ශ්‍රී ලාංකික බෞද්ධ සංස්‌කෘතිය ආරම්භ වන්නේ මහින්දාගමනයත් සමඟය. ක්‍රි . පූ. 3 වැනි සියවසේ දී මිහිඳු මහරහතන් වහන්සේ ලංකාවට වැඩම කළ අවස්‌ථාවේ මෙරට රජ කළ දේවානම්පියතිස්‌ස රජතුමන් විසින් මහා සංඝයා උදෙසා වන භූමි ආරාම පූජා කිරීමත් සමඟ අභයභූමි සංකල්පය බිහිවිය. ඒ අනුව මිහින්තලා වන අරණ අභය භූමියක්‌ විය. මෙය ලෝකයේ පැරැණිතම අභය භූමිය ලෙස පිළිගත හැකිය. ඒ බව මිහින්තලේ මැද මළුවේ ඇති ඉපැරැණි සෙල් ලිපියකින් අනාවරණය වන බව පුරා විද්‍යාඥයෝ අවධාරණය කරති.

බුදු දහමින් පෝෂණය වුණු ශ්‍රී ලාංකික සංස්‌කෘතිය, ලෝකයේ සෙසු සංස්‌කෘතීන් අතරින් කැපී පෙනෙන ලක්ෂණයක්‌ ලෙස එහි පවත්නා අවිහිංසාව පෙන්වා දිය හැකිය. හෙක්ටයාර් 999.7ක විශාලත්වයකින් යුත් මේ අභය භූමිය මිහින්තලා කඳුවැටිය, කළුදිය පොකුණ, රාජගිරිලන කන්ද ආදී අවට වන ප්‍රදේශවල පැතිරී තිබේ. මුවා, ගෝනා, හාවා, ඉත්තෑවා, මීමින්නා, වල් ඌරා මෙන්ම අලියා ද මෙහි වෙසෙති. වන සත්ත්ව සහ වෘක්ෂලතා ආරක්ෂාක කිරීමේ ආඥා පනත අනුව අභය භූමියක්‌ තුළ වන ජීවීන් හා ඔවුන්ගේ ස්‌වාභාවික පරිසරය ආරක්ෂා කරන අතරතුර සාමාන්‍ය මිනිස්‌ ක්‍රියාකාරකම් සඳහා ද ඉඩකඩ ලැබෙන ලිහිල් නීති පද්ධතියක්‌ ක්‍රියාත්මක වේ. මෙහි ගොඩබිම දැවැන්තයා වන අලියා ඇතුළු වන සතුන් රාශියකට වාසස්‌ථාන හිමි වන අතර දේශීය ආවේණික ශාක සහ සත්ත්ව විශේෂ රාශියකට ද මෙහි වාසස්‌ථාන සපයයි. දුර්ලභ කුරුලු විශේෂ රාශියක්‌ මෙන්ම උරග විශේෂ රාශියක්‌ ද මිහින්තලය අභය භූමියේ දී සුලබව දැකිය හැකිය. අතීතයේ සිටම වනසත්ත්ව සංරක්ෂණයේ දී, ශ්‍රී ලංකාව ලෝකයේ විශිෂ්ට ස්‌ථානයක්‌ හිමිකර ගැනීමට සමත්වී ඇති බව ඒ අනුව පැහැදිලි වේ.

මේ ප්‍රදේශයට නීත්‍ය‌නුකූල රැකවරණය සඳහා 1938 මැයි 27 වැනිදා සිට මිහින්තලේ අභය භූමිය වනජීවී අභය භූමියක් ලෙස රජය ගැසට් මඟින් ප්‍රකාශයට පත් කළ අතර ඒ ප්‍රදේශයේ ජෛව විවිධත්වය හා පුරා විද්‍යාත්මක වටිනාකම සුරැකීම මෙහි ප්‍රධාන අරමුණ විය.

වංශ කථාවන්හි දැක්වෙන පරිදි ක්‍රිස්තු පූර්ව 247 දී ඵළඹෙන ඡෙමිට මුල මාසය හෙවත් පොසොන් පුර පසළොස්වක පොහොදා මිහිදු මහරහතන් වහන්සේ ප්‍රමුඛ ඉට්ටිය, උත්ථිය, සම්බල, බද්දසාල රහතන් වහන්සේලා නිර්මල දහම් පණිව්ඩය රැගෙන දඹදිව සිට මිස්සක පර්වතයට වැඩි සේක. එවකට ලක්දිව රජතුමා වු දේවානම්පියතිස්ස රජතුමා ම්හින්තලයේදි මෙම දුත පිරිසට හමුවිය.. මෙම ‍ ඓතිහාසික හමුවීම සිදුවූ ස්ථානය ශ්‍රී ලාංකික බෞද්ධයන් ගෞරව බුහුමානයෙන් වැඳුම් පිඳුම් කරති.

පොසොන් පොහොය දිනක දී මිහින්තලයේ අම්බස්තලයට වැඩමවා වදාළ අනුබුදු මිහිඳු මහ රහතන් වහන්සේ දුටුවේ සිත් කළකිරවන සුලු දර්ශනයකි. එදා දේවානම් පියතිස්ස රජතුමා ඇතුළු පිරිස ඒ මොහොතේ දුනු හී තල අමෝරා දඩයමේ යමින් සිටි අතර එකල මිහින්තලය අනුරාධපුරය ඇතුළු ප්‍රදේශ එකම වන දහනක් බවට පත්ව තිබිණි.‍

අනුබුදු මිහිඳු හිමිපාණෝ රජතුමාගේ නමින් ම රජතුමා ඇමතූහ. රජතුමාහට තමා නමින් අමතන මෙරට සිටින අනෙක් පුද්ගලයා කවුදැයි පුදුමයෙන් බැලීය. දර්ශනය දුටු රජතුමා එක් වරම නැවතිණ. පසුව දුනු හී තල ඉවත දමා ‍සාදු සාදු යැයි සාධුකාර දුන් අතර අනෙක් පිරිස ද රජතුමා අනුගමනය කළහ. මිහිඳු මහ රහතන් වහන්සේ තමන් පිළිබඳ මුලින් ම රජතුමාට කරුණු පැහැදිලි කළහ. මිනිසුන්ට මෙන් ම සියලු සිවුපා සතුන්ට ද, පක්ෂීන්ට ද සියලු ජීවීන්ට ද මේ දේශයේ ඕනෑම තැනක නිදහසේ සැරි සැරීමට අයිතියක් ඇති බවත් මේ භූමිය මහජනතාවට හා සෙසු සතුන් හා ශාකවලට ද අයිති බව පැවැසීය. රජු මෙහි අයිතිකරු නොව පාලකයා පමණක් බවත් මිහිඳු මහ රහතන් වහන්සේ දේවානම් පියතිස්ස රජතුමාට වදාළේ මිහින්තලය හා අනුරාධපුරය ඇතුළු වනගත භූමි ප්‍රදේශය අභය භූමියක් ලෙස ප්‍රකාශයට පත් කරන ලෙසට දේවානම් පියතිස්ස රජතුමාට උපදෙස් දෙමිනි.

ඒ අයුරින් ශිලා ලේඛනවල ත්‍රිපිටකයේ මහවංශයේ ලොව ප්‍ර‍ථම අභයභූමිය ලෙස අනුරාධපුරය හා මිහින්තලය නම් කළ පසුව එදා ජීවත්වූ ජනතාව එම ප්‍රදේශවල සත්ත්ව ශාක විනාශ කරන ක්‍රියාවලට පෙලඹුණේ නැත. දේවානම් පියතිස්ස රජතුමා පැනවූ නියෝගය එලෙස බොහෝ කාලයක් ක්‍රියාවට නැංවුණත් පසු කාලීන යටත් විජිත සමයේ ඒ නීති රීති එතරම් දැඩිව ක්‍රියාත්මක වූ බවක් පෙනෙන්නට නැත.

ඊට යාබදව ඇති අනුරාධපුරයේ අභය භූමිය ද 1938 මැයි 28 වැනිදා ගැසට් මඟින් ප්‍රකාශයට පත්කර ඇත.‍ එහි විශාලත්වය හෙක්ටයාර 3500.7 කි. එනම් අක්කර 8750 කි. ඒ අනුව මිහින්තලය අනුරාධපුරය අටමස්ථානය මහමෙවුනා උයන, කුට්ටම්පොකුණ, බටහිර ආරාමය, ඉසුරුමුනිය ආදී ප්‍රදේශ මෙම වනජීවී අභය භූමිවලට ඇතුළත් වේ.

ඒ ප්‍රදේශවල ගහ කොළ සතා සීපාවා සමඟ එහි ජෛව විවිධත්වය සුරැකීමට වනජීවී සංරක්ෂණ දෙපාර්තමේන්තුව වන සංරක්ෂණ දෙපාර්ත‍මේන්තුව පරිසර අමාත්‍යංශය පළාත් සභාව හා අදාළ පළාත් පාලන ආයතන ‍මීට වඩා මෙහෙයක් කළ යුතු ය. ඒ අන් කිසිවක් නිසා නොව මේ ස්ථානය අප රටේ පමණක් නොව ලොව පැරැණිතම අභය භූමිය වන බැවිනි. ශ්‍රී ලාංකික සංස්‌කෘතියේ ආරම්භය සනිටුහන් වන මිහින්තලාව ඓතිහාසික, පුරාවිද්‍යාත්මක සහ පාරිසරික වටිනාකමින් අනූන වේ. එබැවින් මිහින්තලා අභය භූමිය නොකැළැල්ව පවත්වා ගැනීම කෙරෙහි සියලු දෙනාගේ අවධානය යොමුවිය යුතුය.

ලොව ප්‍රථම අභය භූමිය ලෙස ප්‍රකාශයට පත්කළ මිහින්තලා අභය භූමියට අයත් වනජීවි රක්ෂිත කලාපය අක්කර දෙදහසකට වැඩි භූමියකි.

මිහින්තලා අභය භූමිය පොසොන් සමයේ දී ජනාකීර්ණ වේ. සැදැහැවතුන් විශාල වශයෙන් මෙම අභයභූමිය වෙත ඇදී එන්නේ ශ්‍රී ලාංකික ජන සමාජයේ අතිශයින්ම ඓතිහාසික වූත්, පූජනීය වූත් භූමිය දැකබලා ගැනීමට සහ වැඳපුදා ගැනීමට ය. වන අරණක පිහිටි මෙම පූජනීය භූමිය සැදැහැවතුන්ගෙන් පිරීයද් දී ඒ සමඟම එම භූමියට ආගන්තුක දැ ද එක්‌රැස්‌ වේ. වන්දනාකරුවන් විසින් රැගෙන එන සියලු දේ අභය භූමියට ආගන්තුක ය. මේවා එම පරිසරයට එක්‌ කිරීමෙන් එහි පවත්නා ස්‌වභාවික පරිසරය වෙනස්‌ වේ. එහි ජීවත් වන සත්ත්ව සහ ශාක විශේෂවල ජෛවීය පරිසරය විනාශ වීමෙන් වසර දහස්‌ ගණනක්‌ පුරා ආරක්ෂා් වූ ආවේණික ශාක සහ සත්ත්ව විශේෂ රාශියක්‌ එම ඓතිහාසික භූමියෙන් වඳවී යැම වැළැක්‌විය නොහැකි ය. එබැවින් ඓතිහාසික මිහින්තලා අභය භූමිය සංරක්ෂ ණය කර ගැනීම කෙරෙහි සැදැහැවතුන්ගේ අවධානය යොමු විය යුතුය.

සටහන-පමුදිනි සමරනායක 
ඡායාරූප - හිඳෝගම සමූහ

මහින්දාගමනයෙන් පසු මිහින්තලාවේ ගොඩනැගුණු සෑම ස්මාරකයක් ම ගොඩනැගිල්ලක්ම එකිනෙකට පරයන ඓතිහාසික වැදගත්කමකින් යුක්තය. මිහින්තලාව වැඳ පුදා ගන්නා බැතිමතුන් ට මෙන්ම මෙම භූමිය ගවේෂණයට, පර්යේෂණයට ලක්කරන්නන්ට අත් නොහැර දැකබලා ගත යුතු ස්ථානයකි මිහින්තලේ ඉපැරැණි රෝහල හෙවත් ගිලන් හළ.

භික්ෂූන් වහන්සේ විෂයෙහි අවශ්‍ය සිව්පසය සම්පාදනයෙහිලා ගිහි සමාජයට පැවරී ඇති භාරධූර කාර්ය නොපිරිහෙළා ඉටු කරනු වස් බුද්ධ පුත්‍රයන් වහන්සේ සඳහා ඉදිකළ බොහොමයක් සංඝාරාම හෙවත් විහාරාරාම තදාසන්නයේ රෝහල් පරිශ්‍රයක් ඉඳිකර තිබීම අනුරාධපුර යුගයේ ඉඳිකිරිම් සම්ප්‍රදායේ අනිවාර්ය අංගයක් බව පෙනෙයි. ථූපාරාමය සහ රුවන්වැලි සෑය ආසන්නයේ ද මෙවැනි රෝහල් දෙකක් අපට හමු වෙයි. නමුත් මේ වන විට එම ඉපැරැණි නටබුන් අතරින් පැහැදිළිව දැක බලාගත හැකි ලෙස, නටබුන් ශේෂව පැවතීම නිසා මිහින්තලේ බෙහෙත් ගෙය හෙවත් රෝහල සුවිශේෂත්වයක් ගනී.

මෙම රෝහල පිළිබඳ පළමු වතාවට 1910 දි එච්. සී. පී බෙල් මහතා විසින් පර්යේෂණයක් සිදු කරන ලදී. ඉන්පසු 1947 සෙනරත් පරණවිතානයන් ද පර්යේෂණ සිදු කර තිබේ.

ක්‍රි.ව 853-887 කාලයේ දෙවැනි සේන රජු විසින් මෙය ඉදි කරන්නට ඇතැයි පුරාවිද්‍යා මතයයි. රෝහලක ඇතුළත් විය යුතු සියලු අංග පරිපුර්ණ නේවාසික රෝගින් ට ප්‍රතිකාර ලබා දිය හැකි පරිදි වඩා විධිමත් කළමනාකරණයකින් යුතුව මෙය පවත්වා ගෙන ගිය බවට එනයින් සාක්ෂි හමුවෙයි.

මෙහි ප්‍රධාන පිවිසුම මිහින්තලා කන්දට මුහුණ ලා ඇත. මෙම රෝහල එකිනෙකට සම්බන්ධ මුත් කොටස් දෙකකින් යුක්තය. ඒ, විවෘත භුමියක් සහිත ඉදිරිපස කොටස සහ බුදු පිළිමය සහිත ඇතුළත කොටස ලෙස යි. මෙම විවෘත භුමිය සහිත ඉදිරිපස කොටස බාහිර රෝගී අංශයක් ලෙස භාවිතයට ගන්නට ඇතැයි සිතිය හැකිය. සෙන්ටිමීටර් 65ක් පමණ පළල්, සෙන්ටිමීටර් 40-75ක් තරම් උස් ප්‍රාකාරයකින් මෙය වට වී තිබේ. ප්‍රධාන පිවිසුමට අයත් ගල් උළුවස්ස මීටර් 1.95ක උසකින් සහ සෙන්ටිමීටර් 125ක පමණ යුක්තය. එයින් ඇතුළු වූ පසු දකුණු පසින් ඇතුළත දිග හා පළල මීටර් 5.20 සහ 4.20 සහිත කුටියකි. එහි ගල්කණු 6ක් තිබීමෙන් වහලයක් තිබෙන්නට ඇතැයි අනුමාන කෙරේ.

එළිමහන් භුමියේ වම්පස ට වන්නට බෙහෙත් ඇඹරීම සඳහා සෙන්ටිමීටර් 90ක පමණ විෂ්කම්භයකින් යුත් ඇඹරුම් ගලකි. එමෙන්ම ලංකාවේ දැනට හමුවී ඇති පැරැණි රෝහල්වල අනිවාර්ය අංගයක් වූබෙහෙත් ඔරුවක් මෙහිද වෙයි. මිහින්තලේ රෝහල් බිමේ ඇති බෙහෙත් ඔරුව විශිෂ්ටත්වයෙන් කැපී පෙනෙන බැව් පුරාවිද්‍යාඥයන්ගේ තහවුරුවයි. රෝගීන් ඖෂධ දියරයන් හි ගිල්වා තැබීමට මෙය යොදා ගනී. එය නැගෙනහිර ට දිශානුගතව ස්ථානගත කර ඇත. රෝගියාගේ හිස නැගෙනහිර සිටින සේ සකසා තිබේ. මිනිස් රුවට සමාන හැඩයකින් ඇතුළත හාරා ඇති මෙහි සියුම් කැටයම් පෙළකි. ඖෂධීය කොළ-පොතු කොටාගත් ඖෂධීය දියර, බෙහෙත් තෙල් ගැල්වීම, වාෂ්ප ගැල්වීම, කළල් හෙවත් මඩ නෑම ආදී විවිධ ඖෂධීය ප්‍රතිකාර විධික්‍රම රෝග නිවාරණයට යොදාගන්නට ඇතැයි සිතිය හැකිය. එමෙන්ම දාන ශාලාව සහ උණු පැන් ගෙයක්ද ඉදිරිපස කොටසේ දක්නට ලැබෙයි.

බුදු මැදුර, ඉපැරැණි මිහින්තලා රෝහලේ කැපී පෙනෙන අංගයකි. එහි පද්ම පීඨිකා දෙකක් දැක ගත හැකි අතර හිඳි හෝ සමාධි බුද්ධ ප්‍රතිමාවක් එහි ස්ථාපිත කර තිබෙන්නට ඇතැයි සිතිය හැකිය. නේවාසික රෝගීන්ගේ මානසික සුවතාව සදහා සමාධි සුවයෙන් වැඩ සිටින බුදු රුව ඉවහල් වන්නට ඇත. නේවාසික රෝගීන් සඳහා වෙන-වෙනම කාමර සකසා තිබෙන ආකාරය පැහැදිළිව දැක ගත හැකිය. නැගෙනහිර පැත්තෙහි කාමර පහක් ඇති අතර සෙසු පැතිවල කාමර හත අටක් පමණ තිබෙන්නට ඇතැයි අනුමාන කළ හැකිය.

එච්.සී.පි බෙල් සහ සෙනරත් පරණවිතාන විසින් සිදු කරන ලද පර්යේෂණාත්මක කැණීම්වලදී මෙම ඉපැරැණි රෝහල් බිමෙන් බුජම් දෙකක් සහ මැටි බඳුනක් සොයා ගන්නා ලදී. මේවා රෝහලේ වෙද හෙදකම් කටයුතු සඳහා භාවිතයට ගන්නට ඇතැයි නිගමනය කරන අතර මේවා දැනට අනුරාධපුර පුරාවිද්‍යා කෞතුකාගාරයේ සුරක්ෂිතව තබා ඇත.

මිහින්තලේ ඓතිහාසික පුරාණ රෝහල් පරිශ්‍රය එම භූමියෙන් සොයා ගත් විශිෂ්ට නිර්මාණයකි. මෙනයින් අපට පැහැදිලි වන්නේ ඉතා දියුණු වෙද-හෙද කලාවක් ද ඒ සඳහා පරිණත වෛද්‍යවරුන් ද එවකට සිටි බවයි. දියුණු වෛද්‍ය ක්‍රමයක් පැවතීමෙන් තව දුරටත් පසක් කරන්නේ එදා පැවති ජන සමාජයේ පරිණත බවයි.

*විශේෂ ස්තුතිය - මිහින්තලා රජ මහා විහාරවාසි සුරුක්කුලමේ ඉන්දරතන හිමියන්ට සහ කෞතුකාගාර නිලධාරී ගාමිණී සමරනායක මහතාට.

සකුන්තලා ජයසිංහ 
අඹන්පොල විශේෂ 
ඡායාරූප - හිඳෝගම සමූහ

ගහ කොළට ආදරය කිරීමේ මුල් පාඩම ලෝකයට කියා දුන් ප්‍රථම පරිසරවේදියා අපගේ සම්බුදු පියාණෝ ය. පඨමං බෝධි පල්ලංකං.... ලෙසින් අනිමිසලෝචනයෙන් සතියක් නොසෙල්වී වැඩ හිඳිමින් බුද්ධත්වය පිණිස තමන්වහන්සේට උපකාර වූ බෝධීන්වහන්සේට උන්වහන්සේ කෘතගුණ සැලකුහ. ඒ වර්ෂ2564 කට ඉහතදී ය. එසේම කුදු මහත් ලෝකයාට ජීවිත යථාර්තය හුවා දක්වනු පිණිස බුදුපියාණෝ උපමාවට ගත්තේ පරිසරයයි. "ඵුප්පං මිලායාති යථා ඉදංමේ- කායෝ තථායාති විනාසභාවං". ගස තමා වෙත එළැඹසිටින සියලු දෙනාට සෙවන සදන්නේ ය (මිලින්ද පඤ්හය)"රුක්ඛෝ උපගත මනුපවිට්ඨානං ජනානං ජායා දෙති", "රුක්ඛෝ ජායා වෙමත්තං න කරෝති"සතුරු මිතුරු සියලු දෙනාට සෙවන දෙස ගස මෛත්‍රියේ පාඩම උගන්වයි. භික්ෂු ප්‍රාතිමෝක්ෂයෙහි දක්වන පරිදි "සප්‍රාණි වෘක්ෂලතාදිය සිඳලීමෙන් පචිති වේ"එනම් බුද්ධ පුත්‍රයන් වහන්සේලාට තුරු ලතා නැනසීම හා හානි කිරීම තහනම් ය. එහෙත් කාලානුරූපීව විපරිනාමයන්ට බඳුන් වූ මානව ක්‍රියාකාරකම් පරිසරය තලා පෙළා දැමුවේ ය. එකී නොපනත්කම් කළ මිනසාට විලංගු දැමීමට අද කොරෝනා සමත් වී ඇත.

ජගත් පරිසර දිනයත් උතුම් පොසොන් පොහෝ දිනයත් යෙදී ඇත්තේ 2020 ජුනි 5 දා ටය. එවන් දිනෙක කි.පු. තුන් වැනි සියවසේ දී මහරහත් මිහිදු හිමි ලක් වාසීන්ට කියා දුන් ප්‍රථම පරිසර පාඩම සිහි කැඳවිය යුත්තේ එය කාලීන ව වඩා වැදගත් මාතෘකාවක් ද වන නිසා ය. “මහරජ තොපට මෙන් ම සියලු සිව්පා සතුන්ට ද පක්ෂීන්ට ද සියලු ජීවීන්ට ද මේ දේශයේ ඕනෑම තැනක විසීමට නිදහසේ සැරි සැරීමට අයිතියක් ඇත. මේ භූමිය අයිති මහ රජ තොපට නොව මහජනතාවට හා සෙසු සතුන්ට ය. තොප මෙහි අයිතිකරු නොවේ පාලකයා පමණි” දුණු හී අමෝරාගෙන දඩ කෙළියේ යෙදෙමින් සිටි තිස්ස රජ නවතා මිහිදු හිමි වදාළ බවත් මිහින්තලය ඇතුළු වනගත ප්‍රදේශය අභය භූමියක් බවට පත් කරන ලෙසත් දේශනා කළ බව කියැවේ. ඒ අනුව මහරජ මිහින්තලය අභයභූමියක් ලෙස නම් කළ බවට හා එය මෙලක ප්‍රථම අභය භූමිය වන බවට ප්‍රකාශ වෙතත් ඊට නීතිමය රැකවරණ ලැබුණේ 1938 මැයි 27 දින වනජීවී සංරක්ෂණ දෙපාර්තමේන්තුව මගින් අනුරාධපුර වනජීවී අභය භූමියක් ලෙස මිහින්තලේ ගැසට් මගින් ප්‍රකාශයට පත් කිරීමත් සමඟ ය.

අඩතැනි කලාපයට අයත් ශේෂ කඳුවැටියක් වශයෙන් මිහින්තලා අභය භූමිය අක්කර 2500 කි. හෙක්ටයාර් 999.6 කි. මිහින්තලා කන්ද, අනෛකුට්ටි කන්ද,රාජගිරි ලෙන කන්ද,අටසැට ලෙන් පිහිටි කන්ද,ගිරිභණ්ඩ සෑය පිහිටි කන්ද ආදි කඳු ගැට පෙළින් මිහින්තලාව වටවී ඇත. මිස්සක පව්ව, මිගදාය ලෙස මිහින්තලය පර්යාය නාමයන්ගෙන් හඳුන්වනු ලැබුවේ ඒය මුවන් ගහණ වනයක් වූ නිසාත් මෙම වනය අඹ වෘක්ෂ ගහණ කැලෑවක් වූ හෙයින් අම්බස්තලය ලෙස හැඳින් වේ. තවද ධාතූන් වහන්සේ තැන්පත් කරමින් ස්ථූප ගණනාවක් ඇති හෙයින් පුරාණයේ චෙිතියගිරිය හෙවත් ස්ථූපකන්ද ලෙස ද නම් ලබා ඇත.

මිහින්තලා අභය භූමිය ජෛව විවිධත්වයෙන් යුතු ය. නානා වෘක්ෂ ලතාදියෙන් සුසැදිය. මේ පුණ්‍ය භූමිය පොසොන් සමයේ දී සැදැහැවත් ජනී ජනයාගෙන් පිරී යන්නේ ය. හිත් පිත් නැති මේ සැදැහැවතුන් තමන් කිහිළි ගන්නාගෙන ආ සිලි කවර,ප්ලාස්ටික් ඈ නොකී දෑ තැන තැන දමා ගියේ ය. මේ සඳහා විවිධ පරිසර කමිටු ජනතාව දැනුවත් කරමින් විවිධ උත්සාහයන් ගත්තේ පරිසරය රැක ගැනීමට ය. මුවන් ගහණ මේ වනයේ මුව පොව්වෝ ඉටි කවර කා මිය ගියහ. ඇතැම් කාල වලදී දඩයක්කාරයන්ගෙන් වන මි මින්නනන්, කබල්ලෑවන් ඈ සතුන් රැක ගත යුතු විය. එහෙත් අද තත්ත්වය ඊට හාත්පසින්ම වෙනස් ය. කොරෝනා, මිනිසා අකර්මණ්‍ය කොට සතා සිවුපාවාට නිදහසේ ජීවත් වන්නට ඉඩ සලසා ඇත. අග්ගඤ්ඤ සූත්‍රයෙහි දක්වන පරිදි පරිසරය අනිසි ලෙස භුක්ති විඳීමෙන් මිනිස් සිත් සතන් පිරිහීමත් එයින් එම පරිසරය විකෘතීන්ට ලක් වීමත් සමාජ විෂමතා හා අර්බුද හට ගැනීමත් සිදු වන්නේ ය.අප එළැඹ ඇත්තේ එවන් යුගයකට ය. තුන් කල් දක්නා සම්බුදු හිමි දෙසූ දහම් නො ඇසූ අපට කොරෝනා කදිම පාඩමක් උගන්වා ඇත. මිනිසා ගේ ප්‍රාණ ය රැක දීමට නිර්ලෝභිව ඔක්ෂිජන් ලබා දුන් දැවැන්ත වෘක්ෂලතා බිම හෙළූ අපට කොරෝනා දඩුවම් කළේ සිත්පිත් නැතිව ය. මෙනිසා මිහින්තලය සේම සෙසු පරිසර පද්ධතීන් නුඹට මට සේ ම හෙට උපදින දරුවන්ටත් රැක දීම මිහිදු හිමිටයන්ට සේ ම සම්බුදු පියාණන්ටත් ගෞරව දැක්වීමකි.

සටහන නිලූකා ඩී. තිලකරත්න

නොවෙනස් වන දෙයක් යමකුට වටහා දෙන්නට හොඳ ම උපහැරණයක් වන්නේ, ගලේ කෙටූ අකුරක් වැනි යැයි පැවැසීම ය. අප මුතුක් මිත්තන් එය අර්ථවත් කර ඇත්තේ, වදනක් දෙකක් ගලේ කොටා නොව, හෙළ සංස්කෘතිය මේ යැයි ගලේ කොටා තැබීමෙනි. සෙල් ලිපි, ටැම් ලිපි, පුවරු ලිපි අතුරින් ක්‍රි.ව. 10 වැනි සියවසට අයත් හතරවන මිහිඳු රජ සමයේ යයි සැළකෙන මිහින්තලා පුවරු ලිපිය, ප්‍රශස්තතම ශිලා ලිපි ඝනයට වැටෙන්නේ, එය ආගමික, සංස්කෘතික, සාහිත්‍ය, දේශපාලනික, සමාජ තොරතුරු රැසක් අන්තර්ගත වී ඇති සෙල් ලිපියක් බැවිනි.

ශිලා ලේඛන හෙවත් සෙල් ලිපි වශයෙන් හඳුන්වන්නේ ‘ගල්තලාවක හෝ ස්ථම්බයක හෝ යම්කිසි පුවරුවක යම් විශේෂ කාරණයක් අරබයා නිර්මාණය කරන ලද කිසියම් වැදගත්කමකින් යුක්ත ලියවිල්ල’ යන්නයි. ලක්දිව පුරාතන ලියවිලි බොහොමයක්ම ශිලාලේඛන ගණයට වැටෙන අතර, . ක්‍රි.පූ තුන්වැනි සියවසේ දී පමණ සිට සෙල්ලිපි රචනා කිරීම උදෙසා ලක්වැසියන් පෙලඹී ඇත. අද වන විට ඒ ඒ යුගයන්හි රචනා කරන ලද සෙල්ලිපි රාශියක් හමුව තිබේ. "ලංකාවේ ඇති ශිලාලේඛන ප්‍රධාන වශයෙන් ලෙන්ලිපි, ගිරිලිපි, ටැම්ලිපි හා පුවරුලිපි යනුවෙන් කොටස් කළ හැකිය"යන්න විද්වත් මතයකි. ලෙනක හෝ ගුහාවක කටාරම අසල කොටා ඇති එම ලෙන පිළිබඳ තොරතුරු සඳහන් වන ලිපිය ‘ලෙන්ලිපි’(රිටිගල හා වෙස්සගිරි ආදි ලිපි) නමින් ද, පිහිටි ගලෙහිම කොටා ඇති ලිපි ද හමු වේ. (තෝනිගල ලිපිය) මේවා ‘ගිරිලිපි’ යනුවෙන් ද නම් කෙරේ. ‘ටැම්ලිපි’ යනුවෙන් හැඳින්වෙන්නේ ලිපිය සඳහාම විශේෂයෙන් ගල් කණුවක් සාදා, එහි අත්‍යවශ්‍ය තොරතුරු සංග්‍රහ කොට මහජනයා වෙත ප්‍රදර්ශනය කරන ලද ලිපි විශේෂයයි. "රාජසභාවේ සම්මතය පරිදි ඒ ඒ තැන්වල දී දෙන ලද විශේෂ වරප්‍රසාද හා රජ ඇමැති ආදීන්ගේ නාමයන් ද, නියෝග ද මේ ලිපිවල දක්නට ලැබේ" (බදුල්ල නෑගම ටැම් ලිපි). ගල්පුවරුවක හෝ නොඑසේනම් ගල්ලෑල්ලක ලියූ ලිපි හඳුන්වන්නේ ‘පුවරුලිපි’ යන නමිනි. අනුරාධපුරයේ ථූපාරාමය සහ මිහින්තලා පුවරු ලිපිය මේ පුවරු ලිපි ගණයට අන්තර්ගත වේ.

අනුබුදු මිහිඳු මාහිමියන්ගේ පාදස්පර්ශය ලබා, ලක්දිව වන්දනීයත්වයට පත් වූ මිහින්තලාව, බුදු දහමේ පණිවිඩය ලැබීමත් සමඟ ඉතිහාසයේ රන් අකුරින් ලියැවිණි. පූජනීයත්වය ද, පුරාණ ලක්දිව සංස්කෘතිය ද ලියැවුණු ලේඛනයන් ලෙස මිහින්තලා සෙල්ලිපි හඳුන්වා දිය හැකි අතර, "ක්‍රිස්තු පූර්ව තුන්වන සියවසේ පටන් ක්‍රිස්තු වර්ෂ පළමු සියවස දක්වා වූ කාල පරිච්ඡේදයකට වැටෙන සියවස් හතරකට අයත් වන බ‍්‍රාහ්මී සෙල්ලිපි 75ක් පමණ මිහින්තලා භූමියේ ඇත. මෙයින් 58ක් මිහින්තලා කන්දේ ද, 9ක් රාජගිරි කන්දේ ද, 8ක් මිහින්තලා ආනයිකුට්ටි කන්දේ ද ඇත"යන්න ද විද්වත් මතයකි. එහෙත් උක්ත ශිලාලේඛන සියල්ලක්ම පාහේ බ‍්‍රාහ්මී අක්‍ෂරවලින් නිර්මාණය කර ඇති අතර, ක්‍රි.ව. දහවන සියවසෙහි රචිත මිහින්තලේ පුවරු ලිපිය මිහින්තලේ සියලූ ම සෙල්ලිපි අතරින් දීර්ඝතම වූත්, ප්‍රශස්ත වූත් ලේඛනයක් වශයෙන් වැදගත් වන්‌නේ, ක්‍රි.ව. 10 වැනි සියවසට අයත් හතරවන මිහිඳු රජතුමාගේ මිහින්තලා පුවරු ලිපියයි"යන්න ද විද්වත් මතයකි. පැත්තක පේළි පනස්අට (58) බැගින් යුක්ත මිහින්තලා සෙල්ලිපිය කාණ්ඩද්වයකින් සමන්විත ය. සිරිසඟබෝ අභය මහ රජතුමා හෙවත් සිව්වන මිහිඳු භූපාලයන්ගේ සමයෙහි මිහින්තලා සෙල්ලිපිය නිර්මාණය වූ බව සෙල්ලිපියෙහි සඳහන් වේ. ප්‍රස්තූත සෙල්ලිපියෙහි අක්‍ෂරයක් අඟලත්, අඟල් එකයි කාලත් අතර විශාලත්වයකින් යුක්ත වේ. චිර ප්‍රසිද්ධ තත් ලේඛනය භික්‍ෂු ශාසනය පිළිබඳ වැදගත් තොරතුරු රාශියක් ගවේෂණය උදෙසා මහඟු පිටු බලයකි. අනුරාධපුර යුගයේ අග භාගයට අයත් මිහින්තලා සෙල් ලිපියේ සිංහල භාෂාව හා සංස්කෘතිය පිළිබඳද සපයාගත හැකි තොරතුරු රාශියකි.

දැනට හමුවන සුවිශාලම සෙල්ලිපි අතරින් එකක් වන මිහින්තලා සෙල්ලිපිය මඟින් එම යුගයේ විහාර පාලනයේ සංවිධානාත්මක බව පිළිබිඹු කරවයි. විශේෂයෙන්ම මිහින්තලා පුවරුලිපියෙන් අභයගිරි හා සෑගිරි යන උභය විහාරයන්හි පනවා තිබූ නීති රීති හා අයබදු සම්බන්ධයෙන් තොරතුරු හෙළි වන අතර, මේ ලිපියෙහි හත සහ අට පේළිවලින් ‍සෙල් ලිපියෙහි පරමාර්ථය දක්වා තිබේ.

දහවන ශතවර්ෂය මිහින්තලයේ සෙල්ලිපි සම්බන්ධයෙන් ඉතා සුවිශේෂ වූ කාල පරිච්ඡේදයක් වුව ද, උක්ත ශතවර්ෂයෙන් පසුව අභිලේඛන කිසිවක් මිහින්තලයෙන් හමු වී නැත. එනම්, අනුරාධපුරයෙන් පොළොන්නරුවට රාජධානිය සංක්‍රමණය වීමත් සමඟ, මිහින්තලය හා සම්බන්ධව වැදගත් කිසිවක් සිදු නොවීම හේතුකොටගෙන දහවැනි ශතවර්ෂයෙන් පසුව මිහින්තලයේ සෙල්ලිපි නිර්මාණය වී නැතැයි සිතිය හැකි ය. මිහින්තලා පුවරුලිපිය වැදගත් වනුයේ ශාසනික වශයෙන් හා ඓතිහාසික වශයෙන් තොරතුරු පර්යේෂණය කිරීමට පමණක් නොව, තත් යුගයේ භාවිත භාෂාව පිළිබඳ පුළුල් අවබෝධයක් ලබා ගැනීමට ද එය ප්‍රයෝජනවත් වේ.

මිහින්තලා සෙල්ලිපියෙහි භාවිත භාෂාව ප්‍රවේශය ඓතිහාසික, පුරාවිද්‍යාත්මක මෙන් ම, භාෂාත්මක වශයෙන්ද වැදගත් මූලාශ්‍රයන් ලෙස හඳුන්වා දිය හැකි ය. තත්කාලීන සමාජයෙහි තොරතුරු ඒ අයුරින් ම මේවායෙහි සටහන්ව තිබීම, සෙල්ලිපිවල අගය තීව්‍ර වීමට හේතු පාදක වී ඇත. අද්‍යතන යුගයෙහි මෙන් ලේඛන කලාව නොදියුණුව පැවැති චිරන්තන අවධියේ සඳහන් කළ යුතු සැම කරුණක්ම ඉතා කෙටියෙන් හා නිරවුල්ව ශිලාලේඛනය තුළ අන්තර්ගත කිරීමට නිර්මාණකරුවාට සිදු විය. ඔවුන් රළු ගල් තලාව අක්‍ෂර නිර්මාණය කිරීමට තරම් සුමට වන පරිද්දෙන් සකස් කොට චිරාත් කාලයක් පවතින අයුරින් වැදගත් කරුණු ඒ තුළ අන්තර්ගත කිරීමට වගබලා ගෙන ඇත. සෙල්ලිපි කිහිපයක් හැර සෙසු බහුතරයක් ප්‍රමාණයෙන් කුඩා වීමට තත් සාධකය හේතු වන්නට ඇති බව උපකල්පනය කළ හැකි ය.

අනුරාධපුර යුගයේ අග භාගයට අයත් මිහින්තලා සෙල් ලිපියේ බෞද්ධ භික්‍ෂු ශාසනය පිළිබඳ වැදගත් තොරතුරු රාශියක් සොයා ගැනී‌මට මං සපයන අතර, ඉන් භාෂාව හා සංස්කෘතිය පිළිබඳ තොරතුරු රැසක් හෙළිදරව් කරගත හැකි ය. මෙතෙක් හමු වී ඇති සුවිශාලම සෙල්ලිපි අතරින් එකක් වන මිහින්තලා සෙල්ලිපිය මඟින් එවකට සංවිධානාත්මක විහාර පාලනයක් තිබුණු බව පැහැදිලිව සඳහන් කර ඇත. සෙල් ලිපියෙහි අරමුණ හත සහ අට යන පේළිවලින් දක්වා තිබේ. විශේෂයෙන් ම මෙහි අභයගිරි හා සෑගිරි යන උභය විහාරයන්හි පනවා තිබූ නීති රීති හා අයබදු සම්බන්ධයෙන් නිර්මාණය වූවක් බව පෙනේ. මිහින්තලයේ සෙල්ලිපි දසවන ශතවර්ෂයෙන් හමුවීමෙන් පසුව, අභිලේඛන කිසිවක් මිහින්තලයෙන් හමු නොවීය. රාජ්‍ය බලය අනුරාධපුර යුගයෙන් පොළොන්නරුවට සංක්‍රමණය වීම නිසා, මිහින්තලය හා සම්බන්ධව වැදගත් කිසිවක් සිදු නොවීම එයට ප්‍රධාන හේතුව වන්නට ඇත. ඓතිහාසික වශයෙන් තොරතුරු පර්යේෂණය කිරීමට මෙන් ම, එකළ භාවිත භාෂාව පිළිබඳ පුළුල් අවබෝධයක් ලබා ගැනීමට ද මිහින්තලා පුවරුලිපිය වැදගත් වේ. "අනුරාධපුර යුගයේ අවසාන භාගයේ වනවිට පැවැති හෙළබස් ආර කෙබන්දක්ද යන්න මේ ලිපියෙන් මැනවින් අවබෝධ කරගතහැකි වෙයි. සිංහල භාෂාව, සංස්කෘත භාෂාව හා මිශ්‍ර වීමට පෙර, හෙළබස් ආර මේ යැයි දකවන කැටපතක් වැන්න. භාෂා සාහිත්‍ය පිළිබඳ ඉතිහාසය ගැන කරුණු සොයන්නවුන්ට මේ ලිපිය වැදගත් ය"යන්න විද්වත් මතයකි.

