මෙවන් රටක ධනය හෝ බලය නොමැති නම් ජීවිතය ජයගැනීමට තිබෙන මුල් බැසගත් එකම යතුර වනුයේ අධ්‍යාපනයයි. එදා වේල සොයාගැනීමට නොහැකිව දුක්ඛිත ජීවිතයක් ගත කරන නිර්ධන පාන්තිකයන් ජයගැනීමට නම් සාර්ථකව අධ්‍යාපනය නැමැති නෞකාව තරණය කළ යුතුය. සෑම මව්පිය යුවළකගේ එකම ප්‍රාර්ථනය වනුයේ තම දරුවා අධ්‍යාපනය තුළින් ඉදිරියටම ගොස් සුරක්ෂිත කිරීමය. එසේ හෙයින් දෙමව්පියන් තම දරුවන්ගේ අධ්‍යාපනයට මුල්තැන දී තිබේ. 

 අපේ රටේ ප්‍රධාන වශයෙන් විභාග ත්‍රිත්වයක් දක්නට ලැබෙන අතර ඒවා මව්වරුන්ගේ විභාගය,  ගුරුවරුන්ගේ විභාගය, සිසුන්ගේ විභාගය යන අනවර්ථ  නාම මඟින් හඳුනාගත හැකිය. 

කොවිඩි  19 වසංගතය හේතුවෙන් රටේ දරුවන්ගේ අධ්‍යාපනය බිඳ වැටෙන්නට විය. ඒ සමගම මව්වරුන්ගේ විභාගය නමින් හඳුන්වන ශිෂ්‍යත්ව විභාගය සහ සිසුන්ගේ විභාගය නමින් හඳුන්වන උසස් පෙළ විභාගය ද  අප රටේ සිසුන් සඳහා පවතින අතිශය තරගකාරී විභාගයක් බව නොරහසකි. මෙම විභාගය ජය ගැනීමට හැකි වනුයේ අතලොස්සකට පමණක් වුවද ඔවුන්ගේ එකම අපේක්ෂාව වනුයේ ඒ සුළු පිරිසට එක් වී ජීවිතය ජය ගැනීමයි.

 එහෙත් විභාගය ලං වීමත් සමගම අපේ මනස නොසන්සුන් බවක් සෘණාත්මක සිතිවිලි ඇති වීමක් ආත්ම විශ්වාසය අඩු බව නුරුස්නා  ගතිය පෙන්නුම් කරයි.  එය මානසිකව ආතතියේ දී පෙන්නුම් කෙරෙන රෝග ලක්ෂණ වේ. 

විභාග ආතතිය විවිධ  සාධක නිසා ඇති විය හැක. තමන්ගේ හැකියාවන් අනෙක් අය සමග සංසන්දනය කරමින් අදාළ කාර්යන් කරගත නොහැකි වේ යැයි අනියත බියකින් විභාගයේ පවතින අධික තරගකාරී බවට මුහුණ දීමට නොහැකි වේද යන විභාගයට පෙර ඇතිවිය හැකි සෘණාත්මක සිතුවිලි විභාග ආතතිය ඇතිවීමට බලපාන ප්‍රධාන කරුණ වේ. ඉගෙන ගැනීමේ කාලය තුළදී විභාග ආතතිය සාමාන්‍ය කරැණකි. එහෙත් මේ නිසා අප හැමෝම පීඩා විඳිති 

විභාග කාලය තුළ අප අරමුණු කරා ළඟා වීමට බොහෝ වෙහෙස වේ. විභාග ආතතිය සම්පූර්ණයෙන් නැති කිරීම අපහසු වුවත් අප කළ යුත්තේ පවතින ආතති තත්වය තමන්ගේ ම යහපත සඳහා කළමනාකරණය කර ගැනීමයි . එසේ හෙයින් විභාගයට පෙර හොඳින් සූදානම්  විය යුතු අතර කාලසටහනකට අනුව වැඩ කළ යුතුයි. එමෙන්ම යහළුවන් හමුවී ප්‍රශ්න සාකච්ඡා කළ යුතුය.  විභාගයට ඇති බිය නැති කර ගත යුතුයි හෙයින් සැහැල්ලු මනසකින් නිස්කලංක පරිසරයක අධ්‍යාපන කටයුතුවල නිරත විය යුතුයි. සෑම මිනිත්තු පහළොවකට වරක් ගැඹුරු හුස්මක් ගෙන සැහැල්ලු විය යුතුයි. ධනාත්මක සිතිවිලි මනසට එක්කර ගන්න තමාට හැකි සෑම උත්සාහයක් ගන්නා බව මෙනෙහි කරන්න සෑම දිනකම සුළු වේලාවක් ශාරීරික අභ්‍යාසයක නිරත විය යුතු අතර විවේක ගැනීම ද ප්‍රමාණවත් නින්දක් ගැනීම ද අවශ්‍ය වේ ඒ අයුරින් විභාගයට පෙර අපේ මනස සැහැල්ලු කර ගත යුතුයි එවිට සැහැල්ලු මනසකින් යුක්තව විභාගයට මුහුණ දී සාර්ථක ප්‍රතිඵල ලද හැකිය

 දිනුෂා සඳරේණු

උපත සහ මරණය පොතක මුල හා පසු කවර මෙනි. කවර දෙක සැකසෙන්නේ අපට අවශ්‍ය ආකාරයට නොවේ. අප සිතන නිශ්චිත මොහොතක ද නොවේ. ජීවිතය නමැති මේ පොතේ මුල් පරිච්ඡේද කීපය කෙසේ වෙතත්, ඉදිරි පරිච්ඡේද සියල්ල අප විසින් ම ලිවිය යුතු වේ.

"සෙලවෙන ඇඟිල්ල ලියනු ඇත. එසේ ලියන දෑ සාගර දහසකින්, කඳුළු ගංගාවකින් වුව මකාලීමට අපහසු ය"එසේ සටහන් වී තිබුණේ ඕමාර් ඛයියාම්ගේ රුබයියාට් ග්‍රන්ථයේය. අප ජීවිත පොතේ ලියා ගන්නා ද එසේමය. ඒවා මකා ලීම කිසිසේත්ම කළ නොහැකිය. ඊයේ හෝ පෙරේදා හෝ නැතිනම් ඊට පෙර දවසක හෝ සිදු වූ දෑ වෙනස් කරගැනීමේ වුවමනාව අපට තදින්ම දැනෙන්නට පුළුවන. අතීතයේ එය එසේ නොවුවා නම් වර්තමානයේ මෙය මෙසේ නොවන බව හැඟෙන විට අපට පෙර දවසක සිද්ධීන් වෙනස් කළ හැකි නම් කොතරම් අගේදැයි හැඟේ. එහෙත් අතීතය වෙත ගොස් අතීතය වෙනස් කළ හැකි මන්තරයක් හෝ ක්‍රමයක් හෝ කිසිවෙකුත් නොදනී. නවීන විද්‍යාව තුළ පවා කාලය හරහා ගමන් කිරීම සිහිනයක්ව පවතී. එහෙයින් ම ජීවිතයට රිවස් නැත යන කියමන තවදුරටත් වලංගුව පවතී. බොහෝ දෙනා කටයුතු කරන්නේ ඒ බව මනාව වටහාගෙන නොවේ. පනින්න පෙර සිතා බලනු යන්න ප්‍රකට කියමනකි. සමහරු පැරණි හණමිටි අදහස් යැයි කියමින් එවන් උපදේශයන් පවා බැහැර කරති. පරණ වූ පමණින් සියල්ල ඉවත දැමීම නුවණැති ක්‍රියාවක් නොවේ. සමහර දේවල වටිනාකම වැඩිවන්නේ පරණ වන්න වන්නට ය.

කාලය සමග රේස් දුවන වර්තමානයේ අප සිත සිතා ඉන්නා විට වුව, අප පනින්නට සිතාගෙන සිටින තැනට වෙන කෙනෙකු පැන ගැනීම නිසා අපට තැන අහිමි විය හැකි යැයි කිසිවකු තර්ක කරන්නට පුළුවන. එම තර්කයේ සත්‍යයක් නැතුවා නොවේ. කාලය සමග රේස් එකේ යන විට කල්පනා කිරීමේ වේගයද වැඩි දියුණු කරගත යුත්තේ එබැවිනි.

කල්පනාව ද පුරුදු කරගත යුත්තකි. එයිනුත් යහපත් කල්පනාවක් ඇති කර ගැනීම විශේෂයෙන්ම පුහුණු කරගත යුතුවෙයි. ඊට ද හේතු තිබේ. ඔබේ ගෙමිදුල ගැන සිතන්න. වල් පැළෑටි වලින් එය ඉක්මනින්ම හැඩි වන්නේ ඔබ කිසිම උනන්දුවක් ගෙමිදුල ගැන නො දක්වන විට ය. එහෙත් අගනා මල් පැළයක් හෝ වෙනත් පැළයක් ගෙමිදුලේ සිටුවා වවා ගන්නට නම් ඔබට මහත් ආයාසයක් දරන්නට සිදුවෙයි. එයට කලට වේලාවට පොහොර හා ජලය ලබා දිය යුතුවේ. හිරු එළියට පැලය නිරවරණය කල යුතුය. වැඩි හිරු එළිය ඊට නොවැටෙන සේ ආවරණය කළ යුතුද වෙයි. අපේ සිත හා එහි ඇති වන යහපත් සිතිවිලි ගැන ද තත්ත්වය ඒ හා සමානය.

යහපත් සිතිවිලි ගැන කතා කරන විට යහපත් මිතුරන් ගැනද කතා කළ යුතුය. අද සමාජයේ යහපත් මිතුරෙකු සොයා ගැනීම කළුනික සොයා ගැනීමටත් වඩා අසීරු කාරියක කැයි සමහරු පවසති. එහෙත් ඔවුන් නොදන්නා තවත් කාරණයක් තිබේ. ඔබට යහපත් මිතුරකු හමුවන්නේ ඔබ යහපත් මිතුරකු වුව හොත් පමණි. බොහෝ අයගේ නිවාස වල දොරවල් මිතුරන් සඳහා විවෘත ය.

එසේ වුවත් "නිවෙසේ ඉදිරි දොරෙන් මෘගයෙකු ටද, පසුපස දොරෙන් අශ්වයෙකුට ද ඔබේ නිවසට පිවිසෙන්නට ඉඩ තබන්න එපා"යැයි ඉංග්‍රීසි කියමනක් තිබේ. අපි ඊට යමක් එකතු කරමු. කිසිම විටෙක අනුවණයෙකුට කිසිම දොරකින් හෝ ජනේලයකින් ඔබේ නිවෙස තුළට පිවිසෙන්නට ඉඩ තබන්න එපා.ඉහත දැක්වූ කරුණු ඔබට ඔබේ ජීවිතය නැමැති පොත රචනා කරන විට අවශ්‍ය වන බව නිසැකය. සමහරවිට ඔබ කෙතරම් උත්සාහ ගත්ත ද වෙනස් කළ නොහැකි වූ පරිච්ඡේද ද ජීවිතයේ තිබෙන්නට පුළුවන. ඒ ගැන කල්පනා කිරීමෙන්, සුසුම් හෙළීමෙන් ඵලක් නැත. වෙනස් කළ නොහැකි දෑ ද සමහර අවස්ථාවල දී ජීවිතයෙන් අපට හමුවේ.

දවස පුරා හොඳින් හිරු එළිය වැටෙනු ඇතැයි කාලගුණ විද්‍යා අනාවැකියක පැවසෙයි. එහෙත් ඔබ වේලාගනු පිණිස ඇඳුම් එළියට දැමූ විගස ඇද වැටෙන්නේ මහ වර්ෂාවකි. කොතරම් අවශ්‍ය වුවත් අපට කාලගුණය වෙනස් කරන්ට නුපුළුවන. ඒ ගැන කම්පා වීම ද පළකට නැත. එහෙත් වර්ෂාවේ සුන්දරත්වය අත් විඳිය හැකිනම් ඔබට කිසියම් මානසික සුවයක් දැනෙනු ඇත.

"පෙරළුණු පිට හොඳයි"කීමෙන් ද යහපතක් ළඟා කරගත හැකි මුත්, සෑම අවස්ථාවකම එලෙස ක්‍රියාත්මක වීම ද සුදුසු නැත.බොහෝ අයට ජීවිත පොත නිවැරදිව ලියා ගන්නට හරස් වන්නේ රූපවාහිනියයි. "රූපවාහිනී යන්ත්‍රය ආලින්දයේ යක්ෂයා ය."යනුවෙන් අමෙරිකානු මනෝවිද්‍යාඥ පෙපර් ෂ්වොට්ස් පැවසුවේ එම නිසා විය හැකිය. එය සමීපතමයන්ගේ ඇසුර හා කතාබහ සීමාකරයි. එය නිතරම ඔබ දෙස බලා සිට ඔබේ කටයුතු අවුල් කර දමයි. එනිසා රූපවාහිනිය නම් මෝඩයා ගෙ පෙට්ටිය විසිකර දමන්න ඔහු තවදුරටත් පවසයි.

එහෙත් අපි එසේ නො කියමු. මේ විසල් ලෝකය පුංචි ගම්මානයක් තරමට හකුළුවාලන්නට රූපවාහිනී යන්ත්‍රයෙන් සිදු වූ මෙහෙය අමතක කළයුතු නැත. රූපවාහිනියෙන් ගත යුතු දෑ ද, ඉවත හළ යුතු දෑ ද තිබේ. මෝඩයා ගේ පෙට්ටියට ස්විචයකුත්, ඔබට මොළයකුත් තිබෙන්නේ අන්න ඒ නිසාය. දැන් මොළය පාවිච්චි කරන්න.

 ස්වේතා සූරියබණ්ඩාර

"ඉස්කෝලෙ මහත්තයෝ, ඔය කැලැන්ඩරේ මට දෙනවයි"

"අර මක්කටෙයි"

"ගෙදෙට්ට. ගෙයි බිච්චියෙ ගහන්න"

"අර මක්කටෙයි. බිච්ච්යෙ තව ඉඩ ඇතෙයි"

"නැත්නං"

අපේ ගමේ හිටිය 'කැලැන්ඩර්'හිටිහැටියේ ම මගේ මතකයට ආවේ, අද උදේ ගේ අස්පස් කරන විටය. නගරයේ ගෙයකට කූඩු වී සිටින අපට ගේ දොර අස්පස් කරන්නට වෙලාවක් ලැබෙන්නේ කලාතුරකින් ලැබෙන අද වැනි නිවාඩු දවසකය. කැලැන්ඩරයේ රතු පාටින් ලකුණු කළ නිවාඩු දින කොපමණ තිබුණත් අපට නිවාඩුවක් ලැබෙන්නේ එහෙමත් දවසකය. අන්තිමටම ගේ කල එළි කළේ පසුගිය පෙබරවාරි මාසයේය. ඒ දුව ලොකු ළමයෙකු වූ දිනයේය. ගේ සායම් පිරියම් කොට පොඩි පහේ උත්සවයක් ගත්තා මිස ගේ පිළිවෙළකට අස්පස් වීමක් සිදු වූවේ නැත. සිදු වූයේ මගේ පොත් පත් සහ අනෙක් ලට්ට ලොට්ට එකතු කොට ඉඩ තියෙන කාමරයකට දමා සිරකිරීම යි.

