චිතගොං ප්‍රදේශයේදී ඇති වූ සිදුවීම්වලින් 9 දෙනකු ජීවිතක්ෂයට පත්වූ බව පොලිස් වාර්තාවල සඳහන් විය. බංග්ලාදේශ ජාතික පක්ෂ (BNP) හා විපක්ෂයේ ජාතික එක්සත් පෙරමුණට එරෙහිව හිංසාකාරී ක්‍රියා සිදු වූ බවට මානව හිමිකම් කණ්ඩායම් චෝදනා නගති. මාධ්‍ය නිදහසටද බලපෑම් එල්ල වූ බව තවත් චෝදනාවකි.

බංග්ලාදේශ පාර්ලිමේන්තු මැතිවරණයෙන් අගමැති ෂීක් හසීනාගේ පක්ෂය වන අවාමි ලීගය ප්‍රමුඛ සන්ධානය විශිෂ්ට ලෙස ජයග්‍රහණය කළේය. මැතිවරණ කොමිසම ප්‍රකාශයට පත් කළ නිල ප්‍රතිඵලයට අනුව ඡන්දයෙන් තෝරාගන්නා මන්ත්‍රීන් 300 දෙනාගෙන් 288 දෙනකුම තේරී පත්ව සිටින්නේ එම සන්ධානයෙනි. ප්‍රධාන විපක්ෂය වන, හිටපු අගමැතිනිය බෙගම් ඛලීඩා ෂියාගේ නායකත්වය යටතේ ඇති ජාතික පක්ෂය ලබාගෙන ඇත්තේ ආසන 7ක් පමණි. පාර්ලිමේන්තුවේ සමස්ත ආසන සංඛ්‍යාව 350ක් වන අතර ඉන් 50ක් කාන්තා නියෝජනය සඳහා වෙන්ව ඇත. ආණ්ඩු බලය පිහිටුවීම සඳහා දිනාගත යුතු ආසන සංඛ්‍යාව 151කි. එම අවමයට වඩා 100 කටත් වැඩි ආසන සංඛ්‍යාවක් දිනාගැනීමට අවාමි ලීගය ප්‍රමුඛ සන්ධානය සමත්ව සිටී.

නිල ප්‍රතිඵලය ප්‍රකාශයට පත්කරමින් මැතිවරණ කොමිෂන් ලේකම් කාර්යාලයේ ලේකම් උදීන් අහමඩ් අවාමි ලීගයට සිය සුබපැතුම් එක් කළේය. ජාතික පක්ෂයේ නායකත්වයෙන් යුතු විපක්ෂ දේශපාලන පක්ෂ මෙම ප්‍රතිඵලය පිළිනොගන්නා බව කියා සිටී. මැතිවරණය නිදහස් හා සාධාරණ එකක් නොවූ බව ඔවුන්ගේ අදහසය. එය යළි පැවැත්විය යුතු බවට විපක්ෂය හඬ නැඟුවද නැවත මැතිවරණය පැවැත්වෙන්නේ නැතැයි අගමැතිනිය පවසා තිබිණි.

විපක්ෂ චෝදනා

මිලියන 160ක ජනගහනයකින් සමන්විත මුස්ලිම් බහුතරයක් සිටින දකුණු ආසියාතික රාජ්‍යයක් වන බංග්ලාදේශයේ අගමැති ධුරය සඳහා ෂීක් හසීනා මෙවර තේරීපත්වන්නේ සිව්වැනිවතාවටය. මෙම මැතිවරණය පැවැත්වුණේ අගමැතිනියගේ ප්‍රධාන ප්‍රතිවාදනිය වන 17 අවුරුදු සිරදඬුවමක් බුක්තිවිඳිමින් ඇති පසුබිමකය. එසේම මෙය විපක්ෂ ප්‍රබලයන් 50 කට ආසන්න සංඛ්‍යාවකට මැතිවරණයට තරග කළ නොහැකි පසුබිමක් නිර්මාණය වී තිබියදී පැවැති මැතිවරණයක් බවට ද විපක්ෂ දේශපාලන පක්ෂ චෝදනා කරති. විපක්ෂ ක්‍රියාකාරීන් දහස් ගණනක් පූර්ව මැතිවරණ සමය තුළ අත්අඩංගුවට පත්වූ බවද වාර්තා විය. මැතිවරණ ප්‍රචණ්ඩ ක්‍රියා හේතුවෙන් 17 දෙනකු පමණ මියගොස් තිබිණි.

බංග්ලාදේශ ජාතික පක්ෂයේ (BNP) මහලේකම් සයදි මුවාසිම් හුසේන් අලාල් මැතිවරණය ‘විහිළුවක්’ බව කියා සිටිද්දී අවාමි ලීගයේ (AL) මහලේකම් මහබුබුල් අලාම් හනීෆ් කියා සිටින්නේ මැතිවරණය සතුටුදායක අන්දමින් පැවැත්වුණු බවය.

ඉකුත් ඉරිදා පැවැති මෙම මැතිවරණය එරට මැතිවරණ ඉතිහාසයේ 11 වැනි මහමැතිවරණයයි. මිලියන 104ක ඡන්ද දායක සංඛ්‍යාවක් එහිදී ඡන්දය ප්‍රකාශ කිරීමට සුදුසුකම් ලබා සිටියහ.

පිටපිටම තුන්වැනිවතාවටත් අගමැති ධුරයට පත්ව සිටින ෂීක් හසීනාට රුසියානු ජනාධිපති ව්ලැද්මීර් පුටින් ද සුබපැතුම් පණිවිඩයක් එවා තිබේ. ඇය එරටට ලබාදෙන නායකත්වය පිළිබඳ සතුට පළකර තිබූ ඔහු සාමය හා සමෘද්ධිය ඉදිරියට ගෙනයාමට හැකිවෙතැයි අපේක්ෂා පළකර තිබිණි.

ඉන්දීය කොන්ග්‍රස් පක්ෂ සභාපතිනි සෝනියා ගාන්ධි මෙන්ම අගමැති නරේන්ද්‍ර මෝදි ද ෂීක් හසීනාට සුබපැතුම් එක්කර තිබේ. මෝදිගේ සුබපැතුම් පණිවිඩයේ, “මෙම ප්‍රතිඵල මඟින් ඔබගේ නායකත්වය යටතේ බංග්ලාදේශය ලබා ඇති දියුණුව පිළිබිඹු වන බව” සඳහන් විය.

ඉරාන ජනාධිපති හසන් රොහානිද ෂීක් හසීනාගේ විශිෂ්ට නායකත්වය ඇගැයීමට ලක්කරමින් සුබපැතුම් එක්කර තිබිණි. චීන ජනාධිපති ෂී ජිංග් පිංග් මෙන්ම අගමැති ලී කකියැන්ද බංග්ලාදේශ අගමැතිනියට සුබපැතූ ලෝක නායකයන් අතර සිටිති. ශ්‍රී ලංකා ජනාධිපති මෛත්‍රීපාල සිරිසේන මහතා මෙන්ම අගමැති රනිල් වික්‍රමසිංහ මහතාද ඇයට සුබපැතුම් එක්කර තිබිණි.

මානව හිමිකම් ප්‍රශ්න

මැතිවරණය වෙනුවෙන් විශාල ලෙස ආරක්ෂක විධිවිධාන යොදා තිබූ අයුරු දැකිය හැකිවිය. 600,000ක පමණ ආරක්ෂක භට පිරිසක් එම රාජකාරි සඳහා යොදවා තිබිණි. එසේ වුවද චිතගොං ප්‍රදේශයේදී ඇතිවූ සිදුවීම්වලින් 9 දෙනකු ජීවිතක්ෂයට පත්වූ බව පොලිස් වාර්තාවල සඳහන් විය.

බංග්ලාදේශ ජාතික පක්ෂ (BNP) හා විපක්ෂයේ ජාතික එක්සත් පෙරමුණට එරෙහිව හිංසාකාරී ක්‍රියා සිදුවූ බවට මානව හිමිකම් කණ්ඩායම් චෝදනා නගති. මාධ්‍ය නිදහසටද බලපෑම් එල්ලවූ බව තවත් චෝදනාවකි. ප්‍රකට ප්‍රවෘත්ති ඡායාරූප ශිල්පියකු වන ෂහිදුල් අලාම්, අල් ජසීරා නාලිකාව සමඟ පැවැති සම්මුඛ සාකච්ඡාවකදී ආණ්ඩුව විවේචනය කළ බවට චෝදනා නඟමින් අත්අඩංගුවට ගැනීමද මේ විවේචන අතර තිබේ. මාස 4කට පසු ඉකුත් නොවැම්බර් මාසයේදී ඔහු නිදහස් කෙරිණි.

“මැතිවරණ අක්‍රමිකතා” සිදුවූ බවට අසත්‍ය ප්‍රවෘත්ති වාර්තා කළේය යන චෝදනාව මත ඩකා ට්‍රිබියුන් පුවත්පතේ මාධ්‍යවේදියකු වන හෙදායත් හුසේන් මොල, පොලිසිය විසින් අත්අඩංගුවට ගෙන තිබේ. ඔහුගේ වාර්තාවේ දකුණු කුලානා ප්‍රදේශයේ ඡන්ද මධ්‍යස්ථානයක ලියාපදිංචි ඡන්ද දායක සංඛ්‍යාවට වඩා ඡන්ද 22419ක් ප්‍රකාශ වී තිබූ බව සඳහන් විනැයි පවසන පොලිසිය එය අසත්‍ය පුවතක් බවද ඇත්ත වශයෙන්ම එහි ප්‍රකාශ වී තිබුණේ ලියාපදිංචි ඡන්ද දායක සංඛ්‍යාවෙන් 80%ක් බවද කියා සිටී. ඉකුත් වසරේදී සම්මතවූ නව නීතිවලට අනුව මෙවැනි වරදකදී 14 අවුරුදු සිර දඬුවමක් නියමවිය හැකිය. තවත් මාධ්‍යවේදියකුගෙන් ප්‍රශ්න කිරීමට අවශ්‍ය කර ඇතැයි පොලිසිය සඳහන් කර ඇත.

යුරෝපා සංගමය හා අමෙරිකාව හිංසාකාරී සිද්ධීන් පිළිබඳ පරීක්ෂණ කරන ලෙස මැතිවරණ කොමිෂමෙන් ඉල්ලා ඇතැයි මාධ්‍ය වාර්තා කර තිබිණි. කෙසේ වුවද මැතිවරණය සම්බන්ධයෙන් එල්ලවන චෝදනා අගමැතිනි ෂීන් හසීනා ප්‍රතික්ෂේප කරයි. විපක්ෂ දේශපාලන පක්ෂ ඉල්ලා සිටින අන්දමට බාරකාර රජයක් යටතේ යළි මැතිවරණයක් පැවැත්වීමේ කිසිදු අවශ්‍යතාවක් නැති බව ඇය කියා සිටී. 98% තරම් අතිවිශාල ප්‍රතිශතයක් ලබමින් මැතිවරණය ජයග්‍රහණය කර තිබියදී මැතිවරණය පිළිබඳ එල්ලවන චෝදනා කොපමණ සාධාරණද යන පැනයද මෙහිදී පැන නගී.

විපක්ෂය දුර්වල මට්ටමක තිබියදී මෙම මැතිවරණය පැවැත්වීම පාලක පක්ෂයට වාසිදායක වූ බව පෙනෙන්නට තිබේ. ජාතික පක්ෂයේ නායිකා ඛලීඩා ෂියා සිරභාරයේ සිටින්නේ දේශපාලනිකව එල්ල කළ අසත්‍ය චෝදනා මත බව එම පක්ෂ ආධාරකරුවන්ගේ අදහසය. ඛලීඩා ෂියා 73 වැනි වියේ පසුවේ. ඇයට මැතිවරණ තහනමක් ද පැණවී ඇත.

දස වසරක් තිස්සේ බලයේ සිටින අගමැතිනි ෂීක් හසීනා අධිකාරිවාදී පාලනයක් ගෙනයන බවට ඇතැම් විවේචකයෝ චෝදනා නගති. කෙසේ වුවද ඇයගේ නායකත්වය යටතේ බංග්ලාදේශයේ ආර්ථිකය ඉහළට ඔසොවා තැබීමට හැකිවීම කැපීපෙනෙන කාරණයකි. මේ වනවිට එරට ඇඟලුම් අපනයන කර්මාන්තය දෙවැනි වන්නේ චීනයට පමණි. විශේෂයෙන් ග්‍රාමීය ආර්ථිකය වේගයෙන් වර්ධනය විය. මේ තත්ත්වය මෙවැනි අතිවිශාල ඡන්ද ප්‍රතිශතයක් දිනාගැනීම කෙරෙහි බලපාන්නට ඇතැයි අනුමාන කිරීම අහේතුක නොවේ.

බංග්ලා‍දේශය යනු ලොව 8 වැනි වැඩිම ජනගහනය සහිත රාජ්‍ය යකි. රොහින්ගයා සරණාගත ප්‍රශ්නය හේතුවෙන් මෑත භාගයේදී එරට කෙරෙහි වැඩි ජාත්‍යන්තර අවධානයක් එල්ල විය. අගමැතිනි ෂික් හසීනා බංග්ලාදේශයේ පළමු ජනාධිපතිවරයාගේ දියණියයි. එරට පාකිස්තානයෙන් වෙන්ව නිදහස් රාජ්‍යයක් බවට පත්වූයේ 1971 දීය. ඒ; රුධිරය වැගිරූ අරගලයකින් අනතුරුවය. 1991 වසරේ සිට ප්‍රජාතන්ත්‍රවාදීව ආණ්ඩු පිහිටුවීම සඳහා මැතිවරණ පැවැත්වීම සිදුවිය. එවක් පටන් මාරුවෙන් මාරුවට බලයට පත්වූයේ ජාතික පක්ෂය හා අවාමි ලීගයයි.

ආරම්භයේ පටන්ම මේ මැතිවරණ සමකාමීව පැවැති ඒවා වූයේ නැත. සෑම මැතිවරණයකදීම ප්‍රධාන පක්ෂ දෙකෙහි ආධාරකරුවන් අතර ගැටුම් ඇති විය. මීට පෙර පැවැති මැතිවරණය (2014) ප්‍රධාන විපක්ෂය වර්ජනය කර තිබිණි. එය තනි අශ්වයාගේ රේස් එකක් බවට පත්වූ සෙයක් දිස්විය. එවර අවාමි ලීගය ලබාගත් ආසන සංඛ්‍යාව 214කි. මෙවර එය ඊටත් වඩා ආසන 75කින් පමණ ඉහළ ගියේය.

තනි පක්ෂ බලය

සිව්වැනි වරටත් බංග්ලාදේ‍‍ශයේ බලයට පත්වන ෂීක් හසීනා මෙතෙක් ගෙන ආ ආර්ථික වැඩපිළිවෙළ ඉදිරියට ගෙනයනු ඇත. එය එරටට හිතකර එකක් බව පෙනෙන්නට තිබේ. මෙවර ප්‍රතිඵලයත් සමඟ විපක්ෂය සිටින්නේ අතිශය දුර්වල මට්ටමකය. ඔවුන් ඉදිරිපිට ඇත්තේ අභියෝගාත්මක දේශපාලන ගමනකි. ඛලීඩා ෂියා ඉකුත් වසර මුලදී බන්ධනාගාරගතවීම මෙන්ම බ්‍රිතාන්‍යයේ ජීවත්වූ ඇයගේ පුතු තවත් 19 දෙනකු සමඟ ෂීක් හසීනා ඝාතන ප්‍රයත්නයක් සම්බන්ධයෙන් චෝදනා ලැබ ජීවිතාන්ත සිරදඬුවමකට ලක්වීම වැනි කාරණා ඔවුන්ට අවාසිදායක ලෙස බලපාන බව පැහැදිලිය.

ඇතැම් දේශපාලන විචාරකයන් පෙන්වාදෙන පරිදි බංග්ලාදේශය තනි පක්ෂ ප්‍රජාතන්ත්‍රවාදයක් ඇති රටක් බවට පත්වෙමින් තිබේ. ෂික් හසීනාට මුහුණදීමට විපක්ෂයක් නැති තත්ත්වයක් ඇතිවී තිබේ. සංවර්ධනයේ චක්‍රය ඉහළට නැඹුරු වනවිට ප්‍රජාතන්ත්‍රවාදය පහළට නැඹුරු වෙමින් ඇතිබව ඇතැම් විචාරකයෝ පවසති. එයද ඉහළට හැරවීම අගමැතිනි ෂීක් හසීනාට අභියෝගයක් වනු ඇත.

ධර්ම ශ්‍රී කුරුප්පු මහතා

නවසිය තිස් ගණන්වල මැදභාගයෙන් පටන්ගෙන නවසිය අනූවේ මැද භාගය දක්වා සක්‍රීයව ලේඛකයකු, කවියකු, ගත් කතුවරයකු, පත් කතුවරයකු වශයෙන් විවිධ දස්කම් දැක්වූ ප්‍රවීණ ලේඛක ධර්ම ශ්‍රී කුරුප්පු මහතාගේ ජන්ම ශත සංවත්සරය යෙදුණේ වර්ෂ 2019 ජනවාරි 3 වැනිදාය. වර්ෂ 1919 ජනවාරි 03 වැනිදා රත්නපුරයේ මුද්දුම ග්‍රාමයේ වැදගත් පරම්පරා පවුලක උපන් කුළුදුල් දරුවාට ධර්ම ශ්‍රී නාමය හිමි විය. ගමේ පන්සලෙන් මූලික අධ්‍යාපනය ලද දරුවා රත්නපුරයේ සීවලී විද්‍යාලයෙන් උසස් අධ්‍යාපනය ලබා සිංහල, ඉංග්‍රීසි භාෂාවල මනා පරිචයක් ලැබීය. පූජ්‍ය බලන්ගොඩ ආනන්ද මෛත්‍රී නාහිමියන්ගේ සමීපාශ්‍රය නිසා පාලි සංස්කෘත හා ලතින් භාෂා හැදෑරීමට ද, පැරණි සිංහල සාහිත්‍යය පිළිබඳවද මනා දැනුම් සම්භාරයක් ලබාගන්නට ඔහු සමත් විය.

විදුහලේදී ලබන ලද සාහිත්‍ය පන්නරය අනුව කුරුප්පු ගැටවරයාට එකල පළවෙමින් තිබූ ‘සිංහල ජාතිය’, ‘සිංහල බෞද්ධයා’ පුවත්පත්වලට ලිපි සැපයීමෙන් ලේඛකයකු ලෙසද නමක් දිනා ගැනීමට හැකිවිය.

මෙකල ලන්ඩන් මැට්රිකියුලේෂන් විභාගයෙන්ද සමත්ව ප්‍රාචීන භාෂෝපකාර සමිතියේ විභාග පිළිබඳ සමත්ව සිටි ඔහුට “සිංහල බෞද්ධයා” ප්‍රධාන කතුවර හේමපාල මුනිදාස මහතාගේ ඇසුර නිසා එහි උප කතුවර පදවියක් ද පසුව සිංහල ජාතියේ ප්‍රධාන කතුවර පියදාස සිරිසේන මහතාගේ ඇසුර නිසා එහිද උප කතුවර පදවියක් ද හිමිවිය.

පසුව වර්ෂ 1947 දී, ඩී. බී. ධනපාල මහතා ‘ලංකාදීප’ පුවත්පත ඇරැඹූ පසුව ඔහු එහි කර්තෘ මණ්ඩලයට එකතුවිය. ලංකාදීපයේ ‘ඉරිදා ලංකාදීප’ පත්‍රය පටන් ගත් පසු එහි මුල්ම කවි කොළම වූ ‘සිහිපද බැඳුම්’ ආරම්භ කිරීමෙන් අනතුරුව කවියකු ලෙස ධර්ම ශ්‍රී කුරුප්පු මහතාගේ කීර්තිය දස අත විහිදෙන්නට විය. සමාජයේ හා ජන නායකයන්ගේ තිබෙන වැරදිවලට එල්ල වූ ප්‍රහාර නිසා එය පුවත්පතක මෙතෙක් නුවූ අංගයක් ලෙස ද කියැවුණා.

කලින් කුරුප්පු මහතා සංස්කරණය කළ ‘ඉලක්කය’ සඟරාවේද, මාස ගණනාවක් තිස්සේ පළකළ ‘ඇත්ත’ ටැබ්ලොයිඩ් පත්තරයෙන්ද ඔහු ලද අත්දැකීම් මෙම ‘සිහිපද බැඳුම්’ කවි කොළමෙන් වඩාත් විවරණය කළේය. ලංකාවේ ප්‍රධාන පෙළේ පුවත්පතක ප්‍රථම කවි කොලම වූ නිසාද එය අතිශයින්ම ජනප්‍රිය විය.

මේ අතර බණ්ඩාරනායක අගමැතිතුමා ධර්ම ශ්‍රී කුරුප්පු මහතා කැඳවා ශ්‍රී ලංකා නිදහස් පක්ෂයේ පුවත්පත වූ ‘සිංහලේ’ ප්‍රධාන කර්තෘ පදවිය ඔහුට බාරදුන්නේය. ඉන්පසු රටේ සංවර්ධන කටයුතු හා බණ්ඩාරනායක අගමැතිතුමාගේ සමාජ දර්ශනය පිළිබඳව වඩාත්ම හැඟීම් පාඨකයන් වෙත ලබා දෙන්නට එතුමා කටයුතු කළහ.

වර්ෂ 1959 සැප්තැම්බර් 26 වැනිදා සිදුවූ අගමැති ඝාතනයෙන් පසුව අගමැති වූ දහනායක මහතා තොරතුරු වාර්තා ප්‍රචාරණය සීමාකිරීමට නීති පැනවීමෙන් පසු එකළ පළවූ ‘සිංහලේ’ පත්තරයේ සිරස්තලය වූයේ එවකට රුසියානුවන් හඳට රොකට්ටුවක් යවා පැවැති බැවින් “හ‍ඳේ අඳුරු පැත්තෙන් ඇසෙන වි. වි. බු. බු. ආදි හඬවල්” පිළිබඳව ය. ආණ්ඩුවේ නීති අනුව බණ්ඩාරනායක අග්‍රාමාත්‍යතුමාගේ ඝාතනය පිළිබඳව කටයුතු කළ සැකකරුවන් අල්ලා ගැනීමට මෙම සිංහලේ සිරස්තලය ද බෙහෙවින් උපකාරී විය. එය පසුව මැතිසබයේ දී ද, අධිකරණයේ දී ද කියැවෙන්නට තරම් දුර දිග ගියේ ය. එයින් පසු පත් කතුවරයකු ලෙස කුරුප්පු මහතාගේ දස්කම් හෙළිවිය.

පසුකලෙක සිරිමාවෝ බණ්ඩාරනායක මැතිණිය බලයට පත්වීමෙන් පසු ද ‘සිංහලේ’ කතුවරයා ලෙස කුරප්පු මහතා එතුමියට ද බලවත් ආධාරකාරයකු ද විය. වර්ෂ 1967 දී අගමැතිණියගේ ආරාධනාවෙන් කියුබාවේ නායක පිදෙල් ක්‍රස්තෝගේ 5 වැනි විප්ලවීය සැමරුමට සහභාගි වීමේ අවස්ථාව ධර්ම ශ්‍රී කුරුප්පු මහතා වෙත උදාවිය. එම අවස්ථාවේ දී භාවනා හිදී කුරුප්පු මහතා ඉංග්‍රීසියෙන් රචනා කළ විප්ලවීය කවි පෙළ කොතරම් කාගේත් ගෞරව සම්මානයට පාත්‍රවූයේ ද යත් එය පසුව ස්පාඤ්ඤ භාෂාවට පරිවර්තනය කර ‘එල්මුරාඩො’ නම් එහි දිනපතා පත්‍රයේ මුල් පිටිවේම පළ විය. ඉන් සතුටට පත් රාජ්‍ය නායකයන් මධ්‍යයේ ක්‍රස්තෝතුමා කුරුප්පු මහතාට විප්ලවීය ඇඳුමින් සැරසුනු තම දාරුමය ප්‍රතිමාවක් පිරිනැමීය.

ඉන් අනතුරුව කලෙක ධර්ම ශ්‍රී කුරුප්පු මහතා ‘විනිවිද’ පුවත්පතේ ප්‍රධාන කර්තෘත්වය දැරුවේය. එමෙන්ම 1965දී ශ්‍රී ලංකා ගුවන් විදුලි සංස්ථාවේ ක්‍රියාකාරී අධ්‍යක්ෂවරයා ලෙස පත්ව සිංහල ජනශ්‍රැති, ජනවහර පිළිබඳව තොරතුරු භාෂා සාහිත්‍ය වර්ධනය පිණිස වැඩසටහන් රාශියක් නිෂ්පාදනය කරවීමට ක්‍රියා කළේය.

සංගීතයට විශේෂ ඇල්මක් දැක්වූ හෙතෙම සිංහල සංගීත රටාවක් ඇති කිරීම උදෙසා සමකාලීන පර්යේෂක සංගීතඥයන්ට නිතරම අතහිත දුන්නේය. සීගිරි ගී, කුරුටු ගී ඇසුරෙන් මතුවන සාහිත්‍ය රස රටා ගීත බවට පරිවර්තනය කළේය.

වර්ෂ 1970 පෙබරවාරි 4 වෙනිදා නිදහස් උළෙල නිමිත්තෙන් සංගීතඥයන්, නාට්‍ය ශිල්පීන්ගේ හා ගායක ගායිකාවන්ගේ ද සෙසු වේදිකා හා චිත්‍ර ශිල්පී දස්කම් දක්වන සූරයන්ගේ සහභාගිත්වයෙන් යුතුව අතිවිශාල එළිමහන් රංගපීඨයක දී රඟ දැක්වූ ධර්ම ශ්‍රී කුරුප්පු මහතාගේ ‘මහවැලි ගීත නාටකය’ එතෙක් පැවැත්වූ සුවිශේෂ රංගනයක් ද විය. එය දැක ගත් ආතර් සී ක්ලාක් මහතාගේ පැසසුමට ද ලක් විය. එහි පැවැති නයනානන්දනිය බවින් මන්මත් වුණු විදේශීය වාර්තාකරුවන් තමන්ගේ රූපවාහිනී කැමරාවලට හසු කරගත්හ. පසුව ඔවුන් සිය රටවලට ගොස් ඒවා ප්‍රචාරය කරන ලද බව පසුව ආරංචි විය. එකල අපේ රටේ රූපවාහිනී ප්‍රචාරයන් තිබුණානම් අනාගතයේ ඇත්තන්ට ද එය ඉතිරිවන්නට ද ඉඩ තිබිණ.

මෙසේම සීගිරි ගී පිළිබඳව ද ධර්ම ශ්‍රී කුරුප්පු මහතා කළ පර්යේෂණ ද දැන් ඉතිහාසයට ද එක් වී හමාරය. වර්ෂ 1968 දී ගුවන් විදුලියේ පැවති ‘ජාතික ප්‍රබෝදය’ වැඩසටහන් මාල‍ාවෙන් මෙවැනි කටයුතු කළ අයගේ අගය ද මනා ලෙස විදාහ දැක්වින. ප්‍රබුද්ධ ගායක ශිල්පින් මගින් අපේ උරුමය තව තවත් ලෝකය වෙත ප්‍රදානය කිරීමේ අගය ද එකල ගුවන් විදුලිය මගින් මනා ලෙස හුවා දැක්වීමට ද ධර්ම ශ්‍රී කුරුප්පු මහතාණෝ කටයුතු කළහ.