මිහින්තලා සෙල්ලිපියේ දී භාවිත සුවිශේෂී භාෂා ලක්ෂණ පිළිබඳ අවධානය යොමු කිරීමේ දී, තදනුබද්ධ සමාජයේ ව්‍යවහාරික භාෂාව පිළිබඳ ද අවධානය යොමු විය යුතු වේ. මහාචාර්ය විල්හෙල්ම් ගෛගර්ගේ යුග බෙදුම්වලට අනුව ක්‍රි.ව. 8-13 සියවස්, මධ්‍ය සිංහල යුගයට අයත් වේ. මිහින්තලා සෙල්ලිපිය ද එම කාල පර්ච්ඡේදයට අයත් වන බැවින් එහි පැනෙන භාෂා ලක්‍ෂණ ද මධ්‍ය සිංහල යුගයේ භාෂා ලක්‍ෂණ විය යුතු වේ. මේ සෙල්ලිපියටම සුවිශේෂ වූ භාෂා ලක්‍ෂණ කිහිපයක් ද මේ මඟින් දැක ගැනීමට හැකි වේ. මෙතෙක් සිංහල භාෂාවෙහි දක්නට නොලැබුණු ‘සරඅත් හලත් වෙසෙස’ හෙවත් ස්වරාන්ත හලන්ත වෙනස මේ සෙල්ලිපියෙහි දක්නට ලැබේ. සමකාලීන සමාජයෙහි ස්වරාන්ත අක්‍ෂරයන්ට වඩා හලන්ත අක්‍ෂර භාවිතයට ගෙන තිබීමෙන් එකළ ලේඛකයන් ස්වරාන්ත වචනවලට වඩා හලන්ත වචනවලට ඇල්මක් දැක්වීම හෝ ස්වකීය පාණ්ඩිත්‍යය ප්‍රකට කරනු වස් භාෂාව මෙලෙස යෙදුවේ දැයි සිතිය හැකි ය. එම කඨෝර භාෂා යෙදීම සමඟම සාම්ප්‍රදායික ව්‍යාකරණය තුළ එතෙක් දක්නට නොලැබුණු ‘ඇ’කාර භාවිතය හා ඒ සඳහාම වෙන්වූ සංකේතයක් හඳුන්වාදීම මිහින්තලා පුවරු ලිපියෙන් දක්නට ලැබේ. ‘ඇ‘කාර භාවිතයේ සංවර්ධනීය අවස්ථාවක් පිළිබිඹු කරන්නක් ලෙස මිහින්තලා පුවරු ලිපිය හඳුන්වා දිය හැකිය. ‘ඇ’කාර බහුලව යොදාගෙන ඇති බැවින් ද, මධ්‍ය සිංහල යුගයේ භාෂාව තරමක් උච්ඡාරණයට අපහසු කඨෝර භාෂාවක් බව පළ වේ. සාමාන්‍ය සම්ප්‍රදාය නම් සඤ්ඤක අක්‍ෂර හල් නොකිරීමයි. එහෙත් මේ සෙල්ලිපියෙහි එවැනි අක්‍ෂර හල් කර තිබේ. සඤ්ඤක අක්‍ෂර හල් වීමේ දී ඒ වෙනුවට බිංදුව හෙවත් අනුස්වාරය යෙදීම සාමාන්‍ය රීතියයි. මිහින්තලා පුවරු ලිපියෙහි තත් සම්ප්‍රදාය අතික්‍රමණය කර ඇති බවක් දක්නට ලැබේ. මිහින්තලා සෙල්ලිපිය තුළ අනුනාසිකාක්‍ෂරයන්ගේ බිහිවීම, වර්ධනය හා මුහුකුරා යාම යන ලක්‍ෂණත්‍රයම දක්නට ලැබේ. විභක්ති සූචක අපර නිපාත යෝගය මධ්‍ය සිංහල යුගයට පෙර භාවිත වී නැත. මිහින්තලා සෙලිලිපිය තුළ ද 'ඝ', 'ජ'වීම පමණක් නොව, අක්‍ෂරද්වයම මිශ්‍රවද තිබෙනු දක්නට ලැබේ. මේ යුගයේ භාෂාවේ දක්නට ලැබෙන සුවිශේෂ ලක්‍ෂණයක් නම්, පදාන්ත ගාත්‍රාක්‍ෂරයන් හල් වීමයි. එහි දී පදාන්ත ‘හ’කාරය හැර අනෙක් සියලූ අක්‍ෂරයන් හල් වේ. මෙය මධ්‍ය සිංහල යුගයට සුවිශේෂ වූ ලක්‍ෂණයකි. උච්ඡාරණ අපහසුව නිසා පදාන්ත ‘හ’කාරය හල් නොවූ බව සිතිය හැකි ය. අයදතන යුගයේ පවා ‘හ’කාර හල් නොවේ. x පූර්වක්‍රියා හා අතීත කෘදන්ත සමව යෙදීම බොහෝවිට පූර්වක්‍රියා පදයට සමාන ලෙස අතීත කෘදන්ත පදය භාවිතයට ගෙන ඇති බවට උදාහරණ මිහින්තලා සෙල්ලිපිය මඟින් සනාථ වේ. උදා: ‘ලක්දිව පහයමින් සිටැ සිරිසඟ්බොය් අබහය් මහරජ්හු’ මෙහි දී ‘පහයමින් සිටැ’ යන පදද්වය අතීත කෘදන්තයක් වශයෙන් යෙදී ඇත. මහප්‍රාණාක්‍ෂර බහුලව යොදා ගැනීම ප්‍රාකෘත යුගයේ පැවැති ලක්‍ෂණයකි. මිහින්තලා සෙල්ලිපියට අනුව දීර්ඝ ස්වර මෙන් ම, හ‍්‍රස්ව ස්වර ද භාවිතයට ගෙන ඇති බව විද්‍යමාන ලක්‍ෂණයකි. මිහින්තලා පුවරු ලිපියට අනුව ‘ච’කාර වෙනුවට ‘ස’කාරය බහුලව යොදා ඇති බව දක්නට ලැබේ. සෙසු සෙල්ලිපිවලට සාපේක්‍ෂව මිහින්තලා සෙල්ලිපියට පමණක්ම සුවිශේෂ වූ භාෂා ලක්‍ෂණ ද දැකිය හැකි ය. මෙහි එන ‘බිම්සොවස්’ යන පදය මිහින්තලා පුවරු ලිපියට පමණක් ම සුවිශේෂ වූවක් ලෙස මැදඋයන්ගොඩ විමලකිත්ති හිමියෝ දක්වති . වර්තමානයේ ණ, න, ළ, ල භේදය පිළිබඳ විද්වත් පර්ෂදයේ අවධානය ලැබී ඇති බව පෙනේ. ශිලාලේඛනවල දී පවා උක්ත වියරණ විධි භාවිතයට ගෙන ඇති බවට හොඳ ම උදාහරණයක් වන්නේ, මිහින්තලා සෙල්ලිපියයි. සමස්තයක් වශයෙන් සලකා බලන කල්හි මිහින්තලා පුවරු ලිපිය අක්‍ෂර වින්‍යාසය, පද බෙදීම ආදිය පිළිබඳ සංදිග්ධතා මතු කරයි. නිගමනය ලක්දිව දීර්ඝතම සෙල්ලිපි අතුරින් එකක් වන මිහින්තලා පුවරු ලිපිය සහ ඊ වශයෙන් කාණ්ඩද්වයකින් සමන්විත වේ. මෙහි දී කාණ්ඩය යටතේ අභයගිරි හා සෑගිරි විහාරස්ථානයන්හි පැවැත්විය යුතු සිරිත් විරිත් ගැන පැහැදිලි කෙරෙන අතර, ඊ කොටස මඟින් ආරාමික සේවකාදීන්ට ගෙවන වැටුප් පිළිබඳ සඳහන් වේ. හතරවන මිහිඳු රජුගේ යුගයෙහි පිහිටුවන ලද මෙය මධ්‍ය සිංහල යුගයට අයත් වන සෙල්ලිපියක් වන බැවින්, තත් යුගයේ භාෂා ලක්‍ෂණ පිළිබඳ පුළුල් අවබෝධයක් ලබා ගනු වස් මහෝපකාර වනු ඇත. එම යුගයේ භාෂා ලක්‍ෂණ මෙන් ම, මිහින්තලා පුවරු ලිපියටම පමණක් සුවිශේෂ වූ භාෂා ලක්‍ෂණයන් අවබෝධ කර ගැනීමට ද මේ ලිපිය ප්‍රයෝජනවත් වනු ඇත. එමතුද නොව, මුල්කාලීන වියරණ විධි පිළිබඳ පුළුල් අවබෝධයක් ඇති කර ගැනීම උදෙසා ද මිහින්තලා සෙල්ලිපිය ප්‍රයෝජනවත් ය. උක්ත කරුණු අනුව තත්කාලීන ඓතිහාසික තොරතුරු සඳහා මෙන් ම, භාෂා භාවිතය හා ව්‍යාකරණාංග පිළිබඳ ද පෘථූල අවබෝධයක් ලබා ගැනීමට මිහින්තලා පුවරු ලිපිය ප්‍රයෝජනවත් වන බව නිගමනය කළ හැකි ය.

සටහන -චින්තා රණසිංහ 
තොරතුරු - ලේක්හවුස් පුස්තකාලය සහ අන්තර්ජාලයෙනි

මිහින්තලේ පළමු ආලෝක පූජාව පැවැත්වූයේ 1963 පොසොන් මස 06 වැනිදා ය. මිහින්තලා පුදබිම වෙත ප්‍රවේශ වන 1843 කින් යුතු පියගැට පෙළ දෙපස, විදුලි ආලෝකයෙන් ඔපවත් කිරීම සඳහා ලේක්හවුස් කාර්මික අංශයේ මෙන් ම, නඩත්තු අංශයේ සේවකයෝ සති කිහිපයකට පෙර සිට ම මිහින්තලා පුදබිම පාමුල කඳවුරු බැඳගෙන කටයුතු කළහ. ඊට අවැසි පහන් කණු, විදුලි බල්බ, රැහැන් පමණක් නොව, විදුලි ජනන යන්ත්‍ර පවා රැගෙන ආවේ කොළඹ සිට ය. දුෂ්කර ම කාර්යය වී තිබුණේ ඒවා කන්ද උඩට ගෙනයෑම ය. ඒ සඳහා ලේක්හවුස් කාර්මික ශිල්පීන් දිවා රෑ නොතකා සහය විය.

පොසොන් සඳ පැහැබරය. අරලිය මල් සුවඳ තැවරුණු පියගැටපෙළ එකින් එක නැඟ ඉහළට යන බැතිමතුන් දහස් ගණනකි. වෙනදාට තැනින් තැන දැල්වෙන කැකුණ පහන්, මී තෙල් , පොල් තෙල් පහන් එළිය පරයමින් හාත්පස විදුලි ආලෝකයෙන් ඔපවත්වී තිබෙන්නේ පෙර කිසිදිනෙක නොවූ විරූ දසුනකිනි. ගල්කුලම හන්දියේ සිට ඉහළ බලනවිට පෙනෙන්නේ පොසොන් සඳ සමීපයට යා හැකි ආලෝක ධාරාවක් ඉහළට ඇදී යනවාසේය. ඒ එළි දිගේ ඉහළට ගොස් උඩමළුවේ සිට පහළ බලනවිට පෙනෙන දර්ශනය මහත් ආශ්චර්යක් බඳුය. පොලොවෙන් ඉහළ ආකාසයේ දිව්‍ය විමානයක සිට පහළ දකිනා හැඟීමකින් සිත් පහන් වෙයි. මොහොතකට සිත නිරාමිස සතුටකින් ඉතිරී යයි.

අනුරපුරයම පොසොන් අසිරියෙන් ඔපවැටී ඇත්තේ වෙනදාට නැති අසිරියකිනි. දළදා ප්‍රදර්ශනයට පේවී පැමිණි බැතිමතුන් මෙන් වන්නිහත්පත්තුවෙි පමණක් නොව දුර ඈත සිට බැතිමතුන් මිහින්තලයට පැමිණ ඇත්තේ ආලෝකවත් වන මිහින්තලා පුදබිම සිත්සේ වැඳපුදා ගන්නටයි.

වෙසක් පොහොයට ජය ශ්‍රී මහ බෝධිය උඩමළුවෙි සිල් සමාදන්වීමට පැමිණි පිරිස ගමේ ගෙවල්වලට ගියේ පොසොන් පොහොය ගැන අලුත් ආරංචියක් රැගෙනයි. කොළඹ රටේ සැණකෙළි උස්සවයක සිරියෙන් පොසොන් පොහොයට මිහින්තලා පුදබිම විදුලි ආලෝකයෙන් බබළන බව ඒ අලුත්ම ආරංචියයි. ඒ ආරංචිය කටින් කට ගොස් වන්නිහත්පත්තුවම පොසොන් සැනකෙළියට පේවුණා සේ ය. දුරබැහැර සිට පැමිණි පිරිස් ඒ ගැන දැනුවත්වී තිබුණේ ගුවන්විදුලියෙනි. දිනමිණ , ඩේලිනිවුස් පුවත්පත්වලද මේ ගැන කෙටි දැනුම්දීම් කර තිබුණි.

පළමු ආලෝක පූජාව

මෙලෙස මිහින්තලේ පළමු ආලෝක පූජාව පැවැත්වූයේ 1963 පොසොන් මස 06 වැනිදායි. මිහින්තලා පුදබිම වෙත ප්‍රවේශ වන 1843 කින් යුතු පියගැට පෙළ දෙපස විදුලි ආලෝකයෙන් ඔපවත් කිරීම සඳහා ලේක්හවුස් කාර්මික අංශයේ මෙන්ම නඩත්තු අංශයේ සේවකයෝ සති කිහිපයකට පෙර සිටම මිහින්තලා පුදබිම පාමුල කඳවුරු බැඳගෙන කටයුතු කළහ. ඊට අවැසි. පහන් කනු, විදුලි බල්බ, රැහැන් පමණක් නොව විදුලි ජනන යන්ත්‍ර පවා රැගෙන ආවේ කොළඹ සිටය. දුෂ්කරම කාර්ය වී තිබුණේ ඒවා කන්ද උඩට ගෙනයෑමයි. ඒ සඳහා ලේක්හවුස් කාර්මික ශිල්පීන්ට දිවාරෑ නොතකා සහාය වූයේ මිහින්තලා පුදබිමෙි දායක සභාව සහ අවට ගම්වාසීන්ය. ඔවුන් විසින් ලබාදුන් සහාය පිළිබඳ දිනමිණ පුවත්පතට දක්වා තිබුණ අදහස් අතරින් ඇලඩින් අම්මා නැමති කාන්තාව මෙසේ පවසා ඇත.

‘ පුතේ ඔය කියන කාලෙ මට අවුරුදු තිහක් ඇති. අදවගේ මතකයි ඒ සිද්ධිය. ලයිට් දෙන්න ආපු ලයිට් මැෂින් බලන්න අපි දුවගෙන ආවා. ඒවා උස්සගෙන කඳු මුදුනට යන්න අපේ ගමේ ඈයෝ අතර තිබුණේ තරගයක්. මොකද මෙහෙම දෙයක් උපන්තේකට අපි හිතලා තිබුණේ නෑ. මේ මූකලන් මැද්දේ ලයිට් පත්තු කරනවා කියන එක ඒ කාලේ පුදුමයක්. සමහර පෝය දවස්වල හවස් කාලෙට ගමේ ඇත්තෝ මිහින්තලා කන්දට නැග්ගා. ඒ හුළු අතු පත්තු කරගෙන ගිහින් එනකම් විචිකිච්ඡාවක් තිබුණේ. පෝය දවසේ හයවෙනකොට ලයිට් දැම්මා මයේ පුතේ. එහෙම ලස්සනක් මුළු මිහින්තලේම එළිය වෙලා. මිනිස්සු සාදුකාර දුන්නා. පැය ගාණක් තිස්සේ සාදුකාර දුන්නා.‘

ඇලඩින් අම්මාගේ කතාව මෙන්ම 1963 වසරේ සිට ලේක්හවුස් ආයතනය අඛණ්ඩව පවත්වන උතුරුමැද පළාතේ දහම් පාසල් දරුවන් අතර රචනා තරගයකට ගල්අමුණ ශ්‍රී ධර්මෝදය දහම් පාසලේ අයේෂා මධුෂානි නම් දියණියක විසින් ලියන ලද රචනාවක් බුදුසරණ පුවත්පතෙහි පළකොට තිබුණි. එහි කොටසක් මෙසේයි. ‘පුන් පොහෝ දින මැද මළුවට හෝ උඩමළුවට කෙනෙක් ගිය ද රෑබෝවීමට පෙර පහළට පැමිණීමට කටයුතු කළේය. ඉඳහිට හෝ උඩමළුවට ගියේ හුළු අතු පත්තුකරගෙනය. 1956 /57 පමණ වනවිට ගල්කුලම හතරමන් හන්දියේ පැවතියේ පිදුරු සෙවිලි කළ වරිච්චි බිත්තියෙන් බඳින ලද එක් කඩයකි. එකල පූජා බිම පුරා නිදැල්ලේ හැසිරෙන මුව රංචු සුලබ දසුනක් විය.‘ යනුවෙන් ලියා තිබුණේ වැඩිහිටියන්ගෙන් අසා දැනගෙන බව ද සඳහන් විණි.

මෙරට පුදබිමක් මුල්කරගෙන මාධ්‍ය ආයතනයකින් පැවැත්වූ පළමු ආලෝක පූජාව මිහින්තලේ ආලෝක පූජාවයි. ඒ සංකල්පය රංජිත් විජේවර්ධන මහතාගේයි. ලේක්හවුස් ආදි කර්තෘ ඩී. ආර්. විජේවර්ධනයන් මිය ගියේ 1950 ජූනි 13 දිනයි. එතුමා රෝගාතුරව පසුවන සමයේදීම ලේක්හවුස් පරිපාලන කටයුතු කළමනාකාර අධ්‍යක්ෂ ලෙස කටයුතු කළේ එස්මන් වික්‍රමසිංහයි. අනතුරුව ඒ වගකීම් පැවරුනේ රංජිත් විජේවර්ධන මහතා වෙතයි.

ලාභය නොතකා ජාතික හා ආගමික අවශ්‍යතා වෙනුවෙන් කොන්දේසි විරහිතව පෙනී සිටීමේ ලේක්හවුස් ක්‍රමය ඩී. ආර්. විජේවර්ධනයන්ගේ ප්‍රතිපත්ති අතර පැවතියකි. 1934 දිනමිණ වෙසක් කලාපය ආරම්භ කොට තිබුණේ බෞද්ධ ප්‍රබෝධය වෙනුවෙනි. 1950 බුදුසරණ පුවත්පත අරඹා ඇත්තේ ගුණපාල මලලසේකර මහතා විසින් මූලිකත්වය සංවිධාන කළ ලෝක බෞද්ධ සම්මේලනයේ කටයුතු සඳහා සහයෝගයක් වශයෙනි. කැලණිය පුදබිම මෙන්ම, සේදවත්ත පන්සල, ගංගාරාමය, වජිරාරාමය, විජේවර්ධන පවුල සමඟ පැවතියේ අවියෝජනීය බැඳීමකි. භික්ෂූන් වහන්සේ ධර්මධර මෙන්ම විනයධර විය යුතු බවත් අධ්‍යාපනයෙන් පූර්ණ විය යුතු බවත් විජේවර්ධන ශ්‍රීමතානන්ගේ සංකල්පයක් බව වැටහෙන්නේ පේරාදෙණිය විශ්වවිද්‍යාලයේ සංඝාවාසය ඉදිකිරීමට තම පෞද්ගලික මුදලින් 250,000ක මුදල් පරිත්‍යාග කිරීම නිසාම නොව එහි පුස්තකාලයට ඩබ්ලිව්. ඒ සිල්වාගේ පුස්තකාලයෙන් මිලදීගත් පුස්කොළ පොත් ඇතුළු පොත් සියල්ල පරිත්‍යාග කළ නිසාය. ආරම්භයේ සිට ලේක්හවුස් පුවත්පත් අන්තර්ගතය පිළිබඳ විමර්ශනය කරන විට පෙනී යන වැදගත් කරුණක් වන්නේ ඉපැරැණි පුරාවිද්‍යාත්මක ස්ථාන ඉස්මතුවූ විට ඒ පිළිබඳ හෙළි කිරීම සඳහා දැඩි උනන්දුවකින් යුතුව කටයුතු කරන බවයි. ගල් ඔය ව්‍යාපාරය ආරම්භ කිරීම පිළිබඳ නිරීක්ෂණ චාරිකාවේදී ඒ ප්‍රදේශයේ පුරාවිද්‍යාස්ථාන නැරැඹීමට ඩී. එස්. සේනානායකයන් සමඟ එක්වූ පිරිස අතර ඩී. ආර්. විජේවර්ධනයන්ද සිටි බවට සාක්ෂි හමුවන ඡායාරූපයක් වෙයි.

මේ සංකල්ප තවදුරටත් ක්‍රියාත්මක කිරීමට කළ අදිටනක් ලෙස 1963 රංජිත් විජේවර්ධනයන්ගේ මූලිකත්වයෙන් ඇරැඹි මිහින්තලා ආලෝක පූජාව හඳුනාගත හැකියි. මේ වකවානුව පත්‍රකලා පනත නමින් පුවත්පත් ආයතන රජයට පවරා ගැනීම සඳහා පාර්ලිමේන්තු පනතක් ඉදිරිපත් කළ යුතුයි යනුවෙන් වාමාංශික පක්ෂ දැඩි මතයක් ඉදිරිපත් කළ වකවානුවකි. ඒ සඳහා මූලිකත්වය ගත්තේ ඇත්ත පුවත්පතයි. ගුවන්විදුලිය පැවතියේ රජය යටතේයි. මතයක් ලෙස ඉදිරිපත්වූයේ මාධ්‍ය ජනතාව සඳහා විය යුතු බවයි. ලාභ ලබන ව්‍යාපාරයක් නොවිය යුතු බවයි. මෙවන් පසුබිමක් තුළ ආරම්භ වන මිහින්තලා ආලෝක පූජාව සඳහා එවකට මිහින්තලේ රජමහාවිහාරයේ නායක හිමියන් වූ වලවාහැංගුණවැවේ රතනජෝති හිමි මෙන්ම පුරාවිද්‍යා දෙපාර්තමේන්තුවේ සහ උතුරුමැද පළාතේ දේශපාලන නායකයන්ගේ ද සහාය නොඅඩුව හිමිවී තිබුණේ කුමන බාධක පැවතියද එවකට මෙරට ප්‍රබලතම සන්නිවේදකයා ලේක්හවුස් වූ නිසාවෙන්මය.

මිහින්තලය යනු මෙරට ආගමික බෞද්ධ පුනරුදයේ මුල් බිමයි. ක්‍රි: පූ. තුන්වැනි සියවසේ දී මිහිදු මාහිමියන්ගේ ආගමනයත් සමඟ වන බිමක්ව පැවති මිහින්තලාව භික්ෂූන් වහන්සේලා වාසය කරන පුණ්‍ය භූමියක් බවට පත්විය. මහාවංශයට අනුව මිහිදු හිමියන් මෙහි පැමිණි මුල් දිනයේ මෙන්ම පළමු වස් කාලය ගත කර ඇත්තේත් මිහින්තලාව ආශ්‍රිතවයි. අනුරාධපුර නව නගරයේ සිට නැඟෙනහිරින් කිලෝමිටර්15 ක් පමණ දුරකින් උසින් මීටර් 1,000ක් පමණ ශේෂ කඳු වැටියක පිහිටි මිහින්තලා පුදබිම ආශ්‍රිතව පවතින පුරාවිද්‍යා ස්මාරක මෙරට අතීතය පිළිබඳ කියවෙන ප්‍රමුඛතම සාධක කිහිපයකි. ඉන් පළමු වැන්න මිහින්තලය මෙරට පළමු අභය භූමියයි. එමෙන්ම එහි පිහිටි රෝහල ශල්‍යකර්ම පවා කරන ලද ලොව ප්‍රථම රෝහලයි. එහි හමුවී ඇති දාන ශාලාවෙහි ඇති බත් ඔරුව මෙන්ම කැඳ ඔරුව සාක්ෂි දරන්නේ එහි භික්ෂූන් වහන්සේලා විශාල පිරිසක් වැඩ වාසය කර ඇති බවයි. එසේම මේ පුදබිම සඳහා ජලය සැපයූ ආකාරය ජල තාක්ෂණය පිළිබඳ විශේෂයෙන්ම කියැවෙන්නකි. සිංහ පොකුණ, නාග පොකුණ මෙන්ම කළුදිය පොකුණ ඒවාට සාක්ෂි සපයයි. සේල චෛත්‍යය, කණ්ඨක චෛත්‍යය, මිහිඳු සෑය, මහා සෑය, මිහින්තලේ ශ්‍රීවිභූතිය ලොවටම විරාජමාන කරන ලක්ෂණයි. අනුරාධපුර නව නගරය ඉදිකිරීම ආරම්භ වූයේ 50 දශකයේදීයි. ඊට සාපේක්ෂව මිහින්තලේ පුරාවිද්‍යා කැනීමි කටයුතු ආරම්භ වූයේ 1951දීයි.

ඊට වසර 12කට පසු මිහින්තලේ ආලෝක පූජාව ආරම්භ වුවද මිහින්තලය සඳහා ප්‍රවේශ මාර්ග හෝ ඒ අවට ප්‍රදේශයේ ජනාවාස ව්‍යාප්තව තිබී නැත. පොසොන් පොහොයට අනුබුදු හිමි සිහිකරමින් මිහින්තලේ වන්දනාවේ නිරතවීමේ පැරැණි සිරිතට නව පණක් ලැබුණේ ඉන් අනතුරුව බව නම් කිවයුතුමය.

මුල්කාලයේ පයින්, කරත්තයෙන්, පෑපැදියෙන් වන්දනාවේ ගිය පිරිස් පසුව ලෑන්ඩ්මාස්ටර් ටේලරයට නැඟී වන්දනාවේ ගියේ පවුල් පිටිනි. එය විනෝද චාරිකාවක සිරි ගත්තේ දන්සල් වැඳීම මෙන්ම දන්සල් දීමද ආලෝක පූජාවට සමගාමීව ඇති වූ වන්දනා සංස්කෘතියේ අංගයක් බවට පත්වූ නිසයි. මුල් කාලයේ ඇතැම් පිරිස් මිහිතලේ ගියේ ගසක් යට නිදිගෙන ගසක් යට උයාපිහාගෙන කා පසුදා ගමිබිම් වෙත යෑමටයි. එවන් පිරිස් ආලෝක පූජාවේ මහිමයෙන් මිහින්තලා පඩිපෙළ රාත්‍රියේම තරණයකර පල්ලම් බැස්සේ මහත් සතුටිනි.

ස්ථිර විදුලි ආ‍ෙලා්කය

වසර 57ක් අඛණ්ඩව පැවැත්වූ ආලෝක පූජාවේ සුවිශේෂී සන්ධිස්ථාන රැසකි. ඒ අතර මිහින්තලේ පුදබිමට ස්ථීර විදුලි ආලෝකය ලබාදුන්නේ 1978 වසරේදීයි. එවකට ලේක්හවුස් සභාපති වූයේ රණපාල බෝධිනාගොඩ මහතායි. එතුමා එවක අගමැති ලෙස කටයුතු කළ ආර්. ප්‍රේමදාස මහතාගේ මූලිකත්වයෙන් මිහින්තලේ ආලෝක භාරය නමින් පදනමක් ස්ථාපිත කර ඇත්තේ මේ ආලෝක පූජාව අඛණ්ඩව පවත්වාගෙන යෑම සඳහායි. 77 භීෂණ සමයේදීත් 83 කළු ජූලිය අවස්ථාවේ මෙන්ම, අනුරාධපුරයේ ජය ශ්‍රී මහා බෝධිය අසල සිල්ගත් උවැසි උවැසියනට වෙඩි වරුසාවක් එල්ල වූයේ 1985 මැයි 14 දායි. එම වසරේ ජූනි මස ආලෝක පූජාව පැවැත්වූ අතර, ඒ සඳහා ලක්ෂ 05ක පමණ පිරිසක් සහභාගිවී තිබේ. 88/89 වකවානුවේදී මෙන්ම ත්‍රස්ත ප්‍රහාර පැවති සමයේත් ආලෝක පූජාව අඛණ්ඩව පවත්වාගෙන යෑමට ලේක්හවුස් පරිපාලනය ස්ථීරසාරව අධිෂ්ඨානයෙන් යුතුව කටයුතු කළ බව පවසන්නේ ආඩම්බරයෙන් යුතුවය.

මෙවර පැවැත්වෙන 57වැනි ආලෝක පූජාව පැවැත්වෙනුයේද ගෝලීය වසංගතයක් පවතින අතරතුරය. ලොවම එය පාලනය කිරීමේ අසීරු ප්‍රයත්නයක නිරතව සිටින අවස්ථාවේ අම්බස්තලය මතට පැමිණ මෙරට සමාජ සංස්කෘතික පරිවර්තනයක් ඇති කළ මිහිඳු හිමි සමරන්නේ තිස් වසරක යුද්ධයෙන් මෙන්ම ගෝලීය වසංගතයෙන් රට ආරක්ෂා කළ ජනාධිපති ගෝඨාභය රාජපක්ෂ මහතාගේත් අගමැති මහින්ද රාජපක්ෂ මහතාගේත් මූලිකත්වයෙනි. මේ සඳහා අනුශාසකත්වය මිහින්තලා රජමහා විහාරාධිපති හා භාරකාර ගෞරව ශාස්ත්‍රවේදී වලවාහැංගුණවැවේ ධම්මරතන හිමිපානන්ය. මෙවර රාජ්‍ය පොසොන් උත්සවයට සමගාමීව ජගත් පරිසර දිනය ද සැමරීමට නියමිතය. ජනපති සුරතින් තල් පැළයක් සිටුවා සැමරීමට නියමිත ජගත් පරිසර දිනය ලොව ප්‍රථම අභය භූමිය වන මිහින්තලා පුදබිමෙහි සිදුකිරීම විශේෂත්වයකි. මේ සඳහා මූලිකත්වය ගෙන ක්‍රියා කරනුයේ වනජීවී හා ඉඩම් ඇමැති එස්. එම්. චන්ද්‍රසේන මහතායි.

රටටම සංස්කෘතික ආලෝකය ගෙන ආවේ මිහින්තලා පුදබිමයි. දශක 06කට ආසන්න කාලයක් ඒ පින් බිම ආළෝකමත් කළ පින් මහිමයෙන්, චිරාත් කාලයක් ලේක්හවුස් මව් සැරදේවායි සේවක සැමගේ පැතුමයි.

ලොවටම සෙත් වේවා..!

නෙත අග සැබෑවම නිති පිළිබිඹු වේවා
අත හිත ලැබිය යුතු තැනටම යොමු වේවා
සත වෙත කරුණාව මෙත් ගුණ පැතිරේවා
හිත සිසිලසින් පිරි බෝ මළුවක් වේවා

අඳුරෙහි ගිලුණු ලෝකය කල එළි වේවා
නුදුරෙහි දිනෙක රෝ බිය දුරුවී යේවා
පැදුරෙහි හිඳින අයටත් සොම්නස වේවා
මැදුරෙහි පැලෙහි එක ලෙස සැනසුම වේවා

අදමිටු දුදන ගති ලෝකෙන් දුරු වේවා
මිසදිටු සිත්වලට සත්‍යය වැටහේවා
අනුබුදු මිහිඳු හිමි දෙසු දම් සිහිවේවා
පින පිරි පොසොන් පුන් පෝ දිනයක් වේවා

දිල්රූ ජයසේකර

දහමේ අරුත

සුපසන් දහම් එළියෙන් රට එළිය වුණා
ගණදුර නිවී ඉන් දන මන එකලු වුණා
ඒ රශ්මියෙන් ලක් මව බබලන්න වුණා
ගුණනැණ පිරැණු දැයකට ඉන් මඟ සැදුණා

පොසොන් සඳේ ආලෝකය පැතිරේවා
ලෙඩ දුක් නිවී නිරෝගී සුව වැඩි වේවා
යුදගිනි නිවී ලෝ සාමය වොරැදේවා
ගුණ දම් පිරුණු මග සලකුණු හෙළිවේවා

කරුණා සිතක් ඇති මිනිසුන් බිහි වේවා
සැමටම එයින් නිති සැනසුම් ගෙන දේවා
සෝ ගිනි නිවී සොම්නස් සිත් ඉතිරේවා
දහමේ අරුත ලොව සැමටම වැටහේවා

පසිඳු මිහිරාන් රැටියල

නිමල් සිරිපාල ද සිල්වා
අධිකරණ, මානව හිමිකම් හා නීති ප්‍රතිසංස්කරණ අමාත්‍ය

පහත දැක්වෙන්නේ වත්මන් තතත්වය යටතේ අධිකරණ,මානව හිමිකම් හා නීති ප්‍රතිසංස්කරණ අමාත්‍යාංශය කටයුතු කරන ආකාරය සහ එහි අනාගත ඉලක්ක පිළිබඳ පැහැදිලි කරමින් අමාත්‍ය නිමල් සිරිපාල ද සිල්වා සමඟ සිදු කළ සාකච්ඡාවකි.

හැමදේටම උසාවියට යන්නෙ නැතුව ගම්වලදිම ප්‍රශ්න විසඳන සමත මණ්ඩල තව ශක්තිමත් කළ යුතුයි. උසාවිවල නඩු කල්යාම වළක්වගන්න නීති ක්ෂේත්‍රයේ හැමෝගෙම සහාය අවශ්‍යයි. ඒ වගේම රස පරීක්ෂක වාර්ථා නිසි වෙලාවට ලැබෙන්නෙ නැහැ. මේ නිසාත් නඩු කල්යනවා. රස පරීක්ෂකවරු තිස්නව දෙනෙක් බඳව ගන්න කටයුතු කරමින් ඉන්නකොට මැතිවරණය ආවා. ඒ නිසා මැතිවරණ කොමසාරිස්ගෙනුත් ඒකට අවසර ගන්න වුණා. අපරාදෙ කියන්න බැහැ එතුමා ඒකට නම් අවසර දුන්නා. දැන් සම්මුඛ පරීක්ෂණ තියල මේ මාසෙ ඒ අයව බඳවා ගන්නවා.

* කොරෝනා වසංගතය හමුවේ අඩාළ වූ ජන ජීවිතය යථාතත්ත්වයට පත්කරන්න ආණ්ඩුව ගෙන ඇති ක්‍රියාමාර්ග මොනවාද?

අසරණ වෙච්ච ජනතාව ජීවත් කරවීම ආණ්ඩුවෙ ප්‍රමුඛතම කාරණය නිසා ඔවුන්ට රුපියල් පන්දහසෙ දීමනාව දෙවරක්ම දුන්නා. ගෝඨාභය රාජපක්ෂ ජනාධිපතිතුමා ඇතුළු ආණ්ඩුව ඒ වෙලාවෙ කල්පනා කළේ ජනතාව ජීවත් කරවමින් මේ අර්බුදයෙන් රට ගලවගන්න විදිය ගැනයි. ඒ නිසා තමයි අපි තුන්වෙනිපාරටත් රුපියල් පන්දහස දෙන්න තීන්දු කළේ. ඒත් මැතිවරණ කොමසාරිස් කැබිනට් මණ්ඩලයට එවපු ලියුම නිසා ඒ කටයුත්ත අපිට කරන්න බැරිවුණා. ඊට අමතරව කොරෝනා රෝගීන්ට නිසියාකාරව ප්‍රතිකාර ලබා දෙන්න අවශ්‍ය කටයුතු සැලසුවා. ඒවායේ ප්‍රතිඑල අද අපි භුක්ති විඳිනවා. විදෙස්ගතවෙලා හිටපු ශිෂ්‍යයන් විශාල ප්‍රමාණයක් අපි ලංකාවට ගෙන්වගත්තා. ඒ වගේම රැකියා සදහා විදෙස්ගත වෙච්ච අයවත් අදියර කිහිපයකින් ගෙන්වා ගනිමින් ඉන්නවා.

මේ වැඩකටයුතුවලට ආණ්ඩුව විශාල පරිශ්‍රමයක් දරනවා. මිනිසුන් ජීවත් කරවීම, ඔවුන්ගේ ජීවිත ආරක්ෂා කිරීම අපේ ආණ්ඩුව නොපිරිහෙළා ඉටු කළා. දැන් ජන ජීවිතය යථාතත්ත්වයට පත් කරන්න අවශ්‍ය අනෙකුත් කටයුතු වෙනුවෙන් ආණ්ඩුව ප්‍රමුඛතාව ‍දෙනවා. මේ වසංගතය මැඩ පවත්වන්න සෞඛ්‍ය අංශ, පොලීසිය, ත්‍රිවිධ හමුදාව, වගේම රජයේ විවිධ අංශවල අය විශාල කැපකිරීමක් කළා. ඔවුන් තමන්ගෙ ජීවිත අවධානම පවා නොසලකා කැපකිරීම් කළා. රටේ නායකයා විදියට ආපදා අවස්ථාවකදි අවශ්‍ය මගපෙන්වීම ජනාධිපතිතුමා උපරිමයෙන් ලබා දුන්නා.

අගමැතිතුමා ඇතුළු කැබිනට් මණ්ඩලය මේ ආපදා තත්ත්වයෙදි ඉතාම ඉහළ පරිණත භාවයකින් වැඩකළා. ලෝකයේ දියුණු රටවල් පවා කොරෝනා වසංගතය පාලනයේදී අසාර්ථක වෙන අවස්ථා අපි දැක්කා. වෙනත් රටවල් එක්ක සසඳා බලද්දි අපේ රටේ ජනතාව මේ රෝගී තත්ත්වය පාලනය කරන්න ඉතා හොඳ සහායක් ලබාදුන්නා. කොහොම වුණත් අපි මේ වසංගතය තවමත් සම්පූර්ණයෙන් අවසන් කර නැහැ. ඒ නිසා ජනතාව මේතාක් ලබාදුන් සහය තවදුරටත් ලබාදිය යුතුයි. එහෙම වුණොත් අපිට ඉක්මනින් පෙර තත්ත්වයට ළඟා වෙන්න පුළුවන්.

* ශ්‍රී ලංකාවෙ ආර්ථිකය කඩා වැටී ඇති බවට බොහෝ අය චෝදනා කරනවා. මේ ගැන ඔබ මොකද කියන්නෙ?

අපේ රටේ විතරක් නොවෙයි ලෝකයේම ආර්ථිකය කඩා වැටිලා. කොරෝනා නිසා ලෝක ආර්ථිකයට එල්ලවෙලා තියෙන බලපෑම කොයි වගේද කියල ලෝක බැංකුව කියනවා. රැකියා අහිමි වෙනවා. මිනිස්සුන්ට ජීවනෝපායන් රැසක් අහිමි වෙනවා. ලෝකයේම නිෂ්පාදන නැවතිලා. සෞඛ්‍ය ආරක්ෂිත ක්‍රම අනුගමනය කරන්න වීම නිසා මිනිස්සු ඒකරාශී වෙන එක නතරවෙලා.

මේ නිසා හෝටල්, සංචාරක, භෝජනාගාර, නිමි ඇඳුම් කර්මාන්තවලට විශාල බලපෑමක් ඇතිවෙලා. ලෝකයේම ආර්ථික ක්‍රියාවලිය නතර වෙලා. මේ වෙලාවෙ අපේ ආර්ථිකය ගොඩ නඟන්න ප්‍රමුඛතාව දෙන්න ඕන අංශ අපි මුලින්ම හඳුන ගන්න අවශ්‍යයි. ඒ නිසා තමයි ඇඳිරි නීති කාලෙත් කෘෂිකාර්මික කටයුතුවලට ආණ්ඩුව අවසර දුන්නෙ. අපි අපේ තේ, පොල්, රබර් , එළවළු, වී වගා වැඩට ප්‍රමුඛතාව දුන්නා. දැන් රට ටිකෙන් ටික විවෘත වෙනවා. ඒ එක්ක රටේ ආර්ථික ක්‍රියාවලියත් ශක්තිමත් කළ හැකියි. මුලින් සෞඛ්‍ය ආරක්ෂිතව ආරම්භ කරන්න පුළුවන් කර්මාන්ත ඇරඹීමට අවසර දෙනවා. ඒ වගේම අපිට විදේශ විනිමය ලැබෙන ප්‍රධාන අංශ දෙක අපි රැකගන්න අවශ්‍යයි.

අපනයන අංශය රැකගනිමින් අපනයන ආර්ථිකයකට අපි යා යුතුයි. ඒ යටතෙ ඇඟලුම් කර්මාන්තය යළි පණ ගන්වන්න ඕන. තේ,පොල්, රබර් කර්මාන්ත පණගන්වන්ට ඕන. මත්ස්‍ය කර්මාන්තයත් අපිට විශාල විදේශ විනිමයක් උපයා දුන්නා . මේව ගැන ආණ්ඩුව කඩිනම් අවධානය දක්වනවා. ඒ වගේම විදෙස්ගත ශ්‍රමිකයන්ගෙන් ලැබුණු ආදායම මේ වෙනකොට සැලකිය යුතු ප්‍රමාණයකින් අඩුවෙනවා. ඔවුන් බොහෝ දෙනෙක් ලංකාවට එනවා. විදෙස්ගත ශ්‍රමිකයන්ගේ සුබසාධනය ගැනත් ආණ්ඩුව කඩිනම් තීන්දු ගනිමින් ඉන්නවා. විදේශ විනිමය පිටරටට ගලාගෙන යාම නතර කිරීම අත්‍යවශ්‍ය තෙල් සඳහා යන මුදල නතර කරන්න බැහැ. පරිප්පු වෙනුවට මුංඇට ආදේශක හැටියට ගත්තොත් ඒ මුදල ඉතිරි කරගන්න පුළුවන්. අර්තාපල් , රටලූනු සහල් ආනයනයට යන මුදල් අපි ඉතිරි කර ගන්න ඕන. සහල් කිසිසේත් ආනයනය කරන්න හොද නැහැ.ඒ වගේම ගම්මිරිස්, කරදමුංගු, කරාඹුනැටි, කුරුදු වගේ සුළු අපනයන බෝගවල නිෂ්පාදන ධාරිතාව වැඩිකරන්න ඕන. නව වෙළෙද පොළවල් සොයා ගන්න ඕන. ඒ වෙනුවෙන් තමයි ආණ්ඩුවෙ අවධානය දැන් යොමුවෙලා තියෙන්නෙ.

* ආර්ථික කඩාවැටීමත් එක්ක භාණ්ඩාගාරය හිස්වීමේ බර ජනතාව මත පටවන්නද ආණ්ඩුව ජනතාව මත බදුබර පටවමින් ඉන්නෙ.?

