2020 වසර ආරම්භවීමට ඉතිරිව තිබෙන්නේ තවත් දිනයක් පමණි. ඒ දිනයේ කරන්නට දහසකුත් එකක් වැඩ රාජකාරි ඔබ මත පැටවී තිබෙනවා විය හැකියි. කෙතරම් අවිවේකී වුවත් ඔබේ එකම සිතුවිල්ල විය යුත්තේ ලබන්නා වූ නව වසර සතුටින්, සාමයෙන් සහ අර්ථවත්ව ගත කිරීමයි. සතුට සහ සාමය නැති වූ තැන ඔබ ශාරීරික සහ මානසික සෞඛ්‍ය ගැටලුවලට මැදි වේ. නව වසරේ සෑම මොහොතකම සතුට වඩවා ගන්න, සතුට රඳවා ගන්න මේ කාරණා ගැනත් අවධානය යොමු කරන්න.

සැලසුම් සහගත වීම

නව වසරේ ඔබට කිරීමට ඇති වැඩ, ඔබේ බලාපොරොත්තු සහ ඔබේ අධිෂ්ඨාන මොනවා ද යන්න ඇතුළත් කර සැලසුමක් තනන්න. වසරේ කවර කාලයකදී කවර කටයුත්තක් ඇරඹිය යුතු ද, අවසන් කළ යුතු ද යන විස්තර ඊට පැහැදිලිව ඇතුලත් කරන්න. ඒ ඒ කාර්යයන් වෙනුවෙන් වැය කළ යුතු කාලය බෙදා වෙන් කරගෙන ඒ අනුව වැඩ කිරීම අරඹන්න. එවිට, ඔබේ වැඩ, බලාපොරොත්තු, අධිෂ්ඨාන සහ වගකීම් කිසිවක් පැහැර නොහැර කරගෙන යෑමට අවස්ථාව එළඹෙනු ඇත.

කාරුණික බව

කාර්යයබහුලත්වය හා අවිවේකීත්වය සමඟම අන්‍යයන් වෙත කාරුණික වීම ඔබෙන් තරමක් දුරස් විය හැක. ඔබ වෙනුවෙන් වෙහෙසෙන කෙනකුට "බොහොම ස්තුතියි"කියන්න කිසිවිටෙක අමතක නොකරන්න. "කරුණාකර"යන වචනය ඔබේ වචන මාලාවට නිතර එකතු කරගතහොත් ඔබේ වචන මාලාව මෙන්ම ඔබේ දවසත් සුන්දර වනු නිසැක ය. ඔබට සහය දුන් කෙනකුට සිනහවකින් උණුසුම් පිළිගැනීමක් ලබා දීම වැදගත් ය.

දුරදිග බලා කතා කිරීම

වචනය මුවහත් බර අවියක් බව බොහෝ දෙනෙකුට වැටහෙන්නේ නැත. ඒ නිසා ඔබේ මුවින් පිටවන ඇතැම් වචනවලින් කෙනකුගේ සිත තැලිය හැක. කෙනෙකුගේ නෙතට කඳුළක් නැඟෙන්නට ඉඩ ඇත. ඒ නිසා මෘදු සහ ප්‍රිය වචන සැමවිටම භාවිත කරන්න. හිස් වචනවලට, තවත් කෙනෙකුට අවැඩක් වන වචනවලට, පරුෂ වචනවලට මේ අලුත් අවුරුද්දේ ඔබේ ජීවිතය අවුල් වියවුල් කර දමන්නට ඉඩ නොතබන්න.

සවන් දීම

කතාකරන්නට සියලුම දෙනාට හැකිය. නමුත්, හොඳ සවන්දෙන්නකු බවට පත්වන්නට ඒ හැම දෙනාටම නොහැකි ය. ඔබ හොඳ සවන් දෙන්නකු නම් ලෝකයේ බොහෝදෙනකුට නොඇසෙන සියුම් නාද ශ්‍රවණය කරන්නට හැකියාව ඔබට ලැබෙනු ඇත. මිනිසුන්ගේ වේදනා, සතුට පමණක් නොව පරිසරයේ සිටින සතා සිව්පාවාන් සහ ගහ කොළ නඟන හඬත් ඒ අතර තිබේ. ඔබට මෙතෙක් නොඇසුන ඔබේ ම මාපියන්ගේ හඬත් ඔබේ පුංචි දෝණිගේ හෝ පුතාගේ හෝ හඬත් ඔබ පෙරටත් වඩා සවන් දෙන්නට අදිටන් කරගන්න.

අන්‍යයන් ධෛර්යමත් කිරීම

ජීවිතය රැඳී පවතින්නේ අප ලබන දෙයෙහි පමණක් නොව අප කරන කැප කිරීම් ද සමඟින් බව ඔබට අවබෝධ විය යුතු ය. නැති බැරිකම් ඇති අය වගේම ලෙඩ දුක් සහ විවිධ කරදර නිසා විපතට පත් අයත් අපට ඕනෑ තරම් හමු වේ. ඒ අයට ජීවිතයට මුහුණදීමට අවශ්‍ය ධෛර්ය වචනයෙන් හෝ ලබාදීමට සිතේ තබා ගන්න.

අගය කිරීම

අප වෙනුවෙන් වෙහෙසෙන, අපේ කාර්යයන් පහසුකර දෙන සේවකයන්, හිතමිතුරන් අගය කරන්න. ඔබේ දවස ලස්සන කරන ඔබේ බිරිය හෝ සැමියා හෝ අගය කිරීම ඔබේ දුව හෝ පුතා හෝ අගය කිරීම ගැන ඔබ මෙතෙක් සිතුවාටත් වඩා වැඩියෙන් සිතන්න.

පවුලට ප්‍රමුඛතාව

පවුලේ සාමාජිකයන්ගේ සතුට බෙදා හදා ගන්නට හවුල් වීම, ඔවුන් සමඟ එක්ව කාලය ගත කිරීම, කරදර සහ වැඩ අධිකකම නිසා පසුගිය වසරේ ඔබෙන් ගිලිහෙන්නට ඇත. පවුල ගොඩනඟන්නට මුදල් හරිහම්බ කරදීම තරමටම පවුලේ සාමාජිකයන් සමඟ එකට එක්ව දුක සැප බෙදා හදා ගැනීම වැදගත් බව සිතන්න.

කාලය කළමනාකරණය

බොහෝදෙනෙකු අනවශ්‍ය කරදරවලට මුහුණ දෙන්නේ කාලය නිසි පරිදි කළමණාකරණය කර නොගැනීමෙනි. එය මානසික ආතතිය වැඩිවීමට හේතුවකි. උදෑසැනින්ම අවදිවීම, කඩිසරවීම, අනවශ්‍ය කාර්යයන් අත්හැරීම, මුලින් කළයුතු වැඩවලට ප්‍රමුඛතාව දීම ආදිය නිසා කාලය කළමනාකරණය කරගත හැක.

ඉතිරි කිරීම

ඉතිරි කිරීමේ පුරුද්ද බොහෝදෙනකුගෙන් ගිලිහී යමින් තිබේ. ඒ වෙනුවට ණය වීමෙන් ලබන පීඩනය සමාජයේ සෑම කෙනකු තුළම දක්නට ලැබේ. ආදායමට අනුව වියදම කළමනාකරණය කර ගැනීමත්, ආදායමෙන් කොටසක් ඉතිරි කිරීමත් ඔබ ප්‍රගුණ කළහොත් ඔබේ ජීවිතය තවත් සුව පහසු වනු නිසැක ය.

තමන් ගැන සිතීම

කෙතරම් කාර්යයබහුල වුවත් ඔබ, ඔබ ගැන සිතීම අත් හළ යුතු නැත. ලස්සනට සහ පිරිසිදුවට හිඳීම මෙන්ම තමන්ගේ සෞඛ්‍යය ගැනත් ඔබ සිතිය යුතුය. සෞඛ්‍ය රැක ගැනීම සඳහා භාවනාව, ව්‍යායාම, කලට වෙලාවට ඖෂධ ගැනීම, සුවදායක නින්දක් ලැබීම වැනි දේ වැදගත් ය. කාර්යබහුලකම නිසා ඔබ අඩුතරමින් ප්‍රමාණවත් තරමට වතුරවත් පානය කරන්නේදැයි කියා සිතා බලන්න. ඔබ, ඔබ ගැන එපමණට ම අඩු අවධානයක් දැක්වුවහොත් මේ අවුරුද්ද ඔබට එතරම් ප්‍රීතිමත් එකක් නොවනු ඇත.

අන්තර්ජාලය ඇසුරිනි - මංජුලා විජයරත්න

තැන්නේ ඥානානන්ද හිමි
කැඳවුම්කරු ඒකාබද්ධ රැකියා විරහිත උපාධිධාරී සංගමය

අධ්‍යාපන ක්ෂේත්‍රයේ පවතින අඩුපාඩු සහ රැකියා විරහිත උපාධිධාරීන්ගේ ගැටලු සම්බන්ධව සාකච්ඡා කිරීම සඳහා ඒකාබද්ධ රැකියා විරහිත උපාධිධාරි සංගමයේ කැඳවුම්කරු තැන්නේ ඥානානන්ද හිමි මෙවර එහා ඉවුරට එක්වේ.

* රැකියා විරහිත උපාධිධාරීන් පසුගිය කාලය පුරාම අරගල කළේ කඩිනමින් රජයේ රැකියා ලබා දීමට නිසි ක්‍රමවේදයක් සකස් කරන්න කියලයි. වත්මන් ජනපතිවරයා කියලා තියෙනවා එකී ගැටලුවට ඉක්මනින් විසඳුම් දෙනවා කියලා. ඔබ වහන්සේ මේ සම්බන්ධයෙන් දක්වන අදහස කුමක් ද?

පසුගිය දවසක අපි අධ්‍යාපන අමාත්‍යාංශයට ගිහිල්ලා රැකියා විරහිත උපාධිධාරින්ගේ ගැටලුව සම්බන්ධයෙන් සාකච්ඡා කරන්න අවස්ථාවක් ඉල්ලලා අධ්‍යාපන අමාත්‍යවරයාට සහ නියෝජ්‍ය අමාත්‍යවරයාට ලිපියක් බාර දුන්නා. එතැනදී යම් ප්‍රවේශයක් අරන් තියෙනවා. ඊට අමතරව ජනවාරි මුල් සතියේ ජනාධිපතිතුමාට සහ අගමැතිවරයාට ලිපියක් බාර දෙන්න බලාපොරොත්තු වෙනවා.

පළාත් නවයෙම දිස්ත්‍රික් නායකයින් හා ක්‍රියාකාරීන් සමඟ සාකච්ඡා කරලා ගන්න අදහස් යෝජනා තීන්දු තීරණ ගොනු කරලා අපි අපේ ගැටලුව සම්බන්ධයෙන් සාකච්ඡා කරන්න අවස්ථාව දෙන්න කියලා ලිපියක් යොමු කරනවා. දැනට ගුරු විභාග සමතුන්ගේ ප්‍රශ්නයට අපි මැදිහත් වෙලා තියෙනවා. අනෙක් පැත්තෙන් සමස්ත උපාධිධාරින්ගේ ගැටලුව ඉතා ඉක්මනින් සාකච්ඡා කරන්න බලාපොරොත්තුවෙන් ඉන්නවා.

* රැකියා විරහිත උපාධිධාරින්ගේ ගැටලුව සම්බන්ධයෙන් වත්මන් රජයේ මැදහත් බව ගැන ඔබවහන්සේට සෑහීමකට පත් වෙන්න පුළුවන් ද?

අපේ අත්දැකීම ගත්තොත්, 2008 ඉඳලා අද වෙනතුරු විශ්වාසනීයත්වයෙන් අප සමඟ සාකච්ඡා කරමින්, අපේ අදහස්වලට ඇහුම්කන් දෙමින්, සංවාද කරමින් වැඩ කරපු පාලකයෝ අපට හමුවෙලා නැහැ. අපේ ආසන්නතම අත්දැකීම් අනුව තමයි එහෙම කියන්නේ. වත්මන් ආණ්ඩුව ගැන යමක් කල් තියා කියන්න බැහැ. අධ්‍යාපන අමාත්‍යාංශයට ගිහින් අපි කතා කළාම නම් කිව්වා අපි සාකච්ඡා කරන එක හොඳයි කියලා.

එදා ඇමැතිවරයා කිව්වා සති දෙකකින් සාකච්ඡාවක් දෙනවයි කියලා. පසුගිය රජය ගෙනාව ආබාධිත, විශේෂ අවශ්‍යතා සහිත උපාධිධාරින්ගේ 3%ක කෝටා එක කපලා දැම්මේ ආණ්ඩුවේ ම 91/16 චක්‍රලේඛයට පිටින් යමින්. රජයේ උපාධිධාරීන් බෙදා වෙන්කොට පෞද්ගලික විශ්වවිද්‍යාලවල උපාධිධාරීන්ට සංවර්ධන නිලධාරීන් ලෙස පත්වීම් ලබන්න ඉඩ දුන්නා. මේ වගේ අමනෝඥ වැඩ පසුගිය රජය කළා. ඒ නිසා පසුගිය රජය සම්බන්ධයෙන් මේ රටේ සමස්ත උපාධිධාරින් දැඩි කළ කිරීමෙන් පසුවුණා. ඒ කලකිරීමේ සමහර ප්‍රවණතා ගෝඨාභය රාජපක්ෂ ජනාධිපතිවරයා හඳුන්වා දෙන මුල් දිනයේ ම උපාධිධාරින් ගැන සංවේදීව කතා කළා. අගමැතිවරයාත් ඒ ගැන අවධානය යොමු කළා. පසුගිය රජය කරපු දේ හරි හැටි වත්මන් රජය තේරුම් ගන්නේ නම් එවැනි දෙයක් යළි ඇතිවෙන්නට ඉඩ තබන එකක් නැහැ.

* පසුගිය කාලයේ සංවාදයක් තිබුණා ශ්‍රී ලංකාවේ උපාධිධාරින් ප්‍රායෝගික දැනුමෙන් සන්නද්ධ නැහැ කියලා. ඔවුන් මේ රටේ රැකියාවලට අන්තර්ග්‍රහණය කරන්න ඒක ප්‍රශ්නයක් කියලත් කියැවුණා. ඒ ගැන මොකද හිතන්නේ?

පළමු කාරණය තමයි, ශ්‍රී ලංකාවේ අධ්‍යාපන ක්‍රමය ඇතුළේ ඵලය ලෙස උපාධිධාරියෙක් විදිහට එළියට ආවට පස්සේ සුදුසුකම් ගැන සොයා බලන එකේ ගැටලුවක් තියෙනවා. අපිට දීලා තියෙන්නේ පාලකයන් විසින් නිර්මාණය කළ අධ්‍යාපන රටාවක්. එනිසා අපි රැකියා ලබාදීමේදී මේ ප්‍රශ්නය ඉස්සරහට දානකොට තාවකාලික පිළියමක් ලෙස හෝ හැකිනම් උපාධිධරයාට ලැබෙන රැකියා ස්ථානයේ මාස තුනක, හයක පමණ කාලයක් රාජකාරිය සම්බන්ධයෙන් යම් විධිමත් පුහුණුවක් ලබා දෙන්න කියලා අදත් අපි කියනවා. විවිධ තැන්වල මේ සම්බන්ධයෙන් විවිධ ප්‍රකාශ කරලා තිබුණා. ඒ නිසා අපේ ස්ථාවරය තවමත් එහෙමයි. ඉදිරියේ දී සාකච්ඡා කරන්න අවස්ථාව ලැබුණොත් මේ සම්බන්ධයෙන් අපි කතා කරනවා.

* වත්මන් රජය කිව්වා විද්වතුන් ඇතුළත් කමිටුවලින් මේ ප්‍රශ්න විසඳනවා කියලා?

රැකියා විරහිත උපාධිධාරි සංගමයක් විදිහට අපිට මේ ප්‍රශ්න සම්බන්ධයෙන් මැදිහත් වෙන්න සාකච්ඡාවකට ඉඩක් දුන්නොත් කොන්දේසි විරහිතව අපි සහයෝගය දී සාකච්ඡාවට සම්බන්ධ වෙනවා.

* අපේ රටේ දැනට රැකියා නොලත් උපාධිධාරින් කොපමණ විතර ඉන්නවා ද?

ඒ සම්බන්ධයෙන් රජයටත් හරි හැටි සංඛ්‍යා ලේඛන නැහැ. අවසාන සංඛ්‍යා ලේඛනය 2017/8/6 ජාතික ප්‍රතිපත්ති හා ආර්ථික කටයුතු අමාත්‍යාංශය නිකුත් කළ ලේඛනය. ඒකට අනුව රැකියා විරහිත උපාධිධාරින් 56,375ක් විතර ඉන්නවා. ඒ අයගෙන් 20,000ක් සංවර්ධන නිලධාරි පුරප්පාඩු සඳහා ඇතුළත් වුණා. 2018/2019 වසරවලදී උපාධිධාරින් බිහිවුණ ප්‍රමාණයත් එක්ක දළ වශයෙන් බැලුවොත් තවත් 46,000ක පමණ පිරිසක් රැකියා නොමැතිව ඇති කියලා අපි අනුමාන කරනවා. මේ සම්බන්ධයෙන් රජයටත් නිවැරැදි සංඛ්‍යා ලේඛනයක් නැහැ.

* දීර්ඝ කාලයක් පුරා මේ රැකියා විරහිත උපාධිධාරින්ගේ ප්‍රශ්නය ඉස්සරහට එනවා. ඒ ගැටලුව අනාගතයේ ඇති නොවන්නට ඔබ වහන්සේලා යෝජනා ඉදිරිපත් කරලා තියෙනවා ද?

මේ ප්‍රශ්නය තවදුරටත් ඉදිරියට නොයන්න අපි පැවැති රජයන්ටත් යෝජනා ඉදිරිපත් කළා. රැකියාව අයිතියක් කියලා ව්‍යවස්ථාවෙන් ම පිළිගන්න කියලා අපි යෝජනා කළා. දෙවැනි කාරණය රැකියා ලබාදෙන ජාතික ප්‍රතිපත්තියක් නිර්මාණය කරන්න කියන ඉල්ලීම. තුන්වැනිව සියලු උපාධිධාරින්ට වහාම රැකියා ලබාදීම කියන කාරණය. මේ කාරණා තුන අපේ අරගලවල ප්‍රධාන සටන් පාඨ වුණා. බොහොම කෙටියෙන් අපි අදහස් දැක්වුවා.

උදාහරණයක් විදිහට අපි බස්නාහිර පළාතේ හිටපු ආණ්ඩුකාරවරයාට පෙන්නලා දුන්නා මසකට 80කට වැඩි ප්‍රමාණයක් විශ්‍රාම යන බව. ඒ වගේම ස්ථාන මාරුවීම් ලැබ පිරිසක් ඉවත් වෙනවා. ඒ නිසා ඒ පුරප්පාඩු ටික රැකියා විරහිත උපාධිධාරින්ට ලබා දෙන්න පුළුවන් කියලා පෙන්නලා දුන්නා. සියලු පළාත්වල රාජ්‍ය ආයතනවල සහ පාසල්වල උපාධිධාරින්ට සුදුසු රැකියා තිබෙන ස්ථානවල යම් සංඛ්‍යා ලේඛනයක් රජයට මාසිකව ගන්න පුළුවන් නම් මේ ප්‍රශ්නයට පැහැදිලි විසඳුමක් දෙන්න පුළුවන්. පළාත් මට්ටමින් මේ විදිහට විසඳුම් හෙව්වොත් දැන් වගේ වසර හයක කාලයක් පෝලිමේ ඉන්න උපාධිධාරියාට අනාගතයේ සිදුවෙන්නෙ නැහැ. ජනාධිපතිතුමා කියලා තියෙනවා විද්වතුන්ගේ අදහස් අරගෙන මේ ප්‍රශ්න විසඳනවා කියලා.

ඒ නිසා මේ ප්‍රශ්නයට දිගුකාලීන විසඳුමක් සොයා ගැනීමට උත්සාහ කළ යුතුයි. අපි මේ රටේ හඬක් තියෙන සහ නඟන අධ්‍යාපන මට්ටමක් හිමිකරගත් උපාධිධාරින් පිරිසක්. ඒ වගේම උසස් පෙළ, සාමාන්‍ය පෙළ සහ එතැනිනුත් පහළ පිරිස ඉතා නරක, දැඩි රැකියා අර්බුදයක ඉන්නවා. ඒ නිසා අපි හිතනවා මේ සමස්ත ප්‍රශ්නයට උත්තරයක් හොයන්න වත්මන් රජය උත්සාහයක් ගන්න ඕනෑ.

* විද්‍යා පීඨ විශ්වවිද්‍යාල බවට පත් කරනවාය කියලා ජනපතිවරයා කිව්වා. විද්‍යා පීඪ විශ්වවිද්‍යාල වීම ඔබ වහන්සේ දකින්නේ කොහොම ද?

භෞතික මානව සම්පත් හිඟයක් සහිතව යම් ව්‍යාපෘතියක් දියත් කරන්න ගියා ම ගැටලු පැන නඟිනවා. ආචාර්යවරුන්ගේ ගැටලුව අද ඊයේ නෙවෙයි, පසුගිය දශක කිහිපයේ ම මතුවුණා. අපි හිතනවා හතු පිපෙන්නාක් මෙන් විශ්වවිද්‍යාල ආයතන ටිකක් හදාගෙන ගිහින් ශිෂ්‍යයෝ පුරවලා මොනවා හරි උගන්වලා එළියට දාන එකට වඩා විධිමත් ක්‍රමවේදයක් තිබිය යුතුයි. සමහර පීඨවල පීඨ නිර්මාණය නොකර ශිෂ්‍යයෝ ගෙනත් පුරවලා ගැටලු ඇති වුණ තැන් තිබුණා. ඒ නිසා විෂය නිර්දේශයේ ඉදලා භෞතික මානව සම්පත සම්පූර්ණ නොකර විද්‍යාපීඨ ටිකක් ගොඩනැඟුවට වැඩක් වෙන එකක් නැහැ. 80%ක්වත් භෞතික මානව සම්පත් සම්පූර්ණ නොකර මේ වගේ වැඩපිළිවෙළක් සාර්ථක වෙන එකක් නැහැ.

* දශක ගණනාවක් පුරා මේ රටේ මානව සම්පත විදෙස් රටවලට ගලා යාම සිදු වෙනවා. ඒක මේ රටේ සමාජ, ආර්ථික ප්‍රතිපත්තිවලට විශාල ගැටලුවක් විදිහට පෙන්නලා දුන්න අවස්ථා තියෙනවා?

පැවැති රජයන්වල සමහර ක්‍රියාකලාප නිසා මේ ප්‍රශ්නය වැඩි වුණා. ඒ විතරක් නෙවෙයි වැටුප් ප්‍රශ්න, රැකියා සුරක්ෂිතතා කියන කාරණාත් බුද්ධිගලනයට බලපාලා තියෙනවා. රට අතැරලා යන අයට මේ රට හැඟීමක්, ආදරයක් නැහැ කියලා අපි හිතන්න අවශ්‍ය නැහැ. ඒ අය මේ රටට ආදරේ වුණත්, මේ රටේ දේශපාලන ක්‍රමවේදය නිසා ආදරෙන් වැඩ කරන්න අවස්ථාව නැහැ. මොරටුව විශ්වවිද්‍යාලයේ මහාචාර්යවරයෙක් කොළඹ සහ තදාසන්න ප්‍රදේශවල මාර්ග තදබදය ගැන පර්යේෂණයක් කරලා රජයට බාරදුන්නා. දේශපාලන අධිකාරිය ඒක ප්‍රතික්ෂේප කළා.

අන්තිමට මහාචාර්යවරයා රට අතහැරලා යන්න ගියා. විද්වතුන්ගේ අදහස් ගන්න පාලකයෙක් බිහි වෙන්න ඕන. විද්වතුන් රට අතැරලා ගිහින් තියෙන්නේ කැමැත්තෙන් නොවෙයි. එනිසා ඔවුන්ට මේ රටට සේවය කරන්න හැකි විශ්වාසනීය පරිසරයක් දේශපාලන අධිකාරිය විසින් සැකසිය යුතුයි. එහෙම වුණොත් මේ රටට ආදරේ මිනිස්සු ආයෙත් රටට එයි.

දවසින් දවස අඩුවෙමින් යන්නේ මිනිස්කම් සහිත මිනිස්සු. පසුගිය කාලය පුරාම දේශපාලකයා අනුගමනය කළේ ඔවුන්ට සහ ඔවුන්ගේ පවුල්වලට පවතින්න හැකි ප්‍රතිපත්ති. ඒක නොවිය යුත්තක්. හැම මිනිසකුටම එක තැනකට එකතු වෙන්න පුළුවන් ආදරණීය බිමක් බවට මේ රට පත් කරන්න ඕනෑ. මේ රට යහපත් රටක් කරන්න මේ රටේ විද්වතුන්ට පුළුවන්. ඔවුන්ට ඒ අවස්ථාව දෙන්නට අවංකව කැමැති නම් ජනපතිවරයා සහ අගමැතිවරයා මේ ගැන ඉතා ඕනෑකමින් කටයුතු කරනවා නම් මේ සෑම ප්‍රශ්නයක් ම ක්‍රමයෙන් විසඳා ගන්න පුළුවන්.

* වත්මන් ජනපතිවරයා උගතුන්, බුද්ධිමතුන් එකතුකරගෙන රට ගොඩනඟන්න උත්සාහ කරන බවක් පේනවා. හැබැයි බොහෝ වියතුන් උගතුන් ඊට පැහැදිලි සහයෝගයක් ලබාදෙයි කියලා ඔබ වහන්සේ විශ්වාස කරනවාද?

මානව සම්පත කළමනාකරණය කරනකොට හාල් පොල් බානවා වගේ කරන්න බැහැ. හැම ජනපතිවරයෙක්ම උගතුන්, බුද්ධිමතුන්ට මේ රටට එන්න කියනවා. රට හදමු කියනවා. මේ රට අතැරලා ගිය මහාචාර්යවරයාගෙන් මහාචාර්යවරයාට, මාධ්‍යවේදියාගෙන් මාධ්‍යවේදියාට, කවියාගෙන් කවියාට මේ රට අතැරලා යන්න වුණ හේතුව හොයලා බැලුවොත් එකක්වත්, නිශේධනය කළ හැකි, බැහැර කළ හැකි කාරණා නෙවෙයි. ඒවා ඉතා ම දරුණු සංකීර්ණ තත්ත්වයන්. එනිසා අපි හිතනවා, එක දවසකින් ලැබෙන ආරාධනයකින් ඔවුන්ට මේ රටට එන්න හිතෙන්නේ නැහැ.

ඒ නිසා මම හිතනවා ඒ කාරණයට වේගවත් ප්‍රවේශයක් ගන්න අපහසු වෙයි. විද්වතුන්ගේ ම පාර්ශ්වයක් මේ ප්‍රශ්නයට කළ යුත්තේ කුමක් ද කියලා හිතන්න ඕනෑ. විද්වතුන් විතරක් දේශපාලනයට ගෙනත් පුටුවල වාඩි කළා කියලත් මේ ප්‍රශ්නය විසඳන්න පුළුවන් ය කියලා මම විශ්වාස කරන්නෙත් නැහැ. මේ රටේ කාලයක් රජවරු හිටියා, ඔවුන් හරියන්නේ නැහැ කියලා පාර්ලිමේන්තුවක් ගෙනාවා. පාර්ලිමේන්තුව හරියන්නේ නැහැ කියලා නිලධාරින්ට වැඩි බලතල දුන්නා. ඒකත් හරියන්නේ නැහැ කියලා විධායක ජනාධිපතිවරයෙක් හැදුවා. ඒකත් හරියන්නේ නැහැ කියලා විධායක අගමැතිවරයෙක් හදා ගත්තා. ඒකත් හරියන්නේ නැහැ කියලා දැන් උගතුන් ගැන කතා කරනවා. මේ රටේ කාලයෙන් කාලයට මේ සිදුවෙන වැඩ ගැන හැමෝම අවධානය යොමු කරන්න ඕනෑ.

* රැකියා විරහිත උපාධිධාරින් මේ රටේ යම් අධ්‍යාපන මට්ටමක් හිමිකරගත් පිරිසක්. ඒ සම්බන්ධයෙන් දරන මතය?

දිගින් දිගටම මේ රටේ උගත් පිරිසක් රැකියා නොමැතිව කාලය ගෙවනවා. උසස් පෙළින් ඉහළ අධ්‍යාපන මට්ටමක් තියෙන කොටස මේ ආකාරයට රටේ රැකියා වියුක්තියේ කොටස්කරුවන් වීම ගැන රජයක් විසින් අවධාරණයට ලක් කරයි කියලා අපි විශ්වාස කරනවා. ඒ පිළිබඳ රජය ඉතා කෙටි කාලයකින් සමාලෝචනය කරන්නත් ඕනෑ. වත්මන් රජය සාමාන්‍ය පෙළ සමතුන්, උසස් පෙළ සමතුන්, ධර්මාචාර්ය සමතුන් ගැන වුවමනාවෙන් කතා කළත්, උපාධිධාරින් ගැන එවැනි කතාවීමක් නොමැති වීම ගැන අපට කළකිරීමක් තියෙනවා. පසුගිය රජය අපිට ජනපතිවරයා හෝ අගමැතිවරයා හමුවීමටවත් ඉඩ දුන්නේ නැහැ. අපි බලාපොරොත්තු වෙනවා එළඹෙන මහමැතිවරණයට කලින් හෝ ජනපතිවරයා හා අගමැතිවරයා එකතුව මේ ප්‍රශ්නයට සාධනීය විසඳුමක් ලබාදෙයි කියලා.

දුමින්ද අලුත්ගෙදර

ඡායාරූප-ගයාන් පුෂ්පික

නවයුගයේ නවීන විද්‍යාත්මක පිළිගැනීමේ කාලමාන චක්‍රයට අනුව 2020 ජනවාරි මස පළමුවන බුධ දිනට එළිවෙන්න මධ්‍යම රාත්‍රී 00.00ට ශ්‍රී ලංකාව හිමි ඉකාර පක්ෂියා පුර පස ගමන අවස්ථාවේ කන්‍යා ලග්නය උදාව තිබියදී ලග්නාධිපති බුධ ග්‍රහයා වර්ගෝත්තම හා ස්වක්ෂේත්‍ර බලයෙන් යුතු හත්වැන්න හා හතරවැන්න අධිපති බ්‍රහස්පති හතරවැන්න වන ධනු රාශිගතව, රවි, බුධ ශනි, කේතු සමඟ චතුර් සහ ඡායා ග්‍රහ සංයෝගයකින් යුතුව ද, තුන හා අට අධිපති අඟහරු ස්වක්ෂේත්‍රව රුචක යෝග බලයෙන් යුතුව වෘශ්චික රාශිගතව සිටියි.

ශ්‍රී ලංකාවේ ලග්නය කුම්භ රාශියෙන් අයස්ථානගතව ලග්නාධිපති සෙනසුරු ස්වක්ෂේත්‍රව රණ හංස යෝග බලයෙන් යුතුව බ්‍රහස්පති රවි, බුධ, කේතු සංයෝග වීම ද අඟහරු ග්‍රහයා වර්ශෝත්තමව හා ස්වක්ෂේත්‍ර බවින් දහවැන්නෙහි රුචක යෝගයෙන් ද සිකුරු මකරයෙහි උච්ඡව ද, සඳු ලග්නගතව ද, රාහු පස්වැන්නෙහි ත්‍රිකෝණගතව ද පිහිටා ඇත. වර්ෂය ආරම්භයෙහි ජනවාරි මස 24 වන දින පැය 9 මිනිත්තු 56 ට සෙනසුරු ග්‍රහයා ස්වක්ෂේත්‍ර බවින් යුතුව මකර රාශිගතව වසර පුරා ශෂ නමැති මහා පුරුෂ යෝගය යෙදේ.

මාර්තු මස 29 දින සිට අගෝස්තු මස පළමුවන දින දක්වා සිකුරු තුලා රාශිගතව යෙදෙන මාලව්‍ය නමැති යෝගය සහිත පංච මහා පුරුෂ යෝග රාශියක් වර්ෂය අවසානය දක්වා බලපැවැත්වේ. මේ වර්ෂයේ පූර්ණ සූර්යග්‍රහණයක් ද, අර්ධ සූර්ය ග්‍රහණයක් ද ඡායා චන්ද්‍රග්‍රහණ 4ක්ද සිදුවීමට නියමිතව ඇත. 2020 වර්ෂය ජය අංක 6ට සහ ලංකා කේන්දරයට අනුව ක්ෂේම භූමි අංක 8 වේ.

ඉන්ද්‍ර, වර්ණ, ජය සංඛත ක්‍රමයට අදාළ වූ 2020 වසර ජය අංක 6ට අයත් වේ. 2020 (4) ජනවාරි මස (01) පළමු දිනය (01) ශේෂය අංක 6කි. අංක 6 කේන්දරස්ථානයට අදාළව ශතක ස්ථානය වේ. 2020 වර්ෂය ජය අංක 6ට අනුව බලන කල ලංකා කේන්දරයට හිමිවන්නේ අද්විතීය ස්ථානයකි. පාලන තන්ත්‍රයට අයත් අඟහරු කර්මස්ථානගතව රාජ්‍ය පාලන ක්‍රියාකාරකයා ලෙස බලවත් ශක්තිමත් බවින් යුක්තය. එහෙත් මෙහි චතුර් ග්‍රහයෝග බලය තුළ කේතුගේ සංයෝගය අහිතකර වේ. ලංකා කේන්දරයේ සෙනසුරු ව්‍යසන ස්ථානගත වීමද විවිධාකාරයේ කූට උපක්‍රමික ගුප්ත ලෙස බලපෑම් ඇති කරයි.

එමඟින් මෙරට පාලන තන්ත්‍රය අඩ පණ කිරීමේ අති බිහිසුණු උපක්‍රමික ක්‍රියාවන්හි නියුතු විය හැකි ලක්ෂණ මෙම විෂම ග්‍රහ තත්ත්වය තුළින් පෙන්නුම් කෙරේ. එහෙත් බ්‍රහස්පතිගේ බලපෑම මත මෙරට පාලන තන්ත්‍රයේ ඇතිවන සෑම ප්‍රශ්නයකදීම ඉතාමත්ම බුද්ධිමත්ව ක්‍රියාකර නිහඬ ප්‍රතිපත්තියක් අනුගමනය කරනු ඇත. මෙහිදී කර්මස්ථානගත රුචක නමැති මහා පුරුෂ යෝග බලයෙන් යුතු අඟහරු ග්‍රහයාගේ ශක්තිය ක්‍රියාත්මක වී, පැන නගින සෑම ප්‍රශ්නයකදීම, එයට අනුකූල වන අයුරින් නිසි පිළිතුරු ඒ අවස්ථාවේම එකවර ක්‍රියාත්මක කරනු ඇත. මේ තත්ත්වය මත පරසතුරු බලවේග මහත් කැළඹිලි ස්වභාවයකට පත්වනු ඇත. ඔවුන් ඉතා සියුම් ලෙස විවිධාකාර උපක්‍රම යොදා සහයෝගය දක්වමින් පාලන තන්ත්‍රය සමඟ ක්‍රියාකිරීමට උත්සුක විය හැකිය.

නමුත් එලෙස ක්‍රියාත්මක වී කිසිවකු අපේක්ෂා නොකළ මොහොතක ඉමහත් විනාශයක් සිදුකිරීමට පවා කේතුගේ රුදුරු බලපෑම හේතු වේ.

මෙම අහිතකර කාලය 2020 වසරේ ගුරු කේතු සංයෝගය යෙදෙන සැප්තැම්බර් 23 දින දක්වා කාලය තුළ බලපාන බැවින් වගකිව යුතු අංශ පාලන තන්ත්‍රය කෙරේ විශේෂ අවධානයකින් යුතුව ක්‍රියාකිරීම වැදගත් වනු ඇත.

ප්‍රවීණ ජ්‍යෝතීර්වේදී වෛද්‍යාචාර්ය
තෙරිපැහැ ආරියවංශ කීර්තිසිංහ

හිඳගොල්ල, කුරුණෑගල 

මේෂ - ධන ලාභ

අඟහරු හිමි මේෂ ලග්නයෙන් උපත ලබා ඇති ඔබගේ ලග්නාධිපති අඟහරු ග්‍රහයා නව වසර ආරම්භක මොහොතේ ලග්නයෙන් අටවැන්න වෘශ්චික රාශිගතව සිටියි. වෘශ්චික රාශියට අඟහරු ස්වක්ෂේත්‍ර වන අතර රුචක නමැති මහා පුරුෂ යෝග බලය ද, යෙදී ඇත. ලග්නයට උච්ඡ රවි සමඟ බුධ, ගුරු, ශනි, කේතු භාග්‍යස්ථානගතව ඇත. සිකුරු, සෙනසුරු, හිමි මකර රාශිගතව දහවැන්නේ ද සඳු ශනි හිමි කුම්භ රාශිගතව එකොළොස් වැනි භාවයේ සහ රාහු තෙවැනි භාවගතව මිථුන රාශියේ ගෝචරව යෙදී සිටියි.

මෙම ග්‍රහ තත්ත්වය මත ලග්නාධිපති අඟහරු අෂ්ටම බාධක සහිතව අටවැන්නේ ස්වක්ෂේත්‍රව සිටී‍මෙන් ඔබ කරා එන සියලු කරදර බාධක මැඩ ස්වාර්ථ සුබසිද්ධියට හේතුවන යහපත් ප්‍රතිඵල උදාකිරීමට හේතු වේ.