අමරඟන, ප්‍රේමශිඛා, නවයුගය, ගුත්තිල විත්ති, උඩරට මැණිකේ නවකතාවන්ද සිනමාලෝකනය, බණ්ඩාරනායක චරිතය ද, සීගිරි සින්දු, සීගිරි හස්න ග්‍රන්ථයන්ද ධර්ම ශ්‍රී කුරුප්පු මහතා ලියූ ග්‍රන්ථ අතර වෙයි. මෙසේ දශක ගණනක් තිස්සේ පුවත්පත් කලාවට, සිංහල භාෂාවට, සිංහල සාහිත්‍යයට හා පොදු පාඨක ජනතාවට ද විශිෂ්ට සේවාවක් සැලසූ ධර්ම ශ්‍රී කුරුප්පු මහතාණෝ වර්ෂ අවුරුදු 78ක් ආයුෂ විඳ වර්ෂ 1997 අගෝස්තු 18 වැනි දින අභාවප්‍රාප්ත වූහ.

එතුමා එසේ අභාවප්‍රාප්ත වුව ද එතුමා ලියූ ග්‍රන්ථ මගින් ද ලියූ කාව්‍ය රචනා හා ගීතවලින් ද ධර්ම ශ්‍රී කුරුප්පු නාමය දිගු කල් බැබළෙන බව කිව හැකිය.

සෝමසිරි කස්තුරිආරච්චි

සාදයේ ප්‍රධාන සත්කාරකවරයා වූ එමීර් යසීර් හබීබ් ලෙෆ්ට් හෑන්ඩ් මහේශාක්‍ය ලීලාවෙන් සුඛෝපභෝගී ලිමෝසීන් රථයකින් නෞකාව නැංගුරම්ලා තිබුණු ජැටියට ආවේ පරිවාර ජනයා හා හැඩිදැඩි පෙනුමැති ශරීර ආරක්ෂකයන් දෙදෙනකුද පිරිවරාගෙනය. නෞකාව කරා දිවෙන ජැටිය ඔස්සේ ඔහු පිරිවරත් සමඟ ගාම්භීර ලෙස ඇවිද යද්දී අරාබි එමිර්වරයකු දැක ගැනීමට දෙපස රැස්කමින් සිටි පිරිසට අතවනා ආචාර කිරීමට අමතක කළේද නැත. පිරිවර පිටුපසින්ම ආවේ වෙයින්බර්ග් හා ඇමරොසෝය.

බුමුතුරුණු පිරිසුදු කරන වාෂ්ප යන්ත්‍රවලින් පිරිසුදු කෙරුණු නෞකා රාජයා උත්සව සිරියෙන් බැබළෙමින් තිබිණි. යසීර් පිරිවර සමඟ නැව් තට්ටුවට ගොඩවෙද්දී, අලුත් සුවඳ විහිදුවන කිරි සුදු නිල ඇඳුම්වලින් සැරසුණු කපිතන්වරයා ඇතුළු නාවික කාර්ය මණ්ඩලය ලෙස වෙස්වළා ගත් එෆ්.බී.අයි. නිලධාරීන් ගෞරව සම්ප්‍රයුක්තව එකත්පස්ව නැඟී සිටියේ කලකට පසු දුටු සිය ප්‍රධානියා පිළිගැනීමටය. ඒ වන විට ආරාධිතයින් සියල්ලෝම පැමිණ සිටියහ. අඩුවට සිටියේ එමීර් පමණි. ඒ අඩුව සම්පූර්ණ වීමත් සමඟ කාගේත් සතුටු සිනා හඬ මැද සාදය ඇරඹූණි. එරිචෙට්ටිගේ හා ඔහුගේ මිත්‍රයාගේ අනුග්‍රහයෙන් සපයා තිබුණු මිල අධික මත්පැන් හා ආහාරවලින් පිරිසට සංග්‍රහ කිරීමට ටයි කෝට්වලින් සැරසුණු වේටර්වරු නැව් තට්ටුව මත ඔබ මොබ ගියහ. වේටර්වරුන් සඳහා අනුග්‍රහය සැපයුණේද නගරාධිපතිවරයාගෙනි. ඒ සියල්ල අතර නෞකා සාදයේ අංක එකේ රස මසවුල වූයේ කාර්පෙන්ටියර්ගේ අරුම පුදුම දෙමුහුන් ගොන්-මී හරක් මස්ය. සද්දන්ත ජෝර්ජ්ද චිවාස් රීගල් බෝතල් අමතක කර තිබුණේ නැත. ආරාධිතයින්ගේ වැඩිම ඉල්ලුම තිබුණේද ඒවාටය.

නැවේ සඳළුතලයේ සිට වෙයින්බර්ග් පහළ රැස්ව සිටින පිරිස දෙස එබී බැලූවේ සෑහීමට පත් සිතකිනි. පැමිණෙන ආරාධිතයින් පිළිගෙන එමීර්වරයා වෙත ගෙන ගොස් හඳුන්වාදීමේ වගකීම පැවරී තිබුණේ ඇමරොසෝටය. පාරිම්පරික කිණිස්ස යසීර් විසින් එරිචෙට්ටි වෙත පිරිනමද්දී ඔහුගේ දෑස් කඳුළින් දිලිසුණේ ප්‍රීතියටද නැතිනම් අවස්ථාවේ සංවේදිකම නිසාද කියා දන්නේ නගරාධිපතිම පමණි. එමිර්ට ස්තූති කිරීම සඳහා කලින් පුරුදුව පැමිණි කෙටි හරබර දේශනය හේ අවසන් කළේ හැඬුම් ස්වරය නිසා වචනද පටලවා ගනිමිනි.

“මිත්‍රත්වය තමයි හැමදේම. ඊට වඩා දෙයක් තවත් නැහැ.“ එරිචෙට්ටි නැවත නැවත එයම කියද්දී ඔහු අවස්ථාවේ අතිශය සංවේදීව සිටින බව තේරුම් ගැනීමට කාටත් අසීරුවුණේ නැත. ඉන්පසුව එළැඹූණේ ඡායාරූප ගැනීමේ අදියරයි. සෙනේට් සභික විලියම්ස්, නගරාධිපති එරිචේට්ටි, කාර්පෙන්ටියර්, ටෝර්කැසියෝ ඇතුළු වැදගත් අමුත්තන් සියලුදෙනාම එමීර් සමඟ ඡායාරූපයකට පෙනී සිටීමට වලිකෑවේ එය ගෞරවයක් ලෙස සැලකූ බැවිනි. යසීර්ගේ ඡායාරූප ශිල්පියාගේ කැමරාවට ඉස්පාසුවක් තිබුණේ නැත. ඇමරිකාවේ නම ගිය දූෂිතයින්, මැරවරයන් සමඟ යසීර් එකට හිඳ දිගට හරහට ඡායාරූප ගනිද්දී, ඇබ්ස්කැම් මෙහෙයුම අධිකරණයට ගෙනයාමට අවශ්‍ය සාක්ෂි මදි නොකියන්නට ගොඩගැසෙන්නට විය. ඡායාරූප ගැනීමේ කලබගෑනිය අවසන් වූ සැණින් සියලුදෙනාගෙන්ම සමුගෙන යසීර් කුටියට වැදුණේ නියම රාජකීයකුගේ සම්මත අකුරටම පිළිපදින බව කාටත් නොකියා කියමිනි. සමුදීමට පෙර, කා බී හොඳින් විනෝදවන ලෙස සියලු දෙනාගෙන්ම ඉල්ලා සිටීමටත් හේ අමතක කළේ නැත.

එය අමුතුවෙන් ඉල්ලා සිටීමට ද අවශ්‍ය වූයේ නැත. ලෙෆ්ට් හෑන්ඩ් සාදයට පැමිණීමට ආරාධනා ලැබූවන් සියල්ලන්ම කා බී විනෝදවීමට උපන් හපනූන්ය. හොර මගඩි කෛරාටිකම්වලට දැක්වූ දක්ෂතාව හැරුණු විට එදා පැමිණ සිටි සියල්ලන් පොදුවේ දක්ෂ වූ අනෙක් එකම කාරණය කා බී ජොලි කිරීමය. ඒ සඳහා ඕනෑ තරම් සුපිරි පන්තියේ ආහාර, මධුවිත හා මත්පැන් එරිචෙට්ටි විසින් සපයා දී තිබිණි. විනෝදවන අතරම මොනයම් වෙට්ටුවක් දමා හෝ තම තමන්ගේ මඩිය තරකර ගැනීමටත් කිසිවකු දෙවරක් සිතුවේ නැත. කොටින්ම එහි සිටි සියලුදෙනාම පොර ඇල්ලුවේ එකිනෙකාවම රවටා ගැනිමටය.

මුලු සාදය පුරාම අසරණ මැකාතිට මයාමි නීතිඥ බෙන් කොහෙන්ගෙන් ගැලවීමක් තිබුණේ නැත. කමකට නැති කුණු ලෝභයකු බවට ආඩපාලි කියමින් නීතිඥයා මැකාති පිටුපස වැටී සිටියේ සිය හොර තැන්පතු සහතික තොගය යළි ලබාදෙන ලෙස කරදර කරමිනි. දෙදෙනාගේ බහින්බස්වීම ගුටිබැට හුවමාරුවකින් කෙළවර නොවුණේ සෙස්සන්ගේ මැදිහත්වීම නිසාය. ඒ අතර සද්දන්ත බෝම්බ ජෝර්ජ්ට වුවමනා වී තිබුණේ මත්ද්‍රව්‍ය ප්‍රවාහනයට යසීර්ගේ නැව සතියකට කුලියට ගැනීමටය. සාදයට පැමිණ සිටි සද්දන්ත ජෝර්ජ් ශරීර ආරක්ෂකයකු සහ ව්‍යාපාරික සහකරු සමඟ කෙළින්ම ගියේ සෙනේටර් විලියම්ස් සමීපයටය. හොඳින් දන්නා හඳුනන අයකු බව කාටත් හැඟෙන පරිදි සෙනේට්වරයාට අතට අතදී ආචාර සමාචාර කළ සද්දන්ත ජෝර්ජ් යන්තමින් හෝ දන්නා බවක් සෙනේට්වරයාගේ අංග ලක්ෂණවලින් පළවූයේ නැත. පිරිස ඉදිරියේ පසුබා යාමට අකමැති වූ ජෝර්ජ් අතීත කතාවක් ගෙන හැර පාමින් සෙනේට්ර්වරයාගේ මතකය අලුත් කිරීමට සෑහෙන අරගලයක් කළේ කාට කාටත් ඔහුගේ පුරාජේරුවල ඇත්ත හොඳහැටි පැහැදිලි කරමිනි.

“ඇයි සෙනේට්තුමෝ මාව මතක නැද්ද? මමනේ නිව් ජර්සිවල ඉන්න කාලේ ඔබතුමාගේ ගෙදරටම කාර් එකක් ගෙනල්ලා ගොඩබාලා දුන්නේ ? ඒ කාලේ ඔබතුමා කාර් එක ගත්ත තැන බඩු ඩිලිවරි කරන වැඩ භාරව හිටියේ මමනේ.“

නීතිවිරෝධී මත්‍ද්‍රව්‍ය ආනයනය කරන්නකු වූ ෆ්ලෝරිඩා නුවර තවත් නීතිඥයකුට අවශ්‍යව තිබුණේ සෙනේට්වරයා ලවා කෙසේ හෝ තමන්ගේ ගුවන්යානය නිදහස් කර ගැනීමටය. පොලිසිය කළ වැටලීමකදි, කොකේන් තොගයක්ද සමඟ අත්අඩංගුවට පත්වූ ගුවන්යානය යළි ලබාගැනීමට ඇමක් ලෙස මෙම සාදය යොදාගැනීමට සිතූ හෙතෙම එදින නැව් තට්ටුව පුරා කරක්ගැසුවේ පැමිණි සිටි කාට වුවත්, නොමිලේ කොකේන් වඩියක් උරන්නට අවස්ථාව ලබාදෙමිනි.

“එදා අපේ පාටියට හතළිහක් විතර ඇවිල්ලා හිටියා. ඔක්කොමලා හොරු, තක්කඩි, මැරවරයෝ. ඒ ඔක්කොටම තිබුණේ එකම අරමුණක්. කොහොම හරි, කාවහරි ලව්වා තමන්ගේ ඩීල් එකක් කරවාගන්න. ‘ආදර බෝට්ටු‘ කියලා ජාතියක් ටී.වී. එකේ පෙන්නනවා මම දැකලා තියෙනවා. ඒක ආදර බෝට්ටුව නම් මේක ‘රැවටිලි බෝට්ටුව‘. ඒක හරියට හොර තක්කඩියන්ගේ වාර්ෂික සමුළුවක් වගේ. හැමෝම ට්‍රයි කළේ හැමෝම රවට්ටන්න. ඒ කියන්නේ අපිත් එක්කම. “

වෙයින්බර්ග් කියන්නේ අතීත මතකවල මිහිරියාවේ ගැලෙමිනි. සාදය අහවර වීමෙන් පසු රාත්‍රියේදීත් වෙයින්බර්ග් සහ ඇමරෝසෝ නිකම් සිටියේ නැත. එරිචෙට්ටිගේ හෝටල් කාමරයට රැස්වූ දෙදෙනා උත්සාහ කළේ එරිචෙට්ටි ලවා කෙසේ හෝ කෙනත් මැක්ඩොනල්ඩ්ව අල්ලස් ලබාගැනීමට ලෝන්ග් අයිලන්ඩ් කාර්යාලය වෙත ගෙන්වා ගැනීමටය. සාදයේ උත්කර්ෂවත්බවෙන් හා අරාබි පාරම්පරික උරුමයක හිමිකරු වීමේ ප්‍රහර්ශයෙන් මත්වී සිටි නගරාධිපතිවරයා ඊට පොළඹවා ගැනීම එතරම් අසීරු වූයේ නැත. කෙසේවුව මුදල් ලබාදිය යුත්තේ තමාගේ අතට යන ස්ථාවරය වෙනස් කිරීමට එරිචෙට්ටි එකවරම කැමති වුණේ නැත. හෝටල් කාමරයේ සිටම මැක්ඩොනල්ඩ්ව ඇමතූ එරිචෙට්ටි ලෝන්ග් අයිලන්ඩ් කාර්යාලයේ හමුවක් සඳහා දිනයක් යොදා ගත්තේය.

සියල්ලට අමතරව සෙනේට් සභික විලියම්ස්ගේ හොර වැඩ එළිකරන හඬ පටයක්ද සාදය අවසන් වන විට වෙයින්බර්ග් සතුවිය. ටයිටේනියම් පතල කෙරෙහි තමා උනන්දුවන බව සෙනේට්වරයා පැහැදිලිවම එහි සඳහන් කළත්, ඒ පීළිබඳ කරුණු කාරණාවලදී වෙයින්බර්ග් හා ඇමරොසෝ ගනුදෙනු කළ යුත්තේ නීතිඥ ෆෙයින්බර්ග් සමඟ බවද ඔහු අවධාරණය කර තිබිණි. නමුත් සෙනේට්වරයාගේ වෘක හම ගැලවීමට එම හඬපටය ප්‍රමාණවත් බව කාටත් පැහැදිලිවම පෙනුණි.

පසුදින වන විට සාදයට පැමිණි අවසන් අමුත්තාත් පිටත්කර හැරීමට ගුවන්යානයට පටවා අවසන්ව තිබිණි. සාදයෙන් ලද ප්‍රගතියේ සංකේතාත්මක සාක්ෂි ලෙස ටොර්කැසියෝ, කාර්පෙන්ටියර්, ෆෙයින්බර්ග් හා සෙනේට් සභික විලියම්ස් වැනි ප්‍රධාන පෙළේ දූෂිතයින් රැසකගේ හොර එළි කරන හඬපට රාශියක් අබ්දුල් පාර්ශ්වයේ සන්තකයට පත්ව තිබිණි. හඬපට ඇල්බමයේ කවරයේ කතාව ලෙස අංක එකට වැජඹුණේ එරිචේට්ටි හා මැක්ඩොනල්ඩ්ය. සද්දන්ත ජෝර්ජ් ඇතුළු තවත් ආරාධිතයින් කිහිපදෙනකුගෙන්ම තවත් හොර තැන්පතු සහතික යථා කාලයේදී ලැබෙන්නට නියමිතව තිබිණි. එපමණක් නොව අනාගත මෙහෙයුම් සඳහා බිය සැක නැතිව තුරුම්පුවක් ලෙස යොදාගත හැකි විශ්වාසනීය අරාබි එමීර්වරයකුද මෙම සාදය නිසා ඇබ්ස්කැම් පාර්ශ්වයට ලැබී තිබිණි. එසේම ඇබ්ස්කැම් දැලට හසූවුවන් අතර ඇමරොසෝටද හොඳ පිළිගැනීමක් ඇති බැව් මෙම සාදයෙන් තහවුරු විය. නමුත් මෙම සාදයෙන් ලද වැදගත්ම ප්‍රතිඵලය, සමස්ත ඇබ්ස්කැම් මෙහෙයුමේ විශ්වාසනීයත්වය තහවුරු වීම බව සියල්ලන්ගේම ඒකමතික තීරණය විය.

එෆ්. බී. අයි. වොෂින්ටන් මූලස්ථානයේ ලොකු පුටු හොබවන්නන්ගේ පිළිගැනීම වී තිබුණේ ද එයමය. ජෝන් ගුඩ් විසින් සකස් කර යැවුණු වාර්තා හා හඬපට විශ්ලේශනය කළ බියුරෝවෙන් සාදයට සම්මාදම් වූ සියල්ලන් වෙත සුබ පතමින් ටෙලෙක්ස් පණිවුඩයක් ලැබීණි. සාදය පවත්වනවාට කෙරෙම් විරෝධයක් එල්ලකළාද යන වගක් වත් මතක නැති ගාණට එවා තිබුණු එම සුභාශිංසනයෙන් තහවුරු කෙරුණේ, බියුරෝවේ වගකිව යුත්තන්ගේ පෘථග්ජන ගතියකි. ඒ මුලින් එපා කිව් දෙයක් පසුව සාර්ථක ප්‍රතිඵල ලබාදුන් විට එම සාර්ථකත්වයට හිමිකම් කියන්නට, කලින් විරෝධය දැක්වූවන් කෙතරම් ආශා කරන්නේද යන්නයි.

සාදයට පසුව එලැඹූණු සතියේ, එනම් මාර්තු 31 වැනිදා, එරිචෙට්ටි නමෝ විත්තියෙන් කැසිනෝ කොමිසමේ කෙනත් මැක්ඩොනලඩ්ව අබ්දුල්ගේ ලෝන්ග් අයිලන්ඩ් කාර්යාලයට රැගෙන ආවේය. ඒ බෝට්ටු සාදය දා වෙයින්බර්ග්ට හා ඇමරොසෝට වූ පොරොන්දු අකුරටම ඉටු කරමිනි. අබ්දුල්ගේ පාර්ශ්වයෙන් හමුවට සහභාගි වූයේ මැකාති පමණි. ජෝන් ජේකබ්ස් හමුව පැවති කාමරයට යාබද කාමරයක සිට සුපුරුදු පරිදි සිදුවන සියල්ල වීඩියෝ කැමරා ආධාරයෙන් සජීවිව නැරඹූවේය . ඒ සඳහා අවශ්‍ය ආම්පන්න අටවා තිබුණේ, මැකාතිගේ මේස ලාච්චුවේය. මැකාතිගේ වගකීම වුණේ ඩොලර් ලක්ෂයේ අල්ලසට කරන්න යන්නේ කුමක්ද කියා මැක්ඩොනල්ඩ්ගෙන් ප්‍රකාශයක් ලබාගැනීමත්, මැක්ඩොල්ඩ් සිය දෑතින්ම අල්ලස ලබාගැනීමට පොළඹවා ගැනීමත්ය. නීතිය ඉදිරියට මැක්ඩොනල්ඩ්ව ගෙනයාමට මෙම දෘශ්‍ය සාක්ෂියම පමණක් වුව ප්‍රමාණවත් බව එවැනි කරුණු සම්බන්ධයෙන් හසළ දැනුමැති ජේකබ්ස්ගේ අදහස විය.

නමුත් එම හමුව කෙළවර වූයේ විනාශයක් කට ළඟටම පැමිණීමෙනි. ඒ මෙවැනි කරුණු සම්බන්ධයෙන් කවදත් ප්‍රකට මැකාතිගේ නොහොබිනා කල්ක්‍රියාව නිසාය. එය ඇබ්ස්කැම් මෙහෙයුමේ මැකාතිගේ භූමිකාවේ අවසානයද සනිටුහන් කළේය. වෙයින්බර්ග්ගේ තර්කය ජයගත්තේය.

රොබට් ඩබ්. ග්‍රීන් විසින් රචනා කළ මෙල්වින්
වෙයින්බර්ග්ගේ චරිතාපදානය ‘ස්ටිං මෑන්‘ කෘතියේ

පරිවර්තනය
රුක්ලන්ති පෙරේරා

හෙට - අල්ලස් මුදලින් සන්තෝසමක්

හික්මීමක් ඇති, යහපත් කල් ක්‍රියාවෙන් යුක්ත පුද්ගලයා සෑම සමාජ ස්ථරයකටම ආදර්ශයකි. වර්තමාන සමාජයේ බොහෝ තරුණ දරුවන්ගේ සිත් තුළ හික්මීමක් නොමැති තත්ත්වයක් දක්නට ලැබේ.බුදු දහමට අනුව හික්මීම පුද්ගලයකුට කොතරම් වැදගත් වන්නේ ද යන්න පිළිබඳව අනුරාධපුරයේ ශ්‍රී ලංකා භික්ෂු විශ්වවිද්‍යාලයේ ප්‍රයෝගික බෞද්ධ අධ්‍යයන අංශ ප්‍රධාන, මල්වතු මහාවිහාරයීය, කාරක සංඝ සභික, ජ්‍යෙෂ්ඨ කථිකාචාර්ය, දර්ශනපති, රාජකීය පණ්ඩිත වැලිවිට සෝරත හිමි සමඟ කළ සාකච්ඡාවකි.

හික්මීමක් සහිත පුද්ගලයා පිළිබඳ බුදුදහමෙහි සඳහන් වන්නේ කුමක් ද?

රූප, වේදනා, සංඤ්ඤා, සංඛාර, විඤ්ඤාණ යන පංචස්කන්ධයෙන් සැදුම්ලත් පුද්ගලයා තුළ ඇස, කන, නාසය, දිව, ශරීරය යන ඉන්ද්‍රිය පහක් තියෙනවා.මෙම ඉන්ද්‍රියන් තුළින් රූප, ශබ්ද, ගන්ධ, රස, ස්පර්ශ යන අරමුණුවලට සිත යොමු වෙනවා.“ඉධ භික්ඛු චක්ඛුනා රූපං දිස්වා න නිමිත්තග්ගාහි හොති නානුඛ්‍යඤ්ජනග්නානි හොති” යන බුදු වදනට අනුව මේ ශාසනයෙහි සිටින භික්ෂුව ඇසින් රූප දැක ඒ පිළිබඳ නිමිති ගන්නේ නෑ. අනු නිමිති ගන්නේ නෑ. අනෙකුත් ඉන්ද්‍රියන් සම්බන්ධයෙන් ද මෙසේමයි. එසේ නිමිති ගතහොත් මනුෂ්‍ය සිත් තුළ උපදින්නේ අකුසල ධර්මයක්. එම නිසා අකුසලයන්ගෙන් සිත ආරක්ෂා කර ගැනීම සඳහා මනා හික්මීමක් ඇති කර ගැනීමට නිතරම වෙහෙසෙනවා. “කායෙන සංවරො සාධු, සාධු වාචාය සංවරො,මනසා සංවරො සාධු, සාධු සබ්බත්ථ සංවරො

සබ්බත්ථ සංවුතො භික්ඛු, සබ්බදුක්ඛා පමුඤ්චති” යනුවෙන් දක්වා ඇති පරිදි ද සිත, කය, වචනය යන දොරටු තුන හික්මවා ගැනීම හා සියලු තැන්හි හික්මීම ඇති භික්ෂුව සියලු කෙලෙසුන්ගෙන් මිදී දුක් කෙළවර කොට නිවන් අවබෝධ කරගත්තාය යනුවෙන් හඳුන්වනවා. එසේම අත් පා සංවර කර ගැනීම, කථා කිරීමේදී මුඛය සංවර කර ගැනීමත්, භික්ෂූන්වහන්සේලා උදෙසා පනවා ඇති සේඛියා ධර්ම හැත්තෑ පහේදී දක්වා ඇති පරිදි සිවුරු පෙරවීම, ගමන් බිමන් යාමේදී දැවුණු ස්වභාවය, වළඳන අවස්ථාවේ අනුගමනය කළයුතු පිළිවෙත් ආදියෙනුත් පුද්ගලයා තුළ මනා හික්මීමක් ඇතිවන බව දක්වා තිබෙනවා. ඒ අනුව බුදුදහමේ මනාව හික්මුණු පුද්ගලයා පිළිබඳව, උගන්වන්නේ සියලු ආකාර‍ෙයන් දැමුණු සිතක් ඇති පුද්ගලයාමයි.

පුද්ගලයකුට යහපත් ජීවිතයක් ගත කිරීම සඳහා හික්මීම කොතරම් දුරට බලපානවාද?

බුදු දහමට අනුව සෑම පුද්ගලයෙක්ම යහපත් කල්ක්‍රියාවෙන් යුත් පුද්ගලයෙක් විය යුතු වනවා. එසේ නොවන විට අවට ලෝකයේ සිටින සියලු දෙනාගේ දෝෂාරෝපණයට, නින්දා අපහාසවලට ඇණුම් බැනුම් හා අපවාදවලට ලක්වන පුද්ගලයෙක් බවට පත්වෙනවා. බුද්ධ කාලයේ පවා භික්ෂූන්වහන‍්සේලා ද බොහෝ අයහපත් ක්‍රියාවන්වල නිරත වෙලා තියෙනවා. ඒ අවස්ථාවන්වලදී මිනිස්සු කිපිලා උස් හඬින් දොස් කියලා ඇතැම් අවස්ථාවන්වලදී ගල්මුල්වලින් පහරදීපු අවස්ථා තිබෙනවා. එබඳු අවස්ථාවන් පදනම් කරගෙන බුදුරජාණන්වහන්සේ නොහික්මුණු මහණුන් හික්මවා ගැනීම සඳහා විනය ශික්ෂාපද පැනවූවා. එයිනුත් නොහික්මුණු පුද්ගලයන් ශාසනයෙන් නෙරපා හැර තිබෙනවා.

