උඳුවප් අහස ලලනා වෙස්ගෙන ඇතුවා වාගෙයි. මන්දාරම හාත්පස පැතිර යන්නේ වහින්නට ඔන්න මෙන්න බවක් හඟවමිනි. පොද වැස්සකට පස්සේ නිකිණි අහස වාගේ ආලෝකමත් වෙයි. හිටි හැටියේ මහ වැස්සක් ඇදහැලෙයි. එහෙත් ඉතා ඉක්මනින් එය තුරල් වෙයි. මේ වහා වෙනස්වන උඳුවප් අහසත් එක්ක ජල්ලි අල්ලන්නට සිදුවී‍ෙමන් මම හෙම්බත් වෙමි. තෙත රෙදි ගෙට එන යෑමත් අව්ව පතිතවූ සැණෙහි යළි රෙදි වැල වෙත දිව යෑමත් ආකාසයත් ගෘහණියත් අතරේ කෙළි සෙල්ලමක සිරි දැරුවේය.
මගේ වෙහෙසත් නොරිස්සුමත් තුනී කර දැමුවේ ජානකී අක්කාය. ඇගේ ළෙන්ගතු ස්වරය සැනසුමක්ම විය.
ජානකී කරුණාරත්න මගේ ආදරණීය පාඨකයන් අතුරින් අයකු පමණක් නොවේ. නිබඳ මා අමතන මගේ දුක සැප සොයන මේ සංවේදී හා කාරුණික යෙහෙළිය හෙළිකළ පුවතද සැබැවින්ම අරුත්බර විය.
ශ්‍රී ලංකාවේ බන්ධනාගාර තුළ වන තදබදය පිළිබඳව මැසිවිලි නැ‍ඟෙන අතරේ පුස්තකාලයක් ආරම්භ කිරීම පිළිබඳ පුවත අස්වැසිල්ලක් නොවේද? පොතපත ඥානය පමණක් නොව දයාව සහ කරුණාව ද වඩවාලයි. සවන්දීමට මෙන්ම උපේක්ෂාසහගත වීමටද අප පුරුදු පුහුණු කරවයි.
54A පොල්වත්ත ග්‍රාමනිලධාරි වසමේ යුනයිටඩ් යෞවන සමාජ පුස්තකාලය වෙනුවෙන් වෙහෙසෙන්නන් අතරේ ග්‍රාම නිලධාරි දුමිඳු සුදර්ශන, සභාපති මනෝජ් ධනුක, ලේකම් පසිඳු සචින් මෙන්ම මැල්ලවගෙදර ජානකී කරුණාරත්න ද මහත් භක්ත්‍යාදරයෙන් සඳහන් කළ යුතුයි.
තරුණ සේවා සභාවද මේ යුනයිටඩ් යෞවන සමාජ පුස්තකාලය සඳහා ලබාදුන් මුදල් පරිත්‍යාගය පිළිබඳව ජානකී අක්කා මහත් කෘතවේදී සිතින් සිහිපත් කළාය.
මාහිංගමුව සේවා පියස අසල ඉදිකළ යුනයිටඩ් යෞවන සමාජ පුස්තකාලයට පොත්පත් පරිත්‍යාග කරන්නැයි ජානකී අක්කා ඉල්ලා සිටියේ මහත් උවමනාවෙනි.
යුනයිටඩ් යෞවන සමාජ පුස්තකාලය, මාහිංගමුව, වැල්ලවගෙදර යන ලිපිනයට පොතක් යවන්නට තරම් කාරුණික වන්නේ නම් එය පොත් කියවීමේ පිපාසයෙන් පෙළෙන බොහෝදෙනකු‍න්හට සිහිලැල් දිය දෝතක් වනවා නො අනුමානයි.
076 8517629 හා 077 2112951 දුරකතන අංකයන්ට ඇමතීමෙන් යුනයිටඩ් යෞවන සමාජයේ සභාපති සහ ලේකම් ලෙස කටයුතු කරන මනෝජ් ධනුක ද පසිඳු සමින්ද ද සම්බන්ධ කර ගනිමින් මේ සත්කාර්යයට දායක වන්නයි ඉල්ලා සිටිමි.
අපරාධ ආදියෙන් අඩුවක් නැති අපේ රටට මෙවන් පුස්තකාල වැඩි වැඩියෙන් උවමනා කෙරේ. නෙත් පිටු අතරේ අජීවී අකුරු සජීවී මනුෂ්‍ය චරිත අපට මුණගස්වන අත‍රම ජීවිතයේදී ලෝකයේද හරස්කඩක් අපූරු අන්දමින් මවාපායි. ඉතිං මේ අභිනවයෙන් ඉදිකළ පුස්තකාලයට පොතක් පරිත්‍යාග කිරීමෙන් වචනයෙන් කියා ලියා නිම කළ නොහෙන තරමේ කුසල් සම්භාරයක් රැස්කරගන්නා වග අමුතුවෙන් කිවයුතු ද? මානව යහගුණය හා පොතපත එකට බැඳී නැද්ද...? ඔව් සත්තකින්ම!
ශාන්ති දිසානායක