රාජ්‍ය සේවකයට පඩිගෙවන්න ඕන. රෝහල්වල බෙහෙත් දෙන්න ඕන. ජනතාවට පොදු පහසුකම් දෙන්න ඕන. මේවට සල්ලි, නිකන් උඩින් වැටෙන්නෙ නැහැ. ඒවා කරන්නේ ජනතාවගෙන් එකතුකරන මුදල්වලින්. අපි බදු සහන රැසක් දීපු ආණ්ඩුවක්. විදේශ විනිමය ගලායාම මේ මොහොතේ නතර කළ යුතුමයි. ඒ වෙනුවෙන් භාණ්ඩ කිහිපයක් මත බදු පනවල තියෙනවා. මේ බදු පැනවීම නිසා ආනයනය සීමා වීමෙන් අපේ රුපියලේ අගය ස්ථාවර කරගන්න පුළුවන්. ඒක අත්‍යවශ්‍යයි.

* රට ස්ථාවර කරන්න ස්ථාවර රජයක් අවශ්‍යයි. මේ ගැන ආණ්ඩුවෙ අවධානය යොමුවෙලා තියෙනවද?

අපි ව්‍යවස්ථා උගුලක පැටලිල ඉන්නෙ. ජනාධිපතිවරයා මැතිවරණය සදහා දිනයක් නියම කළාට පස්සෙ අපේ ආණ්ඩුක්‍රම ව්‍යවස්ථාව අනුව, පාර්ලිමේන්තු මැතිවරණ නීතිය අනුව ඒ දිනය වෙනස් කළ හැක්කේ මැතිවරණ කොමිසමට විතරයි. ස්ථාවර රජයක් රටට අවශ්‍යයි. ඒත් අපිට ඕන විදියට මැතිවරණ දින නියමකරන්න බැහැ. කොරෝනා මර්දනයට මෙතරම් කැපකිරීමක් ආණ්ඩුව දැක්වුවෙ ජනතාවගෙ ජීවිත ආරක්ෂා කරගන්න අවශ්‍ය හින්දයි. ඒ වගේම රට කඩිනමින් සාමාන්‍ය තත්ත්වයට පත්කර ගන්න අවශ්‍යයි. ඊට පස්සෙ මැතිවරණයක් තියන්න පුළුවන්. මැතිවරණය පැවැත්වීම ඉතාම වැදගත්. කොරෝනා මර්දනය ඊටත් වඩා වැදගත්.

* ස්ථාවර රජයක් හදාගන්න පාර්ලිමේන්තු මැතිවරණයක් අවශ්‍ය නම්, මැතිවරණ නීති සංශෝධනය හරහා මේ අයහපත් වාතාවරණය තුළ මැතිවරණයකට යන්න පුළුවන් නේද?

මෙවැනි ව්‍යසනයන් අපිට කියල නෙවෙයි එන්නෙ. මේක ලෝකය පුරා ඇතිවුණු ව්‍යසන තත්ත්වයක්. මේ අපි බලාපොරොත්තු නොවුණු තත්ත්වයක්. මෙවැනි හදිසි ආපදාවන්වලදි කටයුතු පවත්වාගෙන යාමට අවශ්‍ය පසුබිම සලසා ගන්න ඕන. ස්ථාවර රජයක් නැතුවත් කොරෝනා පාලනයේදී අපි හොඳ තැනක ඉන්නවා. දැන් විකල්ප ඕන තරම් තියෙනවා. ඒ තීරණ ගන්න බලය තියෙන්නෙ මැතිවරණ කොමිසමට. මැතිවරණ කොමිසම කියන ඕනම දිනයකදි අපි මැතිවරණයට ලෑස්තියි. අපි මැතිවරණවලට බය නැහැ.

* කො‍රෝනා වසංගත තත්ත්වයත් එක්ක අධිකරණ ක්ෂේත්‍රයට නවීන තාක්ෂණය එක් කිරීමේ වැදගත්කම ගැනත් කතාවුණා. විශේෂයෙන් ස්කයිප් තාක්ෂණය යොදා ගැනීම වැනි කාරණා ගැන වැඩි අවධානයක් යොමුවුණා. මේ ගැන ඔබේ අදහස මොකක්ද?

ඔබ ඔය කියන ප්‍රතිසංස්කරණ කරන්න තිබුණෙ මීට බොහෝ කාලයකට ඉස්සෙල්ලා.කොරෝනා වසංගතය අපේ ඇස් පෑදුවා. අධිකරණයට තාක්ෂණය කඩිනමින් ගේන්න අවශ්‍ය අවස්ථාව කොරෝනා නිසා උදාවුණා. මූලික ක්‍රියාවලියක් ලෙස මහේස්ත්‍රාත් අධිකරණවල රිමාන්ඩ් රැදවියන් රිමාන්ඩ් ගතකිරීම, ඔවුන්ට ඇප ලබාදීම වැනි කරුණුවලදී ස්කයිප් තාක්ෂණය යොදා ගනිමින් ඒ කටයුතු කිරීමට අවශ්‍ය ක්‍රමවේදයක් ගැන ඉතා කෙටි කාලයක් තුළ අධ්‍යයනය කළා. ඒ වැඩපිළිවෙළ කැබිනට් අනුමැතියට යොමුකළා. අනුමැතිය ලැබිල මුදල් ලැබුණු වහාම අපිට ඒක පටන්ගන්න පුළුවන්. ඒ හරහා උසාවියෙ තදබදය අඩුවෙනවා.රැදවියන් එහාට මෙහාට ගෙනයාමත් අඩුවෙනවා. ඔවුන්ගෙ ආරක්ෂාවත් තහවුරු වෙනවා.විශේෂයෙන් බරපතළ අපරාධකරුවන් අධිකරණයට ගෙන යන්නෙ නැතුව අධිකරණය බන්ධනාගාරය තුළට ගිහින් නඩු අහන ක්‍රමවේදය අනාගතයෙදි අපි සකස් කළ යුතුයි.

* ජනාධිපතිවරණයේදී හඬ නැඟුණු සටන් පාඨයක් වුණේ එක රටක් එක නීතියක්. මේ වෙනුවෙන් අරගෙන තියෙන ක්‍රියාමාර්ග මොනවද?

ඒ වෙනුවෙන් අපි වැඩකටයුතු කරනවා. මේ ඒකට වෙලාව නෙවෙයි. අපි නොනගත කාලෙක ඉන්නෙ. දැන් නීතියක් හැදුවට ඒක සම්මත කරගන්න පාර්ලිමේන්තුවක් අවශ්‍යයි. ඊට අවශ්‍ය පසුබිම් වැඩ පිළිවෙළ සකසලා ඉවරයි.

* රටේ යල්පැන ගිය නීති ප්‍රතිසංස්කරණ ගැනත් එදා කතා වුණා. ඒ ගැන ඔබ මොකද කියන්නෙ.?

නීති ප්‍රතිසංස්කරණ යටතේ නීති කොමිසම ඇතුළු ආයතන ගණනාවක් තියෙනවා. මේ යල්පැනගිය නීති නිසි ලෙස හදල නීති ක්‍රියාත්මක වීමේ ප්‍රමාදයන් වැළැක්වීමට අවශ්‍ය නීතිමය බාධාවන් අවසන් කිරීමට ප්‍රතිසංස්කරණ සිදුවෙමින් තියෙනවා. ඒවා පාර්ලිමේන්තුවට ඉදිරිපත් කරල සම්මත කර ගන්න ඕන. ඒකට අලුත් ආණ්ඩුවක් අවශ්‍යයි. ආණ්ඩුව පිහිටුවපු ගමන් අණපනත් නීති සංශෝධන පාර්ලිමේන්තුවට ගේනවා.

* අධිකරණයෙ නඩු ප්‍රමාදයන් ගැන හැමදාම චෝදනා එල්ලවෙනවා. මේ තත්ත්වය නිවැරදි කරන්න ගන්න උත්සාහය කොයි වගේද?

නඩු ප්‍රමාදය දවසකින් දෙකකින් විසඳන්න බැහැ. ඒකට දිගුකාලීන වැඩපිළිවෙළක් අවශ්‍යයි. ඒ සදහා නවීන තාක්ෂණය භාවිතා කරන්නත් ඕන. විනිශ්චයකාරවරුන්ගෙ ප්‍රමාණය වැඩිකරන්න අවශ්‍යයි. මේ ක්ෂේත්‍රයට අදාළ කරුණු රාශියක් කරන්න තියෙනවා. මේ පිළිබඳව අධ්‍යයන ගණනාවක් කළා. ඒ අනුව නඩු ප්‍රමාදයන් හැකිතාක් අඩුකරන්න අවශ්‍ය පහසුකම් සපයනවා. හැමදේටම උසාවියට යන්නෙ නැතුව ගම්වලදිම ප්‍රශ්න විසඳන සමත මණ්ඩල තව ශක්තිමත් කළ යුතුයි. උසාවිවල නඩු කල් යාම වළක්වගන්න නීති ක්ෂේත්‍රයේ හැමෝගෙම සහාය අවශ්‍යයි. ඒ වගේම රස පරීක්ෂක වාර්තා නිසි වෙලාවට ලැබෙන්නෙ නැහැ. මේ නිසාත් නඩු කල්යනවා. රස පරීක්ෂකවරු තිස්නව දෙනෙක් බඳව ගන්න කටයුතු කරමින් ඉන්නකොට මැතිවරණය ආවා. ඒ නිසා මැතිවරණ කොමසාරිස්ගෙනුත් ඒකට අවසර ගන්න වුණා. අපරාදෙ කියන්න බැහැ එතුමා ඒකට නම් අවසර දුන්නා. දැන් සම්මුඛ පරීක්ෂණ තියල මේ මාසෙ ඒ අයව බඳවා ගන්නවා.

* මානව හිමිකම් සම්බන්ධව හැම රටකම විශාල ලෙස කතා වෙනවා. මෙරට මානව හිමිකම් ප්‍රවර්ධනයට ආණ්ඩුව දක්වන දායකත්වය කොයි වගේද?

මානව හිමිකම් කඩ වීමකදී නඩු කියන්න හැමෝටම ශක්තියක් නැහැ. ඒ නිසා අපේ රටේ නීති ආධාර සේවය මීට වඩා ශක්තිමත් කරන්න ඕන. ඒ හරහා අතමිට සරු නැති ජනතාවගෙ අයිතිවාසිකම් ආරක්ෂා කරන වැඩපිළිවෙළක් හදනවා.මානව හිමිකම් කඩවීමකදී මානව හිමිකම් කොමිසමට වගේම මූලික අයිතිවාසිකම් කඩවීමකදී ශ්‍රේෂ්ඨාධිකරණයටත් යන්න පුළුවන්. විශේෂයෙන් රක්ෂණ සමාගම්වලින් මේ රටේ ජනතාවට විශාල අසාධාරණකම් සිද්ධවෙනවා. රිය අනතුරකින් පීඩාවට පත්වෙන අයට වන්දි ලබා ගැනීමේ සරල ක්‍රමයක් නැහැ. රක්ෂණ සමාගම් හැම වෙලාවෙම බලන්නෙ වන්දි නොදී ඉන්න. වන්දි ගන්න මාස ගණන් අවුරුදු ගණන් උසාවිවල රස්තියාදු වෙන්න වෙලා. ඒ නිසා අනතුරකදි වන්දි ලබාගන්න පහසු ක්‍රමයක් අපි හදනවා.

සංවාද සටහන
දුමින්ද සම්පත්

ශ්‍රී ලංකා දේශපාලනයේ නියුතු ප්‍රභූ පවුල් අතරින් සේනානායක පරපුර, බණ්ඩාරනායක පරපුර හා රාජපක්‍ෂ පරපුර කැපී පෙනෙන අතර, ඉන් අද ක්‍රියාකාරී දේශපාලනයේ නියුතු වැඩිම පිරිස ඇත්තේ රාජපක්‍ෂ පරපුරෙහිය. සේනානායක හා බණ්ඩාරනායක පරපුර ක්‍රමානුකූලව දේශපාලන බිමෙන් ඈත් වී ඇත.

1658 දී මෙරට අධ්‍යාපනය ලබාගත් ලන්දේසින් පලවා හැරීමේ දකුණේ ගිරුවායේ සටනේ දී සබරගමුවෙන් දකුණට පැමිණි 5000 ක් තරම් වූ සිංහල සටන්කාමී ජනතාවට නායකත්වය දුන් ප්‍රදේශාධිපතීන් 13 දෙනා අතර ගොඩකවෙල උඩුගම රාජපක්‍ෂ මහ මුදලිතුමා ද විය. ලන්දේසීන් පළවා හැරීමෙන් පසු ඉංග්‍රීසීන් මුහුදුබඩ පළාත් අල්ලා ගත් අතර, මුඩුබිම් පනත මඟින් ගම්බිම් තමන් වෙත පවරා ගත්හ. මේ ජනතා විරෝධී ක්‍රියාවලියේ දී දකුණේ නැ‍ඟී සිටි ගොඩකවෙල උඩුගම රාජපක්‍ෂ මහ නිලමෙතුමාගේ පරම්පරාවේ ගිරුවායේ වීරකැටියේ බුද්ධියාගම දොන් දාවිත් රාජපක්‍ෂ විදානආරච්චි රාලහාමී පත් වූ අතර, ඔහු ජනතාවට වගාබිම් ලබාදීමේ අරගලයට සක්‍රීයව නායකත්වය දුන්නේය. ප්‍රදේශයේ ප්‍රභූ පැලැන්තියේ බෙලිගල්ලේ දෝන ගිමාරා වීරකෝන් රත්නායක ළමාතැනී විදානාරච්චි රාළහාමිගේ ප්‍රිය බිරිය වූවා ය. මේ දෙමහල්ලන්ට දියණියක් හා පුතුන් තිදෙනෙක් වූහ.

01. දොන් කරලැයින් රාජපක්‍ෂ

02. දොන් චාල්ස් රාජපක්‍ෂ (ඩී.සී.රාජපක්‍ෂ)

03. දොන් මැතිව් රාජපක්‍ෂ (ඩී.එම්.රාජපක්‍ෂ)

04. දොන් ඇල්වින් රාජපක්‍ෂ (ඩී.ඒ. රාජපක්‍ෂ)

ගාල්ල රිච්මන්ඩ් විද්‍යාලයේ ඉගෙනුම ලැබූ පුතුන් තිදෙනා තම පියා ඩී.සී. රාජපක්‍ෂ විදාන ආරච්චි රාලහාමිගේ අභාවය සමඟ ගමට පැමිණි අතර, වැඩිමහල් සහෝදර ඩී.සී. රාජපක්‍ෂ හදිසි මරණ පරීක්‍ෂක හෙවත් කොර්නෙල් පදවිය දැරීය. ඩී.එම්.රාජපක්‍ෂ විහාරස්ථාන හා සම්බන්ධව වී සමාජ සේවා කටයුතුවල නිරත වූ අතර, ඩී.ඒ. රාජපක්‍ෂ උප්පැන්න හා මරණ රෙජිස්ටාර් තනතුර දරමින් ගොවීන් හා සම්බන්ධව ගොවි නායකයකු බවට පත් විය.

ප්‍රථම ජනතා නියෝජනය

සර්වජන ඡන්ද බලය ලැබීමෙන් පසු 1931 පැවැති පළමු රාජ්‍ය මන්ත්‍රණ සභා මැතිවරණයේ දී හම්බන්තොටින් තරග කළ වී.ද.ඇස්. වික්‍රමනායක මහතාට සහය වෙමින් ඩී.එම්. රාජපක්‍ෂ තම දේශපාලන ගමන් මඟ ආරම්භ කළ අතර, 1936 දෙවන රාජ්‍ය මන්ත්‍රණ සභා මැතිවරණයේ දී වී. ද ඇස්. වික්‍රමනායක හා සමඟ තරග කළ ඩී.එම්. රාජපක්‍ෂ මහතා ඔහුව තුන්වෙනි තැනට ඇද දමමින් වැඩි ඡන්ද 12106 කින් හම්බන්තොට ආසනය ජය ගත්තේය. රාජපක්‍ෂවරුන්ගේ ප්‍රථම ජනතා නියෝජනය මෙය විය.

ඩී.එම්. රාජපක්‍ෂ - 17046

එල්.ජී.පෝලියර් - 4940

වී ද. ඇස් වික්‍රමනායක - 3414

වැඩි ඡන්ද - 12106

ඩී.එම්. රාජපක්‍ෂ එම රාජ්‍ය මන්ත්‍රණ සභාවේ කෘෂිකර්ම හා ඉඩම් කාරක සභාවේ සාමාජිකයෙක් විය. 1945 මැයි 18 වන දා ඩී.එම්. රාජපක්‍ෂ හදිසියේ අභාවප්‍රාප්ත වූයෙන් ඔහුගේ වගකීම් භාරය කරට ගත් ඩී.ඒ. රාජපක්‍ෂ ගොවි ජනතාවගේ ඉල්ලීම පරිදි 1946-07-14 පැවැති අතුරු මැතිවරණයට ඉදිරිපත් විය. වෙනත් අපේක්‍ෂකයකු ඉදිරිපත් නොවුණු නිසා නිතරගයෙන්ම හම්බන්තොට අසුනට පත් වූ ඩී.ඒ. රාජපක්‍ෂ තම සහෝදරයා සේවය කළ කෘෂිකර්ම හා ඉඩම් කාරක සභාවේ ද කටයුතු කළේය. රාජ්‍ය මන්ත්‍රණ සභාවේ මන්ත්‍රීවරයකු ලෙසත් පාර්ලිමේන්තුවේ නියෝජ්‍ය කථානායකවරයකු ලෙසත් නියෝජ්‍ය ඇමතිවරයකු ලෙසත් ඩී.ඒ. රාජපක්‍ෂ මහතා ගිරුවායට අනුපමේය සේවයක් කර ඇත. පාලටුවේ දෝන දන්දිනා සමරසිංහ දිසානායක හා විවාහ වූ ඩී.ඒ.රාපක්‍ෂයන්ට දරුවන් 09 දෙනකු වූහ. (පිරිමි 06 ක් හා ගැහැනු දරුවන් තිදෙනා අතරින් වැඩිමහලා වූයේ චමල් රාජපක්‍ෂ මහතාය.) ඔවුහු නම්,

01. චමල් රාජපක්‍ෂ

02. වෙස්මි රාජපක්‍ෂ (ජයන්ති)

03. මහින්ද රාජපක්‍ෂ

04. චන්ද්‍රා රාජපක්‍ෂ

05. ගෝඨාභය රාජපක්‍ෂ

06. බැසිල් රාජපක්‍ෂ

07. ඩඩ්ලි රාජපක්‍ෂ

08. ප්‍රියදර්ශනී රාජපක්‍ෂ (ප්‍රීති)

09. විචිත්‍රා රාජපක්‍ෂ (ගාන්ධිනි)

අභාවප්‍රාප්ත ඩී.එම්. රාජපක්‍ෂ මහතාගේ පුතුන් දෙදෙනකු සිටි අතර, ඒ දෙදෙනා ද මෙරට දේශපාලනයට අවතීර්ණ වූවෝ වෙති. එම දෙදෙනා නම්,

01. ලක්‍ෂමන් රාජපක්‍ෂ

02. ජෝර්ජ් රාජපක්‍ෂ යන අයයි.

ලාබාලම මන්ත්‍රීවරයා

ලක්‍ෂමන් රාජපක්‍ෂ වාමාංශික නැඹුරුවකින් දේශපාලනයට ප්‍රවිශ්ඨ වූ අතර, පියාගේ මරණයෙන් පසු 1956 මැතිවරණයේ දී බෙලිඅත්ත කොට්ටාශය ඩී.ඒ. රාජපක්‍ෂ ජයගන්නා විට හම්බන්තොට ආසනය ජයගත් ලක්‍ෂමන් රාජපක්‍ෂ මහතාගේ වයස 23 කි. ඔහු මන්ත්‍රී ධූරයට පත්වු ලාබාලම මන්ත්‍රීවරයා විය. 1960 මාර්තු මැතිවරණයේ දී බෙලි අත්ත ආසනය ඩී.ඒ.රාජපක්‍ෂ මහතා පරාජය වන විට ලක්‍ෂමන් රාජපක්‍ෂ මහතා තිස්සමහාරාමය ජය ගත්තේය.

1960 ජූලි මැතිවරණයද තිස්සමහාරාමයෙන් ලක්‍ෂමන් රාජපක්‍ෂ මහතා ජය ගත්තේය. ලක්‍ෂමන් රාජපක්‍ෂ මහතාගේ බාල සහෝදරයා වූ ජෝර්ජ් රාජපක්‍ෂ වලස්මුල්ල ගම්කාර්ය සභාවේ සභාපති ධූරයට පත්වෙමින් දේශපාලනයට පිවිසි අතර, 1960 මාර්තු මැතිවරණයේ දී ද, ජූලි මහ මැතිවරණයේ දී ද මුල්කිරිගල ආසනය ජය ගත්තේය. 1960 ජූලි සිරිමාවෝ බණ්ඩාරනායක මැතිණියගේ රාජයේ නියෝජ්‍ය මුදල් ඇමැති ධූරය දැරූ අතර 1970 මහ මැතිවරණයෙන් වැඩි ඡුන්ද 5926 ක් ලබා මුල්කිරිගල ආසනය ජයගෙන සමගි පෙරමුණු රජයේ ධීවර අමාත්‍ය ධූරය දැරීය.

හෘදයේ සැත්කමක් හේතුවෙන් 1976 ජුනි 18 වන දින ඔහු මියයන විට තම දේශපාලන උරුමය ගෙන යාමට නිරුපමා රාජපක්‍ෂ හා ශ්‍යාමලාල් රාජපක්‍ෂ යන දුවකු හා පුතෙකු බිහිකර තිබුණි. නිරුපමා රාජපක්‍ෂ 1983 සිට පියාගේ උරුමය රැගෙන දේශපාලනය පිවිස නියෝජය හා රාජ්‍ය ඇමැති ධූරවලින් පිදුම් ලැබූ අතර, ශ්‍යාමලාල් රාජපක්‍ෂ දකුණු පළාත් සභා මන්ත්‍රීවරයකු විය. මෙසේ මේ රාජපක්‍ෂ පරපුරේ සියලු දෙනා, ජනතා ඡන්දයේ දේශපාලනයට පිවිසි ජනතාවට සේවය කරන්නන් විනා ලැයිස්තුවෙන් මන්ත්‍රීධූර ලබා ගත්තන් නොවේ. 1989 දී හම්බන්තොට දිස්ත්‍රික් මන්ත්‍රීවරයකු ලෙස චමල් රාජපක්‍ෂ මහතා ප්‍රථම වරට තේරී පත්වූ අතර, උත්තරීතර පාර්ලිමේන්තුවේ කථානායක ලෙසත් අමාත්‍ය හා නියෝජ්‍ය අමාත්‍යධූර කීපයක් දරා ඇති අතර, විසුරුවා හරින ලද පාර්ලිමේන්තු ද අමාත්‍ය ධූරයක් ද දරනු ලබයි. ඔහුගේ පුත් ශෂේන්ද්‍ර රාජපක්‍ෂ ඌව පළාත් සභාවේ ප්‍රධාන අමාත්‍ය ධූරය දැරීය.

1970 මැයි 27 වන දින පැවැති මහ මැතිවරණයේ දී දේශපාලනයේ අත්පොත් තැබූ මහින්ද රාජපක්‍ෂ ශ්‍රී.ලං.නි.ප. බෙලිඅත්ත ආසනය නියෝජනය කරමින් ලාබාලම මන්ත්‍රීවරයකු ලෙස 1970 ජුනි 14 වෙනි දින පාර්ලිමේන්තුවට පිවිසුණ අතර, 1994 කම්කරු ඇමතිවරයා ලෙසත්, පසුව ධීවර ඇමැති ලෙසත්, වරාය හා නාවික ඇමැති ලෙසත් කටයුතු කර ඇත. 2002 මාර්තු මාසයේ දී පාර්ලිමේන්තුවේ විපක්‍ෂ නායක ධූරයට පත්වූ මහින්ද රාජපක්‍ෂ 2004 අප්‍රේල් 06 වන දින ප්‍රථම වරට අග්‍රාමාත්‍ය ධූරයට පත් විය. 2018 හා 2019 දී නැවත අවස්ථා දෙකක දී අගමැති ධූරයට පත්වීමට හැකි විය. 2005 නොවැම්බර් 19 වන දින ජනාධිපතිවරණයෙන් ඡන්ද 4887152 ලබා පස්වන විධායක ජනාධිපති ලෙස පත් වූ මහින්ද රාජපක්‍ෂ මහතා ශ්‍රී.ලං.නි.ප. සභාපති ධූරයට ද පත් විය.

වසර 30 ක් තිස්සේ පැවැති කුරිරු ත්‍රස්තවාදය ලක් පොළොවෙන් අතුගා දැමීමට දෙන ලද නායකත්වය මෙතුමාගේ දේශපාලන ජීවිතයේ මෙන්ම රටේද වැදගත් කාර්යභාරයක් විය. 2009 මැයි 18 වන දින ලැබූ ඒ ඵෙතිහාසික ජයග්‍රහණය ලංකාවාසී ජනතාව ලැබූ අති සුවිශේෂ ජයග්‍රහණයකි. 2010 ජනවාරි 26 පැවැති ජනාධිපතිවරණයේදීද දෙවෙනි වරටත් විශිෂ්ට ජයක් ලැබු මෙතුමා 2015 ජනවාරි 08 දින පැවැති ජනාධිපතිවරණයෙන් දේශීය හා විදේශීය වශයෙන් පැවැති දිගු කාලීන කුමන්ත්‍රණයක ප්‍රතිඵලයක් වශයෙන් පරාජයට පත් විය.

ජනතා බලවේගය

නමුත් ජනතාවගේ ඉල්ලීම මත දේශපාලනයෙන් ඉවත් නොවූ මහින්ද රාජපක්‍ෂ අද විශාල ජනතා බලවේගයකට නායකත්වය දී ඇත. 2010-2015 ආණ්ඩුවේ මහින්ද රාජපක්‍ෂ මහතා ජනාධිපති ධූරය දරද් දී සොහොයුරු බැසිල් රාජපක්‍ෂ මහතා රජයේ ප්‍රධාන අමාත්‍ය ධූරයන් වන ආර්ථීක සංවර්ධන අමාත්‍ය ධූරය දැරුවේ ගම්පහ දිස්ත්‍රික් මන්ත්‍රීවරයකු ලෙස තේරී පත් වෙමිනි. එම මැතිවරණයේ දී ලංකාවේ වැඩිම මනාප සංඛ්‍යාවක් ලබා ජයගත් අපේක්‍ෂකයා ද ඔහු විය.

මහින්ද රාජපක්‍ෂ මහතාගේ 2005 ආණ්ඩුවේ ආරක්‍ෂක ලේකම් ධූරය දරමින් යුද්ධය නිවැ‍රැදි දිශාවකට යොමු කිරීමට මහින්ද රාජපක්‍ෂ මහතාට සහාය දුන්නේ ආරක්‍ෂක ලේකම් ධූරය දැරූ ඔහුගේ සොහොයුරු ගෝඨාභය රාජපක්‍ෂයි. අද ඔහු 2019 නොවැම්බර් ජනාධිපතිවරණයෙන් ඡන්ද හැටනව ලක්‍ෂයක් ලබා රටේ නායකත්වයට පත් ජනාධිපතිවරයාය. මහින්ද රාජපක්‍ෂ එම ආණ්ඩුවේ අගමැතිවරයාය. චමල් රාජපක්‍ෂ කෘෂිකර්ම අමාත්‍යවරයාය. බැසිල් රාජපක්‍ෂ ආර්ථික සංවර්ධන කටයුතු මෙහෙයවන ප්‍රධානියාය.

අද රාජය මුහුණ දෙන්නේ ඊලාම් යුද්ධයට වඩා වෙනත් මුහුණුවරක් ගත් කොයිඩ් 19 වසංගතය ජය ගැන්මට ගෝඨාභය රාජපක්‍ෂ ප්‍රමුඛ ආණ්ඩුව මෙහෙයවන ක්‍රියාදාමයේ දී මහින්ද රාජපක්‍ෂ සිය දේශපාලන ජීවිතයේ පනස්වන සංවත්සරය සමරයි. එදා 1970 මැයි 27 මැතිවරණ ජයග්‍රහණයෙන් දේශපාලනයට පිවිස 2020 මැයි 27 වන විට වසර 50 ඉක්මවන අතර පාර්ලිමේන්තුවේ 1970 ඔහු හා සමකාලීනව සිටි වාසුදේව නානායක්කාර මහතා පාර්ලිමේන්තුවේ සිටින එකම මන්ත්‍රීවරයාය. 1970 පාර්ලිමේන්තුවේ සිටි වෙනත් කිසිම මන්ත්‍රීවරයෙක් වත්මන් විසිරුවා හරින ලද පාර්ලිමේන්තුවේ නැත. ශ්‍රී ලාංකික දේශපාලනයේ දී කෙනෙකුට ලැබිය හැකි සියලු තනතුරු දරා තම ජනාධිපති සහෝදරයා සමඟ ඉදිරි සංවර්ධන කටයුතුවලට උරදෙන මෙතුමාගේ ද පුතුන් තිදෙනෙකි.

01. නාමල් රාජපක්‍ෂ

02. යෝෂිත රාජපක්‍ෂ

03. රෝහිත රාජපක්‍ෂ

මින් නාමල් රාජපක්‍ෂ 2010 මහ මැතිවරණයෙන් මනාප ඡන්ද 147566 ක් ලබා හම්බන්තොට දිස්ත්‍රික්කයෙන් ප්‍රථම ස්ථානයට ජයග්‍රහණය ලැබූ අතර 2015 මහ මැතිවරණයෙන්ද පළමු ස්ථානයට ජයග්‍රහණය කළේය. මහින්ද රාජපක්‍ෂ මහතාගේ දේශපාලනය ඉදිරියට ගෙනයාමට ඔහු කැපවී සිටී.

බණ්ඩාරගම සමරසේන මුදලිගේ

පාලනයෙන් තොර ව මනුෂ්‍ය සමාජයට පැවතිය නොහැක. එසේ ම මනුෂ්‍ය සමාජයක පාලනයක් සහ පාලකයකු බිහිවීම ද වැළැක්විය නොහැක. සමාජයක විවිධාකාර පුද්ගලයන්, පුද්ගල කණ්ඩායම්, දේශපාලන පක්ෂ බලවේග ආදිය එකිනෙක අතර තරගකාරීත්වයකින් මෙන් ම ඇතැම් විට සහජීවනයෙන් ද ක්‍රියාත්මක විය හැකි අතර ඒවායේ ප්‍රධාන අරමුණ වනුයේ රාජ්‍ය බලය අත්පත් කරගැනීම ය.

විග්‍රහයේ පහසුව සඳහා ඕනෑම සමාජයක් මූලික පැතිකඩ තුනකට බෙදා වෙන්කර හඳුනාගත හැකි ය. එනම් ආර්ථික ක්ෂේත්‍රය, දේශපාලන ක්ෂේත්‍රය සහ මානසික ක්ෂේත්‍රය වශයෙනි. මේ ප්‍රධාන ක්ෂේත්‍ර ඒකාබද්ධ ව පාලනය කිරීම සඳහා රාජ්‍ය ක්‍රියාවලිය නිර්මාණය වන අතර රාජ්‍ය පාලනය කිරීම වෙනුවෙන් ආණ්ඩු නිර්මාණය වේ. කෙසේ වෙතත් රාජ්‍යයේ සියලු ක්ෂේත්‍රය පිළිබඳ තීන්දු-තීරණ ගැනීමේ ක්ෂේත්‍රය බවට දේශපාලන ක්ෂේත්‍රය පරිවර්තනය වන අතර එහිදී රාජ්‍යයේ පාලකයාට හිමි වනුයේ ඉතා වැදගත් භූමිකාවකි. සමස්ත සමාජ ක්‍රියාවලිය සහජීවනයෙන් සහ සංවර්ධනාත්මක ව රටේ ජනතාවගේ අභිලාෂ සහ අවශ්‍යතාවලට අනුගත වන පරිදි පාලනය කිරීමට කලින් කලට විවිධ රාජ්‍ය නායකයෝ බිහි වෙති.

රාජ්‍ය නායකයාගේ භූමිකාව

විශේෂයෙන් ම ප්‍රජාතන්ත්‍රවාදය පවතින සෑම සමාජයක ම රාජ්‍ය නායකයාගේ භූමිකාව වර්තමානයේ දී ඉතා තීරණාත්මක ය. විසි වැනි ශතවර්ෂයෙන් පසු ව මෙම සමාජ ක්‍රියාවලිය තුළ රාජ්‍ය නායකයාගේ භූමිකාව අන් කවරදාටත් වඩා තීව්‍ර වීමට සේ ම සමාජය හා ඒකාබද්ධ වීමට පටන් ගත් අතර අදාළ සමාජයේ ඉරණම තීරණය කිරීමේදී බෙහෙවින් වැදගත් විය.

පාලනයට අනුව සමාජය සකස්වීම සහ සමාජයට අනුව පාලනය සකස්වීම යනුවෙන් ලෝකයේ ප්‍රධාන පාලන ක්‍රම දෙකක් ඇත. ඒ අතරින් අප රට තුළ දැකිය හැක්කේ පාලනයට අනුව සමාජය සකස් වීම ය. පාලනය, පෙරදිග සමාජයන්හි ඉතා වැදගත් සාධකයක් වන අතර පෙරදිග දේශපාලන ඉතිහාසය තුළ පාලනයට හිමි වනුයේ වඩා වැදගත් භූමිකාවකි.

මෙරට ඉතිහාසය දෙස හැරී බලන විට ද පෙනී යන්නේ ප්‍රබල රාජ්‍ය පාලනයක් පැවැති සෑම යුගයක සශ්‍රීකව සහ සාමකාමී සහජීවනයකින් සමාජය පවත්වාගෙන ගොස් ඇති බව යි. නිදහස ලැබීමත් සමඟ ම එතෙක් කලක් යුරෝපීය රටවලින් සිදු කෙරුණු මෙරට පාලනය සහ තීන්දු තීරණ ගැනීම් ජාතික දේශපාලනයට පැවරිණි. ආරම්භයේදී නෛතික වශයෙන් අපට යම්කිසි ස්වාධීනත්වයක් ලබාදුන්න ද ඉන් පසුව මෙරට තුළ පත් වූ නායකයන් මඟින් පවා ප්‍රායෝගික වශයෙන් බොහෝ දුරට රාජ්‍ය පාලනය සිදු වූයේ පෙර පැවැති යුරෝපීය පාලනයේ මූලධර්මවලට සහ යුරෝපීය රාජ්‍යයන්වල අවශ්‍යතාවලට අනුකූලව ය. එනම් නාමික ව නිදහස ලැබුණ මුත් රටේ පාලනය බොහෝ දුරට යුරෝපීය බලපෑම් ඔස්සේ ම සිදු විය.

බෙදුම්වාදය

සෘජු, ස්වාධීන තීන්දු-තීරණ ගැනීම සම්බන්ධ ගැටලුවක් නිදහසින් පසු ද රට තුළ දිගින් දිගට ම විය. 1970 දශකය වන විට විදේශීය අත පෙවීම් හේතුවෙන් රට තුළ විවිධාකාර අර්බුද උත්සන්න වූ අතර බෙදුම්වාදය ද ඒ අතර ප්‍රමුඛ විය. විවෘත ආර්ථික වැඩපිළිවෙළ ඔස්සේ එම අර්බුද තව-තවත් දරුණු අතට හැරුණු අතර එල්.ටී.ටී ඊ සංවිධානයේ නැඟී සිටීම ද ස්වාධීන රාජ්‍යයක් නිර්මාණය කරගැනීම තම ගැටලු විසඳා ගැනීමට ඇති එක ම ක්‍රමය ලෙස සිතන තැනට උතුරේ ඇතැම් පිරිස් තල්ලු වීම ද තුළ රාජ්‍ය පාලනයෙහි තීරණාත්මක අර්බුද නිර්මාණය විය. බෙදුම්වාදී ත්‍රස්තවාදය රාජ්‍යයේ ඒකීයත්වයට, භෞමික අඛණ්ඩතාවයට සහ රාජ්‍ය ඓතිහාසිකත්වයට දරුණු බලපෑමක් එල්ල කරමින් දශක තුනක් මුළුල්ලේ ම පැවැතිණි.

එවැනි අවස්ථාවක 2005ට පෙර පැවැති ආණ්ඩු ඒ සඳහා විසඳුමක් ලබාගැනීමට යම්කිසි ආකාරයක ප්‍රයත්නයන් දැරුව ද නිසි තීන්දුවක් ගැනීමට අපොහොසත් වූයේ බටහිර බලවේගවලට යටත් ව කටයුතු කිරීම හේතුවෙනි. ස්වාධීන ව සෘජු හා දැඩි තීන්දු ගනිමින් බෙදුම්වාදී ත්‍රස්තවාදී ප්‍රශ්නය විසඳාගැනීම වෙනුවෙන් දේශීය විසඳුමක් හෝ කළාපීය විසඳුමක් කරා යෑම සැබැවින් ම අභියෝගාත්මක වූ අතර එවැනි උත්සාහ දැරූ සෑම අවස්ථාවක ම එම උත්සාහ අඩපණ කිරීම වෙනුවෙන් විවිධ බලවේග ක්‍රියාත්මක විණි.

සෘජු තීරණ

2005 දී බලයට පත් මහින්ද රාජපක්ෂ ආණ්ඩුව ද ත්‍රස්තවාදී ගැටුමට සාමකාමී විසඳුමක් ලබාදීමට අවංක උත්සාහයක් ගත් නමුත් ඉන් ලැබුණු ඵලයක් නොවී ය. ඉන් අනතුරු ව ජාතික, කලාපීය සහ ජාත්‍යන්තර වශයෙන් ඇති වූ තත්ත්ව විශ්ලේෂණය කරමින් බෙදුම්වාදයට එරෙහි ව දියත් කළ මානුෂීය මෙහෙයුමක් ඔස්සේ සංග්‍රාමික උපක්‍රම යෙදීමට ගත් සෘජු තීරණය ශ්‍රී ලාංකේය ඉතිහාසයේ තීරණාත්මක තීන්දුවක් විය. එවකට සිටි ජනාධිපති මහින්ද රාජපක්ෂ මහතාගේ මූලිකත්වයෙන් ගත් එම විශිෂ්ට, අද්විතීය,තීරණාත්මක මෙන් ම ඓතිහාසික තීන්දුව එතුමන්ගේ අනාගත දේශපාලන දිවියත් රටේ ආනාගත දේශපාලනයත් සම්පූර්ණයෙන් ම තීරණය කිරීමට බලපෑ අතර දැනුඳු සමාජය තුළ රාජ්‍ය ක්‍රියාවලියේ භූමිකාව වර්ධනය වීමට ප්‍රබල ලෙස බලපෑම් එල්ල කරමින් පවතී.

එවකට පැවැති සමාජ වාතාවරණය අනුව ජාතික වශයෙන් මෙන් ම ජාත්‍යන්තර වශයෙන් බලපෑම් එල්ල වන විට ද එවන් සෘජු තීරණයකට එළැඹීම බොහෝ දෙනෙකු අපේක්ෂා නොකළ තත්ත්වයකි. කෙසේ වෙතත් එම සෘජු තීරණය අනුව ම යමින් 2009 වන විට බෙදුම්වාදී ත්‍රස්තවාදී සංවිධානය සම්පූර්ණයෙන් ම මර්දනය කළ ද ඒ සඳහා විරෝධය පෑ පිරිස, යුද ජයග්‍රහණයෙන් පසු ව ද සිදු කළේ සිය විරෝධය මඟහරවා ගැනීම නොව, එය වෙනත් ස්වරූපයකට හරවා ගැනීම ය.

මානුෂීය මෙහෙයුම

යුද්ධයට තිත තැබූ මානුෂීය මෙහෙයුම හෙළා දකිමින් දේශීය ව මෙන් ම ජාත්‍යන්තර ව එල්ල වූ නොයෙක් අපවාද සහ චෝදනා මධ්‍යයේ වුව ද නොසැලුණු නායකත්වය තීරණාත්මක ලෙස ඉදිරියට යෑම ලාංකේය දේශපාලන ඉතිහාසයේ ඉතාම විරල අවස්ථාවක් වූ අතර ලෝක දේශපාලනයේදී ද එවැනි අවස්ථා හඳුනාගත හැක්කේ අල්පයකි. එසේ වුව ද අද ද අප වෙත එල්ල වන යුද අපරාධ චෝදනා නිමක් නැත. 2009දී ලබාගත් ඓතිහාසික ජයග්‍රහණය අවතක්සේරු කිරීමේ බලවේග ජාතික වශයෙන් මෙන් ම ජාත්‍යන්තර වශයෙන් ද ක්‍රියාත්මක වෙමින් පවතී. කෙසේ වෙතත් එම තීන්දුව අනුව යමින් ලබාගත් ප්‍රතිඵලයේ හරය තේරුම් ගත යුත්තේ ද තක්සේරු කළ යුත්තේ ද අදාළ සන්දර්භයට කොතෙක් දුරට අනුකූල වූයේ ද යන දෘෂ්ටි කෝණය මත මෙන් ම එම තීන්දුවෙන් අත්කරගත් ජයග්‍රහණයේ ඇති මහා පරිමාණ ඓතිහාසික වැදගත්කම මත ය.