පොළොන්නරු, දඹදෙණි යුගවලදී මෙන් ම, මහනුවර යුගයේදී ද ඇති වූ ශාසන විලෝපයන් නිසා භික්ෂූන්වහන්සේලා හික්මවීම සඳහා කතිකාවත් පවා ඇති වී තිබෙනවා. භික්ෂූන් පමණක් නෙමෙයි, ගිහියන් අතර පවා හික්මීමක් නොතිබුණු පුද්ගලයනගේ හික්මීම ඇතිකරලීම සඳහා බුදුරජාණන්වහන්සේ බොහෝ දේශනාවන් සිදුකර තිබෙනවා. අනෙක් කාරණය තමයි බුදුහාමුදුරුවෝ වැඩිපුර දේශනාවන් සිදුකර තිබෙන්නේ භික්ෂූන් උදෙසායි. භික්ෂූන්ගේ හික්මීම සඳහා දේශනා කළ බොහෝ කරුණු අනෙක් සියලු දෙනාගේ යහපත වෙනුවෙන් යොදවාගත හැකි වනවා. උදාහරණයක් ලෙස ගමන් කරනවිට, ඇඳුම් පැළඳුම් අඳින අවස්ථාවලදී භික්ෂූන්ට පනවා ඇති නීති ගිහියන්ට ද අදාළ කර ගන්නට පුළුවන්. ඒ අනුව මෙලොව යහපත ඇති කරලීමත් සසරින් එතෙරවීම දක්වාමත් හික්මීම ඉතා වැදගත් කාරණයක් ලෙස දක්වන්න පුළුවන්.

තමා පරිහරණය කරන ඇඳුම පිළිබඳ ටිකක් හිතන්න, සංස්කෘතිකමය වශයෙන් බෞද්ධයන් වූ අපට නිල ඇඳුමක් තිබෙනවා. පාසල් යන්න, රැකියා ස්ථානයට යන්න, ආගමික ස්ථානයකට යන්න, මළ ගෙදරකට යන්න, මඟුල් ගෙදරකට යන්න වෙන වෙනම ඇඳුම් තියෙනවා. ඒත් මඟුලට යනකොට අඳින ඇඳුමේ වූවමනාව ආගමික ස්ථානයකට යනකොට තියෙන්නේ කීයෙන් කීදෙනාට ද? රැකියාවට යනකොට, පාරේ ගමන් කරනවිට, තමන්ට ඔරොත්තු දෙන්නේ නැති ඇඳුම් කී දෙනෙක් අඳිනවාද? අද එක එක විලාසිතා ඇවිත් තියෙනවා. ඒත් ඇඳුමක් අඳින්නේ තමන්ගේ ලැජ්ජා බිය තියන දේවධර්මය වසා ගැනීමෙන් නම් අද පුද්ගලයා තුළ නැත්තෙත් ඒ දෙයමයි. ඒ නිසා යහපත් දිවි පැවැත්මක් උදෙසා හික්මීම හරිම වැදගත් වෙනවා.

බුදුරජාණන් වහන්සේ ඉතා දරුණු පුද්ගලයන් පවා මැනවින් හික්මවන ලද්දේ ඉවසීම පෙරටුකොටගෙන නේද?

දීඝ නිකායේ උදුම්බරික සූත්‍රයේ බුදුහාමුදුරුවෝ හඳුන්වලා තියෙන්නේ “බුද්ධො සො භගවා බොධාය ධම්මං දෙසෙති, දන්තො සො භගවා දමථාය ධම්මං දෙසෙති, සන්තො සො භගවා සමතාය ධම්මං දෙසෙති, පරිනිබ්බුතො සො භගවා පරිනිබ්බාණාය ධම්මං දෙසෙති” යන්නටයි. ඒ අනුව ධර්මය අවබෝධ කළ බුදුහාමුදුරුවෝ අනෙක් අයට අවබෝධ පිණිස ධර්මය දේශනා කරනවා.

සිත, කය, වචනය යන දොරටු තුනෙන් වගේම, ඉන්ද්‍රියන් ආදීන්ගෙන් දමනය වූ උන්වහන්සේ අනෙක් අය දමනය කිරීම සඳහා ධර්මය දේශනා කරනවා. යෑම් ඊම් ආදී ගමන් විලාසයන්ගෙන් ශාන්තිභාවයට පත්වූ උන්වහන්සේ අන් අයගේ ශාන්ත බව ඇතිකරලීම සඳහා ධර්මය දේශනා කරනවා. ඒ වාගේම තමයි, සසර කෙළෙස්, ගිනි ආදියෙන් පිරිනිවුණු උන්වහන්සේ සියලු සත්ත්වයන්ගේ කෙළෙස් ගිනි නිවීම පිණිස ධර්ම දේශනා කරනවා. මේ සෑම අවස්ථාවකදීම උන්වහන්සේ මනා හික්මීමක් හා ඉවසීමක් සහිතව තමයි ක්‍රියා කර තිබෙන්නේ. බලන්න, සච්චක පරිබ්‍රාජකයා කිසිම හික්මීමක් නැතිව කිසිම ගරු සැලකිල්ලක් නැතිව, බුදුහාමුදුරුවෝ සමඟ වාදවිවාද කරන්න ආවා. වාදයෙන් පැරදුණු සච්චක බුදුන් හමුවේ වැඳ වැටුනා.

ආලවක යක්ෂයා බුදුහාමුදුරුවෝ තමන්ගේ විමානෙට වැඩම කරලා ඉන්නවා දැක්කා. එළියට යන්න, ඇතුළට එන්න ආදී වශයෙන් කියා වෙහෙසෙව්වා. අන්තිමේදී ප්‍රශ්න අහල වෙහෙස කරන්නත් බැලුවා. අංගුලිමාල දරුණු පුද්ගලයෙක්. බුදුහාමුදුරුවන්ට “මුඩු මහන නවතින්න” කියලා බැණ වැදුණා. දරුණුම මාරයා කී සැරයක් බුදු හාමුදුරුවෝ පසුපස්සේ ආවාද? උන්වහන්සේ දසමාරයන් බෝ මැඩදී පරාජය කළා. චිංචිමානවිකාව ජනතාව මැද බුදුහාමුදුරුවන්ට දුෂ්ට වචනයෙන් අපහාස කළා. මේ සියලු අවස්ථාවන්වලදී බුදුහාමුදුරුවෝ මනා හික්මීමක් සහිතව, ශාන්ත වූ විලාසයෙන් මෛත්‍රීසහගත සිතින් මනා ඉවසීමකින් යුක්තව කටයුතු කළ බව සඳහන් වී තිබෙනවා. අනෙක් අයට දමනය කරන්න බැරිවුණු පුද්ගලයන් පමණක් නෙමෙයි නාලාගිරි ඇතා වැනි සත්ත්වයන් පවා බුදුහාමුදුරුවන්ගේ ඉවසීමේ ගුණ මහිමය ඉදිරියේ දැමුණු ආකාරය පැහැදිලියි.

වර්තමාන සමාජයේදී පාසල් අධ්‍යාපනය ලබන දරුවන් පවා හික්මීමක් නැති අය බවට පත්වෙලා සිටිනවා.එසේ විමට හේතුව කුමක් ද ?

පාසල් අධ්‍යාපනය ලබන දරුවන් පමණක් නෙමෙයි, සමාජයේ වෙසෙන බොහෝ පිරිස් අතර කිසිම හික්මීමක් දකින්න ලැබෙන්නේ නැහැ. ඒක අපට පසුගිය කාලේ සිදුවුණු සිදුවීම් එක්ක හොඳින් වැටහුණා සමාජයේ වෙසෙන බොහෝ පිරිස් හැසිරුණේ කොයි විදිහට ද කියලා. දරුවන්ගේ හික්මීම නැති වීමට එකම කාරණයක් බලපාන්නේ නෑ. බොහෝ කාරණා ඉවහල් වී තිබෙනවා. අතීතයේ පාසල් ළමයි යම් මට්ටමකින් හෝ හික්මීමක් ලබාගෙන තිබුණේ විදුහල්පතිතුමාගේ භූමිකාව, ගුරුවරයාගේ මගපෙන්වීම හා නිසි වේලාවේදී දඬුවම් කිරීම ආදී කරුණු නිසයි.

දැන් පාසල් ළමුන් තුළ හික්මීමක් දකින්නට නැත්තේ විදුහල්පතිගේ භූමිකාව මග පෙන්වීම තිබුණත්, පොඩි වරදකටවත්, දරුවන්ට තරවටු කරන්න, දඬුවම් දෙන්න ඔවුන්ට හැකියාවක් නෑ. ළමා අයිතිවාසිකම් වෙනුවෙන් කියල හරි ළමා ගැටලු කියලා හරි මානවහිමිකම් කියල හරි තියෙන ඇතැම් රාජ්‍ය නොවන සංවිධාන මගින් ඇති කරල තියෙන වෙනස නිසා දරුවන් හික්මවන්නට ගුරුවරුන්ට අවස්ථාවක් නෑ. ඉස්සර මවුපියන් දරුවන් පාසලට භාර දෙන්නේ හැදියාවක් ඇති දරුවෙක් ගොඩනගන්නයි.

දැන් සමහර වෙලාවට ඒක වෙනස්. වැරදි කරන දරුවට දඬුවම් කළාම ඉස්සෙල්ලම පොලිසියට, උසාවියට යන්නේ මවුපියන්. පාසල තුළ හෝ පරිබාහිර සමාජය තුළ දරුවා හික්මීමක් නැතිනම් ඊට විදුහල්පතිවරුන්, ගුරුවරුන් හා මවුපියන් වගකිව යුතු වනවා. යහපත් පුරවැසියෙක් නිර්මාණය කිරීමේ වගකීම මේ සියලු දෙනාට තිබෙනවා. පසුගිය කාලයේ බොහෝ සෙයින් පාසල්වල ඇතිවුණු නොමනා ක්‍රියාවන් සමාජ වෙබ් ජාලා තුළ සටහන් වෙලා තිබුණා. ප්‍රේම සබඳතා, මත්ද්‍රව්‍ය භාවිතය වැනි දේ පදනම් කරගෙන ජීවිත හානි පවා සිදු වූ අවස්ථා දැක්කා.

ඇතැම් දරුවන් පාසලෙන් පිටස්තර ලෝකයේ සිටින බොහෝ ජාවාරම්කරුවන්ට හසුවෙනවා. මිල මුදල් බොහෝ සෙයින් වියදම්කරන ජාවරම්කරුවන් තරුණ වයසේ සිටින ගැහැනු, පිරිමි භේදයකින් තොරව අපයෝජන සඳහා යොදා ගන්නවා. මුදල් පසුපස හඹායන ඔවුන් තමන්ගේ තත්ත්වය පිළිබඳ සිතන්නේ අඩුවෙනුයි. මෙවැනි සිදුවීම්වලදී අවසානයේ ඇනුම් බැනුම් අසන්නේ දරුවා ගිය පාසල සහ මවුපියන්.

ඇත්තෙන්ම දරුවා සමාජයේ ඇසුරු කරන පුද්ගලයන් යන එන තැන් පිළිබඳ මවුපියන් මීට වඩා සෙවිල්ලෙන් සිටිය යුතු වනවා. පාසල් සමය තුළ දරුවා යථා මට්ටමකට හික්මිලා සිටියත් රාත්‍රී වෙනකම් පැවැත්වෙන බාහිර පන්ති නිසා ඇතැම් ළමුන් නොමනා හැසිරීම්වලට යොමු වෙලා තියෙනවා. අද ළමයාට ළමා කාල‍යක් නෑ. පළමු පන්තියේ ඉඳන් උසස් පෙළ දක්වාම ළමුනට බාහිර පන්ති. මේ තත්ත්වය නිසා ළමයාට, මානසික සැනසීමක් නැහැ. පාසල තුළ හික්මීම තිබුණත් ඇතැම් බාහිර පන්ති තුළදී ළමුන්ගේ හික්මීමක් දකින්න ලැබෙන්නේ නෑ. මේ නොයෙක් හේතු නිසා අද පාසල් අධ්‍යාපනය ලබන ළමයා පවා හික්මීමකින් තොර වෙලා ඉන්නවා. එම නිසා වගකිවයුතු සෑම කෙනෙක්ම මේ පිළිබඳව අවධානය යොමු කළ යුතු වෙනවා.

කුඩා කාලයේ සිට පරිණත පුද්ගලයකු වීම දක්වාම මනා හික්මීමක් සහිත පුරුදු පුහුණු විය හැකි ප්‍රායෝගික ක්‍රියාකාරකම් මොනවා ද?

ළමා කාලයේ සිට හික්මීම පුරුදු පුහුණු කළ යුතු වනවා. “විද්‍යා දදාති විනයං” කියන පාඨයට අනුව හික්මීම ඇති කරන්නේ දැනීම ඉගෙනීම තුළිනුයි. ඒ අනුව අධ්‍යාපනය ලැබිය යුතු කාලයේ ඒ සඳහා උනන්දු වී ක්‍රියා කළ යුතු වෙනවා. තරුණ වයසට යනවිට ඇවතුම්, පැවතුම් සංවර වන ආකාරයට, හික්මීම ප්‍රගුණ කළ යුතු වනවා. අංගුත්තර නිකායේ පටිච්ඡන්න සූත්‍රයේදී තරුණ ස්ත්‍රියගේ සංවරකම, හික්මීම ඇතිවන්නේ අඳින, පළඳින වස්ත්‍රයෙන් පවා ආවරණයවීම හේතුවෙනුයි. විවෘත වූ පසුව නෙවෙයි වැඩිමහලු තත්ත්වයට පත් කෙනෙකුගේ හික්මීම දරුවන්ට ආදර්ශ සම්පන්න විය යුතු වනවා. වැඩිහිටියන් සිටින තැන්වල සිදුවන්නේ නොමනා ක්‍රියාවන්නම්, දරුවන් එය අත්හදා බලනවා.

බුදුදහමට අනුව ළමා, තරුණ කොයි කාටත් හික්මීම ඇති කර ගැනීමට අවශ්‍ය ප්‍රායෝගික ක්‍රියාවන් ලෙස මූලික වශයෙන් සීල, සංවරය උපදවා ගැනීම සිදු කරන්න පුළුවන්. භික්ෂූන් වහන්සේලාට පුරුදු පුහුණු කළ යුතු සීල හතරක් පිළිබඳ දක්වා තිබෙනවා. ඉඳුරන් සංවර කරගැනීම (ඉන්ද්‍රිය සංවර සීලය) දිවි පැවැත්ම සංවර කර ගැනීම (ආජීව පාරිශුද්ධ සීලය) සිව්පසය ලබාගත යුතු පිළිවෙළ (ප්‍රත්‍ය සන්නිශ්‍රිත සීලය) පොහෝ කිරීමෙන් ලබන සංවරය (ප්‍රාතිමෝක්ෂ සංවර සීලය) යන ඒවායි. මේ සියල්ලක්ම ගිහියාට ද අදාළ කර ගන්නට පුළුවන්.

සියලු දෙනා හැමදාම දවස ගත කරන්නේ මුදල් උපයන්නයි. ඒ අපට හුරුපුරුදු වෙච්ච රටාව. එදිනෙදා අවශ්‍ය දේ ලබාගැනීම සඳහා වෙහෙසෙනවා වාගේම මේ සද්ධර්මය සිතේ දියුණු වෙන ආකාරයේ දිනචර්යාවකුත් ඇති කර ගන්න ඕන. ගිහියනට ඇති පන්සිල්, අටසිල්, දසසිල්, උපෝසථ සීලය වැනි දේ වාගේම පැවිද්දා වෙනුවෙන් ඇති විවිධාකාර සීලයන් මගින් හික්මෙනකොට ඇතිවන්නේ මෙලොව යහපත උදා වීමයි. එසේනම් සීල, ප්‍රතිපදාව ළමා කාලයේ සිට ප්‍රගුණ කිරීම සෑම අතින්ම හික්මීම ඇති කරලීමට හේතුවක් වෙනවා.

සටහන - මදාරා මුදලිගේ

තලාතුඔය මුදුනකඩේ ගල්කොටුව පුරාණ විහාරය, සගම රජමහා විහාරය, අනුරගම විහාරය, උඩවත්තකැලේ රාම විහාරය සහ තලාතුඔය ශ්‍රී සම්බුද්ධ ජයන්ති බෝධිමලු විහාරය යන විහාරයන්හි අධිපති පාතහේවාහැට ප්‍රධාන අධිකරණ සංඝනායක අම්පිටියේ ධම්මපාල නාහිමියන් අනූහතර වැනි වියට පා තැබූහ.

එක්දහස් නවසිය විසිපහේ ඔක්තෝබර් මස තුන්වැනි දින අම්පිටිය පල්ලේගමදී උන්වහන්සේ උපත ලැබූහ. වික්‍රමසිංහ මුදියන්සේලාගේ ඩිංගිරි බන්ඩා සහ ඒකනායක මුදියන්සේලාගේ ඩිංගිරි අම්මා යන මව්පියන්ගේ දූ දරුවන් නවදෙනාගෙන් දෙවෙනියා වූයේ උන්වහන්සේය. ගැහැනු සහෝදරියන් පහක් සහ පිරිමි සහෝදරයන් තිදෙනෙක් අතර හැදී වැඩුණ උන්වහන්සේගේ ගිහිනම වූයේ වික්‍රමසිංහ මුදියන්සේලාගේ රන් බණ්ඩාය. ශිල්ප හැදෑරිය යුතු වයස එළැඹි කල්හි අම්පිටියේ වැස්ලියන් පාසලට ඇතුළත්ව එහි හයවන පංතිය දක්වා අධ්‍යාපනය ලැබීය. ඉන්පසු ගිහි දිවියට සමුදී එක්දහස් නවසිය තිස් හයේ දී එවකට සගම රජමහා විහාරාධිපතිව විසූ හුරීකඩුවේ ශ්‍රී සුමංගල ගුණරතනාභිධානනායක හිමියන්, ගොඩමුන්නේ ශීලානන්ද හිමියන් සහ ඔලුවාවත්තේ ධම්මකිත්ති යන හිමි වරුන්ගේ ආචාර්යත්වයෙන් අම්පිටියේ ධම්මපාල නමින් සසුන්කෙතට පා තැබූහ.

ඉන්පසුව කුඩා ධම්මපාල සාමනේරයන් වහන්සේ මූලික අධ්‍යාපනය සඳහා සගම මහා මහින්ද පිරිවෙනට ඇතුළත් වූහ.

අනතුරුව ගම්පල සිරිබුවනෙකබා පිරිවෙන, සහ වටද්දර ඥානෝදය පිරිවෙන්වලින් පිරිවෙන් අවසානය දක්වා අධ්‍යාපනය ලැබූහ. මෙම කාලය අතරතුර උන්වහන්සේගේ ගුරුදේවයන් අපවත්වීම නිසා සගම රජමහා විහාරයට පැමිණ එහි විහාරාධිපති පදවිය භාරගෙන එතැන්පටන් සිය ශාසනික හා සාමාජයික සේවාවන් ඇරඹීය. එවකට අභාවයට ගොස් තිබූ සගම මහා මහින්ද පිරිවෙන 1983 දී නැවත ආරම්භ කළ උන්වහන්සේ මේ දක්වා එහි දියුණුවට අතහිත දෙමින් වැඩසිටී.

උන්වහන්සේගේ අනුශාසකත්වයෙන් හා මගපෙන්වීමෙන් පවත්වාගෙන යන සගම මහින්ද දහම් පාසැල මඟින් ප්‍රදේශයේ දරුවන් රැසකට දහම් අධ්‍යාපනය ලබා දෙයි. සිය පැවිදි දිවියේ අසූතුන්වසරක් සපුරා ඇති උන්වහන්සේ සිය උපසපන් දිවියේ හැත්තෑ තුන්වන වසරට පා තබා සිටී.

දක්ෂ ධර්ම දේශකයාණන් වහන්සේ නමක් වශයෙන් ප්‍රසිද්ධියක් උසුලන උන්වහන්සේ සෑම ආගමික හා සමාජ කටයුතුවලදී උන්වහන්සේගේ සහභාගිත්වය හා අවවාද අනුශාසනා නිරන්තරයෙන් ලබාදෙති.

පුරා වසර අසූදෙකක් ලෝ සතගේ හා බුදුසසුනේ උන්නතිය සඳහා සිය පැවිදි දිවිය කැපකළ උන්වහන්සේට දීර්ඝායු ලැබේවායි පතමු.

පී.ඒ.කපුරුබණ්ඩාර ආරච්චි
තලාතුඔය විශේෂ

සේරුවිල මංගල රජමහා විහාරාධිපති මුංහේනේ මෙත්තාරාම නාහිමියන්ගේ සභාපතිත්වයෙන් යුත් සේරුවිල ප්‍රජා සංවර්ධන පදනමේ මෙහෙයවීමෙන් විහාරස්ථ ශ්‍රී සුමේධංකර දහම් පාසලේ සිසු දරුවනට නිල ඇඳුම් ප්‍රදානය කිරීම පසුගියදා සිදුවිය. එහිදී දහම් පාසලේ සිසු දරුවෙකු නාහිමි අතින් ඇඳුම් ලබාගත් අයුරු.

ඡායාරූපය - සේරුවිල මාධ්‍ය ඒකකය

ධර්මය පුරුදු කරන්නට බාධාව පිණිස පවතින බලවත් දෙයක් තමයි අනුන්ගේ අඩුපාඩු දැකලා ඒ ඔස්සේ අමනාප හිතක් හදා ගැනීම. අඩුපාඩු දැකපු පමණින් ඒක අපිට බාධාවක් වෙන්නේ නෑ. අන් අයගේ අඩුපාඩු දැකලා ඒ ඔස්සේ තමන්ගේ සිතේ අමනාපයක්, ගැටුන හිතක්, අකමැති හිතක් ඉපදෙනවා නම්, ඒක අපිට අතිශයින් ම ලොකු අනතුරක්. එබඳු දෙයක් අපි තුළ තියෙනවා කියලා දැකලා, ඒක දුරු කරගන්ට යම් කෙනෙක් කල්පනා කළොත්, මහන්සි වුණොත් ඒක නිවන් මඟට බලවත් උපකාරයක් වෙයි. අඩුම තරමින් මේ ජීවිතයේ සුවපහසුවෙන් ඉන්ට හරි ඒක උපකාර වෙයි. ඒ විදියේ සුවපහසුවකින් යුක්ත කෙනෙක්, ඊළඟ ජීවිතයේ සුගතියට යන්ට එය උපකාර වෙයි.

ඒ නිසා මේ උවදුර තේරුම් ගන්න. මේ උවදුරෙන් බේරුනොත් එයාට දිනන්ට හොඳට ම අවස්ථාව තියෙයි. මොකද ඒක අපිට අමාරු දෙයක්. අපේ හිත, ‘තමන් හරි’ කියන අදහසේමයි ඉන්නේ. ‘තමන් හරි, අනුන් වැරදියි’ කියන අදහසේ ඉන්නේ. ඒ අදහස බැහැර කරලා, ‘තමාගේ තියෙන අඩුපාඩු මොනවාද’ කියලා සොයා බලමින්, ඒවා නිවැරදි කරගන්ට කල්පනා කරන්ට ඕනෑ.

අන් අය කෙරෙහි අනුකම්පාව උපදවාගන්නට ඕන. අන් අය කෙරෙහි කරුණාව, මෛත්‍රිය ආදී හැඟීම් උපදවාගන්ට ඕන. විශේෂයෙන් කරුණාව උපදවා ගත්තොත්, තව කෙනෙකුගේ අඩුපාඩුවක් දැකලා ඒ ඔස්සේ අපි අමනාපයක් ඇති කරගන්නේ නෑ. අපි තව කෙනෙකුගේ අඩුපාඩුවක් දැකලා ඒ ඔස්සේ අමනාප හදා ගත්තොත්, අපි තුළ අකුසලයක් හටගෙන ඉවරයි. එතකොට එයත් වැරදියි. අපිත් වැරදියි. දෙන්නම වැරදියි. සමහරවිට ටික කලක දී එයා ඒ අඩුපාඩුව හදා ගනියි. අපි හදාගත්ත අකුසලය ගෙවාගන්ට බැරිවෙයි. හේතුව අර අඩුපාඩුව සිහි කර කර ඉන්නවා. ඒක ම සිහිකරලා හිත කෙලෙසා ගන්නවා. සමහරවිට ඒ කාරණය අඩුපාඩුවකුත් නෙවෙයි වෙන්ට පුළුවන්.

ඒ නිසා තම තමන්ගේ හිත පිරිසිදු කරගන්ට කැමති අය විදිහට, අන් අයගේ අඩුපාඩු දැකලා ඒ ඔස්සේ හිතේ අමනාපකම්, අකමැත්ත, අප්‍රසාදය උපදවා ගන්ට එපා. ගැටුන සිත හදාගන්ට එපා. තමා හරි කියන අදහසේ ඉන්නකොට තමයි ඒක වෙන්නේ. නිතර හිතන්න ‘මම නිවැරදි වෙන්ට ඕනෑ’ කියලා. ‘මම හැදෙන්ට ඕන කෙනෙක්. අන් අයත් හැදෙනවා නම් හොඳයි’ කියන අදහසේ අපි හිටියොත්, ඒ වගේ ම අන් අය කෙරෙහි අනුකම්පාවෙන් කටයුතු කරන්ට අපි දක්ෂ වුණොත්, කෙනෙකුගේ අඩුපාඩුවක් ඔස්සේ අපි ගැටෙන්නේ නෑ.

ඒ නිසා යම් කෙනෙකුගේ අඩුපාඩුවක් දැක්කොත් ඒ පුද්ගලයා කෙරෙහි අනුකම්පාව උපදවාගන්න. එතකොට අපිට පුළුවන් කුසල් සිතින් වාසය කරන්ට. එහෙම නොවුණොත් අපිට අතිශයින් භයානක වූ ස්වභාවයන් කරා අපේ හිත පිරිහිලා යන්ට පුළුවන්. අපිට ඉතා යහපත කරන කෙනාගේ වුණත් අඩුපාඩු දැකලා ඒ ඔස්සේ අපි ගැටෙන හිත හදාගෙන අපිට ම විනාශය උපදවා ගන්න අය බවට පත් වෙන්ට ඉඩ තියෙනවා.

එබඳු ස්වභාවයක් තමයි මේ හිතේ තියෙන්නේ. හිත නරක පැත්තට ගියොත් අතිශය විනාසයි. ඒ නරක පැත්තට යන්ට තියෙන ඉඩකඩ වහගැනීම පිණිස තමයි මේ කාරණය අපි සිහිකරලා දෙන්නේ. අඩුපාඩු දැකලා අකමැති සිත හදාගැනීමෙන් උපදින්නේ පටිඝය. ඒක පුංචිවට තියෙන්නේ. අපිට ම තේරෙන්නේ නෑ. ඒක දියුණුවෙලා ගිහිල්ලා මහා බලවත් එකක් බවට පත්වුණාම අපි විනාශ වෙලා යනවා. අපි ම දන්නේ නෑ. ගින්නට අහුවෙච්ච පුංචි සමනලයෙක් පිච්චිලා යනවා. ඒ වගේ ඊටත් වඩා වේගයෙන් අපි විනාශ වෙලා යනවා. ඒ නිසා මේ භයානක උවදුර තම තමා තුළ තිබෙන බව තම තමා තේරුම් අරගෙන, ඒකෙන් නිදහස් වෙන්ට කැමති වෙන්න.