භාග්‍යස්ථානගතව උසස් චතුර් ග්‍රහයෝගයක් බලවත්ව යෙදීමෙන් දියුණුව, භාග්‍යය, වාසනාව සඳහා කරන කටයුතු බොහෝදුරට සාර්ථක වීමට හේතු වේ. බ්‍රහස්පතී මහා දසාව සහ එම දසාවේ රවි, බුධ, ශනි අතුරු දසා, උපදසා, විදසා ගෙවන අයට ඉතා උසස් දියුණුවකට හේතු වේ. බ්‍රහස්පතී දසා පසුකරමින් සිටින අයට තමන් කරන කරවන අපේක්ෂිත කටයුතු බොහෝදුරට ඉටුවේ. ආරම්භ කර අතරමඟ නතරකර තිබුණු වැඩ නැවත පටන් ගැනීම, ආදායම් තත්ත්වය වැඩි දියුණුවීම, උරුම හිමිකම් ලැබීම හදිසි ධන ලාභ, විභාග ජයග්‍රහණ, විවාහ අපේක්ෂිත අයට යහපත් මංගල යෝග සාර්ථක කරගත හැකි වසරකි.

සුබ දවස් - ඉරිදා, අඟහරුවාදා
සුබ වර්ණ - රතු, නිල්
පැලඳිය යුතු මැණික් - රතු කොරල්, රතු මැණික්
අය - 12 වැය 11

*****************

වෘෂභ-මානසික සුවය

සිකුරු හිමි වෘෂභ ලග්නයට අයත් ලග්නාධිපති සිකුරු නව වැන්නේ ශනි හිමි මකර රාශිතව ද, ලග්නයට උච්ඡ හා මුල ත්‍රිකොණගත සඳු ග්‍රහයා කර්මස්ථානගතව ද, භාග්‍යස්ථානය හා කර්මස්ථානය හිමි සෙනසුරු මාරකස්ථානය වන අටවැන්නේ රවි, බුධ, ගුරු, කේතු සමඟ ද රාහු දෙවැනි භාවයේ ද ගෝචරව සිටියදී නව වසර උදාවේ.

වර්තමානය වන විට වසර දෙකහමාරක කාලයක් තිස්සේ බලපැවැත් වූ සෙනසුරු අෂ්ටමක ඒරාෂ්ටක කාලය ජනවාරි මස 24 වැනි දින සෙනසුරු මකර රාශීගත වීමෙන් ස්වක්ෂේත්‍ර භාවයට පත්වීමෙන් නිම වේ. පසුගිය වසර, දෙකහමාරක ගත කළ කාලය තුළ තිබූ තද බල මානසික අසහනකාරී බලපෑම් ක්‍රමයෙන් මඟ හැර යයි. තරමක සහනදායී බවක් අති කළ ද, අට සහ එකොළහ අධිපති බ්‍රහස්පති කේතු සමඟ අටවැන්නේ ගෝචරවීම අහිතකරය. මාර්තු මස 29 වන දින සිට බ්‍රහස්පතී මකර රාශිගත වී සෙනසුරු සමඟ සංයෝග වීමෙන් නීච භංග වී ජුනි මස 30 දින දක්වා එහි ගෝචරවීම මධ්‍යස්ථ වශයෙන් යහපත් වේ.

මේ කාලය තුළ හිතේ කණස්සලු ස්වභාවය මඟහැරී ගොස් මානසික සතුට, ප්‍රබෝධය, ආදායම ක්‍රමයෙන් යහපත්වීම සිදුවේ. පුණ්‍ය කටයුතු හා සමාජ කටයුතු කෙරේ සිත් යොමුවීම, පවුලේ සතුට සමාදානය ඇතිවීම, ලෙඩදුක්, සතුරු කරදර, බාධා අවහිරතාවයන් මඟ හැරීම සිදුවේ. රැකියා තරග විභාග, සම්මුඛ පරීක්ෂණවලින් ජයග්‍රහණය කරයි. හදිසි ධන ලාභ, දරුවන්ගේ යහපත් අපේක්ෂාවන් ඉටු වේ.

ජුනි 29 සිට නොවැම්බර් 20 දක්වා කාලය තරමක අහිතකරය. විශේෂයෙන් ශනි සිකුරු මහ දසා, අන්තර් දසා ගත කරන අයට යහපත් වේ. රාහු කේතු දසා හිමියන්ට අසුබය.

සුබ දවස් - සිකුරාදා
සුබ වර්ණ - සුදු, ක්‍රීම්, අයිවර්
පැලඳිය යුතු මැණික් - දියමන්ති සහ සුදු මැණික්
අය - 11 වැය 5

*****************

මිථුන - මිශ්‍රපල

බුධ හිමි මිථුන ලග්නයෙන් උපත ලබා ඇති ඔබගේ ලග්නාධිපති හා සිවු වැන්න අධිපති බුධ ග්‍රහයා ගෝචර ගමනින් හත්වැන්න ගතව රවි ගුරු ශනි කේතු සමඟ ද රාහු ලග්න ගතවද සිකුරු අටවැන්නේ ද චන්ද්‍රයා නමවැන්නේද සිටියි. මෙම ග්‍රහ තත්ත්වය ඔබගේ යහපත පිණිස හේතු වුවද ජනවාරි මස 24 වැනි දින සෙනසුරු අෂ්ටම ඒරාෂ්ටකය ලබා එය මුළු වසර පුරා බලපැවැත්විම අහිතකර වේ.

කෙසේ නමුදු සෙනසුරු අටවැන්නට ස්වක්ෂේත්‍ර වීම හා සස හා ජය යෝගවට අනුකූලව ද බ්‍රහස්පතීගෙන් යෙදුණ රණ හංස යෝග බලය ද අගහරුගෙන් ලැබුණ රුචක යෝග බලය මත බාධක, කරදර, අවහිරතා කොතෙක් පැන නැඟුන ද ඒවා මැඩ ඉදිරියටම යෑ‍මේ අවකාශය ඇත.

තවද, මාර්තු මස 30 දින සිට ජුනි මාසය දක්වා ශනි ගුරු අටවැන්නෙහි සංයෝග වී නීච භංගවීම තුළින් අෂ්ටම බාධකය මැඩ ජය කොන්තය කරා යෑමට අවකාශ සැලසිය හැකියි.

කෙසේ නමුදු අසුබ පල ලෙස ආර්ථිකය දරා ගැනීමට නොහැකි වන අයුරින් වැයපස අධික වේ. ගුරු ශනි මහ දසා අතුරු දසා ගත කරන අයට හදිසි ධන ලාභ, සිකුරු ගුරු වාසනාවන්ත මංගල යෝග, රාහු, කේතු දසා හිමියනට මුත්‍රා ආබාධ, හදිසි විපත් කරදර බෝවන රෝග ඇතිවිය හැකිය. රවි, බුද, කුජ දසා හිමියනට හා සිසු දරු දැරියනට තරග විභාගවලින් රැකියා ජයග්‍රහණ. අන් අයට මිශ්‍ර පල උදාවේ.

සුබ දවස් - බදාදා, බ්‍රහස්පතින්දා
සුබ වර්ණ - කොළ සහ කහ
පැලඳිය යුතු මැණික් - මැණික්, පච්ච
අය - 2 වැය 5

*****************

කටක - ප්‍රේම සබඳතා

සිතට හා ආපෝ ධාතුවට අධිපති කෙනකුගේ මානසික පැවැත්ම බල දුබල අබල කිරීමට තරම් මහා ශක්තිමත් බලයක් සතු කටක ලග්නය අධිපති සඳු ග්‍රහයා වර්ෂ, ආරම්භයේ දී සෙනසුරු හිමි කුම්භ රාශිය අටවැන්න ගතව ගෝචරව සිටියි. නව වසර උදාවේදී සඳ අටවැන්න ගතවීම රාහු 12 වැන්න ගතවීම, රවි බුධ ගුරු ශනි කේතු රෝගස්ථානගතවීම හා සිකුරු හත්වැන්නගතව සිටින මොහොතක නව වසර උදාවේ.

ඒ අනුව කටක ලග්න හිමියනට ආමාශගත විෂම රෝගාබාධ තුන අධිපති හයවැන්න ගතවිමෙන් සහෝදර හෝ පවුලේ අසමගියට හේතුවන විරෝධතා ඇතිවේ. යුග දිවියේ ගැටලු, ප්‍රේම සම්බන්ධතා සාර්ථකව ආරම්භ වී අවසානයේ අනපේක්ෂිත මොහොතක වෙන්වීම, රැකියා ස්ථානවල කරදර, ප්‍රධානීන්ගේ අභූත චෝදනාවලට ලක්වේ. ස්ත්‍රී පක්ෂයේ අය නිසා අප්‍රසාදයට හේතුවන අවස්ථා සහ අන්පේක්ෂිත කරදර බාධක හිරිහැර නිතර නිතර පැන නැඟිය හැකිය.

ජනවාරි 25 ශනි 7 දිග්බලවීම මාර්තු සිට ජුනි 29 දක්වා ගුරු එහි විසීම යහපත් පල උදාකිරීමට හේතුවනු ඇත. එතැන් සිට නොවැම්බර් 20 අතර කාලය මධ්‍යස්ථ ලෙස ගෙවී යනු ඇත. කෙසේ නමුදු කරන සෑම ක්‍රියාවක් ගැනම සැලකිලිමත් වීමට වග බලා ගත යුතුය.

සුබ දවස් - සඳුදා, අඟහරුවාදා
සුබ වර්ණ - සුදු, ක්‍රීම්
පැලඳිය යුතු මැණික් - මුතු
අය - 2 වැය 5

*****************

සිංහ - රැකියා දියුණුව

රාජ තේජස, අභිමානය, ආලෝකය, දීප්තිය, බැබලිම දියුණුව, භාග්‍යය, යසස, රත්රන්, මැණික්, ගජමුතු ආදී මහා භාග්‍යසම්පන්න වස්තූන්ට මෙන්ම මහා බල පරාක්‍රමයෙන් යුතු පරිවාර සම්පත් උද්දීපනය, අවංක නිහතමානිබව මහත් අභිමානයෙන් යුතු තේජානුභාව පාලන තන්ත්‍රය - සිංහ ලග්නය හිමි රවිගෙන් නියෝජනය වේ.

නව වසර උදාවේදී බොහෝවිට මෙතෙක් පැවති කරදර ක්‍රමයෙන් දුරුවී යයි. අධ්‍යාපන කටයුතුවල මෙන්ම තරග විභාග, රැකියා කටයුතුවලින් උසස් ප්‍රතිඵල සහිත පල ප්‍රයෝජන සහිත කාලයකි.

ව්‍යාපාර දියුණුව, තනතුරුවල උසස්වීම් නිසි වයසේ පසුවන අයට උසස් විවාහ මංගල සාර්ථකවීම, විදේශ රැකියා, රැකියාවල දියුණුව, පවුලේ දියුණුව, සමඟිය, සමාදානය, හදිසි ධන ලාභ මෙන්ම තමාට හිමි දේ ලැබෙනු ඇත. නඩුහබ, දේපළ ආරවුල් ආදිය ඇති අයට ඒවායින් ජයග්‍රහණය අත්වන අතර වසරේ මුල් කාර්තුව යහපත් වේ.

වසරේ මැද කොටස කරදර හා රෝගාබාධ සහිත කාලයකි. එහෙත් අවස්ථානුකූලව බුද්ධිමත්ව ක්‍රියා කිරීමෙන් බාධක මැඩ ජයටැඹ කරා යා හැකිය. මාර්තු 24 ජුනි 30 අතර සතුරු කරදර හා ආමාශගත විෂම වායු පීඩා, අජීර්ණාබාධ බලපැවැත්විය හැකිය. ජුනි 30 ඔක්තෝම්බර් 20 අතර යට කී සුබපල සහිත කාලයකි.

සුබ දවස් - ඉරිදා, අඟහරුවාදා
සුබ වර්ණ - රන්
පැලඳිය යුතු මැණික් - පද්මරාග
අය - 14 වැය 11

*****************

කන්‍යා - රැකියා ලාභ

කේන්දරයේ සිවුවන ස්ථානයේ ස්වක්ෂේත්‍ර භවින් යුතු චාතුර්මහා ග්‍රහයෝගයක් යෙදීම යහපත් වේ.

ජනවාරි 24 දින සෙනසුරු ත්‍රිකෝණ ස්ථානයක් වූ පස් වැන්න ගතවේ. මාර්තු 29 සිට ජුනි 30 දක්වා කාලය බ්‍රහස්පති, සෙනසුරු සමඟ එක්ව මකර රාශියේ නීච භංගවීම යන ග්‍රහ තත්ත්වයන් ගැන සැලකීමේදී උපතින් ශනි ගුරු බලවත්ව සිිටින අයට යහපත් වේ.

තම දියුණුව සාර්ථකවීම, අපේක්ෂිත රැකියා ලැබීම, යාන වාහන ලාභ, යටපත්ව තිබු කටයුතු නැවත ආරම්භවීම තරග විභාග, රැකියා සම්මුඛ පරීක්ෂණ වලින් දියුණුව අත්වේ. කලක් තිස්සේ අපේක්ෂිත කටයුතු සාර්ථක කර ගැනීමට ලැබීම වැනි ඉතා සුබපල ලැබීමට ද හේතු වේ.

එහෙත් වර්ෂාරම්භයේ යෙදී තිබෙන සම විෂම අධම මධ්‍යස්ථභාවය අනුව පොදුවේ ගෘහවාසීනට නිතර කරදර බාධක, අඬ දබර, සතුරු විපත්, විෂ සහිත සතුන්ගේ උවදුරු, භූමිය තුළ අඳුරු ගති, ඉඩ කඩම් සම්බන්ධ ගැටලු, නීති ප්‍රශ්න, නඩුහබ, නිරපරාදේ ධනය ක්ෂය වී යෑමට හේතුවන අනපේක්ෂිත විපත්, අනතුරු ආබාධ වැනි කරදර පැනනැඟීමට හේතු විය හැකිය.

ජනවාරි 25න් පසු සෙනසුරු ස්වක්ෂේත්‍රභාවයට පැමිණීම යහපත් වුවද මාර්තු 29 ජුනි 30 අතර කාලයේ දී ගැබිනි මවුවරුන්ට ශල්‍යකර්ම කිරීමෙන් දරු උපත් සිදුකිරීම අසුබය. මේ කාලය පපුවේ සහ හෘද කපාඨවල, පෙනහැලිවල ආබාධ, ලේ කැටි ගැසීම්, සෙම් සහ විෂම රෝගාබාධ, මුත්‍රා, වකුගඩු ආබාධ ඇති කළ හැකි බැවින් ශරීර සෞඛ්‍යය ගැන සැලකිලිමත් විය යුතුය.

සුබ දවස් - බදාදා, බ්‍රහස්පතින්දා, සෙනසුරාදා
සුබ වර්ණ - කොළපාට
පැලඳිය යුතු මැණික් - පච්ච, ගෝමේද
අය - 2 වැය 5

*****************

තුලා- මංගල යෝග

තුලා ලග්නය හිමි ඔබගේ ලග්නාධිපති සිකුරු සිවුවැන්නේද, බුධ ගුරු ශනි රවි තෙවැන්නේ කේතු ද සමඟ ද පස්වැන්න ත්‍රිකෝණ වී රාහු සහ නව වැන්න අඟහරු ස්වක්ෂේත්‍රව ගොචරව යෙදී ඇත.

වර්ෂාරම්භයේ සිකුරු උච්ඡව සිටීම යහපත්වේ. ඒ අනුව තම ගෘහස්ථානය වැඩි දියුණු කිරීම, අලංකාරය, කලාත්මක බව, වටිනා උපකරණ ගැනීම, ගෘහ ජීවිතය වාසනාවන්ත ලෙස ගත කිරීම නිසි වයසේ සිටින විවාහ අපේක්ෂිත අයට වාසනාවන්ත විවාහයන් සිදුවීම, යාන වාහන ආදී වටිනා දේ මිලට ගැනීමට අවකාශ සලසා ගත හැකිය. රැකියා බලාපොරොත්තු අයට සුදුසු රැකියා ලැබීම, විදේශගතවීමට අපේක්ෂිත අයට ඒවා සාර්ථක වේ.

ජනවාරි 24 සෙනසුරු ස්වක්ෂේත්‍රව සිවුවැන්නට පැමිණේ. එය මධ්‍යස්ථ ප්‍රතිඵල සහිතය. මාර්තු 29 - ජුනි 29 අතර සුබාසුබ මිශ්‍රපල සහිත කාලයකි. ජුනි 29 - ඔක්තෝම්බර් 20 ගුරු, බුධ, රවි, සිකුරු මහ දසා අතුරු දසා ගත කරන අයට යහපත් වේ.

අයහපත් ප්‍රතිඵල ලෙස සෙම් රෝග, කොලස්ටරෝල් අධිකවීම, ගලනාලය, පිත්තාශය, ස්ත්‍රීන්ට ගර්භාෂ හා පියයුරු ආසාදන ඇතිවිය හැකිය.

සුබ දවස් - අඟහරුවාදා, සිකුරාදා, සෙනසුරාදා
සුබ වර්ණ - සුදු, ක්‍රීම්, අයිවරි
පැලඳිය යුතු මැණික් - දියමන්ති, සුදු මැණික්
අය - 11 වැය 5

*****************

වෘශ්චික - විදේශගතවීම

අඟහරු හිමි වාශ්චික ලග්නයෙන් ඔබගේ ලග්නාධිපති කුජ ස්වක්ෂේත්‍රව ලග්න ගතව යෙදීමෙන් නව වසර උදාවේ. ධනස්ථාන ගතව බලවත් බ්‍රහස්පති සමඟ චතුර් ග්‍රහයෝගයකි. සිකුරු තෙවැන්න සඳු සිවුවැන්න. රාහු අටවැනි භාවය තැන්පත්ව ඇත.

මෙම ග්‍රහ තත්ත්වය සහ වර්තමානයේ කුජ බුධ ගුරු රවි සිකුරු දසා උපදසා විදසා ගත කරන්නන්ට තම අපේක්ෂාවන් සාර්ථක වේ. සමාජයේ පිළිගැනීම, ගෞරවයට පාත්‍රවීම තරග විභාග රැකියා පරීක්ෂණ උසස් ලෙස ජය ගනී. රැකියා අපේක්ෂා ඒ අයුරින්ම ඉටුවේ. විදේශගත වීමේ අපේක්ෂා සාර්ථකවීම, හදිසි ධනලාභ ජාතික ආගමික සමාජිය ශාස්ත්‍රීය දේශපාලනික වශයෙන් පොදු ජාතික තලයේ සේවාවන්හි නියුතුවීමට ලැබීම, මංගල යෝජනා සාර්ථකවීම ආදිය ඉටුකරගත හැකි වර්ෂයකි. රාහු මහ දසා හිමියනට අසුභය.

විශේෂයෙන් පසුගිය වසර 7 ½ ක කාලයක් ගෙවා ආ සෙනසුරු ලග්න ඒරාෂ්ටක කාලය 2020 ජනවාරි 24 දින අවසන්වීමත් සමඟ ලග්නයෙන් තෙවැන්නට පැමිණ සෙනසුරු ස්වක්ෂේත්‍ර භාවයට පැමිණීම මාර්තු 29 සිට ජුනි මස 29 දින දක්වා බ්‍රහස්පති සෙනසුරු සමඟ තෙවැනි භාව ගතවීම වෘත්තිය කටයුතුවලට බාධා අවහිරතා මතුවීමට හේතු වුවද , මෙහිදී නීච භංග භාවය මත උසස් ප්‍රතිඵල ලැබීමට අවකාශ සැලසේ.

මාර්තු 29 සිට ජුනි 29 දක්වා කාලය තුළ බාධා කරදර විටින් විට ඇති වුවද තම කටයුතු ඉදිරියට කරගෙන යා හැකිය. ජුනි 29 සිට ඔක්තෝබර් 20 දක්වා යහපත් උසස් ප්‍රතිඵල සහිත කාලයකි. එතැන් සිට වසර අවසානය දක්වා යහපත්ය. එහෙත් රාහු අටවැන්නේ ගෝචර ගමන හේතුවෙන් දුර්වලකම් ඇති අයට වකුගඩු, මුත්‍රා, තුනටිය, හන්දිපත් ආබාධ හා හෘදයට හා මොළයට සම්බන්ධ, ලේ කැටි ගැසීම හෝ ස්නායු සම්බන්ධ දුර්වලතා ඇතිවිය හැකිය.

සුබ දවස් - ඉරිදා , අඟහරුවාදා, බ්‍රහස්පතින්දා
සුබ වර්ණ - රතු
පැලඳිය යුතු මැණික් - රතු මැණික්, රතු කොරල්
අය - 12 වැය 14

*****************

ධනු - බාධා, කරදර

බ්‍රහස්පති ග්‍රහයාට අයත් ධනු ලග්නයෙන් උපන් ඔබ ලග්නාධිපති ලග්න ගතව ස්වක්ෂේත්‍ර වූ චතුර් ග්‍රහ සංයෝගයකින් සමන්විතව නව වසර උදාවේ.

ඒ අතර සෙනසුරු ලග්න ගතව මිත්‍රව හා දෙවැනි භාවයට පැමිණ ස්වක්ෂේත්‍රභාවයට පත්වේ. නමුත් වසර පුරාවට ලග්න ඒරාෂ්ටකය බලපැවැත්වේ. එබැවින් ශනිගේ ක්‍රියාකාරීත්වය දුර්වල වේ. ගුරු කේතු සංයෝගය නිසා එහි නියම ප්‍රතිඵල නොලැබේ.

මෙම ග්‍රහ ගෝචරත්වය සංයෝගය දෘෂ්ඨි ලකෂණයන්හි ප්‍රතිඵල විෂම වේ. එබැවින් එකට ඇසුරු කරන කලණ මිතුරන්ම කෙනෙහිළිකම් කිරීම, අගරු චෝදනා, ප්‍රහාරාත්මක අනිත්‍ය ප්‍රකාශයන් නිසා විසමගියට හේතුවේ. මේ බලපෑම් මත ආර්ථික ලාභ පිණිස කරන කටයුතු වලින් අපේක්ෂිත ප්‍රතිඵල නොලැබේ.

අප්‍රේල් මස මුල සිට ජුනි අවසානය දක්වා හදිසි ධන ලාභ, ලොතරැයි දිනුම් හෝ තම උරුම අයිතිවාසිකම් ලැබීමට හේතුවන කාලපරාසයකි.

ජුනි 20 වැනි දින සිට නො. 20 දක්වා තරමක බාධා කරදර සහිත කාලයක් බැවින් හදිසි අනතුරු විපත් ආබාධ සිදුවීමට හේතුවන කාලවකවානුවකි. ප්‍රවේසම් වන්න. රවි, කුජ, ගුරු බුධ දසා ගතකරන අයට සුබ පල ද, රාහු කේතු අසුබ පල ද, අන් අයට මිශ්‍රඵල සහිත කාලයකි.

සුබ දවස් - ඉරිදා, බ්‍රහස්පතින්දා, සෙනසුරාදා
සුබ වර්ණ - කහ
පැලඳිය යුතු මැණික් - පුෂ්පරාග
අය - 14 වැය 12

*****************

මකර -රැකියා දියුණුව

ශනි හිමි මකර ලග්නයෙන් උපන් ඔබගේ ලග්නාධිපති සෙනසුරු ජනවාරි මස 24 වන දින සිට ලග්නගතව ස්වක්ෂේත්‍රව ශෂ හා ජය යෝග බලයෙන් යුතුව සිටීම, සුබ, අසුබ මිශ්‍රඵල ලබා දීමට හේතුවනු ඇත.

විශේෂයෙන් වසර උදාවේදී 12 වැනි භවයේ ගුරු බුධ රවි සමඟ චතුර් ග්‍රහ යෝගයක් යෙදී ඇත. සිකුරු ලග්න ගතවද සඳු 2 වැනි භාවයේ සහ රාහු 6 වැනි භාව ගතව ගෝචර වී ඇත.

ලග්න ඒරාෂ්ටකයට මැදිව සිටිය ද ලග්නයට ශනි ස්වක්ෂේත්‍රව හා බ්‍රහස්පති ස්වක්ෂේත්‍ර භාවය මත බාධා කරදර අවහිරතාවයන් මධ්‍යයේ ඔබ‍ගේ රැකී රක්ෂා, කර්මාන්ත කටයුතු හා ගෘහ ජීවිතය සාර්ථක ලෙස පවත්වාගෙන යා හැකිය.

දුගී මගී යාචකාදීනට උදව් උපකාර කිරීම, රෝගීන්ට පිහිටවීම, ආගමික කටයුතුවල නියැලීම වැනි කටයුතු ඇප කැප වී සිදුකරනු ලබයි. ආර්ථික තත්ත්වය යහපත් වුවද වැයපස අධික වේ. දැඩි ලෝභි භවකින් ක්‍රියාකළ ද ලැබෙන ධනය ක්ෂය වේ. දේපළ, ඉඩකඩම්, යාන වාහන, ණයතුරුස් වී මිලට ගැනීමට ක්‍රියාකරයි. පවුලේ කිට්ටුම ඥාතියකුගේ මරණයක් සිදුවේ. සුබාසුබ මිශ්‍රපල සහිත වර්ෂයක් බැවින් ඉතා බුද්ධිමත්ව කටයුතු කිරීම හා අසුබ විපාක මගහැර ගැනීමට අදාළ ශාන්තිකර්ම ගැන උනන්දුවන්න.

සුභ දවස් - සෙනසුරාදා, බ්‍රහස්පතින්දා, සිකුරාදා
සුභ වර්ණය - නිල්
සුභ මැණික් - කාකනිල් මැණික්
අය 11 වැය 12

*****************

කුම්භ - ආර්ථික ලාභ

සෙනසුරු හිමි කුම්භ ලග්නයෙන් උපන් ඔබගේ ලග්නාධිපති අයස්ථානගතව රවි, බුධ, ගුරු සහ කේතු සමඟ සංයෝගව සිටියි.

විශේෂයෙන් කුම්භ රාශිය හිමි සෙනසුරු ග්‍රහයා අයස්ථානගතවීම හා ධනස්ථානය හිමි බ්‍රහස්පති ද අයස්ථානගතව පස්වැන්නාධිපති අට අධිපති සමඟ හත්වැන්නාධිපති රවි, අයස්ථාන ගතවීමෙන් කුම්භ ලග්න හිමියනට තම ‍බොහෝ අපේක්ෂාවන් අපේක්ෂිත අයුරින්ම ඉටුකරගත හැකි වසරකි.

කුම්භ ලග්න හිමි ව්‍යාපාරික ප්‍රජාවගේ ආර්ථික වර්ධන වේගය ඉතා ඉහළ මට්ටමක පවත්වා ගෙන යා හැකි වන අතර, දේශපාලන අධිකාරියට සම්බන්ධ ගුරු, ශනි, බුධ, සිකුරු දසා අනු දසා ගත කරන්නට ඉතා උසස් ලෙස ජන ප්‍රසාදයට පත්විය හැකිය. තරග විභාග රැකියා ප්‍රශ්න අපේක්ෂිත අයුරින්ම ඉටුකරගත හැකි වර්ෂයකි.

ජනවාරි 25 දිනෙන් පසු කරදර අධික වුවද අවිවේකීව දිවා, රාත්‍රී නොබලා වෙහෙස මහන්සි වී වැඩෙහි යෙදේ. මාර්තු 29 සිට ජූනි 29 දක්වා කාලය තුළ මානසික වදදෙන ප්‍රශ්න අධික වන කාලයක් බැවින්, අන්‍යයන්ට උදව් උපකාර කිරීමේදී සැලකිලිමත් විය යුතු කාලයකි.

ගෘහ ජීවිතය හා පවුලේ සමගිය සතුට වාසනාව හා දියුණුව ඇතිවන කාලයකි. නිසි වයසේ අයට විවාහයන් සිදුවීම, රැකියා කටයුතු යහපත් ලෙස ඉටු වීමට ද හේතු විය හැක.

සුභ දවස්- සෙනසුරාදා, සිකුරාදා
සුභ වර්ණ - රතු, නිල්
පැලඳිය යුතු මැණික් - සුදු, නිල්
අය 8 වැය 5 යි

*****************

මීන - ව්‍යාපාර දියුණුව

ලග්නාධිපති බ්‍රහස්පති කර්මාස්ථානගතව රවි බුධ ගුරු කේතු සමඟ සංයෝගවීමෙන් දෙවැන්නාධිපති භාග්‍යස්ථානයෙහිද, සිකුරු 11 වැනි භාවයෙහිද, සඳු දොළොස් වැන්නෙහි හා රාහු හතර වැන්නෙහි ගෝචරව සිටියදී වසර උදාවේ. 2020 වසර මීන ලග්න හිමියනට ඉතා යහපත් වර්ෂයකි.

රැකී රක්ෂා කටයුතු සාර්ථක වේ. ආදායම් මාර්ග යහපත් වේ. වෙළෙඳ ව්‍යාපාර දියුණු වේ. ගුරු බුධ සිකුරු සෙනසුරු මහදසා උපදසා ගෙවන අයට අපේක්ෂිත දේපළ හෝ ඉඩකඩම් ගැනීමට ලැබේ.

දරුවන්ගේ අධ්‍යාපන කටයුතු ද සාර්ථක වේ. නිසි කලවයස් පිරුණු මීන ලග්න හිමියනට යහපත් මංගල යෝග හා ඉක්මන් විවාහ සිදු වේ. රැකියා අපේක්ෂිතයනට රැකියා ලැබීමටද හේතුවනු ඇත.

මෙම වර්ෂය ආගමික කටයුතු කෙරේ අැල්ම, දාන සීල භාවනාදි වත් පිළිවෙත්හි නියුතුවීම වැනි අංශ කෙරේ විශේෂයෙන් ලැදිවන ඉතා වාසනාවන්ත කාලයකි. ජනවාරි 24 දින සෙනසුරාදා අයස්ථාන ගතවී ස්වක්ෂේත්‍රවීම කර්මස්ථානාධිපති බ්‍රහස්පති වර්ගෝත්තම හා ස්වක්ෂේත්‍ර බලයෙන් යුතුවීම, අඟහරු භාග්‍යස්ථානයේ ස්වක්ෂේත්‍රව තිබිම වර්ෂාරම්භයේදී වැදගත් වනු ඇත.

සුබ දවස්- අඟහරුවාදා, බ්‍රහස්පතින්දා, සෙනසුරාදා
සුබ වර්ණ, සුදු, කහ
පැලඳිය යුතු මැණික් - පුෂ්පරාග
අය 11 වැය 2යි

සටහන
චතුමී පිටිපන 

තම න්‍යාය පත්‍රය තුළ රට පළමු තැන තබා ගත් දේශප්‍රේමී දේශපාලන වෘත්තිකයන්ට, පාර්ලිමේන්තුව, “ගැටුම්කාරි දේශපාලනයේ” සිට “සම්මුතිවාදී සහ තාර්කික දේශපාලනය” දක්වා රැගෙන එන්නට ඉඩ සැලසේ. මේ තත්ත්වය තුළ රටට වඩාත් සුදුසුම දේ හැමවිටම සිදු වනු නිසැක ය.

පාර්ලිමේන්තුව සම්බන්ධයෙන් මතු වී ඇති ගැටලු නිරාකරණය වනු ඇත.

පොරොන්දු වූ පරිදි මැතිවරණ ප්‍රතිසංස්කරණ හඳුන්වාදීමට යහපාලන රජය අපොහොසත් වූ බැව් අපි දනිමු. මැතිවරණ ප්‍රතිසංස්කරණ යෝජනා කිහිපයකුත්, එයින් ලැබෙන ප්‍රතිලාභ පිළිබඳත් විවරණය කිරීමට පුරවැසියකු හැටියට මම කැමැත්තෙමි. ජනමත විචාරණයකට නොගොස් 20 වැනි ව්‍යවස්ථා සංශෝධනයට ඒවා හඳුන්වා දිය හැකි බව ද සැලකිල්ලට ගන්න.

කුප්‍රකට “මනාප ඡන්ද ක්‍රමය” (Preference Voting System) ඉවත් කර දිස්ත්‍රික්ක යෝග්‍යතා ලැයිස්තුවක් (District merit list) නම් කරන්න. (පහළ දක්වා ඇති 3c ද කරුණාකර බලන්න.) ඒ අනුව සදාචාර විරෝධී සහ නාස්තිකාර පියවර අනුගමනය කරමින් මන්ත්‍රීවරුන්ට “මනාප ඡන්ද” ලුහුබැඳ යෑමේ අවශ්‍යතාවක් නැත. මහා මැතිවරණ සමයේදී අපේ ඇස වේදනාවට සහ වෙහෙසට පත් කරමින් සිදු කෙරෙන පෝස්ටර සහ බැනර් යුද්ධයෙන් ඉවත් වන්නට මේ අනුව අපේක්ෂකයන්ට සිදු වේ. එමඟින් පරිසරය ආරක්ෂා කෙරේ. මැතිවරණ ව්‍යාපාරයට අවශ්‍ය අරමුදල් පක්ෂය හෝ සන්ධානය මඟින් හෝ වියදම් කිරීම එමඟින් කෙරෙනු ඇත. එසේම වියපැහැදම් කිරීම, අදාළ බලධාරීන්ට තක්සේරු කිරීමට සහ අධීක්ෂණය කිරීමට ඉඩ සැලසේ.

වර්තමානයේ ක්‍රියාත්මක විමධ්‍යගත දේශපාලනික පිරමිඩය ඵලදායී විය යුතුව ඇත. එය සිදුවිය යුත්තේ දේශපාලන පිරමිඩයේ අදාළ ස්ථානවල කාර්යභාර සහ සීමා නියම කරමිනි. පාර්ලිමේන්තුව, පළාත් සභා සහ ප්‍රාදේශීය සභා යන ආයතනවල කාර්ය අතිච්ඡාදනය (එක ආයතනයක කාර්ය භාරයන් තවත් ආයතනයක කාරයභාරයට ඇතුළත් වීම) වළක්වා ගත යුතු ය. “නීති සම්පාදකයන්” වන පාර්ලිමේන්තු මන්ත්‍රීවරුන්ට පැවරී ඇති බලතල අඩු කළ හැකි ය යන්න අපගේ මතයයි. පාර්ලිමේන්තු මන්ත්‍රීවරුන්ට වඩා මහජනතාව සමඟ වඩාත් සමීපව කටයුතු කරන පළාත් සභා සහ ප්‍රාදේශීය සභා වෙත එම බලය මාරු කළ යුතුව ද ඇත. පළාත් සභා සහ ප්‍රාදේශීය සභා වර්තමානයේදී හැඳින්වෙන්නේ “සුදු අලි” යනුවෙනි. බිම් මට්ටමෙන් ද මාධ්‍යයෙන් ද එදිනෙදා ප්‍රතිපෝෂණය ලබා ගන්නා වූත්, ඵලදායී සංවර්ධනයකට පහසුකම් සපයන්නාවූත් ආයතන බවට ඒවා පත් කරන්නට පුළුවන.

මන්ත්‍රීවරුන්, “නීති සම්පාදක” භූමිකාවෙන් ඔබ්බට නොයා යුතුව ඇත. එසේ වුවත් දිස්ත්‍රික් සංවර්ධන කමිටු මට්ටමින් පවත්නා යාන්ත්‍රණය හරහා, පිරමිඩයේ පහළ ස්ථරවලට විමධ්‍යගත අරමුදල් වෙන් කිරීම, නිර්දේශ කිරීම සහ නිදහස් කිරීම මේ මන්ත්‍රීවරුන්ට කළ හැකි ය. එය සමාලෝචනය කළ යුත්තේ පහළ සිට ඉහළට යන ප්‍රවේශය (Bottom-up approach) යොදා ගනිමිනි.

පළාත්වල නිතර සංචාරය කිරීම අවශ්‍ය බව පෙන්වා දෙමින් මන්ත්‍රීවරුන් සහ ඇම­ැතිවරුන් සුඛෝපභෝගී වාහන ලබා ගැනීමට කරන ඉල්ලීම් ද මෙමඟින් බෙහෙවින් අඩු කරගත හැකි වනු ඇත. එසේම ඔවුන්ට “විමධ්‍යගත අරමුදල්” වෙන් කිරීමකුත් අවශ්‍ය නොවනු ඇත.

ජාතික මැතිවරණ ක්‍රියාවලිය,

(a). ශ්‍රී ලංකාවේ මැතිවරණ ව්‍යායාමයෙහි මූලික අවශ්‍යතාව වන්නේ පාර්ලිමේන්තුවේ ආසන 225න් ජයග්‍රාහකයා සහ එක් එක් පක්ෂය / සන්ධානය දිනාගත් ආසන සංඛ්‍යාව තීරණය කිරීමයි. සමානුපාතික අංක ගණිත ක්‍රමයකින් එය සරලව සහ තාර්කිකව සොයා ගත හැකි ය. මුළු රටම “ශ්‍රී ලාංකිකයන්ගේ එක් ඡන්ද කොට්ඨාසයක්” ලෙස සලකා, වලංගු ඡන්දවලට සමාන වටිනාකමක් දෙමින් එය සිදු කරන්නට පුළුවන. ශ්‍රී ලංකාව අර අඳින්නේ නූතන නියෝජිත ප්‍රජාතන්ත්‍රවාදී රාජ්‍යයක් ලෙස ඉස්මතු වීමටයි. එබැවින්, සුළු ජන වර්ග, ආගම් සහ කුල මත ඇති වෙනස්කම් පදනම් කරගෙන ඡන්ද වටිනාකම නොසලකා හැරිය යුතු නොවේ.

මෙම පියවර මඟින්, කුඩා දේශපාලන පක්ෂ කිහිපයක් මැතිවරණයකදී තරග වැදීම අධෛර්යය කෙරේ. එසේම, සන්ධාන ලෙස තරග කරන ප්‍රධාන පක්ෂවලට සම්බන්ධ වීමට එම කුඩා පක්ෂවලට දිරිදීමක් ද සිදු වේ. ඉන් ශ්‍රී ලාංකික අනන්‍යතාව ප්‍රවර්ධනය කෙරේ.

(b). ඒ ඒ පක්ෂය/ සන්ධානය දිස්ත්‍රික් මට්ටමින් රැස්කර ගත් ඡන්ද සංඛ්‍යාව සමානුපාතික අංක ගණිතයෙන් ගණනය කර බැලිය හැකි ය. ඒ අනුව ඒ ඒ පක්ෂය/ සන්ධානය ජාතික මට්ටමෙන් ලබාගත් ආසන සංඛ්‍යාව, දිස්ත්‍රික්ක අනුව බෙදා වෙන්කර ගැනීමට පුළුවන.