ලට්ට ලොට්ට වැඩිදුර ඇත්තේ අල්මාරිය උඩය. ඕනම දෙයක් තබන්නට පහසුම තැන එතැනය. හදිසියට අතේ ඇති දේ, පස්සෙ අරන් තියනවා යැයි සිතා අල්මාරිය උඩට තල්ලු කොට අත සහ හිත නිදහස් කර ගත්ත ද පස්සෙ අරන් තිබිල්ලක් නැත. දූවිලි, මකුළු දැල් බැඳෙමින් ඒවායේ සදාකාලික නවාතැන වන්නේ අල්මාරියේ උඩ තට්ටුවය. ලයිට්, වතුර බිල්, පත්තර අතරින් මතු වී ආවේ පත්තර කොළයක ඔතන ලද කැලැන්ඩර් රෝලකි. එහි කැලැන්ඩර් දහයක් දොළහක් තරම් ප්‍රමාණයක් ඇති බව පෙනේ. බිරිය කැලැන්ඩර් රෝල ගෙනත් පසුව බලන්නට සිතා ගෙන පොත් අල්මාරිය උඩ තබන්නට ඇත. ඇයට ද කැලැන්ඩර් පිස්සුව තරමක් දුරට තිබුණාය. එහෙත් මා ඊට එතරම් කැමැත්තක් නැති බව දත් ඇය ක්‍රමයෙන් එය හකුළා ගත්තේය.

"හදිසියකට ඔය කොයිවත් ඕන වෙනවා"යැයි ඇගේ සාදාරණීයකරණය ප්‍රතිඵල නොදුන්නාම නොවේ. එහෙත් ලැයිස්තුගත කළ විට මෙතෙක් කිසිම දෙයකට අවශ්‍ය නොවුණු බඩු ප්‍රමාණය වැඩිය. පසුගිය අවුරුදු ගණනාවටම අවශ්‍ය නොවුණු දේවල් අනවශ්‍ය ම ගොඩට දමන්නට මම කිසි විටක නොපෙලෙමි. ඒවා ඉදිරියට ද අනවශ්‍ය වනු ඇත. ඒ මගේ තර්කයයි.

අසාධාරණය නම් මා විටින් විට ගෙනත් ගොඩ ගසන පත්තර, පත්තර පිටු, සඟරා ආදිය කිසිවිට මේ ලැයිස්තුවට ඇතුළත් නොවීමය.

බඩු ඔතාගෙන එන පත්තර පිටුවක වැදගත් දෙයක් වෙතොත් එය මගෙන් ගැලවී යන එක බොරුය.

බිරියට අවි අමෝරා ගෙන එන්නට එය හොඳ අවස්ථාවක් වන්නේ ය.

"මොනවද අනේ ඔයා කරන්නෙ. කරෝල ඔතපු පත්තර කොළයි, සීනි ඔතපු කොළයි ගෙයි අස්සෙ ගහ ගෙන ඉන්නෙ. අන්න කූඹි වහල."ඇත්තය. මම කරබාගෙන සිටිමි.

එහෙත් මෑතක දී පුතාගේ නිබන්ධනයකට අවශ්‍ය කරුණු ගොනු කොට ගත්තේ අර පත්තර කෑලිවලිනි.

"අන්න දැක්කද"මම බිරිය දෙස ආඩම්බරයෙන් බලමි. බිරිය පසු බසින්නට පටන් ගත්තෙ එතැන් පටන්ය.

කැලැන්ඩර් ජීවත් වුණේ තම මව සමඟ කුඩා නිවෙසකය. ඔහු අවිවාහක ය. ඔහුගේ රැකියාව වූයේ කුලී වැඩට. කුලී වැඩ කීවාට කර්මාන්ත කිහිපයක් ම ඔහුගේ දෑතට හුරුය. වඩු කර්මාන්තය, මේසන් කර්මාන්තය මෙන් ම පයිප්ප වැඩ, වෑල්ඩින් වැඩ, ටිංකරින් වැඩ, වයිරින් වැඩ, ගොවිතැන, වතුපිටි අලංකරණය ආදී බොහෝ දේ ඔහු ඉගෙන ගෙන ඇත්තේ තැන තැන ගොස් වැඩ කිරීමෙන්ය. ඔහුගේ එක් දුර්වල කමක් නිසා මේ හැකියාවන් වැඩිදියුණු කර ගැනීමට බාධාවක් වී ඇත. ඒ කම්මැළි කමය.

ගමේ කවුරු හෝ උදව්වක් ඉල්ලු විට ඔහු නොපැකිළිව එය කර දුන්නේ සත පහක් නොගෙනය.

"ඔහේගෙන් කොහොමෙයි මම සල්ලි ගන්නෙ. ඔන්න ඔහේ කහට ඩිංගිත්තක් දුන්නොත් මං බීල යන්නං"

කැලැන්ඩර් ඔහු උපයන මුදලින් මව රැක බලා ගෙන එදිනෙදා වියදම් කළ පසු ඉතිරි මුදල වියදම් කළේ ඔහුගේ විනොදාංශය වෙනුවෙන් ය. ඒ චිත්‍රපට බැලීමටත්, සරසවිය පුවත්පත හා චිත්‍ර කතා පත්තර ගැනීමටත්ය. ඔහු ටවුමේ චිත්‍රපට හෝල් තුනට හැම චිත්‍රපටියක් ම බැලුවේය. සරසවිය පත්තරේ හැම සතියකම නොවරවා ගත්තේය.

"මේක තියෙනවං මට නොකෑවත් කමක් නෑ"ඔහු පත්තරේ අතේ තියාගෙන කියයි. ඔහු පත්තරේ එනදාට උදේම ගොස් කඩේ ළග රැක ගෙන සිටියි.

ජනප්‍රිය චිත්‍රකතා පත්තර වන "සිත්තර", "මධුර", "සතුට"ඔහු නොකඩවා ගත්තේය. ඔහු සරත් මධු ගේ චිත්‍ර කතා ගැන මහ ඉහළින් කතා කළේය. "ඉතින් ඊට පස්සේ"සහ "යුනිකෝ"ඔහුගේ ප්‍රියතම කතා දෙකය. ජනවාරි මාසය ඔහු කැමතිම මාසයයි.

ඒ හැම පත්තරයකින්ම නොමිලේ කැලැන්ඩර් ලබා දෙන නිසයි. ඔහු කැලැන්ඩර් දෙන පත්තර සොය සොයා ගත්තේය.”

දන්ත දන්නා අයගෙන් ඔහු කැලැන්ඩර් ඉල්ලන්නේ ඊට අමතරව ය. ඔහුට 'කැලැන්ඩර්'යන නම රෙජිස්ටර් වන්නේ මේ නිසාය ඔහුට ලැබෙන කැලැන්ඩර් ඔහු ගෙදර කටුමැටි බිත්තිය පුරා අලවා ඇත; නැත්නම් ඇණ ගසා එල්ලා ඇත.

අපේ ගෙදර බිත්තියේ එල්ලා තිබූ නිළි රැජිනියන්ගේ කැලැන්ඩරය, අතුරුදහන් වී ඇති බව මුලින්ම දුටුවේ මාය. ඒත් ඒ බව එක වරම තාත්තාට කීමට මට නොසිතුණේ අපේ කැලැන්ඩරය අතුරුදහන් වීම හා කැලැන්ඩර් අතර සම්බන්ධයක් ඇති බව සිතුණු බැවිනි. මා පළමුවෙන්ම මේ ගැන කිව්වේ අම්මාටය. ඇය බිය වූයේ කැලැන්ඩරය නැති වීම ගැන දොස් අසන්නට වන්නේ ඇයට නිසාය.

"කොහෙද ! ගේ උස්සන් ගියත් කවුරුවත් දන්නෙ නෑ"යැයි තාත්ත කෑ ගසා දොස් පවරන්නේ සියලු දෙනාටමය.

"ගෙයි තියෙන වටින කියන දෙයක් නැති වුණත් ඔච්චර තමයි."

කිවෙකුට නොදී ආරක්ෂා කළ කැලැන්ඩරය දැන් ඔහුට නොවටිනා දෙයක් බවට පත් වී ඇත.

"එකත් එකටම කැලැන්ඩර් තමයි ඕක ගන්න ඇත්තෙ. කී දවසක් කැලැන්ඩරය ඉල්ලගෙන ආවද."

තාත්‍තා සියල්ල තීන්දු කර කැලැන්ඩර් විත්ති කූඩුවට නග්ගා ඉවරය. තාත්තා නැති අතරේ අම්මාට වැඩක් පලක් කර දී කැලැන්ඩරය ඉල්ලන්නට ඇති.

"අනේ හාමිනේ ඔන්න ඔය කැලැන්ඩරේ දෙන්න."

අම්මා දුන් බව නොකියන පොරොන්දුව පිට කැලැන්ඩරය ඔහුට දෙන්නට ඇති. තෝරා බේරා ගෙන ගොඩ ගැසූ ලට්ට ලොට්ට ගොඩට කැලැන්ඩර් රෝලද මා එක් කළේ කැලැන්ඩර් ගැන මතකය ද සමඟය.

 සුප්‍රි සමරසිංහ

සලෙළ සිත

පිපාසයට මගෙ ඔබේ දෙනෙත් සැලු කඳුළු

නදී තෙරේ හිඳ සැනසුණි මා සිත සලෙළු

හඬා වැටේ ඉවසනු නොහැකිව හද තැළුණු

කෙසේ ලබන්නෙද ඔබෙ සෙනෙහස යළි බිඳුණු

අමිල තෙපුල පිරි කමල සදිසි මුව ගොළුවී

නිමල පෙමක පිදු කුසුම අපුල ලොව තනිවී

ගෙතුළ සුවඳ පිළි පවන වැදී ගොස් විසිරී

ගතම දවයි නිති පවිටු මතක ගිනි ඇවිලී

පුදා අගිල් දුම් උදේ හවා සැම දෙවොලේ

සදා යදින්නෙමි ඔබේ සිතට සුව සහනේ

පතා ඔබෙ ම අත සැම භවයෙදි මතු සසරේ

දමා ඉසුරු යස යමි වන ගැබකට රහසේ

සිරිල් හේරත්

පහළ කරන්නාගොඩ

බිම් තඹරුවක්

ගිනි ගහන මද්දහනෙ

ඉපදිලා

මූදු හුළඟට අත වනන

නුඹ

හමු වුණා මට

හවසක

වැටකෙයා වදුල ළඟ....

දෑස් නොසෙල්වන්

මක් කරන්නෙද නුඹ

ඇසුවෙමි

හිත කකාරන පැනය.....

හෝ හඬ තලන

මහ මුහුද

ඇගෙ ප්‍රථම ප්‍රේමයලු

කීවා හෙමිහිට

තාමත් මඟ බලනවලු

ඇගෙ හිනාවයි

කීවේ එහෙම.....

ඇයත් හරියට

උඹ වගේමයි

කෑ ගහලා කීවේ

යටි හිත...

සයූරී ධනංජනී.

කැලණිය විශ්වවිද්‍යාලය

ප්‍රේමය නම්

නිවෙන පැතුමක නිමල හදවත

දැවෙන පෙමකට උරුම නැතී...

ලද පෙමට තම උරුම ලද්දෝ

පැතුම් ගොනු මැද නතර වෙතී...

හදක ප්‍රේමය නිදන් වූ විට

හඬා වැලපෙයි මලක පෙතී...

නොලද පෙම ගැන විරහවේ සිත්

ලියා කවි ගී නිහඬ වෙතී...

දේශානි ආරච්චිගේ

ඇය

සෙනෙහසින් මුල පිරූ දිවියක

බිලිඳියක් වී ඉපිද මේ ලොව

දියණියක් වී දෙමව්පිය ළඟ

ලබා සෙනෙහස මහ මෙරක් උසකට

ගැහැනියක් වී පතිව්‍රතා රැක

වේදනා විඳ මවක් වී ලොව

මවා සෙනෙහස දරු කැලක් රැක

වියපත් වූ ඇය ගැහැනිය නම් විය.......

ඩිලේශා දිල්රුක්ෂි

යශෝරාවිය

අසා සිටියෙ ද රැයක තනිකම

දෙනෙත අග හඬනා

යශෝරාවිය කොහි ද සැඟවී

මහද අද හඬවා

ආයේ එන්නෙ ද මගේ තුරුලට

දෙතොලතර මදහස හොවා

කෞෂල්‍යයා ගුණසිංහ

කැළණිය විශ්වවිද්‍යාලය

දුවේ ඔය ප්‍රේමය නොවේ

බුදු පහන නිවිලා ගොම්මනයි දැන්

රෑ රෑහැයි හඬනවා රැයේ

කුස්සියේ දුම් සුවඳ අද නෑ

අම්මා පිල ළඟ කණ්ඩියේ

නුහුරු නුපුරුදු කතාවක් දිග

මුදුන් වහලට බර දැනේ

කඩදාසියක මෘදු කඳුළු අමුනා

දුවේ නුඹ කොහිවද ගියේ...

අශ්වයෙකු පිට කුමරු එනකං

මග බැලු පොඩි සංදියේ

නින්ද යනකම් අම්මා කියවපු

කථාවක් නොව ජීවිතේ

උඹේ ඔය සිත මුලා කරලා

ආවේ කුමරෙකු නම් නොවේ

උඹට තේරෙයි කලක් යනකොට

අපි කිව්වේ බොරු නෙමේයි...

අම්මා දැන් පෝයටත් කලියෙන්

සිල් ගන්ට හදනවා පංසලේ

වඳිනවා නොව ඇය හඬනවා ඇති

දුක.. කිය කියා පිලිමෙට ඇගේ

ගිලං වු සිත බුදු බණටවත්

නිවි සැනසෙනවා නම් ඇති

පියෙන්නට ඇස් ඇවිත් පලයං

අපිට උඹ හිටියොත් ඇති

නිශාන්ත දසනායක

හෙමිහිට එන්න නුඹ

හිරු බැස යන හැන්දෑවක..

වැව රවුමේ ඇවිද යන්න...

මාලිගාව පේන දුරින්

දොහොත් මුදුන් එක් කරන්න...

වලා බැම්ම ළඟ

අත්පටලන් තනිවෙන්න

මඟ බලනවා මං

නුඹ එනතුරු තවම...

ආගන්තුක වුවත් අපි

කන්ද උඩරටට

වැව රවුමට නම් අපි

ආගන්තුක නොවේවි කිසිදාක ...

වැව රවුමේ අත් අල්ලන්

පිය මනින්න...

හදිසියක් නෑ එන්න නුඹ හෙමිහිට...

මඟ බලනවා මං

ආදරේ හිත පුරෝගෙන...

ලක්මාලි රණසිංහ

කැලණිය විශ්ව විද්‍යාලය

කැඩපත

බිරිය සැමියාව හරිහැටි

නොදකී නම්

ළමයින් ද කිසිදා පියාව හරිහැටි

නොදකිනු ඇත

මක් නිසාද යත්

මව යනු ළමුන්ට පියාව පෙනෙන

කැඩපත බැවිනි

සංජීව පෙත්තාවඩු

මැණික

නුඹේ තුරුල කවියක්

තවමත් රැඳුනු දෙතොලතර

නෑර එක දවසක්,

නුඹේ මතක සුසුමක්

හැම රෑක හෙලන නිමාවක් නැති

වේදනා කන්දක්,

නුඹේ දෑස ඔසුවක්

කැඩෙන හිත බිඳෙන හද පුරුද්දන

හැඟුම් පොදි යායක්,

පිච්චෙනවා මං තාමත්

නුඹ අවුලාපු ගින්නෙ හැමදාමත්,

මැණික උඹ ගියේ ඇයි,

නැති කරලා මට මාවත්...