පිරිසක් එක්ක ඉන්නකොට මේ දේ කළ යුතුයි. පිරිසක් එක්ක ඉන්නොට ඕන තරම් එකිනෙකාගේ ඇදකුද පෙනෙයි. එතකොට ඒක හිතා මතා බැහැර කරගන්ට ඕන. හිතා මතා, දැන් දැන් ඒවා හදා නොගත්තොත්, පස්සේ හදන්ට බෑ. ඒ විදිහට අපි සකස් වුණොත් අපිට අනාගතේ සතුටු වෙන්ට පුළුවන් දෙයක් තියෙයි. එහෙම නැති වුණොත් වර්තමානයේවත් සතුටු වෙන්ට පුළුන්කමක් ලැබෙන්නේ නෑ. වර්තමානයේ සතුටු වෙන්නේ නැත්නම්, අනාගතේ සතුටුවෙන්ට පුළුවන්කමක් නෑ. එනිසා අපි වර්තමානයේ අකුසල් දුරු කරගැනීමට මහන්සි වුණොත්, ඒ ඔස්සේ වර්තමානෙත් සතුටින් ඉන්ට පුළුවන්. ‘මම යහපත් දෙයක් පුරුදු වෙනවා’ කියලා. අනාගතෙත් සතුට උපදියි.

මේ සියලු දෙනාට ම සෙත් පතනවා. අන් අයගේ අඩුපාඩු දැකලා ඒ ඔස්සේ හිතේ අමනාප ගති ඇතිවන හිත් දුරු කරගෙන, අන් අයගේ අඩුපාඩුවක් දැක්කොත්, ඒ කෙනා කෙරෙහි අනුකම්පාව උපදවාගන්ට පුළුවන් ගුණවත් වූ සිත් ඇති කරගැනීමට භාග්‍යය, ධෛර්යය, වාසනාව, හැකියාව, කැමැත්ත ඉපදේවා.!

සිරිලක් ධරණි තලය මත දිවි ගෙවන අපි වසරක් පාසා වසරක් විවිධ ආගම්වල ‍පවත්වනු ලබන උත්සවාකාර අවස්ථාවන්වලට සහභාගි වන්නෙමු. එවැනි අවස්ථා ශ්‍රී ලාංකිකයන් වන අපගේ හදවත්වලට ඉමහත් සතුටක් හා ප්‍රබෝධයක් දනවන බව අමුතුවෙන් කිව යුතු නොවේ. ආධ්‍යාත්මික ගුණවගාවක්ද ඉන් සිදු වේ.

නව වසරේ උදාවත් සමඟ පල්ලි - පන්සල් හා කෝවිල්වලින් හඹා එන සුමධුර ඝාණ්ඨාර හඬ වසරක් ගෙවී නව වසරක් එළැඹීමේ සුහද පණිවුඩය කියාපායි. කලබලකාරී හා නොසන්සුන් ස්වභාවයෙන් මඳක් ඈත්වී, නිහඬ නිසසල හා සාමකාමී පරිසරයක සැනසීමෙන් හා සංහිඳියාවෙන් කාලය ගතකිරීමට එවැනි මහඟු උත්කර්ෂණීය අවස්ථා අපට අත්‍යවශ්‍යය.

පසුගිය වසරේ අප අතින් දැන හෝ නොදැන සිදු වූ අතපසුවීම්, ප්‍රමාද - දෝෂ හා අඥානකම් එමටවත් තිබීමට පුළුවන. යළිත් එවැනි දෑ නොකරන හැටියට දෙවියන් අභියස පාපොච්චාරණය කරමින් අලුත් ජීවිත රටාවකට අවතීර්ණ වීම 2019 නව වසරේදී අප අතින් සිදුවිය යුතු ඉතා වැදගත් කාරණයකි.

අන්ධකාරයේ අඳුරු හා රුදුරු අවස්ථාවලට පසුගිය වසරේ අප මුහුණ දුන්නාට සැකයක් නැත. තනිකම, පාලුව, සාංකාව, දුක හා වේදනාව මෙන්ම නොයෙකුත් චෝදනා හා අපහාස අන්‍යයන්ගෙන් එල්ල වූ විට ඊට මුහුණ දුන් අයුරු ද ලැබූ නව වසරේදී අපගේ මතකයට නැ‍ඟෙනු ඇත. එවන් වේලාවන්හිදී සමාව භජනය කිරීමේ ආත්මය දුන්, ප්‍රේමයේ හා සෙනෙහසේ දෙවි සමිඳාණන් වහන්සේට ස්තූතිය හා ප්‍රශංසාව පළකළ යුතුම ය.

අපගේ මිනිස් ජීවිතවල වෙන්වීම් මෙන්ම එක්වීම් ද බොහෝ විට සිදු වේ. යම් අයුරකින් අපගේ ඇසුරට පත් ප්‍රියයන්ගෙන් හෙවත් මිත්‍රයන් සමඟ අමනාප වී ඔවුන්ගෙන් වෙන්වීමට සිදුවුවහොත් එය කෙතරම් ශෝචනීය වනු ඇත්ද? මනාප හා අමනාපවූවන් සමඟ වුව ද, සුහදතාවයෙන් හා සබැඳියාවෙන් යුතුව දිවි ගතකරන්නට කාලය මවා නිම කළ දෙවියන් වහන්සේ අපට මඟ පෙන්වනු නිසැකය.

ජාති - කුලමල - තරාතිරම් හා පංති භේද අපට අයත් නොවේ. එක්සත්ව හා එක්සිත්ව මෙන්ම සංහිඳියාවෙන් යුතු දිවිපෙවෙතක් ගතකිරීමට උත්සුක වීම මෙම නව වසරේ (2019) ශ්‍රී ලාංකිකයන්ගේ පරම පවිත්‍ර චේතනාව විය යුතුමය. ශු. බයිබලයේ එපීස පොත ජාතීන් අතරේ තිබිය යුතු සංහිඳියාව ගැන මෙලෙස සාක්ෂි දරයි.

“ජුදෙව්වරුන් හා විජාතිකයන් එක්කරමින් උන්වහන්සේ අප අතර සමඟිය ඇති කළ සේක. උන්වහන්සේ‍ මිනිසත් බව ගෙන ඔවුන් වෙන්කළ, ඔවුන් අතර වෛරය ඇතිකළ මැද බිත්තිය කඩා දැමූ සේක. මේ දෙජාතිය නව මනුෂ්‍යත්වයක් කොට මවා සමඟිය ඇතිකරන පිණිස උන්වහන්සේ නීති-රීති ඇතුළත් ව්‍යවස්ථාව අවලංගු කළ සේක. කුරුසිය කරණකොටගෙන උන්වහන්සේ වෛරය නැතිකර දෙවියන් වහන්සේ උදෙසා ඒ දෙජාතිය එකම ශරීරයක් වන පිණිස සමඟි කර වදාළ සේක. එසේ උන්වහන්සේ වැඩම කර, දුර සිටියා වූ ඔබටත් ළඟ සිටියා වූ අයටත් සාමයේ පණිවුඩය දේශනා කර වදාළ සේක.” (එපීස 2:14-17)

දූෂණයෙන් හා වංචාවෙන් තොරව අවංකව හා විශ්වාසනීයත්වයෙන් යුතු නිර්මල ජීවිත ගතකිරීමට මෙම නව වසරේදී අප විසින් දැඩි අධිෂ්ඨාන‍යක් ඇතිකර ගැනීම ඉතා යෝග්‍යය. අතිරමණීය හා අලංකෘත සිරිලක් මාතාවට එය ඉමහත් අස්වැසිල්ලක් වන්නා සේම ‍රටේ සංවර්ධනයට හා සෞභාග්‍යයට එය ඉමහත් රුකුලක් වනු නොඅනුමානය.

“එහෙත් නුඹලා විසින් හිමිකර ගැනීමට එතෙරව යන දේශය හෙල්වලින් හා මිටියාවත්වලින් යුක්ත වූ, අහසෙන් වෑස්සෙන වතුර උරාගන්නා වූ දේශයක් ය. නුඹේ දෙවි වූ ස්වාමීන් වහන්සේ, බලා සලකන්නා වූ දේශයක් ය. අවුරුද්ද පටන් ගැන්මේ සිට අවුරුද්ද අන්තිමය දක්වා නුඹේ දෙවි වූ ස්වාමීන් වහන්සේගේ ඇස් නිරන්තරයෙන් එය කෙරෙහි යොමු වී තිබේ.” (ද්වී. කථාව 11:11)

සතසිත් තුළෙහි පවතින
සුදතුම් එළිය
සවිමත් කරයි දිවි ගමනක
ඇති විලිය
දැන්වත් කරන දෙව් ‍වදනෙහි
දිව් එළිය
සිරිමත් නව වසට සෙත
දෙනු පැහැදිලිය
ඔබ සැමට ආශීර්වාද ලත්
වාසනාවන්ත ​සුබ නව වසරක් වේවා!

 සිරිමල් ජයලත් ද සිල්වා පියනම

මග්ගොන සාන්ත වින්සෙන්ති ආයතනය මගින් පාලනය කරන ළදරු පාසලේ 31 වැනි වාර්ෂික විවිධ ප්‍රසංගය පසුගියදා පැවැත්විණ. මේ ළදරු පාසෙලේ ඉගෙනීම ලැබූ ආදි ශිෂ්‍ය පැවිදි පූජක හිරුෂාන් හසන්ත පියතුමාද (දැනට මීගමුව මහවීදිය මීසමේ සහයක පියතුමා) ආයතනයේ කළමනාකර අධ්‍යක්ෂ රොෂාන් සිල්වා නිමනි පියතුමා ඇතුළු ආයතනයේ පැවිදි සංඝයේ පූජකවරු සහ සහෝදරවරුද ආරාධනය පිළිගෙන පැමිණ සිටියහ. ආයතනයේ කාර්මික නිවාසයේ අධ්‍යක්ෂ හා ළදරු පාසලේ අධ්‍යක්ෂ සමිර ෆොන්සේකා (නිමනි) පියතුමාගේ උපදෙස් පරිදි පාලිකා නිර්මලා කුරේ මහත්මිය හා සහයක ගුරුතුමි මල්ෂා ප්‍රසානි ගුරුතුමිය මේ උළෙල සංවිධාන කළහ.

සටහන :- සරත් ප්‍රනාන්දු
සේයා :- සුරංග ෆොන්සේකා 

මොරටුව තරුණ ක්‍රිස්තියානි සංගමය විසින් වාර්ෂිකව සංවිධාන කරනු ලබන නත්තල් කැරොල් ගී ගායනා වැඩසටහන පසුගියදා මොරටුව සංගම් ශාලාවේදී පවත්වන ලදී.

සංගමයේ තරුණ සමාජය සහ ළමා සමාජය විසින් ඉදිරිපත් කරන ලද කෙටි නාට්‍යය සහ කැරොල් ගායනා වැඩසටහනේ මුල් තැනක් ගන්නා ලදී. එමෙන්ම මොරටුව වයිස්මන් සංගම්, මොරaටුව තරුණ කාන්තා ක්‍රිස්තියානි සංගමය සහ මොරටුව තරුණ ක්‍රිස්තියානි සංගමයේ කණ්ඩායම් විසින් ඉදිරිපත් කළ ගායනා වැඩසටහන වර්ණවත් කළේය. නත්තල් පණිවුඩය ගෙන එන ලද්දේ ගරු නිරාජ් පෙරේරා දේව ගැති තුමා විසිනි. සංගමයේ අධ්‍යක්ෂක මණ්ඩලය ඇතුළු බොහෝ පිරිසක් වැඩසටහනට සහභාගී වූහ.

බූස්ස බන්ධනාගාරයේ නේවාසික රැදවියන් වෙනුවෙන් විශේෂ නත්තල් දේව මෙහෙයක් ගාලු රදගුරු රේමන්ඩ් වික්‍රමසිංහ පියතුමාගේ ප්‍රධානත්වයෙන් පසුගියදා පැවැත්විණි.බූස්ස බන්ධනාගාර අධිකාරි ඵල්.පී.ඵම්. කරුණාරත්න මහතාගේ උපදෙස් මත ප්‍රධාන ජේලර් මංගල වැලිවිටිය මහතා, පුනරුත්ථාපන අංශයේ නිලධාරි මහත්වරුන් සහ හිරකරු සුබ සාධක සංගමය ඵක්ව මෙය සංවිධානය කර තිබිණි.

යක්කලමුල්ල විශේෂ-කුමාර උදයරත්න

මඩකලපුව කිතුනු ප්‍රජාව නව වසර වෙනුවෙන් විශේෂ පුද පූජා පැවැත්වූහ. මඩකලපුව ප්‍රධාන දේව මෙහෙය පැවැත්වුණේ මඩකලපුව ශුද්ධවූ මරියා දේවස්ථානයේදීය. මවුබිමට සාමය පතමින්, මඩකලපුව පදවියේ රදගුරු පොන්නයියා ජෝසප් හිමිපාණන් විසින් එම දේව මෙහෙය පවත්වනු ලැබිණි.

මඩකලපුව වාර්තාකරු එල්. ජව්ෆර්කාන්

යාපනය උරුම්පිරායි කතෝලික දේවස්ථානය ඉදිරිපිට මෙවර නත්තල නිමිත්තෙන් අඩි 68ක් උස නත්තල් ගසක් ඉදිකොට තිබිණි. යාපනය උරුම්පිරායි ක්‍රිස්තියානි තරුණ සංගමය විසින් ඉදි කරන ලද මෙම අලංකාර නත්තල් ගස තට්ටු අටකින් යුතු වූ අතර එය අලංකාර කිරීම සදහා විදුලි බුබුළු 1650 ක් යොදා ගත් බව නත්තල් ගස ඉදි කළ තරුණ පිරිස පැවසූහ.

වවුනියාව උතුර සමූහ - බන්දුල සෙනෙවිරත්න

වින්සන් මර්වින් ප්‍රනාන්දු මහ බැංකුවේ හිටපු අධ්‍යක්ෂ, ප්‍රවීණ ආර්ථික විශ්ලේෂක

2018 නිම විය. 2019 නව වසර උදා විය. 2018 වර්ෂයේ ආර්ථිකය කෙබඳු වී ද? 2019 ආර්ථිකය කවර අභියෝගවලට මුහුණදිය යුතුද? යන කරුණු පිළිබඳ, ආර්ථික දෘෂ්ඨි කෝණයෙන් බැලීම වැදගත් ය.

1948 පටන් මෙරට පාලනය කළේ ප්‍රධාන පක්ෂයක් හා සම්බන්ධ වූ සුළු පක්ෂ කිහිපයකි. එහෙත්, ප්‍රථම වරට 2015 දී ප්‍රධාන පක්ෂ දෙක එකට එකතුවී “සමාජ වෙළෙඳ පොළ ආර්ථිකයක්” ඔස්සේ යහපාලනයක් හදන්නට භාර ගත්තේය. එහෙත්, පක්ෂ දෙකේ ප්‍රතිපත්තිමය වෙනස්කම් නිසා, එම කාර්යයන් සාර්ථක නොවීය.

2015 ආණ්ඩුව පත් වී මාස කිහිපයකින් සිදුවූ මහ බැංකුවේ බැඳුම්කර වංචාවෙන් ආර්ථිකයටත්, මහ බැංකුවටත් සිදු වූ විනාශයේ ආදීනව අපි තවමත් භුක්ති විඳිමු. ඒ හරහා විදේශ ආයෝජකයන් තුළ ඇති කළ අවිශ්වාසය නිසා , අපට අවශ්‍ය විදේශ ආයෝජන ආකර්ෂණය කර ගැනීම ද දුෂ්කර විය. රටේ සමස්ත ආර්ථික වර්ධනය 2005 – 2014 දක්වා 6%කට වඩා වැඩි මට්ටමක තිබුණත් , 2015 – 2018 කාලය තුළ 3%කට හරියට ම අඩකින් අඩු වීමක් සිදු විය. විරැකියාව ද 4% සිට 4.6%කට වැඩි වී ති‍බේ. 2009 සිට තනි මැදි ඉලක්කමකින් පවත්වාගෙන ගිය උද්ධමනය, 2015 සිට ද තනි මැදි ඉලක්කමකින් පවත්වාගෙන යාමට මහ බැංකුව සමත් වුවත්, ක්‍රමයෙන් 3.8%, 4.0% හා 7.7% ක් දක්වා ගමන් ගත්තේය. 2018 දී එය 4%ක මට්ටමකට යළි අඩු වී තිබේ. තෙල් මිල සූත්‍රයක් හඳුන්වා දුන් නමුත්, තෙල් මිල හා ඒ හා බැඳී අනෙකුත් මිල ගණන් ද වැඩි විය. ඉන් ජනතාවගේ ජීවන බර වැඩි විය. VAT හා අනෙකුත් බදු වැඩි වීමෙන්, ජීවන බර තව තවත් වැඩි විය.

පොලී අනුපාතික වැඩි විය. විද්ශ විනිමය අනුපාතිකය 2014 අගදී ඩොලර් 1ක් රු131/= සිට 2018 අග වන විට, රුපියල් 184/= දක්වාම ක්ෂය විය. අයවැය හිඟය 5%කට වැඩි මට්ටමකට පත් විය. රාජ්‍ය ණය දළ දේශීය නිෂ්පාදිතයෙන් 78%ක් විය. විදේශ සංචිත පිරිහෙන්නට පටන් ගත්තේය. මේ තත්ත්වය 2018 ඔක්තෝබර් 26දා සිදුවූ දේශපාලන වෙනස්කම් හරහා තවත් උග්‍ර අතට හැරුණි.

විදේශ ණය

2018 අගදී සිදුවූ දේශපාලන ගැටුම, 2018 ආර්ථිකය පහතට යෑමට බලපෑ ආකාරය මෙසේ පැහැදිලි කළ හැකි ය.

මහ බැංකුව සතු විදේශ සංචිත 2018 ඔක්තෝම්බර්වල ඩොලර් බිලියන7.9ක් තිබූ අතර, 2018 දෙසැම්බර් වන විට බිලියන 7ට අඩු විය. 2014 අගදී ඩොලර් 1ක් රු. 131/=ක් වූ විදේශ විනිමය අනුපාතිකය, බල අරගලය සිදුවන දිනය වන විට ඩොලර් 1ක් රුපියල් 176ක් දක්වා රුපියල් 45 කින් ක්ෂය වී තිබුණු අතර, බල අරගල දින 52ක් තුළ ක්ෂය වීම තීව්‍ර වී, ඩොලර් 1ක් රුපියල් 181.36 දක්වා 4%කට ආසන්න ප්‍රමාණයක් ක්ෂය විය. 2018 දෙසැම්බර් අග වනවිට මෙය 184ක් විය.

රටේ සාර්ව ආර්ථික මූලධර්ම යහපත් ලෙස මහ බැංකුව විසින් හසුරුවා තිබෙන තත්ත්වයක් තුළ පවා, මේ බල අරගලය පමණක් ප්‍රධාන සාධකයක් ලෙස යොදා ගෙන, ජාත්‍යන්තර ණය වර්ගීකරණ ආයතන තුනක් ශ්‍රී ලංකාවේ ණය ශ්‍රේණිය පහත හෙළීමට තීරණය කළේ ය. 2010 සිට වසර 8ක් ගත වූ පසු ප්‍රථම වරට 2018 නොවැම්බර් 20 දා ශ්‍රී ලංකා රජයේ විදේශ විනිමය ණය නිකුත් කිරීම හා ජ්‍යෙෂ්ඨ සුරැකුම් රහිත ණය ශ්‍රේණිගත කිරීම B1 සිට B2 (ස්ථාවර) මට්ටම දක්වා පහත හෙළීමට මූඩිස් ආයතනය කටයුතු කළ අතර, 2018 දෙසැම්බර් 03 හා 04 දින දෙකේදී ෆිච් රේටින්ග්ස් ආයතනය සහ ස්ටැන්ඩර්ඩ් ඇන්ඩ් පුවර්ස් රේටින්ග්ස් ආයතනය ශ්‍රී ලංකාවේ දිගුකාලීන විදේශ ණය ශ්‍රේණිගත කිරීම “B+” (ස්ථාවර) සිට ‘B’ (ස්ථාවර) මට්ටම දක්වා පහත හෙළන ලදී.

මේ නිසා, එක් අතකින් ශ්‍රී ලංකාවට විදේශ ණය සපයන ආයතන ණය ලබා දීමට තරමක් පසුබට වන අතර, ලබා දෙන ණයවලට පවා වැඩි පොලියක් නියම කිරීමට ද පෙලඹෙනු ඇත. එය ද, 2019 අයවැය හිඟය පියවීමට විදේශ ණය ලබා ගැනීමේදී බලපානු ඇත. 2019 ණය සේවා ගෙවීම් ද ඉහළ යනු ඇත.

බල අරගලය පැවැති මේ සමයේදී, සංචාරක පැමිණීම ද බිඳ වැටුණි. එසේ ම, විදේශ ආයෝජක පැමිණීම් ද අඩපණ විය.

වසර 2018 ජනවාරි මස 01 ඩොලර් 1 ක් රු 152.85ක් වූ විදේශ විනිමය අනුපාතිකය, 2018 දෙසැම්බර් 31 වන විට ඩොලර් 1ක් රු. 185ක් දක්වා අවප්‍රමාණය විය. මෙයට අභ්‍යන්තර හා බාහිර වශයෙන් කරුණු 10ක් බලපා තිබේ. පළමුව අමෙරිකාවේ ආර්ථිකයේ අභ්‍යන්තර ප්‍රතිපත්ති තීරණ, විශේෂයෙන් පොලී අනුපාතික ඉහළ යෑම දැක්විය හැකි ය. එක්සත් ජනපද සන්ධීය සංචිත බැංකුව 2015 අග සිට සිය මුල්‍ය ප්‍රතිපත්තිය සාමාන්‍යකරණය මත ප්‍රතිපත්ති පොලී අනුපාත ක්‍රමයෙන් ඉහළ නැංවීම කරයි. 2017 වසරේදී එය තෙවරක් වැඩි කොට 0.25% පොළී අනුපාතික 1.5%ක් විය. 2018 මාර්තු 21 දා 1. 5% සිට 1. 75%ට වැඩි කළේ ය. 2018 අගෝස්තු 1 වැනිදා සිට මේ අනුපාතිකය 1.75% සිට 2%කට වැඩි කළේ ය. අද වන විට 2.75%ක් බවට පත්ව තිබේ. මෙසේ පොලී අනුපාතික ඉහළ යෑම නිසා, ආයෝජක ආකර්ෂණය වැඩිකර ගැනීමට අමෙරිකාව සමත්වී ඇත. ඒ නිසා බොහෝ විදේශ ආයෝජකයන් තම ආයෝජන අමෙරිකානු වෙළෙඳ පොළ වෙත යොමු කිරීමට පෙලැඹිණි. මෙය ශ්‍රී ලංකාව ඇතුළු බොහෝ ආසියාතික රටවලට හා සංවර්ධිත රටවලට අහිතකර ලෙස බලපා ඇත. ඒ නිසා, ඔවුන්ගේ මුදල් අවප්‍රමාණය කිරීමට සිදුවී ඇත. ශ්‍රී ලංකා රුපියල මේ දිනවල බාල්දු වීමට මෙය තදින් ම බලපා තිබේ.

දෙවනුව - අමෙරිකා එක්සත් ජනපදය හා චීනය අතර හට ගෙන තිබෙන වෙළෙඳ යුද්ධය ද, රුපියල බාල්දු වීමට බලපෑ තවත් ගෝලීය සාධකයකි.

තෙවැනිව - තුර්කිය ඇතුළුව තවත් මහ බැංකු තම පොලී අනුපාතික ඉහළ නැංවීමට ගත් තීරණය ද, රුපියලේ බාහිර අගය පිරිහීමට බලපා ඇත.

සිව්වනුව - ආසියානු කලාප තුළ නැඟී එන වෙළෙඳ පොළ ආර්ථිකවල මුල්‍ය ඒකකය දිගින් දිගට ශ්‍රී ලංකා රුපියලේ අගය අඩු වීමට බලපෑම් කරයි.

පස්වනුව - බොහෝ රටවල් තවමත් ආර්ථික පසුබැසීම් (Recession) වලට මුහුණ දී සිටී. එය ද, ශ්‍රීලංකා රුපියල බාල්දු වීමට තදින් බලපායි.

මේ ගෝලීය සාධක 5ට අමතරව, දේශීය සාධක 5ක් ද මෙයට හේතුවී තිබේ.

හයවනුව - දේශීය උද්ධමන වේගය මෑතක සිට ක්‍රමයෙන් ඉහළ යෑම, රුපියලේ අගය බාල්දු වීමට බලපෑ එක් දේශීය සාධකයකි.

හත්වනුව - ශ්‍රී ලංකාවේ වෙළෙඳ හිඟය ක්‍රමයෙන් ඉහළ යෑම රුපියල බාල්දු වීමට තදින්ම බලපා තිබේ. 2018 වසරේ මුල් මාස 6 තුළ පමණක් ශ්‍රී ලංකාවේ වෙළෙඳ හිඟය අමෙරිකන් ඩොලර් 5.7ක් විය. එය පෙර වර්ෂයේ මාස 6ට සාපේක්ෂව 6.2%ක වැඩිවීමකි. පසුගිය වර්ෂයේ වෙළෙඳ හිඟය ඩොලර් බිලියන 9.6ක් විය. මේ වර්ෂයේ එය බිලියන 10 ඉක්මවනු ඇත. මෙහි තේරුම, විදේශ විනිමය අනුපාතිකය තීරණය වන ප්‍රධාන සාධක දෙක වන විදේශීය විනිමය සැපයුමට වඩා විදේශ විනිමය ඉල්ලුම (ගෙවීම්) වැඩිවීම නිසා, දිනපතා රුපියල බාල්දු වීමයි.

ශ්‍රී ලංකාවට ලැබෙන සංචාරක ඉපැයීම් හා විදේශීය පෞද්ගලික ප්‍රේෂණ ඉපැයීම් එම හිඟය පියවීමට ප්‍රමාණවත් නැත. ඒ නිසා තවතවත් විදේශ ණය ගැනීමට සිදුවී ඇත. විදේශ සංචිත පිරිහීමට ලක් වෙයි. 2018 අගෝස්තු අග වනවිට ඩොලර් බිලියන 8.6ක සංචිත තිබුණත්, ඒවා වැඩියෙන් යොදා රුපියල බාල්දු වීම මර්දනය කළ හැකි වුවත්, තවමත් අප මුල්‍ය අරමුදලේ කොන්දේසිවලට යටත්ව ණය ගන්නා නිසා, එය ද අපට ඕනෑ විදිහට කළ නොහැකි ය. එහෙත්, විටින් විට මහ බැංකුව තවමත් වෙළෙඳ පොළට මැදිහත් වන බව ද දක්නට ලැබේ.