(c). එක් එක් දිස්ත්‍රික්කයට මන්ත්‍රීන් නම් කිරීම ස්වයංක්‍රීයවම ඉන්පසු සිදුවනු ඇත. එය එසේ වන්නේ යෝග්‍යතා අනුපිළිවෙළ අනුව දිස්ත්‍රික් මට්ටමෙන් නාම යෝජනා ලැයිස්තු ලබාගෙන, එම ලැයිස්තු පිළිබඳ මහජනයා දැනුවත් කර ඇති බැවිනි. (නාමයෝජනා ලබාදෙන එක් එක් පක්ෂය / සන්ධානය නිසි පරිදි ලියාපදිංචි කිරීම් සිදු කර ඇත.) මේ ලැයිස්තුව අකාරාදී පිළිවෙළට අද වනවිට ඉදිරිපත් කෙරෙන්නේ ආසන 196ක් පමණක් ආවරණය වන අන්දමටයි. ජාතික ලැයිස්තුවේ සැබෑ පරමාර්ථය වන්නේ, පක්ෂ / සන්ධාන මඟින් පවත්වන ලබන විධිමත් සම්මුඛ පරීක්ෂණවලින් කාන්තා සහ තරුණ නියෝජනය සාක්ෂාත් කර ගැනීමයි. යෝග්‍යතාව පදනම් කරගෙන සකස් කෙරෙන පක්ෂ / සන්ධාන නාමයෝජනා ලැයිස්තුවකින් එම සියලු ජාතික අවශ්‍යතා එකවර ආවරණය කෙරේ.

එක් එක් දිස්ත්‍රික් නාමයෝජනා ලයිස්තුවේ පහළට අතිරේක නාමිකයන් තිදෙනකු හෝ සිව්දෙනකු හෝ එකතු කර ලියාපදිංචි කිරීමට අවසරය දිය හැකි ය. ඒ මන්ත්‍රීවරයකුගේ ඉල්ලා අස්වීම, මරණය හෝ මන්ත්‍රීවරයකු නෙරපා හැරීම වැනි අවස්ථා සඳහා ය. එසේ යෝග්‍යතා අනුපිළිවෙළට සකස් කර ගත් ලැයිස්තුව ඡන්ද දායකයන්ගේ අවධානයට ලක්වීම ඉතා වැදගත් කාරණයකි. ජාතික පාර්ලිමේන්තුව නියෝජනය කිරීමට තමන් තෝරා පත්කරගන්නා පුද්ගලයන්ගේ වැදගත්කම සහ ගුණාත්මක බව පිළිබඳ ඡන්ද දායකයාට, ඡන්දය ප්‍රකාශ කිරීමට පෙර පැහැදිලි අදහසක් ලබා ගැනීමට මෙමඟින් හැකි වේ.

මේ අනුව යෝග්‍යතා අනුපිළිවෙළින් දේශපාලන වෘත්තිකයන් තෝරා ගැනීමේ මුළුමහත් වගකීම ඒ ඒ පක්ෂවලට / සන්ධානවලට පැවරේ. එය ඡන්දදායකයාට පැවරෙන්නක් නොවේ. මේ සඳහා ඒකාබද්ධ සංවිධාන පෙළගැසිය යුතු ය. නියෝජිතයන් තෝරා ගැනීමට අපක්ෂපාති/ පාරදෘශ්‍ය, විධිමත් සම්මුඛ පරීක්ෂණ පැවැත්විය යුතුව ඇත. ඒ සඳහා මූලික සුදුසුකම්, නිර්ණායක කර ගත යුතු ය. එපමණක් නොව, කාන්තා / තරුණ නියෝජනය සම්බන්ධයෙන් මැතිවරණ කොමිසම් සභාව නියම කර ඇති අවශ්‍යතාත්, සිවිල් අයිතිවාසිකම් පිළිබඳ කටයුතු කරන පැෆරල් (Paffrel), කැෆේ (Caffe) සහ CMEV වැනි සංවිධාන නිර්දේශ කරන වෙනත් නිර්ණායකත්, නියෝජිතයන් තෝරා ගැනීමේදී භාවිතයට ගත යුතුව ඇත. දිස්ත්‍රික් මට්ටමෙන් යෝග්‍යතා ලැයිස්තු තිබීමේ ප්‍රතිඵලයක් හැටියට ඡන්ද පත්‍රිකාවට ඇතුළත් වන්නේ පක්ෂවල හෝ සන්ධානවල හෝ නම් සහ සංකේත පමණි. එය සැබවින්ම සරල ය. මෙමඟින් ඡන්ද ගණනය කිරීමේ ක්‍රියාවලියේදී මැතිවරණ දෙපාර්තමේන්තුව මත පැටවෙන වැඩ ප්‍රමාණය අඩු වේ. මැතිවරණ දිනයේ මධ්‍යම රාත්‍රිය එළඹෙන විට මහජනතාවට ප්‍රතිඵල දැන ගැනීමටත් මේ නිසා ඉඩ සැලසේ.

4. දේශපාලන පක්ෂ / සන්ධාන, ප්‍රබල ප්‍රතිපත්ති ප්‍රකාශ සහ ප්‍රායෝගික ක්‍රියාකාරී සැලසුම් සකස් කිරීමේ හැකියාව ඇති ඒකාබද්ධ සංවිධාන විය යුතු බව නූතන ප්‍රජාතන්ත්‍රවාදය තුළ ඡන්ද දායකයා අපේක්ෂා කරයි. මැතිවරණ ප්‍රතිපත්ති ප්‍රකාශනය ඡන්ද දායකයාගේ තීරණය සඳහා තීරණාත්මක සාධකයක් බවට පත්වන බැවින් එය නිත්‍යානුකූලව බලාත්මක ලේඛනයක් බවට පත් කළ යුතු වේ .

5. දිස්ත්‍රික් යෝග්‍යතා ලැයිස්තුව ක්‍රියාත්මක වීමත් සමඟම පාර්ලිමේන්තුවේ ආණ්ඩු පක්ෂයේ හෝ විරුද්ධ පක්ෂයේ හෝ සිටින මන්ත්‍රීවරුන් අනෙක් පාර්ශ්වයට පැමිණ අසුන් ගැනීමේ (Cross-over) විකාරය ද නතර වනු ඇත. මන්ත්‍රීවරයකුගේ මරණය, ඉල්ලා අස්වීම, මන්ත්‍රීවරයකු නෙරපා හැරීම වැනි අවස්ථාවකදී ස්වයංක්‍රියවම පත් වන්නේ ලයිස්තුවේ ඊළඟට සිටින පුද්ගලයා ය. ආණ්ඩු පක්ෂයේ හෝ විරුද්ධ පක්ෂයේ හෝ මන්ත්‍රීවරුන් පැමිණ අනෙක් පාර්ශ්වයේ අසුන් ගැනීමේ ක්‍රියාවලිය (Cross-over) නීතිමය වශයෙන් අඩුවක් නොතබාම ව්‍යවස්ථානුකූලව නවතා දැමිය යුතුව ඇත.

6. ශ්‍රී ලංකික අනන්‍යතාවයන් අනුව කැබිනට් අමාත්‍ය ධුර සංඛ්‍යාවත් (30) ව්‍යවස්ථානුකූලව නිශ්චිතව වෙන්කර ගැනීමට ගණිතමය ක්‍රමයක් (PR arithmetic) භාවිත කළ හැකි ය. එවිට සියලුම ආසන දිනා ගන්නා පක්ෂය කැබිනට් මණ්ඩලය නියෝජනය කරනු ඇත. දෙමළ ජාතික සන්ධානය, ජනතා විමුක්ති පෙරමුණ වැනි කුඩා පක්ෂවලටත් කැබිනට් අමාත්‍යධුර හිමිවීම මින් සහතික කෙරේ. මෙහිදී 13වන ව්‍යවස්ථා සංශෝධනයෙන් පොරොන්දු වූ “ +” සංරචකයට ද පිළිතුරු සැපයිය හැකි ය.

7. ජාතික ආණ්ඩුවක් පිහිටුවීමේදී කැබිනට් අමාත්‍යංශ වැඩිකිරීම සඳහා වැදගත් වන, වත්මන් පාර්ලිමේන්තු විධිවිධාන, ව්‍යවස්ථාමය වශයෙන් නිශ්චිත සහ සාධාරණ අගයකට පැමිණ විය යුතුය.

8. ජනාධිපතිවරයා රාජ්‍ය නායකයා ලෙසත් දේශපාලන පක්ෂ, ජනවාර්ගිකත්වය සහ ආගම් භේදයකින් තොරව ජනතාවගේ “භාරකරු” ලෙසත් කටයුතු කළයුතු බවට බල කිරීමට පුළුවන. ඒ අනුව ජනාධිපතිවරයා, තම ධුර කාලය තුළ කිසිදු ආකාරයක පක්ෂ දේශපාලනයක යෙදීම නීතියෙන් වැළක්විය යුතුව තිබේ. පසුගිය ජනාධිපතිවරණය සාමකාමීවත්, දූෂණයෙන් තොරවත් පැවැත්විය හැකි වුයේ හිටපු ජනාධිපතිවරයාගේ මධ්‍යස්ථභාවය හේතුවෙනි.

9. ජනාධිපති ධුරය සම්බන්ධයෙන්, ඒකාධිපති බලතල තවමත් ඉතිරිව තිබේ නම් ඒවා ඉවත් කළයුතු ය.

10. උපරිම පිරිවැය ප්‍රතිලාභ ලබාගැනීම සඳහාත්, ඡන්දදායකයාගෙන් තාර්කික මැතිවරණ ප්‍රතිඵලයක් ලබාගැනීමටත් ජනාධිපතිවරණය සහ මහ මැතිවරණය ආණ්ඩුක්‍රම ව්‍යවස්ථාව මඟින් සංගෘහිත එක් නිශ්චිත දිනයකදී පැවැත් විය යුතුව ඇත. කෙසේ වුවත් විධායක ජනාධිපති ධුරය අහෝසි කිරීමට පසුගිය දශක දෙකහමාරක කාලය මුළුල්ලේ ජනතාවගෙන් නැඟුණ විරෝධය ද මෙහිදී සලකා බැලීම අනිවාර්යය වේ.

11. මෙම යෝජනාවලින් පැන නඟින සුදුසු සංශෝධනවලින් පසුව පළාත් සභා මැතිවරණය නිත්‍යානුකූලව නිරූපිත දිනයකදී පැවැත්වීම වඩාත් තාර්කික ය.

12. ප්‍රදේශයේ ජනතාව සමඟ අවංකවම කටයුතු කළහැකි ස්වාධීන, උගත්, සමාජීය මනසක් සහිත, පිළිගත හැකි / ගෞරවනීය පුද්ගලයන් තෝරා පත් කර ගැනීමට සරිලන අන්දමට ප්‍රාදේශීය සභා දේශපාලනික බලපෑම්වලින් වියුක්ත කළ යුතු ය. එහිදී “ග්‍රාම රාජ්‍ය සංකල්පයට” (Grama Rajya concept) අනුකූලව වීම වඩාත් වැදගත් ය. ප්‍රාදේශීය මට්ටමෙන්, ජනතාවට බිම් මට්ටමේ සංවර්ධන පහසුකම් සපයන්නන් සහ ඔම්බුඩ්ස්මන්වරුන් අවශ්‍ය ය. ඔවුන් තම දේශපාලන ආධාරකරුවන්ට අනුග්‍රහ දැක්වීමට සහ ඔවුන්ගේ මැතිවරණ වියදම් අයකර ගැනීමට, අල්ලස් දූෂණ ගන්නා අයවලුන් නොවිය යුතු ය. දැනට සිටින පළාත් සභා මන්ත්‍රීවරුන් සංඛ්‍යාව ද සහේතුක විය යුතු ය.

අදාළ අනෙකුත් ගැටලු

(a). විකේන්ද්‍රික දේශපාලන පරිපාලනයක් පවතින අවස්ථාවක, මනාව නිර්වචනය කළ අරමුණු සහ කාර්යයභාර වගකීම් අනුව, නිසි වැඩ අධ්‍යාපනයක් මත පදනම් වෙමින් මන්ත්‍රීවරුන් සංඛ්‍යාව (225) සාධාරණීකරණය කිරීම අවශ්‍ය වේ. කලාපයේ සෙසු රටවලින් උදාහරණ ගෙන ඒ සඳහා සූත්‍රයක් ව්‍යවස්ථානුකූල කළ හැකි ය. අපගේ මතය අනුව වත්මන් පාර්ලිමේන්තු මන්ත්‍රීන් 225 පවා රැස්කිරීම ඵලදායි නොවේ.

(b). ඵලදායීතාව සහ වැඩ අධ්‍යයනය පිළිබඳ විශේෂඥයන්ගෙන් සමන්විත කමිටුවක්, පාර්ලිමේන්තු මන්ත්‍රීවරුන්ගේ වැටුප් හා වරප්‍රසාද නිර්දේශ කරන්නේ නම් වඩා වැදගත් වේ. තමන්ගේ වැටුප් සහ වරප්‍රසාද වැඩි කර ගැනීමට මන්ත්‍රීවරුන් සහයෝගය දැක්වීම “බැඳියා පිළිගැටුමකට” (Conflict of interest) සමාන ය. එපමණක් නොව පාර්ලිමේන්තුවේ වසර පහක් සම්පූර්ණ කිරීමෙන් ජීවිතාන්තය දක්වා විශ්‍රාම වැටුපක් ලබාගැනීමට ඉඩ සලසන, මන්ත්‍රී විශ්‍රාම වැටුප් ක්‍රමය ඉවත් කරන මෙන් හෝ අඩු තරමින් ඒ ගැන සමාලෝචනය කරන මෙන් හෝ ඉල්ලා මහජන විරෝධ මතු වී තිබීම සැලකිල්ලට ගත යුතු ය.

නව දේශපාලනික සහ මාධ්‍ය සංස්කෘතියක අවශ්‍යතාව

ඉහත ක්‍රියාමාර්ග මඟින්, දේශපාලන / මාධ්‍ය සංස්කෘතිය තුළ දේශපාලනඥයන්ගේ සහ ජනතාවගේ ප්‍රවේශයේ සහ ආකල්පවල “සුසමාදර්ශ මාරුවක්” ඉස්මතු කෙරේ. ඡන්දදායකයන් ඔවුන්ගේ ආකල්ප වෙනස් කර ගත යුතු ය. ඔවුන්ගේ ප්‍රාදේශීය ගැටලු විසඳා ගැනීමට ජාතික මට්ටමේ ජනතා නියෝජිතයකු වෙත නොපැමිණිය යුතු ය. රජය, ඉතා වැදගත් මහජන ආයතනවල යහපාලනය සහතික කළ විට මේ ආකල්ප වෙනස ඉබේම ඇතිවනු නිසැක ය.

අතිශය ගැටලු සහගත අවස්ථාවකදී පරිපාලකයන්ගේ ප්‍රමාද ගැන පෙන්වාදීමට ඡන්දදායකයකු ප්‍රාදේශීය සභා හෝ පළාත් සභා හෝ මන්ත්‍රීවරයකු වෙත යා හැකි ය.

තම න්‍යාය පත්‍රය තුළ රට පළමු තැන තබා ගත් දේශප්‍රේමී දේශපාලන වෘත්තිකයන්ට, පාර්ලිමේන්තුව, “ගැටුම්කාරි දේශපාලනයේ” සිට “සම්මුතිවාදී සහ තාර්කික දේශපාලනය” දක්වා රැගෙන එන්නට ඉඩ සැලසේ. මේ තත්ත්වය තුළ රටට වඩාත් සුදුසුම දේ හැමවිටම සිදු වනු නිසැක ය. පාර්ලිමේන්තුව සම්බන්ධයෙන් මතු වී ඇති ගැටලු නිරාකරණය වනු ඇත.

පවත්නා ක්‍රමයට වඩා සංකීර්ණ තත්ත්වය මතු නොකරමින්, තමන්ගේ මුදල් සරල, වියදම් අඩු සහ අර්ථවත් මැතිවරණ ක්‍රමයක් වෙනුවෙන් යෙදවෙනු ඇතැයි බුද්ධිමත් බදු ගෙවන්නෝ / ඡන්දදායකයෝ බලාපොරොත්තු ඇති කර ගනිති.

මෙම තීරණාත්මක ‘සුසමාදර්ශ මාරුව” ගෙන ඒමට අවශ්‍ය බලය සහ ශක්තිය ජනමාධ්‍ය සහ සමාජ මාධ්‍ය සතුව තිබේ. මේ තුළ පාර්ලිමේන්තු නියෝජිතයන් කෙරෙහි මාධ්‍යය තබා ඇති දැඩි අවධානය වෙනතකට යොමු කරන මෙන් අපි ඉල්ලා සිටින්නෙමු. ඒ වෙනුවට, පළාත් සහ ප්‍රාදේශීය වශයෙන් සිදුවන සංවර්ධන කටයුතු ධනාත්මක සහ දේශප්‍රේමී දෘෂ්ටිකෝණයකින් වාර්තා කළ යුතු ය. එසේ වාර්තා කිරීමේදී ජනප්‍රිය, සංවේදී කාරණා වාර්තාකරණයෙන් ඈත් වී සමබර වාර්තාකරණයක් පවත්වාගෙන යෑමට මාධ්‍යය ක්‍රියා කළ යුතුව ඇත.

“Opt for simple and productive electoral reforms” මැයෙන් “ඩේලි නිවුස්” පුවත්පතේ පළ වී තිබූ බර්නාඩ් ප්‍රනාන්දුගේ ලිපියෙහි සිංහල පෙරළුමයි.

l ලෝකයේ

කොතැනක හෝ සිදුවන වැරැද්දක් දෙස බලන්න.

එහි බීජ හටගෙන ඇත්තේ

පවුලකින්ම මිස වෙන කොහෙන්ද? ඒ නිසා ලොව වැදගත්ම සංස්ථාව වන පවුල් සංස්ථාව නිසි

නඩත්තුවකට ලක්වුවහොත් ලෝකයේ බොහෝ ගැටුම් සහ ගැටලු අවම වෙනු ඇත.

හෙට දවස නැවුම්ය. බලාපොරොත්තුද නැවුම්ය. ඒ නව වසරක් ලබන නිසාය. පසුගිය වසරේ ඉටු නොවුණු බලාපොරොත්තුද දලුලා වැඩී ඇති බැවින්, ඊට අලුත් ශක්තියක් එක් වී ඇත. මේ සියල්ල යථාර්ථයක් බවට පත්වන්නේ පවුල නමැති මුදුන් මුල ශක්තිමත්ව වැඩී තිබුණහොත්ය. වැල්ලෙහි තනන නිවෙස්වල රඳා පැවැත්මක් නැත. එය ගොඩනැඟිය යුත්තේ ශක්තිමත් අත්තිවාරමක් මතය. ඒකත්වය සහ අඛණ්ඩත්වය සහ දරුඵල ගැන ලියන්නට සිතුවේ එබැවින්ය. එනම් කිතුනු විවාහයේ ප්‍රධාන ලක්ෂණ ගැන අමතක කොට ඉතිරි ඒවා ගැන කතා කිරීමෙන් පලක් වන්නේ නැත. මන්දයත් මුළු මහත් සමාජයක් ගොඩ නැගෙන්නේ පවුල කේන්ද්‍ර කොටගෙන බැවිනි.

විවාහයේ අඛණ්ඩත්වය යනු කුමක්ද? දෙවියන් වහන්සේ විසින් එක් කළ දේ මිනිසුන් විසින් වෙන් නොකරේවා යන ප්‍රකාශය කිතුන අපට අලුත් කතාවක් නොවේ. හැම කිතුනු විවාහකයදීම මේ ප්‍රකාශය ඇසෙනවිට අපිද හදවතින්ම පතනුයේ එය එසේම වේවා යනුවෙනි. එහෙත් ඇතැම් විවාහ කෙටි කලකින්ම දෙදරා යන්නේ නීත්‍යානුකූලවද ඔවුනොවුන් වෙන් කරලීමෙනි. කිතුනු විවාහයේ අඛණ්ඩත්වය යනු අඹුසැමියන්ගේ ඒකාත්මිකභාවයයි. එය ඛණ්ඩනය වීම යනු දෙදෙනකුගේ විරසකවීමක් නොව මුළු මහත් සමාජයේම විරසක වීමකි. විශේෂයෙන්ම දරුවන් සිටින අඹුසැමියන්ගේ විරසක වීම සමාජයට කරන බලපෑම සුළු පටු නොවේ. සැමියා හෝ බිරියගේ අත්හැරයෑමෙන් තනිවෙන අඹුසැමියන්ගේ වේදනාබර මානසිකත්වය ඔවුන්ගෙන් ලෝකයට වෙන සේවය අවම කරනු ඇත. දරුවන්ගේ තත්ත්වයද ඊටත් වඩා ඛේදජනකය. ඔවුන් විවිධ මානසික ඝට්ටනයන්ට ලක්වෙමින් ජීවිතය ගොඩනගා ගැනීමට වෙර දරයි. තනිවූයේ විරැකියාවෙන් පෙළෙන මවක නම් එහි ඛේදනීය බව තවත් දරුණුය. දරුවන්ට ළමා නිවාස, පල්ලි, පන්සල්වල රැදෙන්නට සිදුවෙයි. දරුවන්ගේ මනසට දැනෙන්නේ අනාථ භාවයකි. අසරණ භාවයකි. ඔවුන්ගේ සිත් සනසන්නට හෝ ඔවුන්ට දිරි දෙන්නට හෝ කෙනකු නැත. නව යොවුන් වියේ දරුවන්ට කතා කිරීමට පාසලකට ගිය අවස්ථාවකදී එක් දියණියක මා වෙත තුන හතරට නැමූ කොළ කැබැල්ලක් දුන්නාය. එහි තිබුණේ ගැටලුවකි. සමහර තාත්තලා දරුවන් දමා යන්නේ ඇයි? මේ කුඩා කොළ කැබැල්ලෙහි තිබූ ගැටලුවේ සංකීර්ණත්වය ගැන මා අමුතුවෙන් කිව යුතුද? දියණියගේ ලෝකයම කඩා වැටී ඇති බව නොදැනෙන්නේ කාටද? එහෙත් මවුපියන්ට එය නොවැටහුණේ මන්ද? විවාහය යනු කුමක්ද යන්නත් එහි අඛණ්ඩතාව කෙතරම් වැදගත්ද යන්නත් වටහා නොගෙන විවාපත්වීම දික්කසාදයට අප කලබල කරවනු ඇත‍. එබැවින් මේ අඛණ්ඩතාව ගැන මනා වැටහීමකින් යුතුව ජීවත්වීම ඉතා වැදගත්ය.

ඒකත්වයද එසේමය. පුරුෂයා සිය මවද පියාද අතහැර සිය භාර්යාවට බැ‍ඳෙන බව අපි නොදන්නෙමුද? එවැනි බැඳීමක් ඇතිව විවාහ වෙන අය වෙනත් බැඳීම්වලට ලක්වෙන්නේ කෙසේද? එතැනදී කුමක් හෝ අනවබෝධයක්, පෙළඹවීමක් අප වරදට පොළඹවනු ඇත. මෙවැනි වෙනත් සබඳතාවක් හේතුකොට ගෙන ඉරිතලා යන හදවත් නැවත එකතු කිරීම ඉතා අසීරු කටයුත්තකි. විශ්වාසය පළුදු වීම යනු වීදුරු බඳුනක් ඉරිතලා යෑමක් බඳුය. එබැවින් එකී විශ්වාසය රැක ගැනීම ඉතා වැදගත්ය. පවුලක ශක්තිමත් පැවැත්මට අඹුසැමි ප්‍රේමය, අවබෝධය, එකිනෙකාට ගරු කිරීම, පරිත්‍යාගය මෙන්ම විශ්වාසයද ඉතා වැදගත් බව සිය දහස් වාරයක් ලියැවී ඇත. කියැවී ඇත‍. එසේ තිබියදී එකී වටිනාකම් කැඩී බිඳී යන්නේ කවර හේතු මතද යන්න ගැන අප සැලකිලිමත් විය යුතුය. එකී ගැටලු අවබෝධයෙන්, ඉවසීමෙන් යුතුව නිරාකරණය කර ගැනීමට අපට හැකියාව ඇත්නම් කිතුනු පවුලේ නොහොත් කිතුනු විවාහයේ ඒකත්වය රැක ගැනීම අසීරු කරුණක් නොවන්නේය.

පවුලක වටිනාම සම්පත දරු සම්පතය. දෙවියන්ගෙන් අප ලද වටිනාම ත්‍යාගය වන්නේ දරුවන්ය. දරුවන් ලොව යහපත් කීර්තිමත් පුරවැසියන් බවට පත් කර ගැනීම අපගේ පරම පැතුම වන්නේය. එය යථාර්ථයක් කර ගැනීමට නම් පවුලක ඒකත්වය සහ අඛණ්ඩතාව ගැන අවදියෙන් සිටීමට අපට සිදු වනු ඇත. එය එසේ නොවෙන තාක් කල් කිතුනු පවුලකින් ලෝකය බලාපොරොත්තු වන පූර්ණත්වය ලබාදීම අසීරු වෙනු ඇත. මෙය කිතුනු පවුලකට පමණක් ලඝු කොට දැක්වීම සාධාරණයැයි කිව නොහැකිය. කිතුනු සභාව කිතුනු පවුලක අඛණ්ඩතාව, ඒකත්වය සහ දරුපල ගැන කර ඇති ප්‍රකාශ සහ මෙහි ලියැවුණ සෙසු කාරණාද සෙසු පවුල්වලටද වැදගත් වෙන බව සත්‍යයකි.

ලෝකයේ කොතැනක හෝ සිදුවන වැරැද්දක් දෙස බලන්න. එහි බීජ හට ගෙන ඇත්තේ පවුලකින්ම මිස වෙන කොහෙන්ද? ඒ නිසා ලොව වැදගත්ම සංස්ථාව වන පවුල් සංස්ථාව නිසි නඩත්තුවකට ලක්වුවහොත් ලෝකයේ බොහෝ ගැටුම් සහ ගැටලු අවම වෙනු ඇත. මුළු ලෝකයම එක වර අවධානය යොමු කළ යුතුවන්නේ පවුල වෙතය. පවුලක ගොඩ නැඟීමකින් තොරව ලෝකයේ ගොඩ නැඟීම ගැන කතා කළ නොහැකිය. තනිවූ මවුපියන් තනිවූ දරුවන් එකතු වූ කල ආදරයේ සහයෝගයේ මහා ගංගා ගලා යනු ඇත. ඒ ගං දියෙන් ලෝකය සරුසාරවත් වෙනු ඇත‍. නව වසරේ කිතුනු මිණ පැතුම වන්නේ අඛණ්ඩතාව සහ ඒකත්වයෙන් සශ්‍රීක වූ පවුලකි. එවැනි පවුල් ලෝකය මනුෂ්‍යත්වයෙන් පුරවාලනු ඇත‍.

තම සේවාවට සහ රැකබලා ගැනීමට බාර වී සිටින කතෝලික ජනතාව සුරක්ෂිත කිරීමේ වගකීම පූජකවරුන් සහ රදගුරු හිමිවරුන් සතුව පවතින බව ප්‍රැන්සිස් සුදොතුම් පියතුමා පෙන්වා දෙයි. ඔවුන් අතින් එම කාර්යභාරය නිසි ලෙස ඉටු වන පිණිස විශ්වාසිකයන් ඔවුන් වෙනුවෙන් නිරන්තරෙන් යාච්ඥා කළ යුතු බව එතුමා පවසයි.

"සභාව වෙතත්, ඇය තමන් තුළ සංරක්ෂණය කරන විශ්වාසයේ නිධිය වෙතත් අප තුළ පවතින ප්‍රේමය ප්‍රබෝධවත් කරන ලෙස ඉල්ලා සමිඳුන් යදිමු. එසේම අපගේ පුදැදුරු-රදගුරුවරුන් සිය ජීවිතයෙන් දිව්‍ය එඬේරාණන්ගේ ස්ථිර බවත් මෘදු බවත් ප්‍රකාශ කරනු පිණිස ඔවුනට යාච්ඥාවෙන් ආධාර කරමින්, බැටලු රැළ රැකබලා ගැනීමට සම වගකිවයුත්තන් කරන ලෙසද අප සමිඳුන්ට යාච්ඥා කළ යුතුය. රදගුරු හිමිවරුන් සිය ජනතාව රැකගැනීම පිණිසත් ඔවුන් වෙනුවෙන් පෙනී සිටීම පිණිසත් නිරන්තරයෙන්ම ඔවුනට සමීප විය යුතුය"

ප්‍රැන්සිස් සුදොතුම් පියතුමා මේ අනුශාසනය කළේ පසුගියදා වතිකානයේ සාන්ත පීතර චතුරශ්‍රයේ පවත්වන ලද පොදු හමුවේ සිය ධර්මෝපදේශ කතාව කරමිනි. ඉකුත් මාස තුන තුළ සිය ධර්මෝපදේශ දේශනයේදී ප්‍රැන්සිස් සුදොතුම් පියතුමා භාවනා කළේ අපොස්තුළුවරුන්ගේ ක්‍රියා පොත ගැනයි. මෙදින එතුමා එම පොතේ 20 වැනි පරිච්ඡේදය කෙරෙහි වන්දනාකරුවන්ගේ අවධානය යොමු කළේය.

"සෑම කිතුනුවකුම අපොස්තුළුවරුන්ගේ ක්‍රියා පොතේ 20 වන පරිච්ඡේදය කියවිය යුතුයි."

අපොස්තුළුවරුන්ගේ ක්‍රියා පොතේ 20 වැනි පරිච්ඡේදයේ කියැවෙන්නේ පාවුළු අපෝස්තුළු තුමා එපීසයේ සිය අපෝස්තලික මෙහෙවර අවසානයේ සමුගත් ආකාරය බව ප්‍රැන්සිස් සුදොතුම් පියතුමා සිහිපත් කළේය. පාවුළු තුමා එපීසයෙන් සමුගනිමින් තමා නික්ම යාමෙන් පසුව, ඇතැම් විට යළිත් කවරදාකවත් තමන් මුණනොගැසෙන, එම සංඝයට නායකත්වය දෙන්නට යන පිරිසට ලබා දෙන "ආධ්‍යාත්මික ගිවිසුමක්"මේ පරිච්ඡේදයට ඇතුළත්ව තිබෙන බව එතුමා පැහැදිලි කළේය.

"20 වන පරිච්ඡේදය, ක්‍රියා පොතේ එන සුන්දරම කොටසයි. මේ නිසා විසි වැනි පරිච්ඡේදය කියවන ලෙස සෑම කිතුනුවෙකුගෙන්ම මා ඉල්ලා සිටිනවා. සමුගන්නේ කෙසේද යන්න ඉගෙන ගන්නටත් මේ පරිච්ඡේදය උදව් වෙනවා ..."සිය ලිඛිත පිටපතෙන් ඉවත් වෙමින් සුදොතුම් පියතුමා කීවේය.

"මේ පරිඡේදය තුළ ශු. පාවුළු තුමා සිය සංඝයට අනුශාසනා කරනවා. එතුමා ඔවුනට කියන්නේ කුමක් ද? 'ඔබ ඔබවත් සමස්ත බැටළු රැළත් රැකබලා ගන්න.'එතුමාගේ උපදේශය එයයි. මේ බැටළු එඬේරාගේ කාර්යභාරයයි. බැටළු එඬේරාගේ කාර්යභාරය කුමක්ද? අවදිව සිටීම, තමා සහ තමාගේ රැළ ආරක්ෂා කිරීමයි."යි සුදොතුම් පියතුමා පැහැදිලි කළේය.

"පුදැදුරුවරුන් (පූජකවරුන්) අවදිව සිට ජනතාව ආරක්ෂා කළ යුතුයි; රදගුරු හිමිවරුන් සහ පාප් වහන්සේ අවදිව සිට ජනතාව ආරක්ෂා කළ යුතුයි. රැළ මුර කිරීම සඳහා මෙන්ම තමන් මුර කිරීම සඳහාද අවදිව සිටින්න. මේ අවදිව සිට මුර කිරීමේ වගකීම ඉටු කරන්නේ කෙසේදැ යි ඔබගේ හෘදසාක්ෂිය පරීක්ෂා කර විමසන්න"යැයි එතුමා සියල්ලන්ගෙන් ඉල්ලා සිටියේය.

ප්‍රැන්සිස් සුදොතුම් පියතුමා ක්‍රියා පොතේ 20:28 උපුටා දැක්වූයේ ය.

"ඔබ තමන්මද, ශුද්ධාත්මයාණන් වහන්සේ විසින් බාරකාරයකු ලෙස පත් කරනු ලැබ ඔබට භාර දී ඇති රැළද රැකබලා ගන්න. දෙවියන් වහන්සේ සිය පුත්‍රයාණන්ගේ යාගික රුධිරය හේතුවෙන් දිනා ගත් උන්වහන්සේගේ සභාවේ එඬේරුන් වන්න."

"ශුද්ධ වූ බයිබලය රැගෙන අපෝස්තුළුවරුන්ගේ ක්‍රියා පොතේ 20 වැනි පරිච්ඡේදය කියවන්න අමතක කරන්නට එපා! විශේෂයෙන්ම එහි 17 වැනි වගන්තියේ සිට ඉදිරියට කියවන්න. එම කොටස මැණිකක් වගේ"යැයිද එතුමා සඳහන් කළේය.

සමන් කපිල විජේසූරිය

නත්තල දුක, කඳුළ, සිනහව, ආශ්වාදය, සතුට අඩු වැඩි වශයෙන් ලබා දෙමින් වියැකී ගියේය. කෙනෙකුට නත්තල සතුට ගෙන දුන්නේය. තවත් අයකුට කිසියම් සතුටක් හදවත ජනිත වූවද, දැනී නොදැනී නත්තල නිමා විය. තවත් අයකුට වෙනදා මෙන්ම දුක කඳුළම ගෙනාවේය. දිළිඳු යැයි සාමාන්‍යයෙන් සමාජය හඳුන්වන සමහරුන්ට නත්තල් සතුට ගෙන දුන්නේය. එවැන්නෝ නත්තලේ අසිරිය විඳ ගත්හ. නත්තල සාමයේ කුමාරයාණන්ගේ උත්පත්ති මංගල්‍යය අනුස්මරණය කිරීමක් හෙයින් අඩු වැඩි වශයෙන් කිතුණුවෝ නත්තල් සතුට විඳ ගත්හ. එය මෙවරද එසේම සිදුවිය...!

එහෙත් මේ ලිපිය නත්තල ආවර්ජනයක් කිරීම සඳහා නොවේ. නත්තල් මිහිරියාව විඳ දරා ගත් සැවොම “ජේසුස්” යන ශ්‍රී නාමය උසස්කොට සැලකූවෝ වෙති.

පාස්කුවට පෙරාතුව චතාරිකය ආවාක් මෙන්, නත්තලට පෙරාතුව ආගමනය පැමිණියේය. ආගමන කාලය නත්තලට ප්‍රවිශ්ට වීම සඳහා සභා මාතාව අපට දායාද කළ කාලවකවානුවකි. පුරා ඉරුදින හතරකදී පූජාප්‍රසාදිවරු ජනතාවට නත්තලේ සැබෑව හඳුන්වා දුන්‍හ. අධ්‍යාත්මික සූදානම සඳහා දේශන මඟින් බොහෝ දෑ ජනතාවට කීහ. ආගමනයක් ගැන කිසිදු අවබෝධයක් හැඟීමක් නොමැති ක‍තෝලිකයෝ ද අප අතර වෙති. නත්තලයට, මහ සිකුරාදාට, පල්ලියේ මංගල්‍යයට පමණක් පල්ලි එන කතෝලිකයෝ ද අප අතර කොතෙකුත් වෙති.

2019 නත්තල නිමාව දැක ඇත. නව වසරකට කවුරුත් පා තබා සිටිති. නව වසරේ නව සිතුම් පැතුම් සියලු සිත්හි ඉපදී ඇත. නව වසරක දී පසුගිය වසර දෙස ආපසු හැරී බැලිය යුතුය. පසුගිය වසරේ අපට වැරදුණු තැන් නිවැරැදි කර ගැනීමට අලුත් තීන්දු තීරණ ගැනීමට පැමිණෙන වෙස්වළාගත් ආශීර්වාදයක් ලෙසින් නව වසර සැලකිය හැකිය.

අභිනව වසර ආරම්භයේදීම නිවැරැදි තීරණ ගැනීමෙන් එම වසරම සතුට පිරී එකක් කර ගත හැකිය. කතෝලික ජනතාව බලාපොරොත්තු සහගත පිරිසකි. ඒකායන බලාපොරොත්තුව තම සගය දිනාගැනීමයි. එවන් අපේක්ෂාවක් ඇතිව, ඒ සඳහා සූදානමින් දිවිගෙවීමෙන් අපේ බලාපොරොත්තු ඉෂ්ට කර ගැනීමට හැකිවනු ඇත. ජීවිතය මිහිරි - අමිහිරි අත්දැකීම් සම්භාරයක එකතුවකි. පොහොසත් - දුප්පත්, උගත් - නූගත්, කුලීන - කුලහීන කොයි කවුරුත් මේ දහමින් බැහැර නොවෙති.