චතූ ගුණසිංහ

නැඟෙනහිර විශ්වවිද්‍යාලය

කොරෝනා ව්‍යසනය හේතුවෙන් ගේ ගෙම්බන් වී නිවසටම කොටු වී සිටින විශ්වවිද්‍යාල විද්‍යාර්ථීන්ගේ විශ්වවිද්‍යාල අධ්‍යාපනය ද යාන්ත්‍රික වී තිබීම ශෝකයට කරුණකි. නමුත් එහි කිසිදු අරුමයක් නොවේ. මන්ද බොහෝ විශ්වවිද්‍යාල විද්‍යාර්ථීන් ද යන්ත්‍ර බවට පත් වී යාන්ත්‍රීකරණය වී ඇති හෙයිනි.

තරඟකාරීත්වය නමැති මඩ ගොහොරුවේ හැදී වැඩෙන ශිෂ්‍යයා නිරන්තරයෙන් කෙනෙක් අභිබවා තමා උසස් තත්ත්වයට පත් වීමේ මානසිකත්වයෙන් පෙලෙයි. කුඩා කල සිටම ශිෂ්‍යත්වය, සාමාන්‍ය පෙළ, උසස් පෙළ ආදී තරඟ විභාග සඳහා හැල්මේ දුවමින් දවස ගත කළ ශිෂ්‍යයා තුළින් සහජීවනය, සහයෝගීතාව ක්‍රම ක්‍රමයෙන් ගිලිහී යයි. එවන් ශිෂ්‍යයන් විශ්වවිද්‍යාලයට පැමිණි කල සටහන් කටපාඩම් කරමින් ආත්මාර්ථකාමීත්වයෙන් අනෙකා අභිබවා තමා ඉදිරියට යෑමට වෙහෙසෙනු මිස සහයෝගය, පරාර්ථකාමීත්වය ඔවුන් තුළ විරලය. වැලිවිටියේ ශ්‍රී සෝරත නාහිමියන් විශ්ව විද්‍යාල ශිෂ්‍යා පිළිබඳ මෙසේ අදහසක් පළකර තිබේ.

“විශ්වවිද්‍යාලයේ ශිෂ්‍යයන් විනෝද විය යුතුය, විවේචනශීලී විය යුතුය, ගවේෂී විය යුතුය. එහෙත් ඒ හැම තැනම සත්‍යගරුක විය යුතුය, යුක්තිගරුක විය යුතුය, බුද්ධිමත් විය යුතුය, ශිෂ්ට විය යුතුය, සභ්‍ය විය යුතුය, සීමාන්තික විය යුතුය.”

වර්තමානයේ මෙවන් විද්‍යාර්ථීන් සොයා ගැනීමට අසීරුය. විනෝද වීම තබා යම් කටයුත්තකට සහයෝගය දැක්වීම, සාමූහිකව කටයුතු කිරීම දැකගත නොහැකිය. අනුන්ගේ සටහනක් මිලට ගෙන හෝ කටපාඩම් කර විභාග සමත් කර තමා ඉදිරියට යාමේ සංස්කෘතියක් විශ්වවිද්‍යාල තුළ ද ගොඩනැගී පවතී. මේ නිසාම දේශනවලට සහභාගී නොවී ද සටහන් ඇනවුම් කර ගෙන්වා ගනිමින් ඒවා කටපාඩම් කරමින් විභාග සඳහා පෙනී සිටිය හැකි යැයි මතයකින් ඇතැම් විද්‍යාර්ථීහු පෙලෙති.

අප රටේ ශිෂ්‍ය ප්‍රජාවේ බුද්ධිමත්ම ශිෂ්‍ය ප්‍රජාව විශ්වවිද්‍යාල විද්‍යාර්ථීන් යැයි අවිවාදිත ය. එම විශ්වවිද්‍යාල විද්‍යාර්ථීන් විචාරශීලීය යනුවෙන් පිළිගැනෙති. ඔවුන් සියල්ල විමසුමට ලක් කරන බවට මතයකි. නමුත් වර්තමානයේ එවන් විද්‍යාර්ථීන් ඇත්තේ අතලොස්සකි. දෙන ලද සටහනක් කටපාඩම් කර විභාග සඳහා හැල්මේ දුවන විද්‍යාර්ථීන් මිස යම් ගැටළුවක්, අදහසක් විචාරශීලීව ගවේෂණය කරන විද්‍යාර්ථීන් දක්නට නොමැති තරම්ය. විශ්වවිද්‍යාලය මඟින් පවත්වනු ලබන රසවින්දන වැඩසටහනක් පවා ප්‍රතික්ෂේප කරමින්, ඒවාට සහභාගී නොවී පාඩම් කරමින් විභාග සඳහා පමණක් වෙහෙසෙන විද්‍යාර්ථීන් විශ්වවිද්‍යාලය තුළ ද බහුලය. තමාට නිර්දේශිත චිත්‍රපටයක්, නවකතාවක්, කෙටිකතාවක් පමණක්ම රස විඳින තත්ත්වයට විශ්වවිද්‍යාල විද්‍යාර්ථීන්ද පත්ව තිබේ. ඇතැම් විට එසේ නිර්දේශිත චිත්‍රපටයක් පවා නියමාකාරයෙන් රස විඳීමකින් තොරව එය නරඹන අතරතුර පවා අවශ්‍ය සටහන් ලියන තරමට විශ්වවිද්‍යාල දරුවාද රසවින්දනයෙන් ඈත් ව තිබේ.

අතීත විශ්වවිද්‍යාල විද්‍යාර්ථීහු තමන් කුමන විෂය ධාරාවක් හැදෑරුවද කුමන පීඨයකට අයත් වුවද රසවින්දනය අත් නොහැරියෝ ය. වර්තමානයේ ශාස්ත්‍ර පීඨයේ විද්‍යාර්ථීන් පවා තමා හදාරන්නේ සාහිත්‍ය විෂයයන් නොවන්නේ නම් රස වින්දන වැඩසටහන්වලට සහභාගී නොවන තත්ත්වයට පත්ව ඇත.

එසේම විචාරශීලී, බුද්ධිමත් යැයි කියාගන්නා විශ්වවිද්‍යාල විද්‍යාර්ථීන් පවා නව මාධ්‍ය භීෂණයට හසුව තිබීම ඛේදයකි. විශ්වවිද්‍යාලයේ දී හෝ යන එන මගතොටේ දී නිරන්තරයෙන් ඡායාරූප ලබාගනිමින් ඒවා නව මාධ්‍ය ඔස්සේ පළකරන විද්‍යාර්ථීන් සිය ප්‍රතිරූපය ගොඩනැගීමට දරන උත්සාහය විශ්වවිද්‍යාලයේ සාමූහික කටයුත්තකදී දක්නට නොලැබේ. ඇතැම් විට විශ්වවිද්‍යාල නේවාසිකාගාරයෙන් ආරම්භ කරන දවසේ දින චර්යාව පවා ඡායාරූප මඟින් පළ කිරීමට තරම් ඇතැම් විද්‍යාර්ථීන් බොළඳ ය. සමාජ මාධ්‍ය තුළ මිතුරන් බොහෝ ඇතත් ඇතැම් විද්‍යාර්ථීහු විශ්වවිද්‍යාලය තුළ සිය සහෝදර සහෝදරියන් නොහඳුනති. ඔවුන් සමඟ සහයෝගයෙන් කටයුතු කිරීමට නොදනී. පාසලක මෙන් ප්‍රේමයට බාධාවන් විශ්වවිද්‍යාලය තුළ නොපවතී. මේ නිසාම දක්නට ඇත්තේ නිදහස විඳින ඇතැම් විශ්වවිද්‍යාල විද්‍යාර්ථීන් පවා සමාජ මාධ්‍ය තුළ නිතිපතා සිය පෙම්වතා හෝ පෙම්වතිය සමඟ ඡායාරූප පළකරමින් සිහින ලෝකවල කල් ගෙවන බවය. ඇතැම් ඡායාරූප තුළ විශ්වවිද්‍යාල විද්‍යාර්ථීන් සතුව පැවතිය යුතු විනයගරුක බව විරලය. එහිදී විශ්වවිද්‍යාල තුළින් බිහිවිය යුතු යැයි වැලිවිටියේ ශ්‍රී සෝරත නා හිමියන් පැවසූ ශිෂ්ට විය යුතු, සභ්‍ය විය යුතු, සීමාන්තික විය යුතු ශිෂ්‍යයා දක්නට නොවේ.

මෙවන් විශ්වවිද්‍යාල විද්‍යාර්ථීන් අනාගතයේ රැකියා ලෝකයට පිවිසුණු කල ආත්මාර්ථය පෙරටු කරගනිමින් තමන් ඉහළට යෑමට වෙහෙසෙනු මිස සුළු සේවකයා සමඟ පවා සහයෝගයෙන්, සහජීවනයෙන් කටයුතු කරනු ලබන ස්වභාවයක් දක්නට නොවේ. එවිට සමස්ත ආයතනයක්, රටක් වශයෙන් කටයුතු කිරීම අපහසු වේ. සිහින ලෝකයෙන් මහ පොළවට බට කළ ඔවුන්ට මහ පොළව මත ඇවිද යාමට අසීරු වේ. එබැවින් හදවත සුපෝෂණය නොවූ පරාර්ථය නොහඳුනන ඇවිදින රොබෝවරුන් විශ්ව විද්‍යාල තුලින් බිහි විය යුතු නැත. දැනුමින් ආඩ්‍ය වූ එහෙත් බුද්ධියෙන් සන්නද්ධ නොවූ විද්‍යාර්ථීන් විශ්වවිද්‍යාලයෙන් පිටවීම විශ්වවිද්‍යාල අධ්‍යාපනයේ පරමාර්ථය නොවේ.

 තරණි උපේක්ෂා

පළමු වසර

මානව ශාස්ත්‍ර හා සමාජයීය විද්‍යාපීඨය

ශ්‍රී ජයවර්ධනපුර විශ්වවිද්‍යාලය

ඔක්තෝබර් 31

අද මාසයක අන්තිම දවස. කියන්න තරම් විශේෂත්වයක් නැතිවුනත් දැනෙන්න දෙයක් වුණ මාසයක්. ඒක තමයි ලංකාවෙන් සදහටම තුරන් වෙලා ගියාය කියපු covid වසංගතය ආයෙමත් ලංකාව පුරා පැතිරෙන්න පටන් ගත්තේ මේ මාසෙ. සරලවම කියනවනම් ලංකාව යන්තමින් පණ ගහගෙන ආවා විතරයි ආයෙමත් ඒකට බාධාවක්. බලමු ඉදිරිය මොනවගේ වෙයිද කියලා

නොවැම්බර් 01

ගෙදරින් බර බරේ එළියට නම් බහින්න එපා කියලා. අම්මලා කියන්නෙත් මාර කතාවක් තමයි . කතාව මාර උනාට ඒකෙත් ඉතින් ඇත්තක් තියෙනවා කියලත් හිතෙන්නේ දවසේ අවසානයට covid රිසාල්ට් එක අහනකොට. ලේසි නෑ. වැඩේ . හම්බෙන හැමෝම, කෝල් කරන හැමෝම කියන්නෙත් ඒ කතාව

නොචැම්බර් 02

අද උදේ ඉඳලා දවල් වෙනකන් ඇඳ උඩමයි. ඇඳ ගාව ගැවසෙන මායිමේ තිබ්බ කොළයක්, පෑනක් අරගෙන ලිව්වා නිසදැසක්. ඉස්සෙල්ලාම ලිව්ව එක ටිකක් හිතට මදි වගේ. ඒක හින්දා ඒක වෙනස් කරලා කවියක් ලිව්වා. ඒත් අන්තිමට ඒක එහෙට මෙහෙට කරලා පේලි දෙක තුනක් ලියලා දැම්ම facebook. ඉස්සෙල්ලාම ප්‍රතිචාරය පරණ පෙම්වතීගෙන්. හැබැයි inbox

"මේ හලෝ... අණබෙර ගහලා ප්‍රසිද්ධියේ ප්‍රශ්ණ එලියට දාාලා පිස්සෙක් වෙන්න එපා"

මොනව වුණත් ඉතින් පරණ පෙම්වතී නේ

නොවැම්බර් 03

හෝටල් වල බෝඩ් ගහලා තිබ්බට Today special කියලා අද මට no special .අහසත් වහින්න ඔන්න මෙන්න වගේ බුම්මගෙන. මටත් අද කිසි ෆිට් එකක් නෑ.

නොචැම්බර් 04

දන්න කියන හැමෝම වගේ කතා කරන්න පටන් ගත්තේ ඇමරිකාවේ ජනාධිපතිවරණය ගැන. හුඟක් අය කිව්වේ ට්‍රම්ප් පරාද වෙයි කියලා. ඒත් ඉතිං මට පොඩ්ඩක් මෙහෙම හිතුනා ඇමරිකාවට ට්‍රම්ප් හොඳ නැති වුණාට අපිට නම් ලොකුවට කේස් දාන්න ආවේ නෑ. මොකද ඇමරිකාව කියන්නේ හැමදාමත් අනුන්ගේ රටවල් වලට ඇඟිලි ගහන රටක්නෙ. ඒත් මිනිහගෙ කාලේ මට මතක විදියට එහෙම දෙයක් වුණේ නෑ. ඒ කොහොම හරි කමක් නෑ බලමුකෝ ට්‍රම්ප් ට මොනව වෙයිද කියලා.

නොවැම්බර් 5

Covid වසංගතය නිසා බස්නාහිර පළාතට දාපු ඇඳිරි නීතිය තවමත් එහෙමමයි. ඒක අයින් කරනවා කියලා කියන්නේ ලබන සදුදා. කොහොම වුණත් මේ පාර රට lockdown කරන්නෙ නෑ කියලා ජනාධිපතිතුමා කිව්වා. ඒකට එක හේතුවක් විදියට සඳහන් කරේ ආණ්ඩුවේ රාජකාරි කරන මිනිසුන්ට වැටුප් ලැබුණත් එදිනෙදා වැටුප් ලබන තමන්ගේ ජීවිකාව කරගෙන ආදායමක් හොයන මිනිස්සු අසරණ වෙනවා කියලයි. මේ අතරෙම ආර්ථිකය ගැනත් කිව්වා.

නොවැම්බර් 6

අද පත්තරේ අතට ගත්තම තමයි දැනගත්තේ ඊයේ covid වසංගතයේ රිසාල්ට් එක. ඊයේ දවසේ තමයි දෙවැනි වරට ලංකාවේ මේ වසංගතය පැතිරුණා ම ක දිනකට මිය ගිය වැඩිම සංඛ්‍යාවක් මිය ගිහිල්ලා තියෙන්නෙ. පස්දෙනෙක්. ඒ වගේම එක දවසකට වැඩිම දෙනෙක් සුව වෙලා තියෙන්නෙත් ඊයෙ. මේ වෙනකන් අද දවසේ කිසිම දෙයක් සම්බන්ධයෙන් ලොකු තොරතුරක් නෑ මොකද අපි තාමත් ගෙදර

දිදුල ශාමන්ත

ලිංගිකත්වයෙන් තොරව මානව සමාජය එකුදු අඩියක්වත් ඉස්සරහට තියන්නේ නෑ. ආගම, සදාචාරය, සංස්කෘතිය මේ සියල්ල උපකුලකයන් බවට පත් කරමින් එයට බලපෑම් කරන ප්‍රධානම කුලකය තමයි දේශපාලනය. මේ මොහොතේ ක්‍රියාත්මක වෙන දේශපාලනය තමයි ඒ මොහොතේ දෙදෙනෙක් අතර ඇතිවෙන ඒ මානසික තත්ත්වය පවා තීරණය කරන්නේ.