එල්.ටී.ටී.ඊ. ත්‍රස්තවාදී සංවිධානය සංග්‍රාමික උපක්‍රම මඟින් විනාශ කිරීමට ගත් තීන්දුව වෙනුවට වෙනත් තීරණයක් ගත හැකි ව තිබුණු බවට වර්තමානයේදී ඇතැම් පිරිස සිදු කරන ප්‍රකාශ, හුදෙක් ම එම ජයග්‍රහණයේ හරය වසන් කිරීමේ අරමුණින් ඉදිරිපත් වන පුහු මත ය. එවන් විශිෂ්ට ජයග්‍රහණවලින් අනතුරු ව ඔවැනි සංවාදයන් ලෝකයේ කොතෙකුත් බිහිවීම සාමාන්‍ය සංසිද්ධියකි.

කෙසේ වෙතත් දශක තුනක් මුළුල්ලේ පැවැති යුදමය තත්ත්වයක් තුළ ආර්ථික, දේශපාලන, සමාජ, සංස්කෘතික මෙන් ම මානව සම්බන්ධතා අතින් පිරිහී යමින් පැවැති රටක් යුද්ධයෙන් පසු නැවත ඒකීය භූ දේශපාලනික ඒකකයක් ලෙස ඒකාබද්ධ වීම තුළ, නිර්මාණය වීමට පටන් ගත්තේ අලුත් තත්ත්වයකි. ඒ සඳහා ගැලපෙන නව පාලන ව්‍යූහයක් වර්ධනය කිරීමට ද මහින්ද රාජපක්ෂ ආණ්ඩුවට සිදු විය. ඒත් සමඟ ම දැවැන්ත සංවර්ධන යෝජනා මෙන් ම චීනය, ඉන්දියාව වැනි කලාපීය රටවල් සම්බන්ධ කරගත් විවිධ ව්‍යාපෘතීන් ද දියත් විණි. සංග්‍රාමික අවධියේ සිට සංවර්ධනාත්මක අවධියකට ලාංකීය සමාජය කැපී පෙනෙන අයුරින් සංක්‍රමණය වූයේ මහින්ද රාජපක්ෂ මහතාගේ දේශපාලන නායකත්වයත් සෘජු තීරණ ගැනීමේ හැකියාවත් හේතුවෙනි. පශ්චාත් යුද සමයේ ඇති වූ අර්බුදකාරී තත්ත්වය තුළ පවා කිසිඳු පැකිලීමකින් තොර ව විදේශීය බලවේගයන්ට නොනැමී රැඩිකල් තීන්දුවලට එළැඹුණු එතුමා ගෙන ගිය දැවැන්ත සංවර්ධන වැඩපිළිවෙළ තුළ අප අත්කර ගනිමින් සිටි විශාල ආර්ථික, සමාජ සංවර්ධනය ලෝකයේ අවධානය අප වෙත නතු කරගැනීමට ද හේතුවක් විය.

දේශපාලන පාවාදීම

යුද ජයග්‍රහණය හේතුවෙන් ජාතික සහ ජාත්‍යන්තර වශයෙන් සතුරු බලවේග ක්‍රියාත්මක වෙමින් පැවැති මොහොතකත් ඒ කිසිවක් නොතකා එවකට ජනපතිව සිටි මහින්ද රාජපක්ෂ මහතා ජනතාව වෙනුවෙන් සෘජු තීරණ ගනිමින් සිටින විටක මෛත්‍රිපාල සිරිසේන මහතා විසින් ඒ සියලු තීන්දු සම්පූර්ණයෙන් ම කණපිට හැරවී ය. 2015 යහපාලන ආණ්ඩුව ආරම්භ වූයේ මහා දැවැන්ත දේශපාලන පාවාදීමකිනි. එම පාලන යුගය තුළ, පෙර පැවැති ආණ්ඩුව විසින් අත්කරගත් සියලු ජයග්‍රහණයන් විනාශ කරදැමීමට අවශ්‍ය වන නෛතික රාමුවක් ද ආණ්ඩුක්‍රම ව්‍යවස්ථාව තුළින් ම සම්පාදනය කෙරීය. එසේ ම 2015න් පසු රටේ පැවැති වර්ධනයන්ට සමානුපාත වන අන්දමින් සෘජු හා නිශ්චිත තීන්දු තීරණ නොගැනීම හේතුවෙන් දිගින් දිගට ම ම බිඳ වැටීමේ යුගයක් ඇති වූ අතර එම බිඳ වැටීමත් සමඟ යහපාලන රජයේ ද බිඳ වැටීම සිදු විය.

මහින්ද රාජපක්ෂ පාලනය තුළ වූ රාජ්‍ය ශක්තිමත් කිරීම, ආර්ථිකය පාලනය කිරීම, ජාත්‍යන්තරය ඉදිරියේ රටේ ප්‍රතිරූපය රැකගැනීම, ස්වාධීනත්වය, ස්වෛරීත්වය, රටේ භෞමික අඛණ්ඩතාව සහ සුජාතභාවය ප්‍රකට කිරීම පිළිබඳ අවධානය යොමු කිරීමේදී ඒ හා සමාන කළ හැකි වෙනත් යුගයක් ලාංකිකයන්ට නැති තරම් ය. කෙසේ වෙතත් ඒ වෙනුවෙන් ගත් ක්‍රියාමාර්ගවල සාර්ථකත්වයට සමානව ම ඊට ප්‍රතිවිරුද්ධ බලවේගයන් ද ජාතික සහ ජාත්‍යන්තර වශයෙන් පැන නැඟීය.

සෘජු තීරණ ගැනීමේ හැකියාව හේතුවෙන් එතුමන්ගේ නායකත්වය තුළ රටක් වශයෙන් අප අත්පත් කරගත් වැදගත් ජයග්‍රහණ රැසකි. ඒ ලබාගත් ජයග්‍රහණ ඉදිරියට පවත්වාගෙන යෑමේ අභියෝගය ද අද වන විට අප හමුවේ පවතී. මේ ගෙවෙන්නේ කොවිඩ් -19 වසංගත අවධිය යි. ජනතා කේන්ද්‍රීය ව සංවර්ධන උපාය මාර්ග දියත් කිරීම පිළිබඳ අලුතෙන් සොයා බැලිය යුතු මෙවන් යුගයක ද රට වෙනුවෙන් තීන්දු තීරණ ගැනීමේදී එතුමන්ගේ දේශපාලන පරිණතභාවය බෙහෙවින් ම යොදාගත හැකි වීම භාග්‍යයකි.

පරිණතභාවය

රාජ්‍ය නායකයා ප්‍රබල වන විට ඊට සමානුපාතිකව එම අදහස් වර්ධනයට සහ ඉදිරියට ක්‍රියාත්මක කරගෙන යෑමට අවශ්‍ය කරන තවත් බලවේග එම නායකත්වය වටා ගොඩනැගෙනු ඇත. අප ඉදිරියට යා යුත්තේ එවන් බලවේගයන් සමඟ ය. එවකට පැවති දේශපාලන නායකත්වයේ චින්තනය, හැසිරීම සහ මූලික හරය තුළ ගෝලීය අභියෝගවලට මුහුණ පාමින් යුද්ධය ජයගත් අප දැන් එළැඹ සිටිනුයේ පශ්චාත් ගෝලීය යුගයට ය. මෙම යුගයේ වැදගත් ම සාධකයක් වන දේශීයකරණය තුළ ජාතික ආර්ථිකය නැංවීම, ආනයන අවම කරමින් දේශීය නිෂ්පාදන වර්ධනය කිරීම වැනි ක්‍රියා පිළිවෙත් වෙත යොමු වීමේදී තව දුරටත් කඩා වැටෙමින් පවතින ගෝලීය ලෝකයෙන් විවිධ බලපෑම් එල්ල විය හැක. එම බලවේගවලට නොනැමී රට වෙනුවෙන් සෘජු තීරණ ගනිමින් ජනතා කේන්ද්‍රීය අනාගත සමාජ, ආර්ථික, දේශපාලන සංවර්ධන මොඩලයක් නිර්මාණය කරගැනීම මෙම යුගයේ දී රාජ්‍ය නායකත්වය වෙත පැවරෙන වැදගත් ම අභියෝගය යි. එවන් අභියෝග ජයගැනීමේ දී, ජාතික දේශපාලනයේ පනස් වසක අත්දැකීම්වලින් පිරිපුන් අග්‍රාමාත්‍ය මහින්ද රාජපක්ෂ වැනි පරිණත දේශපාලන නායකයකුගේ සහයෝගය සහ මඟ පෙන්වීම සැබැවින් ම රටට ආශිර්වාදයකි.

සටහන කාංචනා සිරිවර්ධන

රාජපක්ෂවරුන්ගේ දේශපාලනය දශක හතකට වඩා එහා ගිය එකකි. රාජපක්ෂවරු සහ පොදු ජනතාව අතර එදා සිට පවතින්නේ වෙන් කළ නොහැකි සබදතාවයකි. ගිරුවායෙන් ඇ‍රැඹි රාජපක්ෂවරුන්ගේ දේශපාලන තුළ ඩී. ඒ රාජපක්ෂ යනු අමරණීය නමකි. ගිරුවායේ දුක් විඳින මිනිසුන්ගේ ආදරය දිනූ ඩී. ඒ රාජපක්ෂ මහතාගේ වියෝවෙන් පසු දේශපාලන පිටියට පිවිසෙන්නේ එතුමාගේ පුත් මහින්ද රාජපක්ෂ මහතාය. මහින්ද රාජපක්ෂ මහතා ද ජනතාව සමඟ ඉතාමත් ළඟ සබඳතාවක් පවත්වාගත්තෙකි. ගිරුවායේ තම සමීපතමයන් නමින් ඇමතීමට තරම් මහින්ද රාජපක්ෂ මහතා සහ ජනතාව අතර පවතින්නේ සමීප සබඳතාවකි. 1970 මහමැතිවරණයට සමගි පෙරමුණ යටතේ තරග කරමින් බෙලිඅත්ත ආසනය ජයගත් මහින්ද රාජපක්ෂ මහතා 1970 පාර්ලිමේන්තුවේ සිටි ලාබාලතම මන්ත්‍රීවරයා විය.

ලාබාලතම මන්ත්‍රීවරයා ලෙස මහින්ද රාජපක්ෂ මහතා පැහැබර අනාගතයක පෙර ලකුණු පළ කළේය. ඔහුට එම පාර්ලිමේන්තුවේ ඇසුරු කිරීමට ගුරුහරුකම් ලැබීමට කීර්තිමත් උගත් පක්ෂ විපක්ෂ මන්ත්‍රීවරු රැසක් සිටියහ. ඔවුන් සමඟ එක්ව ජනතා සේවය කළ රාජපක්ෂ මහතා තරුණ අවදියේ සිටම ජනතාවාදී සටන්කාමී සහ වාමවාදී දේශපාලන ය මුල් කරගනිමින් තම දේශපාලන ගමන ශක්තිමත් කර ගත්තේය. සැබැවින්ම පාර්ලිමේන්තු ප්‍රජාතන්ත්‍රවාදය තුළ ඉහළම අත්දැකීම් ඇති සහ මනා සංයමයකින් දේශපාලනය කර රට ඉලක්කගත ගමනකට ගෙන ආ නායකයා ලෙස මහින්ද රාජපක්ෂ හදුන්වා දීමේ වරදක් නැත.

මහින්ද රාජපක්ෂ යන විපක්ෂ මන්ත්‍රීවරයාගේ භූමිකාව වඩාත් සවිමත් වෙන්නේ 1989 මහ මැතිවරණයෙන් පසුවය. එවකට බලයේ සිටි එක්සත් ජාතික පක්ෂ ආණ්ඩුව දැඩි මතධාරී සහ ප්‍රජාතන්ත්‍රවාදී නොවන උපක්‍රම ඔස්සේ ජනතාව පීඩනයට පත්කරද්දී එයට එරෙහිව නැඟී සිටි විපක්ෂ මන්ත්‍රීවරයා වූයේ රාජපක්ෂ මහතාය. විපක්ෂයේ බලවත් තනතුරක් නොදරා ජනතාව වෙනුවෙන් සිය කාර්ය ඉටුකළ රාජපක්ෂ මහතා එහෙක් පරාජය කළ නොහැකි යැයි සිතූ එජාපය පරාජය කිරීමට අවශ්‍ය සැලසුම් සහ උපාය මාර්ග සකස් කළේය. එහි මංසන්ධිය ලෙස කතරගම පාද යාත්‍රාව හඳුන්වා දිය හැකිය. එතෙක් නිද්‍රාවට පත්ව සිටි විපක්ෂ අවදි වූයේ මේ පාද යාත්‍රාව සමඟය. මෙහි සැලසුම්, මැදහත්වීම් සහ මූලිකත්වය මහින්ද රාජපක්ෂ මහතාගේය. එම පාද යාත්‍රාව සාර්ථක වීමත් සමඟ 1994 ජයග්‍රහණයට මූලික අඩිතාලම වැටුණි.

1993 පළාත් සභා මැතිවරණය ද මහින්ද රාජපක්ෂ මහතාගේ මැදහත්වීම සහ සටන්කාමීත්වය පෙන්නුම් කළ අවස්ථාවක් විය. දකුණු පළාත් සභාවේ බහුතර බලය එවක පොදුජන එක්සත් පෙරමුණට සහ ප්‍රජාතන්ත්‍රවාදී එක්සත් ජාතික පෙරමුණට හිමිව තිබීම සහ එහි බහුතරය හිමි පිරිසට ආණ්ඩු බලය ලබා දිය යුතු වුව ද එය එසේ නොකර සිටීමට එවක සිටි ආණ්ඩුකාරවරයා කටයුතු කළ අතර එම අභියෝග හමුවේ රාජ්‍ය බලය පරාජය කර සත්‍ය සහ යුක්තිය දිනවීමට මහින්ද රාජපක්ෂ මහතා මැදහත් විය. 1994 දී දාහත් වසරක එජාප පාලනය පරාජය කිරීමට හැකියාව ලැබෙන්නේ මෙම පෙරළිකාර සිදුවීමත් සමඟය. එදා රාජපක්ෂ මහතා මේ වෙනුවෙන් මැදහත් නොවන්නට එජාපයේ රාජ්‍ය බලය පරාජය නොවන්නට ඉඩ තිබුණි. කිසිදු විටක පටුවාසි නොබැලූ ඔහු තම දේශපාලන ප්‍රතිපත්තිය හා දර්ශනය වෙනුවෙන් ඉදිරිපත් විය.

1994 ජයෙන් පසු කම්කරු ඇමැතිවරයා ලෙසද ඉන්පසුව ධීවර ඇමතිවරයා ලෙසද බාධා මැද විශිෂ්ඨ සේවයක් ඉටු කරන්නට රාජපක්ෂ මහතා කටයුතු කළේය. 2001 දී පොදුජන එක්සත් පෙරමුණු ආණ්ඩුව පරාජය වීමෙන් පසු විපක්ෂ නායකවරයා ලෙස කටයුතු සියතට ගත් ඔහු අවුරුදු දෙකක් ඉක්මවා යද්දීම එජාපය පරාජය වෙත තල්ලු කළ අතර 2004 දී අගමැතිවරයා ලෙස විශිෂ්ඨ සේවයක් සදහා ගමන් ඇරඹීය. 2005 ජනාධිපතිවරණය මෙරට තීරණාත්මක මංසන්ධියක් වූ අතර එම මංසන්ධියක් ජය ගෙන රට නිවැරැදි දිශාවට ගෙන ඒමට ඉතිහාසගත මෙහෙයක් ඉටුකිරීමට රාජපක්ෂ මහතා කටයුතු කළේය.

රටට පිළිලයක්ව පැවති යුද්ධය ජය ගැනීම කළ නොහැක්කක් බවට සමාජයේ මතයක් මුල් බැස තිබුණි. එහෙත් එම මතය වෙනස් කරමින් යුද්ධය ජය ගැනීමට අවශ්‍ය නිර්භීත දේශපාලන නායකත්වය මහින්ද රාජපක්ෂ මහතා විසින් ලබා දුනි. ඔහු කළ මේ මහා මෙහෙය මෙරට පවතින තුරු ජනතාවට අමතක නොවන සහ ඓතිහාසික කාර්යකි. රාජපක්ෂ යුගයේ ඉටුකළ මේ කාර්ය පමණක් වුව ද ඉතිහාසයේ රන් අකුරින් ලියැවීමට ප්‍රමාණවත් ය. මේ යුගය සංවර්ධනය අතින් ද මහා විස්කම් කළ යුගයකි. අධිවේගී මාර්ග, වරාය ගුවන්තොටුපළ පමණක් නොව ප්‍රාදේශීය මට්ටමේ සංවර්ධනය වැඩියෙන්ම සිදු වූයේ මේ කාලයේදීය. ආර්ථික සංවර්ධනය හා ආර්ථික වර්ධන වේගය ඉහළට යමින් වේගවත් සංවර්ධනයක් වෙත රට ගෙන යාමට රාජපක්ෂ දැක්මට හැකියාව ලැබුණි.

2015 දී විවිධ බලවේගවල මුසා බස්වලට ජනතාව මුලා වී රාජපක්ෂ යුගය නිම කිරීමට තීරණය කළ ද කෙටි කලකදීම නැවතත් මහින්ද රාජපක්ෂ මහතා ගේ නායකත්වය ජනතාවට අවැසි විය. එයට හේතු වූයේ දශකයක් එක පිම්මට දියුණුව වෙත ගිය රට නැවත ආපස්සට ගමන් කිරීමය. යහපාලන ආණ්ඩුවේ වැරැදි ප්‍රතිපත්ති ය ඊට මූලිකම හේතුවයි. 2019 දී නැවත රට ගෝඨාභය රාජපක්ෂ මහතාට බාරදීමට ජනතාව තීන්දු කළ අතර එතුමා සමඟ එක්ව රට ඉදිරියට ගෙන යන්නේ මහින්ද රාජපක්ෂ නම් පරිනත නායකයාය. ඉදිරි අවුරුදු පහ තුළ නැවත වැටුණු රට නැගිටවන්නට ගෝඨාභය-මහින්ද සුසංයෝගයට නියත හැකියාවක් තිබේ.

සටහන උදිත ගුණවර්ධන

විජයානන්ද හේරත් එවකට කම්කරු ඇමැති ධුරයේ කටයුතු මහින්ද රාජපක්ෂ මහතාගේ මාධ්‍ය අංශය බාර ගන්නේ 1995 වසරේදීය. ඒ මහින්ද රාජපක්ෂ මහතා කම්කරු ඇමැතිවරයා ව සිටියදීය. එතැන් පටන් විජයානන්ද හේරත් මහතා මේ වන විට වසර 25 කාලයක් මහින්ද රාජපක්ෂ මහතා ඇසුරෙහි සේවය කරමින් සිටියි. හෙතෙම අග්‍රාමාත්‍යවරයාගේ මාධ්‍ය ලේකම් ලෙස කටයුතු කරයි. මහින්ද රාජපක්ෂ නම් වූ අසහාය දේශපාලන නායකත්වය මාධ්‍යවේදීන් සමඟ තිබුණු සම්බන්ධතාව විජයානන්ද හේරත් මහතාගේ අත්දැකීම් ඇසුරෙන් සකස් කෙරිණි.

රුහුණු ගිරුවායේ ජනතාව සහ මහින්ද රාජපක්ෂ නම් දේශපාලනඥයා අතර ඇත්තේ ගහට පොත්ත මෙන් සබඳතාවක් බව නොදන්නෙක් මේ රටේ නොමැත. සකල ශ්‍රී ලංකාවාසීන්ට ළබැඳි මහින්ද රාජපක්ෂ මහතා තමන් උපන් ගමේ ජනතාවට දක්වන්නේ කෙබඳු සෙනෙහසක්දැයි යන්නට ඊටත් වඩා අටුවාටීකා අවැසි නැත. රුහුණේ කවුරුත් ආදරේට මහින්ද මහත්තයා ලෙසින් හඳුන්වන අග්‍රාමාත්‍ය මහින්ද රාජපක්ෂ මහතා තමන් උපන් ගමේ ජනතාවට මෙන් සෙනෙහසක් රටේම ජනතාවට දක්වද්දී ඔහුගේ සිතෙහි විශේෂ ස්ථානයක් වෙන් කරගන්නට සමත් වූ කොට්ඨාසයක් වෙත්නම් ඒ මාධ්‍යවේදීන් බව රහසක් නොවේ. මහින්ද රාජපක්ෂ නම් චරිතය සහ මාධ්‍යවේදීන් අතර ඇත්තේ එවැනි සබඳතාවකි.

තෙවරක් අගමැති

1970 මැයි මස 26 වැනි දා පැවැති මහ මැතිවරණයෙන් ජයග්‍රහණය කොට එම වසරේම ජූනි මස 07 වැනි දින මන්ත්‍රීවරයකු ලෙස පාර්ලිමේන්තුවේ දිව්රුම් දෙමින් සිය පාර්ලිමේන්තු ජීවිතය ආරම්භ කළ මහින්ද රාජපක්ෂ මහතා 2020 ජූනි මස 07 වැනි දා සිය පාර්ලිමේන්තු දිවියෙහි වසර 50 සමරන්නේ දෙවරක් විධායක ජනාධිපතිවරයකු, තෙවරක් අගමැතිවරයකු ලෙසින් පත් වූ පළමුවැන්නා ලෙසිනි. විශේෂත්වය වන්නේ ඔහු තෙවැනි වර අගමැති ධුරයට පත්වන්නේ දෙවරක් ජනාධිපති ධුරය දරා හමාර වීමෙන් පසුව වීමය. රටේ ඉහළම තැනට යන්නට සමත් වුවත් මහින්ද රාජපක්ෂයන් අත නොහැරි සිරිත් දෙකක් වේ නම් ඒ ජනතාවට දක්වන සෙනෙහසත් මාධ්‍යවේදීන්ට දක්වන ආදරයත්ය.

මහින්ද රාජපක්ෂ මහතා මාධ්‍යවේදීන්ට කෙතරම් ආදරයක් දැක්වූයේ ද යත් ජනාධිපතිවරයකු ලෙස මෙන්ම 1970 වසරේ දී පළමු වරට මන්ත්‍රීවරයකු වූ වකවානුවේ පවා ඔවුන් සමඟ සමීප ඇසුරක් පවත්වාගෙන ගියේය. මන්ත්‍රීවරයකු ලෙස කටයුතු කරන සමයේ ඔහු සමඟ සමීපව කටයුතු කළ මේ වන විට ජිවතුන් අතර සිටින මාධ්‍යවේදීහු තවමත් මහින්ද රාජපක්ෂයන්ගේ හිතවත්කම ගැන කතා කරති. මහින්ද රාජපක්ෂයන්ගේ මිතුරන් අතරේ පුළුල් පරාසයක මාධ්‍යවේදීහු සිටිති. ප්‍රාදේශීය මාධ්‍යවේදියාගේ සිට මාධ්‍ය ආයතන හිමිකරුවන් දක්වා පිරිස් ඒ අතර වෙති. මහින්ද රාජපක්ෂයන්ට හිතවත්කම් පවත්වාගෙන යාමේදි කාගෙත් ලොකු පොඩිකම් හෝ තරාතිරම් හෝ වැදගත් වූයේ නැත.

පෞරුෂය

මාධ්‍යවේදීන් අතර සබඳතා දැක්වීමේ දී ඕනෑම අවස්ථාවක දුරකතනයට පිළිතුරු දෙන දේශපාලනඥයන් අතලොස්සක් අතර මහින්ද රාජපක්ෂ මහතා ප්‍රමුඛස්ථානයක සිටි බව රහසක් නොවේ. මාධ්‍යවේදීන් තොරතුරු ලබා දීමෙහි දී රාජපක්ෂ මහතාට කිසිදු සීමාවක් නොවීය. ආණ්ඩුව තුළ සාකච්ඡා වුවත් එම කාරණා ජනතා විරෝධී නම් ඔහු දෙවරක් නොසිතා ඒවා මාධ්‍යයට හෙළිදරව් කළේය. ඒ ගැන ඇතැම් අවස්ථාවල ආණ්ඩුවේ ප්‍රබලයන්ගෙන් මහින්ද මහතාට චෝදනා එල්ල වුවත් ඔහු ඒවා සතයකට මායිම් කළේ නැත. එවන් පෞරුෂයක් එදා සිටම මහින්ද මහතාට තිබුණේය.

ශ්‍රී ලංකාව වැනි ආසියාතික රටවල මාධ්‍යවේදීන් යනු එතරම් වත්පොහොසත්කම් ඇත්තවුන් නොවන බව කාටත් රහසක් නොවේ. සිය ජීවිත කාලයම පත්තර කලාව වෙනුවෙන් කැපකරන බොහෝ ප්‍රවීණ මාධ්‍යවේදීන් ජීවිතයේ අවසන් කාලයේ ඉතා අසරණ ජීවිත ගත කරන බව කාටත් වඩා දන්නා කෙනකු වී නම් ඒ මහින්ද රාජපක්ෂ බව මාධ්‍යවේදීන් අතර කියැවෙන කතාවකි. ඊට හේතු කාරණා ද බොහෝය. රැකියාවේ යෙදී සිටිය දී බොහෝ දේශපාලනඥයන්ගේ ප්‍රසාදයට පත් වන මාධ්‍යවේදීහු රැකියාව නැති කල කිසිවකුගේ හව්හරණක් නැති අය බවට පත්වෙති. ඕනෑම අවස්ථාවක දුරකතනයට පිළිතුරු දෙන දේශපාලනඥයෝ එවැනි අවස්ථාවල දී ගොලු වෙති. එහෙත් මහින්ද රාජපක්ෂ මහතා කිසි විටෙකත් එසේ කරන්නේ නැත.

ප්‍රමුඛතා ලයිස්තුව

තනතුරක සිටිය දී හෝ නැති අවස්ථාවක දී වුවත් බොහෝ මාධ්‍යවේදීන් මහින්ද රාජපක්ෂයන් අමතා දුක කියන්නේ එබැවිනි. බලය නැති විටෙක වුවත් මාධ්‍යවේදියකුගේ ගැටලුවකට විසැඳුම් සොයා දෙන්නට මහින්ද මහතා අමතක කරන්නේ නැත. නම් ගම් වශයෙන් සඳහන් කළ නොහැකි වුවත් එවැනි අවස්ථා දස දහස් ගණනක් මහින්ද රාජපක්ෂයන්ගේ දේශපාලන දිවියේ වසර 50ක කාලය තුළ ලියැවී තිබේ. මහින්ද රාජපක්ෂ මහතාගෙන් උපකාරයක් ඉල්ලා එය ඉටු නොවුණු අවස්ථාවක් සොයා ගැනීම කණ කැස්බෑවා විය සිදුරෙන් අහස දකිනවාටත් වඩා විරළ බව මාධ්‍යවේදිහු දනිති.

මහින්ද රාජපක්ෂයන් කුමන තනතුරක් දැරුවත් ඒ සෑම විටම මාධ්‍යවේදීහු ඔහුගේ ප්‍රමුඛතා ලයිස්තුවේ අංක එකෙහි වූහ. ජනාධිපති ධුරය දරන සමයෙහි පවා මාධ්‍යවේදීන් ආහාර ගත්තේදැයි සොයා බලා මිස ආහාර නොගැනීම මහින්ද රාජපක්ෂ මහතාගේ සිරිතක් විය. ඇමැතිවරයකු වශයෙන් සිටිය දී නම් මාධ්‍යවේදීන්ගේ කරට අතදමාගෙන ආහාර මේසය වෙත කැඳවා ගෙන යාම ඔහුගේ චරිතයෙහි විශේෂ ලක්ෂණයක් බව දන්නෝ දනිති. ජනාධිපති ධුරය දරන සමයෙහි එසේ කළ නොහැකි වුවත් සෑම විටම මාධ්‍යවේදියාගේ ආහාර වේල ගැන සොයා බැලීමට ඔහු අමතක කළේ නැත.

සමීපතමයන් හා ඇසුර

ජනාධිපති ධුරය දරමින් අරලියගහ මන්දිරයෙහි වෙසෙන සමයේ මහින්ද රාජපක්ෂ මහතා අනුගමනය කළ එක් සිරිතක් විය. එනම් පැවැත්වෙන රැස්වීම් අවසානයෙහි ඒවාට සහභාගී වී සිටින මාධ්‍යවේදීන් කෑම මේසයට කැඳවාගෙන යාමය. “ඔහෙලත් යංකෝ කෑම ටිකක් කන්න“ කියමින් මාධ්‍යවේදීන් කැඳවාගෙන යන මහින්ද රාජපක්ෂ මහතා පැය ගණන් කතාබහ කරමින් ආහාර ගන්නා ආකාරය එවකට ජනාධිපති මාධ්‍ය ආවරණ කටයුතුවල නියැළී මාධ්‍යවේදීන් හට අමුත්තක් වූයේ නැත. ජනාධිපතිවරයා සමඟ එසේ ආහාර ගැනීමේ වරප්‍රසාදය හිමි වූ අතලොස්සක් පිරිස අතරින් ප්‍රමුඛස්ථානය මාධ්‍යවේදීන් හට හිමි විය.

මාධ්‍යවේදීන් හා එසේ කල් ගත කිරීම තුළින් මහින්ද රාජපක්ෂයන් කාරණා කිහිපයක්ම ඉටුකර ගත්තේය. පළමු වැන්න සමීපතයන් හා ඇසුරු කිරීම තුළින් ලැබෙන චිත්ත ප්‍රීතියයි. දෙවැන්න තමන් දන්නා තොරතුරු ගැන මාධ්‍යවේදීන් දැනුවත් කිරීමයි. තෙවැන්න මාධ්‍යවේදීන් දන්නා තොරතුරු තමන් ලබාගැනීමයි. ජනාධිපති ධුරයෙහි සිටිය දී පවා මහින්ද රාජපක්ෂයන් විශ්වාස කළ කරුණක් වූයේ ජනාධිපතිවරයා ලෙසින් තමන් නොදන්නා බොහෝ තොරතුරු මාධ්‍යවේදීන් සතුව තිබෙන බවය. ජනතාව අතර කතාබහට ලක්වෙන සංවේදී කරුණු කාරණා මහින්ද රාජපක්ෂයන් දැනගත්තේ මාධ්‍යවේදීන්ගෙනි.

මාධ්‍යවේදීන් ඉල්ලීමක් නොකළ අවස්ථාවක වුවත් උපකාරයක් අවශ්‍ය වූයේ නම් එය නොපිරිහෙළා ඉටුකිරීමට මහින්ද රාජපක්ෂ මහතා පැකිළුණේ නැත. ලංකාදීප පුවත්පතෙහි සේවය කළ ජ්‍යෙෂ්ඨ මාධ්‍යවේදියකු වන දුෂ්‍යන්ත සමරසේන අරලිගයගහ මන්දිරයෙහි උත්සව අවස්ථාවක් ආවරණය කිරීමට ගොස් සිටියදී වරක් දැඩි ලෙස ගිලන්ව ඇද වැටු‍ණේය. ඒ බව දැනගන්නට ලැබුණු මහින්ද රාජපක්ෂ මහතා සිය ආරක්ෂක අංශය වෙත වහාම උපදෙස් දුන්නේ දුෂ්‍යන්ත රෝහලට රැගෙන යන ලෙසය. ඒ සඳහා සිය පරිවාර රථ පෙළෙහි වූ ගිලන් රථය භාවිත කරන ලෙසත් උපදෙස් දුන්නේය. එපමණක් නොව විජයානන්ද හේරත් ඇමතූ රාජපක්ෂ මහතා වහාම ජාතික රෝහලට යන ලෙසත් නියෝග කළේය.

හිතවත්කම්

රාජපක්ෂ මහතාගේ ක්ෂණික ක්‍රියාකාරිත්වය නිසා එදා දුෂ්‍යන්තගේ දිවි බේරා ගැනීමට හැකි විය. පසුව දැනගන්නට ලැබුණේ දුෂ්‍යන්ත රෝහලට රැගෙන යන විටත් රාජපක්ෂ මහතා ජාතික රෝහලේ අධ්‍යක්ෂවරයා අමතා අවශ්‍ය කටයුතු කරන ලෙසට නියෝග කර තිබුණු බවය. රාජපක්ෂ මහතාගේ දීර්ඝකාලීන හිතවතකු වූ දුෂ්‍යන්ත පසුකලෙක ජීවිතයෙන් සමුගත් අතර ඔහුගේ අවසන් කටයුතුවලට අවශ්‍ය සහයෝගය ද කිසිවකුත් නොදැන ඉටුකරලීමට එවකට ජනාධිපති ධුරය දැරූ රාජපක්ෂයන් කටයුතු කර තිබුණි.

මාධ්‍යවේදීන් හට රාජපක්ෂ මහතාගේ සිතෙහි කෙතරම් ආදරයක් තිබුණේ ද යත් සිය ආරක්ෂක නිලධාරීන්ට පවා උපදෙස් දී තිබුණේ මාධ්‍යවේදීන් හට බාධාවකින් තොරව වාර්තා කිරීමේ කටයුතු කරන්නට ඉඩදෙන ලෙසය. ජනාධිපති ධුරය දරන සමයේ මාධ්‍යවේදීන් හට බාධා එල්ල කළ ජනාධිපති ආරක්ෂක අංශයේ නිලධාරීන් ජනාධිපතිවරයාගෙන් බැනුම් ඇසූ අවස්ථා ඕනෑතරම් සටහන් කළ හැකිය. වරක් උත්සවයකට සහභාගී වීමට ගිය අවස්ථාවක ජනාධිපති ආරක්ෂක නිලධාරීන් ඡායාරූප මාධ්‍යවේදීන් හට බාධා කරනු දුටු මහින්ද රාජපක්ෂයන් වේදිකාවේ සිට විජයනාන්ද හේරත් අමතා දැඩිව දැනුම් දුන්නේ එය වළක්වන ලෙසය. තවත් වරක් ඩේලිමිරර් පුවත්පතෙහි මාධ්‍යවේදී සඳුන් ජයසේකර මහතා ජනාධිපති ආරක්ෂක නිලධාරීන් සමඟ බහින්බස් වීමකට මුහුණ පා රෝහල් ගත වූ අවස්ථාවක විජයානන්ද හේරත් මහතා අත සිය කණගාටුව පළ කර යැවූ රාජපක්ෂ මහතා ආරක්ෂක අංශයේ නිලධාරීන්ට දෝෂාරෝපණය කළේ නැවතත් එවැනි සිදුවීම් වාර්තා විය යුතු නැති බව කියමිනි.

මෙවැනි අවස්ථා ඕනෑ තරමක් සටහන් කළ හැකි වුවත් එසේ කරන්නට ඉඩකඩ ප්‍රමාණවත් නොවේ. මහින්ද රාජපක්ෂ මහතාගේ හිතවත්කම් මාධ්‍යවේදීන්ට අමුතුවෙන් කියන්නට යාම ගහ දන්නා මිනිහාට කොළ කඩා පෑමට නොදෙවනි කරුණකි. ඒ ප්‍රාදේශීය මාධ්‍යවේදීන් මෙන්ම ජාතික මාධ්‍ය ආයතනවල සේවය කරන මාණ්ඩලික මාධ්‍යවේදීන් දක්වා බොහෝ පිරිස් මහින්ද රාජපක්ෂ මහතාගේ ළෙන්ගතු බව හොඳින් දන්නා නිසාය. එනිසා අවසානය සටහන් කළ යුතුව ඇත්තේ මෙරට දේශපාලනඥයන් අතරින් මහින්ද රාජපක්ෂ අග්‍රාමාත්‍යතුමන් තරම් මාධ්‍යවේදීන් හට හිතවත් අයකු තවත් නොවන බවය.

ජීවන ගමනේ ඇරඹුම

1945 නොවැම්බර් 18 දින උපත ලද මහින්ද රාජපක්ෂ මහතාගේ පියාණන් වූයේ ජ්‍යෙෂ්ඨ අමාත්‍යවරයකු වූ ඩී ඒ රාජපක්ෂ මහතාය. ඔහුගේ ආදරණීය මව වන්නේ දන්දිනා සමරසිංහ දිසානායක

මහත්මියයි.

අධ්‍යාපනය ලද විද්‍යාල

කොළඹ තර්ස්ටන් ,නාලන්ද විද්‍යාලවලින් සහ ගාල්ල රිච්මන්ඩ් විද්‍යාලයේ ඉගෙනුම ලබා තිබේ.

උසස් අධ්‍යාපනය

ශ්‍රී ලංකා නීති විද්‍යාලයේ නීතිය විෂය හදාරා ඇති රාජපක්ෂ මහතා ජ්‍යෙෂ්ඨ නීනිවේදියෙකි.

දේශපාලන පිටියට පිවිසීම

1967 දී මහින්ද රාජපක්ෂ මහතාගේ පියාණන්වන ඩී ඒ රාජපක්ෂ මහතා හදිසියේ අභාවප්‍රාප්ත වන අතර ඔහුගේ වියෝවෙන් පසු එහි ශ්‍රී ලංකා නිදහස් පක්ෂ වගකීම් භාරගත් අතර 1970 මහමැතිවරණයේ දී ලාබාලම පාර්ලිමේන්තු මන්ත්‍රීවරයා ලෙස රාජපක්ෂ මහතා පත්වන අතර ඒ වන විට ඔහුගේ වයස අවුරුදු 24කි.

විවාහය සහ දූ පුත්තු

1983 වර්ෂයේ දී ශිරන්තී වික්‍රමසිංහ මෙනවිය සමඟ විවාපත් වන රාජපක්ෂ මහතාට නාමල් රාජපක්ෂ, යෝෂිත රාජපක්ෂ සහ රෝහිත රාජපක්ෂ යන පුතුන් තිදෙනෙකි.

පළමු වරට ඇමැතිවරයෙක්

මහින්ද රාජපක්ෂ මහතා 1994 වසරේදී පොදුජන එක්සත් පෙරමුණු ආණ්ඩුවේ කම්කරු ඇමැතිවරයා ලෙස පත්වූ අතර ඉන් අනතුරුව ධීවර සහ ජලජ සම්පත් ඇමතිවරයා ලෙස කලක් කටයුතු කළේය.

විපක්ෂ නායකත්වය

2001 වසරේ පැවැති හදිසි මැතිවරණයෙන් පොදු පෙරමුණු ආණ්ඩුව පරාජය වූ අතර ඉන් පසුව එළැඹි පාර්ලිමේන්තුවේ විපක්ෂ නායකවරයා වූයේ රාජපක්ෂ මහතාය.

 අගමැති මහින්ද

2004 අප්‍රේල් මාසයේ පැවැති මහ මැතිවරණයෙන් ශ්‍රීලනිපය මූලිකව පිහිටුවා ගත් එක්සත් ජනතා නිදහස් සන්ධානය ජය ගත් අතර එම රජයේ අගමැතිවරයා වූයේ රාජපක්ෂ මහතාය.

ජනාධිපති මහින්ද

2005 නොවැම්බර් මාසයේ පැවැති ජනාධිපතිවරණයෙන් රනිල් වික්‍රමසිංහ මහතා පරාජය කරමින් මෙරට විධායක ජනාධිපති ධූරයට පත් මහින්ද රාජපක්ෂ මහතා නැවතත් 2010 ජනාධිපතිවරණයෙන් නැවත ජනාධිපති ධූරයට පත් විය.

නැවත අගමැති ධූරයට

2015 ජනාධිපතිවරණයේ පරායෙන් පසු කුරුණෑගල දිස්ත්‍රික්කයෙන් මන්ත්‍රීවරයකු වු රාජපක්ෂ මහතා 2019 දී නැවත කෙටි කලකට අගමැති ධූරයට පත් රාජපක්ෂ මහතා පසුව විපක්ෂ නායක ධූරයට පත්වූ අතර 2019 ජනාධිපතිවරණය ගෝඨාභය රාජපක්ෂ මහතා ජයගත් පසු නැවත අගමැති ධූරයට පත් විය.

උදිත ගුණවර්ධන

ජනාධිපති නීතිඥ මනෝහර ආර් ද සිල්වා

ජනපතිවරයා විසින් පාර්ලිමේන්තුව විසුරුවාහරිමින් මහ මැතිවරණයට හා අභිනව පාර්ලිමේන්තුව රැස්වීමට දින නියම කර තිබියදී කොවිඩ්-19 බලපෑම හේතුවෙන් අපේක්ෂා කළ දිනවලදී මැතිවරණය පැවැත්වීමටත් නව පාර්ලිමේන්තුව රැස් කිරීමටත් නොහැකි විය. ඒ හේතුවෙන් මැතිවරණ කොමිසම මගින් ජූනි මස 20 දින මැතිවරණය පැවැත්වීමට තීරණය කළේය. ඒ අතරවාරයේ පිරිසක් ශ්‍රේෂ්ඨාධිකරණය වෙත ගියේ ජනපතිවරයා විසින් මාර්තු මස 02 වැනි දින පාර්ලිමේන්තුව විසුරුවා හරිමින් නිකුත් කළ ගැසට් නිවේදනය හා ජූනි මස 20 දින මහ මැතිවරණය පැවැත්වීම වෙනුවෙන් මැතිවරණ කොමිසම නිකුත් කළ ගැසට් නිවේදනය අවලංගු කරන ලෙස ඉල්ලමිනි. එහි තීන්දුව ප්‍රකාශයට පත් වූයේ අදාළ පෙත්සම් සියල්ල ප්‍රතික්ෂේප කරමිනි. මේ සියලු කරුණු සම්බන්ධව ජනාධිපති නීතිඥ මනෝහර ආර් ද සිල්වා මහතා සමඟ කළ සාකච්ඡාවකි මේ.

 මහ මැතිවරණය ජූනි මස 20 දින පැවැත්වීම හා ජනපතිවරයා පාර්ලිමේන්තුව විසුරුවාලමින් නිකුත් කළ ගැසට් පත්‍ර නිවේදනය බල රහිත කරන ලෙස ඉල්ලා ශ්‍රේෂ්ඨාධිකරණයේ ගොනු කර තිබූ මූලික අයිතිවාසිකම් පෙත්සම් නිෂ්ප්‍රභා කරමින් පංච පුද්ගල විනිසුරු මඬුල්ල දුන් තීන්දුව පිළිබඳ ඔබගේ අදහස?