ජේසුස් නම් දෙවිපියාණන්ගේ ඒකජාත පුත්‍රයාණෝ කුරුසියේ දිවි පුදා අපට ගැලවීම උදාකර දුන් සේක. එතේ දුබල මිනිස් වර්ගයා අදත් පාපයේ ශාපයට හසුවෙති. වරද හා නිවැරැදි දේ තෝරා බේරා ගැනීමේ අසීරුව හේතුවෙන් දෙවිපියාණන්ටත්, සහෝදරයාටත් විරුද්ධව පාපයේ නියැළෙන දුර්වල මිනිසා අතර යහපත කිරීමට වෙරදරන ජනතාව ද බොහෝය. එවැන්නෝ මඟදී ඇදවැටුණ ද, දෙවිපියාණෝ ඔවුනට අත දී යළි නැඟිටුවති. “උන්වහන්සේ සියල්ල දන්නා සේක: සියල්ල දකින සේක: සියල්ලට සියල්ල වන සේක”

පවට නිරතුරු පෙළඹෙන මිනිසා සැබෑ ලෙස පසුතැවී ආපසු හැරී එන විට දෙවිඳුණෝ සමාව දානය කර වැළඳ ගනිති. පාපය පිළිකුල් කර පව්කරුවා වැළඳගන්නා දෙවිඳුන්ව අදහන අපි බලාපොරොත්තු උල්ලංඝනය කර නොගත යුතුය. සමිඳාණන් අපට දී ඇති බලාපොරොත්තුව ඇහදිලිවන්තව රැකගැනීමෙන් “ප්‍රේමය” වන දෙවියන් වහන්සේගේ රාජ්‍යය දිනාගැනීමට අපට හැකි වනු ඇත. අප වෙරදැරිය යුත්තේ ඒ සඳහාය. සමහරු පාපයේ ශාපයේම යෙදී සිට, පාපය පිට පාපය ගොඩගසන්නෝ වෙති. මානව දයාවෙන්, ප්‍රේමයෙන් සගයට ඒමට අපට ඇරැයුම් කරන දෙවිඳාණෝ අපගේ මිනිස් දුබලතා දන්නා සේක. ඒවා උන්වහන්සේ සලකන සේක් නම් අපට සගයක් කොයින්ද?

“යක්ෂයා කිසිදා නොනිදයි” අප අසා ඇත. එය සැබෑය. එහෙත් දෙවියන් වහ්න්සේ ආරම්භයත්, අවසානයත් වන සේක. දුබල මිනිසා පාපයට ඇදගනිමින් සාතන් නොහොත් යක්ෂයා සිය වෑයම් කිසිදා අත්නොහරී. කෙසේ වුවද අවසානයේ ජයගත්තේ දෙවිපියාණන් බව සත්‍යයෙනුත් සත්‍යයක්මය. එය කිතුනු අපි වටහාගත යුත්තෙමු. ශු. කුරුසිය මත දෙවි පිදූ ජේසු සමිඳාණෝ එදා මෙදාතුර ජනතාවගේ පාපයට වන්දි ගෙවූ සේක. නැවත කුරුස පත්වීමක් නැත්තේය.

එතේ අවසාන විනිශ්චයක් ගැන අපි දනිමු. සැවොම ඊට මුහුණදිය යුතුමය. “අලුත් අහසක් - අලුත් පොළොවක්” අපට උදාකර දෙන බව සත්‍යයකි. ශු. ලියවිල්ල එයට සාක්ෂි දරයි. ශුද්ධවූ ලියවිල්ල එහෙන් මෙහෙන් කියවා ඵලක් නැත. එය හැකි පමණින් පරිශීලනය කර යහපත, අයහපත තෝරා, බේරාගත යුතුය. ශු. ලියවිල්ලේ “නව ගිවිසුම” තුළ වන “සුපුවත් සතර” අප සැමට ගැලවීම උදාකර දෙන්නට අවැසි පසුබිම හදා දෙයි. කිතුනුවා “සුපුවත් සතර” නොහොත් “ශුභාරංචි සතර” තුළ අඩංගු ගැලවීමේ කතාන්දරය අවබෝධ කර ගැනීමට වෙර දරමු! ඒ මඟින් දුබල මිනිස්කමින් අප සිදුකරන පාප අත්හැර දෙවි පියාණන්ගේ ප්‍රේමණීය සමාව ලබාගනිමු! එවිට අපට සතුටින් ඉදිරි ජීවිතය ගෙවිය හැකිය.

“දස පනත” පැරණි ගිවිසුමේ දෙවිඳුන් අපට දුන් ව්‍යවස්ථාවයි. ජේසු සමිඳාණෝ සිය දේශන මඟින් එය අලුත් කළ සේක. වෙනස් නොකළ සේක. එය වෙනස් කරන්නට කිසිවකුට බැරිය. ගලේ කෙටූ අකුරක් මෙන් සදා නොනැසී පවතින “දස පනත” අනුසාර කරන්නට ප්‍රේමය වන දෙවියන් වහන්සේ අපට මඟ දක්වන සේක. දස පනත පසෙකට දමා රිසි සේ පාපී ජීවිතය වැළඳගන්නා තැනැත්තෝ විනාශ මුඛයට පත් වෙති.

අපි ප්‍රඥාවන්තව, ඉවසිලිවන්තව, ඇදහිලිවන්තව, බැගෑපත්ව එකිනෙකා ප්‍රේම කරමින් දිවි ගෙවීමට වෙරදැරුවොත් එය සගය දිනන මාවතයි. කිතුනු අප අනුන්ට ආදර්ශයක් වෙමින් සෙස්සන්ට තම ජීවිතය තුළින් ක්‍රිස්තුස් වහන්සේ දකින්නට ඉඩ හසර සලසත් නම් අපි වාසනාවන්තයෝ වෙමු. කිතුනුවා ජේසු සමිඳුන් සිය දිවියේ “පරමාදර්ශය” කර ගතහොත් ජය නියතය.

දේව මාතාවන් අපට තිළිණ කර ඇති “ජපමාලය” නමැති යාච්ඤා දාමය සගයට නඟින්නට අපට දී ඇති සවිමත් ඉනිමඟකි; අත්වැලකි; ශක්තියකි. ජේසු සමිඳාණන්ගේ “මාතාවන්” ලොව පුරා තැන තැන දර්ශනය වී ලොවට දෙන පණිවුඩය කුමක්ද?

“පසුතැවී දෙවිඳුන් වෙත හැරි එන්න” යන්නයි. මරියෝත්තමාවගේ උදව්ව ආධාරය පතන අපට එතුමිය“පොරොන්දු” දී ඇත්තේ අපට සගය දිනන්ට අත හිත දෙන බවයි.

කුඩා දරුවන්ට, පැවිදි සොහොයුරියන්ට, ශුද්ධවත් ජීවිත ගතකරන යටහතුන්ට දර්ශනය වී විවිධාකාර ස්ථාන “සිද්ධස්ථාන” බවට පත්කරමින් දේව ජනතාවට සුවය, සහනය, මිහිර ලබා දෙන එතුමිය “ජපමාලය” උච්චාරණය කරන එය ප්‍රචලිත කරන සැදැහැවතුන්ට ඉමහත් වරප්‍රසාද දානය කරන බවට පොරොන්දු 15 ක් මඟින් පෙන්වා දී ඇත. එතුමිය ජේසු සමිඳාණන් මෙන්ම දෙන පොරොන්දු ඉටු කරන්නීය. දේව මාතාව අපට දෙන සහනය, මිහිර, සහය බහුලව ලබාගැනීමට පෙළගැසෙමු. විෂම සමාජ රැල්ලට හසු වී ගසාගෙන යන සමාජය එයින් බේරාගැනීමට අපට දෙන අතහිත අතිශයින් වැදගත්ය. දේව මෑණියන්ට ලොව පුරා කැපකර ඇති සිද්ධස්ථාන, ‍දේවස්ථාන අතිවිශාල සංඛ්‍යාවක් වෙයි. අප කුඩා දිවයින තුළද වැඩියෙන්ම ඇත්තේ මරියතුමියට කැපකර ඇති දෙව්විමන්ය. ඒවා තුළින් විහිදෙන “වරප්‍රසාදයේ කාන්තිය” සුළුපටු නොවේ. අසිරිමත්ව අපට පිහිටවන මරියෝත්තමාවන් මඟින් දුබල අපි සගය දිනන මඟ පහදා ගනිමු!

“සියල්ල දේව මහිමය සඳහාය” සියල්ල කළ හැකි දෙවි පියාණන්ට කළ නොහැකි කිසිවක් නැත.

“දෙවියන් වහන්සේ අපට අතහිත දෙන සේක”, “දෙවියන් වහන්සේ ප්‍රේමය වන සේක”, “දෙවියන් වහන්සේ තුළ යැපෙන අපට උන්වහන්සේ සගය දිනන මඟ කියාදෙන සේක”

මෙවැනි වදන් සමහරක් ශු. ලියවිල්ල තුළත්, සභා ලියවිලි තුළත් අපි දකිමු. සැම දෙයකම අවසානය සගය දිනා ගැනීමය. ඒ සඳහා අපි පෙළගැසෙමු.

ඩික්සන් කොංගනීගේ

රාගම විශේෂ

ලංසුපතිනියෝ ටෙලි නාට්‍යය ITN නාලිකාව ඔස්සේ සතියේ දිනවල සඳුදා සිට සිකුරාදා දක්වා රාත්‍රී 9.00ට විකාශය වේ. මෙහි අධ්‍යක්ෂණය තුසිත අනුරුද්ධ ගෙනි. ‘ලංසුපතිනියෝ’ නිෂ්පාදක ප්‍රකට රංගන ශිල්පී සාරංග දිසාසේකර හා කළ සුහද කතාබහකි මේ.

රංගන ශිල්පියෙකු ලෙස කටයුතු කළ ඔබ නිෂ්පාදනයට අත ගසනවා?

වසර 10කට වැඩි කාලයක් රංගන ක්ෂේත්‍රයේ තිබුණු අත්දැකීම් එක්ක හොඳ නිෂ්පාදනයකට දායක වෙන්න ලොකු ආශාවක් තිබුණා. ඒ නිසා හිතේ කාලයක් තිස්සේ තැන්පත් වෙලා තිබුණු අදහසක් තමා මේ මල්ඵල ගැන්විලා තියෙන්නේ. හැමදාම මම කල්පනා කරපු දෙයක් මේ. ඒ ක්ෂේත්‍රයේම සිටින කෙනෙක් ක්ෂේත්‍රය ඇතුළේ තිබෙන අඩු ලුහුඬුකම් හරියටම හඳුනගෙන මනා දැනුමකින් යුතුව යම්කිසි නිර්මාණයක් කරනවා නම් එය වඩා සාර්ථක වෙයි කියලා හිතලා තිබුණා. ඒ අනුව මම හිතනවා ඉදිරියේදීත් පිටින් ඉන්න කෙනෙකුට වඩා ක්ෂේත්‍රය ඇතුළෙම ඉන්න අයගෙන් හොඳ නිර්මාණ බිහිවෙයි කියලා. ඒ අනුව කාලයක් තිස්සේ මම හිතට වදින පිටපතක් ලැබෙන තුරු බලන් හිටියා.

නිෂ්පාදන කාර්යයට ඔබ පරිණතයි කියලා හිතනවද?

නැහැ. කොහෙත්ම නැහැ. නිෂ්පාදනය කියන්නෙ ලොකු කාර්යභාරයක්. ඇත්තටම ඒක ලොකු පීඩනයක්. මම හිතනවා ඒක දරාගන්න තරම් මම පරිණත මදි කියලා.

ඔබ නිෂ්පාදනය කියන කාර්ය භාරය හඳුනා ගෙන තිබෙන්නෙ කොහොමද?

නිෂ්පාදන කාර්ය කියන්නෙත් ලංකාව දෙස බලනවිට සිතන තරම් පහසු කාර්යයක් නොවේ. ප්‍රධානම ගැටලුව තමා නිෂ්පාදනයට යොදවන මුදල් ප්‍රමාණය ප්‍රමාණවත් නොවීම. ඒ නිසා හොඳ නිර්මාණයක් කිරීමේදී එහි ගුණාත්මක බව ඉහළින්ම රඳවා ගැනීමට අපහසු වනවා. අද වනවිට පෙරට වඩා ප්‍රේක්ෂකයෝ ලෝකයේ බිහිවන නිර්මාණ නිතර නරඹනවා. එය U tube, DVD වෙන්න පුළුවන්. ප්‍රේක්ෂකයන්ට ලෝකයේ බිහිවන නිර්මාණ බැලීමේ පහසුකම් තිබෙනවා. එවිට ප්‍රේක්ෂකයෝ අප රටේ බිහිවන නිර්මාණ ලෝකයේ වෙනත් රටවල නිර්මාණ සමඟ සසඳනවා. එවිට ලංකාව තුළ හොඳ නිර්මාණ බිහි නොවුනම ඔවුන්ට ලොකු අසාධාරණයක් සිදුවෙනවා කියා මම සිතනවා. ‍

මේ නිසා මම යෝජනාවක් විදිහට ඉදිරිපත් කරනවා රාජ්‍ය මට්ටමෙන් නිෂ්පාදක වරුන්ට නිෂ්පාදනය සඳහා ප්‍රතිපාදනයක් හොඳ නිර්මාණයක් වෙනුවෙන් කරන්න පුළුවන් නම් ඉදිරියේ දී හොඳ නිර්මාණ බිහිවෙයි කියලා. දේශපාලනයට සම්බන්ධ වෙලා ඉන්න කලාකරුවන්ට පවා මං යෝජනාවක් කරනවා තමන්ගේ ක්ෂේත්‍රය වෙනුවෙන් එහෙම යෝජනාවක් කරන ලෙස. එය රාජ්‍ය නාලිකාවලින් ප්‍රදර්ශනය කෙරෙන නිර්මාණවලට පමණක් හෝ වෙනවා නම් ගැටලුවක් නැහැ.

ඔබ රංගන ශිල්පියෙක්. විවිධ චරිතවල ඔබ යෙදිලා ති‍යෙනවා. මේ රංගනය කියන කාර්යය ඔබ හඳුනාගෙන තිබෙන්නේ කොහොමද?

තමන් කියන චරිතයෙන් වියුක්ත වෙලා වෙනත් කෙනෙකුගේ මානසික මට්ටමකට ඇතුල්වෙන්න කෙනෙකුව පොළඹවන මෙවලමක්. මම ඒක බොහොම ආසාවෙන් කරන දෙයක්. මම ක්ෂේත්‍ර කීපයක නියැළිලා හිටියත් රංගනය තමා නොනවත්වා ඉදිරියටම කරගෙන යන්න කැමැත්තෙන් ආශාවෙන් ඉන්නේ. කුඩා කාලයේ ඉඳන් ගුවන්විදුලි හඬකැවීමේ ශිල්පියෙක් විදිහටත් මම ආශාවෙන් වැඩ කළා. ඒත් අද ඒ සියල්ල අභිබවා මම රංගනයට මගේ ජීවිතේ වැඩි ඉඩක් වෙන් කරලා තියනවා.

‘ලංසුපතිනියෝ’ අධ්‍යක්ෂ තුසිත අනුරාධ නවක අධ්‍යක්ෂකවරයෙක්. අපි ඔහුව මුලින් හඳුනාගත්තේ කැමරා ශිල්පියෙක් ලෙසට. ඔබේ පළමු නිෂ්පාදනයට අධ්‍යක්ෂවරයා ලෙස තෝරා ගන්නවා?

තුසිත අනුරාධ කියන්නේ ජයප්‍රකාශ් ශිවගුරුනාදන් මහත්මයාගේ කැමරා ශිල්පියෙක් විදිහට මම ඔහුව හඳුනා ගත්තේ. මට මුලින්ම වුවමනා වෙලා තිබුණේ ශිවගුරුනාදන්ව මේ නිර්මාණයට දායක කරගන්න. නමුත් ඔහුට තිබුණු කාර්ය බහුලත්වයත් එක්ක මට ඒක කරගන්න බැරි වෙනවා. ඒ නිසා මම ඊළඟට ගන්න විකල්පය තමා ශිවගුරුනාදන් මහත්මයාගේ රිද්මය තිබෙන තුසිතව තෝරා ගන්න එක. ඇත්තටම අධ්‍යක්ෂණයට ශිවගුරුනාදන් සම්බන්ධ නොවුණට ඔහුගෙන් ලැබෙන ගුරුහරුකම් ගොඩක් වටිනවා. ඒ ආභාෂය තුසිතගේ වැඩ ඇතුළෙත් තිබෙනවා. එතනදී ඔහු කැමරා ශිල්පියෙක් වුණ නිසා මට ලොකු පහසුවක් වුණා. ඔහුගේ මම දුටු සුවිශේෂී දෙයක් තමා චරිත අධ්‍යක්ෂණයටත් ඔහු තුළ විශේෂ දක්ෂතාවයක් තිබෙන බව. මේ නිසා මා ඔහු ගැන තෘප්තිමත්.

ඔබේ ‘ලංසුපතිනියෝ’ට රංගන ශිල්පීන් තෝරා ගත්තේ කුමන පදනමකින්ද?

මෙහිදී මම හිතුවේ ප්‍රේක්ෂකයො නිතර දකින චරිතවලට වඩා වෙනස් චරිතයක් කිරීමට අවස්ථාවක් දෙන්න ඕන කියලා. මම තෝරා ගත්ත නළු නිළියන්ට, එහිදී මගේ පරපුරේ නළු නිළියන්ට වැඩි අවස්ථාවක් දුන්නා. ඔවුන් දැඩි කැපකිරීමක් කරලා විශාල සහයෝගයක් ලබා දෙනවා. ප්‍රේක්ෂකයෝ නිතර දකිනවාට වඩා වෙනස් චරිත ටිකක් ඉදිරියේ දැක බලා ගන්න හැකි වේවි. මගේ පරපුරෙන් එහාට ගිය ප්‍රවීණ රංගන ශිල්පිනියක් වන මල්කාන්ති ජයසිංහ මහත්මිය මෙම නාට්‍යයේදී වෙනස්ම චරිතයක් කරනවා. ඒ වගේම මගේ පරපුරේ සමකාලීනයන් වන දිනක්ෂි, ආශා, තිසුරි, සම්පත් යන ශිල්පීන්ගෙනුත් වෙනස්ම චරිත ටිකක් දකින්නට හැකිවේවි. මෙහි මගේ රංගනය පවා වෙනස් චරිතයක්.

ලංසුපතිනියෝ තුළින් ඔබ සමාජගත කරන්න හදන්නේ කුමක්ද?

කාන්තාව කියන චරිතයට සාධාරණයක් කරන්න තමා උත්සාහ කරන්නේ. සමාජයේ නොයෙක් කම්කටොලු බාධක අසාධාරණවලට ලක්වන්නේ කාන්තාවන්. ඇය යම් ස්ථානයකට යම් කාර්යයක් කරගන්න ගියහම පීඩාවට ලක්වනවා.

පවුල් ජීවිත ඇතුළේ පීඩාවට ලක්වෙනවා. ඒ කාන්තාව ගැන තමා මෙයින් කතා වන්නේ. එමගින් ඔවුන්ටම ඔවුන්ව හඳුනාගැනීම පහසු‍වනවා. මේ දිනවල විකාශනය වන සමහර නාට්‍යවල පොළොවේ පයගහලා නැති චරිත පවා හමුවන කාලයක, මේ නාට්‍යයේ සියලු චරිත පොළොවේ පය ගහලා ඉන්න චරිත. ඉබේ පහළවුණ ඕපපාතික චරිත නෙමේ. මෙහි චරිතවලින් නිතර තමන්ගේ ජීවිතයට බද්ධවුණු භාර්යාවන්ට, සමාජය තුළ වරදින්න පුළුවන් තැන් මෙන්ම නොයෙක් සමාජයේ හමුවුණ අකටයුතුකම් පවුල් ජීවිතවලට වන හානිය ගැන දැනුවත්භාවයක් ලබාදෙන්න උත්සාහ කරනවා.

*මෙහි සංගීතය පවා වෙනස් හැඩයක් ගෙන තිබෙනවා ?

විකාශය වුණු මුල් කොටස්වල සංගීතය ගැන ගොඩක් අය කතා කරනවා. එහි වෙනසක් කරලා තිබෙනවා නේද කියලා? මට මෙම නාට්‍යයේ නිෂ්පාදනයෙන් රංගනයෙන් වගේම ගායනයෙන්ද දායක වෙන්න ලැබුණා. මෙහි තේමා ගීතය ගායනා කරන්නෙත් මා විසින්මයි. බොහෝ අය කිව්වා තේමා ගීතය ඇසෙන විටම නැවතී බලන්න හිතෙන බවක් ති‍යනවා කියලා. මෙහි සංගීත අධ්‍යක්ෂකවරයාත් තරුණ දක්ෂ සංගීතඥයෙක්. ඔහු නමින් අමිත් ගුරු. මෙම නිර්මාණය සාර්ථක කර ගැනීමට ඔහුගෙන් ලැබුණු දායකත්වයත් අති විශාලයි. තේමා ගීතයේ සංගීත අධ්‍යක්ෂණය චරිත් අබේසිංහ. තිවංක උඩගෙද‍රගේ සංස්කරණයෙන් බොහෝ කැපකිරීමක් වුණා.

*ලංසුපතිනියෝ විකුණා ගැනීමේදී ඇතිවුණ ගැටලු?

නිර්මාණයක් කොතරම් හොඳින් නිම කරගත්තත් අවසානයේ නාලිකාවක විකාශනයට දීමේදී බොහෝ ගැටලුවලට මුහුණදීමට සිදුවනවා. ඒත් මා වසර ගණනාවක සිට විවිධ ක්ෂේත්‍රවල කලා ලෝකයේ නිරතවීම නිසා එකිනෙකා දැන හඳුනා ගැනීම මත ඉක්මනින් විකුණා ගැනීමට හැකිවුණා. ඒ සඳහා වාසනාවන්ත වුණා.

*ඔබ මෙගා නාට්‍යවල පවා රංගනයෙන් දායක වුණ ශිල්පියෙක්. ඔබ මේ නාට්‍ය ගැන දරන මතය.

මෙගා කියන නම නාට්‍යවලට ආවේ කොතනින්ද කියලා මම හරියටම දන්නෙ නැහැ. ඒ නාට්‍ය ආරම්භ වුණ සංක්‍රාන්ති සමයේ තමා මමත් ක්ෂේත්‍රයට ආවේ. එතනදී අපි බලන්න ඕන නාට්‍යයේ කොටස් ගණන නෙමේ. නාට්‍යයේ පිටපත කෙතරම් ප්‍රබලද කියන කාරණාව. මේ මෙගා හෙවත් දීර්ඝ නාට්‍යය කලාව ලෝකෙට අලුත් එකක් නමේ. අපේ අම්මලා පොඩි කාලෙත් තිබිලා තියනවා. ලෝක‍ය දෙස බැලුවොත් එංගලන්තයේ රූපවාහිනී නාලිකාවල විකාශනය වන මර්ටිනාස්, කෝකේෂන් ෂීට් වගේ නාට්‍ය වසර 20, 30 විකාශනය වනවා. එහිදී අපි එහි ගුණාත්මක බවයි වටහා ගත යුත්තේ.

(විශේෂ ස්තුතිය- ස්වාධීන රූපවාහිනී ආයතනයේ ඉන්ද්‍රසිරි සුරවීර සහ පියල් වීරසිංහට)

සංවාදය

සුරංජා සරෝජිනී පතිරණ

විෂම භාග සිනමා කෘතිය තිරය මත දිගහැරෙන්නේ රටහුණු කුරකින් එහි නම අපූරුවට ලියැවෙමිනි.

යායට හැඩවුනු කුඹුරු යායක කිසියම් දෝමනස්සයක් මනසට ඒත්තු ගන්වයි. සිනමා අධ්‍යක්ෂකවරයා මේ වියමන් කරන්නේ ශ්‍රී ලාංකේය දේහය තුළ ඔජ වඩන මානව චිත්ත සංතානයේ හෘද ස්පන්දනය නොවන්නේ ද ?

ලෙයින් මසින් මසැසින් වැඩුණු නිවුන් පිරිමි දරුවන් දෙදෙනෙකු වටා විෂම භාග ගෙතේ. මෙම සිනමා කෘතිය ශ්‍රී ලාංකේය සිනමා කෙතේ සරුඵල නෙලනු වස් අස්වැද්දූ වප්මගුල් උළෙලක අසිරිය විඳීමකි.

අධ්‍යක්ෂකවරයා මෙම සිනමා කෘතිය තුළ දෘශ්‍යමාන වන අදිසි හස්තයයි. හෙතෙම ඒ ලෙසින් ප්‍රේක්ෂක ජන මනසට විටින් විට ඉඟි කරයි.

ශ්‍රී ලාංකේය සමාජ සන්දර්භය තුළ මානුෂවාදී සමාජ විඥානයකින් ඌන සංවර්ධිත රටක වාසනාව සහ අවාසනාව අතර දෝලනය වන මනුෂ්‍ය වර්ගයාට හිමි ජීවිත ඉංගිතීන් මනා සංයමයකින් එන්නත් කරයි. විෂම භාග සිනමා කෘතිය කලාත්මක පරිසමාප්ත කින් යුක්ත හෘද සංවේදී ආඛ්‍යානයකි.

ලලිත් රත්නායක සිය සිනමා කෘතිය තිර රචනයකට ගොඩනැගීමේදී රූපමය භාෂාව ව්‍යක්තව පිරිද්දීම සිනමා කෘතිය තුළ ආරම්භයේ සිට අවසානය දක්වා විශිෂ්ඨ නිමැවුමකින් සිදුකරයි.

ලෝකයේ නන්විධ ජන සමාජයන්ට පොදු අත්දැකීමක් බවට ඒත්තු යන අධ්‍යාපන රටාව හා එහි නිමග්න දරු පරපුර දැනුම කේන්ද්‍රීය අධ්‍යාපනය තුළ වින්දිතයකු වීම කිසිදා විවෘතව සාකච්ඡා නොකළ යථාර්ථයක් තේමා කර ගැනීමකි. එය කිසියම් ආකාරයක මානව වර්ගයාගේ ජීවන පැවැත්මේ හැරවුමට ඉඟි පහල කරයි.

විෂම භාග සිනමා කෘතිය ආසියානු ජන මූල සංස්කෘතියට වඩාත් ළඟින් යන සන්දර්භයකින් හා සංස්කෘතික වටපිටාවකින් නිර්මාණයකි. එසේ වුවත් විශ්ව සාධාරණ තේමාවක් ගොනු කර ගැනීම නිසා සමස්ත මානව සංහතියේම හෘද ස්පන්දනයට නතුවන සමාන බවක් මොනවට මතු කරයි.

විටක ඉන්දියානු සිනමා ප්‍රාඥයකු වන සත්‍යජිත් රායි නිර්මාණය කළ ඔපු ත්‍රිත්වය මනස තුළ ඇඳී යන අයුරින්ම විෂම භාග සිනමා කෘතිය ව්‍යක්ත වූ රූප සමෝධානයකින්, රූප සත්කාරයකින්, රූප සංස්කරණයකින්, අවශ්‍ය ළය රඳවා තබා ගනී.

සංගීතය, සමඟ අධ්‍යක්ෂවරයාගේ රංග රීතිය මනාව කුළුගන්වන නිර්මාණයක් බව පැවසීම යුක්ති යුක්ත වෙයි.

කතා ප්‍රවෘත්තිය අග නගරයෙන් බැහැර ගම්මානයක කුටුම්භයක් හරහා ගොඩනැගේ. ප්‍රස්තුත සිද්ධි මාලාවකට සූක්ෂමව වියමන් කරන තිර රචනය ප්‍රේක්ෂක මනස් චිත්‍රයට ළංවන අපූර්වත්වය එක් කරයි.

නිවුන් පිරිමි දරුවන් දෙදෙනා හරහා විෂම වූ මනෝමූලික චෛතසිකයන් විදාරණය කෙරේ. එය එක්තරා ආකාරයක රචකයෙකු මනසින් දුටු කිසිදා නොවූ විරූ සංකල්ප රූපයක් ජනනය කිරීමක් නොවන්නේදැයි අපට හැඟෙයි.

සියල්ල සමාන වූ කළ ලෝකය විවිධත්වයක් හෝ සෞන්දර්යාත්මක නොවන බව අපි අසා ඇත්තෙමු. විවිධත්වය තුළ පවත්නා විචිත්‍රත්වය නොවන්නේද ලොවෙහි පැවැත්ම ?

ඒ ලොවෙහි පැවැත්මට දියුණු යැයි සම්මත ලෝකය ඉඩ නොදෙන්නේ නම් ඒ සමාජය සාධාරණ වන්නේ දැයි සිනමාකරු අපෙන් අසයි. ඉන්දියානු සිනමාවට අමිර් ඛාන් නම් සුප්‍රකට සිනමා නළුවා නිෂ්පාදනය කළ තාරේ සමීන් පර් සිනමා කෘතිය ඉන්දියානු ජාතික සම්මානයෙන් පිදුම් ලැබූ විශිෂ්ට සිනමා කෘතියකි.

එහිදී දරුවකුගේ මනස පිළිබඳව ගුරුවරයකු හරහා කියවා ගැනීම අපි ප්‍රේක්ෂකාගාරයේ සිට අත්වින්දෙමු.

විෂම භාග සිනමා කෘතිය එවන් වූ ගුරු පරපුරක ගේ සහ වැඩිහිටි ලෝකයටත් මුළුමහත් සමාජයටත් දරුවකු හරහා අපූරු පාඩමක් ලෙසින් ඒත්තු ගන්වයි.

අපට මගහැර නොහැකි සිනමා අත්දැකීමක්ව ඇත්තේ ජීවිතය පිළිබඳව ආදරය පිළිබදව ගැඹුරු හදවතක් ඇති බව පෙන්වාදෙන්නට සමත් කෘතියක් බැවින් යැයි මම යෝජනා කරමි.

විටක දෑසට කඳුළක් මතුවේ. හදවතට ගැඹුරු හුස්මක් මතුකරයි. විටෙක පපුව කඩා වැටෙන තරමට සියුම් ස්පර්ශ එක්වුණු රූප පඨිතයක් අඳුරු සිනමා ශාලාව තුළ අපව නැවත නැවත ජීවත් කරවයි.

සිදුවීම් ගලා යාමේදී සිනමා කෘතියට අත්‍යන්තයෙන්ම සමීප රංගන ශිල්පීන් තෝරාගැනීම අතිශයින්ම සාර්ථක බව අතිශයෝක්තියක් නොවේ.

හේමසිරි ලියනගේ සිනමා කෘතිය තුළ සිය රංගන ධාරිතාව දශමයක හෝ අඩුවැඩි නොකරමින් රංගනයේ යෙදේ.

ඊට නොදෙවෙනිව ඔහුගේ දියණිය ලෙස රංගනයේ යෙදෙන විශිෂ්ට රංගවේදිනියක වන කෞෂල්‍යා ප්‍රනාන්දු තබන සනිටුහන කිසිදා අමතක නොවන්නකි. ප්‍රියන්ත සිරිකුමාර සිය චරිතය රංගනයේ යෙදෙනවාට වඩා එහි ජීවත්වන බව නොකියාම බැරිය. ගුරුවරිය ලෙස නිලක්ෂි රත්නායක මැනවින් රංගනයෙහි යෙදේ. අනෙක් චරිතය නම් ජැක්සන් ඇන්තනී නම් ප්‍රතිභාන්විත රංගන ශිල්පියායි. මෙහි ප්‍රතිවීර චරිතයක් වන එනම් දුෂ්ටයාගේ චරිතය නිරූපණය කිරීම අධ්‍යක්ෂකවරයා ඔහු දමනය කර ඇති ආකාරය අති විශිෂ්ටය. සිනමා කෘතිය පුරා ආකර්ෂණය වැඩියම දිනාගන්නා පංසිළු වික්‍රමරත්න සහ පංකජ වික්‍රමරත්න පුතුන් දෙදෙනා අධ්‍යක්ෂකවරයාගේ ඇහිපිල්ලම් යට රැඳී සිටීම කිසිවකුටත් මගහැරේ යැයි නොසිතේ. විෂම භාග සිනමා කෘතිය මේ මොහොතේ ජන සමාජය තුළ පවත්නා රික්තකයක අවශ්‍යතාවක් හඬනගා කියන ආත්ම භාෂණයකි. අධ්‍යක්ෂකවරයා පවා කිසියම් දවසක තම ජීවන අත්දැකීම් පැසතුළ සඟවා සිටි භාවයක විශෝදන ය කිරීමක් දැයි විටෙක හැඟෙයි.

සිනමා කෘතියෙහි ගණන් හැදීමට දක්ෂ කොලුගැටයා මෙන්ම ගණන් හදන්නට අදක්ෂ ගීත ගායනයෙන් සියල්ලන්ම වශීකරණ කරන ඒ අපූරු කොලූගැටයා මොන තරම් හදවත සංවේදී මනුෂ්‍ය ප්‍රාණියෙක් ද? පරිසරය කුරුලු නදට පවා අතිසංවේදී ඔහුගේ ළමා මනස සිය පියා වෙනුවෙන් මව වෙනුවෙන් හා අවසානයේ තමා ආදරය කරන තමන්ට අහිමිවන සීයා වෙනුවෙන් ළතෙත් වෙන අයුරු සංවේදිය. සිය සීයා ජීවිතය අතහැර ගොස් ඇති බව දැනගන්නා කොලූගැටයා සීයාගේ බුලත් හෙප්පුවේ බාගෙට කැපූ පුවක් ගෙඩිය ගෙන සුදු රෙදි කඩක ඔතා බුදු පහන අසල රඳවා තබා තැබිම සමස්තයම සංකේතාත්මකව හකුලා තැබීමකි.

විෂම භාග අපට පෙන්වන ජීවන දහම පාරිසරික වාදී මානව වාදී තිරසර ප්‍රඥප්තීන් ද කැටිව යටි පෙළක් ලෙස මතුව එයි.

ළමා චිත්‍රපටයක් ලෙස ළමුන්ට අතිශයින්ම ගෝචර විෂම භාග සිනමා කෘතිය අත්‍යන්තයෙන්ම වැඩිහිටි සමාජයට අනිවාර්යෙන්ම නැරඹීමට නිර්දේශ කළ යුතු සිනමා කෘතියක් යයි මට හැඟෙයි.

එතෙක් මෙතෙක් ශ්‍රී ලාංකේය සිනමාවේ පරිසමාප්තියට නැගුණු මෙවැනි සිනමා කෘතියක් අපට හමුවන්නේ ඉතාමත් කලාතුරකිනි. තවත් සියවසකටත් පසුවත් විෂම භාග සිනමා කෘතිය පිළිබඳව එතෙර මෙතර සිනමා ප්‍රේක්ෂක ජනහදවත් හදවතින් වැළඳ ගන්නා බව නොඅනුමානය.

ෂර්ලි සමරසිංහ

අතුල සිරිවර්ධන යනු එකල චිත්‍රකතාවත් සමඟ ඉහළින් කියැවුණු නාමයකි. තමා සතු ශිල්පීය හැකියාවෙන් ඔහු වර්තමානයේ ජාත්‍යන්තරයත් සමඟ වඩාත් ගණුදෙනු කරන්නෙකි.

ඔබ වෘත්තීය චිත්‍ර ශිල්පියෙක්ද ?

මෙහෙමයි. චිත්‍ර අඳින එක කළත් ලංකාවේ නම් කොහෙටවත් මම වැඩ කරන්නේ නෑ . 2006 වසරේ පමණ සිට පිටරටවලත් එක්ක තමයි දැං මම වැඩකරන්නේ.

මෙරට ශිල්පියෙක් ලෙස රැඳෙන්න බැරි නිසාද ඔබ පිටරටත් එක්ක චිත්‍ර අඳින්නේ?

රැඳෙන්න බැරි නිසා නෙමෙයි. ලංකාවට වඩා හොඳ මිලක් එහෙන් අපිට ලැබෙනවා. නමුත් ඒ රටේ ශිල්පියෙකුට ගෙවන ගානට වඩා අඩු මිලක් එය. නමුත් අපේ රටේ ගෙවන මිලට වඩා වැඩියි. අපේ අයට ජාත්‍යන්තරයේ ඕන තරම් එවැනි අවස්ථා තිබෙනවා . කැමති අයකුට අතරමැදියෙක් නොවුණත් මට ඒ සඳහා අවශ්‍ය තොරතුරු ලබාදිය හැකියි. එයට පුද්ගලිකවම නම් උදව් කරන්න කැමති නෑ මං. මොකද එහෙම කරන්න පුළුවන් දෙයක් නෙමෙයි මේ වැඩේ. මගේ ෆේස් බුක් පිටුවේ සිත්තර මුළුව https://tinyurl.comපිටුවට ගිය විට ඔය සඳහා අවශ්‍ය විස්තර ලබා ගත හැකියි. එහෙම නැතත් අන්තර්ජාලය පිරික්සූ විට එවැනි අවස්ථා ගැන සොයා දැනගත හැකියි.

ශ්‍රී ලංකාව වැනි රටක ඔබ කියන විදිහට, චිත්‍රශිල්පියකුට හොඳ ආර්ථික මට්ටමක් හදාගන්න බැරිද ?

ලංකාවේ චිත්‍ර අගය කිරීම අඩුයි. මව්පියෝ වුණත් චිත්‍රවලින් සල්ලි උපයන්න බෑ කියන ආකල්පය මත ඉන්න නිසා තමන්ගේ දරුවන් ඊට යොමුවෙනවාට කැමති නැහැ. මා කුඩාකල වුණත් මගේ තාත්තා කැමති වුණේ නැහැ චිත්‍ර අඳිනවාට. අම්මා විතරයි කැමති වුණේ. පස්සේ චිත්‍ර කතා ඇඳලා ප්‍රසිද්ධ වුණාම නම් තාත්තා සතුටු වුණා. ඉස්සර වෙළෙඳ ප්‍රචාරණ ක්ෂේත්‍රෙය් නම් යම් ඉහළ ගෙවීමක් තිබුණා . නමුත් මං නම් හිතන්නේ ඒ ගැන හිතන්න අවශ්‍ය නැහැ. පිටරටවල ඕනෑ තරම් අවස්ථා තිබෙන නිසා. අනික බොහෝ විට මෙහේ වැඩ කරලා සල්ලි ලබාගන්න තිබෙන අපහසුව. නමුත් පිටරටවල එ‍හෙම වෙනවා හරිම අඩුයි. එහෙම නොවෙන්නට එහේ වැඩකරන විට ක්‍රම හදලා තිබෙනවා.