පෙරදිග අපේ කලාපයේ ලිංගිකත්වය කියන්නේ අතිශය රහසිගත දෙයක්. යුරෝපියානු කලාපයේ ලිංගිකත්වය නිදහස්ව නිදහස්ව කතාබහ කරනකොට අපේ කලාපයේ ලිංගිකත්වය තව දුරටත් කතාබහ කිරීම නැවත දමනවා. පුදුමය උපදවන කාරණය නම් මීට පරම්පරා ගණනාවකට පෙර ඉතාම නිදහස්ව තිබුනු ලිංගිකත්වය මේ මොහොත වෙනකොට අතිශය පසුගාමි ලෙසින් හැකිළීගන යෑම.

මේ සියල්ල එකතුවෙන් නිර්මාණය කරපු දිළිඳු ලිංගික සාක්ෂරතාවය විසින් ජන සමාජය පුපුරා හරිමිනුයි මේ මොහත ගෙවිලා යන්නේ. ස්ත්‍රියට , දරුවනට සිදුවන ලිංගික හිංසාව, අසහනය මඟින් සමාජය රෝගී බවට පත්කොට අවසන්. රමණය මිහිරි සිතුවිල්ලක සිට වේදනාවක් බවට වෙනස් වී අවසානයි.

අළු යට ගිනි කඳු පුපුරවා දමන එක් කාරණක් තමයි HIV Aids. ඒඩ්ස් වාහයෙකු යනු මුලුමහත් සමාජයෙන්ම පිටමං කරන බරපතළ අපරාධකාරයෙක්. ඒඩ්ස් වාහයෙකු පමණක් නොව ඔවුන්ගේ පවුල් පවා කුරුසයේ දමා ඇණ ගසා හමාරයි. ලෝකයේ ඒඩ්ස් බහුලම කලාපය තමයි නැගෙනහිර අප්‍රිකානු කලාපය. ඒකට මූලිකම හේතුව තමයි ඒ කලාපය පෙළෙන ආර්ථික සමාජීය දිළිදු බව. ඉන් පස්සේ ලෝකයේ ඒඩ්ස් රෝගීන් බහුලම කලාපය අසල්වැසි ඉංදියානු භූමී කලාපය. ඉංදියාව ඇතුලු ආසියානු කලාපය පුරාම වෙළිලා ගැටගැහිලා තියන පසුගාමි සමාජ දේශපාලන මොහොතවල් තමයි මිනිස් සමාජය එතනට තල්ලු කරලා තියෙන්නේ. ඒඩ්ස් ගැන දේශපාලන ඛේදවාචකය තමයි ඊලඟ කාරණය. සියල්ල මුදල් මත තීරණය වෙන සමාජ ක්‍රමයක ඒඩ්ස් කියන්නේ විශාල ආයෝජනයක්. ඒ නිසා ලාබය හොයන ක්‍රමවේදයකයට ඒඩ්ස් තුරන්කරලා දාන්න උවමනාවක් පැන නඟින්නේ නෑ.

ප්‍රියදර්ශන් කියන මැජික් කාරයාගේ sila samayangalil කියන්නේ අති විශිෂ්ට නිර්මාණයක්. Sila Samayangalil දේශපාලන විවරණයක්. මනෝ විශ්ලේෂණයක්. තමාට ඒඩ්ස් වැළඳී ඇතැයි සැක කරන පුද්ගලයන් හත් දෙනෙක් තමන්ගේ රුධිර වාර්තාව එනකන් ගෙවා දමන කාලය ඇතුලේ තමයි මේ චිත්‍රපටය ගලාගන යන්නේ. මේ මොහොතේ මිනිස් සමාජය මුහුන දෙන ලොකුම ඛේදවාචකය තමයි සාමූහිකත්වය දියවෙලා යන එක. මිනිස්සු සාමූහික වෙන්නේ අනිකා වෙනුවෙන් නෙවෙයි තමන්ට මොකක් හරි දිනාගන්න. එක මොහොතක පිරිසේ සිටින කෙනෙකු යෝජනා කරනවා සල්ලි දීලා හරි වැඩේ ඉක්මනට කරමු යනුවෙන්. මේ මොහොතේ තනි තනිව හුදකලා ලෝකවල හිටපු මිනිස්සු ටික එකට එකතුවෙනවා. තමන්ගේ ජීවීත කතා බෙදාගන්නට පටන් ගන්නවා. නමුත් මුදල් ගෙවා යම් පිළිතුරක් ලැබුනු පසු යළිත් සියල්ල ඔවුන්ගේ හුදෙකලා ලෝකවල විඳවන්නට පිටත් වෙනවා.

මේ සියලු විඳවීම් මැද්දේ චිත්‍රපටය අවසන් වෙන්නේ දරාගත නොහැකි ප්‍රකම්පනයකට ඇදලා දාලා. අනිකාගේ වේදනාව අභියස තනි රැකිය යුතු මොහොතක ඉතිරි සියල්ලටම ඔවුන්ගේ ලෝකවලට පියාඹා යනවා. ඔවුන් අදහන දෙවියන් පවා වේදනාවෙන් අසරණ වූ හදවතක් අත හැර පලා යනවා.

 අනු බන්ඩාර

විසිඑක්වෙනි දශකයේ ජීවත්වන මිනිසා බොහෝ සෙයින් තම ජීවිතය ගත කරනුයේ නව තාක්ෂණය සමගින් ය. තාක්ෂණික දියුණුවත් සමග ජංගම දුරකථනය නමැති ප්‍රබල සන්නිවේදන අවිය අද වන විට පරතෙරටම දියුණු වී ඇත. කුසට අහරක් සොයා වෙහෙසෙන යාචකයන් අතද ජංගම දුරකථන ඇත්තේ එය කා අතරත් ජනප්‍රිය වෙමිනි. ජංගම දුරකථනය තුළින් කළ නොහැකි කාර්යයක් නොමැති තත්ත්වයකට පත්ව ඇත. පුද්ගලයෙකු හට සාර්ථකත්වය මෙන්ම විනාශය ද උදාකර දිය හැකිය. එය නිසැකයෙන්ම තීරණය වනුයේ භාවිත කරන ආකාරය අනුවය.

බහුතරයක් හුදී ජනයා ජංගම දුරකථනය දෙස බලනුයේ ජීවිත විනාශ කරන අවියක් ලෙසටය. එයට හේතු වනුයේ ඔවුන්ට සමාජය තුළින් නිතර අසන්නට දකින්නට ලැබෙන සෝචනීය පුවත්ය. බොහෝ ශෝකජනක පුවත් නිර්මාණය වනුයේ ජංගම දුරකතනය මුල් කොට ගෙනය. නොහඳුනන පුද්ගලයන්ගෙන් ලැබෙන මිස් කෝල් අවසන් වනුයේ ආදර සබඳතා වලිනි. එයින් බොහොමයක් පිරිස් තම ජීවිත විනාශ කර ගනුයේ රැවටිලි වලට හසුවෙමිනි. වයස් භේදයකින් තොරව සියලු දෙනා ජංගම දුරකථන හරහා මුහුණු පොතට පිවිස තම කාලය නිකරුණේ විනාශ කරගනී. කාලය පමණක් නම් කම් නැත. නමුදු මුළු ජීවිතයම විනාශ කර ගනී

හුදෙක් ජනයා ජංගම දුරකථනය ප්‍රයෝජනවත් ලෙස භාවිත කරන්නේ නැත. තම ජීවිතයේ විනාශයට තමාම අතවනා ගනුයේ ජංගම දුරකථන අනිසි භාවිතය නිසාවෙන්ය. තම ආත්ම ගරුත්වය මෙන්ම අනෙක් පුද්ගලයන්ගේ ආත්ම ගරුත්වයට ද හානි කරන්නේ ජංගම දුරකථන උපයෝගී කරගනිමින්ය. තරුණ පරපුර මෙන්ම සියලු ජනයා පුරුදු වී සිටිනුයේ උදෑසන අවදි වූ මොහොතේ පටන් නින්දට යන තුරුම දුරකථනයට නිදහසක් නොදී එය භාවිතයට ඇබ්බැහි වීමය. අද වන විට ජංගම දුරකථනය නොමැතිව අපට ජීවත්විය නොහැකි තත්වයකට පත් කර ඇත. ලෝකයේ සියලු තතු පහසුවෙන් දැන ගැනීමට හැකියාවක් ලැබෙන අතර සියලු දුරස්ථ භාවයන් මගහැර ලෝකය අතර සමීප බවක් ඇති කර ගැනීමට ජංගම දුරකථනය ඉවහල් වේ. එබැවින් ජංගම දුරකථනය නැමැති සන්නිවේදනය සාර්ථකත්වයේ මං පියස කරා යාමට එය භාවිතා කරන්නේ නම් ජීවිතය ජය ගැනීමට එය රුකුලක් වන්නේය. එබැවින් ජංගම දුරකථන හරහා තම ජීවිත තවදුරටත් විනාශ කර ගන්නේ ද සාර්ථක කර ගන්නේද යන්න ඔබටම තීරණය කළ හැකිය

මාස්ක්ගත, සැනිටයිසර්වලින් සන්නද්ධ, පෞද්ගලික ආරක්ෂක ඇඳුම් කට්ටලවලට බැස හඳ මත ඇවිද යන්නාක් මෙන් මිනිසුන්ට ඇවිද යෑමට සිදු වූයේ මන් ද? මේ සියවසේ ජීවත් වන පරම්පරා කිහිපය අවාසනාවන්ත ද? ප්‍රශ්නාර්ථවලින් අවසන් වන වාක්‍ය සමඟ සටන් කිරීමට දැන් අපට සිදුව ඇත. ජීවිතය සහ මරණය අතර සටනක් සමඟ දෛනික ජීවිතය ගත කිරීමට සිදු වූයේ යුද ගැ‍ටුම් මැද ජීවත් වන මිනිසුන්ට පමණි.

මනුෂ්‍යත්වය පරික්ෂාවට ලක් වූ වසර ලෙස 2020 හඳුන්වන්නේ මන්ද? මනුෂ්‍යත්වය අභියෝගයට ලක්ව ඇතැයි කිසිවකු සිතන්නේ කුමණ කාරණාවක් නිසාදැයි ඔබේ අවිඥානය තුළ විදුලි සරයක් ගලාගෙන ගියේ ද? මනස තුළ සාංකාගත දිය ‍රැල්ලක් ගසාගෙන ගියේ ද? එසේ නම් මනුෂ්‍යත්වය අභියෝගයට ලක්ව ඇතැයි ඔබේ මනසේ යම් අරගලයක් මේ වන විටත් හට ගෙන ඇති බවට කැට තැබිය හැකිය. 2020 ඇ‍රැඹීමත් සමඟ නිමක් නොමැති ස්වාභාවික ව්‍යසනවලට ලෝකයට මුහුණ දෙන්නට සිදු විය. මේ ස්වාභාවික ව්‍යසන බහුතරයක් පසුපස කැත හිනාවක් පාමින් පසුපසට අත් බැඳගෙන සිටින්නේ සතා සීපාවුන් නොව මනුෂ්‍යයන්ය. අවි, ආයුධවලින් කෙරෙන ම්ලේච්ඡ, ක්‍රෑර යුද්ධ දැන් වාචික යුද ගැ‍ටුම් බවට පත්ව ඇත. සයිබර් යුද්ධ ද ඒ අතර මුල් තැනක් ගනී. සෑම විටම අනෙකා අභිබවා යෑමේ, අනෙකාට වඩා උසස් වීමේ ආශාවෙන් මඬනා ලද මනුෂ්‍ය වර්ගයා දැන් මේ ගමන් කරමින් සිටින්නේ කොතැනට ද? එතැන පිළිබඳ පැහැදිලි චිත්‍රයක් අප සතු ද?

තාවකාලික සාම කාලයක්

මාස්ක්ගත, සැනිටයිසර්වලින් සන්නද්ධ, පෞද්ගලික ආරක්ෂක ඇඳුම් කට්ටලවලට බැස හඳ මත ඇවිද යන්නාක් මෙන් මිනිසුන්ට ඇවිද යෑමට සිදු වූයේ මන් ද? මේ සියවසේ ජීවත් වන පරම්පරා කිහිපය අවාසනාවන්ත ද? ප්‍රශ්නාර්ථවලින් අවසන් වන වාක්‍ය සමඟ සටන් කිරීමට දැන් අපට සිදුව ඇත. ජීවිතය සහ මරණය අතර සටනක් සමඟ දෛනික ජීවිතය ගත කිරීමට සිදු වූයේ යුද ගැ‍ටුම් මැද ජීවත් වන මිනිසුන්ට පමණි. එහෙත් ලෝකයේ ඇවිළුණු සියලු යුද ගැ‍ටුම්වලට තාවකාලික සාම කාලයක් එකිනෙකා පිරිනමාගෙන වැනිය. උණ්ඩ පත්තු කරමින් දිනා ගන්නට තැත් කළ සියලු අරමුණු හුදෙක් ජීවිතය ‍රැක ගැනීමේ අරමුණ ඉදිරියේ ලජ්ජාසහගතව දියැවී ගොසිනි.

කොරෝනා වසංගතය මේ සියල්ලටම ඉහළින් සිය අණසක පතුරවමිනි. ඡන්ද, කැරළි, මානව අයිතිවාසිකම් දිනා ගැනීමේ උද්ඝෝෂණ සියල්ල අතර මාස්ක්ගත මුහුණු පෙනී සිටිමින් අසන්නේ ජීවිතය ද? බලය ද? වැනි ප්‍රශ්නයකි. සැබවින්ම දැන් ලෝකයට වුවමනා වන්නේ බලය දිනා ගැනීම ද? එසේත් නැත්නම් ජීවිතාශය සමඟ සටන් වැදීමද යන්න යන කාරණා ද්විත්වයෙන් එකක් ‍තෝරා ගැනීමය. සියල්ල එතරම් සරල ‍තෝරා ගැනීමකට ලඝුව ඇත. මරණය පවා වෙනස්ව ඇත.

කොරෝනා වසංගතයෙන් මිය ගිය හොත් ඔබේ මරණය පවා ගූඪව සිදු වෙයි. ශෝක ප්‍රකාශ, නෑදෑ වැලැපීම් හෝ මිනී පෙට්ටියක්වත් ඔබට නොලැබේ. එවිට ඔබේ මරණය පවා ආදිකල්පිතය. සරලය. සොබාදහමේ සරල නියමයකට අත් ඔසවන්නේවත් නැතිව ඔබට යටත් වන්නට සිදු වේ. කොටින්ම ආගමික විශ්වාස පවා සෙලවීමකට ලක් වේ. මේ ගෙවී යන්නේ ඒ සා උඩුයටිකුරු වූ කාලයකි. සැලසුම් රහිත ජීවිත සහ මරණ සහිතව ජීවත් වීමට එකඟ වන්නට සිදු වන කාලයකි.