ඉතාම නිවැරදි තීන්දුවක් ශ්‍රේෂ්ඨාධිකරණය දුන්නා. පෙත්සම් සියල්ල කුණු කූඩයට දැම්මා කිව්වොත් නිවැරදියි. ආණ්ඩුකම ව්‍යවස්ථාවේ 70(1) වගන්තියේ පැහැදිලිව කියනවා පාර්ලිමේන්තුව පත්ව වසර 4 1/2 කට පස්සේ ජනපතිවරයාට පවතින පාර්ලිමේන්තුව විසුරුවා හැරීමට පුළුවන් කියලා. ඊට පෙර ජනපති මෛත්‍රිපාල සිරිසේන මහතා කළ විසුරුවා හැරීම අවලංගු කළේ ඒ අවස්ථාව වන විට පාර්ලිමේන්තුවට වසර 4 1/2 සම්පූර්ණ වී නොතිබූ නිසයි.

ජනපති ගෝඨාභය රාජපක්ෂ මහතා පසුගිය මාර්තු මස 02 දින පාර්ලිමේන්තුව විසුරුවා හැරීමට ගත් පියවර ආණ්ඩුක්‍රම ව්‍යවස්ථාවට අනුකූලව ගත් එකක් බවට තර්කයක් නැහැ. කළුවෙන් සුදුවෙන් ව්‍යවස්ථාවේ මේ කරුණු පැහැදිලිව අච්චුගහලා කියලා තියෙනවා. ජනාධිපතිට ඒ බලතල දීලා තියෙද්දී කොහොමද කියන්නේ ඒ තීන්දුව අවලංගු කරන්න කියලා. ශ්‍රේෂ්ඨාධිකරණය අහගෙන ඉන්න ඕන නිසා දවස් 10 ක් මේ කරුණු අහගෙන හිටිය මිසක් ඇත්තටම මේ පෙත්සම්කරුවන් කළේ ශ්‍රේෂ්ඨාධිකරණයේ වටිනා කාලය කා දැමීමක්. ව්‍යවස්ථාවේ පැහැදිලිව ජනාධිපතිතුමාට පාර්ලිමේන්තුව විසුරුවා හැරීමට හැකි කාල සීමාව දක්වා තිබියදී ඒ ගැන පදනමක් නැති මත ඉදිරිපත් කිරීම ඇත්තටම වැඩකට නැති දෙයක්. ආණ්ඩුක්‍රම ව්‍යවස්ථාවේ 70(5)(අ) වගන්තියේ තියෙනවා ජනපතිවරයා ආණ්ඩුක්‍රම ව්‍යවස්ථාවේ 70(01) යටතේ තමන්ට ලැබී ඇති බලතල පාවිච්චි කරලා පාර්ලිමේන්තුව විසුරුවා හරිනකොට දින දෙකක් නියම කරන්න ඕනැ කියලා.

එකක් මැතිවරණය පවත්වන දිනය. අනෙක් එක තමයි ඊළඟට පාර්ලිමේන්තුව කැඳවන දිනය. මීට අමතරව මැතිවරණ නීතිය මගින් කියනවා නාම යෝජනා කැඳවන දිනයන්ද නම් කරන්න ඕනැ කියලා. එහෙම දින දෙකක් ගැන සඳහන් කරන්න විශේෂ හේතුවක් තිබෙනවා. නැත්නම් ජනාධිපතිවරයකුට පුළුවන් තමන්ගේ බලය පාවිච්චි කරලා විසුරුවා හැරලා මැතිවරණයක් නොතියා පාර්ලිමේන්තුවත් නොකැඳවා ඉන්න. ඒක වළක්වන්න තමයි මාස තුනක් ඇතුළත දිනයක් නියම කරන්න කියලා තියෙන්නේ. ඒක තියෙන්නේ ජනාධිපතිවරයාට දිනයක් නියම කිරීමට මිසක් පාර්ලිමේන්තුව ඒ කියන දිනයේම රැස්විය යුතුයි කියලා නොවෙයි.

මේ පිළිබඳව තවත් පැහැදිලි කරනවා නම්?

අපි හිතමු ජනාධිපති නම් කළ ඒ දිනයේ පාර්ලිමේන්තුව ගං වතුරකින් යට වුණා කියලා. මොකද කරන්නේ මහජන නියෝජිතයෝ වහලේ උඩ රැස් වෙන්නද?. රැස් වෙන්න බැරිනම් බෑ. ජනාධිපතිවරයාට නීතියෙන් නියම කරනවා ඔබ පාර්ලිමේන්තුව විසුරුවා හරින විට මැතිවරණය පවත්වන හා යළි පාර්ලිමේන්තුව රැස් වන දිනයන් ප්‍රකාශයට පත් කරන්න ඕනැ කියලා. ජනපතිවරයා ඒක ප්‍රකාශයට පත් කළාට පස්සේ මැතිවරණය පවත්වන සම්පූර්ණ වගකීම පැවරෙන්නේ මැතිවරණ කොමිසමටයි.

මැතිවරණ නීතිය තමයි මැතිවරණ කොමිසමට බලපාන්නේ. ඒ නීතියේ කියනවා ජනාධිපති නියම කළ දිනයට කුමන හෝ හදිසි තත්ත්වයක් නිසා මැතිවරණය පැවැත්වීමට නොහැකි වුවහොත් කොමිසමට ඒ වෙනුවෙන් වෙනත් දිනයක් නියම කළ හැකි බව. මැතිවරණ කොමිසමේ සභාපතිවරයා කිව්වා මේ කොරෝනා ප්‍රශ්නය නිසා මට මැතිවරණ රාජකාරීවලට නිලධාරීන් ගෙන්වාගන්නත් බෑ, මිනිස්සුන්ට ඡන්දය දෙන්න එන්නත් බෑ , ඒ නිසා ජනාධිපති නියම කළ දිනයට මැතිවරණය පවත්වන්න බෑ, මම ඒ වෙනුවට ජූනි 20 මැතිවරණය තියනවා කියලා. ඕක අල්ලගෙන තමයි මේ අය මේ පෙත්සම් ඉදිරිපත් කළේ.

පෙත්සම්කරුවන් මේ ඔස්සේ කුමක් බලාපොරොත්තු වුණා කියලද ඔබ සිතන්නේ.?

නඩුව කල්දදා කාලයක් යන්නයි මේ අය හිතුවේ. අපිට මේ වගේ අත්දැකීම් තියෙනවා නේ. ඇත්තටම ශ්‍රේෂ්ඨාධිකරණයේ හැමෝම මුඛ ආවරණ පැලඳගෙන තමයි පෙත්සම් විභාගයට ගත්තේ. දවස් 10ක් තිස්සේ ඒ විනිසුරුතුමන්ලා කාලය වැය කළේ මේක කරන්න ඕන නිසා. නැත්නම් ඇත්තටම මෙතන වාද කරන්න තරම් ප්‍රශ්නයක් නෑ. ජනාධිපතිවරයාට පාර්ලිමේන්තුව විසුරුවා හැරීමට බලය තියෙනවා.

ව්‍යවස්ථාවට අනුකූලව එතුමා ඒක කළා. පාර්ලිමේන්තුව රැස්වෙන්න බැරිවුණා කියලා එතුමා මොනවා කරන්නද? ඕක තේරුම් ගන්න නීති විශාරදයෙක් වෙන්න ඕන නැහැනේ. සිහිබුද්ධිය තියෙන ඕන මනුෂ්‍යයෙක් කියයි තියාගන්න බැරිනම් ගංවතුරක් බැහැපු වෙලාවක හරි වසංගතය පාලනය වුණ වෙලාවක හරි මැතිවරණය තියන්න කියලා. ජනතාවගේ ඡන්ද අයිතිය ගැන තියෙන ප්‍රශ්නයක් මේක. ඡන්ද අයිතිය කියන්නේ ජනතා පරමාධිපත්‍යයේ කොටසක්. ජනාධිපතිවරයා නියම කළ දිනට මැතිවරණය පැවැත්වීමට නොහැකි බව මැතිවරණ කොමිසමේ සභාපතිවරයා දැනුම් දුන් විට ජනපතිවරයා කොමිසමට කිව්වේ කොරෝනා නිසා නියමිත දිනට මැතිවරණය පවත්වන්න නොහැකි බව මම දන්නවා, මම ඒක මැඬපවත්වන්න කළ හැකි සියලු දේ කරනවා, රටේ වාතාවරණය හොඳ බව පෙනුණම මැතිවරණය පවත්වන්න කියලයි.

ජනතාවගේ ජීවිත ගැන හිතලා මහ මැතිවරණය සති කිහිපයකින් කල් දාගැනීමට හැකි වීම ජයග්‍රහණයක් කියලා පිරිසක් කියනවා.?

මෙහෙම මිනිස්සුද මේ බලයට එන්න හදන්නේ. ශ්‍රේෂ්ඨාධිකරණය කිව්වේ නැහැ ජූනි 20 මැතිවරණය තියන්න එපා කියලා. මේ අයට උදම් අනන්න දෙයක් නැහැ. මොකද නඩුව ශ්‍රේෂ්ඨාධිකරණය විසින් සම්පූර්ණයෙන්ම විසිකරලා දැම්මා. මැතිවරණය ජූනි 20 තියන්න බැරි වුණේ වෙන හේතුවක් නිසා නොවෙයි මේ අය නඩුදාලා ඒක පරක්කු කළ නිසයි. ඒක මහ ලොකු වීර කමක්ද? නීතිඥවරු, විනිසුරුවරු වැඩ කරනවා.

කන්තෝරුවලත් වැඩ පටන්ගෙන. එතකොට ප්‍රජාතන්ත්‍රවාදී දේශපාලන ප්‍රවාහයක ඉන්න අය කියන්න ඕනැ කතාවක්ද මේක?. අපේ පරමාර්ථය වුණේ මැතිවරණය පරක්කු කරගැනීම කියලා ඒ අය කියනවා නම් ජූනි 20 මැතිවරණය පවත්වන්න හැකියාවක් නොමැති බව මැතිවරණ කොමිසම වෙනුවෙන් පෙනී සිටි නීතීඥ මහතා අධිකරණයට කරුණු දැක්වූ අවස්ථාවේ එයාලට තිබුණා, නඩු ඉල්ලා අස්කරගන්න. මේ අයට ඕන වුණේ නාමයෝජනා කැන්සල් කරගෙන මේ මැතිවරණය තවත් පුළුවන් තරම් කල්දාන්නයි. මම හිතනවා මේ අය දැන් ඉන්නේ මැතිවරණයකට මුහුණ දිය හැකි තත්ත්වයක නොවෙයි. යහපත් දේශපාලන ප්‍රවාහයක ඉන්න කණ්ඩායමක් මැතිවරණයක් එපා කියයිද? ඔවුන් සෑම විටම උත්සාහ කරන්නේ මැතිවරණ ලබා ගන්නයි.

මේ තීන්දුව ජනතාවගේ ප්‍රජාතන්ත්‍රවාදය ආරක්ෂා කිරීම පැත්තෙන් වැදගත් වෙන්නේ මොන ආකාරටයද?

ආණ්ඩුක්‍රම ව්‍යවස්ථාවේ තුන්වන වගන්තියෙන් කියනවා ජනරජයේ පරමාධිපත්‍යය ජනතාව සතුයි කියලා. ඒ වගේම කියනවා ඡන්ද බලය පරාමාධිපත්‍යයේ කොටසක් කියලා. මේ තීන්දුවෙන් කළේ ඡන්දය පැවැත්වීම කල් දැමීමට දරන උත්සාහය පරාජය කිරීමක්. ඒකට අපිට ඉඩ දෙන්න බෑ කියන එක තමයි ශ්‍රේෂ්ඨාධිකරණය කිව්වේ. ඒක ඇත්තටම ජනතා පරමාධිපත්‍යය මුල් කරගෙන දුන් තීන්දුවක්. මේ තීන්දුව මගින් ජනතා පරමාධිපත්‍ය බලයේ වැදගත්කම ඉස්මතු වුණා.

ලෝකයේ කිසිම රටක මාස හයක් පාර්ලිමේන්තුව රැස් නොකර තිබී නොමැති බවත් මෙය ප්‍රජාතන්ත්‍රවාදයට පටහැනි පියවරක් බවත් විපක්ෂයේ පිරිස් පවසනවා.

ඒ අය මුලින් ආණ්ඩුක්‍රම ව්‍යවස්ථාව කියවිය යුතුයි. එහි තිබෙන්නේ පාර්ලිමේන්තුව වසරට එක වතාවක් රැස් වුණත් ඇති කියලයි. ව්‍යවස්ථාවේ 70(2) වගන්තියේ මේක පැහැදිලිව දක්වා තිබෙනවා. මෙහෙම වගන්තියක් තිබියදී ජනතාව නොමඟ යැවීමට කරන ප්‍රකාශ හැටියට තමයි මේ ප්‍රකාශවලට අර්ථකථන දිය හැකි වන්නේ. පාර්ලිමේන්තුව විසුරුවා හැරීම කියලා කියන්නේ පාර්ලිමේන්තුව මරා දැමීමකට සමානයි.

විසුරුවා හැරියොත් පාර්ලිමේන්තුවක් නැහැ. රටක ඉතාමත්ම හදිසි තත්ත්වයක් ඇතිව තිබෙන අවස්ථාවක ජනාධිපතිවරයාට හැඟෙනවා නම් පාර්ලිමේන්තුව කැඳවලා යම් කටයුත්තක් කිරීමට තිබෙන බව , ඒ සඳහා ව්‍යවස්ථාවේ අවකාශ තිබෙනවා. ඒ කාරණය යටතේ පාර්ලිමේන්තුව කැඳවන්න ජනපතිවරයාට සුවිශේෂී බලයක් දී තිබෙනවා. ඒ බලය ලබාදී තිබෙන්නේ කොන්දේසි දෙකක් යටතේයි. එකක් හදිසි තත්ත්වයක් තියෙන්න ඕන. අනික පාර්ලිමේන්තුව කැඳවලා කරගත යුතු දෙයක් තියෙන්න ඕන. අපේ රටේ දැනට තියෙන නිරෝධායන නීති යටතේ සෞඛ්‍ය ඇමතිට හැකියාව තිබෙනවා මේවගේ වෙලාවක ඕනැම නීති රෙගුලාසියක් හදන්න. ඒකට පාර්ලිමේන්තුවක් අවශ්‍ය නැහැ. අනිත් කාරණය පැහැදිලිව ජනතාව ප්‍රතික්ෂේප කළ පාර්ලිමේන්තුවක් යළි කැඳවන්නේ ඇයි.

විපක්ෂය යළි පාර්ලිමේන්තුව රැස් කරන්න කියලා දිගින් දිගටම කියන්නේ ඇයි?

බොරු චෝදනාවක් දාලා ජනපතිවරයාට එරෙහිව දෝෂාභියෝගයක් ගේන්න තමයි මේ අය පාර්ලිමේන්තුව රැස් කිරීම මගින් උත්සාහ කරන්නේ කියලා මම හිතනවා. ගාල්ලේ මන්ත්‍රීවරයෙක් මේ වගේ අදහසක් කියලා තිබුණා. රටේ බහුතරයක් වූ 69 ලක්ෂයකගේ ජනවරම නැතිකරන්න දරන උත්සාහයට ඉඩක් නොදිය යුතුයි. දහනව වැනි ආණ්ඩුක්‍රම ව්‍යවස්ථා සංශෝධනය ගෙනල්ලා කළා වගේම මහ ව්‍යසනයකට රට ගෙනයන්න හදන උත්සාහයක් මේක. පසුගිය වසරේ ශ්‍රේෂ්ඨාධිකරණය තීන්දුවක් දුන්නනේ වසර 4 1/2ක් යන තුරු පාර්ලිමේන්තුව විසුරුවා හරින්න ජනාධිපතිවරයාට බැහැ කියලා. එතුමන්ලා රටේ නීතිය කියා තිබෙන දේ ප්‍රකාශ කළා.

ඇත්තටම මේ 19 වන සංශෝධනයට පක්ෂව පාර්ලිමේන්තුවේ මන්ත්‍රීවරු අතරින් 224 දෙනෙක්ම ඡන්දය දුන්නා. මම ශ්‍රේෂ්ඨාධිකරණ තීන්දුව විවේචනය කරන්නේ නැහැ. ඒත් පාර්ලිමේන්තුව විසුරුවා හැරීමේ බලය ජනපතිට වසර 4 1/2ක් යනතුරු නොතිබෙන බවට තීන්දුව ලබා දී මාස හතරක් යන්නට පෙර මේ සංශෝධනයේ අයහපත් ප්‍රතිපල අපි අත්වින්දා. පාස්කු දින ප්‍රහාරයෙන් දෙසිය හැට ගණනක් මරණයට පත්වුණා. තවත් විශාල පිරිසක් ආබාධිත වුණා. ජනාධිපතිතුමයි අගමැතිතුමයි මුහුණට මුහුණ බලලා කතා කරන්නේ නැති තත්ත්වයක් රටේ ඇති වෙලා තිබුණා.

අවුරුදු හතරක පමණ කාලයක් රට ඇදි ඇදී ආවේ මේ වගේ තත්ත්වයක් එක්කයි. තමන්ගෙ පටු දේශපාලන අරමුණු ඉෂ්ට කරගන්න ගෙනාව සංශෝධනයක් මේක. නැවැත ජනමතය විමසීමට ගියොත් තමන්ට බලය අහිමි වන බව දන්නා නිසා පැවැති පාර්ලිමේන්තුව මොන ආකාරයෙන් හෝ අඛණ්ඩව පවත්වාගෙන යන්න ගහපු ගැටයක් මේක. ලෝකයේ ප්‍රජාතන්ත්‍රවාදය අගයන කිසිදු රටක මේ වගේ තත්ත්වයක් දක්නට ලැබෙන්නේ නැහැ. එන්.ජී.ඕ කාරයින්ට ඕනැ වුණා ඒ ආණ්ඩුව තියාගන්න. එයාලගේ න්‍යායපත්‍රයේ කොටසක් ඒක. රටට විරුද්ධව යෝජනා ගෙනල්ලා ඒවා සම්මත කරන අතරතුර අනෙක් පැත්තෙන් බුද්ධි අංශ අකර්මණ්‍ය කරලා බුද්ධි නිලධාරීන් අත්අඩංගුවට ගත්තා. මේක මහා ව්‍යාපෘතියක එක කොටසක් පමණයි.

රටේ ව්‍යසනයක් වුණාම ජනාධිපති කියනවා මම දන්නේ නෑ කියලා. අගමැති අනිත් පැත්තෙන් කියනවා මම දන්නේ නෑ කියලා. ආරක්ෂක රාජ්‍ය ඇමැතිවරයාත් කියනවා මම දන්නේ නෑ කියලා. අන්තිමට එක්කෙනෙක්වත් මොනවත් දන්නේ නෑ. එහෙම වුණේ මේ සංශෝධනයේ ප්‍රතිඵලයක් ලෙස තමයි. හරියට වැඩකරන ආණ්ඩුවක් තිබුණා නම් මම දන්නේ නැහැ කියලා කියන්න ඒ ගොල්ලන්ට බැහැ. ජනපති හා අගමැති එකට වාඩිවෙලා කතා කරන්නේ නැහැ. ඒ ගොල්ලෝ තරහයි. මේ විදිහට දෙපැත්තට අදින රටක් කොහොමද ඉදිරියට යන්නේ.

ස්වාධීන කොමිෂන්සභා පිහිටුවීම 19 වැනි ව්‍යවස්ථා සංශෝධනය ඔස්සේ සිදු කෙරුණු දෙයක්. මේ සම්බන්ධ ඔබගේ අදහස කෙබඳුද?

කොමිසම් ඇති කරලා ආණ්ඩුව කළේ ඒ අයට උදව් කළ එන්.ජී.ඕ කාරයෝ ඒවට දාගත්ත එකයි. හූල් වගේ අයගේ ක්‍රියාකාරීත්වය මගින් ඒක පේනවා. කලින් චන්දානන් ද සිල්වා, දයානන්ද දිශානායක වගේ මැතිවරණ කොමසාරිස්වරු මේ රටේ මැතිවරණ පැවැත්වූවා. ඒ අය පහළ සිට අත්දැකීම් ලබමින් ඉහළට පැමිණි රාජ්‍ය නිලධාරීන්. කොමිසම ස්වාධීනව කටයුතු කරන බවක් පේන්න නැහැ. අඩු තරමේ එහි සාමාජිකයින්ට එකට ඉඳගෙන එක තීරණයක් ගන්න බැරි තත්ත්වයක් ඇතිවෙලා තියෙන්නේ. දහනව වැනි සංශෝධනයෙන් තවත් අපූරු දෙයක් කළා. කොමිසම පාර්ලිමේන්තුවට වගකියන්න ඕන කියලා එක තැනක තියෙනවා. තවත් තැනක තියෙනවා පාර්ලිමේන්තුවට වගකියන්න ඕන නැහැ කියලා.

හිටපු පාර්ලිමේන්තු මන්ත්‍රී සුමන්තරන් මහතා කියනවා පෙත්සම් ප්‍රතික්ෂේප කිරීමට හේතු ඉදිරිපත් කිරීමක් කළේ නැහැ කියලා.

මිනිස්සු එක එක විකාර ලියලා පෙත්සම් ඉදිරිපත් කරනවා. මූලික අයිතිවාසිකම් පෙත්සමක් පවත්වාගෙන යන්න නම් මුලින් අවසරය ලබාගත යුතුයි. කඩදාසි ගොනුකළ පමණින් නඩුව විභාග කිරීමක් සිදුවන්නේ නැහැ. ඉදිරිපත් කරන පෙත්සම් විභාග කරන්න නම් මුලින් අධිකරණයට පෙන්නුම් කරන්න ඕන, ඒවා විභාග කරන්න තරම් වැදගත් ඒවා කියන කාරණය. ඒක ඒත්තු ගැනුනොත් විතරයි ඒවා විභාගයට ගැනීම සඳහා ශ්‍රේෂ්ඨාධිකරණයේ දොරටුව විවෘත වෙන්නේ. නඩුව හොඳයි, දැන් පවත්වාගෙන යන්න පුළුවන්, විරෝධතා ගොනුකරන්න, ප්‍රතිවිරෝධතා ගොනුකරන්න, ලිඛිත දේශන ෆයිල් කරන්න අපි තීන්දුවක් දෙන්නම් කියලා ශ්‍රේෂ්ඨාධිකරණය දැනුම් දෙනවා. අතුරු නියෝගයක් දෙනකොට තමයි හේතු දක්වන්නේ. මේ නඩුව විභාග කරන්නවත් වටින එකක් නොවේ ඒ නිසා අපි නඩුව පවත්වාගෙන යෑමට අවසර දීම ප්‍රතික්ෂේප කරනවා කියලා පෙත්සම් ප්‍රතික්ෂේප කළා. කෙටියෙන් කියනවා නම් පෙත්සම් ජනේලයෙන් එළියට වීසි කළා. කිසිම වැදගත්කමක් නැති කාරණයක් වෙනුවෙන් ශ්‍රේෂ්ඨාධිකරණයේ කාලය නාස්ති කරන්නේ ඇයි?

ජීවන් තොණ්ඩමන්

ලංකා කම්කරු කොංග්‍රසයේ නායක ආරුමුගන් තොණ්ඩමන් මහතාගේ අභාවයෙන් පසු පොදුජන පෙරමුණේ නාම යෝජනා ලැයිස්තුවේ පුරප්පාඩු වූ අපේක්ෂක ධූරයට නුවරඑළිය දිස්ත්‍රික්කයෙන් ඉදිරිපත්ව සිටින්නේ තොණ්ඩමන් මහතාගේ පුත් ජීවන් තොණ්ඩමන්ය. බැරිස්ටර් නීතිවේදියකු වන විසිහය හැවිරිදි ජීවන් තොණ්ඩමන් මහතා සමඟ කළ සාකච්ඡාවකි මේ.

වසර 25ක කාලයක් මහජන නියෝජිතයෙකු ලෙස පාර්ලිමේන්තුව නියෝජනය කරමින් වතුකරයේ ජනතාවට නායකත්වය දුන් ඔබේ පියා මියගියේ කිසිවකුත් අපේක්ෂා නොකළ අවස්ථාවක. ඒත් සමඟ නොසිතූ අයුරින් දේශපාලනයට යොමුවීමට ඔබට සිදු වුණා නේද?

තාත්තාගේ මරණයෙන් පසු ශ්‍රී ලංකා පොදුජන පෙරමුණේ පුරප්පාඩු වූ නුවරඑළිය දිස්ත්‍රික් අපේක්ෂක ධූරය ලබගෙන තරඟ කරන්න කියලා ලංකා කම්කරු කොංග්‍රසයේ විධායක සභාව යෝජනා කළා. ඒ අනුව තමයි මම මහ මැතිවරණය සඳහා නාම යෝජනා අත්සන් කළේ. මෙතරම් ඉක්මනට තාත්තා අපිව අතහැරලා යයි කියලා මම නෙවෙයි මේ රටේ කවුරුවත් හිතුවේ නැහැ. නොසිතූ අවස්ථාවක සිදුවූ ඔහුගේ මරණය නොසිතූ අයුරින් මාව ක්‍රියාකාරී දේශපාලනයට යොමු කළා. මගේ පියා වතුකරයේ ජනතාව වෙනුවෙන් නිතරම කැපවීමෙන් කටයුතු කළ නිසා අපේ පවුල සමඟ තාත්තට නිතරම ඉන්න අවස්ථාව ලැබුණේ නැහැ. මම වැඩිදුර අධ්‍යාපනය ලැබුවේ එංගලන්තයේයි. දේශාපාලනයට එන්න මුලින් මගේ අදහසක් තිබුණේ නැහැ.

තාත්තා තමයි මාව ලංකාවට ගෙන්නගෙන ලංකා කම්කරු කොංග්‍රසයේ තරුණ සංවිධානයේ නායකත්වය ලබාදුන්නේ.තාත්තා වතුකරයේ ජනතාවට නිතරම කියපු දෙයක් තමයි එකමුතුව කළොත් ජයග්‍රහණ රැසක් ලබා ගන්න පුළුවන් කියන එක. තාත්තාගේ අභාවයෙන් පස්සේ වතුකරයේ ජනතාව එකට එකතුවී සිටිනවා.මට පාර්ලිමේන්තුවට පිවිසෙන්න අවස්ථාව ලබාදුන්නොත් තාත්තාගේ සිහිනය සැබෑ කරන බවට මම වතුකරයේ ජනතාවට පොරොන්දු වෙනවා.

ඔබ දේශපාලනයට ආධුනිකයෙක්. නුවරඑළිය දිස්ත්‍රික්කයේ වතු ජනතාවට නායකත්වය දෙන පක්ෂ අතර තිබෙන්නේ දැඩි තරඟකාරීත්වයක්. මෙයට මුහුණ දීමට ඔබට හැකියාව තිබෙනවාද?

දේශපාලනයේදී වඩාත් වැදගත් වන්නේ පළපුරුද්දට වඩා ජනතාවට සේවය කිරීම සඳහා අවංක වුවමනාවක් තිබීමයි. ලංකා කම්කරු කොංග්‍රසයේ තරුණ සංවිධානයේ සභාපති ලෙස මම වසර තුනක පමණ කාලයක් තිස්සේ කටයුතු කරනවා. මේ තනතුරු බාරදෙන කොට තාත්තා කිව්වේ ජනතාව ගැන නොහිතා වැඩකරන දේශපාලනඥයින්ට ඉදිරි ගමනක් නැහැ කියලයි. කොච්චර දේශපාලන දැනුම තිබුණත් වැඩක් නැහැ ජනතාවගේ හැඟීම් තේරුම් ගන්න බැරි නම්. අපිට ඡන්දය දීලා ජනතාව අපිව පාර්ලිමේන්තුවට යවන්නේ ඔවුන්ගේ ප්‍රශ්නවලට විසඳුම් ලබාගන්න මිස අපේ ප්‍රශ්න විසඳ ගන්න නොවෙයි. තාත්තා හැම වෙලාවෙම ජනතාවගේ පැත්තේ ඉඳලා දේශපාලනය කළ කෙනෙක්. මට කා එක්කවත් තරඟයක් නැහැ. ජනතාවට සේවය කරන්න මොකටද තරඟයක්. අපි හරියට වැඩකරන කොට ජනතාව තීරණය කරයි කාටද ඡන්දය දෙන්න ඕන කියලා.

ඔබගේ පියාගේ මරණයත් සමඟ විවිධ අදහස් සමාජ මාධ්‍ය ඔස්සේ ප්‍රචාරය වුණා.ඇතැම් ඒවා මතබේදයට තුඩුදෙන ඒවා

මගේ පියා පුටුවෙන් වැටුණා කියලා සමාජ මාධ්‍ය ජාලාවල පළවුණා. තාත්තා නැතිවෙන කොට ළඟ හිටියේ මමයි මගේ දෙවනි සහෝදරියයි තාත්තාගේ ආරක්ෂක අංශයේ නිලධාරිනුත් පමණයි.ස්වයං නිරෝධානයට යොමු වෙලා ඉන්න මගේ වැඩිමහල් සහෝදරිය පියාගේ දේහයට අවසන් ගෞරව දැක්විමට කොළඹ ලංකා කම්කරු කොංග්‍රස් මුලස්ථානයට අලුයම් කාලයේ රහසිගතව ඇවිල්ලා විනාඩි 15ක් හිටියා කියලත් චෝදනා එල්ල වුණා.

මේවා කිසිදු පදනමක් නැති කතා.පියාගේ අභාවය දැනගත් විගස ඕමානයේ සිටින මගේ වැඩිමහල් සහෝදරිය ඕමාන් රජයේ නිරෝධායන සහතිකයක් රැගෙන ලංකාවට පැමිණියා. එයා ලංකාවට ආපු ගමන් ලංකාවේ සෞඛ්‍ය බලධාරින් විසින් නිරෝධාන රෙගුලාසි වලට අනුව දින 14 ක ස්වයං නිරෝධායනයට යොමු කළා. ඇය මීගමුව ප්‍රදේශයේ සංචාරක හෝටලයක ස්වයං නිරෝධනයට යොමු වෙලයි සිටින්නේ. ඒ සම්බන්ධව සහ පියාගේ හදිසි අභාවය පිළිබදව සමාජ මාධ්‍යවල අපහාසාත්සමක ප්‍රචාර ගණනාවක් රැගෙන ගියා.

ඒ ගැන හරිම කණගාටුයි. මියගියේ අසියාවම පිළිගත් නායකයෙක්. වසර 30 ක් මේ රටේ දේශපාලනය කරපු නායකයෙක්. එහෙම කෙනෙකුගේ දේහය තැන්පත් කරලා තියෙන තැනට රහසිගතව ඇවිල්ලා අවසන් ගෞරව දැක්වීමට අවස්ථාවක් තියෙයි කියලා ඔයා විශ්වාස කරනවාද? පියාගේ දේහය තැන්පත් කරතිබූ සෑම තැනකම මාධ්‍යවේදීන්, ආරක්ෂක අංශ නිලධාරින් වගේම සෞඛ්‍ය අංශ නිලධාරින් හිටියා. ඒ අයගේ ඇස් වහලා මගේ වැඩිමහල් සහෝදරියට පියාගේ දේහයට අවසන් ගෞරව දැක්වීමට පුළුවන්ද?

මේ සිදුවීම් පසුපස දේශපාලනයක් ක්‍රියාත්මකයි කියලා ඔබ විශ්වාද කරනවාද?

එක් අවස්ථාවක මගේ දෙවැනි සහෝදරියගේත් තවත් අවස්ථාවක සෙන්දිල් තොණ්ඩමන් අයියගේ බිරිඳගේත් ඡායාරූප පෙන්වලා ඒ තමයි මගේ වැඩිමහල් සහෝදරිය කියලා සමාජ ජාලවල පළ කරලා තිබුණා .හදිසියේ හෘදයාබාධයක් ඇතිවුණ වෙලාවේ තාත්තව ජයවර්ධනපුර රෝහලට රැගෙන නොගොස් තලංගම ප්‍රාදේශිය රෝහලට අරගෙන ගියේ ඇයි කියලත් සමහරු ප්‍රශ්න කර තිබුණා. මගේ පියා අවසන් හුස්ම හෙළුවේ මගේ උකුළේ. ඒ වෙලාවේ මගේ පියා රැගෙන යන්නේ කොහෙටද කියලා මට හිතා ගන්න බැරුව හිටියේ. අපේ බත්තරමුල්ලේ නිවසට ආසන්නම රෝහල තලංගම ප්‍රාදේශිය රෝහල කියලා කිව්ව නිසා අපි පාරවල් අහගෙන එතන්ට ගියා. පියාගේ මරණයෙන්

දේශප­ාලන වාසි ලබාගැනිමටත් අපේ තොණ්ඩමන් පවුලට අපහාස කරන්නත් එපා කියලා මම සියලු දෙනාගෙන් ඉල්ලා සිටිනවා.

ඔබ සෞඛ්‍ය අධ්‍යක්ෂ ජනරාල්වරයාට දුරකතනයෙන් තර්ජනය කළ බවටත් චෝදනාවක් එල්ල වෙනවා.

මම එහෙම තර්ජනයක් කළේ නැහැ. පියාගේ අවසන් කටයුතු නිරෝධායන රෙගුලාසිවලට අනුව සිදුකළ යුතු ආකාරය පිළිබදව සෞඛ්‍ය අංශ වෙත උපදෙස් ලබා දෙන්න කියලා සෞඛ්‍ය ඇමතිනී පවිත්‍රා

වන්නිආරච්චි මහත්මියගෙන් ඉල්ලීමක් කළා. පියාගේ දේහයට අවසන් ගෞරව දැක්වීමට ජනතාවට අවස්ථාව උදාකරලා දුන්නත් අවසන් කටයුතු සියල්ල සිදුකළේ නිරෝධායන රෙගුලාසිවලට අනුකූලවයි.

ආරුමුගන් තොණ්ඩමන් මහතාගේ අභාවයෙන් පසු ලංකා කම්කරු කොංග්‍රසයේ නායකත්වයට පත්වන්නේ ඔබද?

අද බොහෝ දෙනෙකුට ලංකා කම්කරු කොංග්‍රසයේ නායකත්වය ප්‍රශ්නයක් වෙලා. අපිට තවම ඒක ප්‍රශ්නයක් වෙලා නැහැ. ලංකා කම්කරු කොංග්‍රසයේ නායකයා තෝරන්නේ පක්ෂයේ විධායක සභාව මගින්. විධායක සභාව ඒක අවශ්‍යය වෙලාවට කරයි. කම්කරු කොංග්‍රසයේ නායකත්වය කාට හිමිවුණත් මගේ පියා වතුකරයේ ජනතාව වෙනුවෙන් රැගෙන ගිය වැඩපිළිවෙළ එලෙසින්ම සිදුකරනවා.

අවස්ථාවාදි දේශපාලනඥයින් චෝදනා කරනවා ලංකා කම්කරු කොංග්‍රසය කියන්නේ තොණ්ඩමන් පරම්පරාවටම අයිති බූදලයක් කියලා. එහෙම දෙයක් ලංකා කම්කරු කොංග්‍රස් ව්‍යවස්ථාවේ නැහැ. එහෙම තිබුණා නම් මගේ පියා අභවප්‍රාප්ත වු විගසම ලංකා කම්කරු කොංග්‍රසයේ නායකත්වය මට හිමිවෙන්න තිබුණා. එහෙම වුණේ නැහැ. එහෙම වුණා නම් සියලු දෙනාම ලංකා කම්කරු කොංග්‍රසයේ මීළඟ නායකයා ජිවන් තොණ්ඩමන් කියලා වතුකරයේම පොස්ටර් ගහනවානේ. එහෙම වුණාද?. අද අසියාවේ දේශපාලනය ගැන බැලුවම පරම්පරාවෙන් දේශපාලනයට පිවිසුණු ගොඩ දෙනෙක් ඉන්නවා. ඒක ලංකා කම්කරු කොංග්‍රසයට විතරක් පොදු වූ කාරණාවක් නොවෙයි. එහෙම

පරම්පරාවෙන් දේශපාලනය කරපු බොහෝ පිරිසක් අද දේශපාලනයෙන් සමු අරන් තියෙනවා. ඒකට හේතුව ජනතාව ඔවුන්ව ප්‍රතික්ෂේප කිරීමයි . පරම්පරා උරුමයකින් දේශපාලනයට ආවත් දේශපාලනයේ රැඳෙන්න වැදගත් වෙන්නේ තමන් කරන වැඩයි. ලංකා කම්කරු කොංග්‍රසයේ නායකත්ව තෝරන්නේ ජාතික සභාව විසිනුයි.

ජාතික සභාව ළඟදී රැස් වෙනවද?

පියාගේ අභාවය නිසා දැන්මම ලංකා කම්කරු කොංග්‍රසයේ ජාතික සභාව එක්රැස් කරන්න අපිට අදහසක් නැහැ. ඒක කවදා සිද්ධවෙයිද කියලා දැන්ම කියන්නත් බැහැ. මගේ පියා අප අතර නැතත් මගේ මවගෙන් සහ මගේ සහෝදරියන්ගෙන් මගේ ඉදිරි දේශපාලන කටයුතුවලට නිරන්තරයෙන්ම අශිර්වාදය ලැබෙනවා. මගේ ලොකු අක්කා ඕමාන් රාජ්‍යයේ වෛද්‍යවරියක්. දෙවැනි අක්කා තමයි තාත්තගේ හොඳම සුරතලා. එයා තාත්තට නිතරම කියනවා වතුකරයේ තරුණියන්ට හොඳ රැකියා අවස්ථා ලබාදෙන්න කියලා. පියාගේ අභාවයෙන් පසුව එයාටත් වුවමනාවක් තියෙනවා වතුකරයේ තරුණියන් වෙනුවෙන් පියා වෙනුවෙන් මොනවා හරි කරන්න ඕනි කියලා.

දිගු කලක් විදේශ රටක ජීවත්වූ ඔබට වතුකරයේ ජනතා ප්‍රශ්න ගැන අවබෝධයක් තිබෙනවාද?

වතුකරයේ තරුණ තරුණියන්ගේ ගැටලු මම හොඳින් දන්නවා. සුදුසුකම්වලට නොගැළපෙන රැකියා කරන හොඳ අධ්‍යාපනයක් ලද වතුකරයේ තරුණ තරුණියන් විශාල පිරිසක් ඉන්නවා. මගේ මුත්තාගේ කාලයේ (සෞම්‍යමූර්ති තොණ්ඩමන්) ඇඟලුම් කර්මාන්ත ක්ෂෙත්‍රය හොඳින් තිබුණා. ඒ නිසා වතුකරයේ තරුණ තරුණියන්ට රැකියා අවස්ථා ලැබුණා. දැන් එහෙම නැහැ. මට ගොඩක් දෙනෙක් චෝදනා කරනවා දේශපාලන පළපුරුද්දක් නැහැ කියලා. මම ලංකා කම්කරු කොංග්‍රසයේ තරුණ සංවිධානයේ අවුරුදු තුනක් නායකයා වශයෙන් ක්‍රියාකාරිව කටයුතු කළා.

මගේ පියා මට කියලා දුන්න දෙයක් තමයි හොඳ දේවල් කරන්න පළපුරුද්දක් අවශ්‍යය නෑ කියන එක.

පසුගිය මැතිවරණ වලදී නුවරඑළිය දිස්ත්‍රික්කයේ වැඩිවාසි අත්වුණේ එක්සත් ජාතික පක්ෂය ප්‍රමුඛ කණ්ඩායමටයි.මෙවර එම තත්ත්වය වෙනස් වෙයිද?

මෙවර මහ මැතිවරණයෙන් ශ්‍රි ලංකා නිදහස් පොදු ජන පෙරමුණ ස්ථිර ලෙසම තුනෙන් දෙකක විශිෂ්ට ජයග්‍රහණයක් ලබාගන්නවා. ඒකට හේතුව ජනාධිපති ගෝඨාභය රාජපක්ෂ මහතා කෙ‍ෙරහි මේ රටේ ජනතාව තබා ඇති විශ්වාසය හා අගමැති මහින්ද රාජපක්ෂ මහතාගේ නායකත්වයයි.

කොවිඩ් -19 වයිරසය පැතිර යාමේ අවදානම සම්බන්ධයෙන් මේ රටේ ජනාධිපති ගෝඨාභය රාජපක්ෂ මහතා කටයුතු කළ ආකාරය පිළිබඳව රටේ පමණක් නොව ලෝකයේම ප්‍රශංසාව ලැබී තිබෙනවා. ජනතාව තුළ එතුමා කෙරෙහි දැඩි විශ්වාසයක් ඇති වෙලා තියෙනවා. ජනාධිපතිවරණයේදි එතුමා ලක්ෂ 14ක වැඩි ජන්ද ප්‍රමාණයක් ගත්තා. නුවරඑළිය හා යාපනය පමණයි කොළ පාට වෙලා තිබුණේ. මේ වන විට යාපනයේ ජනතාවත්, වතුකරයේ ජනතාවත් වත්මන් ජනාධිපතිතුමා අගමැතිවරයා රට ගොඩනැගීමට කටයුතු කරන ආකාරයත් කොවිඩි- 19 වයිරසය මෙරට තුළ පැතිර යාම පාලනය කිරිමටත් කටයුතු කරන ආකාරය ගැන විශාල පැහැදීමකින් ඉන්නේ. මෙවර නුවරඑළිය දිස්ත්‍රික්කයේ ප්‍රතිඵලය අපි උඩුයටිකුරු කරනවා. ජනතාව ඒකට දැන් පෙළගැසී අවසානයි.