කලාව කියන විෂය තුළ ලංකාවේ චිත්‍රශිල්පියා ගායක ගායිකාවන්,නළු නිළියන් වැනි කාලාකරුවන්ට සාපේක්ෂව කැපී පෙනෙනවා අඩුයි.ඇයි එහෙම වෙන්නේ?

ඕනම ක්ෂේත්‍රයක යම් කෙනෙක් පෙරමුණට එන්නේ රසවිඳීමේ ප්‍රමාණය මතයි. අපේ රටේ චිත්‍රකතාව එහෙම රසවිඳින්නේ නැහැ. අපි කුඩා කාලයේ තත්වය හැබැයි ඊට වෙනස්. චිත්‍ර කතා බලන අය ඉහළ අගයක තිබුණා එකල. චිත්‍රකතා පත්තර, සඟරා වැනි දේට වඩා පොත් වශයෙන් නිකුත් වුණා නම් තත්වය මීට වඩා වෙනස් වෙන්න තිබුණා. පිටරට චිත්‍රකතා වල අදාල චරිතය අවුරුදු ගණනාවක් එහාට විකාශනය වුණත්, එක කතාවක් එක පොතකින් ඉවර කරනවා. ඉස්සර අපි චිත්‍රකතා පත්තරයක් අරන් කතාවක් බලන්න සතියක් ආසාවෙන් බලන් හිටියට දැන් එහෙම බැහැ. ජීවන රටාවත් එක්ක රසවිඳීමත් වේගවත් වෙලා. රසවිඳීමත් එක්තරා විදිහට සංස්කෘතියක් .ඒ විඳීම වෙනස්වීම අනුව යම් කෙනෙක් ඉහළට පහලට යනවා.

අපේ රටේ බොහෝ චිත්‍ර ප්‍රදර්ශන තුළ ඇබ්ස්ට්‍රැක්ට් ආර්ට් වගේම, ස්වභාවික චිත්‍ර ඒ ආකාරයෙන් අඳින ප්‍රකාශන චිත්‍රත් අපිට දකින්නට පුළුවන්. මේ අතරින් සැබෑ දක්ෂයා කොහොමද සොයාගන්නේ?

ඒක තීරණය වන්නේ රසවිඳින්නා මතයි. සමහර විට එයා සැබෑ ලෙසම දක්ෂයෙක් නොවුණත් බලන කෙනාට හොඳ රසයක් දෙන්න පුළුවන් කෙනා දක්ෂයා ලෙස ඔවුන් තීරණය කරනවා. උදාහරණයක් ලෙස කියනවා නම් කුඩා දරුවෙක් ගායනා තරඟයක හොඳට ගීත ගයනවා නම් එයා දක්ෂයි කියනවා. නමුත් ලොකු වුණු විට එයා ගායකයො අතරට එන්නේ නැහැ.ඒ දක්ෂ කම තාවකාලිකයි. සැබෑ දක්ෂයෙක් වෙන්නනම් ශ්‍රාස්ත්‍රීය දැණුම, අත්දැකීම් වගේ දේවල් අතින් පිරිපුන් විය යුතුයි.

ඔබ මේ ක්ෂේත්‍රයට ආවේ හැදෑරීමක් කරලාද?

නැහැ. මම මුලින්ම කලේ ජනක රත්තනායක වගේ චිත්‍ර ඇඳපු එක. පාසල් කාලේ සමරු පොත් හරියට ඇන්දා. ඒ පුරුද්දට මට චිත්‍රකතා අඳින්න ආස හිතුනා. නමුත් මුල්ම කාලේ ඇඳපුවා පත්තරවලින් ප්‍රතික්ෂේප වුණා. මල්ටිෆැක්ස් එකෙන් කිව්වා එක දවසේ චිත්‍රකතාවක් අඳින්න කියලා. ඒක දුන්නම මට අවස්ථාවක් ලැබුණා නිව්ටන් ගුණසේකර ලියපු ‘පැණි කුරුල්ලෝ‘ කියන චිත්‍ර කතාව අඳින්න. එහි පළමුව ඇඳපු එක ප්‍රතික්ෂේප වුණා. දෙවැනියට ඇඳපු එක තමයි තෝරාගත්තේ. ඒ කාලේ චිත්‍ර ගැන කිසිම දෙයක් මම දන්නේ නැහැ. මම හේවුඩ් එකට යන්න පටන් ගත්තා. ඒ කාලේ යාලුවො මාර්ගයෙන්. එහි හිටපු චන්ද්‍රගුප්ත තේනුවර, විනී හෙට්ටිගොඩ, විමල් ලොකුලියන වගේ අය මගේ චිත්‍රවල අඩුපාඩු කියා දෙනවා. දිනක් චන්ද්‍රගුප්ත තේනුවර මහතා මගේ චිත්‍ර බලලා, කායික ව්‍යුහය අඳින ඉරි පිළිබඳව ගැඹුරු හේතු තිබෙන බවත්, ඒවා හැදෑරිය යුතු බවත් පැහැදිලි කළා. එතැන් සිට මා ඒ ගැන හොයන්න පටන් ගත්තා. ඉන් පසු මම චිත්‍ර කතා පත්තර කිහිපයකම වැඩකළා . පස්සේ වෙළෙඳ දැන්වීම් ප්‍රචාරන ආයතනයක වැඩකරන විට එහි හිමිකරු රෙජී කන්දප්පා මහතා මාව ලයිෆ් ඩ්‍රොවින්වලට ස්ටැන්ලි අබේසිංහ මහතා ළඟට යොමු කළා. එයින් මා බොහෝ දේ ඉගෙන ගත්තා.

බොහෝ අය මෙන් ඔබත් අද චිත්‍ර අඳින්නේ තාක්ෂණය මඟින්ද?

මං පරිගණකය මඟින් තමයි අද සම්පූර්ණවවම චිත්‍ර අඳින්නේ. එයින් කාලය ඉතුරු කරගන්න පුළුවන් වුණත් ශිල්පියෙක් ලෙස දියුණු වීම නම් අඩු වෙනවා. නමුත් අපි කරන්නේ රස්සාවක් නිසා ප්‍රශ්නයකුත් නැහැ. චිත්‍ර ශිල්පියෙක් යනු කුලී කාරයෙක් ලෙසයි මා දකින්නේ. තාක්ෂණය සමඟ කෙටි පාරවල් පාවිච්චි කරන එක වරදක් ලෙස මා දකින්නේ නැහැ. එය ඉතා පහසු දෙයක්. නමුත් චිත්‍ර හැදෑරීම නම් මා අතහැර නැහැ.

මෙරට චිත්‍ර කතා පත්තර කලාවේ අපේ රටේ කඩාවැටීම ගැන, ඔබේ දැක්ම ?

එයට අත්වුණේ ස්වභාවික මරණයක්. එය අකාල මරණයක් නෙමෙයි. එයින් ලබන තෘප්තිය ඊට වඩා ප්‍රාණවත්ව රූවාහිනියේ නාට්‍යයක් මඟින් ලැබුවා. අනික කියවීම අඩුවුණා. අපේ සමහරු කතාව චිත්‍ර දෙකම එකම කෙනා කිරීමත් බලපෑවා. කොතරම් හොඳ චිත්‍ර ශිල්පියෙක් වුණත් කතාව හොඳ නැති නම් බලන කෙනා කැමති වෙන්නේ නැහැ. පිටරටවල ජනප්‍රිය චිත්‍රපටවලින් චිත්‍රකතා හැදුනා. චිත්‍රකතාවලින් චිත්‍රපට හැදුනා. ඒවා එතරම් ජනප්‍රිය වුණා. අපේ රටේ එහෙම වුණේ නැහැ.ටිං ටිං වැනි චිත්‍ර කතා ලංකාවෙත් අද බලනවා. සුපර් මෑන්, බැට් මෑන් වැනි වීරයන් බිහිවෙලා ඒවා අදටත් විකාකශනය වෙනවා. අපේ රටෙත් නිව්රෝ, යුනිකෝ වැනි චරිත බිහිවුණත් ඒවා ඉදිරියට ගියේ නැහැ. ඒවා එකම කතාව දිගට ඇදී ගියා. නමුත් එකම චරිතයක් වුණත් එක පොතකින් ඉවරවෙන විදිහට ඉදිරිපත් කරන්න පුළුවන් නම් ලංකාවේ චිත්‍රකතාවට හොඳක් වෙයි කියන එක මගේ අදහසයි.

සංවාදය

දර්ශ කපුගේ

ලෝකයේ විවිධ සම්ප්‍රදා ඇසුරු කරමින් සංගීත නිර්මාණකරණයේ යෙදෙන අමිත් ලියනගේ සමඟ සංගීත කලාව, ගීතය, නව නිර්මාණ සම්බන්ධයෙන් කළ කතාබහකි.

ඔබ, බොහෝදුරට නිර්මාණකරණයේදී සුභාවිත සංගීතය සහ ජන සංගීතය ගීතයට යොදාගන්නවා. එහෙත් එයට ගැති නොවන ඔබ විවිධ සංගීත සම්ප්‍රදා ඇසුරු කරනවා?

ඔබ නිවැරදියි. මම මගේ සංගීත නිර්මාණකරණයේදී බොහෝවිට කිසිදු සීමාවකින් හෝ කිසිදු සම්ප්‍රදායකට ගැති වීමකින් තොරව ලෝකයේ විවිධ සංගීත සම්ප්‍රදා ඇසුරු කරනවා. හින්දුස්ථානී සංගීතය, ශ්‍රී ලාංකේය ජන සංගීතය, බටහිර සම්භාව්‍ය සංගීතය, පොප් සංගීතය, ලතින්, ආදී විවිධ සම්ප්‍රදායයන් ඇසුරු කරමින් මා කළ නිර්මාණ තිබෙනවා. කෙසේ වුවත් මා පිළිගන්නා පරිදි අපේ සංගීතයක් ගොඩනැගීමේදී දේශීය ජන නාදමාලාවන්හි හැඩතල සහ වර්ණයන් අමතක කළ නොහැකියි. අපේ රටේ ජීවත් වන මිනිසුන්ගේ සංස්කෘතියේ නාද ගමන රටාව තිබෙන්නේ ජන සංගීතය තුලයි. එය අවුරුදු දහස් ගණනක් තිස්සේ අපගේ උප විඥාණය තුල ගැබ්වී පවතින දෙයක්. මෙරට ජීවත් වූ ජනතාව ප්‍රාග් ‌ෙඑතිහාසික යුගයේ සිටම සංගීතය සම්බන්ධ ක්‍රියාකාරකම් වල යෙදී ඇතැයි මා විශ්වාස කරනවා. විජය කුමාරයා ලංකාවට ගොඩබැස්සේ සිරසවත්තු පුරයේ මහා මංගල්‍යය දිනයේයි. එම සැණකෙළියේ වාද්‍ය භාණ්ඩ හැට හතරකින් සමන්විත තූර්ය වාදන ඉදිරිපත් කොට ඇති බව ‘ශ්‍රී ලංකාවේ සංගීත සම්භවය’ ග්‍රන්ථයේ සී. ද එස්. කුලතිලකයන් සඳහන් කරනවා. ජන සංගීතය පැන නගින්නේ සාමාන්‍ය ජනතාව තුලින්මයි. එදිනෙදා කාර්යයන් ඉටු කිරීමේදී ඇතිවන කාන්සිය, වෙහෙස නිවා ගැනීම සඳහාත්, සාමූහිකත්වය වර්ධනය කිරීම සඳහාත්, දැනුම බෙදාදීමේ මාධ්‍යයක් ලෙසත් ඔවුන් විවිධ ගායනා සහ සංගීත ක්‍රමවල යෙදී තිබෙනවා. මේවා අලිඛිතව එනම් ශ්‍රැත සම්ප්‍රදායානුකූලව පරම්පරාවෙන් පරම්පරාවට තමයි පැවත ආවේ. මෙම නිර්මාණ ප්‍රස්තාරගත කොට නොමැති නිසා මුල් නාදමාලා කෙසේදැයි සොයාගත හැකි ක්‍රමයක් නැහැ. එසේම ජන ගී වලට ප්‍රස්තාරගත කළ නිශ්චිත තනු නැති නිසා විවිධ ගැමියන් ඔවුන්ගේ ගායන පරාස අනුව විවිධාකාරයෙන් ගායනා කරනවා. අපේ රටේ ජන සංගීතය වර්ධනය වන්නේ බෞද්ධ ආගමික පසුබිමක් තුලයි. පසුකාලීනව මෙයට පෘතුගීසි, ඉංග්‍රීසි, ඉන්දියානු ආදී සංස්කෘතීන් වල බලපෑම ලැබෙනවා. මේ ආකාරයෙන් ඕනෑම රටක සාමාන්‍ය ජනතාව තුලින් පැන නැගුනු ජන සංගීතයක් තිබෙනවා. එම ප්‍රාථමික සංගීත ක්‍රම පෝෂණය වී වර්ධනය වීමෙන් තමයි පසුකාලීනව මහා සංගීත සම්ප්‍රදායයන් බිහිවුණේ.

අද වෙනදාට වඩා, සුභාවිත ගීතය ගැන කතාබහට ලක්වෙනවා. එහෙත් අපට ශ්‍රවනය වෙන්නේ, හරසුන් ගීත සම්ප්‍රදායක්?

සුභාවිත යනු යහපත් භාවිතාවකින් යුතු ගීත වැනි අදහසක් ජනිත කරවනවා. ගීතයක අන්තර්ගත පද රචනාව, සංගීතය සහ ගායනය අර්ථ පූර්ණව, ස්වර මාධූර්යයෙන් සහ සුගායනීයත්වයෙන් පරිපූර්ණ නම් අපට එය සුභාවිත ගීතයක් යැයි අර්ථකතනය කළ හැකියි. අතීතයේදී අපට එවන් ගීත අසන්නට ලැබුණා. ඒ බොහෝවිට මෙම එක් එක් ක්ෂේත්‍රයන්ට පිවිසුණු බොහෝ අය ඒ ක්ෂේත්‍ර පිළිබඳ උගතුන් වීම නිසායි. එවකට පැවති අධ්‍යාපන ක්‍රමය මගින් සාහිත්‍යය, දර්ශනය, ඉතිහාසය, කාව්‍ය ශාස්ත්‍රය, භාෂා ඥාණය පිළිබඳව හැදෑරීමකින් යුතු පිරිසක් බිහි කෙරුණා. නමුත් පසුකාලීනව විවිධ දේශපාලකයන්ගේ අරමුණු අනුව අධ්‍යාපන පද්ධතියෙන් ඉහත විෂයයන් ඈත්කරනු ලැබුවා. මම හිතන්නේ අද අප දකින පරිහානියේ මූලාරම්භය එයයි. අද බිහිවන ගීත, සිනමා පට, ටෙලිනාට්‍ය, වේදිකා නාට්‍ය ආදී කලාංගයන් තුල මෙම පරිහානීය ලක්ෂණ දැකිය හැකියි. අද බොහෝ ගීත රචකයන් ට, සංගීත නිර්මාණ කරුවන් ට සහ ගායකයන් ට සිය විෂයයන් පිළිබඳ පුළුල් හැදෑරීමක්, කියැවීමක් හෝ ප්‍රාමාණිකත්වයක් නැහැ. ඔහේ හිතට එන මනස්ගාත ලියනවා. ඒවාට කුමන හෝ ශබ්ද ටිකක් එකතුකොට ගායනා කරනවා. හරයක් නොමැති බොල් නිර්මාණ බිහිවන්නේ ඒ නිසායි. මේ ව්‍යසනය පිළිබඳව නිවැරදි අධ්‍යයනයක් සිදුකොට නැවතත් අපේ අධ්‍යාපන පද්ධතියට ඒ නැතිවූ දැනුම ඇතුලත් කළ හැකිනම් මම හිතන්නෙ අපේ ඊලඟ පරම්පරාව වත් නිසි මගට ගමන් කරාවි.

මීට ප්‍රථම, මෙරට ගායන ශිල්පීන් ගීත ඇතුළත් සංයුක්ත තැටි නිකුත් කළා. එහෙත් අවාසනාවකට මෙන් අද ඔවුන් එළිදක්වන්නේ, ගීතයක් දෙකක් පමණයි ?

ඔව්. මීට ප්‍රථමයෙන් කැසට් පට යුගය සහ සීඩී පට යුගය පසු කරමින් අපි පැමිණියා. මීට දශකයකට එකහමාරකට පමණ පෙර කැසට් සහ සීඩී නිෂ්පාදකයින් ප්‍රබලව කටයුතු කළත් අන්තර්ජාලය මෙරට ප්‍රචලිත වීමත් සමග ගීත නිර්මාණකරණය සහමුලින් ම පරිවර්තනයකට ලක්වූවා. කැසට් හෝ සීඩී නිෂ්පාදකයින් විශාල නිෂ්පාදන වියදමක් දරමින් නිර්මාණය කරනු ලබන ගීත ඇල්බම් විවිධ පුද්ගලයින් එක රැයින් කොපි කොට ව්‍යාජ සීඩී පට නිපදවමින්, ඒවා අඩුමිලට විකුණමින්, අන්තර්ජාලයට එක් කරමින් ගීතයේ කර්තෘවරුන්ගේ බුද්ධිමය දේපල අයිතින් අමු අමුවේ උල්ලංඝණය කළා. එම නිසා කැසට් සහ සීඩී නිෂ්පාදකයින් විශාල ලෙස පාඩු ලැබීමටත්, නිෂ්පාදන ආයතන බංකොලොත් වීමටත් පටන් ගත්තා. එබැවින් ඔවුන් ගීත නිර්මාණකරණය අතහැර ලාබ ලැබිය හැකි වෙනත් ව්‍යාපාර අවස්ථා සඳහා යොමුවුණා. ගීතයේ නිෂ්පාදන වියදම දැරීමට පුද්ලයකු නොමැතිවීම නිසා නව ගීත නිර්මාණකරණය බිඳවැටුණා. ගීත ඇල්බමයක් නිකුත් කිරීමට යන විශාල වියදම දැරීමට දැන් බොහෝ නිර්මාණකරුවන් ට නොහැකියි. ඒ නිසා ඔවුන් ගීතයක් හෝ දෙකක් නිකුත් කිරීමට පෙළඹී සිටිනවා.

ඔබ, සංගීත පිළිබඳව හැදෑරීම් කරන්නේ කේමදාස මාස්ටර් , මහාචාර්ය සනත් නන්දසිරි, රෝහණ බැද්දගේ වැනි විවිධ සංගීත ශෛලීන් ප්‍රගුණ කළ සංගීතඥයන්ගේ ඇසුරේ. මේ මිශ්‍ර ⁣ශෛලිය ඔබේ නිර්මාණකරණය සඳහා ඔබ යොදා ගන්නේ කොහොමද ?

ඔබ හරි. මට විවිධ සම්ප්‍රදායයන් ප්‍රගුණ කළ ගුරුවරුන් ඇසුරු කිරීමට ලැබුණා. ඒ මගින් එක් සංගීත සම්ප්‍රදායක සිරනොවී සිටීමට හැකිවීම මා ලද විශාල භාග්‍යයක් ලෙසයි මා සිතන්නේ. එමනිසා කිසිදු සංගීත සම්ප්‍රදායක් තවත් එකකට වඩා උසස් ලෙස හෝ පහත් ලෙස නොසැලකීමට මා පෙළඹුණා. කිසිදු සංගීත සම්ප්‍රදායක ගැත්තෙකු වීමට මා උත්සාහ කරන්නේ නැහැ. එම නිසා අදටත් මම මේ ගුරුවරුන්ගෙන් ඉගෙන ගත් බටහිර සංගීතය, හින්දුස්ථානී සංගීතය සහ දේශීය ජන සංගීතය ආදී සංගීත සම්ප්‍රදායන් මගේ නිර්මාණකරණයට නිදහස් ලෙස යොදාගන්නවා. මගේ නිර්මාණාවලිය තුල ඒකාකාරීත්වය බිඳලමින් විවිධත්වයක් ඇති කිරීමට නිතරම මා උත්සාහ ගන්නේ එම ගුරුවරුන්ගෙන් මා ලද අනුප්‍රාණය නිසායි.

ඔබේ නිර්මාණය සඳහා ගොඩාක් දුරට යොදාගන්නේ දේශීය වාද්‍ය භාණ්ඩ?

නැහැ. දේශීය වාද්‍ය භාණ්ඩ පමණක් යොදාගන්නා වාද්‍ය වෘන්දයකින් ගීත පටිගත කිරීම අපහසුයි. අපේ දේශීය වාද්‍ය භාණ්ඩ අතර ස්වර වාද්‍ය භාණ්ඩ ඉතාම සීමිතයි. අප දැන් නිර්මාණය කරන ගීත ආකෘතිය ස්ථායි අන්තරා ආදී වන ඉන්දියානු සංගීත ආභාසයෙනුයි සැකසී ඇත්තේ. එසේම බටහිර කෝඩ්ස්, ස්කේල්ස්, බීට්ස්, කවුන්ටර් පාට්ස් ආදියත් මෙයට අවශෝෂණය කරගෙන තිබෙනවා. මේ නිසා අද අපි නිර්මාණය කරන ගීත, සම්ප්‍රදායයන් කිහිපයකම කොටස් ඒකතු කිරීමෙන් සකසා ගත්තක් වෙනවා. මෙහිදී අපිට විවිධ සංගීත භාණ්ඩ භාවිතා කරන්න වෙනවා. ඒ නිසා දේශීය, ඉන්දියානු හෝ බටහිර ආදී ලෙස සංගීත භාණ්ඩ බෙදා වෙන්කරන බැහැ.එහිදී ගීතයේ ප්‍රකාශනය ට වඩාත්ම උචිත සංගීත භාණ්ඩ සංයෝජනය කිරීමයි සිදුකරන්නේ.

ඔබේ නවතම නිර්මාණ ගැන සඳහනක් කළොත් ?

මෑතකදී රෝහණ බැද්දගේ, අමරසිරි පීරිස්, ජගත් වික්‍රමසිංහ, කිත්සිරි ජයසේකර, සමන් ලෙනින්, හර්ෂණ දිසානායක, චන්දන ලියනාරච්චි, ඉමාන් පෙරේරා, චම්පා කල්හාරි, ශෂිකා නිසංසලා, නිලක්ෂි හැලපිටිය වැනි ප්‍රවීණ ගායක ගායිකාවන් සහ මහේෂ් පතිරාජ, රොෂෙල් රත්නායක, සඳරු ලීනියාගොඩ වැනි නවක ගායන ශිල්පීන් සමගත් නිර්මාණ කටයුතු සිදුකළා.

ඔබ, නර්තනය ගුරු උපහාර ගීතයට සහ පාසල් ගීත ගණනාවකට දායක වූවෙක්?

ඔව්. නර්තන ගුරු උපහාර ගීතය අමෙරිකාවේ ලොස් ඇන්ජලීස් හි තත් ජීත් නර්තන ඇකඩමියේ අධ්‍යක්ෂ ප්‍රසන්න යමසිංහගේ ආරාධනාවක් අනුවයි නිර්මාණය වූයේ. එය රචනා කලේ සුසන්ත දන්දෙණිය. මුල්ම වතාවටයි නර්තන ගුරුවරුන් පිදීමේ උපහාර ගීයක් නිර්මාණය වන්නේ. ඊට අමතරව පාසල් කිහිපයකම පාසල් ගීත නිර්මාණය කිරීමට දායක වුණා.

වේදිකා , ටෙලි, සිනමා මේ කලාංග සඳහා ඔබ සංගීතයෙන් දායක වූවෙක්. මේ ත්‍රිත්වය වෙන් වෙන්ව ඔබ හඳුනාගන්නේ කොහොමද?

වේදිකා නාට්‍ය සංගීත අධ්‍යක්ෂණය කරන්න ලැබුණේ මීට අවුරුදු දහයකට පමණ පෙරයි. බොහෝවිට මට ලැබුණේ වෙනත් සංගීත අධ්‍යක්ෂවරුන් නිමවූ වේදිකා නාට්‍යවල සංගීතය මෙහෙයවීමටයි. ඒකාංගික ටෙලිනාට්‍යයක සංගීත අධ්‍යක්ෂණය කිරීමටත් කෙටි චිත්‍රපට කිහිපයක සංගීතය නිර්මාණය කිරීමටත් ලැබුණා. මීට අමතරව වෘතාන්ත චිත්‍රපට කිහිපයකට ආරාධනා ලැබී තිබෙනවා. මේ මාධ්‍යයන් තුන එකිනෙකට වෙනස්. වේදිකාව සජීවී මාධ්‍යයක්. ටෙලිනාට්‍යය රූපවාහිනියේ පුංචි තිරයට නිර්මාණය කරන්නක්. එහි සංගීතය වේදිකා සංගීතය ට වඩා සිනමා සංගීතයට සමීප වුවත් සිනමා සංගීතය යනු ඉඳුරාම වෙනස් මාධ්‍යයක්. මෙම මාධ්‍යවල සුවිශේෂීතා කෙටියෙන් විස්තර කිරීම අසීරුයි. මා මේ දිනවල සිනමා සංගීත තාක්ෂණය පිළිබඳ ග්‍රන්ථයක් සම්පාදනය කරමින් සිටිනවා. එහි මේ සියල්ල පිළිබඳව සවිස්තරාත්මකව දක්වා තිබෙනවා.

සංගීතය ඔබේ ජීවිතය. හෙට දිනයේදී කොහි විදිහටද ඔබ, සංගීතය හා ගතකරන්නේ ?

සංගීතය, සිනමාව සහ ශබ්ද සැළසුම්කරණය යන විෂයයන් පිළිබඳවයි මගේ වැඩි උනන්දුව සහ හැදෑරීම තිබෙන්නේ. සිනමා පට කිහිපයක සංගීත නිර්මාණයටත්, ශබ්ද සැළසුම්කරණයටත් ආරාධනා ලැබී තිබෙන නිසා ඒ පිළිබඳව ඉදිරියේදී අවධානය යොමුකරනවා. එමෙන්ම මේ දිනවල මගේ ම වාද්‍ය වෘන්දයක් නිර්මාණය කරමින් සිටිනවා ‘ධ්වනි’ නමින්. ඉදිරියේදී ප්‍රසංග කිහිපයකට ආරාධනා ලැබී තිබෙනවා. ඒ වගේම පළමු වරට කැලණිය විශ්වවිද්‍යාලයේ වාද්‍ය වෘන්දයක් නිර්මාණය කරන්නත් පසුගිය දිනවල අපට හැකිවුණා. ඔපෙරා, සංධ්වනි, බැලේ වැනි ගීතය ඉක්මවූ සංගීත භාවිතාවක් වෙනුවෙන් නිර්මාණකරණයේ යෙදීමටත් මගේ විශාල බලාපොරොත්තුවක් තිබෙනවා.

සංවාදය

අනුසාර මාහිංගොඩ

පසුගිය ආණ්ඩුව දේශපාලනික වශයෙන් යම් යම් වාසි ගැනීම පිණිස මත්තල ගුවන් තොටුපොළේ වී ගබඩා කළ නමුත් වී අලෙවි මණ්ඩලය පණ ගැන්වීම වැනි රටට පලදායි වැඩක් කරන්නට ඔවුන් උත්සාහ කළේ නැත. වී අලෙවි මණ්ඩලය මගින් වැඩි මිලට ගත් වී අඩු මිලට සත්ත්ව ආහාර සඳහා අලෙවි කළ අවස්ථාද අප දැක තිබේ. ජනතාව ගසා කෑම පිණිස මෝල් හිමියන් ක්‍රියාත්මක කරනු ලබන තවත් කූට ක්‍රියාවක් නම් ඒ සුපිරි නාමයෙන් වෙළෙඳ පොළට නිකුත් කරනු ලබන සහල්ය.

රටේ නොයෙකුත් මාෆියා තිබේ. මේ මාෆියාවන්ගේ ගොදුරු බවට බොහෝ විට පත්වන්නේ සාමාන්‍ය ජනතාවය. වෙළෙඳ පොළ තුළ ඉල්ලුමක් ඇති භාණ්ඩ සඟවා ඒවා වැඩි මිලට අලෙවි කිරීමේ මාෆියාව අද ඊයේක ඇති වූවක් නොවේ. උත්සව සමය එළඹි විට එය මෙරට නිතර දකින්නට ලැබෙන තත්ත්වයකි. ඒ අනුව දැන් යළිත් වරක් සහල් මාෆියාව ක්‍රියාත්මක වෙමින් තිබේ. පසුගිය වසර කිහිපය තුළ මෙරට නිෂ්පාදිත හා ආනයනය කළ සහල් තොග සැලකීමේදී මේ අවස්ථාව වන විට රටේ සහල් හිඟයක් ඇති වීමට කිසිදු ඉඩක් නැත. එසේ වුවත් ඉල්ලුමට සරිලන සැපයුමක් කළ නොහැකි බව කියමින් මහා පරිමාණ සහල් මෝල් හිමියන් හිතුමතේ හාල් මිල ඉහළ දමමින් සහල් ප්‍රශ්නයක් නිර්මාණය කර තිබේ.

නාඩු සහල් කිලෝවක මිල රුපියල් 120 ක් දක්වා ඉහළ ගිය අවස්ථාවක ජනපති මැදිහත්වීම මත කිලෝවක මිල රුපියල් 98 ක් දක්වා සහල් පහත වැටුණේ රජය නාඩු සහල් කිලෝවක් සඳහා රුපියල් 98 ක උපරිම සිල්ලර මිලක් නියම කරමින් ගැසට් පත්‍රයක් නිකුත් කිරීමේ ප්‍රතිඵලයක් ලෙසිනි. පසුගිය වසරේ සහල් මෙට්‍රික් ටොන් ලක්ෂ 24 ක පමණ අස්වැන්නක් අපට ලැබිණි. මෙරට වාර්ෂික සහල් පරිභෝජනය සහල් මෙට්‍රික් ටොන් ලක්ෂ 22 ක් පමණ වන අතර පෙර වසරවල සහල් අතිරික්තය හා ආනයනික සහල් තොග සැලකීමේදී රටේ සහල් හිඟයක් පැවතීමට කිසිසේත්ම ඉඩක් නොමැත. එසේ තිබියදී සහල් හිඟයක් මවා පෙන්වමින් මෝල් හිමියන් කිහිප දෙනකු සිදු කර තිබෙන්නේ නාඩු කිලෝවක් සඳහා රජය මගින්ම පාරිභෝගිකයාට දැරිය නොහැකි මිලක් නියම කරවා ගැනීමය.

තොග සැඟවීම

අද මෙරට සහල් මිල පාලනය කරනු ලබන්නේ මහා පරිමාණ මෝල් හිමියන් තුන් හතර දෙනකු බව රටම දන්නා කරුණකි. අසීමිත ලෙස ලාබ ඉපයීමට මෙන්ම දේශපාලනික වශයෙන් යම් යම් අපේක්ෂාවන් මුදුන් පමුණුවා ගැනීමටද මොවුන් සහල් තොග සැඟවීමට පුරුදුව සිටිති. බලයට පත්වන ආණ්ඩු මේවා තේරුම් ගත යුතුය. මහා පරිමාණ සහල් මෝල් හිමිකරුවන් ඍජුව හා වක්‍රව දේශපාලනයට සම්බන්ධය. මේ නිසා මොවුන් පාලනය කිරීම ආණ්ඩුවකට කළ නොහැකි බවට මතයක් ජනතාව තුළ පවතී. එය නිවැරදි කිරීම වත්මන් රජයේ වගකීමකි. මෝල් හිමියන් ක්‍රියාත්මක කරනු ලබන සහල් මාෆියාව බිඳ දැමීම සමාන්‍ය ජනතාවට කළ නොහැකිය. එය රජයේ වගකීමකි.

මේ අත්විඳිමින් සිටින්නේ වී අලෙවි මණ්ඩලය දුර්වල කිරීමේ ප්‍රතිවිපාකයයි. වී අලෙවි මණ්ඩලය මගින් දැනට මිලදී ගනු ලබන්නේ මෙට්‍රික් ටොන් 50000 ක පමණ ප්‍රමාණයකි. වී ගබඩා කිරීම පිණිස තිබූ ගබඩා බොහොමයක් දැන් පවතින්නේ මරණ මංචකයේය. දේශපාලනඥයින් හා නිලධාරීන් එක්ව මේවා විනශා කළේ මහා පරිමාණ මෝල් හිමියන්ගේ අවශ්‍යතා ඉටු කරන්නටද යන සැකය මතුවන්නේ වී අලෙවි මණ්ඩලය දුර්වලවිමේ වාසිය මෝල් හිමියන් අද අසීමිත ලෙස ලබාගෙන තිබෙන බැවිනි.

පසුගිය වී අස්වැන්නෙන් නාඩු වී කිලෝව රුපියල් 40 කටත් සම්බා වී කිලෝව රුපියල් 50 කටත් මිලට ගත් මෝල් හිමියෝ අද රජයේ පාලන මිල යටතේ රුපියල් 98 ක මුදලකට නාඩු සහල් කිලෝවක් අලෙවි කිරීමෙන්ද අසීමිත ලාභයක් ලබති. එවැනි ලාභයක් ලබන අතර සහල් තොග සැඟවීමෙන් මොවුන් අපේක්ෂා කරන්නේ, සහල් මිල තවත් ඉහළට ගෙන යාමය. වී අලෙවි මණ්ඩලය සතුව ප්‍රමාණවත් වී තොග තිබුණේ නම් මේ ආකාරයට මෝල් හිමියන්ට සහල් මිල තීරණය කරන තත්ත්වයට පත්වන්නේ නැත. සඟවා තිබෙන සහල් තොග සොයා ගැනීම ආණ්ඩුවට අසීරු කටයුත්තක් නොවේ. එසේ වුවත් ඒවා සොයා ගැනීමට ආණ්ඩුව උනන්දුවක් දක්වන බවක් පෙනෙන්නට නැත. ගෝඨාභය රාජපක්ෂ මහතා ජනපති ධුරයට පත්වීමත් සමඟ සහල් තොග මේ ආකාරයට සැඟවූයේ ඇයිද යන්න වෙනම සොයා බැලිය යුතු කාරණයකි. සෑම උත්සව කාලයකදීම රට තුළ සහල් මාෆියාවක් මෝල් හිමියන් ක්‍රියාත්මක කරන බව පැහැදිලිව දක්නට ලැබෙන බැවින් වී අලෙවි මණ්ඩලය යළි පණ ගන්වා එමඟින් සෑම කන්නයකදීම සමස්ත අස්වැන්නෙන් 60% ක් පමණ ආණ්ඩුව විසින් මිලට ගත යුතුව තිබේ. එසේ නොමැතිව මෙම ගැටලුවට විසඳුම් සෙවීමට නොහැකිය.

සේනානායක යුගය

මෙරට සහල් නිෂ්පාදනය 1940 සිට 1950 දක්වාවූ දශකයේදී පැවැතියේ ජාතික අවශ්‍යතාව සපුරා ගැනීමට නොහැකි මට්ටමකය. එකල රටේ සමසත් සහල් අවශ්‍යතාවෙන් 40% ක පමණ ප්‍රමාණයක් රට තුළ නිෂ්පාදනය කර ගනිද්දී ඉතිරිය සපුරා ගනු ලැබුවේ ආනයනය කිරීමෙනි. මෙම දත්ත සැලකීමේදී රටේ නිෂ්පාදනය කළ ප්‍රමාණයට වඩා සහල් ආනයනය කර තිබෙන බව පැහැදිලිය. මහාමාන්‍ය ඩී.එස්. සේනානයක මහතා මුල්වී ගොවි ජනපද පිහිටුවීමත් සමඟ මෙම මට්ටම් දෙක 50% ක් දක්වා ගෙන එමින් සමපාත කිරීමට හැකිවිය. හැත්තෑව දශකය වනවිට මහවැලි එච් කලාපය ඇතුළු මහවැලි කලාප පිහිටුවමින් ගොවිබිම් ස්ථාපිත කිරීම ඔස්සේ දේශීය සහල් නිෂ්පාදනය 60% ක අගයක් දක්වා ඉහළට ගෙන ඒමට හැකි විය. අසූව දශකයේදී ආනයනික සහල් ප්‍රමාණය 10% ක් දක්වාත් අනූව දශකයේදී එම අගය 5% ක් දක්වාත් අඩු කිරීමට හැකිවීම රටක් ලෙස අප ලත් ජයග්‍රහණයකි. වසර 2000-2009 කාලයේදී අප සහලින් ස්වයංපෝෂිත වූයේ මේ අකාර ක්‍රමවත් වැඩපිළිවෙළක් ඔස්සේ කටයුතු කිරීමේ ප්‍රතිඵලයක් ලෙසිනි. වසර 2010 දී අප සහලින් ස්වයංපෝෂිත තත්ත්වයෙන්ද ඔබ්බට ගොස් සහල් අතිරික්තයකටද හිමිකම් කිවුවේය. ත්‍රස්තවාදය නිමාවට පත් කිරීමෙන් පසු උතුරු නැගෙනහිර ප්‍රදේශවල අත්හැර දමා තිබුණු කුඹුරු යළි අස්වැද්දීමත් හෙක්ටයාර් එකකින් අප ලබාගත් කිලෝ ග්රෑම් 650 ක් වූ සහල් ප්‍රමාණය 4500 ක් පමණ දක්වා වැඩිකර ගැනීමත් මෙයට ප්‍රධාන ලෙස බලපා තිබිණි.