සාමූහිකත්වය ගැන නිහඬ පාඩමක්

තනි තනිව ජීවත් වීමට, තනි තනිව සාර්ථකත්වය කරා යෑමට උගෙන සිටි මිනිසාට සාමූහිකත්වය ගැන නිහඬ පාඩමක් මේ අභූත වසංගතය විසින් ලබා දී ඇත. සමූහයක් විසින් සිදු කරන යහපත් ක්‍රියාවල අනු හේතු සහ අනු ප්‍රතිඵල මත අනෙකාගේ ජීවිතය ‍රැඳී තිබේ. යමකු වසංගතයට නිරාවරණය වී ආසාදිතයකු වී ඇත්නම් ඔහුට ඇති වගකීම සාමූහිකව බෙදා ගත යුත්තකි. සියල්ල දම්වැලක් මෙන් බැදී තිබේ. තනි පුද්ගලයකු ගන්නා එක් වැ‍රැදි තීරණයක් මත සමූහයක් කරදරයේ දැමීමේ අවදානම ‍රැදී පවතී. අනෙකා යනු තමන්ගේ විශ්වාසවන්තයාය යන සංකල්පය මෙහිදී බිඳ වැටීමට ඉඩ නොදිය යුතුය. මේ මනුෂ්‍යත්වය පරීක්ෂා කිරීමේ අවස්ථාවක් වන්නේ එහෙයිනි. වාහකයා වන්නේ මිනිසාමය. වාහකයකු නොවී සිටීමේ තනි වගකීම ඇත්තේද ඔහුටමය. සමාජය විෂයෙහි ඔහු කෙරෙහි දයාවක්, කරුණාවක් මෙන්ම වගකීමක් පැවතිය යුත්තේ එහෙයිනි.

එහෙත් ලෝකය පුරා ප්‍රායෝගික ගැටලු සහසක් මතුව ඇත. ඇතැම් රටවල ජල බිල්පත් නිසි වේලාවට නොගෙවීම නිසා ජල සැපසුම විසන්ධි කර ඇත. ජලය නොමැතිව නිතිපතා ඔවුන් අත් සෝදන්නේ කෙලෙසක ද? සෞඛ්‍යාරක්ෂිතව වෙසෙන්නැයි කීවාට ඔවුන් ඒ පහසුකම් වෙත ළඟා වෙන්නේ කෙලෙසින් ද? ‍රැකියා අහිමි වීම අනෙක් ගැටලුවයි. වසංගතයෙන් ගැලවීමේ ප්‍රධාන මාර්ගයේ යන ගමනට සහභාගී නොවී ඔවුන්ට ආහාර ලබා ගැනීමේ අතුරු පාරකට පිවිසීමට සිදුව ඇත. ඇතැම් රාජ්‍ය මඟින් සහනාධාර ලබා දෙමින් ඔවුන්ව ‍රැක බලා ගනී. එහෙත් මේ චක්‍රය නොකැඩී පවත්වාගෙන යා හැකිද? මිචිගන් සරසවියෙන් කළ සමීක්ෂණයකට අනුව පසුගිය අප්‍රේල් මාසය වන විට ‍රැකියා විරහිතයන්ගේ ප්‍රතිශතය 48% තෙක් ඉහළ නැඟ ඇත. මේ ඉලක්කම් බිය ඇති කරන්නේ නොවේ ද?

ආහාර හිඟකම

අනාගතයේදී ආහාර හිඟකමින් මිය යා හැකි බවට ලැයිස්තුගත කර ඇති දකුණු සූඩානය, වෙනින්සියුලාව මෙන්ම මධ්‍ය ආදායම් සහිත රටවල් ලෙස හඳුනාගෙන ඇති ඉන්දියාව, දකුණු අප්‍රිකාව සහ බ්‍රසීලය ගැන කිව යුත්තේ කුමක් ද? වසංගතය සේම ආහාර හිඟකමද එකවර දෙතැනකින් පහර දීමට පටන් ගත හොත් අවසානය කුමක් විය හැකි ද?

වඩා දියුණු රටවල් පවා මේ අනාගත ආහාර හිඟකමෙන් පීඩාවට පත්ව හැකි යැයි අනතුරු අඟවා තිබෙන විටත් අප කරමින් සිටින්නේ කුමක් ද? ආහාර බැංකු ආදියේ රස්තියාදු වෙමින් ආහාර සෙවීමට මිනිසුන්ට සිදුව ඇත. සෑම රජයකටම ස්වකීය රටවැසියන් නඩත්තු කළ හැකි සීමාවේ රතු ඉර පැන්න විට පුපුරා යන්නේද මනුෂ්‍යත්වයයි. ඔක්ස්ෆාම් ඇමරිකාහි ප්‍රධාන විධායක නිලධාරී, ඇබී මැක්ස්මන් මාධ්‍ය නිවේදනයක් නිකුත් කර කියා සිටියේ "අකාරුණික සත්‍ය වන්නේ අපේ ආහාර නැතිවීමේ අවදානම දැන් අපේ නිවෙස් පසුපසටම පැමිණ පුපුරා ගොස් අවසන් වීමයි. සෑම නගරයකම කුසගින්නේ නින්දට යන මිනිසුන් දැන් සිටී. ‍රැකියා සහිත කාලයේදී පවා දුප්පත්කමේ අග්ගිස්සේ සිටි මොවුන් දැන් ‍රැකියා විරහිතව වැටී තිබෙන්නේ ඊට අන්ත තැනකටය. මිසිසිපිහි ජනගහනයෙන් සැලකිය යුතු ප්‍රමාණයක් ආහාර හිඟයකට මුහුණ දී සිටියි. ලුසියානාවල තත්ත්වයත් ඊට වඩා වෙනස් නැත. කුඩා දරුවන්ගේ ආහාර හිඟකම මෙහිදී ප්‍රධානය."

බෙහෙත් නමැති ගුවන් යානය

මේ සියල්ලෙන් ගොඩ ඒමට විද්‍යාඥයෝ උත්සාහ දරති. ඒ වසංගතයට වුවමනා බෙහෙත් නම් ගුවන් යානය පදවන අතරම එය සකස් කරමිනි. ඔවුන් ගුවන් යානය පදවන අතර එය සැකසීමේ අවදානම අපට දැන් ගැනීමට සිදුව ඇත. මන්ද යත් අප සිටින්නේ එකී ගුවන් යානය ඇතුළත හෙයිනි. එහෙත් ගැටලුව වන්නේ කොතෙක් කාලයක් ඔවුන් විසින් බෙහෙත් නමැති ගුවන් යානය පදවාවිද යන්නය. එය නිමැවීමට ඔවුන්ට කොපමණ කාලයක් ගත වේද යන්නයි. ගුවන් යානය ඇතුළත ගැස්සෙමින්-පැද්දෙමින්, මරණ බියෙන් කෑ ගසන මගී ජනතාව කොපමණ කාලයක් තම යථා සිහිය පවත්වා ගනීද යන්නයි.

එනිසාම මේ ගැස්සෙන-පැද්දෙන ගුවන් යානය ඇතුළේම විවාහ මංගල උත්සව පැවැත්වෙයි. ඒ මාස්කගතව, මීටරේ දුර පවත්වාගනිමිනි. දරු උපත් ද සිදු වේ. මේ සියල්ලම කොරෝනා කාලේ සිදු වන අමුතු විවාහ සහ දරු උපත් ගනයට වැටෙයි. කාලයේ හැටියට, රෝගයේ තරමට මිනිසා තමන්ගේ ජීවන රටාව වෙනස් කරගන්නට එකඟ වීම ඊට ප්‍රධානම හේතුවයි.

වඩාත් හැඟීම්බර වුව හොත් මේ එක්තරා දඬුවමක්දැයි අපට අපේ යටි හිතට තට්ටු කර අසා දැනගත හැකිය. මනුෂ්‍යයන් ලෙස අප යහපත් කල්කිරියාවෙන් පසු වී ද? අනෙකාට වුවමනා බලය අත්පත් කර ගැනීමේ නූතන යුද්ධයට අපත් උණ්ඩ සපයා ඇති ද? අප අතින් පවා නිෂ්ක්‍රීය උණ්ඩ පත්තු වී තිබේ ද? ප්‍රශ්නාර්ථ සමඟ දැන් නොසන්සුන්ව එහා-මෙහා ඇවිදීමෙන් පලක් නොවේ. ගැටලුව සමඟ ජීවිතය පවත්වා ගැනීමේ නිශ්ශබ්ද එකඟතාවකට දැන් අප කැමතිව හෝ අකමැතිව එළැඹෙන්නට සිදුව තිබේ. කිසිවකුට මේ තත්ත්වය මඟ හැර අන් තැනකට යා නොහැක. එවන් 'අන් තැන්'කිසිවක් දැන් ඇත්තේද නැත. මහා වසංගතයක් පැමිණ සියල්ල එක සමාන කර ඇත. මේ පෙර කී දඬුවම ද?

යහපත් අතුරු ඵල

අප තප්පර විස්සක් අත් සෝදමින් වසංගතයෙන් ගැලවීමට තැත් කරන විට ප්‍රථිවියේ උෂ්ණත්වය ඉහළ ගොසිනි. ලෝකය අඩ වශයෙන් අක්‍රිය වීමත් සමඟ ඉන්දියානුවන්ට හිමාලය දැකිය හැකි වීම පරිසර දූෂණය අවම වීමේ අතුරු ප්‍රතිඵලයකි. බැංකොක් සහ සාන් පවුලෝ වෙත පිරිසුදු වාතය ලැබීමත් යහපත් අතුරු ප්‍රතිඵලය.

රොබර්ට් කුන්සිග්ට අනුව කොරෝනා වසංගතය විසින් අපට අනියමාකරයෙන් උගන්වන්නේ අප විසින් පෘථිවියට කළ අකටයුතුකම්වලට දඩුවම්ය. බිලියන 800ට ආසන්න ජනගහනයක් එකම කෝප්පයක දමා සොලවමින් මේ පාඩම උගන්වන සැටියකි.

කොරෝනා වසංගතය පවතින කාලයේ වැඩිහිටියන්ව සමාජයට එකතු වන අයවලුන් සමඟ කළ කෙටි සාකච්ඡා කිහිපයක් පසුගියදා නැෂනල් ජියොග්‍රැපික් මැගසිනය ප්‍රකාශයට පත් කර තිබුණි. එහිදී මූලිකව සාකච්ඡා කළ කාරණය වූයේ 'අපේ පරම්පරාව මහත් ව්‍යසනයකට පත්ව ඇත්ද'වැන්නකි. එය සුළුකොට තැකිය යුතු දෙයක් නොවන බවට ලිපිය ලියූ ජෝර්ඩන් සලාමා අවධාරණය කර සිටියි.

"අපේ පරම්පරාවට නොයෙක් නම් කියනවා. සමහරු අපිට කියන්නේ දේදුනු පරම්පරාව කියලා. තවත් අය ජෙනරේෂන් ඉසෙඩ් කියලත් කියනවා. සිලනියල්ස් කියලත් කියනවා. ජෙනරේෂන් ස්කෲඩ් වගේ අපවාදාත්මක නම් ඒ අතරේ තියෙනවා. අවුරුද්ද මුල පටන් ගත්ත නිරෝධායන තත්ත්ව නිසා මට වැඩි හරියක් ගත කරන්න වුණේ තනියම, ලියුම් ලියමින්. අපි අපේ හැඟීම් බෙදාගත්තේ මේ ලියුම්වලින්. ඒවා අතිශය සංවේදීයි. ටෙක්ස්ට් මැසේජ්, සූම් ඇමතුම් ආදියෙන් බෙදාගන්න බැරි වර්ගයේ ඒවායි අපි ලියුම්වල ලිව්වේ. මම එහෙම දෙයක් මීට කලින් අත් විඳලා නෑ."

ඒ එක් අයකුගේ හැඟීම්ය. මේ එලී ඕ බ්‍රයන් පවසන දෙයයි.

"මේ, අපි කලින් හිතාගෙන හිටපු ජීවිතේ නෙවෙයි"

ඔබේ සැලසුම්ගත ජීවිතය අවුලෙන් අවුලට ගොස් ඇති බවට කිසිදු සැකක් නැත. එහෙත් දැන් කළ හැක්කේ කුමක් ද? මාස්ක්ගතව, සැනිටයිසර්ගතව, අනෙකා දෙස සැකෙන් බලමින් ජීවත් වීම ද? උණ්ඩවලින් ආරක්ෂා වී, බිම් බෝම්බවලින් ආරක්ෂා වී සිටීමේ අනාගතයක් ඇතැයි සිතූ අයම සබන් දමා අත් සෝදමින් ජීවිතය ‍රැක ගැනීමේ අතිශය සරල විසඳුමට ළඟා වීම ද? පිළිතුර දැන් තනි තනිව සොයාගෙන අවසන්ය. එය සමූහයක් වෙත ලබා දීමේ රන් මොහොත දැන් උදාව තිබේ. අනෙකාව ‍රැකගන්න. එවිට අනෙකා විසින් ඔබව රකිනු ඇත.

කාංචනා අමිලානි

තවමත් ලොවට ආගන්තුක වයිරසයක් වන කොවිඩ් 19 පරාජය කිරීම සඳහා ලොව පුරා විද්‍යාඥයෝ මෙන්ම පර්යේෂකයෝ අනවරත උත්සාහයක නිරත වී සිටිති. ඒ පිළිබඳව නිකුත් වූ නවතම පර්යේෂණ වාර්තාවකින් සනාථ වී ඇත්තේ කොවිඩි 19 වැලඳීමෙන් අනතුරුව ශරී‍රයේ ප්‍රතිදේහ මට්ටම (ANTIBODIES) ශීඝ්‍රයෙන් බිඳ වැටෙන බවයි. ඉම්පීරියල් කොලේජ් ලන්ඩන් විශ්වවිද්‍යාලයේ පර්යේෂක කණ්ඩායමක් විසින් සිදු කර ඇති මෙම පර්යේෂණ‍ය (REACT 2) නැමැති පර්යේෂණයේ කොටසක් ලෙස ඉදිරිපත් වූවකි. පුද්ගලයන් 350,000ක සහභාගිත්වයෙන් සිදු කර ඇති මෙම පර්යේෂණයෙන් සනාථ වී ඇත්තේ කොවිඩ් ආසාදනයෙන් අනතුරුව ශරීරයේ ප්‍රතිදේහ පහළ බැසීමක් සිදු විය හැකි බවයි. ප්‍රතිදේහ මඟින් ඉ‍ටු කෙරෙන ප්‍රධාන කාර්යය වන්නේ සෛල වෙත වයිරස් ඇතුළු වීම වැළැක්වීමයි. එම පර්යේෂණයෙන් හඳුනා ගෙන ඇති අනෙක් කාරණය වෙන්නේ වයස 65ට වැඩි පිරිසෙහි ප්‍රතිදේහ පහත යෑම ශීඝ්‍රයෙන් සිදු වන බවයි. මෙවැනි හේතු නිසා එන්නතක් සොයා ගැනීම වෙනත් මානයකින් විමසිය යුතු බවත් කළ යුතු බව මෙම පර්යේෂණ දත්ත පිළිබඳව වි‍ශ්ලේෂණය කරන පර්යේෂක මහාචාර්ය ග්‍රැහැම් කුක් පවසා තිබේ.