අටවනුව - සම ප්‍රේක්ෂණය හෙවත් අවස්ථාවෙන් ප්‍රයෝජන ගැනීමට අපනයනකරුවන් තම ආයතන ආදායම් මෙරටට එවීමට ප්‍රමාද කිරීමත්, වාණිජ බැංකු අවශ්‍යතාවට වඩා ඩොලර් ළඟ තබා ගැනීමත්, රුපියල බාල්දු වීමට ප්‍රබලව බලපෑ තවත් දේශීය හේතුවකි. නවවනුව - ආනයන අඩුකිරීමට අපට නොහැකි වීම ය. මේ වන විට වාහන ආනයන සඳහා 100%ක ණයවර ලිපි සීමාවක් මහ බැංකුව පනවා ඇත්තේ ද ඒ නිසා ය.

දසවනුව - 2018 වර්ෂය පුරාම මෙරට පවතින දේශපාලන අස්ථාවරභාවය ද රුපියල බාල්දුවීමට තදින් බලපා ඇත.

2018 වර්ෂයේ සිදුවූ තවත් වැදගත් සිදුවීමක් නම්, අය වැය ඉදිරිපත් කිරීමට නොහැකි වීම ය.

2019 සඳහා වූ රජයේ විසර්ජන කෙටුම්පත (The Appropriation Bill) පළමුවර කියැවීම 2018 ඔක්තෝබර් මුලදී මුදල් ඇමැතිවරයා විසින් පාර්ලිමේන්තුවට ඉදිරිපත් කළත්, 2018 ඔක්තෝබර් 26 වැනිදා ජනාධිපතිතුමා විසින් සිදු කළ පෙරැළිය නිසා, නොවැම්බර් 5 වැනිදාට ඉදිරිපත් කිරීමට නියමිතව තිබූ අය වැය දෙවැනිවර කියැවීම පමණක් නොව, මුළු අය වැයත්, යහපාලන ආණ්ඩුවත් බිඳ වැටුණි. අය වැයක් පළමුවර කියවා දෙවැනි වර කියවන්නට බැරි වූ එක ම වර්ෂය, 2018 වර්ෂය ලෙස ඉතිහාසගත විය.

යළි බලය ලබා ගත් අගමැති රනිල් වික්‍රමසිංහ මහතා ප්‍රමුඛ ආණ්ඩුවේ 2019 සඳහා අය වැය ඉදිරිපත්කොට සම්මත කිරීමට කාලය මද වූ නිසා, දෙසැම්බර් 21 වැනිදා 2019 මුල් මාස 4 සඳහා අතුරු සම්මත ගිණුමක් ඉදිරිපත් කරන්නට තීරණ කළේ ය. අතුරු සම්මත ගිණුමක් යනු, කිසියම් හේතුවක් මත අය වැයක් ඉදිරිපත් කිරීමට නොහැකි වූ විට, ඒ වෙනුවට කෙටි කාලයකට (උපරිම වශයෙන් මාස 4 කට) ඉදිරිපත් කරන වැය ලේඛනයකි. ඒ අනුව, 2019 මුල් මාස 4 සඳහා ඉදිරිපත් කළ අතුරු සම්මත ගිණුමට අනුව 2019 මුල් මාස 4 සඳහා රජයේ මුළු වියදම රුපියල් බිලියන 1765කි. මෙයින් රුපියල් බිලියන 795ක් පුනරාවර්තන වියදම් වන අතර, ඉතිරි 965 ප්‍රාග්ධන වියදම්ය. ඉතිරි බිලියන 5 අත්තිකාරම් ගෙවීම්ය. වියදම්වලින් 55%ක් ම වැය වනුයේ ණය සේවා වියදම් හා ඊට අදාළ පොලී ගෙවීමට ය. මේ වියදම් කිරීමට රුපියල් බිලියන 990ක් ණය වශයෙන් ගන්නා බව ද, අතුරු සම්මත ගිණුම් යෝජනාවේ දැක්විණි. අතුරු සම්මත ගිණුමේ වැය ඇස්තමේන්තු අනුව වැඩි ම මුදලක් වෙන් වන්නේ, ගත් ණයවලට වාරික ගෙවීමට සහ පොලී ගෙවීමට ය. එය වෙන්කළ මුදලින් 55%කි.

ආර්ථිකයේ මේ සියලු ම බිඳවැටීම්වලට ප්‍රධානතම හේතුව, ශ්‍රී ලංකාව විශාල වශයෙන් ණය වීම බව බොහෝ දෙනකු කීව ද, එය එසේ ම යැයි කීම අසීරු ය. සෑම සාර්ථක මිනිසකු මෙන් ම, රටක් පසුපස තිබෙන්නේ ණය කන්දරාවකි. කෙනකුට ගෙයක් හදා ගන්නට, කාර් එකක් ගන්නට, තමන‍්ගෙ වැටුප ඉතුරු කර, ඒ සඳහා කවුරු හෝ ණයක් දෙන්නේ නම් එය ගෙවා ගත හැකි නම්, ප්‍රශ්නයක් නැත. ප්‍රශ්නය ණය අරගෙන ඒක අනවශ්‍ය පරිභෝජනයකට යෙදවුවහොත්ය. ශ්‍රී ලංකාවේ බලයට පත් හැම ආණ්ඩුවක්ම ණය ගෙන තිබේ. ණය ප්‍රමාණය ආණ්ඩුවෙන් ආණ්ඩුවට වැඩිවී තිබේ.

1950 ගත් ණය රු. බිලියන 0.6 ඊට වසර 10 කට පසුව 1960දී ගත් ණය බිලියන 2.3කි. 1970 දී බිලියන 8.7, 1976දී ගත් ණය බිලියන 17 කි. 1950 – 1977 දක්වා ආණ්ඩු ගත් ණය බිලියන 17ක් තරම් අඩු ප්‍රමාණයක් යැයි කෙනකු කියන්න පුළුවන. එහෙත්, රටක් දියුණු වුණේ 3%කට අඩු ප්‍රමාණයකිනි. 1978 විවෘත ආර්ථිකය හඳුන්වා දීම සමඟ, රටේ ණය ද වැඩි විය. රටේ වර්ධනයත් ඉහළ ගියේය. 1980 අපේ ණය රු. බිලියන 51 කි. 1990දී එය බිලියන 310කි. 2000දී රු. බිලියන 1218 කි. 2004දී බිලියන 2139 කි. දළ දේශීය නිෂ්පාදිතයෙන් 102% කි. බොහෝදෙනෙක් පවසන්නේ, 2005 සිට මහින්ද රාජපක්ෂ මහතාගේ ආණ්ඩුව යටතේ ණයවීම පිළිබඳයි. ඒ ණය බැලිය යුත්තේ, දළ දේශීය නිෂ්පාදිතයට (රටේ දියුණුවට) සාපේක්ෂවයි.

විදේශ සංචිත

2005 සිට 2014 දක්වා වසර 10ක කාලය තුළ රාජ්‍ය ණය රු. බිලියන 5168ක් වැඩි වුව ද, දළ දේශීය නිෂ්පාදිතයේ ප්‍රතිශතයක් ලෙස එය 90.6% සිට 71.3% දක්වා අඩු වීමෙන් පෙන්නුම් කරනුයේ, ණය වැඩිවී, රටේ ආර්ථික වර්ධනය ද වැඩි වූ බව ය. ප්‍රශ්නයකට තිබෙන්නේ, වර්ධනය වූ අංශ බොහොමයක් වෙළෙඳ නොවන අංශ වීම ය. ඒ නිසා, ගත් ණය ගෙවා දැමීමට ප්‍රමාණවත් ආදායමක් උපයා ගැනීමට අපහසු විය. ඒ නිසා ම, ණය වී සෑදු වත්කම් (වරාය, ගුවන්තොටුපළ) ආපසු 99 අවුරුද්දකට බද්දට යටත් කිරීමට සිදු විය. එම ගත් ණය බේරුම් කිරීමට කටයුතු කළත්, 2015 සිට 2018 දක්වා රු. බිලියන 2500 කින් ණය වැඩිවී, එය දළ දේශීය නිෂ්පාදිතයේ ප්‍රතිශතයක් වශයෙන් 71% සිට 80% දක්වා ඉහළ යෑමට හේතුව (මේ ප්‍රතිශතය මීට වඩා වැඩි වීමට ද ඉඩ තිබේ) ගත් ණයවලින් ආර්ථික වර්ධනය වැඩි කර ගැනීමට 2015න් පසු රජය අසමත් වීම ය.

මේ දක්වා අප සඳහන් කළ සියලු ම කරුණු, 2019 ආර්ථිකයට එක සේ බලපායි. එක ආර්ථික වර්ධන වේගය 2015 සිට අඩුවන උපනතියක් පෙනේ. 2019දී මේ ප්‍රවණතාවම අත්දකින්නට පුළුවනි. මන්ද, මැතිවරණ ඉලක්ක කරගෙන සෑම දෙනාම කටයුතු කරන නිසා ය. 2018 බිඳවැටුණු අපේ විදේශ අංශය එකවරම 2019 ශක්තිමත් වේ යැයි සිතීම අපහසු ය. මන්ද ඩොලර් බිලියන 05කට ආසන්න ණයක් ගෙවන්න සිදුවේ. මෙය ඉදිරි අවුරුදුවලටත් බලපානු ඇත. ඒ නිසා, විදේශ සංචිත සොයා ගැනීම පහසු නැත. අපේ ණය ශ්‍රේණිය අඩු කර ඇති බැවින්, විදේශ විනිමය අනුපාතය තව දුරටත් අවප්‍රමාණය වන්නට පුළුවන. රාජ්‍ය අංශයේ රාජ්‍ය ආදායම් අපේක්ෂා කළ පරිදි වැඩි නොවීමෙන් සහ වියදම් වැඩි වීමෙන්, අය වැය හිඟය සහ ඉහළ උද්ධමනය ඉහළ ගොස් , එක්තරා දුරකට ජීවන බර වැඩිවන්නට පුළුවන.

මේ තත්ත්වය මඟහැර වීමට නම්, දේශපාලන ආරවුල් වියවුල් සමනය කර ගනිමින් , සෑම පක්ෂයක්ම රට ගැන සිතා, දැනට පවතින ආණ්ඩුවට ඉතිරි කාලය තුළ වැඩ කර ගැනීමට ඉඩ සැලසිය යුතුය. එය එසේම වේවායි අපිදු ප්‍රාර්ථනා කරමු.

එය 1976 ඔක්තෝබර් මාසයේ දිනයකි. මම ගුවන් විදුලි රඟමඬලට නාට්‍ය පිටපතක් බාරදීම සඳහා සුගතපාල ද සිල්වා හමුවීමට ගුවන් විදුලි සංස්ථාවට ගියෙමි. මා අත හංගේරියානු නාට්‍යකරුවකු වූ ජුලියස් හේ (Julius Hay) ගේ “ද හෝර්ස්” (The Horse) නාට්‍ය ග්‍රන්ථයද විය. එය දුටු සුගත්, සතුට හා මවිතය මුසු බැල්මක් හෙළමින් මෙසේ ඇසුවේය.

“ඒයි උඹට කොහෙන්ද ඔය පොත?”

කිසි ලොකුකමක් නැති පුද්ගලයකු වූ සුගත් (ඔහු නාට්‍ය ක්ෂේත්‍රයේ මිතුරන් අතර ප්‍රකටව සිටියේ ඒ කෙටි නමිනි) කාහටත් ‘උඹ-බං’ කියා ඇමතුවේය.

“වැල්ලවත්තෙ පරණ පොත් කඩේකින්”

“ඕක මට දීපං, මම ළඟදි ‘තුරඟ සන්නිය’ සිංහල පොත ගහනවා. ඒකෙ පිටපතක් උඹට දෙන්නං.”

සුගත් මා අත තිබූ “තුරඟා” ඩැහැ ගත්තේය. ඔහු ‘තුරඟ සන්නිය’ නාට්‍ය පරිවර්තනය සඳහා “ද හෝර්ස්” ග්‍රන්ථය ලබාගෙන තිබුණේ, ගුවන් විදුලි සංස්ථා පුස්තකාලයෙනි. එය ආපසු බාරදිය යුතු වුවත්, ඔහු ඊට කල් ගත්තේය. මගේ පොත තම පුස්තකාලයට එක් කරගත් සුගත්, සංස්ථා පුස්තකාලයේ පොත ආපසු එයටම බාර දුන්නේය. සුගත් පසුව තම පොරොන්දුව ද ඉටුකරමින්, “තුරඟ සන්නිය” මුද්‍රිත පිටපතක් මට තිළිණ ‍කළේය. එය තවම මගේ පුස්තකාලයේ ඇත.

ඒ කාලයේ පරණ පොත් කඩවලින් පමණක් නොව පදික වේදිකාවේ පොත් වෙළෙඳුන්ගෙන් පවා මෙවැනි වටිනා, දුලබ පොත් අඩුමිලට සොයා ගත හැකි විය. හංගේරියානු නාට්‍යකරුවෙක්, වැල්ලවත්තේදී හමුවීම පුදුමයට කරුණක් නොවේද? සුගත් ද, පරණ පොත් කඩ පීරන්නෙකු විය.

ගම්බද පොළ පැවැත්වෙන දිනවල ද, අපූරු පොත් වෙළෙන්දෙක් දැක ගත හැකි විය. ඔහු තම පොත් ප්‍රදර්ශනය කළේ, දිගහරින ලද කුඩයක රවුමට තබමිනි. සොකරි, මනමේ, කාපිරි කුමාරයාගේ කතාව, සුභාෂිතය වැනි කව් පොත් ද, බණ පොත් ද ඒ අතර විය. සුගතපාල මෙම පොත් ගැන “නවයුගය” සඟරාවට ලියූ ලිපි පෙළ නම් කළේ “කුඩේ කඩෙන් පොතක්” යනුවෙනි.

සුගතපාල ද සිල්වා නාට්‍යකරුවකු වශයෙන් සිංහල වේදිකාවේ ස්ථාපිත වන්නේ “‍අපේ කට්ටිය” සමඟ ඔහු මුල්කාලයේ කළ “තට්ටු ගෙවල්”, “බෝඩිංකාරයෝ”, “හරිම බඩු හයක්”, “හිත හොඳ අම්මණ්ඩි” වැනි නාට්‍ය තුළිනි. ඔහුගේ වඩාත්ම ජනප්‍රිය නාට්‍යය වූයේ “දුන්න දුනු ගමුවේ” ය. පසු කලෙක නිෂ්පාදනය කළ “දෑවැද්දෝ”, “සත සහ සත”, “නන්දිවිසාල” වැනි නාට්‍ය ප්‍රේක්ෂක සිත් දිනා ගත්තේ නැත. “මරාසාද්” විශිෂ්ට නිෂ්පාදනයක් වුවද, එයද සිංහල ප්‍රේක්ෂාගාරයට ගැළපුණේ හෝ වැටහුණේ නැත. “තුරඟ සන්නිය” මා දකින්නේ සුගතපාල ද සිල්වා නමැති නාට්‍යකරුවාගේ නිෂ්පාදන පරිණතභාවය කදිමට පළ කළ විශිෂ්ට නාට්‍ය නිර්මාණයක් ලෙසිනි. අධ්‍යක්ෂවරයකු වශයෙන්, නළු නිළියන් මෙහෙයවීමෙහි ඔහු දැක්වූ මහත් කුසලතාවද ‘තුරඟ සන්නිය’ තුළින් දැකගත හැකි විය. විශේෂයෙන්ම, යූ. ආරියවිමල්, ලූෂන් බුලත්සිංහල, ඉන්ද්‍රා රාමනායක, බන්දුල විතානගේ, මර්සි එදිරිසිංහ වැනි ප්‍රතිභාපූර්ණ රංගන ශිල්පි ශිල්පිනියන්, මෙම ‍සොඳුරු ආඥාදායකයාගේ අණසකට නතුව, විශිෂ්ට ලෙස චරිත නිරූපණයන්හි යෙදෙන අයුරු “තුරඟ සන්නිය” නැරැඹුවන්ගේ මතකය තුළ තැන්පත් වූයේ සදා නොමැකෙන සේය.

ජුලියස් හේ, ශ්‍රී ලාංකික වේදිකාවට හඳුන්වාදීමේ ගෞරවය ද, සුගපාල ද සිල්වා‍ට හිමිවෙයි. මගේ දැනුමේ හැටියට, ඉන් පසු ජුලියස් හේ ගේ නාට්‍යයක් සිංහලට නැඟුණේ හෝ නිෂ්පාදනය වූයේ නැත.

වර්ෂ 1900 මැයි 05 වැනිදා හංගේරියාවේ ඇබනි නගරයේ උපත ලද, ගුලා ජුලියස් හේ, පාසල් වියේ සිටම සමාජවාදී අදහස් දැරුවේය. 1919 දී හංගේරියාවේ කොමියුනිස්ට් පාලනයක් බිහිවූ කාලයේ, ඔහු එහි අධ්‍යාපන අමාත්‍යාංශයේ ප්‍රචාරක නිලධාරියෙකු වශයෙන් ද සේවය කළේය. කෙටි කලකදීම කොමියුනිස්ට් රජය බිඳ වැටුණේත්, හේ ජර්මනියට පලා ගියේය. එහිදී ගෘහ නිර්මාණ ශිල්පය හදාරා පසුව, වේදිකා අලංකරණ ශිල්පියෙකු වශයෙන් කටයුතු කළේය. මේ අවධියේදී, ඔහු බර්ටෝල්ට් බ්‍රෙෂ්ට් සමඟ සමීප සබඳතා පැවැත්වූයේය.

ගුවන් විදුලි නාට්‍ය රචකයෙකු ලෙස ද ප්‍රකට වූ හේ, ස්ටෙෆාන් ෆේබර් නමැති “පෑනේ නාමයක්” ද භාවිත කළේය. ඔහු ලියූ වේදිකා නාට්‍ය අතර, “තුරඟා” හැරුණු විට, “දෙවියෝ, අධිරාජයා සහ ගොවියා” (God, Emperor and farmer), විනිශ්චය දිනය (Judgment day- 1945) ‘ද ටර්කි ෂර්ට්’ (The Turkey Shirt – 1945) හෑව් (Have) “ද ග්‍රෑන්ඩ් ඉන්කුවිසිටර් - (The Grand Inquisitor) වැනි නාට්‍ය කැපී පෙනෙයි.

1932 දී, ඔහුගේ නාට්‍යයක් බර්ලිනයේ රයින්හාඩ් නමැති ප්‍රකට නිෂ්පාදකයාගේ රඟහලෙහි ප්‍රදර්ශනය කෙරෙද්දී, එහි කඩා වැදුණු නාසි භටයෝ එය කඩාකප්පල් කර දැමූහ. හිට්ලර් බලයට පත්වූයේ මේ සිද්ධියෙන් සති කීපයකට පසුවය. කොමියුනිස්ට් පාක්ෂිකයකු වූ හේ, ඔස්ට්‍රියාවේ වියානාවට පලා ගියේය.

ඔස්ට්‍රියාවද සමාජවාදීන් දරුණු ලෙස මර්දනය කළෙන්, හේ පැරීසියට ද, පසුව සෝවියට් දේශයට ද පැන ගත්තේය. මොස්කව් නගරයේ හෝටලයක, හේ වැනිම සංක්‍රමණික කලාකරුවෝ ලැගුම් ගෙන සිටි අතර, ඔහු ද ඔවුනට එක්වීය. එහෙත්, වැඩි කල් නොයාම, ස්ටැලින්ගේ කලා මර්දන ප්‍රතිපත්තිය ඔහුට එපා විය.

නැවත හංගේරියාවට යන හේ, නාට්‍යකරණයේ යෙදෙයි. 1956 නිදහස් සටනේදී ඔහු එරට ලේඛක සංවිධානයේ උප සභාපති බවට පත්විය. නැවත වරක්, සිය නිජබිමෙහිදීම කලාකරුවන්ගේ හා බුද්ධිමතුන්ගේ නිදහස වෙනුවෙන් සටන් වදින ඔහු, ආඥාදායකත්වයට එරෙහිව ලියා පළ කළ “Why I do not like comrade kucsera” නමැති නිබන්ධය අදටද වලංගු ය. හේ ගේ අභාවයෙන් පසු ජර්මන් සඟරාවකට ඔහු පිළිබඳ ලිපියක් ලියූ විචාරකයකු මෙසේ සඳහන් කළේය. “ජුලියස් හේ සමාජ සත්තා යථාර්ථවාදී පිළේ ද නොසිටියේ ය. එහෙයින් ඔහු බ්‍රෙෂ්ට් හා සම තැන තැබීමටද නොහැකිය. එසේම හේ, ඔවුනට ප්‍රතිවිරුද්ධ පාර්ශ්වයෙහි ද නොවීය.”

ජුලියස් හේ කිසිදු පිළකට වහල් නොවූ, නිදහස් මතික, ස්වාධීන සමාජවාදියෙකු වූ බව මෙයින් පැහැදිලි වෙයි.

හංගේරියානු පාලකයෝ, ජුලියස් හේ ට සය වසරක සිර දඬුවමක් පැනවූ නමුදු, පසුව තෙවසරකට පසු නිදහස් කෙරුණි. “තුරඟා” රචනා කෙරුණේ මේ අවධියෙහිය.

“Julius Hay 1900” යනු ජුලියස් හේ ගේ ස්වයං චරිතාපදානයයි. එහි එක් තැනක මෙසේ සඳහන් වෙයි.

“1934 දී මගේ පියා මිය ගියා. මට ඔහුගේ අවමඟුලට යා නොහැකි වූයේ, එවකට මා භයානක කොමියුනිස්ට් කාරයෙකු ලෙස වියානාවේ සිරගතකොට සිටි නිසා 1958 දී මගේ මව මිය යනවිට, මා බුඩාපේස්ට් හි සිරගෙයක් තුළ. එවිට මා හැඳින්වුණේ භයානක, කොමියුනිස්ට් විරෝධියකු ලෙස.”

ජුලියස් හේ පවසන අන්දමට, ඔහුගේ දේශපාලන දෘෂ්ටිය වෙනස් වූයේ නම්, ඒ සමාජවාදී මාවතේ ගමන් කරන්නේ යැයි කියමින් බලකාමී ආඥාදායකයන් බවට පත්වූ නායකයන් නිසාය.

හේ, තම අවසාන කාලය ගත කළේ ස්විස්ටර්ලන්තයෙහිය. ඔහුගේ නාට්‍ය, නිජබිමෙහි තහනම්ව තිබුණත් යුරෝපා රටවල වේදිකාගත කෙරුණි. 1975 මැයි 7දා සිය 75 වෙනි උපන් දිනයෙන් දින 2කට පසු - ජුලියස් හේ මිය ගියේය. ඔහුගේ පුතා පීටර්, කැනඩාවේ පදිංචි ගත්කතුවරයෙකි. ප්‍රකාශකයෙකි.

“තුරඟ සන්නිය” නාට්‍යයේ කතා වින්‍යාසය ගොඩනැ‍ඟෙන්නේ රෝමයේ සීසර්වරුන් දොළොස්දෙනා අතුරින් අවසාන පාලකයා වූ කේයස් සීසර් කලිගියුලාගේ චරිතය ඇසුරිනි. ප්‍රංශ ලේඛක ඇල්බෙයා කැමු (Albeye Camus) ද “කලිගියුලා” මැයින් ම නාටකයක් ලිවීය.

කලිගියුලා යනු, ලෝක ඉතිහාසයේ සඳහන් කෲරතම පාලකයන් අතර ද, කෲරතමයා ලෙස සැලකෙයි. ඔහුගේ මනස අවුල් වූයේ, අපස්මාරයෙන් පෙළුණු නිසා හෝ සිය බිසව විසින් කැවූ ඉනා බෙහෙතක් බලපෑමෙන් විය හැකි යැයි ඉතිහාසඥයෝ සැක පහළ කරති.

“ද හෝස්” නාට්‍යයේදී, කලිගියුලා තමන්ට වාසනාව ගෙන ආ ඉග්නේෂස් නම් අශ්වයා පුරෝහිත තනතුරට පත් කරයි. මෙබඳු ඔල්මොරොන්දන් වැඩවලින් රෝම වැසියා අන්දමන්ද වන නමුදු ඊට එරෙහි වනු නොහැකිව විපරිත ජීවන රටාවකට අනුගත වෙයි. කලිගියුලා තම අශ්ව පුරෝහිතයාට මිනිස් භාර්යාවක සොයාදීමට උත්සාහ කරයි. රෝමයේ සිටින සියලුම දෙමාපියෝ තම දියණියන් ඔහුට විවාහ කර දීමට සිහින දකිති. අවසානයේදී බැංකුපතියෙකුගේ (ෆුෆිසියස්) දියණිය වන අමියානා පුරෝහිත සරණපාවා ගනී. මද කලකින් කලිගියුලාටද පුරෝහිතගේ මිනිස් බිරිඳට සිත ඇදී යයි. ඒ සඳහා ඔහුට ද අශ්වයකුසේ වෙස්වලා ගැනීමට සිදුවෙයි. නාට්‍ය අවසානයේදී කලිගියුලා වැසියන්ගෙන් පහර කන අතර පුරෝහිත අශ්වයා මරුමුවට පත්වෙයි.

මෙම නාටකයේ එන සිලේනස් නමැති තරුණයාගේ මුවට නංවා ඇති මෙම දෙබස් ඛණ්ඩය කලිගියුලා සමයේ රෝමය පිළිබඳ විවරණයක් ප්‍රේක්ෂකයා ඉදිරියේ තබයි.

“සිලේනස් - රෝමය මොනතරම් පුදුමාකාර නගරයක් ද, ගමේ උන්ට කීවොත් උන් මා අදහන එකක් නෑ. ඒත් මට කිසිවක් තේරුම් ගන්න බෑ. තමා තෘප්තිමත් බව පෙන්වන්න එක මිනිහෙක් සතුටු නෑ. සැක කරන්න ඒ ඇති. අසන්තෝෂයෙන් ඉන්න බව පෙනේනෙත් නෑ. මොකද ඒකත් සැකයට හේතුවක්. බය නැතුව ඉන්නත් මිනිස්සු බයයි. ආත්ම විශ්වාසය තරම් සැකයට හේතුවෙන වෙන කිසිවක් නෑ... මිනිහෙක් ජනප්‍රිය නම් ඔහු අධිරාජ්‍යයාට විරුද්ධව කුමන්ත්‍රණය කරන්නෙක්. මිනිහෙක් පොහොසත් නම් ඔහු අධිරාජ්‍යයාට වංචා කරනවා වෙන්න පුළුවන්. නැති වෙන්න කිසිවක් නැත්නම් ඔහු තරම් භයානක පුද්ගලයෙක් තවත් නෑ. උසස් නිලයක් දැරීම අපරාධයක්. උසස් නිලයකින් ඉල්ලා අස්වීමත් අපරාධයක්. ඒත් අපරාධයන්ගෙනුත් අපරාධය තමයි. නිරපරාදවීම, අධිරාජ්‍යයාට ඇදට නොපෙනෙන එකම ගුණාංගයක්වත් තබා ගැනීම මිනිහෙකුට අපහසුයි. සැකය, අවිශ්වාසය, සංකාව හැමතැනම. මේ ඊයේ පෙරේදා රෝම වැසියෙක් ස්වාභාවික මරණයකට ගොදුරු උනා. ඇ‍ඳේදීම මිනිහෙක් මැරිලා! බොහොම සැක කටයුතුයි. හරිම අවිශ්වාසදායක වෙන්න බැරි වැඩක්.”