වී ගොවිතැන

හැටේ දශකය මුල් භාගය වන විට කිලෝග්‍රෑම් 135 දක්වා මෙරට ඒක පුද්ගල සහල් පරිභෝජනය මේ වන විට කිලෝග්‍රෑම් 100 දක්වා පහත බැස තිබේ.තිරිඟු පිටි ආශ්‍රිත නිෂ්පාදන භාවිතයට ජනතාව වැඩි වශයෙන් නැඹුරු වීම මෙම තත්ත්වයට ඍජුව බලපා තිබේ. වී සඳහා හොඳ මිලක් ගොවියාට නොලැබෙන කතාව අද ඊයේක ඇති වූවක් නොවේ. ගොවීන් අස්වැන්න නෙළන අවස්ථාව වන විට ඔවුන් මහ පරිමාණ මෝල් හිමියන්ගේ ණය කාරයින් බවට පත්ව හමාරය.ඉතා සැළසුම් සහගතව මොවුහු ගොවීන් තමන්ගේ උගුලට අසුකර ගනිති. ණය උගුල තුළ සිරවී සිටින ගොවියාට කේවල් කරමින් තම වී අලෙවි කිරීමට ඇති සියලු අවස්ථා මෝල් හිමියන් විසින් අසුරනු ලැබේ. මෙහි ප්‍රතිඵලයක් ලෙස වී ගොවියා කබලෙන් ළිපට වැටෙද්දී මෝල් හිමියා ගොවියාගේ දහදියෙන් මන්දිර තනන තත්ත්වයක් රටේ නිර්මාණය වී තිබේ. මේ තත්ත්වයට බලයේ සිට සියලු ආණ්ඩු වගකිව යුතුය.ජනතාව ඡන්දය ලබාදී තමන්ගේ නියෝජිතයින් ලෙස පත්කර යවන පුද්ගලයින්ද මෝල් හිමියන්ගේ සාක්කුවට වැටෙන්නේ ඔවුන් සතු මහා ධනස්කන්දයට වහ වැටීම හේතුවෙනි.

වෙළෙඳ පොළ තුළ තරඟකාරීත්වයක් පැවැතීම තුළින් වාසිය අත්වන්නේ පාරිභෝගිකයාටය. මහා පරිමාණ මෝල් හිමියන් හා සුළු පිරිමාණ මෝල් හිමියන්ද වී මිලට ගැනීමේ තරගයට ප්‍රවිශ්ඨ වීමෙන් ගොවියාට හොඳ මිලක් ලැබෙන අතරම සහල් මාෆියාවක් රටේ ක්‍රියාත්මක වීමට ඇති ඉඩකඩද ඇහිරී යන්නේය. එහෙත් අද සුළු පරිමාණ මෝල් හිමියන් අන්ත අසරණ තත්ත්වයට පත්ව සිටින්නේ මහ පරිමාණ මෝල් හිමියන් අසීමාන්තිකව වී තොග ලබා ගනිමින් වෙළෙඳ පොළ ඔවුන්ගේ ග්‍රහණයට නතු කරගෙන සිටින බැවිනි. මේ නිසා අද සුළු පිරිමාණ මෝල් බොහොමයක් වැසී ගොස් ඇත.

පසුගිය ආණ්ඩුව දේශපාලනික වශයෙන් යම් යම් වාසි ගැනීම පිණිස මත්තල ගුවන් තොටුපොළේ වී ගබඩා කළ නමුත් වී අලෙවි මණ්ඩලය පණ ගැන්වීම වැනි රටට පලදායි වැඩක් කරන්නට ඔවුන් උත්සාහ කළේ නැත. වී අලෙවි මණ්ඩලය මගින් වැඩි මිලට ගත් වී අඩු මිලට සත්ත්ව ආහාර සඳහා අලෙවි කළ අවස්ථාද අප දැක තිබේ. ජනතාව ගසා කෑම පිණිස මෝල් හිමියන් ක්‍රියාත්මක කරනු ලබන තවත් කූට ක්‍රියාවක් නම් ඒ සුපිරි නාමයෙන් වෙළෙඳ පොළට නිකුත් කරනු ලබන සහල්ය. සුපිරි ලේබලය යටතේ වෙළෙඳ පොළේ විවිධ මිල ගණන්වලට සහල් අලෙවි කෙරේ. සුපිරි නමින් වී වර්ගයක් නොමැත.

සුපිරි මායාව

අද සුපිරි කීරි, සුපිරි සම්බා යනුවෙන් සහල් කිලෝවක් අලෙවි වන්නේ රුපියල් 150කට වැඩි මිලකටය. මේ සහල් නිෂ්පාදනය කිරීමට අවශ්‍ය වී මෝල් හිමියන් විසින් මිලට ගෙන තිබෙන්නේද කිලෝව රුපියල් 50.00 මිලකටය. වැලි හා දූවිලි ඉවත් කර සුපිරි ලේබලය අලවා මේ ආකාරයෙන් පාරිභෝගිකයින් ගසා කෑමට ඉඩ නොදිය යුතුය. පාන් රාත්තලක් අලෙවි කළ යුතු මිලක් තිබේ.ඊට වැඩි මිලකට අලෙවි කළහොත් පාරිභෝගික සේවා අධිකාරියට ඒ සම්බන්ධයෙන් ක්‍රියාත්මක වීමට පුළුවන.පෙති පාන්වලට මේ නීති අදාළ නැත.ඒවා ව්‍යාපාරිකයින්ට සිතෙන මිලට අලෙවි කෙරේ. සහල් සම්බන්ධයෙන්ද උද්ගතව තිබෙන්නේ මේ තත්ත්වයමය. සුපිරි ලේබලය අලවා සහල් කිලෝවක් හිතෙන මිලකට අලෙවි කිරීමට ඇති හැකියාවට වැට බැඳීම බලධාරීන්ගේ වගකීමය.

සහල් මාෆියාව ඉතා බරපතළ එකකි. එක රැයකින් මේ ප්‍රශ්නයට විසඳුම් සෙවීමට වත්මන් ආණ්ඩුවටද නොහැකි බව පිළිගත යුතුය. එහෙත් ප්‍රශ්නය නිවැරදි ලෙස තේරුම් ගනිමින් එයට විසඳුමක් ලබා දිය යුතුය යන ස්ථාවරයට ආණ්ඩුව ප්‍රථමයෙන් පැමිණිය යුතුය. දැන් ගොවීන් සතුව වී තොග නොමැත. කුඹුරු කැපී ගොවීන් අතට වී ලැබෙන්නේ එළඹෙන පෙබරවාරී මාසයේදීය. ඉදිරි මාස දෙකක කාලය තුළ මේ ආකාරයෙන් සහල් මිල ඉහළ අගයක පවත්වා ගෙන යෑමෙන් පීඩාවට පත්වන්නේ ජනතාවය. දැන් ආණ්ඩුව හමුවේ සහල් මිල පාලනය කිරීම සඳහා ක්‍රියාමාර්ග දෙකක් තිබේ.එකක් නම් මෝල් හිමියන් සඟවා තබාගෙන සිටින සහල් තොග සොයා ඒවා එළියට දැමීමය.අනෙක් මඟ වන්නේ සහල් ආනයනය කිරීමය.කෘෂිකර්මාන්තය සඳහා ජාතික ප්‍රතිපත්තියක් අවශ්‍ය බව යළිත් ආණ්ඩුවලට මතක් කර දීමට සිදුවීම කනගාටුවකි. පෙර වැරදි දැන් හෝ තේරුම් ගෙන ඒවා යළිත් සිදු නොවන්නට රටේ සියලු ක්ෂේත්‍ර සඳහා ජාතික ප්‍රතිපත්ති නිර්මාණය කිරීමට ආණ්ඩුව ක්‍රියා කළ යුතුව තිබේ.එය සහල් මාෆියාව පමණක් නොව ජනතාව පෙළමින් ක්‍රියාත්මක වන සියලු මාෆියාවන් මැඩ පැවැත්වීමට එමගින් හැකිවනු ඇත.

ජනවාරි

ජනවාරි 05

ත්‍රිපිටකය ලෝක උරුමයක් බවට පත් කිරීම එවක ජනාධිපති මෛත්‍රීපාල සිරිසේන මහතා අතින් සිදු කෙරුණි.

ජනවාරි 08

නව ලග්ගල නගරය ජනතා අයිතියට පැවරීම

ජනවාරි 21

ප්‍රවීණ සිනමා නළුවකු වූ මාක් සැම්සන්

මහතාගේ අභාවය.

පෙබරවාරි

පෙබරවාරි 06

මාකඳුරේ මධූෂ් නමැති ප්‍රකට පාතාල සැකකරු ඩුබායිහිදි අත්අඩංගුවට පත්වීම.

පෙබරවාරි 19

ජාතික පොලිස් කොමිසමේ සභාපතිවරයා ලෙස විශ්‍රාමික පරිපාලන නිලධාරියකු වූ තිලක් කොල්ලුරේ මහතා පත්කිරීම.

පෙබරවාරි 27

ජ්‍යෙෂ්ඨ මාධ්‍යවේදියකු හා පුවත්පත් කර්තෘවර ජයතිලක ද සිල්වා මහතාගේ අභාවය.

මාර්තු

මාර්තු 05

2019 වර්ෂය සඳහා වූ අයවැය යෝජනා පාර්ලිමේන්තුවට ඉදිරිපත් කිරීම.

අබ්දුල් කලාම් කළමනාකරණය සහ තාක්ෂණ විද්‍යායතනය මගින් පිරිනමන, ආසියාවේ අභිමානය සම්මානය කතානායක කරු ජයසූරිය මහතා වෙත පිරිනැමීම.

හිටපු පාර්ලිමේන්තු මන්ත්‍රීවරයකු සහ මහජන එක්සත් පෙරමුණේ ජ්‍යෙෂ්ඨ නායකයකු වූ සෝමවීර චන්ද්‍රසිරි මහතාගේ අභාවය.

මාර්තු 30

හිටපු ජනාධිපති අපේක්ෂිකා සහ හිටපු ඇමැති ගාමිණි දිසානායක මහතාගේ බිරිය ශ්‍රීමා දිසානායක මහත්මියගේ අභාවය.

ප්‍රවිණ ගායිකා ඇන්ජලීන් ගුණතිලක මහත්මියගේ අභාවය.

අප්‍රේල්

අප්‍රේල් 08

මාතර සිට බෙලිඅත්ත දක්වා දීර්ඝ කරන ලද දකුණු දුම්රිය මාර්ගයේ මංගල ගමන එවකට ප්‍රවාහන ඇමැති අර්ජුන රණතුංග මහතාගේ ප්‍රධානත්වයෙන් ජනතා අයිතියට පත්කිරීම.

අප්‍රේල් 09

ප්‍රවිණ සංගීතවේදී එච්. එම්. ජයවර්ධන මහතාගේ අභාවය.

දේශීය සිසුන් දෙ‍ෙදනකු විසින් නිර්මාණය කළ ප්‍රථම චන්ද්‍රිකාව රාවණ 01 ගුවන්ගත කිරීම.

අප්‍රේල් 21

පාස්කු ඉරිදා කටුවාපිටිය, කොච්චිකඩේ, සහ මඩකළපුව දේවස්ථානවල සහ කොළඹ සංචාරක හෝටල්වලට එල්ල වූ ත්‍රස්තවාදී ප්‍රහාරයකින් පුද්ගලයන් තුන්සියයකට අධික ප්‍රමාණයක් මියගොස් විශාල පිරිසක් තුවාල ලැබීම.

අප්‍රේල් 24

අන්තවාදී ත්‍රස්තවාදී කණ්ඩායමක් සහ ආරක්ෂක අංශ අතර අම්පාර චවලකඩ ප්‍රදේශයේ ඇති වූ ගැටුමකින් පසු බෝම්බ පුපුරුවා ගැනීමක් නිසා ත්‍රස්තවාදීන් සහ කුඩා දරුවන් කිහිප දෙනෙක් මරණයට පත්වීම.

අප්‍රේල් 29

පාස්කු ත්‍රස්ත ප්‍රහාරයෙන් පසු මෙරට ආරක්ෂක පද්ධතියේ සංශෝධන සිදු කරමින් නව ආරක්ෂක ලේකම්වරයා ලෙස ජනරාල් ශාන්ත කොට්ටේගොඩ මහතා පත්කරනු ලැබීම.

එවකට ජනාධිපති මෛත්‍රීපාල සිරිසේන මහතා විසින් ඉස්ලාම් අන්තවාදී සංවිධාන රැසක් තහනම් සංවිධාන බවට පත් කරන ලද අතර ආරක්ෂාව තහවුරු කිරීමේ පියවරක් ලෙස හදිසි නීතිය රට පුරා පැනවීම.

ආරක්ෂක අමාත්‍යාංශයේ තීරණයකට අනුව පොලිස්පති පූජිත් ජයසුන්දර මහතා අනිවාර්ය නිවාඩු යැවීම.

මැයි

මැයි 10

රටේ ප්‍රදේශ රැසක ඇති වූ ගැටුම්කාරී තත්ත්වයන් නිසා රට පුරා ඇඳිරි නීතිය පැනවීම.

මැයි 23

ජාතික බොදුබල සේනා සංවිධානයේ නායක ගලබොඩඅත්තේ ඥානසාර හිමිට ජනාධිපති සමාව යටතේ බන්ධනාගාරයෙන් නිදහස ලැබීම.

දප්පුල ද ලිවේරා මහතා නව නීතිපතිවරයා ලෙස ජනපති ඉදිරියේ දිවුරුම් දීම.

ජුනි

ජූනි 04

එක්සත් ජාතික පෙරමුණ ආණ්ඩුව නියෝජනය කළ සියලු මුස්ලිම් ඇමැතිවරු ධුරවලින් ඉල්ලා අස්වීම.

ජූනි 09

ඉන්දීය අගමැති නරේන්ද්‍ර මෝදි මහතාගේ මෙරට එක්දින සංචාරය

ජූනි 11

මූල්‍ය ආයතන වංචාවක් සම්බන්ධයෙන් සිර දඬුවම් හිමි වූ පෞද්ගලික පන්ති ගුරුවරයකු වන සක්විති රණසිංහ මහතාට උසාවි ඇප යටතේ නිදහස හිමිවීම.

ජූනි 17

එවක ජනාධිපති මෛත්‍රීපාල සිරිසේන මහතා සහ රුසියානූ ජනාධිපති බැලැඩ්මිර් පූටින් මහතා අතර හමුව.

ජූලි

ජූලි 26

ක්‍රිකට් ක්‍රීඩක ලසිත් මාලිංග එක්දින ක්‍රිකට් පිටියෙන් සමුගැනීම.

අගෝස්තු

අගෝස්තු 03

ඉන්ද්‍රාණි සේනාරත්න ගායන ශිල්පිනියගේ අභාවය

අගෝස්තු 05

හිටපු ඇමැතිවරයකු වූ කුරුණෑගල දිස්ත්‍රික් පාර්ලිමේන්තු මන්ත්‍රී සාලින්ද දිසානායක මහතාගේ අභාවය.

ලෝකයේ මවු කිරි ලබා දෙන රටවල් අතරින් පළමු ස්ථානය ශ්‍රි ලංකාවට හිමි වීම.

අගෝස්තු 12

ශ්‍රී ලංකා පොදුජන පෙරමුණේ ජනාධිපති ධූර අපේක්ෂක ලෙස ගෝඨාභය රාජපක්ෂ මහතා සහ එම පෙරමුණේ නායකයා ලෙස මහින්ද රාජපක්ෂ මහතා නම් කිරීම.

අගොස්තු 19

ජනතා විමුක්ති පෙරමුණ ඇතුළු සිවිල් සංවිධාන රැසක් සන්ධානගත වූ ජාතික ජනබලවේගය නම් දේශපාලන සංවිධානයේ ජනාධිපති අපේක්ෂකයා ලෙස ජනතා විමුක්ති පෙරමුණේ නායක අනුර කුමාර දිසානායක මහතා නම් කිරීම.

සෞරග්‍රහ මණ්ඩලයෙන් එපිට නව සෞරග්‍රහ මණ්ඩලයක් ඇති බව ශ්‍රී ලාංකික විද්‍යාඥ පිරිසක් විසින් සොයා ගැනීම.

අගෝස්තු 20

මේජර් ජනරාල් ශවේන්ද්‍ර සිල්වා මහතා නව යුද හමුදාපතිවරයා ලෙස පත්වීම.

අගෝස්තු 21

ජ්‍යෙෂ්ඨ පුවත්පත් කලාවේදිනියක් වූ ශ්‍රියා රත්නාකාර මහත්මියගේ අභාවය.

සැප්තැම්බර්

සැප්තැම්බර් 01

රටවල් 40 ක ඉස්ලාමීය බෝරා ප්‍රජාවගේ ලෝක සමුළුව කොළඹ දී ආරම්භ විය.

සැප්තැම්බර් 03

ප්‍රකට මහාචාර්යවරයකු සහ දේශපාලන ක්‍රියාකාරිකයකු වන මහාචාර්ය කාලෝ ෆොන්සේකා මහතාගේ අභාවය.

සැප්තැම්බර් 04

දිවයින පුවත්පතේ හිටපු ප්‍රධාන කර්තෘවරයකු වූ මෙරිල් පෙරේරා මහතාගේ අභාවය.

සැප්තැම්බර් 06

ශ්‍රී ලංකාවේ කොමියුනිස්ට් පක්ෂයේ ඉදිරි පෙළ නායකයකු වූ පාර්ලිමේන්තු මන්ත්‍රී චන්ද්‍රසිරි ගජධීර මහතාගේ අභාවය.

සැප්තැම්බර් 16

නෙළුම් කුලුන ජනසතු කිරීම.

ජනපති නිකුත් කළ විශේෂ ගැසට් පත්‍රයක් මගින් ජාතික රූපවාහිනි සංස්ථාව ආරක්ෂක අමාත්‍යාංශය යටතට පත් කරනු ලැබීම.

සැප්තැම්බර් 19

2019 ජනාධිපතිවරණය සඳහා වූ දින නියම කිරීමේ නිවේදනය මැතිවරණ කොමිසම විසින් නිකුත් කරනු ලැබීම.

සැප්තැම්බර් 22

එවක ජනාධිපති මෛත්‍රීපාල සිරිසේන මහතා සහ විපක්ෂ නායක මහින්ද රාජපක්ෂ මහත්වරු අතර මුහුණට මුහුණ හමුවීමකින් පසු ශ්‍රී ලංකා නිදහස් පක්ෂය සහ ශ්‍රී ලංකා පොදුජන පෙරමුණ අතර එකඟතාවක් ඇති කර ගැනීමට නායකයන් දෙපොළ අතර මූලික එකඟතාවක් ඇතිකර ගැනීම.

සැප්තැම්බර් 25

එක්සත් ජාතික පක්ෂය සිය ජනාධිපති ධුර අපේක්ෂකයා ලෙස සජිත් ප්‍රේමදාස මහතා නම් කිරීමට ඒකමතිකව තීරණය කළ අතර එහිදී පක්ෂයේ නායකයා ලෙස රනිල් වික්‍රමසිංහ මහතා දිගටම කටයුතු කළ යුතු බවට එකඟතාවක්ද ඇති විය.

සජිත් ප්‍රේමදාස මහතා තරග කරන දේශපාලන පක්ෂය නව ප්‍රජාතන්ත්‍රවාදී පෙරමුණ බවට එජාප නායකයන් අතර එකඟතාවට පැමිණීම.

සැප්තැම්බර් 27

දුම්රිය වෘත්තීය සමිති ආරම්භ කළ වර්ජන ක්‍රියාමාර්ගයකින් දුම්රිය ගමනාගමනය මුළුමනින්ම අඩාල වීම.

සැප්තැම්බර් 30

සති ගණනක් කොළඹ කොටුව දුම්රිය පොළ ඉදිරිපිට පැවැති ආබාධිත රණවිරුවන්ගේ උපවාසය අවසන් වීම.

ඔත්තෝබර්

ඔක්තෝබර් 07

ජනාධිපතිවරණය සඳහා නාම යෝජනා භාරදීම. මෙහිදි දේශපාලන පක්ෂ සහ ස්වාධීන අපේක්ෂකයන් 35 දෙනකු ජනාධිපතිවරණ තරග බිමට එක් වීම.

ඔක්තෝබර් 08

ජනාධිපතිවරණයේදී ශ්‍රී ලංකා නිදහස් පක්ෂයේ සහාය ගෝඨාභය රාජපක්ෂ මහතාට ලබා දීමට තීරණය කළ අතර ඒ පිළිබඳව රාජපක්ෂ මහතා සහ ශ්‍රීලනිපය අතර ගිවිසුම්ගත වීමට ද තීරණය වීම.

ඔක්තෝබර් 09

ශ්‍රී ලංකා පොදුජන පෙරමුණේ ජනාධිපතිවරණ මංගල රැළිය අනුරාධපුරයේදි පැවැත්වීම.

නව ප්‍රජාතන්ත්‍රවාදි පෙරමුණු ජනාධිපති ධුර අපේක්ෂක සජිත් ප්‍රේමදාස මහතාගේ ප්‍රථම ජනාධිපතිවරණ ප්‍රචාරක රැළිය ගාලුමුව දොරපිටියේදී පැවැත්වීම.

ඔක්තෝබර් 11

ඇල්පිටිය ප්‍රාදේශී‍්ය සභාව සඳහා පැවැත් වූ මැතිවරණයෙන් ශ්‍රී ලංකා පොදුජන පෙරමුණට විශිෂ්ට ජයක් හිමි විය.

ඔක්තෝබර් 17

යාපනය අන්තර්ජාතික ගුවන් තොටුපොළ ජනතා අයිතියට පත්වීම.

ඔක්තෝම්බර් 25

ගෝඨාභය රාජපක්ෂ මහතාගේ ප්‍රතිපත්ති ප්‍රකාශනය, රට හදන සෞභාග්‍යයේ දැක්ම, ප්‍රතිපත්ති ප්‍රකාශය ජනගත කිරීම.

ඔක්තෝබර් 30

ජනාධිපතිවරණයේ තැපැල් ඡන්ද විමසීම.

නොවැම්බර්

නොවැම්බර් 01

නව ප්‍රජාතන්ත්‍රවාදි පෙරමුණේ අපේක්ෂක සජිත් ප්‍රේමදාස මහතාගේ ප්‍රතිපත්ති ප්‍රකාශය එළිදැක්වීම.

නොවැම්බර් 07

කොළඹ පිටත වටරවුම මාර්ගයේ අවසාන කොටස වන කඩවත සිට කෙරවලපිටිය දක්වා කොටස සහ දක්ෂිණ අධිවේගී මාර්ගයේ සූරියවැව දක්වා කොටස ජනතා අයිතියට පත් කිරීම.

නොවැම්බර් 13

ජනාධිපතිවරණයේ පූර්ව ප්‍රචාරක කටයුතු නිමාවට පත්වීම.

නොවැම්බර් 16

ජනාධිපතිවරණය පෙ.ව 7.00 ට ආරම්භ වී පස්වරු 5.00 අවසාන විය. මෙදින පැවැති මැතිවරණයෙන් 52% ඡන්ද ප්‍රතිශතයක් ලබා ගනිමින් ගොඨාභය රාජපක්ෂ මහතා ජනාධිපති ධුරයට තේරී පත්විය.

නොවැම්බර් 18

නව ජනාධිපතිවරයා ලෙස ගොඨාභය රාජපක්ෂ මහතා අනුරාධපුරයේදී දිවුරුම් දීම.

නොවැම්බර් 20

ජනාධිපති ගොඨාභය රාජපක්ෂ මහතා තම රාජකාරී කටයුතු නිල වශයෙන් ආරම්භ කරනු ලැබීම.

නොවැම්බර් 21

14වන අගමැතිවරයා ලෙස මහින්ද රාජපක්ෂ මහතා ජනාධිපතිතුමා ඉදිරියේ දිවුරුම් දීම.

දෙසැම්බර්

දෙසැම්බර් 01

වැට් ඇතුළු වක්‍ර බදු ඉවත් කිරීමට රජය තීරණය කරයි.

දෙසැම්බර් 02

පාර්ලිමේන්තුවේ සැසිවාරය ජනාධිපති ගෝඨාභය රාජපක්ෂ මහතා විසින් අවසන් කිරීම.

මහාචාර්ය විනී විතාරණ මහතාගේ අභාවය.

දෙසැම්බර් 04

පාර්ලිමේන්තු මන්ත්‍රී රංජිත් සොයිසා මහතාගේ අභාවය

දෙසැම්බර් 07

ලෝක විවාහක රූ රැජින ලෙස ශ්‍රී ලංකාවේ කැරොලයින් ජූලි මහත්මිය පත්වීම.

දෙසැම්බර් 10

ශ්‍රී ලංකාවට විශිෂ්ට ජයග්‍රහණ අත්පත් කර දුන් නේපාලයේ පැවැති සාග් ක්‍රීඩා උළෙල නිමාවට පත්වීම.

පාර්ලිමේන්තු මන්ත්‍රී සජිත් ප්‍රේමදාස මහතාට විපක්ෂ නායක ධූරය ලබා දීමට එක්සත් ජාතික පක්ෂය තීරණය කළ අතර ඒ බව දන්වමින් පක්ෂ ලේකම් අකිල විරාජ් කාරියවසම් මහතා විසින් කතානායක කරු ජයසූරිය මහතා වෙත ලිපියක් යොමු කරයි.

දෙසැම්බර් 18

වාහන අනතුරක් සම්බන්ධව ජාතික හෙළ උරුමයේ නායක හිටපු ඇමැති පාඨලි චම්පික රණවක මහතා රිමාන්ඩ් බන්ධනාගාරගත කිරීම.

දෙසැම්බර් 23

දිස්ත්‍රික්ක දහතුනක ඇති වූ අයහපත් කාලගුණය තත්ත්වය නිසා ගංවතුර තත්ත්වයක් ඇතිවීම සහ වසර ගණනකට පසු සියලු ජලවිදුලි උත්පාදන ජලාශ සියයට අසූව ඉක්මවූ ජල ප්‍රමාණයකින් පිරී යෑම.

දෙසැම්බර් 30

හිටපු ඇමැති රාජිත සේනාරත්න මහතා අධිකරණය ඇප මත නිදහස් කිරීම.

සටහන

උදිත ගුණවර්ධන

මදාරා මුදලිගේ

ඡායාරූප ලේක්හවුස් මාධ්‍ය පුස්තකාලයෙනි

පීටර් සෝයර් බීගල්

• ඔබට කතුවරයකු වීමට අවශ්‍ය වුණේ කුමන කාලයේද?

මට අකුරු ලිවීමටත් බැරි කාලයේ ඉඳන් ම තමයි රචකයකු වීමට අවශ්‍ය වුණේ. මම කුඩා අවධියේදී, මවිසින් ම ගොඩනගපු විවිධ කතා කීමට මම පුරුදුවෙලා හිටි බව මගේ අම්මා මට කියලා තියෙනවා. ඊට පස්සේ මම අම්මට කියනවලු, ඒ කතාව ලියන්න කියලා. කොහොමහරි මම ටිකෙන් විට වැඩිමහල් වන විට මගේ ලිවීමේ ආශාවට වඩා සංගීතය කෙරෙහි ලැදියාව වැඩි වුණා. මම අදටත් සිහින දකින්නෙ, Chet Atkins, Jerry Reed, Marcel Dadi වගේ ජෑස් ගිටාර් වාදකයකු වීමටයි. කතා නිර්මාණය සහ ලිවීමටත් මම දැඩි ලෙස ඇලුම් කරනවා. මම මේ කටයුතු දෙකම සමබරව කරගෙන යනවා. මගේ කතාවල විශේෂත්වය වෙන්නේ, ඒවා බොහොමයක් සංගීතය පසුබිම් කරගත් කතා වීමයි.

• ඔබ විශ්වවිද්‍යාල අධ්‍යාපනය ලබමින් සිටින අතරතුරත් ලිවීමේ කටයුතුවල නිරත වුණා නේද?

ඔව්. මම එහිදීත් ලිවීමේ කටයුතු දිගින් දිගටම කළා. එවකට නිර්මාණාත්මක රචනය පිළිබඳ හොඳ ම සාහිත්‍යවේදියාට හිමි සාහිත්‍ය සම්මානය නොකඩවා හිමි වුණේ මට. ඒත් මම මේ හේතුව නිසා, විශ්වවිද්‍යාල අධ්‍යාපන කටයුතු කිසි විටෙකත් අතපසු කර ගත්තේ නෑ .

• සංගීතය සහ ලිවීම ඔබට අනුව එකිනෙකට සම්බන්ධ වෙන්නේ කොහොමද ?

මම සාමාන්‍යයෙන් ගොඩනගන හැම සිදුවීමක්ම සංගීතමය ආකාරයකින් තමයි දකින්නේ. විශේෂයෙන්ම ජෑස්. මම වැඩක් කරන වෙලාවකට සංගීතයට, ගීතයකට සවන් දෙන්නේ නැහැ. මට ඒ වෙලාවට ඇසෙන එක ම දේ, පරිසරයේ විවිධාකාර සංගීත රටා සහ මගේ මනස තුළ නිර්මාණය වන සංගීතය විතරයි. එය මගේ මනස එක තැනකට ගෙන එන අතර ම, මගේ ලිවීම රටාවකට සකසනවා.

• ඔබ වාදනය කරන සංගීත භාණ්ඩ මොනවද ?

මම පියානෝ සංගීතය කියවීමට ඉගෙන ගෙන තිබෙනවා. ඒත් මට පියානෝව වාදනය කිරීමට නම් හැකියාවක් නැහැ. ගිටාරය තමා මම වාදනය කරන එක ම සංගීත භාණ්ඩය. ගායනය තමා මගේ එක ම විනෝදාංශය සහ සතුට.

• ඔබගේ පළමු ග්‍රන්ථය කුමක්ද?

‘අ ෆයින් ඇන්ඩ් ප්‍රයිවට් ප්ලේස්’ (A Fine and Private Place) කෘතිය තමා මම පළමුවෙන්ම රචනා කර ප්‍රකාශයට පත් කළේ. ඒ 1960දී. එතකොට මට වයස අවුරුදු 19යි. මගේ ආරම්භය ඉතාමත් සාර්ථකයි.

• ඔබ මේවනවිට කොපමණ ග්‍රන්ථ ප්‍රමාණයක් රචනා කර තිබෙනවාද?

1960 ආරම්භයෙන් පසු මේ දක්වා එක දිගට මං ලිවීමේ කටයුතු කළා. මේ දක්වා මං නවකතා, ප්‍රබන්ධ නොවන කතා 30කට අධික සංඛ්‍යාවක් රචනා කර තිබෙනවා. ‘අයි සී බයි අවුට්ෆිට්’-1965, ‘ද ලාස්ට් යුනිකොර්න්’-1968, ‘ද කැලිෆෝර්නියා ෆීලින්ග්’-1969, ‘ලීලා ද වර්වොල්ෆ් ‘-1974, ‘අමෙරිකන් ඩෙනිම්’-1975, ‘ද ලේඩි ඇන්ඩ් හර් ටයිගර්’-1976, ‘ද ගාර්ඩ්න් ඔෆ් ද ඩිලයිට්ස්’-1982, ‘ද ෆෝල්ක් ඔෆ් ද එයාර්’-1986, ‘ද ඉන්කීපර්’ස් සෝන්ග්’-1993, ‘ද යුනිකොර්න් සොනාටා’-1996, ‘ගියන්ට් බෝන්ස්’-1997, ‘ටැම්සින්’-1999, ‘අ ඩාන්ස් ඔෆ් එමීලියා’-2000, ‘ද ලයින් බිට්වීන්’-2006, ‘රිටන්’-2010’, ‘සමර්ලොන්ග්’-2016’ යනාදී කෘති ඉන් කිහිපයක් විධිහට දක්වන්න පුළුවන්. ඒ වගේ ම, මම කර්තෘවරයකු ලෙස තවත් ප්‍රකාශන 4ක් පමණ රචනා කර තිබෙනවා. ඊට අමතරව දෘශ්‍ය ග්‍රන්ථ 5ක් ප්‍රකාශයට පත් කර තිබෙනවා. මට මේවා වෙනුවෙන් ගෞරව සහ සම්මාන බොහෝ ප්‍රමාණයක් හිමිව තිබෙනවා. ‘Locus Award, Hugo Award, Nebula Award, Inkpot Award, WSFA Small Press Award’ ඉන් කිහිපයක්.

• මේ සියලු ග්‍රන්ථ අතරින් ඔබව වඩාත් ප්‍රසිද්ධියට පත් වුණේ 1968දි ඔබ විසින් ප්‍රකාශයට පත්කරන්නට යෙදුණු ‘ද ලාස්ට් යුනිකොර්න්’(The Last Unicorn) කෘතිය හරහා යැයි කිව්වොත් ඔබ එකඟ වෙනවාද?

අනිවාර්යෙන්ම. මං මෙතරම් පොත් ප්‍රමාණයක් රචනා කර තිබුණත්, ඒවා කෙතරම් ජනප්‍රිය වුණත්, අදටත් මගේ නාමය පාඨකයන් අතර නිතර කියවෙන එක හේතුවක් විධිහට, මේ ග්‍රන්ථය සඳහන් කරන්න පුළුවන්. ඒක නවකතාවක්. 1987 වසරේදී ‘ලුකස්’නම් සුප්‍රසිද්ධ සඟරාවට අනුව මේ කෘතිය ‘සර්වකාලීන හොඳ ම කල්පිත නවකතාව’ ලෙස ලෝකයේ හොඳ ම කෘති 33ක් අතරින් 5ස් වැනි ස්ථානය හිමිකර ගත්තා. ඒ වගේම, 1998දි සිදු කරන ලද මත විමසුමකදී, ලොව හොඳ ම ග්‍රන්ථ අතරින් 18 වැනි ස්ථානය ලැබුවා. මෙය, මට වැඩි ම ගෞරව සම්මාන ප්‍රමාණයක් වගේ ම, ඇගැයීම්, ප්‍රශංසා, විචාර ලැබුණු කෘතියක්. මේ නිසාම, මෙහි තවත් කොටස් කිහිපයක්ම ප්‍රකාශයට පත් කරන්න සිදු වුණා. ‘ද යුනිකොර්න් සොනාටා’-1996, ‘ද ලාස්ට් යුනිකොර්න් : ද ලොස්ට් වර්ෂන්’-2007, සහ The First Last Unicorn and Other Beginnings, forthcoming, The Last Unicorn, abridged යනාදී කොටස් එයට එක්කරමින්, කොටස් කිහිපයක් රචනා කළා. ඒ වගේම මේ කෘතියෙහි නමින්ම ඇනිමේෂන් සිනමාපටයක් පසුකාලීනව නිර්මාණය වුණා. ඒ 1982 වර්ෂයේදී. එහි තිරපිටපත රචනා කළෙත් මා විසින්ම වීම තවත් විශේෂත්වයක්.

• ඔබගේ ‘සමර්ලෝන්ග්(Summerlong)’ කෘතියත් බෙහෙවින් ජනප්‍රිය වුණ තවත් කෘතියක්. එය ලිවීම සඳහා පාදක වෙන්නේ මොන වගේ තේමාවක්ද?

මම අවුරුදු 6 ක් පමණ සියැටල් නගරයේ ජීවත් වුණා. එහිදී වෙරළ ආශ්‍රිත පරිසරය සහ එහි ජනතාවගේ වෙනස්කම්, හැසිරීම් මගේ හිතේ සටහන් වී තිබුණා. පසු කලෙක ඒ පරණ මතක ඇසුරින් ඒ පරිසරයත් බද්ධ කරගෙන තමා ‘සමර්ලෝන්ග්’ නිර්මාණය වුණේ. ‘සමර්ලෝන්ග්’ කියන්නේ මගේ සාමාන්‍ය ලියන රටාවෙන් මදක් වෙනස් වූ රචනයක්. මම මීට පෙර රචනා කර තිබූ නිර්මාණ, කල්පිත ගණයේ ඒවා වුණත්, මේ කෘතිය සත්‍ය පරිසරය සහ සිදුවීම් පදනම් කරගෙන නිර්මාණය වූවක්. කෙසේ වෙතත් මම සිතුවාටත් වඩා හොඳ ප්‍රතිචාර එයට ලැබුණා.

• නවකතා රචනයට අමතරව තිර පිටපත් රචනයත් ඔබ කරගෙන යනවා. මේ සඳහා යොමු වුණේ කොහොමද?

මේ අවුරුදු කිහිපයටම මම තිර පිටපත් ඉතා සුළු ප්‍රමාණයක් තමා රචනා කර තියෙන්නේ. මට නම් දැනෙන්නේ, තවම මම ඒ සඳහා නවකයෙක් විධිහටයි. මේ සඳහා යොමු වෙන්නේ, මගේ මිතුරාගේ පෙරැත්තය මතයි. එය වෙනත්ම විෂයයක්. මම ඒ පිළිබඳ තවමත් ඉගෙන ගනිමින් සිටින්නේ. ‘ද ඩව්’, ‘ද ලෝර්ඩ් ඔෆ් ද රින්ග්ස්’, ‘අ ටේල් ඔෆ් ඊජිප්ට්’, ‘අ වේල් ඔෆ් අ ටේල්’ මා විසින් තිර පිටපත් රචනා කළ නිර්මාණ කිහිපයක්.

‘මොට්ටැක්කිලිය’ දමිළ භාෂාවෙන් ලියැවුණු කෙටිකතා එකතුවක සිංහල පරිවර්තනයකි. පරිවර්තක ලේඛකයා මොහොමඞ් රාසූක් ය. රාසූක් දමිළ මාධ්‍යයෙන් අධ්‍යාපනය ලැබූ, ස්වෝත්සාහයෙන් සිංහළ භාෂාව මැනවින් ප්‍රගුණ කළ ලේඛකයෙකි. සිංහල ලේඛකයන් සමඟ එක්වෙමින් දෙමළ කෙටිකතා හා නවකතා කිහිපයක් ම සිංහල භාෂාවට පරිවර්තනය කිරීමට දායකවී ඇති අතර, තමන්ගේ ම පරිවර්තන කෘති කිහිපයක් ම රචනා කළ, රාජ්‍ය සාහිත්‍ය සම්මාන ලාභියෙකි.