කොරෝනා සඳහා නිශ්චිත එන්නතක් නිපදවීම සඳහා තවත් වසර දෙකක්වත් ගත වනු ඇතැයි ලෝක සෞඛ්‍ය සංවිධානය අවධාරණය කරන්නේ මෙවැනි පර්යේෂණ ලොව පුරා තවදුරටත් සිදු වෙමින් පවතින නිසාත්ය.

පසුගියදා ලෝක සෞඛ්‍ය සංවිධානය විසින් පවත්වන ලද මාධ්‍ය සාකච්ඡාවේදී කොරෝනා මැඩ පැවැත්වීම පිළිබඳව ගෝලීය අත්දැකීම් සාකච්ඡාවට ලක් වූ අතර දකුණු අර්ධගෝලයෙන් ආරම්භ වූ කොරෝනා උතුරු අර්ධගෝලය වෙත හුවමාරු වූ අතර ‍මේ සියවසේ ඇති විය හැකියැයි අනුමාන කළ හැකි දරුණුතම මිනිස් සංහාරයට මුලපුරමින් දකුණු අර්ධගෝලය වෙත නැවත වතාවක් රැලි නංවමින් තිබේ. ඒ රැල්ල මේ සීත ඍතුවේ නැවත වතාවක් උතුරට සංක්‍රමණය වෙමින් සිටින බවට සංඛ්‍යා දත්ත මඟින් තහවුරු වෙමින් පවතී.

මෙම මාධ්‍ය සාකච්ඡාව ඉදිරියට පැමිණි ලෝක සෞඛ්‍ය සංවිධානයේ අධ්‍යක්ෂ ජනරාල් ට්‍රේඩෝස් අබ්හනෝමන් (TEDROS ABHANOM GHEBREYESUS)පවසා සිටියේ කොවිඩි 19 රෝගියකුගේ ආශ්‍රිතයකු වීම හේතුවෙන් තමාටද දින 14ක කාලයක් නිරෝධායනයෙහි නිරත වීමට සිදු වී ඇති බවයි.

මෙම මාධ්‍ය සාකච්ඡාවේදී ඉදිරිපත් වූ තොරතුරු අතර වඩාත් වැදගත් කරුණු කීපයක් අනාවරණය විය. ඒ අනුව කොවිඩි 19 පාලනය සඳහා ලෝක සෞඛ්‍ය සංවිධානයේ නිර්නායකයන්ට අනුව කටයුතු කරමින් රෝගය පාලනය සඳහා ලොව රටවල් බොහොමයක් සාර්ථකව කටයුතු කරන අතර උතුරු ඇමරිකාවේ මෙන්ම යුරෝපයේ රටවල් කීපයක් තවමත් රෝගපාලනය සෞඛ්‍ය අංශ වෙතට නතු කර ගැනීමේ ප්‍රයත්නයක නිරත වන බවට අවධාරණය කෙ‍රිණි.

රෝග පාලනය සාර්ථකව පවත්වාගෙන යන රටවල් ලෙස නවසීලන්තය, රුවන්ඩාව, තායිලන්තය, දකුණු කොරියාව, ඉතාලිය මෙන්ම ස්පාඤ්ඤය පිළිබඳව සඳහන් වූ අතර මෙතෙක් කිසිදු මරණයක් හෝ‍ දේශීය සම්ප්‍රේෂණයක් වාර්ථා නොවන රට ලෙස මොංගෝලියාව විශේෂ අගය කිරීමකට ලක් කෙරිණි.

මොංගෝලියාව පිළිබඳව අදහස් දක්වමින් ලෝක සෞඛ්‍ය සංවිධානයේ අධ්‍යක්ෂ ජනරාල්වරයා මෙහිදී අවධාරණය කරමින් කියා සිටියේ සම්ප්‍රේෂණය නොවීම සඳහා අප සතු කාර්ය භාරය විශාල බවත් ඒ වෙනුවෙන් කළ හැකි බොහෝ දේ පවතින බවත් ඊට අදාළ බොහෝ පාඩම් මොංගෝලියාවෙන් උගත හැකි බවත්ය.

මෙම සාකච්ඡාවේදී ඉස්මතු වූ වැදගත්ම කාරණය නම් බොහෝ රටවල් තම සෞඛ්‍ය ධාරිතාවේ උපරිම සීමාවට ළඟා වෙමින් සිටින අතර ඇතැම් රටවල් තම සෞඛ්‍ය ධාරිතාව පුළුල් කිරීම සඳහා මෙය අවස්ථාව බවට පත් කරගෙන තිබේ. එසේ සෞඛ්‍ය ධාරිතාව වැඩි කිරීම දීර්ඝ කාලීන ආයෝජනයක් වන අතර මේ සියවසේ සිදු වූ විසල් මානව අභියෝගය ජයගත හැක්කේ අභියෝගයේ ස්වභාවය හඳුනාගෙන ඒ සඳහා කල්වේලා ඇතිව සූදානම් වීමෙන් පමණක්ය.

කොවිඩි 19 ශ්‍රී ලංකාවට ඊයේ දහවල් වන විට මෙරට ආසාදිතයන් පිරිස 12570වකි. මරණ සංඛ්‍යාව 29ක්ව පැවති අතර සුවය ලැබූ පිරිස 6623කි. ලෝක සෞඛ්‍ය සංවිධානයේ නිර්දේශයන්ට අනුව ‍රෝග ව්‍යාප්තිය සහ පාලනය හඳුනා ගැනීම සඳහා අඳිනු ලබන ප්‍රස්තාරයට අනුව ශ්‍රී ලංකාව, ප්‍රංශය, ඉන්දියාව එකම දිශානතියකට ගමන් කරමින් සිටින බව හඳුනාගත හැකිය. තවමත් රෝගය පාලනය කිරීම පිළිබඳ විශ්වාසය තබා ගනිමින් කටයුතු කළ හැකි මට්ටමක පසුවෙන අතර සෞඛ්‍ය අංශ පිළිබඳ විශ්වාසයෙන් යුතුව ඒ උපදෙස් සහ ක්‍රමෝපායන් ක්‍රියාවට නැංවීම වඩාත් වැදගත් වෙයි.

ගත වූ සති දෙකක කාලය තුළ වාර්තා වූ නව ආසාදිතයන් මෙන්ම සුව වූ පිරිස පිළිබඳව සලකන විටද පෙනී යන්නේ ඔක්තෝබර් 23 වාර්තා වූ ආසාදිතයන් ගණන 866ක් බවත් සති දෙකක කාලය තුළ වාර්තා වූ ඉහළම ආසාදිතයන් ගණන එය බවත්ය. ඉන් අනතුරුව 633ක් ලෙස වාර්තා වූයේ ගෙවුණු තිස් වැනිදායි. 06 වැනිදා වනවිට 383ක් ලෙසට වාර්තා වී තිබීමෙන් හඳුනා ගත හැක්කේ රෝගීන් වාර්තා වීම යම් පාලනයකට නතු කර ගැනීමට හැකි වී ඇති බවයි.

සති දෙකක කාලය තුළ සුවවීමේ ප්‍රස්තාරයට අනුව 23 වැනිදා 83ක් ලෙස වාර්තා වූ අතර 6 වනදා වන විට එම ප්‍රස්තාරය ක්‍රමයෙන් ඉහළ යමින් 765ක් දක්වා වර්ධනය වෙමින් පවතින බව නිරීක්ෂණය කළ හැකිය. මේ අනුව ආසාදිතයන් වාර්තා වීම ක්‍රමානුකූලව සම මට්ටමක පවතින අතර සුව වීමේ ප්‍රස්තාරය ක්‍රමයෙන් ඉහළ යමින් පවතී.

ලෝක සෞඛ්‍ය සංවිධානයේ නිර්ණායකයන්ට අනුව සෞඛ්‍ය පහසුකම් ධාරිතාව සඳහා වන පීඩනය අවම කර ගැනීමට මෙරට සෞඛ්‍ය අංශ කටයුතු කරමින් පවතින බවයි. ලෝක සෞඛ්‍ය සංවිධානයේ උපදෙස් අතර ප්‍රමුඛ උපදෙසක් වන්නේ ප්‍රස්තාරය තිරස් රේඛාවට සමාන්තරව පවත්වා ගැනීමට උත්සුක විය යුතු බව හෙවත් (Flattening the caw) සංකල්පයයි.

බුද්ධිකා බ්‍රාහ්මණගේ

ඔහු සිය බල වපසරියේ පිහිටි ගංතුලාන බොහොමයක පාසල් තනවමින් හෙට දවසේ මෙලොව එළිය දකින දරුවනගේ දෑස් පෑදීමට කළ මෙහෙය අනූපම සේවාවෙකි. සංඛ්‍යා ලේඛන අනුව බැද්දේගම නම් නවකතාව ලියා ලෝ පුරා මහත් කීර්තියක් අත්කරගත් හම්බන්තොට දිසාව භාරව හුන් සුදු ආණ්ඩුවේ උප ඒජන්ත ලෙනාඩ් වුල්ෆ් එහි ගත කළ කාලය තුළ 1908 සිට 1911 දක්වා කාලයේදී මුළු දිස්ත්‍රික්කයේම දරුවන්ගේ අධ්‍යාපනයට අලුතින් ඉදි කෙරුණේ පාසල් දොළසකි.

‘රුහුණේ සිංහයා’ මිය ගියේය. ඒ 1945 වෙසක් මහේ 18 දායි. ඔහු වියෝ වූයේ ලංකා රාජ්‍ය මන්ත්‍රණ සභාවේ අසුන් ගෙන සිටියදීය. රට කරවන තැනදී හෘදයාබාධයක් වැලඳ රුහුණේ සිංහයායැයි විරුදාවලිය ලත් ඩී.එම්. රාජපක්ෂ හෙවත් දොන් මැතිව් රාජපක්ෂ මන්ත්‍රීවරයා මියගිය පුවත ගිරුවාගම් දොළොස්දහසක ජන හදවත් කම්පනයට පත් කරවමින්, සසල කරවන්නට තරම් ඉතා ප්‍රබල හේතු කාරණාවක් විය. ඔහු අවසන් සුසුම් වාතලයට මුසු කළ කනගාටුදායක ආරංචිය ඇසූ සිය ගණනක් ගොවියන්, ධීවරයන් ප්‍රමුඛ හම්බන්තොට ජනී ජනයා වැල නොකැඩී රුහුණේ සිංහයාට ස්වකීය ගෞරවය දක්වන්නට වීරකැටියේ කොන්දගල වලව්ව කරා ඇදී ආහ. මුළු වීරකැටිය නගරය වසා ඔහුගේ ආධාරකරුවෝ ඈත රුහුණේ ගම්මානයන්හි සිට පැමිණියෝය. ඔවුහු කඳුළු හලති. හඬති. කඳුළු හල හලා, හඬමින් වැලපෙති. ගිරුවාගම් සියල්ලෙහිම අහසට එසවුණේ සුදු කොඩිවැල් ය. ශෝක ප්‍රකාශ ලියූ සුදු රෙදි කොඩි ලුණුගම්වෙහෙර, කිරින්ද, තිස්සමහාරාමය, දෙබරවැව, වීරවිල, බැදිගම්විල, බුන්දල, යෝධකණ්ඩිය, යාල, මාගම, පන්නෙගමුව, හම්බන්තොට, උඩ මත්තල, පහළ මත්තල, බඳගිරිය, අම්බලන්තොට, රිදියගම, නෝනාගම, හුංගම, ලුණම, රැකව, රන්න, නෙටොල්පිටිය, තංගල්ල, උණාකුරුව, නාකුළුගමුව, කුඩාවැල්ල, බෙලිඅත්ත, කුඩා හීල්ල, මහ හීල්ල, පුවක්දණ්ඩාව, වලස්මුල්ල, කිරම, මීගහජඳුර, සූරියවැව, අඟුණකොළපෑලැස්ස, කටුවන,මි‍ද්දෙණිය මේ එකී නොකී හැම ගමකම ජනී ජනයා ලොකු කුඩා භේදයකින් තොරව හඬමින් වැලපෙමින් සුදු කොඩි ඔසවා ඔහුට ගෞරවාචාර කළහ.

රුහුණේ සිංහයා රාජ්‍ය මන්ත්‍රණ සභාවේ අසුන් ගත්තේ 1936 පැවති දෙවැනි රාජ්‍ය මන්ත්‍රණ සභා මැතිවරණයට හම්බන්තොට දිසාවෙන් තරග කොට ප්‍රතිවාදීන් දෙන්නකුම වැඩි ඡන්ද 12106කින් පරාජයට පත් කරමිනි.

ඩීඒගේ පියාණෝ දොන් දාවිත් රාජපක්ෂ විදානාරච්චි රාලහාමිය. ඔහු විදානාරච්චි ධුරය දැරුවේ වීරකැටිය ඉහළ වැලිකඩ කෝරළේය. ඩීඒගේ මෑණියෝ දෝන ගිමාරා රත්නායක වීරකෝන්ය. එතුමිය ඉහළ බෙලිගල්ලේ ප්‍රභූ පවුලක සාමාජිකාවකි.

රිච්මන්ඩ් විද්‍යාලයීය ක්‍රිකට් කණ්ඩායමේ තුන් අවුරුද්දක්ම නායකයා වූයේ හද්දා පිටිසරින් දකුණු ලකේ අගනගරේ ගාලුපුරේට ආ ඩීඑම්ය. ඒ 1913 සිට 1915 දක්වාය. ඩීඇම්ගේ ‘කැප්ටන්’ කමින් ඒ තෙවසරේම පැවති ‘රුහුණේ ආදරවන්තයන්ගේ හටනේ’දී මහින්ද විදුහල් ක්‍රිකට් ක්‍රීඩකයන්ට ජය අත් කර නොදෙන්නට ඩීඑම් අපූරුවට රිච්මන්ඩ් පිළ මෙහෙයවා ඇති අයුරු රිච්මන්ඩ් මහින්ද මහා ක්‍රිකට් ගැටුමේ ඉතිහාසය හාරා අවුස්සා බලද්දී කවරකුට වුව මැනවින් වටහා ගත හැකිය.

මල්ලී ද අයියාට නොදෙවැනිය. ඩීඒද ක්‍රිකට් පන්දුවටත් පිත්තටත් වගේම පාපන්දුවට ද පෙම් කළේය. ඔහු වසර කීපයක්ම රිච්මන්ඩ් පාපන්දු පිලේ නායකයා වෙමින් ප්‍රතිවාදී පාසල් පාපන්දු කණ්ඩායම් ‍මවිත කරවමින් සිය පිල හසුරුවා විදුහල් මාතාවට ජයග්‍රහණ අත්පත් කර දුන්නේය.