සාකච්ඡා කළේ -අසේල කුරුළුවංශ
ඡායාරූප - නාලක රත්නායක, නුවරඑළිය 

විවිධ ප්‍රශ්න සහ අභියෝග හමුවේ මනසින් කඩාවැටෙන ඕනෑම මොහොතක යළිත් ශක්තිමත්ව නැගී සිටින්නට කලාව සලසන මානසික සහනය අතිවිශාලය.

මුළු ලෝකයම වසංගතයකට යට වී අර්බුදයකට මුහුණ දෙමින් සිටින අවස්ථාවේ කලක් පුරා කලාව වෙනුවෙන් ඉටු කරන ලද මෙහෙය නොකඩවා පවත්වාගෙන යන්නට කොරෝනා හේතුවෙන් තදින්ම බැට කෑ ඉතාලියෙහි ජීවත් වන ආනන්ද අමිල වැන්ඩවෝල් දරන උත්සාහය ප්‍රසංශා කළ යුත්තකි.

ලොව පුරා විහිදී සිටින විදෙස්ගත ශ්‍රී ලාංකිකයන්ගේ ගායන කුසලතා අගයමින් එම හැකියාවට ඉඩක් දෙන්නට 2014 වසරෙන් ආරම්භ කර 2015 වර්ෂයෙහිදීද පවත්වන්නට යෙදුණු මියුරු සර facebook star තරගය, 2017 වර්ෂයෙහි දී මුහුණු පොතේ සියලු කලාකරුවන් එක් තැනකට රැගෙන එන්නට හැකි ‘‘මුහුණු පොතයි කලා කෙතයි - අමිල ටැලන්ට් සම්මාන උලෙළ’’ බවට පරිවර්තනය විය.

ඉතාලියේ නාපෝලි නගරයෙහි ජීවත්වන ආනන්ද අමිල වැන්ඩවෝල් මෙම සංකල්පයෙහි නිර්මාතෘවරයා වන අතර පසුගිය වසර දක්වාම විෂය ක්ෂේත්‍රයන් පහළවක් යටතේ සම්මානීයයන් රැසක් බිහිකරන්නට ඔහු සමත් විය.

‘‘මුහුණු පොතයි කලා කෙතයි - අමිල ටැලන්ට් සම්මාන උලෙළ’’ 2020 වසර සඳහා ද මේ වන විට සංවිධානය කරමින් සිටින අතර ගද්‍ය, පද්‍ය, ගායනා, නර්තන, රංගන, නිවේදන, සිතුවම්, ඡායාරූපකරණය ආදී අංශ ගණනාවකින් යුක්ත මෙම තරගාවලියේ මුහුණුපොතෙහි කලා කටයුතුවල නිරත වන බොහෝ දෙනා මේ වනවිටත් තරග වැදීම ආරම්භ කර තිබේ. සෑම වසරකම අදාළ ක්ෂේත්‍රයන්හි ශ්‍රී ලංකාව තුළ නමක් දිනා ගත් ප්‍රවීණ විනිසුරු මණ්ඩලයක සහයෝගය මේ කටයුත්ත සඳහා හිමි වේ.

ලොව වටා විසිරී සිටින සියලුම ශ්‍රී ලාංකිකයන්ගේ කලා හැකියාවන් උපයෝගී කරගනිමින් මෙම සම්මාන උලෙළෙහි තරග සඳහා ඉදිරිපත් වන්නට සියලු දෙනාටම හැකියාව තිබේ.ආනන්ද අමිල වැන්ඩවෝල් ගේ මෙම අනගි මෙහෙවර සඳහා ලංකාවේ සහ විදෙස්ගතව ජීවත්වන බොහෝ දෙනාගේ ශ්‍රම දායකත්වය හිමි වී තිබේ. වසංගත තත්වය හමුවේ වුව කලාවට ඇති ආදරය හේතුවෙන් මෙවරත් සංවිධානය කරන ‘‘මුහුණු පොතයි කලා කෙතයි - අමිල ටැලන්ට් සම්මාන උලෙළ’’ සදහා තරග වදින්නට කලාවට ආදරය කරන කලාවෙහි දස්කම් දක්වන සියලු දෙනාටම මේ වන විට අවස්ථාව උදා වී තිබේ.

සටහන දිල්රූ ජයසේකර

සම්පූර්ණ ව්‍යාපෘතිය සඳහා වැලි මීටර් කියුබ් 800,000 භාවිතා කළ අතර එයින් වැලි මීටර් කියුබ් 300,000 ක් කළුතර කැලිඩෝ වෙරළ තීරයටත් , වැලි මීටර් කියුබ් 350,000 ගල්කිස්ස වෙරළ තීරයටත්, වැලි මීටර් කියුබ් 150,000 ගල්කිස්ස වෙරළ තීරයටත් පොම්ප කරන ලදී. ඒ අනුව ගල්කිස්ස වෙරළ තීරයේ වැලි පෝෂණ ව්‍යාපෘතිය සඳහා රුපියල් මිලියන 890 ක් වැය වී ඇතැයි යන සාවද්‍ය ප්‍රකාශයකි. 

දකුණු කොළඹ වැලි පෝෂණය කිරීමේ ව්‍යාපෘතිය කළුතර කැලිඩෝ වෙරළ තීරය, රත්මලාන අඟුලාන වෙරළ තීරය සහ ගල්කිස්ස වෙරළ තීරය අලළා දියත් වූවකි. මෙම ව්‍යාපෘතිය සඳහා ලබාගත් පරිසර අධිකාරියේ අනුමැතිය 2018 සිට වසර තුනක් දක්වා වලංගු වේ. ව්‍යාපෘතියේ කටයුතු මූලික වශයෙන් ආරම්භ වූයේ 2017 වර්ෂයේ අගභාගයේ සිට වුව ද අමාත්‍ය මණ්ඩල අනුමැතිය ලබාදීමට වසර දෙකක් පමණ ගත විය. ඒ අතරතුර කාලයේ අප දෙපාර්තමේන්තුව විසින් අමාත්‍ය මණ්ඩලයට තොරුතුරු පත්‍රිකා, සක්‍යතා වාර්තා ආදිය ඉදිරිපත් කරමින් අවශ්‍ය කටයුතු සම්පාදනය කළ අතර ව්‍යාපෘතියට අමාත්‍යමණ්ඩල අනුමැතිය ලැබුණේ 2019 අප්‍රේල් 30 වැනිදාය.

මෙම ව්‍යාපෘතිය සඳහා අවශ්‍ය කරන තාක්ෂණය ශ්‍රී ලංකාව තුළ නොමැති වීම හේතුවෙන් ව්‍යාපෘතිය වෙනුවෙන් ජාත්‍යන්තර මිල ගණන් කැඳවීමට සිදු විය. ඒ අනුව ජාත්‍යන්තර සමාගම් 5කින් ඊට අදාළ ටෙන්ඩර් පත් ලැබුණු අතර එම ටෙන්ඩර් පත් තාක්ෂණික ඇගයීම් කමිටුවකට යොමුකොට, අවසානයේ සුදුසුකම් ලත් කොන්ත්‍රාත්කරු වූ ඩෙන්මාර්කයේ ‘Rodhe Neilsen’ආයතනයට ව්‍යාපෘතිය ප්‍රදානය කිරීමට 2020 ජනවාරි 14 වැනිදා අනුමැතිය ලැබුණි.

කෙසේ වෙතත් 2019 අප්‍රේල් 30 වැනිදා අමාත්‍ය මණ්ඩල අනුමැතිය ලැබීමෙන් පසුව ද මෙම ව්‍යාපෘතියේ වැඩ ඇරඹීමට තරමක් කල් ගත වූයේ ඒ අතර මැද කාලවකවානුවේ රට තුළ ජනාධිපතිවණයක් පැවැතීම, නව ආණ්ඩුවක් පත්වීම වැනි හේතු සාධකද මුල් කර ගනිමිනි. ව්‍යාපෘතියේ වැඩකටයුතු 2020 පෙබරවාරි 29 වැනි දා ආරම්භ වූයේ කළුතර වෙරළ තීරයෙනි. ඒ වන විටත් කළුතර වෙරළ තීරයෙන් අක්කර 30කට ආසන්න ප්‍රමාණයක් මුහුදු ඛාදනයට ලක් වී අවසන් ය. මෙවර වාරකන් කාලය එළැඹීමට පෙරාතුව ව්‍යාපෘතිය අවසන් කිරීමට අපට අවැසි වූයේ මැයි මාසයේ මැද ඇරඹී සැප්තැම්බර් මාසයේ මැදක් දක්වා පවතින මෙම වාරකං කාලයට ද එම මුහුදු ඛාදනයට ලක්වන ප්‍රදේශ මුහුණ දුන්නේ නම් පැවැති වෙරළ ඛාදනය උග්‍ර අතට හැරී එම වෙරළබඩ ප්‍රදේශවල දේපළවලට සංචාරක කර්මාන්තයට සහ ධීවර කර්මාන්තයට මෙන් ම සමස්තයක් ලෙස මුළු රටට ම සිදු වන හානිය බරපතළ වීමට ඉඩ පැවැති බැවිනි.

කෙසේ වෙතත් ඇතැම් දේශපාලන අධිකාරීන් චෝදනා එල්ල කරනුයේ මෙම ව්‍යාපෘතිය වාරකං කාලයේදී සිදු කළ බව කියමිනි. සැබැවින් ම ව්‍යාපෘතිය මෙම වාරකන් කාලය ඇරඹීමට පෙරතුව එනම් අප්‍රේල් මස 22 වැනි දා අවසන් කරන ලදි. යම් හෙයකින් අප විසින් එසේ සිදු නොකොට මෙම වාරකං කාලයේදී ද එම මුහුදු ඛාදන තත්ත්වයට මුහුණ දුන්නේ නම් ඉන් සිදු වන විනාශය මැඬ පැවැත්වීමට මෙම ව්‍යාපෘතියට දැරූ වියදමට වඩා වැඩි වියදමක් දැරීමට සිදු වනු ඇත.

මාස තුනක් වූ ව්‍යාපෘති කාලය ඉකුත් වීමට මත්තෙන් අදාළ විදේශීය සමාගම අප්‍රේල් 22 වැනිදා වන විට ව්‍යාපෘතිය සාර්ථක ව අවසන් කළේ ය. යම් හෙයකින් ඇඳිරි නීතිය පැවැති කාලයේදී එම වැලි පෝෂණ ව්‍යාපෘතිය නවතා දැමුවේ නම් විදේශීය සමාගමට අප විසින් ප්‍රමාද වීමේ ගාස්තුව පැයකට රුපියල් ලක්ෂ 02ක් බැගින් ගෙවිය යුතු බැවින් ඇඳිරි නීතිය මධ්‍යයේ පවා අදාළ බලධාරීන්ගේ අනුමැතිය ඇති ව ව්‍යාපෘතියේ කටයුතු පවත්වාගෙන යෑමට වෙරළ සංරක්ෂණ දෙපාර්තමේන්තුව විසින් කටයුතු යෙදී ය.

ගල්කිස්සත් දෙහිවලත් අතර සංචාරක කලාපයක් ඇත. එසේ ම බොහෝ සෙයින් ධීවර ජනතාව ජීවත් වන රත්මලාන අඟුලාන අතර වෙරළ තීරයේ මුහුදට ඉතාමත් ආසන්න ව බොහෝ නිවාස දැකිය හැක. නිරන්තරයෙන් වෙරළ ඛාදනයට ලක්වන එම ප්‍රදේශවල නිවාස, සංචාරක හෝටල්, දුම්රිය මාර්ග ආදී සියල් පැවැතියේ අනතුරක ය. එසේ හෙයින් අපට අවැසි වූයේ මෙම වෙරළ ඛාදනය මැඩපැවැත්වීම, එම ප්‍රදේශවල සංචාරක ව්‍යාපාරයටත් ධීවර කර්මාන්තයටත් බාධාවක් නොවන අන්දමින් සිදු කිරීමට ය.

ඒ අනුව මුල් අවස්ථාවේදී මෙම ව්‍යාපෘතිය සැලැසුම් කළේ ගල්කිස්ස දෙහිවල අතර වෙරළ තීරය සහ රත්මලාන අඟුලාන වෙරළ තීරය වෙනුවෙනි. එසේ වුව ද 2018 ගං වතුරෙදි කළුතර කළු ගඟේ වැලිවැටිය අනපේක්ෂිත ලෙස දේශපාලන අධිකාරිය සම්බන්ධ වී කාපාදැමීම හේතුවෙන් කළුතර කැලිඩෝ වෙරළ තීරය ද දරුණු ලෙස වෙරළ ඛාදනයකට මුහුණ පාන්නට විය. මූලික වශයෙන් වෙරළ සංරක්ෂණ සහ වෙරළ සම්පත් කළමනාකරණ දෙපාර්තමේන්තුව විසින් ගල් දමා එම වෙරළ ඛාදනය යම්තාක් දුරකට වළක්වා ගැනීමට කටයුතු කළ අතර ඉන් අනතුරුව රත්මලාන අඟුලාන අතර වෙරළ තීරය සහ දෙහිවල ගල්කිස්ස අතර වෙරළ තීරය වෙනුවෙන් ක්‍රියාත්මක කිරීමට නියමිත ව පැවැති ව්‍යාපෘතියට කළුතර කැලිඩෝ වෙරළ තීරය ද එක්කර ගැනිණි. සම්පූර්ණ ව්‍යාපෘතිය සැලැසුම්කොට ඉදිරියට ගෙනඑනු ලැබුවේ ඒ අනුවය.

කෘත්‍රිම වැලි පෝෂණයේ දී සිදු කෙරෙනුයේ ඈත ගැඹුරු මුහුදේ වැලි ගෙනැවිත් ඛාදනයන්ට ලක්වන වෙරළට එකතු කිරීමෙන් එම ඛාදනය වන වෙරළ නැවත පෝෂණය කිරීමකි. ශ්‍රී ලංකාව තුළ ප්‍රථම වරට මෙවැනි වැලි පෝෂණ ව්‍යාපෘතියක් දියත් වූයේ මීගමුව වෙරළ තීරය රැකගැනීම වෙනුවෙනි. ඒ, 1986 දී ය. ඉන් අනතුරුව උස්වැටකෙයියාව, මාරවිල සහ උණවටුන යන ප්‍රදේශවල ද එවන් ව්‍යාපෘතීන් සිදු කෙරුණු අතර වෙරළ ඛාදනය මැඩැපැවැත්වී මේ වන විට එම ප්‍රදේශවල ජනතාව ව්‍යාපෘතියේ ප්‍රතිලාභ භුක්ති විඳින ආකාරය දැකගත හැකිය.

කෙසේ වෙතත් මින් පෙර 2014දී උණවටුණේ සිදු කෙරුණු වැලි පෝෂණ ව්‍යාපෘතියේදී ද මුල් දිනවලදී ගල්කිස්ස වෙරළ තීරයේ මේ වන විට සිදු වෙමින් පවතින ආකාරයට ම වෙරළ තීරයට එක් කළ වැලි නැවත මුහුදට යන බව කියමින් ප්‍රදේශවාසීන් සහ විවිධ දේශපාලන මතධාරීන් හඬනැඟූ නමුත් අද වන විට එම වෙරළ තීරය ඉතාමත් මනරම් ව පවතින බව සිහිපත් කළ යුතු ය. මෙය ලංකාවේ ක්‍රියාත්මක වන පළමු වැලි පෝෂණ ව්‍යාපෘතිය නොවන බව යළි යළිත් කියනු කැමැත්තෙමි. වෙරළ තීරයට වැලි දැමීම හැසිරෙන්නේ මෙයාකාරයෙනි. කිසිඳු වරදක් හෝ මුදල් නාස්තියක් මෙම ව්‍යාපෘතිය හරහා සිදු වී නැත.

ශ්‍රී ලංකාව දූපතකි. දූපතක් වශයෙන් පවතින විට නිරන්තරයෙන් මුහුදු රළවලට මුහුණ දෙමින් වෙරළ ඛාදනයට ද මුහුණපෑමට සිදු වන බව අමුතුවෙන් කිව යුතු නැත. එසේ ම මෙම වෙරළ ඛාදන තත්ත්වය අදක ඊයෙක පටන් ඇරඹි එකක් නම් නොවේ.

වෙරළ ඛාදනය සඳහා වන පිළියම් දීර්ඝ කාලීන හා කෙටි කාලින විසඳුම් වශයෙන් වර්ග කරන අතර කෙටි කාලීන විසඳුම් වශයෙන් කාලගුණික හදිසි තත්ත්වයන් යටතේ ජීවිත හා දේපළ හානි වීම වැලැක්වීම සඳහා ගන්නා ක්‍රියා මාර්ගයන් හඳුනාගත හැකි වේ. වැලි ගෝනි මඟින් ආරක්ෂක බැමි යොදා, සේදි යෑම වැලැක්වීම ආදිය ඒ සඳහා උදාහරණ ලෙස පෙන්වා දිය හැකිය.

දිගු කාලීන විසඳුම් වනුයේ වෙරළ ඉංජිනේරු තොරතුරු පදනම් කර සකසන ලද සැලැසුම් සහගත වෙරළ ස්ථායි යෝජනා ක්‍රමයන් ය. එම දිගු කාලීන විසඳුම් දෘඪ විසඳුම් සහ මෘදු විසඳුම් වශයෙන් ප්‍රධාන කොටස් දෙකකි.

පැති බැමි, දිය කඩන, වැටි දාර ආදී ව්‍යූහමය සංවර්ධන යෝජනා ලෙස ඉදිරිපත් වන දෘඪ විසඳුම් මඟින් වෙරළ තීරයේ භෞතික ස්වභාවය වෙනස් වේ. මෘදු විසඳුම් වශයෙන් හැඳින්වෙන්නේ දිගු කාලීන ව වෙරළ තීරයේ භෞතික ස්වභාවයට හානි නොවන පරිදි යොදාගන්නා විසඳුම් වේ. ඒ අතර කෘත්‍රිම වැලි පෝෂණය ද ඒ අතර ප්‍රමුඛ ස්ථානයක් ගනී.

වෙරළ ඛාදනය මැඩපැවැත්වීම සඳහා ලෝකයේ පිළිගත් වඩාත්ම සාර්ථක හා පරිසර හිතකාමී ක්‍රමය වනුයේ ද කෘත්‍රිම වැලි පෝෂණය යි. ලෝකයේ බොහෝ රටවල මෙවැනි වැලි පෝෂණ ව්‍යාපෘති සිදු කෙරේ. සිංගප්පූරුව මෙවැනි ව්‍යාපෘති ආරම්භ කළේ 1970 දශකයේ සිට ය. කෙසේ වෙතත් මෙවැනි ව්‍යාපෘති වෙනුවෙන් විශාල මූල්‍ය පිරිවැයක් දැරිය යුතු බැවින් අප වැනි රටකට ස්ථාන කිහිපයක් තෝරාගනිමින් මෙවැනි ව්‍යාපෘතියක් සිදු කිරීමට හැකි වනුයේ වසර හතර පහකට වතාවක් ය.

මෙම ක්‍රමයට වඩා අඩු වියදම් සහිත ක්‍රමයක් ලෙස සලකා ගල් යොදා ගල්කිස්ස දෙහිවලත් අතර වෙරළ තීරයත් රත්මලාන - අඟුලාන වෙරළතීරයත් කළුතර කැලිඩෝ වෙරළ තීරයත් වෙරළ ඛාදනයෙන් රැකගැනීමට කටයුතු කළේ නම් එම ප්‍රදේශවල ධීවර කර්මාන්තය සහ සංචාරක කර්මාන්තය අනතුරෙහි වැටෙන්නට ඉඩ තිබිණි. සංචාරක කලාපවල වෙරළ තීරයට ගල් දැමීමෙන් දෙස්විදෙස් සංචාරකයන් අපේක්ෂා කරන එම සුන්දර පරිසර පද්ධතිය අහිමි වන අතර ධීවර කර්මාන්තය පවතින ප්‍රදේශවල වෙරළ තීරයට ගල්දැමීමෙන් එම කර්මාන්තය පවත්වාගෙන යෑමට අවැසි වන වෙරළ තීරය අහිමි වෙමින් කර්මාන්තයට නොයෙකුත් බාධා පැමිණෙනු ඇත. එබැවින් මෙම ව්‍යාපෘතිය රටේ යහපත වෙනුවෙන් දියත් කළ ව්‍යාපෘතියක් බව ජනතාව තේරුම් ගත යුතුය.

අප රටෙහි ගංගාවන් 106ක් මුහුදට සම්බන්ධ වන අතර වෙරළට අවශ්‍ය වැලි ලැබෙනුයේ එම ගංගාවලිනි. රටේ සංවර්ධනය වේගවත් වීමත් සමඟ ගංඟාවලින් වැලි ගොඩදැමීම ද ඉතාමත් වේගයෙන් සිදු වේ. එවිට නියමිත පරිදි වෙරළට ලැබෙන වැලි ප්‍රමාණය නොලැබී යනු ඇත. වෙරළබඩ හැසිරීම වරින් වර වෙනස් වන අතර අවසාදිතවල වෙනස්කම් ඇති වන බව පැවැසූ වෙරළ සංරක්ෂණ දෙපාර්තමේන්තුවේ ප්‍රධාන ඉංජිනේරු (වෙරළ සංවර්ධන) සුජීව රණවක පැහැදිලි කළේ මිරිදිය ගංගා ජලය නිදහසේ ගලා යෑම හේතුවෙන් වෙරළබඩ ප්‍රදේශයට ප්‍රමාණවත් වැලි ගෙන එනු ලබන අතර එයින් වෙරළ ඛාදනය අවම වන නමුත් පසුගිය කාලය පුරා සිදු වූ නීති විරෝධී මිරිදිය වැලි කැණීම් හේතුවෙන් මුහුද දෙසට එන එවැනි නිදහස් වැලි ප්‍රවාහයන් ක්‍රමයෙන් අඩු වී ඇති බවයි. වෙරළට අවශ්‍ය එම වැලි ප්‍රමාණය නොලැබී යනවිට වෙරළින් එම වැලි ප්‍රමාණය ලබාගනිමින් වෙරළ ඛාදනයක් සිදු වේ. අප විසින් මෙම වෙරළ ඛාදනය වළකාලීමට කටයුතු යෙදුවේ එලෙස ඉවත් වන වැලි ප්‍රමාණය නැවත වෙරළට දැමීම මඟිනි. එම ක්‍රියාවලිය කෘත්‍රිම වැලි පෝෂණය යනුවෙන් හැඳින්වෙන අතර භූ විද්‍යා සමීක්ෂණ හා පතල් කාර්යාංශය විසින් නිකුත් කරන ලද බලපත්‍රයක් භාවිතා කරමින් මෙම ව්‍යාපෘතිය සඳහා වැලි ලබාගෙන ඇත්තේ රත්මලාන සිට කිලෝමීටර් 2 - 6 ක් පමණ දුරින් පිහිටි, වෙරළ සංරක්ෂණ දෙපාර්තමේන්තුවට ම වෙන්කොට ඇති වැලි නිධියකිනි. 2014 වර්ෂයේදී උණවටුන වෙරළ තීරයට පොම්ප කිරීම සඳහා වැලි ලබාගත්තේ ද එම නිධියෙන් ම ය. වැලි ලබාගන්නා එම නිධිය සම්බන්ධයෙන් අප විවිධ අධ්‍යයනයන් සිදු කොට ඇති අතර ඒ සඳහා පාරිසරික අධිකාරියෙන් නිසි අවසරය ද ලබාගෙන ඇත. මේ දිනවල බොහෝ සෙයින් කතාබහට ලක්වන ගල්කිස්ස වැලිපෝෂණ වැඩසටහන වනාහි මෙම දකුණු කොළඹ වැලි පෝෂණය කිරීමේ ව්‍යාපෘතියේ එක් කොටසක් පමණි. සම්පූර්ණ ව්‍යාපෘතියට ශ්‍රී ලංකා රජය මිලියන 890ක් වැය කරන අතර ගල්කිස්ස ප්‍රදේශය වෙනුවෙන් වැය කෙරෙනුයේ රු. මිලියන 110කට ආසන්න මුදලකි. 

මෙම සම්පූර්ණ ව්‍යාපෘතිය සඳහා වැලි මීටර් කියුබ් 800 000ක් යොදාගෙන ඇත්තේ වැලි මීටර් කියුබ්

300 000ක් කළුතර කැලිඩෝ වෙරළ තීරයටත්, 350 000ක් රත්මලාන අඟුලාන වෙරළ තීරයටත් 150 000ක් ගල්කිස්ස වෙරළ තීරයටත් ආදි වශයෙනි.

පසුගිය කාලය පුරා ගල්කිස්ස වෙරළ තීරයේ ඛාදනයක් දකින්නට තිබුණු අතර එම වෙරළ තීරය අසලින් ගමන් කරන දුම්රිය මාර්ගය ආරක්ෂා කිරීමට කලකට පෙර අප විසින් ගල් යෙදීමට ද කටයුතු යොදා තිබුණි. කෙසේ වෙතත් වසර ගණනාවක් මුළුල්ලේ ම ප්‍රදේශවාසීන්ගෙන් සහ එම ප්‍රදේශයේ සංචාරක අවන්හල්වලින් ඉල්ලීම් ඉදිරිපත් වූයේ එම වෙරළ ඛාදනයට පිළියම් යොදන මෙන්ය.

වෙරළ සංරක්ෂණ දෙපාර්තමේන්තුවෙහි ප්‍රධාන ඉංජිනේරු (සැලසුම් හා පර්යේෂණ) ලිලානි රුහුණගේ පවසා සිටියේ දශකයකට ආසන්න අත්දැකීම් සමඟින් කලාපීය ධීවර ප්‍රජාවටත් සංචාරක කර්මාන්තයටත් හානි වන අයුරින් මෙම කලාපයේ මීටර් දෙක තුනක වෙරළ ඛාදනය ඔවුන් විසින් දැක ඇති බව යි. එසේ ම එවැනි තත්වයක් තුළ වෙරළ පෙර පරිදි තබා ගැනීම සඳහා වැලි පිරවීම අත්‍යවශ්‍ය වූ බවත් ව්‍යාපෘතිය අවසානයේ අදාළ වෙරළ තීරයේ, වෙරළ ඛාදනය අපේක්ෂිත පරිදි යම් මට්ටමකට අඩු වී ඇති බවත් ඇය කියා සිටියාය.

ගල්කිස්ස වෙරළ තීරයේ එක් ස්ථානයකට වැලි යෙදීමෙන් අපේක්ෂා කළේ ගල්කිස්සත් දෙහිවලත් අතර සම්පූර්ණ කලාපයම එමඟින් ආවරණය කරගැනීමය. එම වැලි ප්‍රවාහය ගමන් කරනුයේ බටහිර වෙරළ තීරයේ දකුණේ සිට උතුරටය. ඒ අනුව ගල්කිස්සේ සිට දෙහිවල, වැල්ලවත්ත දෙසට එම වැලි ප්‍රවාහය ගමන් කරනු ඇත. එනම් ගල්කිස්ස වෙරළ තීරයට වැලි යෙදීමෙන්, එතැන් සිට උතුරට ඇති කොටසත් වෙරළ ඛාදනයෙන් ආරක්ෂා කරගැනීම මෙම ව්‍යාපෘතියේ සැලැස්මක් විය. එසේ වුව ද මේ පිළිබඳ අනවබෝධයෙන් බොහෝ පිරිස් හඬනඟනුයේ ගල්කිස්ස වෙරළ තීරයට එක් කළ වැලි නැවත මුහුදට ම ගසාගෙන ගොස් ඇති අතර ව්‍යාපෘතිය වෙනුවෙන් දැරූ වියදම් අපතේ ගොස් ඇති බව කියමිනි. එහෙත් ඉවත් වීමක් නොව, සිදු ව ඇත්තේ වැලි පැතිර යෑමකි. පැතිර යෑම සිදු ව ඇත්තේ උතුරු දිශාවට ය. එලෙස වැලි ප්‍රවාහයන් ගමන් කරන බව වෙරළ ඉංජිනේරු තාක්ෂණය පිළිබඳ අවබෝධයක් ඇති පුද්ගලයන් හොඳින් දනී. ඒ අනුව ගල්කිස්ස වෙරළේ එක් කොනකට යෙදූ වැලි ප්‍රවාහය උතුරු දෙසට ගමන් කළ බවට අපට සාක්ෂි සහිත ව ඔප්පු කළ හැකිය. උතුරු ප්‍රදේශයේ වෙරළ පෙර පැවැති පමණට වැඩියෙන් පුළුල් ව ඇත. ලෝකයේ වඩාත් ම සාර්ථක සහ පරිසර හිතකාමී ක්‍රමය ලෙස භාවිතා කරන මෙම මුහුදු වෙරළ නැවත වැලි යොදා පිරවුමේ ඉංජිනේරු ක්‍රමවේදය වෙරළ තීරය වැලි යොදා පිරවීමට පමණක් නොව සමස්ත උතුරු දෙසට වූ සාගර තීරයේ වැලි නැවත පිරවීම සඳහා ද යොදා ගැනේ. ඒ අනුව ගල්කිස්ස වෙරළ තීරයේ මේ වන සිදු වන වැලි වැටියක් සේදී යෑමේ සංසිද්ධිය ව්‍යාපෘතියේ අනපේක්ෂිත ප්‍රතිඵලයක් නොවන බවත් එය ව්‍යාපෘති සැලැසුමේ ම කොටසක් බවත් පැහැදිලිව කිව යුතුය.

ගල්කිස්ස වෙරළ තීරය සංරක්ෂණය සඳහා වැලිපෝෂණය සිදු කෙරුණේ මෙම ව්‍යාපෘතියේ අවසාන අදියර වශයෙනි. ඊට පෙර කළුතර කැලිඩෝ වෙරළ තීරයේත් රත්මලාන අඟුලාන වෙරළ තීරයේත් වැඩ අවසන් කළ අතර මේ වන විට එම ප්‍රදේශවල පැවැති වෙරළ ඛාදන තත්ත්වය ක්‍රමයෙන් අඩු වෙමින් වෙරළ තීරයන් ස්ථාවරත්වයට පත් වෙමින් පවතී. කෙසේ වෙතත් මෙය ස්වභාව ධර්මයත් සමඟ සිදු වන ගනුදෙනුවක් සිහි තබාගත යුතුය. වරෙක බොහෝ සෙයින් රළු වන තව වරෙක සන්සුන් වන හිටිහැටියේ සුනාමි තත්ත්වයන් පවා ඇති කරන මහ මුහුද කොයි ආකාරයට හැසිරෙයි ද? යන වග අපට කල් තියා කිව නොහැකිය. එවන් වූ යම් යම් ස්වභාවික තත්වයන්ට මුහුණ දීමේදී මෙම වෙරළ තීරයන් නිරන්තරයෙන් වෙනස්වීම්වල බඳුන් විය හැකිය. කෙසේ වෙතත් මෙම වෙරළ තීරයන් රැකගැනීමෙහිලා දියත් වූ දකුණු කොළඹ වැලි පෝෂණය කිරීමේ ව්‍යාපෘතියේ සාර්ථකත්වය පිළිබඳ කිසිදු සැකයක් නැත.

සටහන - කාංචනා සිරිවර්ධන

ශ්‍රී ලංකා පොදුජන පෙරමුණේ මහනුවර දිස්ත්‍රික් නායක - මහින්දානන්ද අලුත්ගමගේ

ශ්‍රී ලංකා පොදුජන පෙරමුණේ මහනුවර දිස්ත්‍රික් කණ්ඩායම් නායක මහින්දානන්ද අලුත්ගමගේ මහතා සමඟ මෙරට සමාජ, ආර්ථික හා දේශපාලන කරුණු කිහිපයක් සම්බන්ධයෙන් කළ සාකච්ඡාවකි.

* පාර්ලිමේන්තුව විසුරුවාහරිමින් ජනාධිපතිවරයා නිකුත් කළ ගැසට් නිවේදනය හා මහමැතිවරණය ජූනි මස 20 වැනිදා පැවැත්වීමට මැතිවරණ කොමිෂන් සභාව නිකුත් කළ ගැසට් නිවේදනය අවලංගු කරන ලෙස ඉල්ලා ගොනු කළ මූලික අයිතිවාසිකම් පෙත්සම් ශ්‍රේෂ්ඨාධිකරණය මගින් ප්‍රතික්ෂේප කිරීම සම්බන්ධව ඔබ හිතන්නේ කුමක් ද?

ශ්‍රේෂ්ඨාධිකරණය මේ පෙත්සම් සියල්ල විභාගයට නොගෙන ඉවත දැමීම ඇත්තටම මේ රටේ ප්‍රජාතන්ත්‍රවාදයේ ජයග්‍රහණයක් ලෙස හඳුන්වා දෙන්න මම කැමතියි. මොකද ජනතාවගේ පරමාධිපත්‍ය බලය තමයි මහජන ඡන්දය කියලා කියන්නේ. සාමාන්‍යයෙන් විපක්ෂයක් හැම වෙලාවෙම කරන්නේ, මැතිවරණ ඉල්ලන එක. අපි විපක්ෂයේ සිටියදී මැතිවරණ ඉල්ලලා පාරට බැස්සා. පසුගිය යහපාලන ආණ්ඩුව මැතිවරණ නොපවත්වන තැනට කටයුතු කළා. ආණ්ඩු පක්ෂය විදිහට අපි මැතිවරණයකට යන්න උත්සාහ කරද්දී විපක්ෂය මැතිවරණ එපා කියනවා. මෙහෙම හැසිරෙන විපක්ෂයක් තියෙන ලෝකයේ එකම රට මේකයි.

අනිත් පැත්තෙන් මැතිවරණ කොමිසම ඡන්ද තියන්න එපා කියලා අධිකරණයට යනවා. බටහිර විජාතික බලවේගවල න්‍යාය පත්‍රයට තමයි මේ සියලු දේ වෙන්නේ. විපක්ෂය දන්නවා මැතිවරණයකට ගියොත් අන්ත පරාජයක් අත්වෙනවා කියලා. ඒ නිසා ඒ අය උත්සාහ කළේ මැතිවරණය පවත්වන දිනය කොහොම හරි කල් දමා ගන්න. ඒ ගොල්ලන්නට ඕනෑ වුණේ නැවත පරණ පාර්ලිමේන්තුව කැඳවා ගන්න. නඩුව සැලසුම් කළේ ජාතික සමඟි ජනබලවේගය. නඩුව හැදුවේ සුමන්තිරන්. වියදම් කළේ රිෂාඩ් බදියුදීන්. අන්තවාදීන් තමයි ජාතික සමඟි ජනබලවේගය පිටුපස ඉඳන් මේ බටහිර න්‍යාය පත්‍රය ක්‍රියාත්මක කළේ. ශ්‍රේෂ්ඨාධිකරණ තීන්දුවත් සමඟ මේ සියලු කණ්ඩායම්වල අපේක්ෂා බිඳවැටුණා. ඒ ඔස්සේ මේ රටේ ප්‍රජාතන්ත්‍රවාදය ස්ථාවර වුණා.

* මහ මැතිවරණය පවත්වන්න ආණ්ඩුව මෙතරම් හදිස්සි වී තිබෙන්නේ එජාපය පිල් දෙකකට බෙදිලා ඉන්න වෙලාවේ එහි වාසිය ගන්න නේද?

එජාපය අද දෙකට කැඩිලා බව ඇත්ත. ඒත් අමතක කරන්න එපා, මේ අය එකට ඉන්න වෙලාවේ තමයි ජනාධිපතිවරණය ඡන්ද ලක්ෂ 14කට වැඩි ගාණකින් පාරාජය වුණේ. සියලු අන්තවාදීන් සජිත් ජනපති පුටුවේ ඉන්දවන්න එදා සිහින දැක්කා. මේ රටට අවංකව ආදරය කරන අන්තවාදය පිටුදකින ජනතාව ගෝඨාභය රාජපක්ෂ මහතා ජනපති පුටුවට ගෙනාවේ ජනපතිවරයකුට මෙතෙක් ලැබී තිබෙන ඉහළම ඡන්ද ප්‍රමාණය ලබා දෙමිනුයි. අද එජාපය රනිල්, සජිත් පිල් දෙකකට බෙදිලා. මේ දෙකඩ වීම තුළ ජනපතිවරණයේ ලබාගත් ඡන්ද ප්‍රමාණය ආසන්නයටවත් ඔවුන්ට ඒමට නොහැකි බව ඔවුන් දන්නවා.

සජිත් දක්ෂයකු නොවන බව රටම තේරුම් අරන් ඉවරයි. තමන් නායකත්වය දෙන දිස්ත්‍රික්කය තියා ආසනයවත් දිනාගන්න සජිත්ට බැරි වුණා. දැන් බලන්න මහින්ද රාජපක්ෂ මහතා හම්බන්තොටින් කුරුණෑගලට ගියාම එතනදී වාර්තාගත ඡන්ද සංඛ්‍යාවක් ගන්නවා. ජාතික නායකයෙක් කියන්නේ එහෙම කෙනෙකුටයි. තමන්ගේ ආසනය දිනා ගන්න බැරි කෙනා කොහොමද ජාතික නායකයෙක් වෙන්නේ. එජාපය කඩාගෙන ගිහින් සමඟි ජනබලවේගය හදලා ජනබලවේගයක් ගොඩනගන්න සිහින දැක්ක සජිත්ලා අද හුළං බැහැපු බැලුම් ගානට වැටිලා. මහමැතිවරණයේදී බරපතළ පරාජයක් ලැබෙනවා කියලා මේ අය දන්නවා. ඒ පරාජයට බයේ තමයි මැතිවරණය කල්දාන්න හිතාගෙන උසාවි ගියේ.

* දහනව වැනි ව්‍යවස්ථා සංශෝධනය මගින් ස්ථාපිත කළ ස්වාධීන කොමිෂන් සභා සම්බන්ධව විපක්ෂය සුබවාදී අදහස් දක්වනවා. ආණ්ඩු පක්ෂය ඒ සම්බන්ධව දරන්නේ ඊට විකල්ප අදහසක්. කොමිෂන් සභා සම්බන්ධව මේ පරස්පර විරෝධී අදහස් මතුව තිබෙන්නේ ඇයි?

පසුගිය යහපාලන ආණ්ඩුව වැඩියෙන්ම කතා කළේ මේ ස්වාධීන කොමිෂන් සභා ගැන. ප්‍රජාතන්ත්‍රවාදය ශක්තිමත් කරමින් මේ කොමිෂන් සභා ගෙනාවා කියන කාරණය තමයි ඒ අය හැම වෙලාවෙම ඉස්මතු කරන්න හදන්නේ. දැන් ඇත්ටම මේ කොමිෂන් සභාවල තියෙන ස්වාධීනත්වය මොකක්ද? අල්ලස් කොමිසමේ සභාපති දූෂිතයි කියලා රටට හෙළි වුණා. මැතිවරණ කොමිසමේ ස්වාධීනත්වය දැන් පේනවා. මැතිවරණ කොමිසම මැතිවරණ තියන්න එපා කියලා උසාවි යනවා. රටක මැතිවරණ කොමිසමක් තියෙන්නේ මැතිවරණ පවත්වන්න මිසක් වෙන මොකටද? මේ කොමිසම තමන්ට පැවරී තිබෙන වගකීම් ඉෂ්ට නොකර වෙන දේවල් කරන්න යනවා. මේ පත් කරපු ස්වාධීන කොමිෂන් සභා බහුතරයක් ස්වාධීන නැහැ. මේවා නමට විතරයි, ස්වාධීන.

* දහනව වැනි ව්‍යවස්ථා සංශෝධනය ගෙන එන අවස්ථාවේ ඔබත් ඊට පක්ෂව අත ඉස්සුවා නේද?

දහනවය ගෙනාවේ ඊට පස්සේ විස්ස ගේනවා කියලයි. යහපාලන ආණ්ඩුව දහනවය ගේනකොට කිව්වා, ඒ එක්කම විසිවන සංශෝධනයත් ගෙනල්ලා දහනවයේ අඩුපාඩු සියල්ල විස්සෙන් නිවැරදි කරනවා කියලා. හැබැයි ඒ අය විස්ස ගෙනාවේ නැහැ. මේ අය දහනව වැනි සංශෝධනය ව්‍යවස්ථාවට ගෙනාවේ තමන්ගේ පැවැත්ම තහවුරු කරගන්නයි. මේ අය දැනගෙන හිටියා, රාජපක්ෂවරුන්ට මේ රටේ ජනතාවගේ ආදරය ඉහළින්ම තියෙන බව. ජනපති ධූරය අවස්ථා දෙකකට වඩා දැරීමට නොහැකි බවට යෝජනා මේකට ඇතුළත් කළේ මහින්ද රාජපක්ෂ මහතා ඉලක්ක කරගෙනයි. ද්විත්ව පුරවැසි භාවය ඇත්නම් මැතිවරණයකට තරග කළ නොහැකි බවට වගන්ති ඇතුළත් කළේ තනිකරම රාජපක්ෂවරු ඉලක්ක කරගෙන. අනිත් පැත්තෙන් ස්වාධීන ලේබලය අලවපු නම පමණක් ස්වාධීන කොමිෂන් සභා පිහිටෙව්වා. තමන් රැකෙන්න සුරැකෙන්න තමයි යහපාලන ආණ්ඩුව 19 වැනි සංශෝධනය ගෙනාවේ.

* ඉදිරි මහ මැතිවරණයේදී තුනෙන් දෙකක බලයක් ඉල්ලන්නේ, ව්‍යවස්ථා සංශෝධනයකට යන්නද?