ආඥාදායකත්වය තුළ විපරීත වන සමාජය දෙස ජුලියස් හේ හෙලන්නේ කර්කශ, උපහාසයෙන් පිරි බැල්මකි. අශ්වයකු පුරෝහිතයන් බවට පත්කර ගන්නා අධිරාජ්‍යයන් පමණක් නොව ඔවුන්ට අනුකූලත්ව දක්වමින් වහල් ජීවිත ගතකරන පුරවැසියන්ද එදා පමණක් නොව අද දවසේද ලොව දක්නට ලැබෙන බව තුරඟ සන්නිය නරඹා පිටව යන්නෙකුට හැ‍ඟෙයි. තුරඟ සන්නිය මිනිස් සමාජයෙන් තුරන් කළයුතු භයානක දේශපාලන වසංගතයක් බවද ජුලියස් හේගේ මේ විශිෂ්ට නාටකය අපට ඉඟි කරයි.”

කපිඑල කුමාර කාලිංග

Although we hail from different lands

we share one earth and sky and sun

remember friends, the world is one..

-we want all enmity to seize

for we want peace, we all want peace

we want no hate, we want no strife

since we born for love and life

come let us chant while joining hands

we shall not rest till wars are done

remember friends, the world is one..

we have matured to dream build

we want our dreams to be fulfilled

we have come here to dream and plan

A world of joy and hope for man

A world his dignity demands

A world that we shall see begun

ඉහත පළවෙන ඉංග්‍රීසි පදමාලාව සහිත ගීතය සමහර විට ඔබ අසා ඇති. මේ දවස්වල මේ ගීය සමාජ මාධ්‍යයේ අවධානයට ලක් වී තිබෙන නිසා ඔබත් එක්ක ඒ ගැන ටිකක් කතා බහ කරන්න හිතුණා. අලුත් අවුරුද්දෙ සමාජ ජාලයේ පළ වෙන විවිධ ශුභාශිංසන අතරට මේ ගීය එක් වී තිබීමත් ඉතා වැදගත් කියා මට හිතෙනවා.

Although we hail from different lands මේ ගීතය ගායනා කරන්නේ ඉන්දියාවේ ස්වර්ණමය හඬ ලෙස විරුදාවලිය ලබන ජනකාන්ත ගායක මොහොම්මඩ් රෆි. රෆිගෙම ඉතා ජනප්‍රිය හින්දි ගීයක තනුවක් අනුව ගැයෙන නිසා මේ ගීය ඉන්දියානු දේශසීමා ඉක්මවමින් සමස්ත ලෝකවාසීන්ගෙම සිත්සතන් අවදි කිරීමට සමත්ව තිබෙන බවත් පැවසෙනවා. ඇත්තටම හින්දි ගීයේ තනුව මිසක් පදමාලාව ඉංග්‍රීසි ගීයත් සමඟ කිසිම සම්බන්ධයක් නැති බවත් මුලින්ම කිව යුතුයි. අග්‍රගණ්‍ය ඉන්දියානු සංගීතඥයන් දෙපළක් වන ෂන්කර් හා ජායිකිෂන්ගෙ මියුරු සංගීතය වගේම සිත්සසල කරවන තනුව නිසා ඉමහත් ජනප්‍රසාදයට පත් “බහරන් පූල් බරාෂෝ ” තමයි ඒ අපූරු ගීයෙ නම. 1966 දී වාර්තා තබමින් තිරගත වූ “සුරාජ්” නම් චිත්‍රපටියෙ මේ ගීය ගයමින් රංගනයක යෙදෙන්නෙ හින්දි සිනමාවේ සුපිරි තරු යුවලක් වන රාජේන්ද්‍රකුමාර් හා වෛජන්තිමාලා. විරහ ගීයක් ලෙසින් ගැයෙන නිසාදෝ රසික ප්‍රජාව අතර මේ ගීය යුග සීමා හා දේශසීමා තරණය කරමින් ජන හදවත් පැහැරගෙන තිබෙන සැටි විස්මිතයි.

බහරන් පූල් බරාෂෝ ගීතය වගේම although we hail from different lands මේ වෙන විට එක හා සමානවම ලොව පුරා ජනප්‍රිය වී හමාරයි. විශේසයෙන්ම ඉංග්‍රීසි පදමාලාවෙන් වහනය වන මානව දයාව පිළිබඳ මාහැඟි පණිවිඩය සාමය හා සහජීවනය අගයන කෝටි සංඛාත ලෝක ජනතාවගේ හදවත් කම්පනය කර තිබෙන බවයි සමාජ මාධ්‍යයේ දක්වා තිබෙන ප්‍රතිචාරවලින් පෙනී යන්නෙ. මේ ගීයද ඇතුළු ඉංග්‍රීසි ගී ඇල්බමයක් මොහාම්මඩ් රෆි අතින් නිමවුණේ නවසිය අනූපහ කාලසීමාවේ ඔහු ලන්ඩනයේ ජීවත් වූ සමයේ බවත් කියනවා. අපගේ අවධානයට ලක් වන ඉංග්‍රීසි ගීයේ පදමාලාව ලියා තිබෙන්නෙත් ප්‍රකට ලේඛකයකු වගේම නළුවකු හා විප්ලවවාදියකු වන හරින්ද්‍ර චට්ටෝපාධ්‍යාය. සාමාන්‍ය ඉංග්‍රීසි දැනුමක් තියෙන ඕනාම කෙනකුට තේරුම් ගත හැකි ඉතා සරල වදන් යොදා රචනා කළ ගීයක් වීමත් මෙහි ජනප්‍රියත්වයට බෙහෙවින් බලපෑ හේතුවක්. එසේම මිනිසත්කම, ආදරය හා කරුණාව වැනි ගුණාංග ඉස්මතු කරන රාෆිගේ ළගන්නාසුලූ හඬ අපගේ සිත් කම්පනයට පත් කරන ආකාරයත් මෙහි දී කිසිසේත් අමතක කළ නොහැකියි. සාමයේ කුමරා ලෙස සැලකෙන ක්‍රිස්තුස් වහන්සේගේ උපත සැමරූ පසුගිය නත්තල් සමයේ බෙහෝ දෙනා තම නත්තල් සුබ පැතුම් අතරට මේ ගීයත් එක්කර ගන්නට ඇත්තේ එහි ගැබ්ව තිබෙන මේ වෙසෙස් ගූණාංග නිසාම වෙන්න ඕනා.

රෆිගේ ඉංග්‍රීසි ගී ඇල්බමය පිළිබඳව යූ ටියුබයේ සටහනක් තබන ඉන්දීය ගීත ලෝලියකු වන සන්ජීව් කුමාර් ඩික්සිත් කියා තිබුණේ මොහොම්මඩ් රෆි තරම් විවිධ භාෂාවන්ගෙන් ගී ගැයූ වෙනත් ගායකයෙක් ඇතැයි සිතිය නොහැකි බවයි. ඔහුගේ ස්වර උච්චාරණය විවිධ භාෂාවන් හා ජාතීන් තෘප්තියට පත් කිරීමට සමත් ආශ්චර්යයක් වූ බවයි ඩික්සිත් තවදුරටත් කියා සිටින්නෙ. රෆි හින්දි බසට අමතරව කේරළ, පර්සියන්, ගුජරාටි, ලන්දේසි හා ඉංග්‍රීසි භාෂාවලින්ද ගීත ගායනයේ යෙදුණු ප්‍රතිභාපූර්ණ ගායකයෙක්. 1924 වසරේ ඉන්දියාව් පන්ජාබ් ප්‍රාන්තයේ උපත ලැබූ ඔහු සුවහසක් රසික ජනයාගේ හදවත් සසල කරමින් මෙලොවින් සමු ගත්තේ 1980දි. රෆි ගායන ක්ෂේත්‍රයට එක් වන්නේ 1944දි. එතැන් පටන් හින්දි රි දී තිරය පුරා ඔහුගේ හඬ පෞරුෂය පැතිර ගියේ ගීත ලෝලීන්ගේ හදවත් වැළඳගනිමින්. මේ වන විට ඔහු විවිධ භාෂාවන්ගෙන් ගයා ඇති ගී සංඛ්‍යාව 7500ත් ඉක්මවන බවයි වාර්තා අනුව පෙනී යන්නෙ. ඉන්දියානු සිනමාවේ මෙන්ම සංගීතයේද යෝධ පියසටහන් තබා ඇති ඔහුට පිරිනැමී ඇති සම්මාන මෙතෙකැයි කියන්න බැහැ. ඉන්දියාවෙ 14 වන ෆිල්ම් ෆෙයා සම්මාන උළෙලෙදි සුරාජ් සිනමාපටයට බහරන් පුල් බර්ෂෝ ගීතය ගායනය වෙනුවෙන් ලැබුණු හොඳම ගායකයාට හිමි සම්මානය මේ අතර විශේෂයි. අපේ ජනකාන්ත ගායකයන් දෙපළක් වන ජෝති හා මිල්ටනුත් මේ ගීයේ තනුවට නිර්මාණය කළ ගීදෙකක් ගායනා කර තිබෙන බව මෙහි දී නොකියා බැහැ. ජෝති ගයන “මවා සෝ තාප සංකාවෝ අපේ පෙම් ලොව දැවේ ගින්නේ” හා මිල්ටන්ගේ “සුවබර ආලක මැදුරේ උදා වූ සීගිරි ළඳුනේ” තමයි මේ ගීත දෙක. මොහාම්මඩ් රෆිගේ චරිතාපදානය ලියූ ප්‍රකට ලේඛිකා සුජාතා දේව් පවසන ආකාරයට “හින්දි රි දී තිරයේ ස්වර්ණමය හඬ” යන කීර්ති නාමයේ එකම හිමිකරුවා ඔහුයි. මොහොම්මඩ් රෆිගේ අභාවය වෙනුවෙන් ඉන්දීය රජය දින 2ක ශෝක කාලයක් ප්‍රකාශ කිරීමෙන්ම තහවුරු වෙනවා ඔහුට කෙතරම් ජනප්‍රසාදයක් හිමිව තිබුණාද කියන වග.

ග්‍රහ ලෝක තරණය කරන්න තරම් හපනුන් වී සිටියත් අද සමස්ත මිනිස් වර්ගයාම පසු වෙන්නෙ ආධ්‍යාත්මික ප්‍රපාතයක් කරා ගමන් කරමින් සිටින යුගයක. මෙවන් වකවානුවක although we hail from different lands ගීතය ඔස්සෙ තම හෘදය සාක්ෂිය දෙස යළි එබී බලන ලෙස මොහොම්මඩ් රෆී මානව වර්ගයා වෙත හෘදයංගම ආමන්ත්‍රණයක් කරනවා. ගීතයේ මේ පද කීපයම වුණත් ප්‍රමාණවත් ඔහුගේ මේ දයාබර ආයාචනය තේරුම් ගන්න.

“උපන්නත් අපි විවිධ දෙස්වල

එකම පොළොවක, ඉර හඳක උරුමකරුවන් වෙමු අප.

මතක තබාගන්න මිතුරනි...ලෝකය තනි යායකි..

හතුරුකම් අවසන් කරමු

අපිට අවැසියි සාමය..ඔව් අපි හැමෝටම අවැසිමයි සාමය

එපාමයි වෛරය.. එපාමයි ද්වේෂය

මන්ද අපි ඉපිද ඇත්තේ බෙදාගන්නයි ආදරය

එන්න මිතුරනි, ගයමු අපි අත්වැල් බැඳගෙන

අපට නිවනක් තියේවිද යුද ගිනි ඇවිලෙනා තුරු

මතක තබාගන්න මිතුරනි, ලෝකය තනි යායකි..

සිහින මැදුරු තනන්නට තරම්- මුහුකුරා ගොසිනි අප

අවැසිමයි ඒ සිහින සැබෑ වනු දකින්නට

පැමිණ ඇත්තේ මෙහි අප සිහින සදන්නටමය

අපේක්ෂා පිරි මිනිස් ලෝකයක්

මින්ස්කමට සරිලන ලෝකයක්.....

එවන් ලොවක් බිහිවනු දැක්මයි අප පැතුම..

කමල් පෙරේරා

2015 ජනවාරි අට ‍මෙරට ප්‍රජාතන්ත්‍රවාදී ඉතිහාසය තුළ ඉතාමත් වැදගත් සංධිස්ථානයකි. ජනවාරි අට විප්ලවය ජනවාරි අට ‍වෙනස ආදී කුමන ආකාරයකින් නිර්වචනය කළද ‍ජනවාරි අට ලැබු ජනතා විජයග්‍රහණයට ලැ‍බෙන වැදගත් කම අඩුවන්නේ නැත. ‍ජනවාරි අට පරිවර්තනයට ‍පෙර ‍මෙරට තිබු‍ණේ ‍ප්‍රජාතන්ත්‍රවාදයට විලංගු දැමු නිදහස , මානව අයිතීන් ඇතුළු ‍ලොව පිළිගත් මුලධර්මවලට පිටුපා කටයුතු කළ පාලන තන්ත්‍රයකි. ජනතාව තුළ ‍පැවැති පාලන තන්ත්‍රයට විරුද්ධව විශාල මතයක් ඇතිව තිබුණද එම සියලු මතවාද පාගා දමා තමන්ට කැමැති මතයට පමණක් ඉඩ ලැ‍බෙන වාතාවරණයක් එවකට ‍ගොඩනැගී තිබුණි. එ‍හෙත් ‍මේ වන විට විපක්ෂය තුළත් ඉන් පිටත සිවිල් සමාජය තුළත් ‍එවකට පැවැති රාජපක්ෂ ආණ්ඩු‍වේ වැඩපිළිවෙළට එ‍රෙහිව ‍පොදු වැඩපිළි‍වෙළකට අවශ්‍ය පසුබිම ඇතිවී තිබුණි. 2015 ජනවාරි අට ‍මෛත්‍රීපාල සිරි‍සේන මහතා මුල් කරගනිමින් ජයග්‍රහණය ක‍ළේ සියලු ප්‍රගතිශීලී කණ්ඩායම් එක්ව බිහි කළ ‍පොදු වැඩපිළි‍වෙළයි. සැබෑ ‍ලෙසම ජනවාරි අට ජයග්‍රහණය එක් පුද්ගලයකුට ‍හෝ ‍එක් ‍දේශපාලන පක්ෂයක ජයග්‍රහණයක් ‍නොව ඉදිරිගාමි සමාජ සහ ‍දේශපාලන වැඩපිළි‍වෙළ ලැබූ ජයග්‍රහණයකි. ‍මෙම ‍පොදු වැඩපිළි‍වෙ‍‍‍ළෙහි ජයග්‍රහණය මගින් පසුගිය අවුරුදු හතර තුළ රටට ජයග්‍රහණ රැසක් අත්පත් කර ගැනීමට හැකියාව ලැබුණි. ‍මෙම වැඩපිළි‍වෙළ අතර ඇසට ‍පෙ‍නෙන ‍ජයග්‍රහණ ‍මෙන්ම ඇසට ‍නො‍පෙ‍නෙන වැදගත් ජයග්‍රහණ රැසත් ඇතුළත්ව ති‍බේ.

2015 ජනවාරි අට වන විට අන්තර්ජාතිකව අප රට සිටි‍යේ ‍ලෝක‍යේ හු‍දෙකලා වු රටක් ‍ලෙසිනි. ‍ලෝක‍යේ අපට සිටි‍යේ සීමිත මිතුරන් ප්‍රමාණයක් පමණි. එ‍හෙත් ජනවාරි අට ජයග්‍රහණය සමග අන්තර්ජාතිකව ‍මෙරටට තිබු කළු පැල්ලම් ඉවත් කර ‍‍ලෝක‍යේ ඉහළ පිළිගැනීමක් සහිත ශිෂ්ටසම්පන්න රටක් බවට පත්වීමට ‍මෙරටට හැකියාව ලැබුණි. මානව හිමිකම් පිළිබඳ ‍‍චෝදනා නිසා ආර්ථික සම්බාධක පැනවී‍මේ අනතුරකට මුහුණපා සිටි ශ්‍රීලංකාව එම තත්ත්ව‍යෙන් ගලවා ගැනීමට පමණක් ‍නොව ජී එස් පී ප්ලස් සහනය ඇතුළු අහිමි වී තිබූ වරප්‍රසාද රැසක් නැවත ලබා ගැනීමට හැකියාව ලැ‍බෙන්‍‍නේ ජනපති අගමැති මුල් කර ගත් වර්තමාන රජ‍යේ නිවැරැදි දැක්ම නිසාය. ‍මෙහිදි එක කඳවුරක් ‍නොව ඉන්දියාව , චීනය, යු‍රෝපය ,අ‍මෙරිකාව ජපානය වැනි හැම පාර්ශ්වයකම අප රටට සහ‍යෝගය ලැබුණි. අන්තර් ජාතික මුල්‍ය අරමුදල යු‍රෝපා සංගමය වැනි ආයතනවලින් අප රටට අඩු ‍පොලී යට‍තේ ණය ලැ‍බෙන්‍‍නේද ‍ජනවාරි අට ජයග්‍රහණ‍යේ ප්‍රතිඵල වශ‍යෙනි. 2015 ‍පෙර පැවැති රාජපක්ෂ ආණ්ඩුව සියළු ව්‍යාපෘති සඳහා ණය මුදල් ලබා ‍‍ගත්තේ අධික ‍පොලියකට යටත්ව ‍‍වෙනත් අන්තර්ජාතික ආයතනවලිනි.

ජනවාරි අට වැඩපිළි‍වෙ‍‍ළේ තවත් වැදගත්ම අංගයක් බවට පත්ව ති‍බු‍ණේ ව්‍යවස්ථා ප්‍රතිසංස්කරණ සහ විධායක ජනාධිපති ධුරය ‍වෙත ආ‍රෝපණය වී තිබූ අත්තනෝමතික බලතල ඉවත් කර එම ධූරය පාර්ලි‍මේන්තුව සමග සහ‍යෝග‍යෙන් කටයුතු කරන ධුරයක් බවට පත්කිරීමයි. එ‍තෙක් කල් වචනයකට පමණක් සීමා වී තිබූ ‍මෙම ‍යෝජනාව ජනවාරි අට ආණ්ඩුව බලයට පත්ව මාස පහක් ගත ‍වෙද්දීම යථාර්ථයක් බවට පත්වීම අගය කළ යුතුය.

එ‍මෙන්ම ස්වාධීන ‍කොමිෂන් සභා පිහිටුවීම සහ මැතිවරණ ‍කොමිසම, ‍පොලිස් ‍කොමිසම ඇතුළු වැදගත් ‍කොමිෂන් සභා ඇති කිරීම නිසා ‍මෙරට ප්‍රජාතන්ත්‍රවාදය වඩාත් ශක්තිමත් තැනකට පත්වූ‍යේ යැයි සඳහන් කිරීම අතිශ‍යෝක්තියක් ‍නො‍වේ. ‍මේ නිසා ස්වාධීන අධිකරණ පද්ධතියක් ඇති , මැතිවරණ ‍කොමිසම මගින් නිදහස් මැතිවරණයකට අවශ්‍ය පසුබිම නිර්මාණය වීම යන කරුණු වඩාත් වැදගත් ප්‍රවේශ ‍ලෙස සඳහන් කළ හැකිය.‍එ‍මෙන්ම ‍පොලිස් ‍කොමිසම සහ ව්‍යවස්ථාදායක සභාව ‍මෙන්ම රාජ්‍ය ‍සේවා ‍කොමිසමද ජනවාරි අටවනදා ඇතිවූ ප්‍රගතිශීලී වැඩපිළි‍වෙළෙහි අග්‍රප්‍රතිඵල ‍ලෙස සඳහන් කළ හැකිය.

ජනවාරි අට ජයග්‍රහණ අතරින් වඩාත්ම වැදගත් කරුණක් ‍ලෙස ‍තොරතුරු දැන ගැනීම් පනත සම්මත වීම සඳහන් කළ හැකිය. ‍මෙය ඉතිහාස‍යේ වැදගත් පනතක් ‍ලෙස හඳුන්වා දිය හැකිය. ‍මෙහි සම්පූර්ණ ගරුත්වය ‍ ජනවාරි අට ‍දේශපාලන වැඩපිළි‍වෙලට සහ ‍ ‍මෛත්‍රී , රනිල් ආණ්ඩුවට හිමි විය යුතුය. ‍ජනවාරි අට බලයට පත් නව රජය ලබා දුන් ‍මෙම ප්‍රජාතන්ත්‍රවාදී ජයග්‍රහණ එ‍තෙක් ‍මෙ‍තෙක් ‍වෙනත් කිසිදු ආණ්ඩුවක් ලබා දීම තබා ලබා දීමට සිතූ ‍දේ ‍හෝ ‍නොවීය.

‍පොදු‍වේ ගත් කල ජනාධිපතිවරයා‍ගේ අගමැතිවරයා‍ගේ සිට ආණ්ඩු‍වේ ‍සෙසු ‍කොටස් වි‍වේචනය කිරී‍මේ නිදහස මාධ්‍ය සහ ‍සෙසු සමාජ මාධ්‍යවලට හිමිවන්නේ ‍මේ කාල‍යේදීය. අද පවා ජනාධිපති අගමැති ‍හෝ ‍සෙස්සන් වි‍වේචනය කළද එම මාධ්‍ය ආයතනවලට ‍හෝ මාධ්‍යවේදීන්ට තර්ජන එල්ල වන්නේ නැත. එ‍හෙත් 2015 ‍පෙර අතීතය බිය කරුය. මාධ්‍යවේදීන් සුදු වෑන්වලින් පැහැර ගන්නේ මරා දමන්නේ මාධ්‍ය ආයතන ගිනි තබන්‍‍නේ ඒ අවදි‍යේදීය.

ප්‍රජතන්ත්‍රවාදී ජයග්‍රහණවලට පමණක් ජනවාරි අට ජයග්‍රහණය පටු වන්‍‍නේ නැත. රාජ්‍ය ‍සේවකයන්ට රුපියල් දසදහසක වැටුප් ඉහළ යාමක් ලබා දීම පුද්ගලික අංශ‍යේ ‍සේවකයන් ‍වෙත රුපියල් ‍දෙදහස් පන්සියයක වැටුප් ඉහළ යාමක් ලබා දීම අත්‍යාවශ්‍ය ආහාර ද්‍රව්‍ය සහ ගෑස් ඉන්ධන ඇතුළු ‍දේවල මිල ගණන් කැපී ‍පෙ‍නෙන ‍ලෙස පහළ ‍‍හෙළීමද සඳහන් කළ හැකිය.

සියයට අසූව දක්වා දුම්වැටි අසුරණවල රූපමය අවවාද ක්‍රියාවට නැංවීම භාවිතය දිරිමත් ‍නොවන ආකාරයට එහි බදු ඉහළ දැමීම වැනි කරුණු නිසා ‍මෙම ද්‍රව්‍ය පරිහරණ‍යේ කැපී ‍පෙ‍නෙන අඩුවක් ඇතිව ති‍බේ. ‍මෙ‍තෙක් කල් ‍මෙවැනි ‍දේ ‍වෙත ජනාධිපතිවරයකු සෘජු ‍ලෙස මැදහත් ‍නොවුණද ජනාධිපති ‍මෛ‍ත්‍රීපාල සිරි‍සේන මහතා ‍මෙම කරුණු ගැන පුද්ගලිකවම අවධානය ‍යොමුකිරීම අගය කළ යුතුය. ජනාධිපතිවරයා‍ගේ න්‍යායපත්‍රයේ මුලටම මත් වි‍රෝධි ප්‍රතිපත්ති අනුගමනය කිරීම ‍මෙම මත් වි‍රෝධී ප්‍රතිපත්ති සවිමත් වීමට ප්‍රබල ‍හේතුවක්ව ති‍බේ.

පසුගිය අවුරුදු හතර තුළ ‍මෙරට සිදුවූ වැදගත්ම සංවර්ධන ව්‍යාපෘතිය ‍ලෙස සඳහන් කළ හැක්කේ ‍මොරගහකන්ද කළුගඟ ව්‍යාපෘතියයි. 2015 ට ‍පෙර ඇරඹුණද එම ව්‍යාපෘතිය ‍වේගවත් ‍ලෙස නිමා වූ‍යේ පසුගිය අවුරුදු හත‍රේදීය. ‍මෙමගින් ර‍ටේ උතුරු අර්ධයට විශාල ‍සෙතක් සැල‍සෙන අතර ‍මෙය ‍මෙරට ක්‍රියාත්මක වූ දැවැන්තම බහුකාර්ය වාරී ව්‍යාපෘතිය ‍ලෙස සඳහන් කිරී‍මේ වරදක් නැත. එ‍මෙන්ම ‍‍මොරගහකන්ද ව්‍යාපෘතිය නිසා එම ප්‍රදේශ ආශ්‍රිතව නව නගර ඉදිවීම ඇතුළු සංවර්ධන කාර්ය රැසක් ඉටුවන අතර අංග සම්පූර්ණව ඉදිවූ නව ලග්ගල නගරය අද දින ජනතා අයිතියට පැවරීමට නියමිතව ති‍බේ.

එ‍මෙන්ම මහනුවර අධි‍වේගී මාර්ග‍යේ ඉදිකිරීම් කටයුතුද ‍මේ වන විට ආරම්භ වී ඇති අතර ‍මෙය ර‍ටේ මාර්ග සංවර්ධන‍යේ විශාල පිම්මක් ‍ලෙස සඳහන් කළ හැකිය. දැනටමත් කඩවත් සිට ‍කෙරවලපිටිය දක්වා අධි‍වේගී වටරවුම් මාර්ග‍යේ ඉදිකිරීම් සියයට අනූවක් නිමවා ති‍බෙන අතර මාතර ‍බෙලිඅත්ත දුම්රිය මාර්ගය ඉදිරි මාස කිහිප‍යේදී ජනතා අයිතියට පැවරීමට නියමිතය. ‍

එ‍මෙන්ම ග්‍රමීය ප්‍රදේශ ‍කේන්ද්‍ර කරගනිමින් ඉදිකිරීම් මාර්ග සංවර්ධනය කිරීම ගුවන්පාලම් ඉදිකිරීම ඇතුළු වැදගත් කරුණු රැසක් සපුරා ති‍බේ. සංවර්ධනය කිසිවක් සිදු ‍නොවූ බවට ඇතැමුන් නගන තර්කවලට ‍මෙම ඉදිකිරීම් කදිම පිළිතුරකි. ‍මෙහි වැදගත්කම වැඩි වන්නේ ප්‍රජාතන්ත්‍රවාදි ජයග්‍රහණ , අන්තර් ජාතික ජයග්‍රහණ සමග සංවර්ධනයට අවශ්‍ය මූලිකාංග ඇතිව තිබීම අගය කළ යුතුය.