මේ දෙන්නා සුද්දන්ටත් කළු සුද්දන්ටත් එරෙහිව රට පුරා පැන නැඟෙන අධිරාජ්‍ය විරෝධී හටන් විවිධ අයුරින් මතු වෙද්දී ඒවාට තව තවත් පොදු මහජනයා ඒකරාශි කරවන්නට දේශමාමක උගත් බුද්ධිමත් තරුණ පිරිසක්ද පොදිගැහුණේ සූරියමල් ව්‍යාපාරය නමින් 1933 නොවැම්බර් 11 වැනිදා ඇරඹුණු නව දේශප්‍රේමීන්ගේ ගොනුව වෙතයි. බොරලුගොඩ සිංහයා නමින් විරුදාවලිය ලත් පිලිප් ගුණවර්ධන හා ඔහු සොවුරු රොබට් ගුණවර්ධනයන් ද ඇන්.ඇම්.පෙරේරා හා කොල්වින් ආර් ද සිල්වා, මොරවක ඇට මැස්සා යනුවෙන් කළු සුද්දන් විසින් නම් පට බැඳි අකුරැස්සේ වෛද්‍ය සුගීෂ්වර වික්‍රමසිංහයන් ද ඩෙරීන් යංග් (පසුව ඩොරීන් වික්‍රමසිංහ - බ්‍රිතාන්‍ය ජාතික ගුරුවරියකි, සැබවින්ම මෙහි ප්‍රථම සභාපතිවරයා වූයේ ඇයයි) වෛද්‍ය මේරි රත්නම් හා ඇගේ පුතණුවන්, රොබින් රත්නම්, ඊලියන් පෙරෙයිරා, ටෙරන්ස් ද සිල්වා, රෝයි ද මෙල්, විල්මට් පෙරේරා, වර්ණන් ගුණසේකර, ඇම්.ජී. මෙන්ඩිස්, ලෙස්ලි ගුණවර්ධන, චම්ලි ගුණවර්ධන යන දෙසොහොවුරන් ද කේ.රාමනාදන්, පී.කන්දයියා, ජේ.සී.ටී. කොතලාවල, සෙලිනා පෙරේරා, විවියන් ගුණවර්ධන, අයිලින් වීරසේකර, නීතිඥ ඩී. වේලාරත්න, හෙන්රි පෙරින්පනායගම් වැනි දේශප්‍රේමී, දේශමාමක, දෙස් විදෙස්හි මනා අධ්‍යාපනයක් ලද ජවයෙන් අනූන කීප දෙනකුගෙන් සමන්විත තරුණ කැලකි මෙපිරිස. සිරිලක සිව් දිසාවෙන්ම එකට එක්රැස් වී මව්බිමට පූර්ණ නිදහස ගන්නට තිර අදිටනින් මොවුහු පොරට බටහ. පසු කලෙක මේ උදවියගෙන් අති බහුතර පිරිසක් ලාංකේය වාමාංශික ව්‍යාපාරයේ ආරම්භක නියමුවෝ වූහ. මව්බිමේ පූර්ණ නිදහස වෙනුවෙන් පෙරට ආ මේ උගත්, බුද්ධිමත්, තරුණ ජවයෙන් හෙබි මොවුන්, රට පුරා සිය සංවිධාන ගොඩනඟද්දී ඩී.එම්. ද ඔවුනට හවුල් වූයේ සිය මලණුවන් ද එක්කරගෙන ය.

දොස්තර ඇස්.ඒ. වික්‍රමසිංහයන් සමඟ පැවති මිත්‍ර සංධානයෙන් සූරියමල් ව්‍යාපාරයට ඇදී ගිය ඩීඑම් දෙවන රාජ්‍ය මන්ත්‍රණ සභාවට හම්බන්තොට ආසනය නියෝජනය කරමින් මහජන නියෝජිතයකු වූයේ ඔහු රුහුණු ගිරුවාගම් දොළොස්දාහේ දිවි ගෙවන අහිංසක අසරණ ගොවි ජනතාවගේ මෙන්ම ධීවර හා කම්කරු‍වන්ගේ පණ කෙන්ද රකින්නට ඔවුන් අතරේ රැඳෙමින් කළ නේකාකාර වූ ක්‍රියාකාරකම් එක් සිතින් ඒ මිනිසුන් පිළිගත් හෙයින් යැයි කීම නිබොරුවකි.

රුහුණේ සිංහයා රාජ්‍ය මන්ත්‍රණ සභාවේ හම්බන්තොට ආසනය නියෝජනය කරමින් මහත් වූ සේවාවක නියැළී සිටියදී 1945 අභාවප්‍රාප්ත වූයේය. ඔහුගේ අභාවය හම්බන්තොට ජනතාවට ගෙන දුන්නේ දැඩි කම්පනයකි. ඔහුගේ අභාවයෙන් හිස් වුණු ආසනයට ඔහුගේ බාල සොහොවුරා පත් කරගන්නට ජනතාව පොදි ගැසී ඔහු සොයා ආහ.

අභාවප්‍රාප්ත ඩීඇම්ගේ සොහොවුරා දොන් එල්වින් රාජපක්ෂ ගම්මුන් විසින් හැඳින්වූයේ බුද්ධියාගම පොඩි රාලහාමි නමිනි.

ඔහුගේ පවතින ගතිගුණ ඩීඑම්ගේ වගේ නොවීය. හේ බොහෝ සාන්ත දාන්ත පුද්ගලයෙකි. ඉතා චාම් වූත්, සරල වූත්, දිවි පෙවෙතකට කැමැත්තක් දැක් වූ පුද්ගලයෙකි. බොහෝ නිවුණු චරිතයක් වගා දිගා කර ගන්නා ලද්දෙකි. හැම දෙයක් දිහාම ඉතා නිහතමානීව බැලීමට හැකියාව දියුණු තියුණු කර ගත් තැනැත්තෙකි.

ඉඳුල් කමින් සුද්දා අනුකරණය කළ කළුසුද්දන් පර සුද්දන්ට වඩා බෝ ගරුගම්භීරය. ඩීඒට ඒ ගැන අමුතුවෙන් හිතන්නට කාරණා නොවීය. මේ වන විට දෙවන ලෝක යුද්ධයේ බියකරු හානිවලින් සමස්ත ලෝකයාම අන්ත අසරණ වී දැඩි පීඩාවකට පත්ව හුන් අයුරු අපේ ඩී.ඒ. මැනවින් අත්දැක්කේය. ඔහු ජනතාව අතර සැරිසරයි. අහිංසක ගොවි ජනයා එක පැත්තකින් ද ධීවර ජනයා තවත් පැත්තකින් ද ඔහු අභිමුව පවසන්නේ තමන් පත්ව හිඳිනා දැඩි අසහනකාරී පීඩාවන් ගැනය. හේ ඔවුන්ගේ කන්නලවු කෙරෙහි බෝ සාවධානව සවන් දෙයි. විසඳුම් සොයන හැටි කියයි.

ඔය අතරේ පළමුවැනි පාර්ලිමේන්තු මහ මැතිවරණ සමය උදා විය. ඩීඒ තරග කළේ හම්බන්තොට ආසනයට නොවේ. අලුතින් බෙදා වෙන් කෙරුණු බෙලිඅත්තටය. හම්බන්තොට අසුනට වරම් ලද්දේ ඩීඒගේ මඟ පෙන්වීම මත ඔහුට මහජන සේවය සඳහා දොරගුළු විවර කර ගන්නට මඟ හසර පෑදුණු සොහොවුරාගේ ජ්‍යෙෂ්ඨ පුතණුවන්ටය. ලක්ෂ්මන් රාජපක්ෂටය.

බෙලිඅත්තත්, හම්බන්තොටත් ආසන දෙකෙහිම ජයග්‍රහකයෝ වූයේ සුළු පියාණන් වූ ඩීඒ හා ඥාති පුතණු ලක්ෂ්මන්ය. ලක්ෂ්මන් ඡන්ද 8756ක් ලැබ හම්බන්තොටින් මැතිසබයට සුදුසුකම් ලබද්දී, ඩී.ඒ. 14007ක් හිමි කර ගනිමින් ප්‍රතිවාදියාට වඩා වැඩි ඡන්ද 8022කින් බෙලිඅත්තෙන් පාර්ලිමේන්තුවේ අසුන් ගත්තේය.

හේ සිය සොහොවුරා මෙන්ම ආරිය සිංහල ඇඳුමක් හැඳ නිබඳවම ගෙල වටා කුරහන් පැහැ සළුවකින් සැරහී හුන්නේය. රාජපක්ෂලා ගිරුවාපත්තුවේ පමණක් නොව රුහුණේ ද සිටිනා ප්‍රභූ පැලැන්තියේ නම් දරමින් සිටියද වැඩිමහල් සොහොවුරන් දෙන්නා මෙන්ම ඩීඒද ඔවුන් නියෝජනය කළ පැලැන්තියට ගරු නොකළේය. ඔවුන්ගේ තුච්ච හැසිරීම් අලුයම ලූ කෙළ පිඩක් සේ ඒ සියල්ල බැහැර කළේය.

හෙළ බොදු දිවයින වසා පැතිරැති සමාජ අසාධාරණය ඔහු නොරිස්සුවේය. ඒ අතර, ප්‍රමුඛතාවක් ගිරුවායේ අසරණයන් විඳින අනේක විධ කෙනෙහිලිකම්වලින් මුදා ගන්නට ඇවැසි පියවර අප්‍රමාදව ගත්තේය.

ක්ෂුද්‍ර යැයි සම්මතයක් ඇති කොටගෙන ඇති ජන සමූහයා මුළුමනින් කය වසාගෙන සිටින්නට නොහැකිව හුන් ස්වකීය උපන් බිමේ ගැහැනුන්, මිනිසුන්ට ඇඟට සරිලන ඇඳුම් පැලඳුම්වලින් සැරසී සිටින්නට එකල ඒ පෙදෙසේ හුන් වංසක්කාරයන් පනවා තිබූ තහංචි අකා මකා දමන්නට ඉඩ හසර පාදා දුන්නේ ඩී.ඒ. ය. කුලහීනයන් යැ යි පාරම්පරිකව කායිකවත් මානසිකවත් කෙලෙසන ලද ඔවුන් නේක පැහැයෙන් ඇඟලන ලද වතින් පෙරහරකින් ඡන්ද පොළට ගියේ ඩීඒගේ මඟ පෙන්වීම මතය. උඩුකය වසා නොගෙන එතෙක් කලක් ලැජ්ජාවෙන් ඇඹරෙමින් ගමන් බිමන් ගිය කාන්තාවෝ එදා ඩී.ඒ. ට පින් දෙමින් ආශිර්වාද කළහ. වංසක්කාරයන් එන විට පාර අයිනකට වී හිස බැඳි තලප්පාව ඉවත් කොට කරේ තියෙන සාළුව අතකට ගෙන දෙකට තුනට නැමී ප්‍රභූ උත්තමයා එන මඟින් ඈත්ව හිඳින්නට හුරු පුරුදුව හුන් ගැමියා එදා පටන් ඩී.ඒ. ට විතරක් නොව ඔවුනගේ දූ පුතුනට ද ඉමහත් භක්ත්‍යාදරයක් දක්වන්නේ පුරුදු වූහ.

මුල්ගිරිගල රාජ මහා විහාරය හා අවට පිහිටි කසාගල, නයිගල, කොන්දගල, බිසෝගල ප්‍රමුඛ සෙසු පූජනීය බෞද්ධ සිද්ධස්ථානයන්හි නාහිමිපාණන් වහන්සේගේ ඇසුරේ පැටි සංධියේ පටන් හැදුණු වැඩුණ ඔහු ඒ හැම පන්සලක්, විහාරයක්ම ආරක්ෂා කරන්නට, රැකගන්නට පියවර ගත්තේය.

එවක පාර්ලිමේන්තුවේ පළාත් පාලන ඇමැති මෙන්ම සභානායකවරයා වූ එස්.ඩබ්ලිව්.ආර්.ඩී. බණ්ඩාරනායක මහතා ආණ්ඩු පක්ෂයෙන් විපක්ෂයට පිය නඟද්දී ඔහුගේ සෙවණැල්ල සේ පසුපසින් පැමිණ විපක්ෂයේ අසුන් ගත්තේ එවක පාලකයන් ද සුද්දන්ට කත් අදිමින් තමන්ගේ තැන රැකගන්නට ගන්නා උත්සාහය කෙරෙහි දැඩි සේ හුන් කලකිරීම පෙන්වමිනි.

ඊට පසු 1952දී ඡන්ද 17382ක් ගනිමින් ද 1956 මහ මැතිවරණයේදී බෙලිඅත්ත ඡන්දදායකයන්ගේ ඡන්ද 26215 ක් ද ලැබ පාර්ලිමේන්තුවේ අසුන් ගත්තත්, 1960 මාර්තු 19 වැනිදා පරාජයට පත් වූයේ එක්සත් ජාතික පක්ෂයේ ඩී.පී.අතපත්තුටය. ඒත් 1960 ජූලි මැතිවරණයේදී 35992 කුගෙන් යුත් ඡන්දවලින් 15121ක කතිර ලැබ සිය අසුන රැක ගත්තත්, ඔහු 1965 දී පරාජයට පත් වූයේ යළිත් සිය ප්‍රතිවාදියා වූ ඩී.පී.අතපත්තුටයි.

මැතිනියගේ සභාග ආණ්ඩුව විනාශ කර දමන්නට ඇවැසි අන්දමින් මිටි ගණනින් පුරවන ලද සල්ලි පෙට්ටි ආණ්ඩු පක්ෂයේ මැති ඇමතිවරුන් අතට පත් කරන්නට වූහ. ඔවුන් යෙදූ උපක්‍රමයට ප්‍රබල ඇමැතිවරුන් කීපදෙනකු ඇතුළු මහජන නියෝජිතයන් දාහතර දෙනකු අල්ලා ගන්නට ප්‍රතිගාමීත්වය සමත්කම් පෑවේය.

ඩී.ඒ.අල්ලා ගැනීමට ද කුමන්ත්‍රණකරුවෝ දැල් එලූහ. ඩී.ඒ. ලා ට ඉතා කිට්ටුවන්ත මහා ප්‍රභූවරයෙක් රුපියල් පනස්දාහකට වැඩි සල්ලි පුරවා ගත්තු සූට්කේසයක් ගෙන ආවේය. ඒ වන විටත් ඩී.ඒ.බොහෝ ආර්ථික අසීරුතාවලින් පෙළුණි. අර ප්‍රභූවරයා කුමන්ත්‍රණකරුවන් එවන ලද්දේ දැඩි විශ්වාසයක් ඇතිවය. කාරණා කාරණ කියමින් අර ප්‍රභූවරයා ඩී.ඒ. නම්මවා ගන්නට දත කෑවේය. ඒත් ඩී.ඒ.රාජපක්ෂයෝ ඊට අවනත ‍නොවූහ. අන් කිසිදු දවසක කිසිදු දෙයකට කෝප නොගන්නා, බොහෝ සාන්ත දාන්ත, මැදමුලනේ රාලහාමි එදා නම් හිතට නැඟුණු කේන්තිය වාතලයට බැහැර කළේය. සුන් වූ බලාපොරොත්තුවෙන් අර මහා දැවැන්ත ප්‍රභූවරයා ආපහු හැරී ගියේ පස්සවත් නොබලාය.