‘මොට්ටැක්කිලිය’ ඔහුගේ මෑත භාගයේ ප්‍රකාශයට පත්කළ පරිවර්තන කෘතියයි. දමිළ හා මුස්ලිම් සමාජයේ කාන්තාවන්ගේ ජීවිතයේ විවිධාකාර වූ පැතිකඩ හා සිංහල, දමිළ, මුසල්මානු සංස්කෘතික වටිනාකම් පිළිබඳ සිංහල සමාජයට කිසියම් අවබෝධයක් ලබාදීම පරිවර්තකයාගේ අරමුණවී ඇති බව පෙනේ. කුමන ජාතියක වුව ද, කාන්තාවගේ බොහෝ ප්‍රශ්න කාන්තාවකට පොදු කාරණා ලෙස හඳුනා ගන්නට ද මඟ පෙන්වයි. සෑම කථාවක ම මතුකරන්නට උත්සාහ කරන ප්‍රශ්නය හෝ ගැටලුව මඟින්, වාර්ගික සබඳතා මැනවින් ප්‍රකාශ කෙරේ. ඒ සඳහා තෝරාගත් දමිළ හා මුස්ලිම් ලේඛකයන් කිහිප දෙනකු වෙතින් කෙටිකතා කිහිපය ප්‍රශස්ත ය.

විශේෂයෙන් යෞවනය, බිරිය, මව, මේ කුමන ඉසව්වක් පසු කළ ද, මොනයම් හෝ වාර්ගිකත්වයකට උපත නිසා ඇය හිමිකම් කියනු ලැබූව ද, මේ සෑම අවස්ථාවක ම පොදු බව මඟහැරීමට නොහැකි බව මේ කෙටිකතා සංග්‍රහයේ කථා කිහිපයක් ම පසක් කරයි. එසේ ම, වාර්ගික ලෙස කිනම් ජාතියකට දාව ඉපදුණ ද, අනෙක් වාර්ගික අසල්වැසියා හා පවතින අසල්වැසි හා මිත්‍රශීලී සබඳතාව මොන තරම් නිර්ව්‍යාජ බැඳීමක් ද යන්න ‘ආයිසා ආච්චි’ කථාව ගෙනහැර දක්වයි.

ජාතීන් අතර මිත්‍රත්වය, අන්‍යෝන්‍ය අවබෝධය, සංස්කෘතික වෙනස්කම් පිළිබඳ අවබෝධය, බහුවාර්ගික, බහු ආගමික අප වැනි රටක, ජාති අතර සංහිඳියාව ගොඩනැඟීමේ දී වැදගත් බව විශේෂයෙන් පැහැදිළි කළ යුතු නොවේ. මේ දමිළ කෙටිකථා කිහිපය සිංහල පාඨකයන් අතරට පත් කිරීමේ දී, ඒ අරමුණ සඳහා ම වූ උත්සාහයකින් මොහොමඞ් රාසූක් කටයුතු කළා ද යනුවෙන් අවබෝධයක් නොමැති වුව ද, කෙටිකතා සංග්‍රහය ඒ සඳහා වූ විශිෂ්ට ප්‍රයත්නයක් බව නම් කිව යුතු ය.

‘රේල්වේ ස්ටේෂන් ’ කෙටි කතාවේ දී සිංහල, දෙමළ, වාර්ගික ජන කොටස් යුද්ධයට පෙර එක ම බිම් ප්‍රදේශයක ජීවත් වෙමින්, ජීවන අරගලයට පුංචි දරු පැටවුන් පවා සමීපව සහසම්බන්ධවූ අයුරු මනා ලෙස පැහැදිලි කරන්න උත්සාහ දරා ඇත. එය අතිශයෝක්තියෙන් ගහන නොවන බව කථාවේ කථානායකයා කරුණාරත්නගේ සංවාදය පැහැදිළි කරයි. යුද්ධයට පෙර ජාතීන් අතර, සබැඳියාව පිළිබඳ මනා චිත්‍රයක් පාඨකයා තුළ මවන අතර, කෙටිකතාව යුද්ධයේ භීෂණය පමණක් නොව, විනාශය සංකේතවත් කරනුයේ කරුණාරත්න දුටු දැරියගේ ගෙල දවටා තිබුණු පතරොම් වැලයි.

සෑම කථාවකින් ම ප්‍රකාශ වනුයේ ජාතීන් අතර පැවැති සබැඳියාව හා යුද්ධය විසින් මේ සමාජයට අත්කර දුන් විනාශය සහ යහපත් සමාජයක් විනාශ කරන්නට දායක වූ ආකාරය ය.

සංහිදියාවෙන් පිරුණු රටක ලේඛන කලාව තුළ පැවතිය යුතු ගුණාංග, ඒ ඒ ජාතීන්ගේ සංස්කෘතික ඇවැතුම් පැවතුම් පිළිබඳ එකිනෙකා තුළ පැවැති අවබෝධය, මේ කෙටිකතා වැල තුළ අපුරුවට පෙළගස්වා ඇත. පොත තුළ එසේ පෙළගස්වා තිබුණ ද, අද සමාජය එකිනෙකා සැක කරන, එකිනෙකාට වෛර කරන දේශයක වැසියන් බවට පත් වූයේ, කවර විපාකයකින් ද යන්න නම් කථානායකයන් සෘජුව ප්‍රකාශ කරන අවස්ථා විරල ය. එසේ වුව ද, සිදුව ඇති විනාශයේ ගැඹුර අවම කරන්නට, පිළිතුරක් සොයා යන්නට පාඨකයාගේ මනස තුළ යම් දෘෂ්ටිමය අවකාශයක් නිර්මාණය වන්නට පවතින ඉඩකඩ බෙහෙවින් පුළුල් බව සටහන් කිරීම වැදගත් යැයි සඳහන් කළ යුතු ය.

කෙටිකතාවල මුල් රචකයන් හඳුන්වා දීමේ දී, ඔවුන්ගේ නිර්මාණ නාමවල සිංහල තේරුම සටහන් කළා නම්, කෘතියට තවත් වටිනාකමක් එකතු වනු නො අනුමාන ය.

පාසල, විශ්වවිද්‍යාල තුළ සාහිත්‍යමය හා සංස්කෘතිමය විෂයධාරා තුළ මෙවැනි කෘති පරිශීලනය කරන්නට, සංවාදයට ලක්වෙන අවස්ථා පුළුල් කිරීමට බලධාරීන් යොමුවිය යුතු ය.

ඒ සඳහා මොහොමඞ් රාසූක් හා තවත් එවැනි ලේඛකයන්ගේ, ‘මොට්ටැක්කිලිය’ වැනි නිර්මාණශීලී ප්‍රකාශන, රටට වඩ වඩාත් අවැසි වටපිටාවක් නිර්මාණය වී තිබෙන බව ද, රටවැසියන් වූ අප තේරුම් ගත යුතු ය.

ධර්මසිරි ලංකාපේලි

සේන තෝරදෙණිය මහතාගේ ආඛ්‍යාන රීතිය නවකතාකරුවන්ගේ අවධානයට ලක් විය යුතු සාධකයකි. ඔහු ප්‍රධාන චරිතය කරලියට ගෙනෙන්නේ සෙසු චරිත තුනක් ඔස්සේ ය. මේ අනුව පැතිකඩ තුනකින් ප්‍රධාන චරිතය විවරණයට ලක්වෙයි. මෙය දුෂ්කර කාර්යයෙකි. කතුවරයා සිය විග්‍රහය සඳහා තෝරාගෙන ඇති විෂය ක්ෂේත්‍රයද සංකීර්ණ ය.

සේන තෝරදෙණිය මහතාගේ “නිමල මල” ප්‍රබන්ධය දේශපාලන නවකතාවක් ලෙස හඳුන්වා ඇත. එහි අන්තර්ගතය ගතහොත් මූලික කොටස් දෙකකින් සමන්විත ය. පළමුව මේ කෘතිය තෝරාගත් කාල පරාසයක දේශපාලන සංසිද්ධීන් විවරණය කරයි. දෙවනුව උසස් හමුදා නිලධරයකුගේ මනුෂ්‍යත්වය, උදාරත්වය හා බුද්ධිමත්භාවය නිරූපණය කරයි. උක්ත සාධක දෙක කෙරෙහි අවධානය යොමු කරන කල පෙනී යන්නේ, විද්වත් සංවාදයකට අවශ්‍ය උත්තේජනය එහි පවතින බව ය. නිර්දය විවේචනයක් ද සහිත ව දේශපාලන සිද්ධි විග්‍රහයට ලක් කරන කතුවරයා, සත්‍ය සිදුවීම් හා සැබෑ චරිත ඒ සඳහා පාදක කර ගනී. ඔහු කිසිඳු පැකිලීමකින් තොරව දේශපාලන නායකයන් හා ඔවුන්ගේ තීන්දු - තීරණ දැඩි ලෙස විවේචනය කරයි. දේශපාලන ලියුම්කරුවන් පවා එබඳු විවේචන ඉදිරිපත් කරන්නේ කලාතුරෙකින් ය. මෙහි එන හමුදා නිලධරයා පවා සැබෑ චරිතයක් බව පෙනී යයි. යුද හමුදාව පිළිබඳ කරුණු දන්නා කෙනකුට නම් කිහිපයක් සිහිපත් විය හැකි ය.

කොටි ත්‍රස්තවාදය හා තිස් අවුරුදු යුද්ධය ශ්‍රී ලංකාවේ ගමන් මඟ වෙනස් කළ ප්‍රධාන සාධක දෙකකි. මේ සාධක දෙක අතහැර මෑත කාලීන දේශපාලනය ගැන කතා කිරීම අසීරු ය. ඉහත සාධක දෙක එකිනෙකට අන්තර්පරායන ලෙස බැඳී පවතී. මේ සම්බන්ධයේදී වැදගත් වන අතුරු මාතෘකා කිහිපයක් ද තිබේ. සාම සාකච්ඡා, සටන් විරාම ගිවිසුම්, සාම වෑයම්, මානව හිමිකම් පිළිබඳ චෝදනා, ජාත්‍යන්තර බලපෑම් හා රාජ්‍ය නොවන සංවිධානවල ඇඟිලි ගැසීම් ඒ අතර ප්‍රධාන වෙයි. කතුවරයා එම සිදුවීම් සියුම් ව නිරීක්ෂණය කරන අතර, දේශපාලන දැක්මක් සහිත ව තාර්කික විවේචනයකට හසුකරයි.

“මෙහෙම දේශපාලන නායකත්වයක් එක්ක ද යුද්ධ කරන්නෙ?”

(පිටුව 164)

තමුසෙ නේද කළු කණ්ණාඩි දාගෙන මිස්ටර් බීන්ට මුහම්මාලේ නෝ මෑන්ස් ලෑන්ඩ් එක පෙන්නුවෙ? කොටින්ට එන්ඩ තියෙන්නෙ තව ටිකයි කියල පෙන්නුව ද?

(පිටුව 146)

ඉහත උපුටන දෙක සජීවී සංවාදයක කොටසක් බව හැ‍ඟෙයි. එය ටිකක් කියා හුඟාක් හඟවන වාක්‍ය කිහිපයකි. කතුවරයා සිය ප්‍රබන්ධය උදෙසා සැලකිය යුතු අධ්‍යයනයක යෙදී ඇති බව පෙනෙයි. සටන් විරාම සමයකදී අගමැති ලෙස ක්‍රියා කළ රනිල් වික්‍රමසිංහ මහතාට හමුදා සෙබළුන්ගෙන් ද, හමුදා නිලධාරීන්ගෙන් ද එල්ල වූ විරෝධය හා විවේචනය පළමු පාඨයෙන් පැහැදිලි වෙයි. දෙවන පාඨය එවකට ජනාධිපතිනිය වූ චන්ද්‍රිකා බණ්ඩාරනායක මැතිනියගේ ප්‍රකාශයකි. ජනාධිපතිනිය එක්සත් ජාතික පක්ෂ ආණ්ඩුවේ අමාත්‍යාංශ තුනක් පවරා ගැනීමට පෙර පැවැති සාකච්ඡාවකදී ඉහත ප්‍රකාශය කර ඇති බව ප්‍රකට ය. කතුවරයා ඇතැම් දේශපාලන සිදුවීම් පිළිබඳ ගැඹුරු සොයා බැලීමක් සිදුකර තිබේ.

මේ නවකතාව කියවාගෙන යන විට දේශපාලකයන්ගේ අමන තීන්දු පිළිබඳ බලවත් කලකිරීමක් ද යුද්ධය ජයග්‍රහණය කොට ජාතියට නිදහස උරුම කර දෙන්නට ජීවිත පරිත්‍යාගයෙන් ක්‍රියා කළ සෙබළුන් පිළිබඳ ගෞරවයක් ද ඇතිවීම වැළැක්විය නොහැකි ය. දේශපාලන විවේචනයේදී කතුවරයා කොන්දේසි විරහිත ව ක්‍රියා කරන බව ද පෙනී යයි.

“උපාලි අයිය කියන්නෙ පාර්ලිමේන්තුවට බෝම්බ ගහපු සාමාන්‍ය මිනිස්සුන්ගෙ අයිඩෙන්ටිටි කාර්ඩ් එකතු කරල විනාශ කරපු, රත්තරන් කොල්ල කාපු, බස් ගිනි තියාපු, බැංකු කඩාපු, කෘෂි සේවා මධ්‍යස්ථාන විනාශ කරපු, තේ පැක්ටරි ගිනි තියාපු, ඡන්දෙ දෙන්ට ආව අසරණයන්ට වෙඩි තියාපු අය සාමකාමී දේශපාලනයකට එනව කියල ද?”

(පිටුව 97)

ඉහත විවේචනය එල්ලවන්නේ ජනතා විමුක්ති පෙරමුණ වෙත ය. විවේචනය සත්‍යයක් වී නැත. ඉදිරියේදී එවැන්නක් සිදුවන බවක් ද පෙනෙන්නට නැත. එහෙත් කතුවරයා නිරූපණය කරන කාල පරිශ්‍රය තුළදී ජනතා විමුක්ති පෙරමුණු පිළිබඳ ඉහත හැඟීම් යුක්ති සහගත බව කිව හැකි ය. මහජනයාගේ පොදු හැඟීමද එය ම විය.

කතුවරයා සිය දේශපාලන විවරණය පරිපූර්ණ එකක් බවට පත් කිරීම සඳහා පරිශ්‍රමයක් දරා ඇත. නිදසුනක් ගතහොත් උතුරේ සන්නද්ධ කල්ලි ඇතිවීම හා ඒවායේ ව්‍යාප්තිය පිළිබඳ සංක්ෂිප්ත විවරණයක් ද මීට ඇතුළත් ය. නවකතාවකින් එවැන්නක් ඉදිරිපත් කිරීම අසීරු ය. එය කතා රසයට බලවත් බාධාවකි. එහෙත් ඔහු දේශපාලන සංවාද යන උපාය මාර්ගය ඔස්සේ එය ජයගැනීමට උත්සුක වී ඇත. ‘85’ පිටුවේ ඇති විස්තරය ඊට කදිම නිදසුනකි.

“1977 දී එක්සත් ජාතික පක්ෂය බලයට පත්වීමත් සමඟම උතුරු හා නැ‍ඟෙනහිර දෙමළ බෙදුම්වාදීන්ගේ ක්‍රියා වැඩිවන බවක් පෙනිණි. බැංකු කොල්ලකෑම්, ඇව්රෝ ගුවන් යානයකට ප්‍රහාර එල්ල කිරීම, යුද හමුදා හා නාවික හමුදා ඛණ්ඩවලට ප්‍රහාර එල්ල කිරීම මේ අතර විය...

මේ කොටස ඉදිරිපත් වන්නේ උපාලි නම් චරිතයේ ස්මරණයක් හැටියට ය. ඔහු ජයසංඛ පිළිබඳ මතකය අවදි කරන්නේ, යුද්ධය පිළිබඳ සිදුවීම් ද ඊට එකතු කරමින් ය. එය තාර්කික වන්නේ වුව ඇතැම් විස්තර දීර්ඝ ය. නීරස ය. නවකතාවක මූලික අර්ථයට හානිදායක ය. නවකතාකරුවා මරාගෙන කතුවරයා තුළ ජීවත්වන දේශපාලන විචාරකයා ඉස්මතු වන බවක් පෙනෙ යි.

නිමල මල නවකතාවේ ප්‍රධාන චරිතය ලෙසින් සැලැකිය හැකි ජයසංඛ නම් හමුදා නිලධාරියාගේ චරිතය ගොඩනඟා ඇත්තේ ඉතා පරෙස්සමෙන් ය. ඔහු රටට හා ජාතියට ආදරය කරන බුද්ධිමත් හා නිර්භීත මිනිසකු ලෙස නිරූපණය වෙයි. පාඨකයා තුළ ඔහු පිළිබඳ මහත් ගෞරවයක් උපදී. ජයසංඛ කිසිවිටෙක හමුදා රහස් හෙළි කරන්නේ නැත. එලෙස ම කිසිවිටෙක හමුදාව අවතක්සේරු කරන්නේ ද නැත.

“ජයසංඛත් ලංකාවෙ ඉතිහාසය නැවත ලියන්ට හවුල් වෙලා තියෙනවා”

“අපේ හැම සොල්දාදුවෙක් ම!”

(පිටුව 171)

යුද ජයග්‍රහණයේදී හා දෙමළ ත්‍රස්තවාදය පරාජය කිරීමේ දී උසස් හමුදා නිලධාරීන් එහි ගෞරවය තමන් වෙත පවරා ගැනීම සාමාන්‍ය සිරිත වෙයි. එකිනෙක හමුදා නිලධාරීන් අතර මේ පිළිබඳ වාග් සංග්‍රාම පැවැති බව රහසක් නොවේ. දේශපාලකයන් අතර ද එවැනි දේ පැවැතිණි. එහෙත් ජයසංඛ යුද ජයග්‍රහණය සලකන්නේ සාමූහික ප්‍රයත්නයක ප්‍රතිඵලය හැටියට ය. ඔහු සතු උදාර ගතිය එයින් ප්‍රකට වෙයි. ඒ පමණක් නොව; දෙමළ ජනතාව කෙරෙහි වෛරයක් ද ජයසංඛ තුළ නැත. ඔහු මේ ක්‍රියාදාමය විග්‍රහ කරන්නේ දේශපාලන වැරැද්දක් හැටියට ය.

ජයසංඛගේ චරිතය නිරූපණය වන්නේ උපාය මාර්ග කිහිපයක් භාවිත කරමින් ය. ඔහු චරිතයක් ලෙස වෙනම නවකතාවට සහභාගී වන්නේ නැත. උපාලි, මෙලීනා, චිත්‍රා යන ප්‍රධාන චරිත තුන ජයසංඛ පිළිබඳ ගෙන එන ස්මරණ හා සංවාද ඔස්සේ ජයසංඛ නිරූපණය වෙයි. උපාලි යනු ජයසංඛගේ මස්සිනා ය. චිත්‍රා යනු ‍සහෝදරිය වෙයි. මෙලීනා ජයසංඛගේ හිතවතියකි. දෙදෙනා අතර පැවැති සමීප සම්බන්ධයෙන් පෙනී යන්නේ ඔවුන් වැඩිහිටි ප්‍රේමයක පැටලී සිටි බව ය. මේ දෙදෙනාගේ සම්බන්ධයෙන් මනුෂ්‍යත්වය පිළිබඳ බොහෝ කරුණු හෙළිදරව් වෙයි.

13 වැනි පරිච්ඡේදය හඳුන්වා ඇත්තේ “නොදන්නෙමි කියන නම අහන්නට කෙනකු නැත” ‍යන ලෙසින් ය. එම කොටස ඉදිරිපත් වන්නේ මෙලීනාගේ ප්‍රකාශනයක් හැටියට ය. මේ පරිච්ඡේදයෙහි රිද්මය, ශෛලිය හා පෙළගැස්ම ආකර්ෂණීය වෙයි. කතුවරයා සතු භාෂා ඥානය ද මෙහි ලා සනාථ වෙයි. අතිශය සං‍වේදී ප්‍රකාශනවලින් සමන්විත එම කොටස ගීතයක් සේ ගලා යයි.

“අප දෙදෙනා අතර ඉතා විසිතුරු චමත්කාරජනක මිත්‍රත්වයක් තිබිණ. එම මිතුදහමේ කිසිදු බන්ධනයක් නොවීය. දෙදෙනාටම එහි කිසිම අපේක්ෂාවක් නොවීය. මේ මිතුදම අප දෙදෙනාටම යහපත් එකක් වූ බව මම දැන සිටියෙමි. මගේ ජීවිතයේ වූ අඳුරු කාලවලදී ඔහු මට ශක්තිය හා ධෛර්යය ලබාදුන්නේ ය. මගේ ජීවිතය බොහෝ අතින් සාරවත් කළේ ය. මා සිතන්නේ ඒ අනුව බලන කල්හි ඔහුගේ ජීවන අරගලවලදී මා කර ඇත්තේ ඉතා සුළු උපකාරයක් බවයි.”

(පිටුව 309)

මෙලිනා පිළිබඳ පූර්ණ වැටහීමක් කරා ද, දෙදෙනාගේ ආධ්‍යාත්මික බැඳීම පිළිබඳ අවබෝධයක් කරා ද පාඨකයා ගෙනයෑමට කතුවරයා සංයමයකින් යුතුව වචන හසුරවන ආකාරය සුන්දර ය. නවකතාවේ එන චමත්කාරයෙන් පිරුණු කොටස මේ පරිච්ඡේදය යැයි සිතේ. මෙලීනාගේ හා ජයසංඛගේ බැඳීම ජීවිතය පිළිබඳ විවිධ අරුත් සපයයි. මේ දෙදෙනා ම හුදෙකලා ජීවිත ගත කරති. මෙලීනාගේ සැමියා මිය ගොසිනි. ඇගේ දරුවෝ වෙන ම ජීවත් වෙති. ජයසංඛගේ බිරිය මිය ගොසිනි. ඔහුගේ දරුවෝ ද වෙන ම ජීවත් වෙති. දෙදෙනාටම ඇත්තේ තනිකම පිළිබඳ ගැටලුවෙකි. එහෙත් ඔවුන් සමාජය සමඟ ගැටෙමින් ජීවිතයට මුහුණදිය යුතු ය. දෙදෙනාගේ මානසික බැඳීම ඇති වන්නේ පුදුමාකාර පසුබිමක් මත ය. මේ පසුබිම කතුවරයා විසින් මෙසේ නිරූපණය කරනු ලැබේ.

“අප දෙදෙනා මහ සයුර මැද තනි වූ ඔරුකාරයන් දෙදෙනකු සේ මට පෙනිණි. ඔහුගේ ඔරුවේ ලන්තෑරුම් එළිය මට පෙනේ. මගේ ඔරුවේ ලන්තෑරුම් එළිය යාන්තමින් හෝ ඔහුට ද පෙනෙනු ඇත. ඒවා එකිනෙකට ළං නොවන්නා වූ ඔරු දෙකක් බව ඔහු ද, මම ද දැන සිටියෙමු. “

(පිටුව 211)

දෙදෙනා තුළ ම ඇත්තේ ගෞරවය පෙරදැරිකරගත් ආදරයකි. එහිලා ලිංගිකත්වය ඉස්මතු නොවන බව කතුවරයා හඟවයි. එකිනෙක චරිතවලට අයුක්තියක් නොවන අයුරින් නිරූපණ හසුරුවා ගැනීමට කතුවරයා සමත් වී ඇත. ලිංගිකත්වයට බර එක වචනයක් හෝ එහි නැත. කතුවරයා ඉතා දුෂ්කර වෑයමක් ජයගෙන ඇතැ’යි කිව හැකි ය. නවකතාව වැඩි වශයෙන් විකාශය වන්නේ ද ‍ශෝකී රිද්මයක් තුළ ය. කතාව ආරම්භ වන්නේ ජයසංඛගේ මරණයත් සමඟ ය. පළමු පරිච්ඡේදය හැඳින්විය හැක්කේ කතාවේ පසුබිම හැටියට ය. එහි පොත් ගැන විස්තරයක් එයි. ජයසංඛගේ සමීපතමයා වන උපාලි ගැන විස්තරයක් ද එයි. මූලික කතාව ආරම්භ වන්නේ මෙලීනාට ලැබෙන දුරකථන ඇමතුමකින් ය. ඉන් කියැවෙන්නේ ජයසංඛ රෝහල්ගතව අසාධ්‍ය තත්ත්වයේ පසුවන බව ය. සිඩ්නි නුවර සිටින මෙලීනා වහා ම ලංකාවට එයි. ඒ සමඟ ජයසංඛ ජීවිතයෙන් සමුගනී.

සේන තෝරදෙණිය මහතාගේ ආඛ්‍යාන රීතිය නවකතාකරුවන්ගේ අවධානයට ලක් විය යුතු සාධකයකි. ඔහු ප්‍රධාන චරිතය කරලියට ගෙනෙන්නේ සෙසු චරිත තුනක් ඔස්සේ ය. මේ අනුව පැතිකඩ තුනකින් ප්‍රධාන චරිතය විවරණයට ලක්වෙයි. මෙය දුෂ්කර කාර්යයෙකි. කතුවරයා සිය විග්‍රහය සඳහා තෝරාගෙන ඇති විෂය ක්ෂේත්‍රයද සංකීර්ණ ය. ඔහු 1970 ගණන්වල සිට අද දක්වා රාජ්‍ය පාලනය, නායකයන් ගනු ලැබූ තීරණ ආදිය තාර්කික පදනමක් මත විග්‍රහයට ලක් කරයි. එහිදී හැඟුම්බර වන අවස්ථා ද, කෝප ගැන්වෙන අවස්ථා ද තිබේ. ඇතැම් විට නවකතාකරුවා මරාගෙන දේශපාලන විචාරකයා හිස ඔසොවන අවස්ථා ද තිබේ. ප්‍රබන්ධ කථා විෂයයෙහිලා කතුවරයා දක්වන සංයමය දේශපාලන විචාරයේදී දක්නට නැත.

ජෝන් කෙරී නම් ප්‍රකට ඉංග්‍රීසි ලේඛකයා මෑතකදී ලියූ නවකතාවට පාදක වී ඇත්තේ, බ්‍රිතාන්‍යයට අදාළ බ්‍රෙක්සිට් සිද්ධිය යි. නවකතාවක් ලෙස එහි කලාත්මක පැත්ත ආරක්ෂා කර ගැනීමට කතුවරයා මහත් වෙහෙසක් දරා තිබේ. එහෙත් ඔහුගේ ඇතැම් සංවාද නීරස ය. ඒවා නවකතාවකට උචිත නොවේ. වර්තමාන සංකීර්ණ දේශපාලන ක්‍රියාකාරකම් ප්‍රබන්ධ කථාවක් ඔස්සේ නිරූපණය කිරීම අතිශය දුෂ්කර ය. ඒ දුෂ්කරතාවට සේන තෝරදෙණිය මහතා ද මුහුණ දී තිබේ.

රන්ජන් අමරරත්න

මහපොළව කිසිවකුට අයත් පෞද්ගලික දේපළක් හෝ පාරම්පරික උරුමයක් නොවේ. මාතෘභූමිය යනු හුදෙක් දේශපාලනික වදනක් නොවේ. “පරිසරය යනු, මම නො වෙමි සියල්ලයි” යනුවෙන් භෞතික විද්‍යාඥ ඇල්බර්ට් අයිස්ටයින් ප්‍රකාශ කළේය. දැන් සාමූහික ව සිතීමට එක්ව පොදු අරමුණක් වෙනුවෙන් ක්‍රියාකිරීමට කාලයයි. අන් සියල්ලට වඩා මහපොළව ගැන මෙනෙහි කිරීමට කාලයයි.

හරිත වර්ණ තුරු ලතා, කඳු වැටි, නීල වර්ණ ඇළ, දොළ, ගංඟා, සමුද්‍රය සහ අනෙක් සත්ත්ව ජීව විශේෂවලින් තොරව මානවයාට පැවැත්මක් නොමැත. ඔහු විසින් නිර්මාණය කළ කෘත්‍රිම ලෝකය හුදු මායාවක් සහ ප්‍රබන්ධයක් පමණි. කෑදරකම නිසා තමාට ජීවය දුන් සොබාදහම අමතක කර මනෝවිකාර ව හැසිරෙයි. තමා විසින් ම ඉදි කළ මධුර විහඟ නාදය, මී මැස්සන්ගේ ගුමු ගුමු ව. ගෙම්බන්ගේ තර්ක විතර්ක නොඇසෙන සිරකුටියක හුදකලා වූ හෙතෙම ඉතා කෙටි කලකින් පිපාසිත ව නිරාහාර ව පිඩාවිඳිනු ඇත. නොපැවැත්මේ සිට පැවැත්ම දක්වා කරන මෙම අනවරත අරගලයෙන් මනස විකෘති වූ හෙතෙම දිවිනසාගැනීමෙන් හෝ සමූල ඝාතනයයෙන් මිහිමතින් වඳවී යනු නියතය. “සංතෘෂ්ටියේ ප්‍රථම කොන්දේසිය මානවයා සහ සොබාදහම අතර සබඳතාව බිඳ නොදැමීම යැයි” රුසියානු මහා ගත්කතුවර ලියෝ ටොලස්ටොයි ප්‍රකාශ කළේය. ඉතිහාසයේ සෑම දෙයකට ම සීමාවක් ඇත. කාලය පැමිණි විට සවිඥානයේ නව පරිච්ජේදයක් ආරම්භ වේ. නව යුගයට ප්‍රවේශවීම සඳහා සෑම අයෙකුට ම සම අවස්ථා සහ අපේක්ෂා හිමි විය යුතුය. දැන් ඒ සඳහා කාලයයි.

මුඩුවන පෘථිවිය

“සෑම දිනයක් ම මහපොළවේ දිනයකි” මනවයා දින දසුනේ එක් දිනක් තොරා අන් සියලු දින අමතක කර දමයි. විවිධ සමරු උත්සව සහ අඬහැර දක්නට අසන්නට ලැබේ. ඒවා, තාවකාලික ව ගැටලුව ඉස්මතු කර සදාකාලික ව යටපත් කරන දේශපාලන සහ මාධ්‍ය ප්‍රයෝගයන්ය. අමෙරිකානු ස්වදේශික නායක සියටල් (1786 - 1866 ජූනි 07) වොෂින්ටනයට යාබද බ්ලේක් දූපත් හි වාසය කළේය. ඔහුගේ සැබෑ නම සියාත්ය. ඔහු දුවාමිස් (Duwamish) සහ සුකුවාමිස් (Suquamish) යන ගෝත්‍ර දෙකෙහි ම නායකයාය. වොෂින්ටනයේ සිටි සුදු පාලකයා ස්වදේශික රතු අමෙරිකානුවන් ජීවත් වූ භූමිය මිල දී ගැනීම සඳහා ඉල්ලා එවූ ලිපියට නායක සියටල් 1854 දී පිළිතුරක් යවමින් “මහපොළව මානවයාට අයත් නොවෙයි. මානවයා අනෙක් සතුන් මෙන් ම මහපොළවේ කොටසකි. ලේ ඥාතීත්වයෙන් පවුලක් එකට බැඳී තිබෙනවා මෙන් ම, හැමදෙයක් ම එකිනෙකට සම්බන්ධ යැයි.” කියා සිටියේය. සැබවින්ම මහපොළව කිසිවකුට අයත් පෞද්ගලික දේපළක් හෝ පාරම්පරික උරුමයක් නොවේ. මාතෘභූමිය යනු හුදෙක් දේශපාලනික වදනක් නොවේ. “පරිසරය යනු, මම නො වෙමි සියල්ලයි” යැයි භෞතිකවිද්‍යාඥ ඇල්බර්ට් අයිස්ටයින් ප්‍රකාශ කළේය. දැන් සාමූහික ව සිතීමට එක්ව පොදු අරමුණක් වෙනුවෙන් ක්‍රියාකිරීමට කාලයයි. අන් සිල්ලට වඩා මහපොළව ගැන මෙනෙහි කිරීමට කාලයයි.

2019 ජූලි මස එළිදැක් වූ Crowther Lab of ETH Zurich පර්යේෂණ වාර්තාවට අනුව හෙක්ටයාර් බිලියන 0.9 ක් (අක්කර බිලියන 2.2) අලුතින් වන වගාව සඳහා යොදාගත හැකි භූමියක් පෘථීවිය මත නිසරු වී තිබේ. එම භූමිය මත නැවත ශාක වගා කළ හොත් මානව කාබනික විමෝචනය 2/3 ක් උරාගත හැක. දේශගුණික වෙනස සඳහා වූ එම විසඳුම සොබාදහමේ අනාගත පැවැත්ම මත පදනම් විද්‍යාත්මක ගවේෂණයකි. වත්මන් ගෝලීය උණුසුම සමහන් කිරීමට කොතරම් ශාක ප්‍රමාණයක් අවශ්‍යදැයි සොයාබැලූ ප්‍රථම අවස්ථාව මෙයයි. 2015 වසරේ මෙවන් තක්සේරුවක පෘථීවිය මත ශාක බිලියන 400 ක් ඇතැයි ප්‍රකාශ වූව ද නව තාක්ෂණික මෙවලම් (කෘත්‍රිම බුද්ධිමත්භාවය AI) මගින් සිදු කළ පර්යේෂණයට අනුව ශාක ත්‍රිලියන 3.04 ක්, වත්මන් ජනගහනය (බිලියන 7.2) සමඟ සසඳන විට එක් මානවයෙක් සඳහා ශාක 422 ක් ඇත. පෘථීවිය මත සමස්ත භූමියෙන් 30% ක් වනාන්තරවලින් ආවරණය වේ. 1990 - 2016 ලෝක බැංකු වාර්තාවට අනුව වර්ග සැතපුම්. 502.000 (ව. කි. මී. මිලියන 1.3) විනාශ වී ඇත. එක්සත් ජාතීන්ගේ ආහාර සහ කෘෂිකර්ම සංවිධානයේ තක්සේරුවට අනුව සෑම වසරක ම ආසන්න වශයෙන් හෙක්ටයාර් මිලියන. 3 (අක්කර මිලියන 18) විනාශ වේ. ඉකුත් වසර දෙක තුළ ඇෆ්ගනිස්තානයේ පමණක් වනාන්තර 70% ක් විනාශ වූ වග එහි සඳහන් වේ. වත්මන් විනාශය අනුව 2100 වන විට සම්පූර්ණයෙන් ම වැසි වනාන්තර මිහිතලයෙන් අතුරුදන් වේ. නිවර්තන වනාන්තර පෘථීවිය මතුපිට 6 -7% ක් ආවරණය කරන අතර, ශාක සහ සත්ත්ව විශේෂ 50% ක් දැකගත හැකිය. නිවර්තන වනාන්තර කාබන් ගිගාටොන් 210 ක් දරා සිටියි. එහෙත් දැන් නිවර්තන කලාපයේ වනාන්තර අඩක් විනාශ වී අවසන්ය. පසුගිය දසකය තුළ මානව ක්‍රියාකාරිත්වය නිසා විමෝචනය කළ කාබන්ඩයොක්සයිඩ් ප්‍රමාණය උරාගැනිමට ත්‍රිලියන 1.2 ක ශාක වගාවක් අවශ්‍ය වේ.

පෘථීවිය මත ආසන්න වශයෙන් භූමිය වර්ග කිලෝ මීටර් 130 එනම් හෙක්ටයාර් බිලියන 13 ක් ඇතැයි ලෝක බැංකු වාර්තාවේ සටහන් වේ. ඉන් 30.8% ක් දැනටමත් වනයෙන් ආවරණය වී ඇත. සමස්ත භූමියෙන් 37.5% ක් කෘෂිකර්මාන්තය සඳහා යොදාගැනේ. එම භූමියෙන් නෙළාගන්නා අස්වැන්න බිලියන 17 ක ජනයා පෝෂණය කිරීමට සමත්වේ. එහෙත් අපි දිනපතා සැකසූ මාංශ ආහාර පරිභෝජනය කළ හොත් එම භූමියෙන් බිලියන දෙකක පමණ ජනයාට ආහාර නිෂ්පාදනය කළ හැකිය. වර්තමාන ගෝලීය ජනගහනය බිලියන 7 පෝෂණය කිරීමට වගා කළ හැකි භූමියෙන් 15% ක් ධාන්‍ය, එළවළු සහ පළතුරු ආහාර වගා කළ යුතුය. දේශගුණික වෙනසට ප්‍රතිචාර දැක්වීම සඳහා ආසන්න වශයෙන් පෘථීවිය මත 60% ක වන ආවරණයක් තිබිය යුතුය. දැනට වාණිජ කෘෂිකර්මාන්තයට යොදාගෙන ඇති 37.5% න් 15% ක් එළවළු සහ පළතුරු වගාව වෙනුවෙන් යොදා ගත හොත් 37.5% - 15% - 22.5% සමස්ත භූමියෙන් හෙක්ටයාර් බිලියන 3 ක් නව වන වගාව සඳහා ඉතිරි වේ. එ මගින් වාර්ෂික ව කාබනික වායු ටොන් බිලියන 54 ක් උරාගත හැකිවේ. වර්තමානයේ වායු ගෝලයේ (සූර්ය රශ්මිය රඳවාගන්නා) මිලියන කොටසක කාබනික වායු කොටස් 410 ක් ඇති අතර එය කාර්මික යුගයට පෙර යුගය දක්වා පසුබැසීමට, එනම් වායු ගෝලයේ කාබනික වායු කොටස් 350 දක්වා අඩුකිරීමට සමත් වේ.

වන විනාශය පෘථීවිය මත පාරිසරික සමතුළිතතාව බිඳ දමා ජෛව විවිධත්වය අනතුරට පත් කරයි. මානව කේන්ද්‍රීය අවිධිමත් සංවර්ධනය, පතල් කැණීම, ගිනි ගැනීම, වාණිජ අවශ්‍යතා, සමාගම් කෘෂිකර්මය (80%) වන විනාශයට හේතු වේ. වන විනාශය නිසා වාර්ෂික ව 12% -17% හරිතාගාර වායු විමෝචනය සිදු වේ යැයි ලෝක සම්පත් ආයතනය (World Resources Institute) පවසයි. වැසි වනාන්තරයන් හි ස්වභාවික ශාක විශේෂ 121 ක් ඖෂධ නිපැයුමට යොදාගැනේ. සෑම වසරක ම දකුණු අමෙරිකාව, අප්‍රිකාව සහ ගිනිකොණදිග ආසියාව වනාන්තර හෙක්ටයාර් මිලියන 13 ක් කෘෂිකර්මාන්තය සඳහා විනාශ කරයි. 2015 Nature වාරප්‍රකාශනයට අනුව 46% ක් වන ශාක විනාශ කර ඇත. ඉකුත් වසර 50 තුළ ඇමසෝනියානු වනයෙන් 17% ක් මානව ක්‍රියාකාරකම් නිසා අනතුරට ලක් විය. වනාන්තර මානවයා මුදාහරින කාබන්ඩයොක්සයිඩ් පමණක් නොව ගෝලීය උණුසුම දරා සිටින වායු උරාගැනීමට ද සමත් වේ. නිවර්තන වන තීරුවට දේශගුණික වෙනස 23% ක් අවම කළ හැක.