එ‍මෙන්ම ග්‍රාමීය සංවර්ධනය මුල්කර ගත් ගම්පෙරළිය ව්‍යාපෘතිය ‍මෙන්ම එන්ට්‍රප්‍රයිස් ශ්‍රීලංකා ව්‍යවසායකත්ව ණය වැඩපිළි‍වෙළද ගැමි ආර්ථිකය ඉහළ නංවා පුංචි මිනිසා සවිමත් කිරීම සඳහා රජය ආරම්භ කළ වැඩසටහන්ය.

ජනවාරි අට ‍පෙරළි‍යෙන් පසු ඉදිරියට ගිය අංශයක් ‍ලෙස සුව‍සේවා අංශයද ඉදිරි‍යෙන් සිටි. සුවසැරිය ගිලන් රථ ‍සේවය සඳහන් කළ හැකිය. ‍මේ ‍සේවය නිසා පසුගිය අවුරුදු කිහිපය තුළ ජනතාවට විශාල ‍සේවාවක් සැලසුණි.එ‍මෙන්ම අත්‍යාවශ්‍ය ‍බෙ‍හෙත් වර්ග රැසක මිල පහළ ‍හෙළීම , ඇස් කාච මිල පහළ ‍හෙළීම ස්ට්‍රෙන්ත් මිල පහළ ‍හෙළීම වැනි කරුණු නිසා අඩු ආදායම් ලාභී ‍පොදුජනතාව ‍වෙත ලැබුණ ‍සෙත අපමණය. 2015 බලයට පත්වූ ආණ්ඩුව ජනතාව ‍වෙත ලබා දුන් බලවත්ම සහනය ‍ලෙස ‍මෙය හඳුන්වා දී‍මේ වරදක් නැත.‍

අධ්‍යාපන අං‍ශ‍යේද විශාල වැඩ‍කොටසක් ඉ‍ටුකිරීමට ‍මෙම ආණ්ඩුවට හැකියාව ලැබුණි. එ‍තෙක් කල් ‍දේශාපාලනීකරණය වී තිබූ අධ්‍යාපන අංශය ඉන්මුදවා ගැනීමට හැකිවීම අගය කළ හැකිය. නිසි පදනමක් යට‍තේ දරුවන් පාසල්වලට ඇතුළත් කිරීම විදුහල්පති ගුරුපත්වීම් මාරුකිරීම් ‍දේශපාලන‍යෙන් ‍තොරව නිසි ආකාරයට ලබා දීම නිතැතින් අගැයුමට ලක්වන කරුණුය. ‍මෙහිදී ලක්ෂ හතලිහකට අධික රජ‍යේ සහ පුද්ගලික පාසල්වල සිසු දරුවන් ‍වෙත සුව ප්‍රතිලාභ ලබා ‍දෙන “සුරක්ෂා“ වැඩසටහන සුවි‍ශේෂය. නිසි ‍බෙ‍හෙතක් ‍රෝහලක ‍නේවාසික පහසුකමක් ලබා ගත ‍නොහැකි අඩුආදායම් ලාභී මාපියන්ගේ දරුවන්ට ‍මෙම ‍යෝජනා ක්‍රමය අග‍නේය.

‍මේ අතර රජ‍යේ ‍සේවකයන්ට සිය ‍සේවා කාල‍යේදී පමණක් හිමිවන අග්‍රහාර ප්‍රතිලාභ විශ්‍රාමිකයන් ‍වෙත ද ලබා දීමට කටයුතු කිරීම තවත් සුවි‍ශේෂ තත්ත්වයකි. ‍මේ සියල්ල පසුගිය අවුරුදු හතරක කාලය තුළ ජනතාව‍ ‍වෙත ලැබුණ ප්‍රතිලාභ ‍ලෙස සඳහන් කළ හැකිය.

ගම්උදාව සංකල්පය නැවත පණ ලැබීමද 2015 පසු ඇතිවූ තවත් සුවි‍ශේෂ ‍කාර්ය භාරයක් ‍ලෙස සදහන් කළ හැකිය. එමගින් ‍මේ වන විට උදාගම්මාන සිය ගණනක් ජනතා අයිතියට පැවරී ඇති අතර තවත් උදාගම්මාන රැසක් ඉදි‍වෙමින් පවතී. මහනගර සහ බස්නාහිර සංවර්ධන වැඩපිළි‍වෙළ යට‍තේද ව්‍යාපෘති සහ නව නගර සැලසුම් රැසක් ආරම්භ වී ඇති අතර ‍මෙය නුදුරු අනාගතය ගැන පමණක් ‍නොව දශක ගණනක් ඉදිරිය ගැන සලකා බලා ඇති කළ ව්‍යාපෘතියක් ‍ලෙස හඳුන්වා දී‍මේ වරදක් නැත. එ‍හෙත් 2015 ‍පෙර සංවර්ධන ව්‍යාපෘති නාම‍යෙන් විවිධ ‍දේ සිදු ‍කෙරුණද ‍මේ ව්‍යාපෘති සහ 2015 පසු ව්‍යාපෘති අතර ඇති ‍වෙනස්කම වන්නේ 2015 පසු ව්‍යාපෘති ප්‍රතිඵල දායක ‍ලෙස සැලසුම් කර ක්‍රියාත්මක වීමයි.

එ‍මෙන්ම 2015 ‍පෙර ගත් ණය ක්‍රමානුකුලව පියවීමටද වර්තමානය වන විට අවශ්‍ය සැලසුම් ක්‍රියාත්මක වන අතර එනිසා 2020 පසු ර‍ටේ ආර්ථික තත්ත්වය අදට වඩා සවිමත් වීමට ඉඩ විවිර වී ති‍බේ.

2015 ට ‍පෙර පැවැති රාජපක්ෂ ප්‍රතිපත්ති මූලික කර ගත් ආණ්ඩුව සමග සසඳා බලද්දී ජනවාරි අට වැඩපිළි‍වෙළ මුල් කරගත් ආණ්ඩුව ප්‍රජාතන්ත්‍රවාදය, රාජ්‍ය තාන්ත්‍රික භාවය, මැදහත් වි‍දෙස් පිළි‍වෙත ආදි‍යෙන් ‍2015 ආණ්ඩුව විශාල ප්‍රගතියක් ලබා ඇති අතර ජනතාවටද අදහස් පළ කිරීම වි‍වේචනය වැනි ‍දේ නිදහ‍සේ කිරීමට හැකි වාතාවරණයක් ඇතිව ති‍බේ. ‍මෙම තත්ත්වය සමහරු අඩුපාඩුවක් ‍ලෙස සැලකුවද ‍මෙම නිදහස් වටපිටාව 2015 ලැබූ ජනතා ජයග්‍රහණයක් ‍ලෙස සඳහන් කිරී‍මේ වරදක් නැත.

විවිධ බාධක මැද ඉදිරියට පැමිණි ජනවාරි අට වැඩපිළි‍වෙළ රටට විශාල ජයග්‍රහණ ප්‍රමාණයක් ලබා දී ඇති අතර එම ජයග්‍රහණ ර‍ටේ අනාගතය ස්ථාවර කරන මග සලකුණු ‍ලෙස සඳහන් කළ හැකිය.

උදිත ගුණවර්ධන

මහාචාර්ය රෝහණ ලක්ෂ්මන් පියදාස

2015 ජනවාරි 08 වන දින මෙරට දේශපාලන ඉතිහාසයට එක් වූ සුවිශේෂී දිනයකි. ඒ ජනමතයක් දැවැන්ත දේශපාලන පෙරළියක් සිදු කළ දිනයක් නිසා‍වෙනි. එදින මෙරට ජනපති ලෙස පදවි ප්‍රාප්ත වූ ජනපති මෛත්‍රීපාල සිරිසේනයන්ගේ ධුර කාලයේ සිව්වන වර්ෂ පූර්ණය අදට යෙදී තිබේ. එදා සිදු වූ දේශපාලන පෙරළියෙන් රටත් රටවැසියාත් ලැබූ දේ බොහෝ ය.

මෛත්‍රී යුගයක දේශපාලන ක්‍රියාවලිය හරි හැටි වටහා ගත හැක්කේ ඉන් පෙර පැවති දේශපාලන සංසිද්ධීන් සහ දේශපාලනඥයන්ගේ ක්‍රියා කලාප අධ්‍යයනය කිරීමෙනි.

මෙරට දේශපාලන වශයෙන් ඩොමීනියන් තත්ත්වය යටතේ නිදහසක් ලබාගෙන වසර 70ක් ඉකුත් වූ පසු එළැඹ ඇති මෙම කාල වකවානුව අධ්‍යයනය කිරීමේ දී කැපී පෙනෙන විශේෂත්වය වන්නේ මෙරට දේශපාලන බල ව්‍යූහය, අධිකාරීවාදී ප්‍රභූ සමාජයක් අතරින් ක්‍රමයෙන් සමාජයේ සාමාන්‍ය පංතිය වෙතට සංකේන්ද්‍රනය වූ ආකාරය යි. අප නිදහස ලබා ගන්නා විට මෙරට දේශපාලන බලය ලබාගත්තේ ප්‍රධාන අධිකාරීවාදී, ධනේෂ්වර පවුල්වලට සම්බන්ධ ප්‍රභූ ජනසමාජයේ කණ්ඩායම් ය. මෙම දේශපාලන බලය මාරුවන්‍‍‍‍නේ විශේෂයෙන් ම 1833 දී කෝල්බෲක් කොමසාරිස්වරුන්ගේ වාර්තා මත බිහිවන මිෂනාරි අධ්‍යාපනය ඔස්සේ හැදී වැඩුණු, ප්‍රභූ, යටත්විජිත මනෝභාවයන්ගෙන් යුක්ත සමාජ තීරුවේ ය. එසේම එම බල මාරුව තුළ පවුල් කේන්ද්‍ර ස්වභාවයක් සහ එක්තරා ආකාරයක වැඩවසම් ස්වභාවයක් දැකගත හැකි විය. මෙම බල හුවමාරුව සිදුවන ප්‍රධාන ප්‍රභූ සමාජ කණ්ඩායම් බවට පත්ව සිටියේ ඉඩම් හිමියන්, රේන්දකරුවන්, මිනිරන් පතල්කරුවන් වැනි සමාජයේ ඉහළ ස්ථරවල සිටි පිරිස් ය.

ඩී.එස්.සේනානායක, ඩඩ්ලි සේනානායක, සර් ජෝන් කොතලාවල වැනි දේශපාලන නායකයින් ඥාති පරම්පරාවලින් බිහි වූ එකම පවුල් ප්‍රවාහයක ජන කණ්ඩායම් ය. දහනව වන සියවසේ අගභාගයේ සිටි ප්‍රභූ පවුලක් වන ආටිගල පවුලේ දියණියන් තිදෙනෙකු සමඟ ආවාහ විවාහ වන මෙම ප්‍රධාන රාජ්‍ය නායකයන් තිදෙනා උදාහරණ ලෙස දැක්විය හැක. ජාතික සංගම් ව්‍යාපාරය, එක්සත් ජාතික පක්ෂය ආදි වශයෙන් ඉදිරියට ගලා ආවේ ඒ දේශපාලන බල ව්‍යූහයේ එක් හැඩයකි.

මේ අතරතුර තවත් විකල්ප සමාජ කණ්ඩායම් බිහි වූ අතර උදාහරණයක් ලෙස බණ්ඩාරනායක පවුල දැක්විය හැක. බණ්ඩාරනායක පවුල සේනානායක පවුලට වඩා වෙනස් ස්වරූපයක් ගත් බව කිව යුතු ය. සමාජය, ජන්මය සහ වර්ධනය සමාන වුවද බණ්ඩාරනායක මහතා සේනානායක මහතාට වඩා වෙනස් වූයේ ඔහුට බුද්ධිමය වශයෙන් දැනුමක්, ප්‍රවේශයක් සහ මෙරට ස්වදේශිකවාදය පිළිබද විශේෂ දැක්මක් පැවති බැවිනි. එක්සත් ජාතික පක්ෂය සහ ශ්‍රී ලංකා නිදහස් පක්ෂය බිහිවන්නේ මෙම සන්දර්භයන් මත යි. 1948 සිට 1980 දක්වා ම බලය දෝලනය වූයේ මෙම ප්‍රධාන පවුල් ද්විත්වය අතර ය.

එජාපය 80 දශකයෙන් පසුව ද වැඩෙන්නේ එම පවුල් ප්‍රවාහය තුළ ම ය. මන්ද රනිල් වික්‍රමසිංහ මහතාගේ පවුල් ප්‍රවාහය පිළිබඳ සලකා බලන විට ඔහුව හඳුන්වා දිය හැක්කේ ඩී.එස්.සේනානායක, ඩඩ්ලි සේනානායක, සර් ජෝන් කොතලාවල, ජේ ආර්.ජයවර්ධන යන ප්‍රභූවරුන්ගේ ඥාති පරම්පරාවේ ම අයකු ලෙසයි. ශ්‍රී ලංකා නිදහස් පක්ෂය පිළිබඳ සලකා බලනවිට එස්.ඩබ්.ආර්.ඩී. බණ්ඩාරනායක, සිරිමාවෝ බණ්ඩාරනායක, චන්ද්‍රිකා කුමාරතුංග ආදීන් අතට බලය ක්‍රමයෙන් හුවමාරු වී ඇත. චන්ද්‍රිකා කුමාරතුංග හිටපු ජනපතිනියගෙන් පසුව ශ්‍රී ලංකා නිදහස් පක්ෂයේ අධිකාරිත්වය අත්පත් වන්නේ ගිරුවාපත්තුවේ මහින්ද රාජපක්ෂට මහතාට ය. 2015 මැතිවරණය නිර්මාණය වන්නේ, මහින්ද රාජපක්ෂ පාලනය අවුරුදු 10කට වැඩි කාලයක් පවතින අතරතුර ඇති වූ සමාජමය ප්‍රතිවිරෝධයන්, දූෂණය හා වංචාව පිළිබද කතිකාව සහ පවුල් කේන්ද්‍රීය බලය යන කාරණා හේතුවෙන් සමාජයේ පැවැති අසහනයත් අතෘප්තිකර භාවයත් හරහා ය. මැතිවරණයේ ප්‍රතිඵල සමස්ත ලෙස විශ්ලේෂණය කළ විට පෙනී යන ප්‍රධාන කාරණය වූයේ වංචාව, දූෂණය, අසාධාරණකම් සහ පවුල් පාලනයට එරෙහිව ජනමතය උද්දීපනය වූ වගයි.

ශ්‍රී ලංකා නිදහස් පක්ෂයේ නිර්මාතෘවරුන් පක්ෂය ආරම්භයේදී ම ප්‍රකාශකොට සිටියේ එම පක්ෂය සාමාන්‍ය ජනතාව වෙනුවෙන් නිර්මාණය කරන පක්ෂයක් බවයි. මෛත්‍රිපාල සිරිසේන මහතා දේශපාලන කරළියට සම්ප්‍රාප්ත වන්නේ, මෙම පහළ පන්තියේ විශේෂයෙන් ඇතිකරන ලද විවිධ කෘෂිකාර්මික, සමාජ සහ අධ්‍යාපන ප්‍රතිසංස්කරණ හරහා ගොඩනැගුණු සමාජ තීරුවේ සාමාජිකයකු ලෙසයි. 1960 දශකයේදී ඔහු ශ්‍රී ලංකා නිදහස් පක්ෂයේ පාක්ෂිකයෙකි. ලංකාවේ වාමාංශික ව්‍යාපාරයේ පසුතලයක් ඔහුට පැවැතිණි.

2015 වසරේ දී එවකට පැවැති පාලනයට එරෙහිව අති දැවැන්ත අන්දමින් විකල්ප මතයක් ගොඩනැගීමට එතුමන්ට හැකි විය. ශ්‍රී ලංකා නිදහස් පක්ෂයේ ලේකම්වරයා ව සිටි මෛත්‍රීපාල සිරිසේන මහතා එජාපය සමග එක්ව පොදු අපේක්ෂකයෙකු ලෙස ජනාධිපතිවරණයට ඉදිරිපත් වන්නේ එජාපය ප්‍රමුඛ සිවිල් සංවිධාන ඇතුළු ‍බො‍හෝ පිරිසක් කළ ඉල්ලීමක් අනුවය. ඒ අතරතුරදී ය. එතුමන් එක්සත් ජාතික පක්ෂයේ අපේක්ෂකයෙකු ලෙස ඉදිරිපත් නොවී පොදු අපේක්ෂකයෙකු ලෙස ඉදිරියට පැමිණිය ද ඔහුට ඡන්දය ලබාදුන් බහුතරයක් එක්සත් ජාතික පාක්ෂිකයින් ය. නමුත් එතුමන්ගේ අධ්‍යාත්මය, ක්‍රියාකාරකම් සහ අතීත හැසිරීම් ආදී සියල්ල ශ්‍රී ලංකා නිදහස් පාක්ෂිකයින්ගේ මතවාදයේ සංකල්ප වටා ගොඩනැඟුණකි.

මෛත්‍රීපාල සිරිසේන මහතා 2015 මැතිවරණයට ඉදිරිපත් කරන “මෛත්‍රී යුගයක්” නම් මැතිවරණ ප්‍රකාශනයට ඔහු අත්සන් තබන්නේ ශ්‍රී ලංකා නිදහස් පක්ෂයේ ලේකම්වරයා ව සිටියදී ය. එතුමන්ට අවැසි වූයේ මෙරට යම් ආකාරයකට අකර්මන්‍ය ව පැවති ප්‍රජාතන්ත්‍රවාදී ආයතන ව්‍යූහය නිවැරදි කිරීමට ය. එතුමා රටේ ජනාධිපතිවරයාට කේන්ද්‍ර වූ අධිකාරී බලය පවා අවම කරගනිමින් දහනව වන ආණ්ඩුක්‍රම ව්‍යවස්ථා සංශෝධනය හරහා යම් යම් ප්‍රතිසංස්කරණ හඳුන්වා දුන් ජන නායකයෙකි.

මෛත්‍රී පාලන යුගයක් මඟින් රට දැයට දායාද කොට ඇත්තේ කුමක්දැයි කියා පිරික්සීමේදී ප්‍රධාන වශයෙන් ම මතුකොට දැක්විය හැකි කරුණක් ලෙස මෙරටේ මාධ්‍ය නිදහස පිළිබඳ සංකල්පය ඉදිරිපත් කළ හැක. මාධ්‍යවේදීන්ට තර්ජන එල්ල කිරීම්, මාධ්‍යවේදීන් මරා දැමීම්, මාධ්‍යවේදීන්ට පහර දීම් සහ පැහැරගෙන යෑම් හෝ අතුරුදහන් කිරීම් වැනි ඛේදවාචකයන් මෛත්‍රීපාල සිරිසේන ජනපති පාලනය යටතේ වාර්තා නොවූ වග කිව යුතු ය. එසේ ම එතුමන්ගේ පාලන සමයේ දී ජනතාවගේ උද්ඝෝෂණ පැවැත්වීමේ සහ විරෝධතා ව්‍යාපාර දියත් කිරීමේ අයිතිය ද තහවුරු වි ඇති අතර සෑම සතියක ම කිනම් හෝ විරෝධතා ව්‍යාපාරයක් කොළඹ කරා පැමිණිය ද පසුගිය පාලන සමයන්හි සේ විරෝධතාකරුවන් මරාදැමීම්, වෙඩි තැබීම්, පැහැරගෙන යෑම් වාර්තා නොවීම ද විශේෂත්වයකි. ඒ සියල්ල දැකිය හැක්කේ යම් ආකාරයකින් මෙරට තුළ ප්‍රජාතන්ත්‍රවාදී නිදහසක් විඳීමට අවස්ථාව ලබාදීමක් ලෙසයි.

මෛත්‍රීපාල සිරිසේන ජනපතිතුමන්ට එතුමා අපේක්ෂා කළ පාලනය ගෙන යෑමට හැකි වූවාද යන්න ස්ථීරව ප්‍රකාශ කළ නොහැක. ධුර කාලයෙන් වසර තුනහාමාරක් ගෙවී යන තැන එතුමා ඉතාම දැඩි, ඉතාම සංකීර්ණ සහ දේශපාලනමය වශයෙන් බොහෝ සෙයින් අභියෝගාත්මක තීරණයකට එළැඹෙන්නේ ය. ඒ, එතුමා සමඟින් ජනපති ධුරය සඳහා තරග වැදුණු, ඒ වනවිට රටේ ප්‍රධාන විපක්ෂයේ බලය හිමිකරගෙන සිටි, එසේම විශාල ජනප්‍රසාදයක් පැවති මහින්ද රාජපක්ෂ මහතා අග්‍රාමාත්‍ය ධුරයට පත් කිරීමයි. ජනපති මෛත්‍රිපාල සිරිසේනයන්ගේ සිවු අවුරුදු පාලනය තුළ අප අත්පත් කරගෙන ඇති සුවිශේෂීම දෙය නම් දූෂණයෙන්, වංචාවෙන් තොර මහජන ආණ්ඩුවක් යන අදහස සාක්ෂාත් කරගත් දැවැන්ත පෙරමුණක් වෙනුවෙන් එතුමා පෙනී සිටින ආකාරය යි. ඒ කාලය තුළ සංස්කෘතික වශයෙන් නැගී සිටීමක් ද දැකිය හැකි විය. ජනපති ලෙස පත්ව වසර හතරකට පසුව එතුමා ආරක්ෂක අමාත්‍යංශයට අමතරව පොලිස් දෙපාර්තමේන්තුව ද තමන් යටතට පත් කරගත්තේ දැවැන්ත සැලසුමක් ඇතිව ය. ඒ මගින් කෙටි කලක් තුළ ලංකාවේ මහාපරිමාණ මත්ද්‍රව්‍ය ජාවාරම්කරුවන් සහ අපරාධකරුවන් අත්අඩංගුවට ගැනීමට පියවර ගත් අතර මෙරට තුළ ප්‍රජාතන්ත්‍රවාදී ආයතන ක්‍රමයක් අත්කර ගැනීමට, සංස්කෘතිකමය වශයෙන් දියුණුවක් ඇති කිරීමට සහ සංහිඳියා වාතාවරණයක් ඇතිකිරීමට සියලු පියවර ගනිමින් සිටී. එසේම තිප්‍රිටකය ජාතික උරුමයක් බවට පත් කිරීම, සාරධර්ම අධ්‍යාපනයට මුල්තැනක් ලබාදීම, මත්ද්‍රව්‍ය උවදුර වැලැක්වීම සඳහා වූ දැවැන්ත ව්‍යාපාරය, විවිධ සංවර්ධන ව්‍යාපෘතීන්ට අත පෙවීම වැනි ක්‍රියාකලාපයන් නිරන්තරයෙන් නෙත ගැටෙන විට අදින් ඇරඹෙන එතුමන්ගේ ජනපති ධුර කාලයේ සිවු වර්ෂ ප්‍රවිශ්ටය, දේශපාල සංලක්ෂයක් සනිටුහන් කරන වග සක්සුදක් සේ පැහැදිලි ය. ඉකුත් සිව් වසර තුළ සේ ම එතුමා ඉදිරියට ද මෑත ඉතිහාසයේ කිසිඳු දේශපාලනඥයකු, රාජ්‍ය නායකයකු නොගත් අන්දමේ සෘජු තිරණයන්ට එළඹෙමින් ද සෘජු විග්‍රහයන් ඉදිරිපත් කරමින් ද දේශයට නව ආලෝකයක් ලබාදෙන ප්‍රවිශ්ටයක් නිර්මාණය කරනු ඇත. රටවැසියන්ගේ උත්තමාචාරය හිමි විය යුත්තේ, රටට ණය නැති නායකයෙකුට ය යන වග පමණක් අවසාන වශයෙන් සිහිපත් කරනු කැමැත්තෙමි.

කාංචනා සිරිවර්ධන

පේරාදෙණිය විශ්වවිද්‍යාලයේ සමාජ විද්‍යා අධ්‍යන අංශයේ ජ්‍යෙෂ්ඨ මහාචාර්ය දයා අමරසේකර

පොදු අපේක්ෂක ලෙස මෛත්‍රිපාල සිරිසේන මහතා 2015 ජනවාරී මස 08 දින ජනපතිවරණයට ඉදිරිපත් කිරීම හුදු අහම්බයක් නොවන අතර ඒ වන විට සමාජය තුළ කැකෑරෙමින් තිබූ ප්‍රශ්න ගණනාවයක් මේ සඳහා උත්තේජන සැපවූවේය.මාදුළුවායේ සෝභිත හිමි මෙහිදී පෙරමුණ ගෙන ක්‍රියාකාරී මෙහෙයුමක් දියත් කළ අතර ඒ පසුපසින් සිට සාධාරණ සමාජයක් අපේක්ෂාවෙන් සිටි සංවිධාන රැසක් උන්වහන්සේට ශක්තිය දුන්හ.තරුණ ඡන්ද එම මැතිවරණයේදී තීරණාත්මක සාධකයක් විය. සමාජ මාධ්‍ය බහුලව භාවිත කළ එම තරුණ කණ්ඩායම් ඒ ඔස්සේ ගෙනගිය මතවාද මහින්ද රාජපක්ෂ හිටපු ජනපතිවරයාගේ පරාජයට බෙහෙවින් බලපෑවේය. මහ සංඝරත්නය, විද්වතුන්,සිවිල් සංවිධාන හා තරුණ කණ්ඩායම් මෙම අවස්ථාවේ පොදු අපේක්ෂක ජයග්‍රහණය කරවීම පිණිස ඉස්මතු කළ සටන් පාඨ අධ්‍යයන කිරීමේදී ඒ වන විට රටේ පැවැති වාතාවරණය හා එම බල පෙරළියෙන් පසු රට අද පත්ව තිබෙන තැන පිළිබඳ අවබෝධයක් ලබා ගැනීම පහසුය.

ත්‍රස්තවාදය පරාජයට පත් කිරීමෙන් පසු මහින්ද රාජපක්ෂ පාලනය තුළ සිදු වූ ප්‍රජාතන්ත්‍ර විරෝධී වැඩපිළිවෙළ ගණනාවක් කෙරෙහි ජනතාව තුළ පැවතියේ නොසතුටකි.රාජපක්ෂවරුන් තීන්දු තීරණ ගැනීමේදී තමන්ගේ ඇමැති මණ්ඩල නියෝජිතයින්ට කන් නොදීම හා රාජ්‍ය ආයතනවල ඉහළ තනතුරු ඔවුන්ගේ නෑ හිතවතුන්ට ලබා දීම ආණ්ඩුව තුළම අර්බුද පැන නැගීමට හේතුවී තිබිණි.විශේෂයෙන්ම ශ්‍රී ලංකා නිදහස් පක්ෂයේ ජ්‍යෙෂ්ඨ දේශපාලනඥයෝ පක්ෂය තුළ සිදුවන බොහෝ දේ සම්බන්ධයෙන් ඒවන විට කලකිරීමට ලක්ව සිටියහ.බණ්ඩාරනායක ප්‍රතිපත්ති පසෙක තබා ශ්‍රී ලංකා නිදහස් පක්ෂය වෙනත් අරමුණු ඔස්සේ ගමන් ගන්නා බවටද චෝදනා එල්ල විය.සුදු වෑන් සංස්කෘතිය,මාධ්‍යවේදීන් ඝාතනයට ලක්වීම හා පහර කෑම්වලට ලක්වීම,මාධ්‍යය ආයතනවලට ගිනි තැබීම,පුද්ගල අතුරුදන් කිරීම්,මානව හිමිකම් කඩ කිරීම,අධිකරණයට බලපෑම් කිරීම,අයිතිවාසිකම් ඉල්ලා උද්ඝෝෂණ විරෝධතා දක්වන පිරිස්වලට වෙඩි ප්‍රහාර එල්ල කර පුද්ගල ඝාතන සිදු කිරීම වැනි බොහෝ චෝදනා මහින්ද රාජපක්ෂ පාලනයට එරෙහිව ඒ වන විටත් එල්ල වී තිබිණි.