අනිවාර්යයෙන්ම මැතිවරණ ජයග්‍රහණයෙන් පසු ව්‍යවස්ථා සංශෝධනයකට යා යුතු වෙනවා. ඒ නිසා තුනෙන් දෙකක බහුරයක් අපේක්ෂා කරනවා. ඒක ලැබෙයි කියන විශ්වාසය තදින්ම තියෙනවා.

* පසුගිය ජනපතිවරණ ප්‍රතිඵලය විශ්ලේෂණය කිරීමේදී, ගෝඨාභය රාජපක්ෂ මහතාට සිංහල බෞද්ධ ඡන්ද අතිබහුතර සංඛ්‍යාවක් ලැබෙද්දී සුළු ජාතික ඡන්ද හිමි වූයේ සුළු ප්‍රමාණයක් බව පැහැදිලිව පෙනෙනවා. මේ නොලැබී ගිය දෙමළ හා මුස්ලිම් ඡන්ද මහමැතිවරණයේදී ලැබේවි කියා විශ්වාසයක් තිබෙනවාද?

කතෝලික ජනතාව අතරින් 75% කට එහා ගිය පිරිසක් අප සමඟ හිටගන්නවා. ජනපතිවරණයේදී ලැබුණු ප්‍රමාණයට වඩා දෙමළ ඡන්ද සැලකිය යුතු ප්‍රමාණයක් අපට ලැබෙනවා. මුස්ලිම් ඡන්දත් යම් ප්‍රතිශතයක් ලැබෙයි කියන විශ්වාසය අපට තියෙනවා. ජනාධිපතිවරණයේදී තමන් ගත් තීරණය වැරදි බව මේ රටේ දෙමළ, මුස්ලිම් ජනතාව අද තේරුම් අරන්. අන්තවාදී දෙමළ, මුස්ලිම් නායකයින් ඔවුන්ගේ දේශපාලන වුවමනාවන් වෙනුවෙන් තමන් පාවිච්චි කළ බව බොහෝ දෙනෙක් තේරුම් අරන් තිබෙන බව පේනවා. මේ පසුබිම තුළ සුළු ජන ඡන්දවලින් පෙරට වඩා සැලකිය යුතු ප්‍රතිශතයක් ශ්‍රී ලංකා පොදුජන පෙරමුණට ලැබෙන බව මට විශ්වාසයි.

* මුස්ලිම් ජනතාවගේ නායකයන් වන රවුෆ් හකීම්, රිෂාඩ් බදියුදීන් වගේ අය ජාතික සමඟි ජනබලවේගය වටා එක්වීම තුළ මේ අපේක්ෂා කරන මුස්ලිම් ජනතා සහයෝගය ආණ්ඩුවට ලබා ගැනීමට පුළුවන් වෙයිද?

රිෂාඩ්ලට හකීම්ලට තිබුණු මුස්ලිම් ජන බලවේගය දැන් කැඩිලා විසිරිලා ගිහින් ඉවරයි. රිෂාඩ් බදියුදීන් කියන්නේ බරපතළ දූෂණ චෝදනා තියෙන කෙනෙක් වගේම පසුගිය පාස්කු ප්‍රහාරයට සම්බන්ධ නායකයෙක් කියන චෝදනාව ජනතාව වෙතින් එල්ල වෙනවා. මේ නිසා ඔහුට තිබුණු ප්‍රතිරූපය සම්පූර්ණයෙන්ම බිඳ වැටිලා. රවුෆ් හකීම් කියන්නේ මුස්ලිම් ජනතාවගේ ඡන්දයෙන් පාර්ලිමේන්තුවට ඇවිත් ඒ ජනතාව වෙනුවෙන් කිසිම දෙයක් නොකරපු අයෙක්. මේ රටේ මුස්ලිම් ජනතාව ඔවුන් පසුපස ගොස් නැවතත් පරාජිත ගොඩට එකතු නොවන බව මට හොඳටම විශ්වාසයි.

* ලංකා කම්කරු කොංග්‍රසසයේ නායක ආරුමුගන් තොණ්ඩමන් මහතාගේ හදිසි අභාවය හේතුවෙන් ආණ්ඩුවට වතුකරයෙන් ලැබෙන ඡන්ද ප්‍රමාණයට යම් බලපෑමක් ඇතිවිය හැකියි නේද?

ආරුමුගන් තොණ්ඩමන් මහතා අවංක පරිණත දේශපාලනඥයෙක් වගේම නිවැරදි තීන්දු අවශ්‍ය වෙලාවට ගත් නායකයෙක්. ඔහු කවදාවත් අන්තවාදී වුණේ නැහැ. එල්.ටී.ටී.ඊ සංවිධානයට කවදාවත් වතුකරය තුළ හිස ඔසවන්න තොණ්ඩමන් මහතා ඉඩක් තැබුවේ නැහැ. ඉන්දීය සම්භවයක් ඇති දෙමළ ජනතාවට නායකත්වය දුන් එකම පුද්ගලයා තමයි තොණ්ඩමන් ඇමැතිතුමා. එතුමා තමයි වතුකරයේ සිටි දැවැන්තම දේශපාලන නායකත්වය. එතුමාගේ අභාවයෙන් පුරප්පාඩු වූ අපේක්ෂක ධූරය ලංකා කම්කරු කොංග්‍රසයේ දේශපාලන මණ්ඩලයේ තීරණයකට අනුව එතුමාගේ පුත් ජීවන් තොණ්ඩමන් මහතාට ලබාදුන්නා. වතුකරයේ ඡන්ද පදනම ඒ ආකාරයෙන්ම අපට තිබෙනවා. නුවරඑළිය දිස්ත්‍රික්කයේ අපි මන්ත්‍රී ධූර පහක් ගන්නවා.

* ඔබ ශ්‍රී ලංකා පොදුජන පෙරමුණේ මහනුවර දිස්ත්‍රික් නායකයා. පසුගිය මහ මැතිවරණයේදී දිස්ත්‍රික්කය ජයගත්තේ එක්සත් ජාතික පක්ෂය. මෙවර එම ප්‍රතිඵලය වෙනස් කරන්න හැකි වේ යැයි විශ්වාස කරනවාද?

පසුගිය ප්‍රතිඵලය උඩුයටිකුරු කරලා අපි විශිෂ්ට ජයග්‍රහණක් මහනුවරින් ලබනවා. ඒ සඳහා අවශ්‍ය ශක්තිමත් කණ්ඩායමක් අපට සිටිනවා. එක්සත් ජාතික පක්ෂයේ කෑල්ලක් සමඟි ජනවේගය කියලා කැඩිලා ගිහින්. ඒ කැඩිලා ගිය අය අතරත් අද ප්‍රශ්න. තිස්ස අත්තනායක මහනුවරින් තරග කරන්න ගියා. ලක්ෂ්මන් කිරිඇල්ල විරුද්ධ වුණා. ඒ නිසා දැන් තිස්ස ලිස්ට් එකට ගිහින්. සමඟි ජනබලවේගය නමට විතරයි. ඒකේ ඇති සමඟියක් නැහැ.

* කොවිඩ්-19 අර්බුදය පැමිණි විගස ආණ්ඩුව පරිප්පු, සැමන් වගේ ආහාර ද්‍රව්‍යවල මිල විශාල ලෙස පහත දමා ජනතාවට සහන දුන්නා. අලුතින් බදු පැනවීම නිසා දැන් පරිප්පු, සැමන්, සීනි පමණක් නොව තවත් ආහාර ද්‍රව්‍ය රැසක මිල ඉහළ ගිහින්. ජනතාවාදී යැයි කියන ආණ්ඩුවකට මේ ආකාර තීන්දු තීරණ ගන්න පුළුවන්ද?

යහපාලන ආණ්ඩුව කළේ, ජනතාව මත බදු පටවා ඔවුන්ගේ ජීවන බර වැඩි කිරීම. මේ ආණ්ඩුව පත් වුණාට පස්සේ වැට් බද්ධ 15% සිට 8% දක්වා පහතට ගෙනාවා. තවත් සමහර බදු ඉවත් කර දැම්මා. මේ නිසා රාජ්‍ය බදු ආදායම රුපියල් බිලියන 500කින් පහළ ගියා. ඒ වාසිය පෙරළා සහනයක් ලෙස හිමි වුණේ ජනතාවටයි. කොරෝනා වසංගතයක් එක්ක ලෝක ආර්ථික අර්බුදයක් ඇති වෙලා තිබෙනවා. එහි බලපෑමෙන් අපට මිදෙන්න බැහැ. ඒ නිසා යම් යම් අමාරුකම් විඳින්න අපට සිදුවේවි. ආණ්ඩුව හැකි තරම් උත්සාහ කරන්නේ ජනතාවට සහන සලසන්නයි. අපට අතිවිශාල ණය ප්‍රමාණයක් ගෙවන්න තියෙනවා. මම හිතන්නේ ඒ සඳහා අපට යම් සහනයක් ලැබේවි. මොකද, මේක අපිට විතරක් බලපාන තත්ත්වයක් නොවන නිසා. ලෝකයේ බලගතු රට වලට තාමත් කොවිඩ්-19 ව්‍යාප්තිය පාලනය කරගන්න බැරිව දවසකට දහස් ගණන් මරණයට පත් වෙනවා. ඒ රටවල රෝහල්වලට රෝගීන් ඇතුළත් නොකරන තත්ත්වයක් ඇති වෙලා. අපි රටක් ලෙස මේක සැලකිය යුතු අන්දමින් පාලනය කර තිබෙනවා. මේකට ප්‍රධාන හේතුව නිවැරදි නායකත්වයක් රටට හිමිව තිබීම. මේ ප්‍රශ්නයෙන් මුළුමනින්ම ගොඩ එන තුරු අපි හැමෝටම යම් යම් කැපකිරීම් කරන්න වෙයි.

* එක්සත් ජාතික පක්ෂය මේ වන විට කණ්ඩායම් දෙකකට බෙදිලා. සමගි ජන බලවේගයට සම්බන්ධව සිටි පාඨලී, රාජිත, මංගල වැනි අයට එරෙහිව නීතිය ක්‍රියාත්මක කරන්නට ආණ්ඩුව ක්‍රියා කරන්නේ රනිල් පිල සමඟ ඇති ඩීල් එකක් නිසා බවට චෝදනා එල්ල වෙනවා?.

අපි රනිල්, සජිත් නොවෙයි කා එක්කවත් ඩීල් දාලා නැහැ. මම සහභාගි වන වාද විවාදවලදී මොනතරම් රනිල්ට රවීට ගහනවාද කියලා බලන්න. ඩීල් එකක් තියෙනවා නම් අපි රනිල්ලා රවීලා රකින්න ඕන. අනිවාර්යයෙන්ම අපි බැඳුම්කර හොරුන්ට දඬුවම් දෙනවා. ඒ වගේම රවී කරුණානායක ඇතුළු සියලු දෙනා සම්බන්ධයෙන් නීතිය ක්‍රියාත්මක කරනවා. අපට කිසිදු ගනුදෙනුවක් ඒ අය එක්ක නැහැ. සජිත්ලා අද දේශපාලන වශයෙන් අනාථ වෙලා. මේ නිසා ඔවුන් කිසිදු පදනමක් නොමැති කතා පතුරුවලා දේශපාලන වාසි ගන්න උත්සාහ කරනවා. මේකෙන් වෙන්නේ ඔවුන් තව තවත් අනාථ වීමයි.

* විපක්ෂයේ සිටියදී ඔබ ෆයිල් පෙන්වමින් යහපාලන ආණ්ඩුවේ මැති ඇමැතිවරුන්ගේ වංචා දූෂණ හෙළි කළා. ආණ්ඩු පක්ෂයට ගියාම ඒ ෆයිල්වලට මොකද වුණේ කියලා ජනතාව අහනවා?

මේ ආණ්ඩුව බලයට පත් වෙලා මාස තුනෙන් කොරෝනා වසංගතය ආවා. අපි පසුගිය කාලයේ කළ කිසිම පැමිණිල්ලක් ඒ ආයතන විභාග කරලා තිබුණේ නැහැ. මේ සියල්ල විභාග කරලා අපි වැරදිකරුවන්ට නීතියෙන් දඬුවම් දෙනවා. ඒකට අපට තව මාස තුනක් කල් දෙන්න.

* අගමැති මහින්ද රාජපක්ෂ මහතාගේ දේශපාලන දිවියට වසර පනහක් සපිරෙනවා. ඔහුගේ නායකයකත්වය ඔබ දකින්නේ කොහොමද?

අපේ රටේ පහළ වුණු දේශපාලනඥයන්් අතර පොළොවේ පය ගහපු, දුක් විඳින මිනිස්සුන්ගේ දුක කඳුළ අඳුනන, ජනතාවගේ හද ගැස්ම දන්න, ජනතාව අතර ජනප්‍රියතම දේශපාලනඥයා තමයි මහින්ද රාජපක්ෂ.

ප්‍රථමයෙන් කහ පළඟැටි උවදුර වාර්තා වුණේ මාවතගම ප්‍රදේශයෙන්. පසුව කෑගල්ල දිස්ත්‍රික්කයේ ප්‍රාදේශීය ලේකම් කොට්ඨාස එකොළහ තුළම මොවුන් ව්‍යාප්ත වුණා. මාතර, හම්බන්තොට, අඹේපුස්ස, උතුරු පළාතේ කිලිනොච්චිය යන ප්‍රදේශවලින්ද දැනට වාර්තා වී තිබෙනවා.

මිනිසා ද අනෙකුත් සත්ත්වයෝ ද ගහකොළ ද මහ පොළවේ ජෛව විවිධත්වය ආරක්ෂා කරන්නෝ වෙති.එහෙත් මින් එක කොටසකින් හෝ අනෙක් කොටසකට හානියක් වන විට එකිනෙකා වෙනුවෙන් එය මර්දනය කළ යුතු අවස්ථා ද පැමිණේ. මේ දිනවල ශ්‍රී ලංකාවේ කඩින් කඩ පැතිර යන කහ තිත් පළඟැටි උවදුර ද එවැනි අවස්ථාවකි.

කහ තිත් පළඟැටියා සහ කාන්තාර පළඟැටියා නමින් වාගාවලට හානිදායක පළඟැටි විශේෂ දෙකක් හමු වේ. yellow spotted locust - Aularches miliarris (Fam.pyrgomorphidae), Desert locust belongs to family Acrididae ලෙස ඔවුහු වෙති.

පළමු වරට 1989 වර්ෂයේ මෙරට විවිධ ප්‍රදේශවලින් වාර්තා වී ඇති කහ තිත් පළඟැටි විශේෂය මහා පරිමාණයෙන් බෝගවලට හානි කළ බවක් වාර්තා වී නැතැයි කෘෂිකර්ම දෙපාර්තමේන්තුවේ අධ්‍යක්ෂ ආචාර්ය ඩබ්ලිව්.එම්.ඩබ්ලිව්. වීරකෝන් මහතා පෙන්වා දෙයි. ඉඳහිට කැලෑවලින් හමුවන මේ පළඟැටියන් ඉබේම නැති වී යන අතර මේ පළඟැටියා අතීතයේ රබර් ඉඩම්වලින් හමු වී ඇත. රබර් කොළ කා දැමුවත් මහා පරිමාණ හානියක් සිදු කර නොමැති බවත් වීරකෝන් මහතා පෙන්වා දෙයි.

පසුගිය වසරේ මෙරට තැන් කිහිපයකින් මේ පළඟැටියා පිළිබඳ තොරතුරු වාර්තා වුණා. ඒ වතාවේ මර්දන කටයුතු කිහිපයකින් පසුව මේ පළඟැටියන් ඉක්මනින් නැති වී ගියා. නමුත් මෙවර මොවුන් එකපාරටම ප්‍රදේශ කිහිපයකින්ම ව්‍යාප්තිය පටන් ගත්තා. මේ නිසා වසංගත තත්ත්වයකට පත් වුණා. නමුත් මේ වන තුරු කහ තිත් පළඟැටියා ආර්ථික බෝගවලට විශාල හානියක් කරලා නැහැ. බොහෝ ගස්වල ළපටි කොළ කා දමන මේ සත්ත්වයාගේ ව්‍යාප්තිය වැඩි වුණොත් හානිය වැඩිවෙන්න පුළුවන්. මේ නිසා අපි මොවුන් මර්දනය සඳහා වැඩළිවෙළක් සකස් කරලා ඒ ප්‍රදේශවල කෘෂිකර්ම නිලධාරීන් දැනුවත් කරලා තිබෙනවා

මෙවර ප්‍රථමයෙන් කහ පළඟැටි උවදුර වාර්තා වූයේ මාවතගම ප්‍රදේශයෙනි. පසුව කෑගල්ල දිස්ත්‍රික්කයේ ප්‍රාදේශීය ලේකම් කොට්ඨාස එකොළහ තුළම මොවුන් ව්‍යාප්ත වී තිබේ. මාතර, හම්බන්තොට, අඹේපුස්ස, උතුරු පළාතේ කිලිනොච්චිය යන ප්‍රදේශවලින්ද දැනට වාර්තා වී තිබේ. මේ ප්‍රදේශවල පළඟැටියන් මර්දනය කිරීම සඳහා පුලුස්සා දැමීමේ ක්‍රමවේදය භාවිතා කරයි. එවැනි ප්‍රාථමික ක්‍රමවේදයක් තුළින් මර්දනය කළ හැකි මෙකී විශේෂය විශාල වශයෙන් ව්‍යාප්ත වුවහොත් කෘමිනාශක භාවිතා කිරීමට සිදු වේ. එවැනි තත්ත්වයක් පැමිණීම වැළැක්වීම සඳහා ගත යුතු ක්‍රියාමාර්ග කෙරෙහි රජය අවධානය යොමු කර තිබේ.

මේ පළඟැටියන් ලක්ෂ ගණනින් ව්‍යාප්ත විය හැකියි. මූලිකව 10 - 15 සිට 500 - 1000 දක්වා ප්‍රමාණවලින් පළඟැටියන් වාර්තා වුණා. මෙය ලක්ෂය දක්වා වැඩි වෙලා තිබෙනවා. නමුත් මේ ප්‍රමාණ පහසුවෙන් මර්දනය කළ හැකියි. මුලින්ම පිළවකු ලෙස පසේ හටගෙන පනිමින් යන මේ පළඟැටියා හැව අරිමින් අවධි කිහිපයක් පසු කර පියාඹන අවධියට පත්වෙනවා. මේ අවධියේදී තමයි ඔවුන් මර්දනය කළ හැක්කේ. පොල් ඉඩම්වල යට තණකොළ කොටසින් මේ පළඟැටි වර්ගය වාර්තා වෙලා තිබෙනවා. පොල් කොළ කා දමා තිබුණත් ඒවා සවිමත් නිසා ඒ තරම් හානියක් කරන්නට මොවුන්ට බැහැ. මේ වන විට කෙසෙල්, පුවක්, අඹ, හවරි නුග, ගම්මිරිස්, මඤ්ඤොක්කා, ගස්ලබු වැනි ගස්වලත් ළපටි කොළ කා තිබෙනවා

මෙහිදී කාන්තාර පළඟැටියා ගැනත් යමක් සඳහන් කළ යුතුය. කාන්තාර පළඟැටියා හෙවත් Desert locust දක්නට ලැබෙන්නේ කාන්තාර ප්‍රදේශවලය. ඒ සත්ත්වයා දැනට වාර්තා වන්නේ උතුරු ඉන්දු පකිස්තාන බෝඩරය අවටිනි. කාන්තාර පළඟැටියා කහ තිත් පළඟැටියාට වඩා මහා පරිමාණයෙන් වගාවලට හානි කරන කෘමී විශේෂයකි. ඒ පළඟැටියන් අපේ රටට පැමිණීමේ අවදානමකුත් ඉදිරියේදී තිබෙන නමුත් දැනට ඔවුන් ඉන්දියාවේ පහළ ප්‍රදේශවලට පැතිරිලා නැති බැවින් මෙරට ජනතාව අනිසි බියක් ඇති කර ගත යුතු නැත. නමුත් ඒ තර්ජනයටත් අපි මුහුණ දීමට අවධානයෙන් සිටිය යුතුය.

“තව සතියකින් දෙකකින් පමණ මේ උවදුර පහව යනු ඇතැයි අපි විශ්වාස කරනවා. මේ පළඟැටි විශේෂය කොතැනකින් හෝ හඳුනාගත හොත් 1920 දුරකථන අංකයට අමතා ඒ පිළිබඳ දැනුවත් කරන ලෙස ජනතාවගෙන් ඉල්ලීමක් කර තිබේ. ඊට අමතරව සියලු කෘෂිකර්ම නිලධාරීන් ඒ පිළිබඳ දැනුවත් කර තිබෙන නිසා පළඟැටි මර්දන ව්‍යාපාරය කඩිනමින් ක්‍රියාත්මක කෙරේ.

කෙසේ වෙතත් කහ තිත් පළඟැටියා යනු මහපොළොවෙන් වඳ කළ යුතු සත්ත්වයකු නොව මහා පරිමාණයෙන් ව්‍යාප්ත වීමට ඉඩ නොදී මර්දනය කළ යුතු සත්ත්ව විශේෂයක් පමණක් බව අධ්‍යක්ෂවරයා අවධාරණය කරයි. යම් හෙයකින් කහ තිත් පළඟැටියා වගාවනට තර්ජනයක් වන්නේ මහාපරිමාණ වශයෙන් ව්‍යාප්ත වුව හොත් පමණි.

සටහන - චින්තා රණසිංහ

මාතර දිස්ත්‍රික් පාර්ලිමේන්තු මන්ත්‍රී හිටපු අමාත්‍ය මහින්ද යාපා අබේවර්ධන

මාතර දිස්ත්‍රික් පාර්ලිමේන්තු මන්ත්‍රී සහ හිටපු වාරිමාර්ග හා ග්‍රාමීය සංවර්ධන රාජ්‍ය අමාත්‍ය මහින්ද යාපා අබේවර්ධන සමඟ සහල් මිල, පොහොර හිඟය, ඉදිරි පාර්ලිමේන්තු මැතිවරණය ආදි කරුණු පිළිබඳ කළ සාකච්ඡාව.

අද වන විට එක්සත් ජාතික පක්ෂය දෙකට කැඩිලා තිබෙන්නේ. දීර්ඝ ඉතිහාසයක් තිබෙන පක්ෂයක් තමයි එක්සත් ජාතික පක්ෂය කියන්නේ. අද ඒ දෙගොල්ලම එකිනෙකාට දේශපාලනික වශයෙන් ප්‍රහාර එල්ල කර ගන්නවා. මා හිතන්නේ රටේ ජනතාව එක්සත් ජාතික පක්ෂයට හෝ සමගි ජන බලවේගයට ඡන්දය දෙන්න සූදානම් නැහැ .අද රටේ ජනතාව ගෝඨාභය රාජපක්ෂ මහතා හා අගමැති මහින්ද රාජපක්ෂ මහතා වටා තමයි රොද බැඳගෙන සිටින්නේ.

කොරෝනා වසංගතය පාලනය සම්බන්ධයෙන් රජයේ වැඩපිළිවෙළ පිළිබඳව කතා කළොත්?

කොරෝනා වසංගතය මර්දනය කරන්න අවශ්‍ය වැඩපිළිවෙළ අපේ ජනාධිපතිතුමා විසින් ඉතා විධිමත් ආකාරයට සැලසුම් කළ නිසා පාලනය කරන්න හැකියාව ලැබුණා. සෞඛ්‍ය අංශ මෙන්ම ත්‍රිවිධ හමුදාව, පොලීසිය ඇතුළු ආරක්ෂක අංශ ඇතුළත් වෙනමම කාර්යසාධන බලකායක් ඇති කිරීම නිසා මෙම වසංගතය පාලනය කරන්න එතුමාට හැකියාව ලැබීම රටේ ජනතාව ලබපු භාග්‍යයක්. ඒ විතරක් නෙවෙයි නිසි වේලාවට අවශ්‍ය පියවර ගත්ත නිසා කොරෝනා වසංගතය පාලනය කරන්න රජයට හැකියාවක් ලැබුණා.ඒ වගේම රට පුරා එම වෛරසය ජනතාවට රෝග වාහකයෙක් වශයෙන් ක්‍රියා කරවීම වැළැක්වීමට සියලු පියවරයන් ගැනීම මේ රටේ ජනතාව ලැබූ විශාල ජයග්‍රහණයක්. මෙහිදී අගමැති මහින්ද රාජපක්ෂ මහතා ඉටු කරන ලද කාර්යභාරය අති විශාලයි.

වැරදිලා හරි පසුගිය යහපාලන ආණ්ඩුව කාලයේ මෙම වසංගතයට මුහුණ දෙන්න සිදුවුණා නම් අපට දකින්න ලැබෙන්නේ ජනාධිපතිවරයා හා අගමැතිවරයා අතර කඹ ඇදිල්ල නිසා අවසානයේ මෙම රෝග මර්දනයට කිසිම වැඩක් කෙරෙන්නෙ නැතුව, අපේ සෞඛ්‍ය අංශවලටත් කිසිම වැඩක් කර ගන්න බැරුව රට විශාල වශයෙන් අනාථ භාවයට පත්වන තත්ත්වයක්. මේ වගේ අවස්ථාවකට මුහුණ දෙන්න නම් රට පාලනය කරන පාලකයන් සියලු දෙනා එක තීරණයක ඉන්න අවශ්‍යයි. එක මතයක සිට එය කළ යුතුයි. ඒ නිසා කොරෝනා වසංගතය එන විට රටේ ජනතාවගේ වාසනාවට තමයි ගෝඨාභය රාජපක්ෂ මහතා ජනාධිපති වෙලා මහින්ද රාජපක්ෂ මහතා අගමැති වුණේ.

රටපුරා ඇතිවී තිබෙන සහල් හිඟය සම්බන්ධයෙන් ඔබතුමාගේ මතය කුමක්ද ?

අපේ රටේ වී වගා කිරීමේදී වගා කන්න දෙකක් තිබෙනවා. යල කන්නය සහ මහ කන්නය කියලා. මේ වන විට මහ කන්නය අවසාන කරලා තියෙන්නේ. හොඳම වී අස්වනු ලැබෙන්නේ මහා කන්නයෙන්. සාමාන්‍යයෙන් මහ කන්නය තුළ හෙක්ටයාර් දශ ලක්ෂයක විතර වී වගා කරනවා. සාමාන්‍යයෙන් පොලොන්නරුව දිස්ත්‍රික්කයේ වැඩි වශයෙන් ගොවීන් වගා කරන්නේ කීරි සම්බා. දකුණු පළාතේ ඇතුළු තවත් දිස්ත්‍රික්ක කිහිපයක වගා කරන්නේ නාඩු වී. අද අපේ රටේ වී හිඟයක් නැහැ. වී තිබෙනවා. හැබැයි නාඩු වල හිඟයක් තිබෙනවා. ඒකට හේතුව පාරිභෝගිකයන් වැඩි වශයෙන් ඉල්ලන්නේ නාඩු. වැඩි වශයෙන් නාඩු සහල් බවට පත් කරන්නේ කුඩා මෝල් හිමියන්. නමුත් කුඩා මෝල් හිමියන් ළඟ මේ වෙන විට නාඩුවල හිඟයක් පවතිනවා. මේ අවස්ථාවේ රජයේ වී ගබඩාවලින් හිඟයට පිළියමක් වශයෙන් වෙළඳපොළට සහල් නිකුත් කළ යුතුයි.

නමුත් වී අලෙවි මණ්ඩලයේ ගබඩාවල දැනට වී නොමැති වීම ගැටලුවක්. ඒ නිසා අපි හිඟය ඇති වන විට වෙළෙඳපොළට සහල් නිකුත් කරන්න, ගබඩා කරගෙන තබාගත යුතුයි. දැනට රට පුරා ඇති වී තිබෙන සහල් හිඟයට ප්‍රධාන හේතුව පසුගිය රජය තුළ නිසි වැඩ පිළිවෙළක් නොතිබීමයි. අපි ආණ්ඩුව භාරගන්න විට රජයේ වී ගබඩාවල තිබූ සියලුම වී තොග සත්ව ආහාර වශයෙන් නිකුත් කර ගබඩා හිස් කරලා තිබුණේ. එයයි අද රට තුළ සහල් හිඟයක් ඇති වෙන්න බලපා තිබෙන ප්‍රධාන හේතුව.

අපි රජය භාර ගන්න විට රජයේ වී ගබඩා වල එක වී ඇටයක් වත් තිබුණේ නැහැ. තිබූ සියලු වී තොග රජයට පාඩු ලබාගෙන පෞද්ගලික සමාගම් වලට විකුණා දැමුවා.ඉදිරියේදී මෙවැනි තත්වයකට මුහුණ දීම සඳහා අපි රජයක් විදිහට වී අළෙවි මණ්ඩලය හරහා විශාල වශයෙන් තොග රැස් කරන්න බලාපොරොත්තු වෙනවා.

රට තුළ පොහොර හිඟයක් ඇතිවෙලා තිබෙනවා නේද?

රට තුළ කිසිසේත් පොහොර හිඟයක් නැහැ. කොරෝනා වසංගත තත්ත්වය නිසා ඇතැම් ප්‍රදේශවල පොහොර බෙදාහැරීමේදී ඇතිවන ගැටලු නිසා පොහොරවල යම් අඩුවක් පවතිනවා. ඒ විතරක් නොවෙයි. රසායනික පොහොර භාවිතය ඒ තරම්ම උචිත නැහැ. රසායනික පොහොර භාවිතය අවම කිරීම සඳහා වෙළඳ පොළට නිකුත් කරන පොහොර ප්‍රමාණයේ යම් අඩුවක් තිබෙන්නත් පුළුවන්. රසායනික පොහොර භාවිතය අඩු කිරීම තමයි අපේ රජයේ ප්‍රතිපත්තිය.ඒ නිසා අවශ්‍ය ප්‍රමාණයට පමණයි පොහොර නිකුත් කරන්නේ.

එක්සත් ජාතික පක්ෂයේ සහ සමගි ජන බලවේග පක්ෂයේ ඇති වී තිබෙන අර්බුදය ඔබ දකින්නේ කොහොමද?

අද වන විට එක්සත් ජාතික පක්ෂය දෙකට කැඩිලා තිබෙන්නේ. දීර්ඝ ඉතිහාසයක් තිබෙන පක්ෂයක් තමයි එක්සත් ජාතික පක්ෂය කියන්නේ. අද ඒ දෙගොල්ලම එකිනෙකාට දේශපාලනික වශයෙන් ප්‍රහාර එල්ල කර ගන්නවා. මා හිතන්නේ රටේ ජනතාව එක්සත් ජාතික පක්ෂයට හෝ සමගි ජන බලවේගයට ඡන්දය දෙන්න සූදානම් නැහැ .අද රටේ ජනතාව ගෝඨාභය රාජපක්ෂ මහතා හා අගමැති මහින්ද රාජපක්ෂ මහතා වටා තමයි රොද බැඳගෙන සිටින්නේ. ඉදිරියේදී පැවැත්වෙන පාර්ලිමේන්තු මැතිවරණයෙන් ස්ථිර වශයෙන්ම 2/3 ක බලයක් අපේ පක්ෂය ලබා ගන්නවා.

පාර්ලිමේන්තු මැතිවරණය සම්බන්ධව ඔබේ මතය කුමක්ද?

අධිකරණය ලබාදීපු තීන්දුවත් එක්ක අපට පෙනීයන එක කරුණක් තමයි අපේ ජනාධිපතිවරයාගේ නිවැරදි නායකත්වය. මැතිවරණය තියනවට විපක්ෂය බය වුණේ අපිට 2/3 බලයක් ලැබෙන නිසා. ඒක කිසිම ජගතෙකුට වළක්වන්න බැහැ. අපේ ජයග්‍රහණය හෙට නැගෙනහිරින් හිරු පායනවා වගේ විශ්වාසයි.

අපේ රටේ ජනතාව මේ වන විට සෞඛ්‍ය අංශවල උපදෙස් අනුව අපේ රජයට සහයෝගය ලබා දෙන්න සූදානම් වෙලයි ඉන්නේ. ඒ විතරක් නොවෙයි. පසුගිය දිනවල විපක්ෂය පාර්ලිමේන්තු මැතිවරණය කල් දාන්න උත්සාහ කිරීම රට අස්ථාවර කිරීමේ එක කොටසක් ලෙසයි මා දකින්නේ.

පාර්ලිමේන්තු මැතිවරණයෙන් පරාජය වන අය ජාතික ලැයිස්තුවෙන් පාර්ලිමේන්තුවට ගෙන ඒම පිළිබඳ ඔබතුමාගේ මතය කෙබඳුද?

මහජනයා ප්‍රතික්ෂේප කරන අය නැවත පාර්ලිමේන්තුවට ගෙන ඒමට කටයුතු කිරීම හොඳ දෙයක් නෙවෙයි. මේ සියල්ලේ දීම මහජනයා තමයි වැදගත් වන්නේ. ඒ නිසා ඒ අයගේ මතයට අප ගරු කළ යුතුයි. අපට කියන්න තියෙන්නේ රටට රටේ අනාගතයට සුදුසු අය මහජනතාව විසින් පත්කර එවිය යුතු බවයි.

අද මේ රටේ ජනතාවට ඡන්දය ලබා දෙන හැටි උගන්වන්න අවශ්‍ය නැහැ. ජනතාව දැන් ඡන්දය දෙන්නේ ලාභ, වරදාන, වරප්‍රසාද බලාපොරොත්තුවෙන් නොවෙයි. රට ගැන හිතලා. අපි සියල්ල කළ යුත්තේ රට ගැන හිතලා මිස පුද්ගලයන් ගැන සිතාගෙන නොවෙයි. පසුගිය රජය සමය වගේ අපි පළිගන්න වැඩ කරන්නේ නැහැ. හැමෝටම රටේ නීතිය සාධාරණව ක්‍රියාත්මක වෙනවා.

රට පුරාම ජනතාව ගෙවතු වගාවට යොමු වෙලා හිටපු කෘෂිකර්ම ඇම­ැතිවරයා වශයෙන් ඔබ එය දකින්නේ කෙසේද ?

අපේ රට කෘෂිකාර්මික වශයෙන් වැදගත් වන රටක්. අතීතයේ අපේ මව්බිම හැඳින්වූයේ පෙරදිග ධාන්‍යාගාරය කියලා. විවෘත ආර්ථිකයත් සමග මේ සියල්ල වෙනස් වුණා. අපට මතකයි අපේ ගෙවල්වල ඒ දවස්වල එළවළු කොටුවක් තිබුණා. අවශ්‍ය සියලු ම එළවළු ටික වගා කළා. ඒ කොටුවේ බටු ගස් කිහිපයක්, කරවිල වැල් කිහිපයක්,මිරිස් ගස් දෙක තුනක්, මෑ වැල් කිහිපයක් වෙන්නත් පුළුවන්. සමහර වෙලාවට පොළට ගියේ ලුණු ඇතුළු අත්‍යවශ්‍ය කුළුබඩු ටිකක් ගේන්න විතරයි.

පසුකාලීනව මේ සියල්ල වෙනස් වෙලා පිටරටින් එන තුරු අපි බලාගෙන හිටියා.කොරෝනා වසංගතයත් එක්ක රට තුළ ඇති වන ආහාර හිඟයට පිළියමක් වශයෙන් අද සෑම නිවසකම විතරක් නොවෙයි පන්සල් ඇතුළු ආගමික ස්ථාන වලත් වගා කරනවා. මෙය අපේ රටේ ජනතාව ලබා ගත්තු බුද්ධිමත් තීරණයක් වගේම, රටේ දියුණුවට බලපාන හොඳ ප්‍රවණතාවක්. හිටපු කෘෂිකර්ම ඇම­ැතිවරයා වශයෙන් ඉදිරියේදී ඒ සඳහා රජයක් විදියට අපි රජය පැත්තෙන් අවශ්‍ය සහයෝගය ලබා දෙන්න බලාපොරොත්තු වෙනවා.

බඩු මිල ඉහළ යාම සම්බන්ධව ඔබේ අදහස?

බඩු මිල ඉහළ ගියපු එක අපි පිළිගන්නවා.එයට වගකියන්න ඕන පැවති රජය. ඒ අයගේ කිසිම සැලැස්මක් නොතිබූ බව මේ තුළින් හොඳටම පැහැදිලි වෙනවා. රට තුළ නිසි සැලැස්මකට අනුව කෘෂිකර්මාන්තය දියුණු කළේ නැහැ. පුරන් කුඹුරු අස්වද්දන්න පැවති රජයේට නිසි වැඩපිළිවෙළක් තිබුණෙත් නැහැ. ජනාධිපති ගෝඨාභය රාජපක්ෂ මහතාගේ සෞභාග්‍යා වැඩසටහන යටතේ කෘෂිකර්මාන්තය දියුණු කර එළවළු ඇතුළු අත්‍යවශ්‍ය ආහාර ද්‍රව්‍යවල මිල පහත හෙළීමට කටයුතු කරනවා.

ග්‍රාමීය සංවර්ධනය පැත්තෙන් ඔබතුමාලා ඉදිරියේදී මොකක්ද කරන්න බලාපොරොත්තු වෙන්නේ?

ග්‍රාමීය සංවර්ධන කටයුතුවලදී ප්‍රමුඛතාව දෙන්නේ ස්වයං රැකියා අංශය වැඩි දියුණු කරන්න. ස්වයං රැකියා කිරීමට අවශ්‍ය වන යටිතල පහසුකම් දියුණු කිරීම, ස්වයං රැකියා වෙ‍ෙළඳ පහසුකම් දියුණු කිරීම, ස්වයං රැකියා ආරම්භ කරන පිරිසට රාජ්‍ය බැංකු හරහා අඩු සහනදායී පොලියක් මත ණය ලබා දීමට අපි බලාපොරොත්තු වෙනවා. මේ වැඩපිළිවෙළ මාතරට පමණක් සීමා වෙන්නේ නැහැ. මුළු රට පුරාම ක්‍රියාත්මක කරන්න බලාපොරොත්තු වෙනවා. සෑම ප්‍රාදේශීය ලේකම් කොට්ඨාසයක්ම ආවරණය වීමට හැකිවන පරිදි මේ වැඩසටහන් දියත් කරනවා. ස්වයං රැකියා වශයෙන් ඒ ඒ ප්‍රදේශවල තිබෙන අමුද්‍රව්‍ය පදනම් කරගෙන ස්වයං රැකියා ආරම්භ කරන්න පුළුවන්. කොහු කර්මාන්තය ආශ්‍රිත නිෂ්පාදන, මල් වගාව, ආහාර ද්‍රව්‍ය, රස කැවිලි නිෂ්පාදනය ඒ අතුරින් කිහිපයක් පමණයි.

පසුගිය ආණ්ඩු කාලයේ කීවා හොරු අල්ලනවා කියා. නමුත් ඒ දේ සිදු වුණේ නැහැ නේද ?

හොරු අල්ලනවා කියලා පසුගිය රජය කරපු දේවල් දැන් එළිපිටම දිගහැරෙනවා නේද? අපේ රජය මේ සියලු දේවල් නීත්‍යානුකූලව විමර්ශනය කරගෙන යනවා. මේ වන විට පාස්කු ප්‍රහාරය පිළිබඳ විමර්ශන කටයුතු සිදු වෙනවා. පසුගිය රජය වගේ මැතිඇමැතිවරුන්ට ඕන විදිහට නීතිය අතට ගන්නේ නැහැ. ඒ සියල්ල අධිකරණය හරහා සිදු­‍ෙවනවා.

පාර්ලිමේන්තු මැතිවරණය සඳහා සූදානම කෙබඳු ද?

පාර්ලිමේන්තු මැතිවරණයට අපට අලුතෙන් සූදානම් වෙන්න අවශ්‍ය නැහැ.හෙට මැතිවරණය තිබ්බත් අපි ඉතා ඉහළින් ම ජයග්‍රහණය කරනවා.එය ඉර හඳ වගේ අපට විශ්වාසයි. ඒ සඳහා අපිට වඩා ජනතාවගේ දැඩි උනන්දුවක් පෙනෙන්න තිබෙනවා.

සංවාද සටහන හා ඡායාරූප
තමරසිරි විජේසේකර
දෙයියන්දර සමූහ

විදෙස් ගමන් බලපත්‍රයක් ඉල්ලුම් කළ පන්නිපිටිය වීර මාවතේ පදිංචි කාන්තාවකට ආගමන විගමන දෙපාර්තමේත්තුවේ නිලධරයකු පවසා ඇත්තේ මීට වසර කිහිපයකට පෙර ඇයගේ නමින් ගමන් බල පත්‍රයක් නිකුත් කර ඇති බවයි. මෙවැනි සමාජ විරෝධි ක්‍රියාවන් සහ ව්‍යාජ තොරතුරු අවම කිරිම සඳහා ජෛවමිතික (Biometrix) ක්‍රමවේදය උපයෝගි කර ගනිමින් ජාත්‍යන්තර තත්වයේ හැඳුනුම් පතක් ජනතාව වෙත ලබා දීමේ වැඩ පිළිවෙළක් රාජ්‍ය ආරක්ෂක අමාත්‍යංශය විසින් ඇරඹිමට කටයුතු කරමින් සිටී. මෙය රාජ්‍ය ආරක්ෂක ලේකම් මේජර් ජනරාල් කමල් ගුණරත්න මහතා දත්ත සමුදායක් (Data base) සකස් කිරිම සඳහා ගන්නා උත්සාහයේ ප්‍රතිඵලයකි. ඔහු ඒ සඳහා ප්‍රායෝගික දක්ෂතාව ඇත්තෙකි. සංසන්දනාත්මක (Referance) ක්‍රම වේදයක් මෙයට ඇතුළත්ය.