වන විනාශය නිසා වායු ගෝලයට විමෝචනය වන කාබන් ප්‍රමාණය 11% කි. එය ඉන්ධන දහනය වන වාහන මුදාහරින ප්‍රමාණයට සමාන්තරය. ලෝක ඔක්සිජන් නිෂ්පාදනයෙන් 20% ක් ඇමොසෝනියානු වැසි වනාන්තර නිපයයි. ඉදිරි දසක තුන තුළ වන විනාශය නිසා ජීව විශේෂ 28.000 ක් විනාශ වනු ඇතැයි ලෝක වන සත්ත්ව අරමුදල පවසයි. වර්තමානයේ පිළිකා රෝගීන්ට ප්‍රතිකාර කළ හැකි ඖෂධ 25% ක් අමසෝනියානු වනය සම්පාදනය කරයි. රටවැසියාට ඉතා සුළු දෙයක් සරල ව කළ හැක. එය විශාල වෙනසකට මඟ පාදයි. ඒ සුළු දෙය හැකි සෑම තැනක ම පැළ (ශාක) සිටුවීම යැයි වන්ගාරි මාතායි ප්‍රකාශ කළාය.

කළ හැකි කුමක් ද?

සාගර ජලය 1994 - 2007 දක්වා කාලය තුළ කාබන්ඩයොක්සයිඩ් ගිගාටොන් 34 ක් උරා ගෙන ඇතැයි National Oceanic and Atmospheric Administration (NOAA) පවසයි. සාගරයට පසු කාබන්ඩයොක්සයිඩ් ගබඩාව ජෛව ස්කන්ධය biomass වනාන්තර පද්ධතියයි. ශාක වායු ගෝලයේ කාබන්ඩයොක්සයිඩ් උරාගෙන ජීවීන්ට අවශ්‍ය ඔක්සිජන් නිෂ්පාදන කර බෙදාහරියි. ඉතා හොඳින් වැඩුණ කොළ සහිත ශාකයක් 2- 10 අතර පුද්ගල ප්‍රමාණයකට දිනකට අවශ්‍ය ඔක්ෂිජන් සම්පාදනය කරයි. සමූද්‍ර පැළෑටි Phytoplankton ගෝලීය ඔක්සිජන් අවශ්‍යතාවෙන් අඩක් 50% නිපයයි. එහෙත් වනාන්තර පිරිසුදු වායු සම්පාදනයේ ප්‍රරෝගාමියාය. පෘථීවිය මත සත්ත්ව ජීව අඩක් වන ආශ්‍රීත ව ජීවත් වෙති. එය භූමිය ජෛව විවිධත්වයෙන් 80% කි. බිම් පණුවා පස පෙරළා පෝෂණය කර මහපොළව සුවපත් කරන අතර සමනලයා, මීමැස්සා, කුඩා පක්ෂීන් පරාග සංයෝග කර වනාන්තර ශාක පද්ධතියේ පැවැත්ම සහතික කරති. තක්සේරුවට අනුව මිලියන 300 ක ජනයා ද මිලියන 60 ආදිවාසී ජනයා ද පරපුරෙන් පරපුරට ප්‍රවර්තනය වෙමින් වනයේ ජීවත් වෙති. ශාක අධික උෂ්ණත්වයෙන් මහපොළව රැක දෙයි. කාලගුණික රටාවන් වෙනස් කර වළාකුළු රඳවා වර්ෂාව ලබා දෙයි. ගංවතුර පාලනය කර, ජලපෝෂක ප්‍රදේශවල රඳවා, භූමියට උරා ගෙන භූගත ජල මාර්ග පුරවා දමයි. සුළඟේ වේගය පාලනය කරයි. නිසරු පස සාරවත් කරයි. කාබන්මොනොක්සයිඩ්, සල්ෆර්ඩයොක්සයිඩ්, නයිට්‍රජන්ඩයොක්සයිඩ් වැනි විෂ දුමාර මගින් සිදුවන වායු දුෂණය අවම කරයි.

වර්තමානයේ මානවයා පොළඹවා ඇති මුදල මත පදනම් තරගකාරී ජීවන රටාව දැන් අභියෝගයට ලක්ව ඇත. මානවයා සිය ජීවන පැවැත්ම රඳා පවතින සොබාදහමට තර්ජනය නොකළ යුතුය. කෙන්යාවේ විසු නොබෙල් සාම ත්‍යාග ලාභී (2009) වන්ගාරි මාතායි හරිත තීරු එකමුතුව Green Belt Movement මත ස්ත්‍රීන් 900, 000 ක් බලසතු කර ශාක මිලියන 47 ක් වගා කළාය. “ජනයා බලසතු කිරීමෙන් තොරව ඔබට පරිසරය රැකගත නොහැක. ඔවුන් ව දැනුවත් කරන්න. මෙම සම්පත් ඔවුන්ට පොදු ව අයත් වග අවබෝධකර ගැනීමට උදවු කරන්න. එවිට ඔවුන් පරිසරය රැකගනීවි” යැයි අය කියා සිටියාය. ගුර්ගාඔන් හි තුරු මිනිසා Tree Man දිපක් ගෞරේ 2010 වසර සිට ශාක 47, 000 ක් රෝපණය කළේය. ජාදේව් පයෙනග් හෙවත් වන මිනිසා forest man 1979 වසර සිට අක්කර 1360 ක වනයක් වගා කළේය. මධ්‍ය ප්‍රදේශ් ප්‍රන්තය නර්මදා ගං ඉවුර දෙපස පැය දොළහක් තුළ මිලියන 1.5 ක ජන සහභාගිත්වයෙන් ශාක මිලියන 66 ක් රෝපණය කළේය. සෑම අයෙක් ම සිය ජීවිත කාලය තුළ ශාක 60 -100 ප්‍රමාණයක් වගා කළ හොත් ගෝලීය උණුසුම අවම කර ගැනීමට හැකි වේ. ඔබ ඒ සඳහා සූදානම් ද?

lවිනාශකාරිත්වය විනාශ කිරීමට දැනුම සතු බලය - අවසන් කොටස

‘පශ්චාත් සත්‍ය ලෝකයක දැනුම ගොඩනැගීම’ යන තේමාව යටතේ සබරගමුව විශ්වවිද්‍යාලයේ සමාජීය විද්‍යා හා භාෂා පීඨයේ පැවැති පස් වැනි වාර්ෂික ශිෂ්‍ය පර්යේෂණ සැසියේදී නිව් එංග්ලන්ඩ් ඕස්ට්‍රේලියා විශ්වවිද්‍යාලයේ ආචාර්ය ඩී.බී. සුබේදී ප්‍රධාන දේශනය පවත්වන ලද අතර එය "Knowledge: most powerful weapon to fight destructive elements"යන ශීර්ෂය සහිතව ඩේලි නිවුස් පුවත්පත වාර්තා කර තිබිණ. මේ එම ලිපියේ සිංහල පරිවර්තනයයි. පශ්චාත් සත්‍ය කතිකාව

පළමුවෙන්ම අප අපගේ පුරුද්ද වෙනස් කළ යුතුය. ව්‍යාජ ප්‍රවෘත්ති, කටකතා සමාජ මාධ්‍යවල දක්නට ලැබෙන ප්‍රචාර පරිහරණය කිරීමෙන් වැළකිය යුතුව ඇත. තොරතුරු තක්සේරු කිරීම, ප්‍රවෘත්ති ප්‍රශ්න කිරීමට සහ තොරතුරුවල විශ්වසනීයත්වය සොයා බැලීමට ශාස්ත්‍රීය ප්‍රජාවක සාමාජිකයකු වශයෙන් අපට සමාජ සහ සදාචාරාත්මක වගකීමක් තිබේ. නිදහසේ සංසරණය වන තොරතුරු සත්‍යදැයි පරීක්ෂා කිරීමට අවශ්‍ය සම්පත් ද අප සතුය.

පශ්චාත් සත්‍ය කතිකාව නිසා ඇතිවන සමාජ බලපෑම ගැන සලකන විට, ප්‍රචණ්ඩ අන්තවාදය ප්‍රචලිත වන අන්දම කැපී පෙනෙයි. ප්‍රචණ්ඩ අන්තවාදීහු, ජනතාව විප්ලවීය ලෙස අන්තවාදයට සහ ත්‍රස්තවාදයට හරවා ගැනීමේ නරුම චේතනාවෙන් යුතුව කටකතා, ව්‍යාජ ප්‍රවෘත්ති සහ නුසුදුසු කාරණා ප්‍රචාරය කිරීමට අන්තර්ජාලය සහ සමාජ මාධ්‍ය වේදිකාවක් බවට පත් කරගනිති. අන්තර්ජාලය, සමාජ මාධ්‍ය සහ නවීන සන්නිවේදන පද්ධතිවල නැඟීමත් සමඟම එක තැනෙකට කේන්ද්‍රගතව තිබුණු ත්‍රස්තවාදයේ සම්ප්‍රදායික ව්‍යුහය, විකේන්ද්‍රණය වූයේ ය. එය මුළුමහත් ලෝකය පුරාම දැකිය හැකි තත්ත්වයකි. ඒ සමඟම, සමාජ මාධ්‍ය භාවිතය පිළිබඳව හොඳ දැනුමක් ඇති ඕනෑම කෙනෙකුට, ව්‍යාජ ප්‍රවෘත්ති සහ කටකතා භාවිත කර සාමාන්‍ය ජනයා වීදිබැස්සවිය හැකි ය. අරාබි වසන්තය මෙහිදී නිදසුනක් හැටියට දක්වන්නට පුළුවන. අන්තර්ජාලය සහ සමාජ මාධ්‍ය, සමාජ සහ දේශපාලන බලමුළු ගැන්වීමට සම්බන්ධ සම්ප්‍රදායික ක්‍රමය වෙනස් කළේ කෙසේ ද යන්න අරාබි වසන්තයෙන් පිළිබිඹු වේ.

ප්‍රචණ්ඩ අන්තවාදීන්

වෙනත් වචනවලින් කිවහොත් පශ්චාත් සත්‍ය කතිකාව, සමාජ හා දේශපාලන බලමුළු ගැන්වුම් ක්‍රමය සහ මෝස්තරය රැඩිකල් ලෙස වෙනස් කර ඇත යන්නයි. ප්‍රචාර සහ කටකතාවල ආධිපත්‍ය හේතුවෙන් අපේ ශක්තිමත් සමාජ අන්තර්ක්‍රියා සහ එදිනෙදා ජීවිතය බිඳ වැටෙන අන්දමත්, සමාජ සහ ආගමික කණ්ඩායම් හුදකලාව වී ක්‍රියාත්මක වීමට පටන් ගන්නා අන්දමත් අපේ අවධානයට ලක් විය යුතුව ඇත. සමාජ කණ්ඩායම් හුදකලා වීම අද සාමාන්‍ය සමාජයේ සාමයට සහ සහජීවනයට විශාල තර්ජනයක් වී තිබේ.

පශ්චාත් සත්‍ය කතිකාව දැඩි ලෙස අයහපත්ව බලපා ඇති තැනක් වේ නම් ඒ දේශපාලනයයි. ව්‍යාජ ප්‍රවෘත්ති, කටකතා සහ ප්‍රචාර, ලෝ පුරා දේශපාලන ප්‍රතිඵල වෙනස් කරන්නට හේතුවක් වී ඇත. පරිණත ප්‍රජාතන්ත්‍රවාදයක් ඇති බටහිර රටවල් තුළ පවා ජනතාවාදයේ සහ දක්ෂිණාංශික අන්තවාදයේ නැඟීමට පශ්චාත් සත්‍ය කතිකාව සම්බන්ධ වී තිබේ. ප්‍රජාතන්ත්‍රවාදය ස්ථාපනය වන තෙක් බලා සිටින බංගලිදේශය, කාම්බෝජය, තායිලන්තය වැනි සංවර්ධනය වෙමින් පවත්නා රටවල්වලදී පශ්චාත් සත්‍ය කතිකාව තරගකාරී ඒකාධිපතිවාදයක් බවට පත්ව ඇත. මැතිවරණ නිදහසට වළකපන, දේශපාලන විරුද්ධවාදීන් තලා පොඩි කර දැමීමට මැතිවරණය භාවිත කරන තත්ත්වයක් ඉන් ඉස්මතු වේ. එවිට බලවත් දේශපාලන ප්‍රභූන් ඒකාධිපති පාලකයන් ලෙස ඉහළට එසවෙනු නිසැක ය. අතීතයේදී, අධිකාරි රෙජිම මතුවූයේ හමුදා කුමන්ත්‍රණ සහ දේශපාලන ඝාතන සමඟ ය. එසේ වුවත් පශ්චාත් සත්‍ය ලෝකයේ එය සිදුවන්නේ මැතිවරණ හරහාම වීම විශේෂත්වයකි.

ආර්ථිකය ඉදිරියේ ඇති බලපෑම ද භාරදූර ය. පුදුමය නම්, ඒ ගැන කිසිවක් අපට නොතේරීම ය. ධනවාදී ආර්ථිකයන්හි භාණ්ඩ නිර්මාණය කෙරෙන්නේ ලෝකයේ එක තැනෙක ය. අලෙවි කෙරෙන්නේ ලෝකය වෙනත් තැනෙක ය. ඒ භාණ්ඩ පරිහරණය කරන්නේ ලෝකයේ තවත් කෙළවරක සිටින පිරිසකි. මේ තත්ත්වය සම්ප්‍රදායික කෘෂි ආර්ථිකයකට වඩා වෙනස් බැව් අප අවබෝධ කරගත යුතු ය. එය ගෝලීයකරණයයි. ගෝලීයකරණ ක්‍රියාවලිය තරමක් සංකීර්ණ ය. ගෝලීයකරණය වූ ආර්ථිකය තුළ සිදුවන ගනුදෙනුවලින් ප්‍රතිලාභ ලබන්නේ කවරකු ද යන්න සොයා ගැනීම දුෂ්කර ය. ජයග්‍රාහකයන් සහ පරාජිතයන් කවරෙකුදැයි කියා කිසිවෙක් නොදනිති. ලාභය නැවත බෙදා හැරෙන්නේ කෙසේ ද යන්න අපි නොදනිමු. එසේම එය බෙදා ගන්නේ කවුද, ප්‍රතිලාභ ලබන්නේ කවු ද යන්න ගැනත් අපි නොදනිමු. මේ සංකීර්ණතාව, ජාතික පරිමාණයේ ඇති පෞද්ගලික සමාගම් සඳහා ද අදාළ වේ.

මෙහි කනස්සල්ලට කාරණයක් ඇත. එනම්, ගෝලීය ආර්ථිකය සහ එමඟින් අපේ එදිනෙදා ජීවිතයට බලපෑම් කරන පෞද්ගලික සමාගම්, විනිවිද නොපෙනෙන සහ ප්‍රජාතන්ත්‍ර විරෝධී ක්‍රියාවලින් හරහා ප්‍රධානීන් පත්කර ගැනීම ය. පෞද්ගලික අංශවල ප්‍රජාතන්ත්‍රවාදය ගැන අපි කතා නොකරන්නෙමු. වඩා වැදගත්ම කාරණය, ආර්ථික වශයෙන් ගත් කල පෞද්ගලික සමාගම්, ආණ්ඩුවලටත් වඩා බලවත් ය යන්නයි. උදාහරණයක් ලෙස 2018 වසරේදී ශ්‍රී ලංකාවේ දළ දේශීය නිෂ්පාදිතය බිලියන 88.9ක් වීමත්, ගූගල් සමාගමේ එම වර්ෂයේ ආදායම බිලියන 136ක් වීමත් ය. මුදල්, බලය රැගෙන එන්නේ නම් මෙම සංඛ්‍යාවලින් නිරුපණය කෙරෙන්නේ ගෝලීයකරණය වූ වත්මන් ලෝකය තුළ බලය බෙදා හැරෙන ආකාරයයි.

කෙසේ වෙතත්, අපේ එදිනෙදා ජීවිතයට බලපාන පෞද්ගලික සමාගම්වල ප්‍රජාතන්ත්‍රවාදී නායකත්වය ගැන හෝ අපේ රජයන් ගැන හෝ අප ප්‍රශ්න කරන්නේ නැත. මෙය ප්‍රජාතන්ත්‍රවාදය වැරදී යන අංශ කිහිපයෙන් එකකි. මෙම යථාර්ථයන් සමාජ මාධ්‍යවල සංසරණය වන්නේ අඩුවෙනි. රජයෙන් පාලනය නොවන, පෞද්ගලික සමාගම්වලින් පාලනය වන ප්‍රවෘත්ති සේවාවන්වල එම යතාර්ථයන් සංසරණය වන්නේ ද කලාතුරකිනි.

දරිද්‍රතාව

අතීතයට වඩා වත්මන් ලෝකය අසමාන ය. 2018දී "ෆෝබ්ස්"සඟරාව පෙන්වා දුන් ආකාරයට ලෝකයේ ඉහළම ධනවතුන් දසදෙනාගේ දළ වත්කම බිලියන 743.8කි. ලොව ධනවත්ම 1% - එනම් ඩොලර් මිලියනයකට වඩා ඇති පිරිස, ලෝක ධනයෙන් 45%ක් හිමිකරගෙන ඇති බව මේ වසරේදී අනාවරණය විය. 2018 වසරේදී "ඔක්ස්ෆෑම්"ආයතනය එළි දැක් වූ වාර්තාවකින් අනාවරණය වූයේ ලොව ධනවත්ම පුද්ගලයන් 26 දෙනෙකු සතු ධනය, අන්ත දරිද්‍රතාවයෙන් පෙළෙන බිලියන 3.8කගේ ධනයට සමාන බවකි. මෙම ආන්තික අසමානතා ජාතික වශයෙන් ද දේශීය වශයෙන් ද ප්‍රතිනිර්මාණය වේ. අද ලෝකයේ පවත්නා දරිද්‍රතාව මිනිසා විසින් සාදන ලද්දකි. එහි ඍජු ප්‍රතිවිපාක, සමාජය තුළ සහ සමාජ අතර අසමානතා වර්ධනය වීමයි. අප අසමත් කරන්නේ දර්ද්‍රතාව නොවේ. එහෙත් අසමානාතාව, දරිද්‍රතාව නිර්මාණය කරයි. අවසානයේදී අප මෙන්ම අපගේ දේශපාලන නායකයෝ ද අසමත් තත්ත්වයකට පත්වෙති.

ගැටලුව ගෝලීය වුවත් අප විසඳුම් සොයන්නට උත්සාහ ගන්නේ දේශීය වශයෙන්ය යන්න මා ඉදිරිපත් කළ සංඛ්‍යා ලේඛනවලින් පෙනී යයි. සංවර්ධනය අසාර්ථක වී අසමානතාව වර්ධනය වනවිට ජනතාව පාලනය කිරීම අහිමි වේ යන බිය දේශපාලන පන්තිය තුළ ඇති වේ. එහි ප්‍රතිඵලයක් වශයෙන් වඩාත් කනස්සල්ලට පත්වන දේශපාලන පන්තිය, ව්‍යාජ ප්‍රවෘත්ති, කටකතා සහ ප්‍රචාර මත රැඳෙමින් බලයේ සිටීමට උත්සාහ ගනී. පශ්චාද් සත්‍ය ලෝකයේ දේශපාලන සහ ආර්ථික යථාර්ථය මෙයයි.

සමාජ අන්තර් ක්‍රියා

පශ්චාත් සත්‍ය කතිකාවෙන් අපේ එදිනෙදා ජීවිතයට සහ අපේ සමාජ අන්තර් ක්‍රියාවන්ට සිදු කරන අයහපත් බලපෑම අවම කිරීමට පර්යේෂකයන්, ශාස්ත්‍රඥයන් සහ සිසුන් වන අපට කළ හැකි වන්නේ කුමක්ද යන ගැටලුවට දැන් මම පිවිසෙමි. එය බරපතළ ගැටලුවකි. ඊට පිළිතුරු සෙවීමේදී සීමා ඇති බවත් මම පිළිගනිමි. එසේ වුවත් ධනාත්මක බලපෑමක් කළ හැකි ආකාරය ඉස්මතු කිරීමට කැමැත්තෙමි.

පළමුවෙන්ම අප අපගේ පුරුද්ද වෙනස් කළ යුතුය. ව්‍යාජ ප්‍රවෘත්ති, කටකතා සමාජ මාධ්‍යවල දක්නට ලැබෙන ප්‍රචාර පරිහරණය කිරීමෙන් වැළකිය යුතුව ඇත. තොරතුරු තක්සේරු කිරීම, ප්‍රවෘත්ති ප්‍රශ්න කිරීමට සහ තොරතුරුවල විශ්වසනීයත්වය සොයා බැලීමට ශාස්ත්‍රීය ප්‍රජාවක සාමාජිකයකු වශයෙන් අපට සමාජ සහ සදාචාරාත්මක වගකීමක් තිබේ. නිදහසේ සංසරණය වන තොරතුරු සත්‍යදැයි පරීක්ෂා කිරීමට අවශ්‍ය සම්පත් ද අප සතුය.

අප අපගේ අධ්‍යාපනය තුළ, පර්යේෂණ සංස්කෘතියක් වැඩි දියුණු කර එය ශක්තිමත් කළයුතු බවත් මම අවධාරණය කරමි. අප තර්ක, ප්‍රති-තර්ක, ආඛ්‍යාන, ප්‍රති-ආඛ්‍යාන මත පදනම් වූ සංස්කෘතියක් ගොඩනැඟිය යුතුව ඇත. "අපි එකඟ නොවීමට එකඟ වෙමු"යන්න ඉතාමත් සාමකාමී ලෙස වටහා ගැනීම, ශාස්ත්‍රීය කටයුතුවල ඇති සුන්දරත්වයයි.

විශ්වවිද්‍යාල සිසුන් සහ උපාධිධාරීන් කෙරෙහි මට විශාල විශ්වාසයක් ඇත. ඒ අනෙකක් නිසා නොව අපගේ සිසුන් උපාධිය ලබා ගන්නා විට විවේචනාත්මක චින්තන කුසලතාවය වර්ධනය කර තිබීම නිසයි. එනම්, විවිධ කෝණවලින් සහ දෘෂ්ටිකෝණවලින් අදහස්, කරුණු සහ තර්ක දෙස බැලීමේ කලාවයි. රැකියා ස්ථානයේ, පවුලේ හෝ තමන් ජීවත් වන ප්‍රජාවේ හෝ වේවා, ප්‍රචාර, විනාශකාරී ආඛ්‍යාන ආදිය ප්‍රශ්න කිරීම සහ ඒ වෙනුවට විකල්ප ඉදිරිපත් කිරීම ඔබේ වගකීමයි. ජාතිය, ජනවාර්ගිකත්වය, ආගම, කුලය සහ ජාතිකත්වය නම් පටු කාච භාවිතයෙන් ඔබ ප්‍රශ්න දෙස බැලුවහොත් එය විවේචනාත්ම නොවන බව මම ඔබට පවසමි. ඔබ කිසියම් ප්‍රශ්නයක් දෙස ගෝලීය මානවවාදී දෘෂ්ටිකෝණයකින් සහ සමාජ වෙනස්වීමේ දෘෂ්ටිකෝණයකින් බැලුවහොත් විකල්ප අදහස් හා කරුණු සොයාගත හැකි ය. අප දේශාභිමානය ජනනය කර නොගන්නේ නම්, පශ්චාත් සත්‍ය කතිකාව තුළ බලවත් පුද්ගලයන් අප අවභාවිත කරනු ඇත.

පශ්චාත් සත්‍ය කතිකාවෙන් නැඟෙන විනාශකාරී අංගයන්ට එරෙහිව සටන් කිරීමට, අපගේ විශ්වවිද්‍යාල සිසුන් තුළ බලවත් අවියක් ඇති බව මම තරයේ විශ්වාස කරමි. එනම්, විශ්වවිද්‍යාලයේ ඉගෙන ගන්නා විට ලබන පර්යේෂණ කුසලතාව සහ විවේචනාත්මක චින්තනයයි. පශ්චාත් සත්‍ය කතිකාව අපේ ලෝකයට රිංගාගෙන ඇත. එනිසා අන්තර්ජාලය සහ සමාජ මාධ්‍ය භාවිත කරන විට පරෙස්සම් වන්න; ස්වයං වගකීම, සමාජ සදාචාරය සහ ආචාරධර්ම ගැන සිතා බලන්නට කාලය එළඹ ඇති බව මතක් කරමි. දැනුම, ආචාරධර්මානුකූල ක්‍රමවලින් භාවිත කිරීම, පශ්චාත් සත්‍ය ලෝකයේ කතිකාවට එරෙහි වීමට ඇති කුඩා පියවරක් වන නමුත්, එය ප්‍රබල පළමු පියවර වන බව ද මතක් කර දෙමි.

සිංහලට පෙරළුම

මංජුලා විජයරත්න

“අනේ නැන්දේ, මට මේ බත් නම් කන්ට බෑ. ගිලින්ටත් හරි අමාරුයි!”

තම්බපු හාලේ ඝන ඇට සහිත බත්පත දෙස හො‍රැහින් බලා ‘නඳුන්’ මැසිවිලි කීවේ ය.

“සුදු පුතේ එහෙම කියල කොහොමද? අපි කවුරුත් කන්නේ ඔය හාල්වලින් උයපු බත්. අනික ඒවා අපේම කුඹුරුවලින් ගත්ත හාල්.”

“ඔයාලට නම් මේවා කන්න පුළුවන් ඇති. ඒත් මට නං හරි අමාරුයි.”

“ඔය බොරු කතා කියන්නට එපා පුතේ. ඔයා ඊයෙ රෑට කෑවෙත් නෑ. අද බොරු ලෙඩක් අරන් ඉස්කෝලෙ ගියෙත් නෑ.”

බොහෝ සිහින් සිරුරින් යුතු, ඉත්තෑකූරු කෙස් ඇති, තලඑළළු පැහැ පිරිමි ළමයා එක්වරම යමක් මෙනෙහි වූවා සේ දකුණු කන අතින් අල්ලා ගත්තේය.

“බොරු නෙවෙයි නැන්දෙ, ඇත්තටම මට ඉවසන්ට බැරි කනේ අමාරුවක් හැදුණා.”

සමහර දිනවල හය හැවිරිදි වියේ උන් ‘නඳුන්’ සහ ඔහුගේ නැන්දනිය වූ විසිහය හැවිරිදි ‘ලතා’ අතර මෙබඳු කතාබහ සිදුවෙයි. ‘ලතා’ නඳුන්ගේ පියාගේ එකම නැඟණියයි. අ. පො. ස. සාමාන්‍ය පෙළ විභාගයෙන් අධ්‍යාපනය අවසන් කළ ඇය මැහුම් පංතියකට යයි.

නඳුන්ගේ මවුපියන් රජයේ සේවකයන් වූ බැවින්, පාසල් ඇරී ආ පසු ඔහුව කවා පොවා රැකබලා ගත්තේ ‘ලතා’ විසිනි. ඔහුගේ කරදර ඉවසනු බැරි තැනකදී මෘදු හදවතක් තිබුණ ද ඇයට ද කේන්ති යන අවස්ථා ඇති වේ. නඳුන්ගේ කුදු මහත් කටයුතු ඉටුකරන ඇය නිසි පරිදි ආහාර නොගන්නා බැවින් බෙහෙවින් කෙසඟ ඔහුගේ සිරුර දෙස බලා දුක් වෙයි.

“ගමේ අනික් කොල්ලො බෝල ගෙඩි වගේ ඉන්නවා. උන්ට හරියට කන්ට දේකුත් නෑ. අපේ එකාට ඕන පදං කෑම තිබිලත් ඇටකිච්චෙක් වෙලා!”

නඳුන්ගේ මවට කිරි හිඟ වීම නිසා ඔහුට මවුකිරි බීමට ලැබුණේ මාස තුන හතරක් පමණි. ටිංකිරිද හිඟ ඒ කාලයේ එළකිරි ඩිංගක් සොයා ගන්නට සැතපුම් ගණන් දුර ගෙවා යන්නට පවා ඉදිරිපත් වූයේ ‘ලතා’ය.

“යකෝ මේකා පුදුම යක් පැටියෙක්නේ. බත් ඇටයක් කටේ තියන්නෙ නෑ.”

වයසින් වැඩෙන විට ද ‘නඳුන්’ගේ ගති සොබා වෙනස් නොවීම ගැන ඔහුගේ මව උරණ වූවාය.

“ඒ වුණාට අපේ එකාගෙ කටේ සද්දෙ නං මුළු පළාතටම ඇහෙනවා. අනික අපි එක්ක හරි හරියට කට ගහගෙන එනවා. තලනවා මං දවසක උන්දැගෙ කට!”

පියා ඇතැම්විට එසේ කියන්නේ දත්කූරු කමිනි.

සැබැවින්ම කොතෙක් දඬුවම් ලැබුවද, මවුපි‍යන් සමඟ එකට එක කියන ‘නඳුන්’ ගේ පුරුද්ද නැති කරන්නට බැරි විය. එහෙත් මේ සියල්ල මැද්දේ ඔහුගේ පිහිටට සිටියේ ‘ලතා’ නැන්දාය.

“නැන්දේ මට බත් කන්ට පිරියක් දැනෙන්නෙ නෑ. ඒ නිසා ඔයා මට රස දෙයක් හදල දෙනව ද?”

බොහෝ චාටු ස්වරයෙන් මෙදිනද ‘නඳුන්’ නැන්දණියට පැවසුවේය.

“හොඳයි බලමුකො! මොනවද මගෙ පුතාට ඕනෙ?”

“අනේ හොඳ නැන්දනේ. මට බිත්තරයක් බැදලා දෙන්ටකෝ.”

නිවසේ කිකිළියක් ඇති කළ බැවින් මේ ඉල්ලීම ඉටු කිරීම දුෂ්කර වූයේ නැත. ඇය හනිකට බිත්තරයක් තෙලෙහි බැද, ඔහුගේ පිඟානට උණු බත්ද බෙදා කතාකළාය.

“එන්න දැන් ඉතිං බඩ පිරෙන්ට කන්ට පුළුවන්.”

‘නඳුන්’ එතැනට ආවේය. ඉන්පසුව බත් පත දෙස බලා, අප්‍රසන්නතාව පළ කරන අටියෙන් යටි තොල පිටතට පෙරලුවේය.

“අයියෝ නැන්දේ මේ බිත්තරේ හරිම කුයිලයි. නරක් වෙළාද දන්නෙත් නෑ.”

එවර නම් ‘ලතා’ට බෙහෙවින් කේන්ති ගියේය.

“දැන් උඹ පොඩ්ඩකට කලින් කිව්වා නේද බිත්තරයක් බැද්දොත් කනවා කියලා. ඉතිං ඇයි මේ තරම් වධ දෙන්නේ. දැං මේ බත් ඩිංගිත්ත කාපං පුතේ! ඔය බිත්තරේට කිසි දෙයක් වෙලා නෑ.”

“නැන්දේ මේ බිත්තරේ මං හිතුවට වඩා කුයිලයි. නැත්තං මං කන්නයි හිතා හිටියේ.

එබසට ‘ලතා’ නැන්දාට යක්ෂාවේශ විය. “උඹ පුතේ මගෙන් හොඳ පදයක් අහන්ටයි තනන්නේ? ඇයි යකෝ මොන රටේ ද කිකිළි බිජුවලින් සඳුන් සුවඳ විහිදෙන්නේ?”

එයට පිළිතුරක් දෙන්නට ලැබුණේ නැත. නිවෙස ඉදිරිපිට ගුරු පාර පැත්තෙන් මහ හඬින් පිරිමි කටහඬක් ඇසිණි.

“මාලෝ... මාලෝ... මූදු මාලෝ...!”

ඒ හඬින් නඳුන්ගේ මුවෙහි මද සිනාවක් නැගිණි. ඔහු හීන් හඬින් නැන්දනිය ඇමතීය.

“නැන්දේ... පාරෙ මාළුකාරයා යනවා!”

ඇගේ කේන්තිය අලුත් විය. ඔහු ඊළඟට අල්ලන අඩව්ව ගැන ඇයට සියුම් අවබෝධයක් ඇති විය.

“ඉතිං මාළුකාරයා පාරෙ ගියාම බොට මොකද?”

“අනේ නැන්දේ මාළු කෑල්ලක් එක්කනම් බත් ටික කන්ට පුළුවන් වෙයි.”

“මේ ‘නඳුන්’ උඹ මාව විහිළුවකට ගන්ට එපා! දැං බිත්තර ඉල්ලුවා දුන්නා. ඒ මදිවට බෝංචි තියෙනවා. පිදුරු බිම්මල් මාළුව තියෙනවා. උඹ ඒ එකක්වත් කට හරියෙ තිබ්බෙ නෑ.”

“අනේ හොඳ නැන්දනෙ. මාළු ටිකක් උයල දෙන්ට. මං ඔක්කොම බත් ටික කන්නම්.”

ඔහුගේ මැසිවිල්ල කෙලවරවූයේ ‘ලතා’ ‘ලින්නා’ මාළු බාගයක් මිලදී ගැනීමෙනි. අලකොළවල ඔතන ලද මාළුවලින් නැගුණු පිළී ගඳ ඇගේ නැහැපුඩු හැකිලවීය. තවත් පැය බාගයකින් පමණ උණු උණුවේ මාළු හොද්ද බාගත හැකි විය. බිත්තරය ඉවත් කර මාළු කෑලි සහ හොදි බෙදන ලද පිඟාන ‘නඳුන්’ ඉදිරියේ තැබිණි.

“නැන්දට බැරිද මට බත් ටිකක් කවන්න?”

ඒ මැසිවිල්ල ද ඉවසා ගනිමින් ඇය ඔහුට බත් පිඬුවක් අනා මුවගට ළං කළාය. ඔහු එය යන්තමින් ගෑවෙන විටම කෑ ගැසුවේය.

“අයියෝ ‍ඔයා හොඳටම මිරිස් දාලා මං කොහොමද කන්නෙ?”

“මේ කොල්ලො විකාර කියන්ට එපා. මං මේ මාළු හැදුවේ කිරට. බොරු නැතුව කාපං.”

“එක්කො නැන්දේ... මට මාළු එපා. මට බත් ටික විතරක් කවන්ට බැරිද?”

‘ලතා’ගේ ඉවසීමේ රතු ඉර එවර නම් පැන තිබිණි. ඇයට බත් පත මේ කේඬෑරි කොල්ලාගේ ඔළුවේ හලන්නට සිතිණි. එහෙත් වැර වෑයමින් කේන්තිය නවත්වාගත් ඈ කෑමොර දුන්නාය.

“මං දැන් තෝ කියන කියන දේවල් හදල දුන්නා. තෝ ඒ එකක් ගැනවත් සැලකුවේ නෑ. ඇත්තමයි තෝ නං මාවත් මරාගෙන කන්ට උපන් යස්ස පැටියෙක්. හිටපිය අද මං මේ වගේ ජරා වැඩ ආයෙ නොකරන්ට යස පාඩමක් උගන්නන්නං.”

ඉනික්බිතිව ඇය ඉඳුල් අතින්ම ‘නඳුන්’ ඔසවා ගත්තේය. ඔහුව තදින් ඔසවා ගත් ඇය වියරුවෙන් මෙන්, පෑල දොරින් නික්ම වත්ත පහළට යන්නට පටන් ගත්තාය.

“ඈ බොල යස්ස පැටියෝ! තොට බත් කන්ටනෙ බැරි. මං අද තෝව නයාට කන්ට දානවා. හිටපිය තෝ වගේ උංගෙන් වැඩක් නෑ.”

සිය ආදරණීය නැන්දාගේ මේ වියරු විලාසයෙන් ‘නඳුන්’ බෙහෙවින් බිය විය. ඔහු මොරගසමින් හඬන්නට පටන් ගත්තේය. එහෙත් ‘ලතා’ ගමන නැවැත්වූයේ නැත. ඇය අලිපේර ගස පසුකර කැකුණ ගස ළඟින් වැට අයිනේ කොස්ගස් මණ්ඩිය දෙසට ගමන් කළාය. එක් මහ කොස් ගසක් පාමුල දැවැන්ත තුඹසක් දක්නට ලැබිණි. එය අඩි තුනහමාරක් පමණ උසින් යුක්ත විය. ‘ලතා’ තුඹසට ළංව ‘නඳුන්’ එහි බහාලන්නට මෙන් තැත් කළාය.

“අයියෝ මාව නයාට කන්ට දාන්ට එපා. බුදු නැන්දේ! ආයෙ එහෙම කරන්නෙ නැතෝ!”

මේ තුඹසේ නාගයකු සිටිනු දෑහින් දැක ඇති බැවින් ‘නඳුන්’ බෙහෙවින් භීතියට පත් විය. ඔහුගේ පියා දිනක් දැවැන්ත නයෙකු මරා ඌ ගින්නට ලා පිළිස්සූ හැටි ඔහුට මැවී පෙනුණේය. නයාගේ බියකරු පෙන ගොබය මේ දැන් තුඹසෙන් මතුවී තමන්ට දෂ්ට කරනු ඇතැයි ඔහු සිතුවේය. එබැවින් ඇගේ කෙස් කලඹේ එල්ලී හඬා වැළපෙමින් ඔහු අභය ඉල්ලා සිටියේය. ඊළඟ තත්ත්පරයේ ‘ලතා’ද කඳුළු සලමින් දරුවා කරපින්නාගෙන නිවස දෙසට පා තැබුවාය.

Tiniwick 2705@gmail.com