දහඅට වන ව්‍යවස්ථා සංශෝධනය මගින් විධායක ජනපති ධූරයේ බලතල තවත් වර්ධනය කර ගනිමින් ඒකාධිපති ගමනක් යමින් සිටි මහින්ද රාජපක්ෂ පාලනය නිම කරමින් මෛත්‍රී පාලනයක් රටේ ඇති කිරීම සඳහා ජනතාව පෙරමුණ ගනු ලැබුවේ විශාල බලාපොරොත්තු කන්දරාවක් සමඟිනි.ගත වූ කාලය තුළ අඩු වැඩි වශයෙන් අදාළ අපේක්ෂාවන් වෙත ළඟා වීමට හැකි වීම රටක් ලෙස අප ලද ජයග්‍රහණයකි.දහනව ව්‍යවස්ථා සංශෝධනය මගින් විධායක ජනපති ධූරයේ එතෙක් පැවැති බලතල අඩු කිරීම,ස්වාධීන කොමිෂන් සභා පිහිටුවීම වැනි කාරණා මෙම කාලය තුළ අප ලද විශාල ජයග්‍රහණයකි.බලයට පැමිණීමට පෙර නොයෙක් පොරොන්දු දෙන පාලකයින් බලයට පැමිණි පසු ඒවා ඒ ආකාරයෙන්ම ක්‍රියාත්මක නොකිරීම පිළිබඳ අත්දැකීම් අපට ඉතිහාසය තුළින් ඕනෑ තරම් ගත හැකිය.එසේ වුවත් විධායක ජනපති ධූරයට පත් මෛත්‍රිපාල සිරිසේන මහතා තමන් අත තිබූ බලය අඩුකර ගැනීමට බලයේ සිටියදීම කටයුතු කිරීම අගය කළ යුතු ක්‍රියාවකි.මෙරට තරමක් නුහුරු වූ ජාතික ආණ්ඩු සංකල්පය ක්‍රියාවට නන්වමින් ප්‍රධාන පක්ෂ දෙක එකට එක්ව ආණ්ඩු කිරීමේ ක්‍රමය වඩා විධිමත් අයුරින් ක්‍රියාත්මක වූයේදී ජනවාරී 08 ජයග්‍රහණයෙන් පසුය.දේශපාලන පක්ෂවල අවශ්‍යතා පසෙක තබා රටේ අවශ්‍යතා වෙනුවෙන් ප්‍රමුඛතාව දී කටයුතු කරන ස්වභාවක් යහ පාලන ආණ්ඩුවේ මුල්කාලය තුළ දක්නට ලැබුණු අතර එය රටට විශාල ජයග්‍රහණ අත්කර දීමට හේතු සාධකවූ බව කිසිවකුට බැහැර කළ නොහැකි සත්‍යයකි.

ඒ වන විට ජාත්‍යන්තර වශයෙන් ශ්‍රී ලංකාව කෙ‍ෙරහි ගොඩ නැගී තිබූ අපකීර්තිය කීර්තියක් බවට පර්වර්තනය කර ගැනීමට ආණ්ඩුවට හැකි විය. ජී.එස්.පී ප්ලස් සහනය යළි ලබා දීමටත් යුරෝපා මත්ස්‍ය තහනම ඉවත් කිරීමටත් ජාත්‍යන්තරය කටයුතු කළේ ශ්‍රී ලංකාව තුළ ක්‍රමයෙන් ස්ථාපිත වෙමින් තිබූ ප්‍රජාතන්ත්‍රවාදයේ ලක්ෂණ සැලකිල්ලට ගනිමිනි. ජත්‍යන්තර වශයෙන් ශ්‍රී ලංකාව කෙරෙහි එතෙක් පැවැති ප්‍රතිරූපය ක්‍රමයෙන් වර්ධනය වීමේ ක්‍රියාවලිය සඳහා ජනපති හා අගමැති සුසංයෝගයේ ක්‍රියාකාරීත්වය බෙහෙවින් හේතු වූ අතර රටට එන විදේශිකයින්ගේ සංඛ්‍යාව ඉහළ යෑමටද එය බලපෑවේය.අධිකරණය අද කොතරම් ස්වාධීනද යන්න දැන් ජනතාවට හොඳින් තේරුම් ගොස් තිබෙන්නේය.ආණ්ඩුව විසුරුවා හැරීමට ජනපති ගත් තීරණයට එරෙහිව අධිකරණය තීන්දුවක් ලබා දුන්නේය.අධිකරණයට පාලකයින් බලපෑම් කරනු ලබන කාලවකවානුවක නම් මෙවැනි තීන්දුවක් ලැබෙතැයි අනුමාන කළ නොහැකිය.ස්වාධීන රාජ්‍යය සේවා කොමිසම,ස්වාධීන මැතිවරණ කොමිසම මෙන්ම පොලිස් කොමිසමද දැන් බලාත්මක ලෙස ක්‍රියාත්මකය.අනෙක් පසින් ඇමැති මණ්ඩලය සීමාකර ගැනීමට හැකි වූයේද මෙම පාලන කාලය තුළය.වෙනදා නම් ආණ්ඩු පක්ෂය ශක්තිමත් කිරීම පිණිස විපක්ෂයේ සිට එන සැමට ඇමැති ධූර හිමි වෙයි.අද ඒවාද යම් යම් ආකාරයට සීමාවට ලක්ව තිබේ.

ගෙවී ගිය කාල සීමාව තුළ කිසිදු මාධ්‍යවේදීයකු ඝාතනයට ලක්වූයේ නැත.අතුරුදන් වූයේද නැත.මාධ්‍යයට ජනපති,අගමැති පවා විවේචනය කිරීමේ පසුබිම ලැබී ඇත.මාධ්‍ය නිදහස යන්න පුළුල්ව සාකච්ඡා කළ යුතු මාතෘවක් වන අතර ගෙවී ගිය කාලය තුළ ජනතාවගේ තොරතුරු දැන ගැනීමේ අයිතියට ආණ්ඩුව ගරු කළ තත්ත්වයක් පෙනෙන්නට තිබිණි.විශේෂයෙන් තොරතුරු දැන ගැනීමේ පනත සම්මත කිරීම ජනතාව ලද විශාල ජයග්‍රහණයකි.මහජන මුදල් අවභාවිතය සම්බන්ධයෙන් පසුගිය ආණ්ඩුවට බරපතළ චෝදනා එල්ල විය.එම ආණ්ඩුව වෙනස් කිරීම පිණිස ජනතාව පෙරමුණ ගැනීම සඳහා එයද එක් හේතුවක් වූයේය.එම ආණ්ඩුව සමයේ සිදු වූ බොහෝ දූෂණ වංචා පිළිබඳ සමාජ කතාබහක් ඇතිවූයේ වත්මන් ජනපති බලයට පත්වීමෙන් පසුය.අදාළ වංචා දූෂණ සම්බන්ධයෙන් චෝදනා ගොනු කිරීමේ ප්‍රමාදය පිළිබඳව ජනතාව තුළ එතරම් ප්‍රසාදයක් නොමැති වුවත් මේවන විට විශේෂ මහාධිකරණ පිහිටුවා එම නඩු විභාග කිරීම ආරම්භ කර තිබේ.වත්මන් ආණ්ඩුව බලයට පැමිණි පසු මහ බැඳුම්කර සිද්ධිය කරළියට පැමිණියේය.විශාල මුදල් වංචාවක් සිදුවූ බව කියන එම බැඳුම්කර සිද්ධියේ සියලු තොරතුරු හෙළිදරව් වූයේ යහ පාලන ආණ්ඩු සමයේදීමය.එම ආණ්ඩුව බිහි කිරීමට පෙරමුණ ගෙන ක්‍රියා කළ රවී කරුණානායක මහතා ඇමැති ධූරයෙන් පවා ඉවත් වූයේ මෙම කාලයේදීය.මෙය යහපත් ප්‍රවණතාවකි.බලය සතු පිරිස් එම බලය උපයෝගි කරගෙන තමන් කළ වැරදි යටපත් කිරීමේ ක්‍රමවේදය යම් ප්‍රමාණයකට මෙම කාලය තුළ පාලනයවූ බව කවුරුත් පිළිගන්නා සත්‍යයකි.

අද රටේ උද්ඝෝෂණ විරෝධතා නිතර දක්නට ලැබෙයි.මේවාට විසඳුම් ලබා දීම පාලකයින්ගේ යුතුකම වුවත් ඒවා සිදු කරන්නට නිදහස පැවතීම එක් පැත්තකින් සුබවාදී ලක්ෂණයකි.නව ව්‍යවස්ථාවක අවශ්‍යතාව කලක පටන් රටට දැනෙන්නකි.මහජන අදහස්ද ලබා ගනිමින් සියලු ජාතීන් එකට එකතු කිරීමට සමත් ව්‍යවස්ථාවක් සකස් කිරීමේ ක්‍රියාවලියට ආණ්ඩුව අතගසා තිබේ.ජනවාරී 08 ජයග්‍රහණය සඳහා රටම පෙළ ගැසුණේ උතුම් අරමුණු රැසක් පෙරදැරිවය.පටු දේශපාලන අරමුණු තුළ ගැබ්ව යළිත් ප්‍රධාන පක්ෂ සම්ප්‍රදායික දේශපාලනය හා ගොනුවීම තුළ දැන් මෙම උතුම් අරමුණ වෙත යන ගමන යම් ප්‍රමාණයකින් අඩාල වී ඇත්තේය.මේ තුළ නොමැති අර්බුද මතු වූ බවද නොරහසකි.මේ සියල්ල තරාදියකට දමා කිරුවහොත් ජනවාරී 08 ජයග්‍රහණයෙන් පසු රට ලැබූ ජයග්‍රහණ ඇති පැත්ත බර වැඩි බව කිව යුතුව ඇත.

සටහන-අසේල කුරුළුවංශ

මෙරට දේශපාලනයේ වෙනස්කම් සිදුවන්නේ කිසිවෙකුත් නොසිතු ආකාරයටය. එවන් වෙනසක් අප දුටුවේ 2014 නොවැම්බර් මාසයේය. ඒ රටට නායකත්වය දෙන්න ජනතාවගේ මතයට අනුව වැඩි ප්‍රසාදයක් නොහොත් මනාපය හිමිවන්නේ කාටදැයි උරගා බලන්නට ඉදිරිපත්වන ජනාධිපති අපේක්ෂක කවුරුදැයි රටම බලාසිටි මොහොතක ඉදිරිපත් වූ මෛත්‍රීපාල සිරිසේන මහතා ජනතා කැමැත්ත මත ජනාධිපති ධූරයට පත්වූයේ 2015 ජනවාරි මස 8 වැනිදා පැවැති ඡන්දයෙනි.

2015 ජනාධිපතිවරණය සඳහා සුදුසු රටේම ජනතාව පිළිගත් දේශපාලන ක්ෂේත්‍රයේ ප්‍රවීණයෙක් එනම් විධායක ජනාධිපතිවරයෙක් සමග ගැටී දේශපාලන පොරපිටිය ජයගත හැකි අයෙකු පොදු අපේක්ෂකයා ලෙස තෝරා ගැනීම දේශපාලන ක්ෂේත්‍රයේ කාගේත් වුවමනාව විය. එහෙත් එදා පැවැති බිහිසුණු වාතාවරණය හමුවේ කිසිවෙකුත් එවකට සිටි ජනාධිපතිවරයා සමග තරග වැදීමට ඉදිරිපත් නොවන මොහොතක එම අභියෝගයට එඩිතරව මුහුණ දුන්නේ මෛත්‍රීපාල සිරිසේන මහතාය. ඒ වනවිට එතුමන් මහින්ද රාජපක්ෂ රජයේ සෞඛ්‍ය ඇමතිවරයා ලෙසත් ශ්‍රී ලංකා නිදහස් පක්ෂයේ මහ ලේකම්වරයා ලෙසත් කටයුතු කරමින් සිටියේය.

ජනාධිපතිවරණ සමයේ රජයේ මාධ්‍ය හරහා එල්ල කළ දැවැන්ත මඩ ප්‍රචාරයන් සියල්ලට මුහුණ දෙමින් එතුමා 2015 ජනවාරි මස 08 දා පැවැති ජනාධිපතිවරණ ප්‍රතිඵලයට අනුව සියයට 51.28 ක ප්‍රතිශතයක් ලබා ජයග්‍රහණය කළේය. එම ජනාධිපතිවරණයෙන් මහින්ද රාජපක්ෂ මහතාට ලබාගත හැකිවූයේ සියයට 47.58 ක ජනවරමක් පමණි.

මෙම ජයග්‍රහණය ජනතාව ලැබූ ජයග්‍රහණයක් මිස දේශපාලඥයන් ලද ජයග්‍රහණයක් නොවන බව රටේම ජනතාවගේ හැඟීම විය. රටේ ජනතාව එසේ සිතන්නට වූයේ මෛත්‍රීපාල සිරිසේන නම් යුග පුරුෂයා කවුරුද ,ඔහුගේ පනස් වසරක දේශපාලනය කොතරම් ජනතා හිතකාමීද යන්න කල්තියාම ජනතාව දැනසිටි නිසාය.

සංවර්ධන ව්‍යාපෘති

එහිදී පිහිටුවන ලද ආණ්ඩුවේ නාමය යහපාලන ආණ්ඩුව විය. මේ ආණ්ඩුවට අගමැතිවරයෙක් කැබිනට් මණ්ඩලයක් සිටියද ජනතා හිතකාමි වැඩ කොටසක් ආරම්භ කිරීම සඳහා විකල්පයක් සොයා ගන්නට සිදුවිය. රටට, ජාතියට, ශාසනයට, සංස්කෘතියට ආණ්ඩුවෙන් සිදුවිය යුතු කාර්ය භාරයේ කොටසක් ජනාධිපති මෛත්‍රීපාල සිරිසේන මහතා භාරයට ගෙන ඒ හරහා විශාල මෙහෙයක් සිදු කළේය.

දේශපාලන, සමාජයීය, ආර්ථික, සංස්කෘතික වගේම කෘෂිකාර්මික අභියෝග රැසකට මුහුණ දෙමින් ඒවා ජයගැනීමට ජනාධිපතිවරයා පසුගිය සිව් වසරක කාලය තුළ සමත් විය. මෙහි ලද ඉහළම ජයග්‍රහණයන් ලෙස ත්‍රිපිටකය ජාතික උරුමයක් බවට පත්කිරීම, ඉංග්‍රීසින් විසින් රාජ්‍ය ද්‍රෝහීන් ලෙස නම් කරන ලද සිංහල නායකයන් පිළිබඳ ගැසට් නිවේදනය අවලංගු කිරීම, මොරගහකන්ද කළුගඟ වාරි ව්‍යාපෘතීන් තුළින් ගොවීන්ගේ මූලික ගැටලුවලට විසඳුම් සෙවීම, වනරෝපා, ග්‍රාම ශක්තිවැනි ව්‍යාපෘති තුළින්ජනතා ආර්ථික දියුණුව වෙනුවෙන් මහගු මෙහෙයක් ඉටුකිරීම නිසා ජනාධිපතිවරයා කෙටි කලක් තුළ ජනතා ප්‍රසාදයට ලක්වීය.

සිව් වසරක් තුළදී ජාත්‍යන්තරය දිනාගනිමින් මෙරට පැවැති කොටි ත්‍රස්තවාදය විනාශ කරමින් ජාතියට රටක් ඉතිරිකර දුන් වීරෝධාර රණවිරුවන් පිළිබඳව එක්සත් ජාතීන්ගේ මානව හිමිකම් කවුන්සලය ඇතුළු ජාත්‍යන්තරයෙන් එල්ල වූ තර්ජන වලට මුහුණ දෙමින් ඒවා සමනය කිරීමටද ජනාධිපති මෛත්‍රීපාල සිරිසේන මහතා පියවර ගත්තේය.

ගැටලු විසඳීම

ආරක්ෂක හමුදාවේ කීර්තිය ජාත්‍යන්තරය දක්වා ගෙනගිය ජනාධිපති මෛත්‍රීපාල සිරිසේන මහතා යුද්ධයෙන් විපතට පත් උතුරු නැගෙනහිර ජනතාව වෙනුවෙන්ද පෙනීසිටියේය. යුද්ධයෙන් විනාශ වූ එම ප්‍රදේශ කඩිනමින් ප්‍රතිසංස්කරණය කර එහි ජනතාවගේ ජීවන තත්ත්වය නගාසිටුවීම සඳහා ජනාධිපති කාර්ය සාධක බලකායක් පිහිටුවා වැඩකටයුතු ජනාධිපතිවරයාගේ සෘජු අධීක්ෂණය යටතේ ආරම්භ කළේය. එම ජනතාවගේ ගැටලු විසඳීමේ කාර්යභාරය අමාත්‍යාංශ මට්ටමින් එක්සත් ජාතික පක්ෂය නියෝජනය කළ ඇමතිවරුන්ට පවරා තිබුණද ඔවුන් ඡන්ද සහ වෙනත් වාසි තකා කටයුතු කිරීමට උත්සාහ කිරීමෙන් ඒ ජනතාවට සේවය කිරීමට තිබුණු අවස්ථා මඟහැරී තිබුණි.

විවිධ හේතූන් මත එක් එක් ප්‍රදේශවල ඇතිවූ කලහකාරී සිදුවීම්වලට අමතරව ස්වභාවික ව්‍යසනයන් ඇතිවූ සෑම අවස්ථාවකම නිලධාරීන්ට නිරන්තරයෙන්ම උපදෙස් ලබාදෙමින් විපතට පත් ජනතාවට සහන සැලසීමට ජනාධිපති මෛත්‍රීපාල සිරිසේන මහතා ගනුලැබු පියවර මෙරට ජනතාවගේ පමණක් නොව ජාත්‍යන්තර වශයෙන්ද පැසසුමට ලක්විය.

ශ්‍රී ලංකාව කෘෂි ආර්ථිකය මුල්කරගත් ජීවන රටාවකට පදනම්ව ජීවත්වන ජනකොටසකට අයත් රටකි. මෙරට ජනතාවගේ ජීවනෝපාය ගොඩනැගී ඇත්තේ ප්‍රධාන වශයෙන් කෘෂි කර්මාන්තය පදනම් කරගෙනය. අනාදිමත් කාළයක මානව ජනාවාස බිහිවීමත් සමඟ මේ කෘෂි කර්මාන්තය ආරම්භ විය.රටේ වියලි කලාපයේ ගොඩනැගී තිබුණු වැව් ආශ්‍රිත වාරිමාර්ග පද්ධතිය පදනම් කරගත් ස්වයංපෝෂිත ආර්ථික රටාව අප කෘෂි ආර්ථිකයේ මූලාරම්භය ලෙස සැලකේ. රජ සමයෙන් පසු වාරිමාර්ග ‍ක්ෂේත්‍රයේ ඇතිවූ මහවැලි ව්‍යාපෘත්යෙන් පසු වාරි ව්‍යාපෘතිය වගේම කෘෂි ආර්ථිකය නංවාලීම පිළිබඳ උනන්දුව පහත වැටී තිබුණි.

විවෘත ආර්ථිකයත් සමග පසුගිය පාලකයන්ගේ වැඩි අවධානයට ලක්වූ කරුණ වන්නේ මෙරට කාෂිකර්මාන්තයේ දියුණුව පසෙකලා ජනතා පරිභෝජනයට අවශ්‍ය සහල් පිටරටවලින් ගෙන්වීමය.

මෙම තත්ත්වයේ භයානකකම තේරුම් ගත් මෛත්‍රීපාල සිරිසේන මහතා මහවැලි සංවර්ධන ඇමතිව සිටියදි මෙරට වාරි කර්මාන්තය දියුණු කිරීම වෙනුවෙන් මහත් පරිශමයක් දැරුවද ඊට එම රජයෙන් නිසි සහය නොලැබීම නිසා ඔහුට හිමිව තිබුණේ කනගාටුව පමණකි.

ජාතික පුනර්ජීවනයක්

2015 ජනවාරි මස 8 වැනිදා රටේ ජනතාව ඇති කළ වෙනස තුළින් එදා ගිලිහි ගිය එම වාරි සංකල්පය යළිත් ගොඩ නගන්නට ජනාධිපති මෛත්‍රීපාල සිරිසේන මහතාට අවස්ථාව උදාවිය.ඒ තුළින් බිහි වූ මොරගහකන්ද කළුගඟ වාරි ව්‍යාපෘතිය මෙරට කෘෂි කර්මාන්තයේ නියැලී ජනතාවගෙන් සියයට 90 කටම සෙත සැලසේ.

එමෙන්ම පසුගිය සිව් වසරක කාළය තුළ රටේ ආගමික පුනර්ජීවයක් ඇතිකරන්නට වෙහෙසුණු ජනාධිපති මෛත්‍රීපාල සිරිසේන මහතා පන්සල් වෙහෙර විහාර ප්‍රතිසංස්කරණය වෙනුවෙන් උපරිම දායකත්වය දැරීම පමණක් නොව ක්‍රි.පූ. 3 වන සියවසේ සිදුවූ මහින්දාගමනයේ ප්‍රතිඵලයක් ලෙස ශ්‍රී ලාංකීය බෞද්ධ ජනයාට උරුමවී වසර දහස් ගණනක් පුරා රැකගෙන ආ නිර්මල බුදුදහම ලෝකවාසි ජනතාවටත් අනාගත පරපුර සඳහා නිවැරදි ලෙස ආරක්ෂා කිරීමේ අරමුණ ඇතිව පූජනීය ත්‍රිපිටකය ජාතික උරුමයක් බවට පත් කරන්නට පියවර ගැනීම මහ සඟරුවනේ මෙන්ම සමස්ත බෞද්ධ ජනතාවගේ ප්‍රසාදයට ලක්විය.

එම ඓතිහාසික සිදුවීමට පෙර ජනාධිපති මෛත්‍රීපාල සිරිසේ මහතා විසින් ජාතිය වෙනුවෙන් සිදුකළ උතුම් ක්‍රියාව වන්නේ ලංකාවේ ආණ්ඩුකාර ධූරය හෙබවූ රොබට් බ්‍රවුන්රිග් විසින් 1818 ජනවාරි 10 දින අංක 851 දරන ලංකා ගැසට් පත්‍රය පළකරමින් රාජ්‍ය ද්‍රෝහීන් ලෙස නම්කර ඔවුන් සතු දේපළ සියල්ල රාජ සන්තක කරන ලද කැප්පෙටිපොළ මහාධිකාරම් ඇතුළු සිංහල නායකයන් 19 දෙනකු ඇතුලු නිදහස් අරගලයට සහාය දැක් වූ සියලුදෙනා රාජ්‍ය ද්‍රෝහීන් බවට නම් කර සිටි සියලු දෙනාට අදාළ එම ගැසට් පත්‍රය අහෝසි කොට එම විරුවන් වෙනුවෙන් 2017 මාර්තු මස 01 වැනිදා ඓතිහාසික දළදා මාලිගාව පරිශ්‍ර යේ දී වීරපූජෝපහාර උලෙළක් පවත්වනු ලැබීය. එය මෙරට ඉතිහාසයට සිදුකරන ලද මිල කළ නොහැකි ගෞරවයකි.

දුප්පත්කම නැති කිරීම

එවැනි ඉතිහාස ගත සිදුවීම් රැසකට පුරෝගාමීත්වය දැක්වූ ජනාධිපති මෛත්‍රීපාල සිරිසේන මහතා මෙරට දුගී දුප්පත් ජනතාව එම තත්ත්වයෙන් නිදහස් කර ගැනීම සඳහා ප්‍රමුඛ ව්‍යාපෘත්යක් ලෙස ආරම්භ කළ ග්‍රාම ශක්ති ජනතා ව්‍යාපාරය අද වනවිට දිවයින පුරා සාර්ථකව ක්‍රියාත්මක වෙමින් අඩු ආදායම්ලාභි ජනතාවට වැඩි පහසුකම් සලසන හා ස්වෝත්සාහයෙන් නැගීසිටින අභිමානවත් වැඩසටහනක් බවට පත්ව තිබේ.

මෙරට දේශපාලඥයන් මෙන්ම විනාශකාරී පිරිස් විසින් වැනසු පරිසරය රැකගැනීම වෙනුවෙන් පරිසර අමාත්‍යාංශය අත්පත් කරගෙන සිටින ජනාධිපතිවරයා ඒ වෙනුවෙන් දක්වන කැපකිරීම ජාතික මෙන්ම ජාත්‍යන්තර කීර්තියට පත්ව තිබේ. ජනාධිපතිවරයා වනරෝපා රුක්රෝපණ වැඩ සටහන ආරම්භ කළේ මිනිසාගේ මෙන්ම සතා සිවුපාවාගේ පැවැත්මට බරපතළ තර්ජනයක් බවට පත්ව තිබෙන පරිසර විනාශයට තිත තබා එය රැගැනීම උදෙසාය.පරිසරය විනාශ කරන්නන්ට එරෙහි නීතිරීති තද කරමින් ඒ ඒ බල ප්‍රදේශ භාර නිලධාරීන් වන විනාශයන්ට වගකිවයුත්තන් කරමින් හෙට දිනය වෙනුවෙන් පරිසරය රැකදීමට ජනාධිපතිවරයාගේ කැපකිරීම කිසිවෙකුටත් අමතක කළ නොහැකිය.

රටේ තරුණ පරපුරත්, පාසල් දරුදැරියනුත් විනාශ කරමින් ව්‍යාප්ත වන මත් උවදුර මුලිනුපුටා දැමීමට ජනාධිපති මෛත්‍රීපාල සිරිසේන මහතා සුවිශේෂී මෙහෙයක් සිදුකරනු ලබයි. පොලිස් දෙපාර්තමේන්තුව රාජ්‍ය ආරක්ෂක අමාත්‍යාංශය වෙත පවරා ගැනීමෙන් අනතුරුව ගතවූ දෙමසක කාලය තුළ නීති විරෝධි මත්ද්‍රව්‍ය වැටලීම් ප්‍රබල කරමින් මතින් තොර රටක් නිර්මාණය කරන්නට ගනු ලබන වෙහෙස කාගෙත් පැසසුමට ලක්ව තිබේ.

ජනාධිපති මෛත්‍රීපාල සිරිසේන මහතාගේ සිව් වසරක පාලන සමය තුළ සිදුකළ ජනතා මෙහෙය රටේම පැසසුමට ලක්වන අතර අදට යෙදෙන පදවිප්‍රාප්තියට ශුභාශිංසනය පතමු.

ටී. චන්ද්‍රසේකර