දැනට පවතින ජාතික හැදුනුම්පත සඳහා වූ ඡායාරූපයේ පුද්ගල මුහුණ වෙතින් දත්ත 17ක් වෙනුවෙන් ජාත්‍යන්තර සිවිල් ගුවන්සේවා සංවිධානයේ (ICAVO) නිර්ණායක ක්‍රියාත්මකය වේ. පුද්ගලයින් ලියාපදිංචි කිරිමේ දෙපාර්තමේන්තුව මගින් නිකුත් කෙරෙන ජාතික හැදුනුම්පත වෙනුවෙන් ඉහත ප්‍රමිතියෙන් යුත් හැදුනුම්පත් නිකුත් කරනු ලබන අතර ඒ සඳහා ජායාරූප ගැනීමේ කාර්ය බාර දී ඇත්තේ දිවයින පුරා පවත්වාගෙන යන ඡායාරූප ශාලා වෙතටය. රේඛිය දෙපාර්තමේන්තුව විසින් මේ සදහා වූ දැනුවත් කිරීම් පුහුණු කිරිම් සහ ලියාපදිංවිකිරිම් ආදිය සිදු කර ඇත්තේය. ස්වදේශ කටයුතු අමාත්‍යාංශය යටතේ ඇති පුද්ගලයින් ලියා පදිංචි කිරිමේ දෙපාර්තමේන්තුව මෙම ක්‍රියාවලිය සදහා වසර කිහිපයක සිට ජිව දත්ත එක් කිරීමේ සැලසුම් ක්‍රියාත්මක කරමින් සිටියේය.මේ අනුව දත්ත සමුදායක් (Data base) සහිත හැඳුනුම්පතක් නිකුත් කිරිමට පහසු වන්නේය.

ජෛවමිතික (Biometrix) ක්‍රම වේදය යනු කුමක්ද ? හැදුනුම්පත වෙනුවෙන් ජීවදත්ත උපයෝගි කර ගන්නේ ඇයි ? යන්න පිළිබදව ජනතාවට ඇත්තේ කුතුහලයකි.

සරලව දක්වුවහොත් යම් පුද්ගලයකු කවුරුද, වෙනත් අය සමග සංසන්දනය කිරිමේ දී ඔහුගේ මුහුණ හෝ වෙනත් දත්ත ඇසුරින් වෙනස් කම් මොනවාද යන්න විශ්ලේෂණය කිරිම මෙහි ප්‍රධාන අරමුණුවලින් කිහිපයකි. මුහුණින් පිළිබිඹු කෙරෙන පෙන්නුම් කරන දත්තයන් ඉරියව්වන් පුද්ගලයකු ජීවත් වෙන කාල පරාසය තුළම නොවෙනස්ව පැවතීම මෙහි පදනමයි. මේ අනුව වයස මේ සදහා ප්‍රශ්නයක් නොවේ. උදාහරණයක් ලෙස වයස අවුරුදු පහළොවේදී හැදුනුම්පතක් සදහා යොමුවන පුද්ගලයාගේ ජීවිතාන්තය දක්වාම මුලින් ගත් ඡායාරූපය සංසන්දනාත්මක (Referance) ලෙස යොදා ගැනීම විශේෂ ලක්ෂණයකි. විවිධ අවස්ථාවන් සදහා කිහිපවතාවක් පුද්ගලයෙකු විසින් ඡායාරූප ගත්තත් මුල් රුවට සංසන්දනය කිරිමක් සිදු කෙරේ. මුල් ලක්ෂණ විනාශ නොවීම නිසා කායික වෙනස් කම් මෙහි දී ඒතරම් ගණන් නොගැනේ. වර්තමානයේ ස්මාට් දූරකතන විවර කිරිමේ දී ඇඟිලි සලකුණු හෝ මුහුණේ රුව දිස් කිරිම මෙන්ම සංචාරක හෝටල වල කාමර විවෘත කිරිම සඳහාද මෙම ක්‍රම අනුගමනය කර ඇත. දැනට විශේෂයක් වන මෙය තව ටික කලකදී සාමාන්‍යයක් වනු ඇත.

මෙම ක්‍රමවේදය තුළින් දත්ත සමුදාය ( Data base) ක්‍රියාවලිය පරිගණක ආශ්‍රිතව ගොඩ නැගිය හැකිය. වසර පණහකට පෙර IBM සමාගම මූලිකව දත්ත සමුදාය (Data base) ක්‍රියාවලිය ආරම්භ කැර ඇත. වවිධ අවශ්‍යතා අනුව වෙනස් කිරිම් කළ හැකි යාවත්කාලීන කළ හැකි සහ අවශ්‍යතාව අනුව නැවත තොරතුරු විශ්ලේෂණය කළ හැකි නවීන ලෝකයට ප්‍රබලව අවශ්‍ය වන්නකි. ලිපිගොනු, ප්‍රස්තාර, සංඛ්‍යලේඛන විවිධ අව්‍යතා පිළිවෙළට ගබඩා කළ හැකි මාධ්‍යයකි. මේ අනුව පුද්ගලයකුගේ තොරතුරු නිශ්චිත පිළිවෙළකට ගබඩා කිරිමක් සිදු කෙරේ. මේ අනුව පුද්ගලයකු ඉපදුණු දා සිට ඔහුගේ හෝ ඇයගේ ජීවන දත්ත මෙන්ම අනෙකුත් තොරතුරු මෙමගින් සුරැකිව ගබඩා කර අවශ්‍යතා අනුව ප්‍රයෝජනයට ගත හැකිය. අතීතයේ මෙන්ම වර්තමානයේ මෙම ක්‍රියාවලියට සමාන සරල ප්‍රායෝගික ගබඩා කිරිම් පත්‍රිකා බැංකු, හැඳුනුම්පත් කාර්යාල මෙන්ම පර්යේෂණ ආයතනවල ක්‍රියාත්මකය.

සුචි පත්‍රය යනුවෙන් මේවා හදුන්වනු ලබන්නේය. අත්සන, ඡායාරූපය, රුධිර ගණය සහ වෙනත් සංසන්දනාත්මක තොරතුරු මෙහි අඩංගුය. රටක ජිවත්වන සියලු පුද්ගලයින්ගේ තොරතුරු මෙම ක්‍රමය තුළින් පහසුවෙන් අවශ්‍යතා අනුව ප්‍රයෝජනයට ගැනීමට රාජ්‍ය ආයතනවලට හැකියාව ලැබේ.

සංකීර්ණ ලෝකයේ මිනිසා ගේ භෞතික, කායික, හැසිරිම් ආදි තොරතුරු විද්යුත් ක්‍රමවේද සහ මුද්‍රිත ක්‍රමවේද සහ ශාරීරික කොටස් වෙතින් ලබා ගන්නා තොරතුරු විශ්ලේෂණය කරමින් ගබඩා කිරිමකට ලක් කිරිම මෙමගින් සිදු කෙරේ. මුහුණ වෙතින් දත්ත තිහකට වැඩි ප්‍රමාණයක් ලබා ගත හැකිය. ඇසක රුධිර සාම්පල ඇගිලිසලකුණු, කෙස් මෙන්ම බහිශ්‍රාවීය ද්‍රව්‍ය ද ඇතුළත්ය.සමහර විට කට හඩ පවා දත්ත ලෙස භාවිතා කරයි.අත්සන කාලයක සිට මේ දක්වා ක්‍රියාත්මක තවත් අංගයකි.

පුද්ගලයකු හඳුනා ගැනීමට මෙම දත්ත සමුහයන් මහෝපකාරී වේ. මෙම ක්‍රියාවලිය මඟින් ජන සමාජයක ජීවත් වන සියලුදෙනා වෙත පොදුවේ ක්‍රියාවට නංවමින් මිනිසාගේ ආරක්ෂාව සැලසීම සහ නීති විරෝධි ක්‍රියා සිදු කරන්නන් හඳුනා ගැනීමටත් සමහර අවස්ථාවලදී රෝග නිධාන සහ පැතිරීමේ පරිසරය සහ භූගෝලිය ප්‍රදේශ හඳුනා ගැනිමටත් හැකි වේ.

ලෝක ව්‍යාප්ත වෛරස් රෝගයක් වූ කොවිඩ් 19 සදහා මෙම දත්ත විශ්ලේෂණය සිදු කරමින් පවතින අතර ශ්‍රි ලංකාවේ රාජ්‍ය ආරක්ෂක අමාත්‍යංශය මැනවින් මෙම ක්‍රමවේදය අනුගමනය කරමින් සිටි. ඒ් අනුව ශ්‍රි ලංකාවේ පුද්ගල අනන්‍යතාව සත්‍ය ලෙස හදුනාගැනීම සදහා මෙවැනි ජෛවමිතික (Biometrix) සහිත ව්‍යාපෘතිවල සාර්ථකත්වයක් රඳා පවතින්නේය. එය යහපත් ජනසමාජයක් බිහි කිරීමටත් නීති ගරුක සමාජයක් ඇති කිරිමටත් මහෝපකාරි වනු නොඅනුමානය.

රටේ පවතින නීතිය සහ අවශ්‍යතාව අනුව කළ හැකි නීත්‍යනුකූල වෙනස්කම් ඇත. ඒ්වා කුලය නිසා නම් වෙනස් කිරිම, විවාහයක් නිසා නම සහ ආගම වෙනස් කිරිම ආදියයි. මේ වෙනස් කිරිම් පිළිබදව ජාතික පුවත්පතක ප්‍රසිද්ධියක් කළ යුතු වේ. ඒ සාධාරණ හේතුන් මතය. ඉහත සමහර වෙනස් වීම් හැඳුනුම්පත සදහා හෝ ගමන් බල පත්‍රය සදහා හෝ නැවත යාවත්කාලීන කළ යුතු වේ. මේ සදහා නීති උපදෙස් පිළිපැදිය යුතුවේ ලෝකයේ බොහෝ රටවල ජෛවමිතික (Biometrix) හැඳුනුම් පතක් වසර දහයකට පමණක් වලංගු වේ.

ප්‍රශ්නය පැන නගින්නේ ව්‍යාජ අනන්‍යතා වෙනස් වීම් සිදු කරනා පුද්ගලයින් හේතුවෙනි. වංචනික අදහස් මත වයස වෙනස් කිරිම්, විදේශ ගමන් බලපත්‍ර සැකැසීම, ඒකම බලපත්‍රයක් ඒකම පවුලේ කිහිපදෙනකු භාවිතා කිරිම, ජාතිකත්වය වෙනස් කිරිම්, මිය ගිය හෝ වෙනත් අයගේ නමින් ලිපි ලේඛන සැකසීම ආදිය වේ. බොහෝ අවස්ථාවලදී විදෙස් ගමන් බලපත්‍රය සැකසීමේ දී වෙනත් අය ඒ නමින් සහ අදාල හැඳුනුම්පත් අංකය යොදමින් සිදු කෙරෙන වංචා එමටය.

මීට අමතරව පාතාලය, මිනීමැරුම් හා විවිධ ත්‍රස්තවාදි ක්‍රියාවනට සම් බන්ධතා අති අයවලුන් වාංචනිකව හැඳුනුම් පත් විදෙස් ගමන් බලපත් මෙන්ම ව්‍යාජ ලිපිලේඛන ඉදිරිපත් කිරිම මත විශ්‍රාම වැටුප් අහිමි වූ ඉඩකඩම් අහිමි වූ මෙන්ම විවිධ වරප්‍රසාද අහිමි වූ පිරිස අති විශාලය. මෙයට ප්‍රධාන හේතුව අනන්‍යතාව සදහා වූ ජාතික හැදුනුම් පත ව්‍යාජ වෙනස් වීම්වලට පත් කළ හැකි හෙයිනි. ඒ අනුව බලන කල ශ්‍රි ලංකාවට ජෛවමිතික (Biometrix) සහිත ජාතික හැඳුනුම්පතක අවශ්‍යතාව මැනැවින් පැහැදිලිය.

සටහන
අනිල් ලසත් පෙරේරා
පන්නිපිටිය විශේෂ

අග්‍රාමාත්‍ය මහින්ද රාජපක්ෂ මහතාගේ දේශපාලන දිවියට අර්ධ ශතවර්ෂයක් සම්පූර්ණ වී තිබේ. වසර 50ක් යනු දීර්ඝ කාලයකි. එවකට ළාබාලතම මන්ත්‍රීවරයා ලෙස 1970දී ප්‍රථම වරට පාර්ලිමේන්තුවට එක් වන මහින්ද රාජපක්ෂ මහතා එතැන් සිට ගල් මුල් ප්‍රහාර මෙන්ම මල් වරුසා ද ඇතුළුව බොහෝ අත්දැකීම් තම දේශපාලන දිවියට එක් කරොගත්තේය. වසර 30ක කාලයක් පැවති යුද්ධය මුලිනුපුටා දමමින් ශ්‍රී ලංකාවේ භාරකාරයා වීමට ද එතුමාට හැකි විය. පනස් වසරක දේශපාලන දිවිය පිළිබඳ එතුමා පළ කළ අදහස් කිහිපයකි මේ.

1970 පාර්ලිමේන්තුවට පත් වුණු ළාබාලතම මන්ත්‍රීවරයා ලෙස ඉන් සතියකට පසු රාජාසන කතාවේ ස්තුති යෝජනාව ඉදිරිපත් කරන්න ඔබට අවස්ථාව ලැබෙනවා ?

ඒ අවස්ථාව ළාබාලතම මන්ත්‍රීවරයට දෙන්න ඕනෑ කියලා ඒ කාලෙ සම්ප්‍රදායක් තිබුණා. ඒ කාලෙ මම අවුරුදු විසිපහට ලබමින් හිටියේ. මොන්ටි ගොපල්ලව කියනවා මම ඉතින් හැමදාම තාත්තට ස්තුති කරනවනේ. වෙන කෙනෙක්ට දෙන්න කියලා. එහෙම තමයි ඒක මට ලැබෙන්නේ.

දේශපාලකයකුගේ ඉතිහාසය කියන්නේ ඒ රටේ දේශපාලනයේ එක් පැතිකඩක්. මේ වසර 50ක දේශපාලන ජීවිතයේ සංධිස්ථාන අතර 1977 සමඟි පෙරමුණ විශාල පරාජයකට පත්වීම ගැනත් පැහැදිලි මතකයක් ඇති?

ඔව්. මේ පරාජයට හේතු කිහිපයක්ම තිබුණා. 71දී ඇති වුණු සමාජ විප්ලවය ඒකෙන් ප්‍රධාන වුණා. මිනිස්සුන්ට ආණ්ඩු පෙරළන්න මෙන්ම ආණ්ඩු පිහිටුවන්න අවශ්‍ය වෙන්නේ බොහොම සුළු කාරණාවක්. දකුණ හා වම කියලා ආණ්ඩුව දෙකඩ වුණා. විශාල පරාජයක් අත් වෙන්න ඒකම හේතුවක් වුණා.

අනුර බණ්ඩාරනායක මහතා සහ ඔබ අතර තිබුණු මිත්‍රත්වය ගොඩනැඟෙන්නේ කොහොමද ?

අපි සම වයස්වල හිටියේ. තරුණ වයස නේ. හැමතැනම යනවා. අපිත් ඇවිදින්න කැමතියි. ඒක ඒ විදියට ආව යාළුකමක්. දේශපාලන වශයෙන් අපි පැති දෙකක හිටියේ. එයා යූ.එන්.පී. එකට යද්දි මට කිව්වේ එයා යනවා කියලා විතරයි. කවදාවත් මට එන්න කිව්වේ නෑ. මාවත් ගන්න කියලා යූ.එන්.පීයෙන් ඉල්ලීම් එද්දි “මහින්ද එන්නෙ නෑ, මගේ වචන නාස්තිකරගන්න බෑ” කියලා ඔහු පක්ෂයට කියලා තියෙනවා.

1977 පරාජයෙන් පසු එජාපය මේ රටේ ආර්ථික වශයෙන් විශාල පරිවර්තනයක් කරනවා. තරුණ දේශපාලනඥයකු විදියට ඒකට මුහුණ දෙන්නේ කොහොමද?

ඒ කාලේ ශ්‍රී ලංකා නිදහස් පක්ෂයේ නොයෙක් වෙනස්වීම් සිදුවුණා. අලුත් ව්‍යවස්ථාවක් ආවා. මැන්දිස් රෝහණදීර මහත්මයා ව්‍යවස්ථාව ලිව්වා. ඒ අනුව දිස්ත්‍රික්කවල ඡන්ද තිබුණා. ඒකෙන් තවත් බෙදෙන්න පටන් ගත්තා. අපි මහජනතාව අපිත් එක්ක සම්බන්ධීකරණය කරන වැඩපිළිවෙළ දිගටම කරගෙන ගියා. ආණ්ඩු විරෝධී වැඩපිළිවෙළ කරගෙන ගියා. 80 මහා වර්ජනයට දායක වුණා.

83 කළු ජූලියේ විශාල අත්දැකීම් තිබෙනවා නේද ?

ඒක යූ.එන්.පී. ආණ්ඩුවෙන් මෙහෙයවපු එකක්. අන්තිමට ජේ.වී.පී. කොමියුනිස්ට් සමසමාජ පක්ෂ තහනම් කරලා ඒ සාමාජිකයෝ අත්අඩංගුවට ගත්තා.

අතුරු මැතිවරණයේදී ඔබතුමා සිරගත වෙනවා?

අතුරු මැතිවරණයට චමල් රාජපක්ෂ මහත්මයා ඉල්ලුවේ. ජෝන් අමරතුංග 1000ක් විතර සෙනඟක් එක්ක හිටියා. මම ඒ අයව පහුකරලා ගිහින් වලස්මුල්ල පහුකරලා ටිකක් දුර තිබුණු අපේ කාර්යාලයේ හිටියා. අපි එතන ඉඳිද්දි ජෝන් අමරතුංගගේ කණ්ඩායම ආවා අපිට ගහන්න. මම බැහැලා අහසට වෙඩි තිබ්බා ආත්මාරක්ෂාවට. ඉන්පස්සේ මම කාරෙක අරගෙන යන්න ගියා. මම ගියාට පස්සේ තමයි ඔය සිදුවීම වුණේ. මාව සොයන්න පටන්ගත්තා. මම වෙඩි තිබ්බා කියලා. ගෙදර ගිහින් මම සිද්ධිය කිව්වා. මම වෑන් එකේ කොළපාට කොඩි ටිකක් ගහගෙන ආවේ. “අන්න අර මහින්දයා මිනීමරනවා, තමුසෙලා ඉක්මනට යනවා” කියලා පොලිසියෙන් වාහනේ නවත්තලා අපට කිව්වා. මට හිනහයි. ඒ කියන්නේ මම ගැන නෙවෙයි වගේ මමත් ඉතින් මාරුවෙලා ආවා. මට මතකයි මාව බලන්න ඇවිත් මැගසින් හිරගෙදරින් එළියට බහිද්දි තමයි අපේ අම්මා අසනීප වුණේ. මම හිරේ ඉඳිද්දි තමයි අම්මා අන්ත්‍රා වුණේ. වාසුලා ඇවිත් බොහොම සුළු වෙලාවකට මට ඇප දීලා මාව මරණයට එක්කගෙන ආවා.

වාසුදේව නානායක්කාර මහතා සහ ඔබතුමා ලංකාවේ මිනිස්සුන්ගේ මානව අයිතිවාසිකම් වෙනුවෙන් ජිනීවා යනවා. ඒක සිදුවුණේ කෙහොමද ?

අපිට ටිකට් එකක් දීලා කීවා ගියාම කෙනෙක් පිළිගනීවි. දවසක් ඉන්නත් ලැබෙයි, පාර හොයාගෙන මානව හිමිකම් කොමිසමට යන්න කියලා. හොඳ වෙලාවට අපිට ලංකාවේ කිහිපදෙනෙක් මුණගැහුණා. අපි ගත්තු උත්සාහය සඵල වුණා. අපි දෙවැනි පාර යද්දි තහනම් කළා. ඉස්සර මානව හිමිකම් කොමිෂන් සභාවේ හිටියේ සාමාජිකයෝ 15ක් වගේ පිරිසක්. මම ඒකට ගිහින් ඒ සියලු දෙනාටම සාක්කියේ පිටපත් දුන්නා. ඒ ලයිස්තුවල නම් තියන අය ගැන ආණ්ඩුවට වග උත්තර දෙන්න කිව්වා. ඒ වගේ ජාත්‍යන්තර බලපෑම් නිසා මේ භීෂණය යටපත් වුණා.

89දී පැවති මැතිවරණය තීරණාත්මක එකක්. ඔබතුමා නැවත පාර්ලිමේන්තු එනවා. ඉන්පසුව මොනවද සිදුවුණේ ?

ඒක සාධාරණ මැතිවරණයක් නෙවෙයි. මහජනතාව ඡන්ද දාන්න ආවේ මරණ බයෙන්. පළමුවැනියට ඡන්ද දාන්න ආව අයට වෙඩි තියනවා, අත් කපනවා කියලා තර්ජනය කළා. ඇත්තටම ඒවා කළා. සීයට 51ක ඡන්දයක් වැටුණේ ජනාධිපතිවරණයකට. ඒ කාලේ මැතිවරණ රැලි තිබුණේ නැති තරම්. තිබුණු ඒවටත් වෙඩි තිබ්බා. ඒ කාලේ මැතිවරණ කල් දාන්නේ ආණ්ඩු. දැන් විපක්ෂය තමයි මැතිවරණ කල්දාන්න උත්සාහ කරන්නේ.

1994 කියන්නේ මේ රටේ විශේෂ අවස්ථාවක්. ඔබ යළිත් බලයට පත් වෙනවා, ඒ වගේම ඔබේ පක්ෂයේම කෙනෙහෙලිකම්වලට ඔබ ලක් වෙනවා?

අවුරුදු 17කට පස්සේ ප්‍රථම වතාවට මම කම්කරු හා වෘත්තිය පුහුණු ඇමැති බවට පත් වෙනවා. සාමාන්‍යයෙන් කම්කරු ඇමතිකම දෙන්නේ වයසක අයට. මම ඒක ඉල්ලලා ගත්තු එකක් නෙවෙයි. එක අතකට මම සතුටු වුණා. මොකද මට වෘත්තිය සමිති, කම්කරු සංවිධාන එක්ක සම්බන්ධකම් තිබුණා. පාර්ලිමේන්තුවේ සම්මත කළ පළමුවැනි පනත තමයි වෘත්තිය පුහුණු අධිකාරිය වෙනුවෙන් ගෙනාව පනත. ජීවිතයට හැකියාවක්, හැකියාවට රැකියාවක් කියන එක තමයි මගේ සටන් පාඨය වු‍ණේ. ඒත් මට කම්කරු ඇමතිකම නැතිවෙනවා. ඒකට හේතුවක් තිබුණා. ලුණු ලේවාය පෞද්ගලීකරණය කරන්න හැදුවා. ඊටීඑෆ් එකේ සල්ලි දාලා මම ඒක ගත්තා. ඊළඟට වතු විකුණන්න හැදුවා. මම මතුරට වතුයාය ගත්තා. ඔය සාකච්ඡාවට ඇවිත් හිටපු හාම්පුතුන් කණ්ඩායමක් කිව්වා මෙහෙම කරන්න එපා කියලා. ඒත් මම ඒක ඇහුවේ නැහැ. ඒ වගේම කම්කරු ප්‍රඥප්තිය ගෙනාවා. ඒකට කැබිනට් එක දක්වා එන්න දුන්නේ නැහැ. ඒ වගේම මම හැමවෙලේම කම්කරුවගේ පැත්ත ගන්නවා ස්වාධීන නැහැ කියලා චෝදනාවක් තිබුණා.

ඒත් ඔබට පසුකාලීනව විපක්ෂ නායකකම ලැබෙනවා නේද?

මම විපක්ෂ නායකයා වෙද්දි මම හිටියේ සවුදිවල. පලස්තීන තානාපතිවරයා මට කිව්වා මෙහෙම පුරප්පාඩුවක් තියෙනවා එන්න කියලා. ඉන්පස්සේ මම ආවා. මන්ත්‍රීවරුන්ගේ සාකච්ඡා තිබුණා. බොහෝ අයගේ මතයක් තිබුණා රාජකීය විද්‍යාලයේ ආදි ශිෂ්‍යයකුට මේක දෙන්න ඕනෑ කියලා. එතකොට මං වෙනුවෙන් කතාකරන්න ලෑස්තිවෙලා හිටියේ දොඩංගොඩ ඇමතිතුමා සහ භාරත ලක්ෂ්මන් මහත්තයා. දෙන්නටම එදා නින්ද ගිහින්. සාකච්ඡාව වේලාසන පටන් අරන්. මම ගියාම මාව ඩිෆෙන්ඩ් කර ගත්තා. කොහොම හරි චන්ද්‍රිකා මට විපක්ෂ නායකකම දුන්නා. ඒක ගත්තා කියන්නේ අගමැතිකමත් එනවා කියන එකනේ.

2005 ජනාධිපතිවරයා වුණු පසු ඔබට දැනුණු බර කොහොමද?

රැස්වීමකට ගියත් මේ රටේ මිනිස්සු මගෙන් ඉල්ලුවේ යුද්ධය නවත්තලා දෙන්න කියපු එක මිසක් කන්න බොන්න දෙන්න, රස්සාවල් දෙන්න කියලා නෙවෙයි. ඒ හඬ තමයි රටේ හැමතැනම තිබුණේ. මොකද රටේ ඒ කාලෙ වෙද්දි දවස ගානේ ගම්වල සුදුකොඩි වැටෙනවා. හමුදාවට යන තරුණයෝ ආයෙ පණපිටින් ගම්වලට ආවේ නැහැ. ඒ වගේම උතුරේ තරුණයොත් මේකෙන් මැරුණා. මේක ඉවර කරන්න ඕන කියන දේ තමයි මම තෝරගත්තේ. ගෝඨාභය ඇවිත් ආපහු අමෙරිකාවට යනවා කියලා කියද්දි මම කිව්වා යන්න එපා, වැඩක් භාරදෙන්න තියෙනවා කියලා. මෙයා යයි කියන බයට ඊට පහුවෙනිදම මම ආරක්ෂක ලේකම්කම දීලා කිව්වා යුද්දෙට ලෑස්තිවෙන්න කියලා. මට මතකයි ඒ වෙලාවේ සෝමවංශ ඇතුළු ජනතා විමුක්ති පෙරමුණ මට උදව් කළා. ඔවුන් කිව්වෙම ගහන්න කියලා. ඒත් අපට භටයන්ට දෙන්න ඇඳුම් තිබුණේ නෑ, ඇතිවෙන්න භටයෝ හිටියේ නෑ. ඒ වෙලාවේ තමයි හමුදාවට බැඳෙන්න කියලා තරුණයන්ට ආරාධනා කළේ. යෝෂිතත් ඇවිත් ඇහුවා මම නේවි එකට බැඳෙන්නද කියලා. තරුණයන්ට එන්න කියලා මට එයාට බෑ කියන්න බෑ නේ. මගේ පුතා වගේම රට පුරාම පුත්තු හමුදාවට බැඳුණා.

යුද්ධය කරගෙන යද්දි අතිවිශාල බලපෑම්වලට යටත් වෙන්න සිදුවෙන්න ඇති?

ත්‍රස්තවාදීන් ලෝකයේ නොයෙක් රටවල ඡන්දදායකයන් වෙලා තිබුණා. ඒ නිසා සාමයෙන් කටයුතු කරන්න කියලා බොහෝ රටවල් අපිට කිව්වා. මට මතකයි සෝල්හයිම් ඇවිත් කිව්වා ජීනියස් කෙනෙක් එක්ක තමයි ඔබ සටන් කරන්න යන්නේ, ඒ නිසා ඔවුන් ඉල්ලන ඉල්ලීම් ටික දීලා සාමයට යන්න කියලා. ඉල්ලීම් දෙන්න කියද්දිම කියන්න හදන්නේ මොකක්ද කියලා මට තේරුණා. මම පැහැදිලිව කිව්වා මම මේක ඉවර කරලා තමයි පස්ස බලන්නේ කියලා. මේ වගේ සටනකදී ඉන්දියාවේ බලය තමන්ගේ පැත්තේ තියාගන්න ඕන. ඒ නිසා මම ඉන්දියාවට ගිහින් එයාලා කැමති කරවගත්තා. දකුණු ඉන්දියාවේ බලපෑම නිසා ඔවුන් ඒක ප්‍රසිද්ධියට පත් කරන්න එපා කියලා ඉල්ලුවා. චීනය, පාකිස්තානය, රුසියාව වගේ රටවල්වලින් වගේම පසුකාලීනව අමෙරිකාවේ සහායත් ලැබුණා. තාක්ෂණික තොරතුරු ලැබුණේ අමෙරිකාවෙන්. යුද්ධය ජයග්‍රහණයට අවශ්‍ය තොරතුරු වගේම ආයුධ ලැබුණා.

පසුකාලීනව යුද ජයග්‍රහණය නිසාම ජාත්‍යන්තර ගැටලු රැසකට මුහුණ දෙන්න සිදු වුණා නේද?

මානව අයිතිවාසිකම් ආයතන, එන්ජීඕ ආයතන එක්ක තමයි ඒ දේවල් වැඩිපුර සිදු වුණේ. ඒ වගේම ජීවිත තර්ජන පවා එල්ල වුණා. ඒ තර්ජනවලට මම යට වුණේ නැහැ. මං හිතන්නේ ඒ වෙලාවේ හිටිය එක්සත් ජාතීන්ගේ සංවිධානයේ මහලේකම්වරයා මට කතා කරලා කිව්වා ලංකාවට එන්න ඕනෑ කියලා. මේ යුද්දේ අවසාන අදියර ක්‍රියාත්මක වන වෙලාවේ මට ජෝර්දානයට යන්න ආරාධනාවක් තිබුණා. මම නොයන්න හිටියේ. ඒත් මෙතුමා එනවා කියපු නිසා ඔහු එන එක වළක්වගන්න මම කිව්වා “මම ජොර්දානයට යනවා; මම නැහැ” කියලා. “අගමැතිතුමා හිටියම මට ඇති” කියලා ඔහු කිව්වා. ඒත් මම කිව්වා “මම එනකම් ලංකාවට එන්න එපා” කියලා. මම එහේ ඉඳලා දුරකතනයෙන් ගෝඨාභය, හමුදාපති ඇතුළු සියලු දෙනා සමඟ සම්බන්ධ වුණා.

කොටි සංවිධානය එවකට ආරක්ෂක ලේකම් ගෝඨාභය රාජපක්ෂ මහත්මයට ප්‍රහාරයක් එල්ල කරද්දිවත් ඔබ පසුබැස්සේ නැද්ද?

නැහැ. මුලින්ම ප්‍රහාරයක් එල්ල වුණේ හමුදාපති සරත් ෆොන්සේකා මහත්මයට. හමුදාපතිවරයාගේ කඳවුරට ගිහින් ගැහුවේ. මම හිතන්නේ ඒ පාරෙන් කාටවත් යන්නවත් දෙන්නේ නෑ. ඒ තරම් ආරක්ෂාවක් තිබුණේ. ඊට පස්සේ ගෝඨාභයට ගැහුවේ. මට ඒ සද්දේ ඇහෙද්දිම කිව්වා කාටහරි බෝම්බයක් වැදුණා කියලා. මගේ ළඟ හිටිය කෙනෙක් කිව්වා නැහැ ඒ වෙන සද්දයක් කියලා. මම එළියට බැහැලා එද්දි ගෝඨාභය ඉස්සරහට එනවා. ලේ තිබුණා ඇඟේ. ඒත් තුවාල තිබුණේ නැහැ. ඒ වගේ සිද්ධිවලින් වුණේ යුද්ධය අවසන් කිරීම ඉක්මන් වුණ එක මිසක් බයක් ඇති වීම නෙවෙයි.

වසර 30ක් පුරා මුළු රටම බැටකෑව යුද්ධය අවසන් කරපු ඔබතුමාව 2015දි ගෙදර යවන්න ජනතාව තීරණය කරනවා. මේකට මුහුණ දුන්නේ කොහොමද?

ඒක ජනතාවගේ තීරණය. ප්‍රජාතන්ත්‍රවාදී ආණ්ඩු ක්‍රමයක ඉද්දි ජය පැරදුම දෙකටම මුහුණදෙන්න ඕනෑ. මට පැරදුම පුරුදුයි. වෙනස කොයි තරම්ද කිව්වොත් මගේ පොඩි පුතාට වතුර බෝතලයක් ඉල්ලුවම ජනාධිපති මන්දිරයෙන් කියලා තියෙනවා දැන් දෙන්න බෑ කියලා. වතුර බෝතලයක්වත් දෙන්න එපා කියලා කොහෙන්හරි නියෝගයක් ඇවිත් තිබුණා. මම 12, 01 වෙද්දි මැදමුලනට ගියා. යද්දි මැදමුලනේ අතිවිශාල සෙනඟක් මාව පිළිගන්න හිටියා. 2015දි කුමන්ත්‍රණයකට මුහුණ දෙන්න වුණා. මෛත්‍රීපාල සිරිසේන මහත්මයමයි මට ජනාධිපති අපේක්ෂකයා විදියට ඉදිරිපත්වෙන්න කියලා යෝජනා කළෙත්. රෑ අපි එක්ක රාත්‍රී ආහාරවේලටත් එකතු වෙලා ඉඳලා උදේ වෙද්දි එතුමා අනිත් පැත්තට ගිහින්.

2015 පරාජයට පත් වුණත් ඊට පහුවෙනිදා ඉඳලම තංගල්ලට සෙනඟ එන්න පටන් ගත්තා?

ඔව්. එතන ඉඳලා මාස ගානක් තංගල්ලට කාර්වලින් බස්වලින් සෙනඟ ආවා. කිලෝමීටරයක් දෙකක් පෝලිම තිබුණා. ඇවිත් තත්පර ගානකට ආයුබෝවන් කියලා යනවා. මට මතකයි විමල් ඇවිත් මට කියනවා අපි ආපහු සංවිධානය වෙන්න ඕනෑ කියලා. ඉන්පස්සේ මම වාසුගෙන් මේ ගැන ඇහුවා. දිනේෂ් ගුණවර්ධන, ලොකුගේ මහත්තයලා එක්ක මේ ගැන සාකච්ඡා කළා. ගීතාංජන ගුණවර්ධනගේ ගෙදරට එකතු වුණා. මහින්ද සුළඟ කියන රැල්ල නුගේගොඩින් පටන්ගනිමු කියලා එතනදි තීරණය කළා.

ඔබ පරාජයට පත් වූ වහාම දේශපාලන පළිගැනීම් ලෙස ඔබේ දරුවන් අත්අඩංගුවට පත් වෙනවා. මේ සිදුවීම්වලට ඔබ මුහුණ දුන්නේ කොයිවිදියටද?

ඉතින් එදා තිබුණු ආණ්ඩුවේ ප්‍රතිපත්තිය තමයි පළිගැනීම. ඒකනේ එයාලට අවුරුදු 05ක් තිස්සේ වැඩක් කරන්න බැරි වුණේ. මේ අපි කරපු දේ මේක කියලා පෙන්නන්න දෙයක් තිබුණේ නෑ නේ. මගෙන් විතරක් නෙවෙයි අපේ පවුලෙන්ම පළිගත්තා. අපේ ඇමති මණ්ඩලයෙන් පවා පළිගත්තා. විශේෂයෙන්ම කියන්න ඕනෑ මම පළිගන්නේ නැහැ. පාඨලී චම්පික රණවක හා රාජිත සේනාරත්න අත්අඩංගුවට ගැනීමට ආණ්ඩුවක් වශයෙන් අපි සම්බන්ධ වෙන්නේ නැහැ. අපිට ඊට වඩා වැඩ කරන්න තියෙනවා. පරණ ඒවට පළිගන්න කාලයක් නැහැ.

18 වැනි සංශෝධනය හා 2015 මැතිවරණය කලින් තියපු එක ගැන ඔබට චෝදනාවක් තියෙනවා?

සමහර තීන්දු නොගත්තනම් කියලා දැන් හිතෙනවා. ඒත් ඒ වෙලාවට ගන්න තියෙන හොඳම තීරණය තමයි අරන් තියෙන්නේ. 18 වැනි සංශෝධනය මම ජී.එල්. පීරිස් මැතිතුමාට තමයි දුන්නේ. කොහොමහරි තුන්වැනි වතාවටත් ඉන්න ඕනෑ කියලා බොහෝ අය කිව්වා. ඒත් මේ ආණ්ඩුව ඇවිත් ඒ සියලු අයිතිවාසිකම් නැති කළා. කලින් මැතිවරණය තියපු එක මගේ වරදක්. මන්ත්‍රීවරුන්ට ඔවුන්ගේ කාලය අවසන් වන තුරු ඉන්න දුන්නේ නෑ. ඒක අසාධාරණයක් කියලා මට දැන් හිතෙනවා. ජ්‍යෝතිෂය නිසා මේක කළේ කියලා මට චෝදනා කරනවා. දැන් මගේ දැඩි විශ්වාසයක් නැහැ ඒ ගැන. මොකද මම එකපාරක් බැට කෑවා. මට පරාජය පුදුමයක් වුණේ නැහැ. මම ජය පරාජය දෙකම හොඳට විඳලා තියෙනවා. මගේ දරුවොත් ඒ කටුක අත්දැකීම විඳපු එක ගැන මම පෞද්ගලිකව සන්තෝස වෙනවා. ඒත් රටකට විශාල හෙනයක් වුණා. මේ තරම් පළිගැනීම් කිසිම දේශපාලනඥයකුට එන්න නැතිව ඇති.

ඔබ ශ්‍රී ලංකා දේශපාලනයේ එක්තරා සලකුණක් බව විපක්ෂය පවා කියනවා. නවකයන්ට ඔබ ආදර්ශයට ගත හැකි වගේම ඔබ තරුණයකු ලෙස දේශපාලනයට එද්දි ආදර්ශයට ගත්තු දේශපාලනඥයන් කවුරුද?

විශේෂයෙන් එක්කෙනෙක් කියලා නැහැ. ඒත් අපිට බොහෝ අය ආශ්‍රය කරන්න ලැබුණා. විශේෂයෙන් මගේ තාත්තා හිටියා. එයාගේ ආභාසය ලැබුණා. ජේ.ආර්. ජයවර්ධන, ඩඩ්ලි සේනානායක, එන්.එම්. පෙරේරා, කොල්වින් ආර්. ද සිල්වා වගේ මහත්තුරු ආශ්‍රය කරන්න අවස්ථාව ලැබුණා. වාසුලා හිටියා. වාසු තරුණ වුණත් අපට ඔහුගේ අදහස් ගැන ගෞරවයක් තිබුණා.

විපක්ෂයේ සිටියදී පවා ඔබ සැලකෙන්නේ පත්තරකාරයාගේ මිතුරෙක් විදියට. ඒත් ඔබ බලයේ සිටින යුගයේ මාධ්‍යවේදීන්ට හිරිහැර වුණා කියන චෝදනාව නැගෙනවා?

අපි දැනුවත්ව ආණ්ඩුවෙන් මෙහෙම දෙයක් වුණේ නැහැ. ඒ කාලේ ඝාතන කිහිපයක් සිදු වුණා. අපි පරීක්ෂණ කළා. ලසන්ත මාව හමුවෙන්න රැට එනවා. මම යවන්නේ මගේ කාර් එකේ. එයාගේ ආරක්ෂාවට. රටේ මිනිස්සු දන්නවා කවුද ඒක කළේ කියලා. රනිල් වික්‍රමසිංහ මහත්මයා පාර්ලිමේන්තුවේ පවා කියනවා මේකට වගකියන්න ඕනෑ කවුද කියලා. රජයේ අවශ්‍යතාවකට නෙවෙයි මේක වුණේ.

මේ වසංගතය සමඟ අපට අභියෝගාත්මක තත්ත්වයකට මුහුණදෙන්න වෙලා තියෙනවා. ඉදිරියේදී රට ගොඩනඟන්න තියෙන සූදානම කොයි වගේද ?

අපට ශක්තිමත් ජනාධිපතිවරයෙක් ඉන්නවා. දැන් අපට ශක්තිමත් පාර්ලිමේන්තුවක් අවශ්‍යයි. පහුගිය ආණ්ඩුව ඡන්ද කල්දැම්මා. දැන් අවශ්‍ය වෙන්නේ හැකි ඉක්මනින් ඡන්දය තියන එක. දැන් ජනාධිපතිවරයගේ කාලයෙන් කොයිතරම් ගෙවිලද? අවුරුදු 05යිනේ එයාට තියෙන්නේ. ඒ නිසා ශක්තිමත් පාර්ලිමේන්තුවක් පිහිටුවලා ශක්තිමත් ආණ්ඩුවක් එක්ක ඉදිරියට යන්න තමයි අපි බලාපොරොත්තු වෙන්නේ. අධිවේගී මාර්ග නුවර සිට දඹුල්ල දක්වා සහ රත්නපුරයට අරන් යනවා. පාලම් ටික හදලා දෙනවා. මම සියලුදෙනාටම විදුලිය ලබා දුන්නා. ඒ වගේම බීමට සුදුසු ජලය නොමැති 7%ක් ජනතාව ඉන්නවා. සියලු දෙනාට ජලය ලබාදෙන්න වැඩපිළිවෙළක් සකස් කරනවා. ජනාධිපතිවරයා බොහොම පැහැදිලිව දූෂණ වංචා සිදුවීම් නොවීමට වගබලා ගන්නවා.

(මහින්ද රාජපක්ෂ මහතා සහ වාසුදේව නානායක්කාර මහතා සමඟ අයි.ටී.එන්. නාලිකාව මඟින් කරන ලද විශේෂ සංවාදයක් ඇසුරින් සකස් කරන ලද ලිපියකි.)

සටහන
නදී මාණික්කගේ