ඩී.ඒ. බොහෝ ගුණගරුක පුද්ගලයෙකි. සිය හෘදය සාක්ෂියට නො ගැළපෙන කිසිවක් කිසිදු විටෙක නොකළේය. ඒ නිසාම රටත් ජාතියත් රැක ගන්නට සුදුසු කටයුතු සුදුසු වෙලාවට කරමින් තමන් මහා යෝධයකු කරන්නට කතිර කෑල්ල පූජා කළ බෙලිඅත්තේ ඡන්දදායකයින්ට නිගරුවක් වන කිසිවක් කිසිදු වෙලාවක කරන්නට හීනෙකින්වත් හිතුවේ නැත. එහෙයින් 1965 මහ මැතිවරණයෙන් පැරද ඔහු සිය නිවහනට වී පියාදර බිරිය දන්දිනා සමරසිංහ දිසානායක පාලටුවේ හාමිනේ හා දරුවන් නවදෙනා සමඟ දුෂ්කර ක්‍රියාවේ යෙදුණේ අයියාගේ ඡන්ද ව්‍යාපාරවලට ඇවැසි මිල මුදල් විය පැහැදම් කර යාන්තමින් ඉන්න ගේ කෑල්ලත් ඉඩම් කෑල්ලත් විතරක් හිමි වූ ගොවි නියමුවකු හැටියටය.

මොන තරම් අසීරුතා ඇතත් ඔහු තමන් හා එක්ව හිඳිනා ගිරුවායේ ගැමියනගේ ඕනෑ එපාකම් පිරිමසන්නට තත්පරවීමට අමතක නොකළේය. ඔහුගේ සිහිනය වූයේ ගොවිතැන් බත සරිකරන්නට දිවා රෑ වෙහෙස වෙමින් කාෂ්ටක පොළොවේ ගිනි ගහන අවුවේ පිච්චෙමින් වෙහෙසෙන ගොවි සිත් තුටු පහටු කිරීමය. ඒ වෙනුවෙන් ඔහු මුරුතවෙල ජලාශය නිමහම් කළේය. චන්ද්‍රිකා වැව ඉදි කරන්නට මංගල පස් පිඩැල්ල කපා සුවහසක් ගොවි දනන්ගේ කෙත්වතු සරු කරන්නට දියවර දෙන්නට පියවර ගත්තේ ඊට පෙරය. එදා ඔහු තරම් අන් කිසිවකු සතුටු වූයේ ද යන්න දන්නෝ ඔවුන්ම පමණි. කිරම හොය වාරි ව්‍යාපාරයක් සේ නංවන්නට පියවර ගත්තේ ඔහුය. කෘෂිකර්මාන්තය හා වාරි කර්මාන්තය පිළිබඳ මනා අවබෝධයකින් හෙබි ඩී.ඒ. රාජපක්ෂයෝ ඒවා නිර්මාණය කළ නිසා තමන් ඇතුළු සිය ගණනක් ගොවි පවුල් බඩ වියත රස්සා කරගන්නා බව අපට සිහිපත් කළේ බඳගිරිය වැවෙන් පෝෂණය වන කෙත්යායේ අසිරිය විඳිමින් එහි එක් අන්තයක දිවි ගෙවනා සිරිපාල දිසානායක ගොවි පුත්‍රයායි. බඳගිරියේ හැම ගෙයකම පැරැණියන් ඩී.ඒ.අදහන්නේ දෙවියකු සේය.

ඔහු සිය බල වපසරියේ පිහිටි ගංතුලාන රාශියක පාසල් තනවමින් හෙට දවසේ මෙලොව එළිය දකින දරුවනගේ දෑස් පෑදීමට කළ මෙහෙය අනූපම සේවාවෙකි. සංඛ්‍යා ලේඛන අනුව බැද්දේගම නම් නවකතාව ලියා ලෝ පුරා මහත් කීර්තියක් අත්කරගත් හම්බන්තොට දිසාව භාරව හුන් සුදු ආණ්ඩුවේ උප ඒජන්ත ලෙනාඩ් වුල්ෆ් එහි ගත කළ කාලය තුළ 1908 සිට 1911 දක්වා කාලයේදී මුළු දිස්ත්‍රික්කයේම දරුවන්ගේ අධ්‍යාපනයට අලුතින් ඉදි කෙරුණේ පාසල් දොළසකි. එදා පැවති පාසල් ගණන තිස් දෙකකි. ඒත් ඩී.එම් හා ඩී.ඒ. රාජපක්ෂ දෙසොවුරෝ 1960 වන විට දිස්ත්‍රික්කය පුරා අලුතින් පාසල් එකසිය හැට නවයක් දක්වා වැඩි කරන්නට උත්සුක වූයේ හම්බන්තොට මහ පොළොව එක්ක හරි හරියට හැප්පෙන ගොවියන්ගේ හා අවු වැසි පිනි හුළං කොඩ නොතකා ජීවිතයත් මරණයත් අතර මහා බියකරු හටනක යෙදී අපේ බත් පතට ඇවැසි මාළු පිනි සපයන්නට දත කන ධීවර ජනයාගේත් අනාගත පරපුර සාක්ෂරතාව අතින් ඉහළට ඔසවන්නට ගත් දැවැන්ත මෙහෙවර කෙතරම් අගනේ ද? කෙතරම් ප්‍රශස්ත ද?

රිච්මන්ඩ් විදුහලේදී මනා ශික්ෂණයක් උකහා ගත්, මනා දැනුමක් උරාගත් ඩී.ඒ. රාජපක්ෂයෝ ප්‍රායෝගිකව නිවැරදි සේ ඒ දැනුම බොහෝ හොඳින් භාවිතයේ යෙදූහ.

බෞද්ධ දර්ශනය මත පිහිටා සියලු දෙනාට මෙත් සිතින් සැලකීම ඔහු සිය දියණියන් තිදෙනාටත්, පුතණුවන් හය දෙනාටත් හුරු පුරුදු කළේය. එනිසාම ඔවුහු බොහෝ යහපත් ගුණගරුක, රටට වැඩදායක, සැමදෙනාට මිත්‍රශීලිව සලකන හොඳ පුරවැසියන් සේ හැදුණහ. වැඩුණහ. එහිලා ඩී.ඒ. ගේ ආදරණීය පාලටුවේ හාමිනේ ද ඇය හැදී වැඩුණු පරිසරයෙන් උකහා ගත් සියලු යහගුණ ගති සිරිත් අඩුවකින් තොරව ඔවුන්ට දායාද කළාය.

මවුආර වාරි යෝජනා ක්‍රමයක සිහින ඔහු දැක්කේය. උමා ඔයේ දිය කඳ හම්බන්තොට කාෂ්ටක පොළොවේ වියැළි බව පහ කරන්නට හැකි වග දොස්තර විකුම්සිහගේ ඇසුරින් ලද නිසා වියළී, කාෂ්ටක වී ඇති දකුණේ දකුණ, ඇල් ජලයෙන් නිතර සරුසාර වන අයුරු දකින්නට ‍ හේ සිහින මැවුවේය. ඒත් ඒ සියලු සිහින හිත් හතන්හි දරාගෙන 1967 ඉල් මහේ එකොළොස් වැනිදා හේ දැයෙන් සමු ගත්තේය.

1951දී එවක පළාත් පාලන ඇමැතිවරයා වූ එස්. ඩබ්ලිව්.ආර්. ඩී. බණ්ඩාරනායක මහතා ආණ්ඩු පක්ෂයෙන් විපක්ෂයට පා නැඟූදා ඔහුත් සමග ඒ පැත්තෙන් මේ පැත්තට පිය නැඟූ ඩී.ඒ. රාජපක්ෂයාණෝ අනතුරුව ශ්‍රී ලංකා නිදහස් පක්ෂය නමින් නව දේශපාලන පක්ෂයක් නිර්මාණය කොට රාජ්‍ය බලය අත්පත් කර ගන්නට වෙහෙස වූ පෙරමුණේ රාළලාගෙන් අංක දෙක සේ සටහන්කරුවාණන් යැයි සටහන් කළ හොත් නිවැරදිය. එදා ඔහු හා තවත් කීපදෙනෙක් බණ්ඩාරනායක සිරිමතාණන් හා ගත්තු තීරණයේ නිරවද්‍යභාවය අද ලාංකේය අපට පමණක් නොව ප්‍රගතිශීලී සෙසු ලෝකයාටත් ගෙන දෙන්නේ මහත් වූ ආස්වාදයකි. අපේ මේ පින්බිම දඩබිමක් කර ගන්නට, අපට හතුරුකම් කරන්නට පැය විසිහතර පුරා ඔත්තු සේවා යොදවමින් කුමන්ත්‍රණ කරන බටහිරයන් කෙරෙහි තඹ සතයක සැලකිල්ලක් නො දැක්වූ සමාජ ප්‍රජාතන්ත්‍රවාදය ඔස්සේ පමණක් නොව මානුෂීයවාදී ලොවක් ලොවේ තනන්නට වෙහෙසෙන දේශමාමකයනට ගෙන දෙන ඉලක්කයට ඩී.ඒ. රාජපක්ෂ නම් උතුම් මිනිසා පෙන්වා ඇති ආදර්ශය මිල කළ නොහැක්කේමය.

දොන් දාවිත් රාජපක්ෂ නම් මිනිසා හා දෝන ගිමාරා වීරකෝන් රත්නායක නමැති උත්තම ගණයේ යුවළක් මේ බිමේ පහළ නොවන්නට ත්, ඩී.ඒ. රාජපක්ෂ හා දන්දිනා සමරසිංහ දිසානායක පාලටුවේ හාමිනේත් නැත්නම් අද මේ පින් බිම තවමත් හෙළයනගේ රුහිරුවලින් නැහැවෙමින් පවතින ඉන්දීය සයුරේ ලේ බින්දුව සේ ලොව පුරා කුප්‍රසිද්ධ වනු සිකුරුය.

යුගයෙන් යුගයට රටකට රාජ්‍යයකට යුග පුරුෂයෝ පහළ වෙති. ඔවුන් ජන හදවත්හි මතක සටහන් තබන්නේ කිසි දිනෙක නොමැරුණු මිනිසුන් ලෙසටයි. ඩී.එම්. මෙන්ම ඩී.ඒ. ද මහා යුග පුරුෂයෝය. රටක ලොවක ඉතිහාසය අලුතින් ලියැවෙන්නේ ඔවුන් නිසයි.

ඩී.ඒ. හා දන්දිනා මාතාව විසින් සිරිලක් මවට ජනිත කළ මහින්ද රාජපක්ෂ හා ගෝඨාභය රාජපක්ෂ දෙසොහොවුරන්, ලක් ඉතිහාසයේ පමණක් නොව ලෝක ඉතිහාසයේ ද සදා අමරණීය චරිත සේ සටහන්ව ඇති වග අපට විශ්වාසය.

මේ පින් බිම කෘෂිකර්මාන්තයෙන් මෙන්ම අපනයන භෝග වගාවෙන් ද උසස් තත්ත්වයකට ඔසවා තබන්නට ඩී.ඒ. දැරුවේ අපමණ මහන්සියකි. වෙහෙසකි. ඔහු තම ගංතුලාන ආශ්‍රිතව පිහිටි දනවුහි වඩාත් සාර්ථකව වගා කෙරුණු පැඟිරි වගාව නංවාලීමට ඇප කැප වූයේය. එයින් නොනැවතුණු ඔහු ඇඹිලිපිටියේ කඩදාසි කම්හලක් නිර්මාණය කර කර්මාන්ත ක්ෂේත්‍රයෙන් අලුත් අලුත් දෑ නිපැයීමට පාලක පක්ෂයත් ජනතාවත් මෙහෙයවන්නට පියවර ගත්තේය. රුහුණේ මනාව කපු වැවෙනා නිසා ඔහු කපු වැවීමෙන් ද රටේ ආර්ථිකයට වාසි අත්කර ගත හැකි බව වටහාගෙන බටඅත ගොවිපළ ආශ්‍රිත ගම්බිම් රැසකම කපු වගාව අරඹන්නට තත්පර විය.

වීරකැටිය මුල් කොටගත් දොන් දාවිත් රාජපක්ෂ පරපුරේ රාජපක්ෂ නාමාවලියේ දිදුලන තාරකා බො‍හෝය. ලක්ෂ්මන් රාජපක්ෂ, ජෝර්ජ් රාජපක්ෂ ප්‍රමුඛ දූ පුතුන් හත් දෙනෙකි. රුහුණේ සිංහයා යනුවෙන් චිරප්‍රචලිත වූ ඩී.එම්. රාජපක්ෂයාණන්ට, පවුලේ වැඩිමල්ලා වූ දොන් චාල්ස් රාජපක්ෂ කොරනෙල් රාලහාමිට දුවලටත් පුතුන්ටත් හිටියේ එක දියණියකි. ඇය බ්‍රියට්‍රීස්ය.

ඩී.ඒ.ගේ පරපුරේ චමල්, ජයන්ති, මහින්ද, චන්ද්‍රා, ගෝඨාභය, බැසිල්, ඩඩ්ලි, ප්‍රීති හා චාන්දනී (ගාන්ධිනී) රාජපක්ෂ යනුවෙන් දූ පුතුන් නව දෙනෙකි. මේ නව දෙනාගෙන් ජයන්ති ද ප්‍රීති හා චන්ද්‍රා ද කලකට පෙර ජීවිතවලින් සමු ගත්හ.

ඩී.ඒ. ගේ මද්දු පුතා තරම් ජනප්‍රිය චරිතයක් මෙසිරිලක තවත් ඇත්තේ නැතැ යි අමුතුවෙන් කිව යුතු නොවේ. ඔහු බොහෝ නිහතමානීය. නිරහංකාරය. ලොව වත්මනේ සිටින මහා බලගතු රාජ්‍යයන්හි රාජ්‍ය නායකයින් සමඟ සිටිනා විට අන් සියල්ලන්ට වඩා කැපී පෙනෙන රාජ්‍ය නායකයා මහින්දය. ඔහු මේ බිමේ දෙවරක් ජනාධිපති ධුරයට හිමිකම් කියන්නට තරම් වාසනාවන්ත විය. දෙවරක් අගමැති තනතුරේ (වර්තමානයේදී පවා) කටයුතු කරන්නට ඔහු පින් කර ඇත්තේය.

අද සිරිලක භාරකාරත්වය දරනා ගෝඨාභයගේ පවතින විනයගරුක බව අන් කිසිදු රාජ්‍ය නායකයකු සතුව ඇතැයි කියන්නට හැකියාවක් තිබේ දැයි සිහි කට යුතුය.

කෙසේ වුව ද රටට දැයට සමයට 1936 සිට ඩීඑම්ද අනතුරුව 1945 සිට 1967 දක්වා ඩීඒ විසින් ද රුහුණු රටට පමණක් නොව මායා හා පිහිටි රට උදෙසා ද කරන ලද්දේ අනගි මෙහෙයකි. ඩී. එම්.ගේ ජෝර්ජ් රාජපක්ෂ ලාංකේය ධීවර ජනයා වෙනුවෙන් කළ කාර්ය භාරය එතෙක් යැ මෙතෙක් යැයි කිව නොහැකිය. ඔහු ධීවර ඇමැතිවරයා සේ කටයුතු කර සිටි සමයේදී ධීවර වරාය නීතිගත සංස්ථාව ස්ථාපිත කිරීමෙන් අපේ ධීවරයා ලද සහන අපමණෙකි.

ඩී.‍ඒ. රාජපක්ෂයාණන් ඈත ගිරුවායේ හිඳ මේ රට ගොඩනංවන්නට මැවූ සිහිනය නම් කෘෂිකර්මාන්තය මෙන්ම කර්මාන්ත ද දේශීය අනන්‍යතාවය රකිමින්, නූතනයට ගැළපෙන පරිද්දෙන් සංව‍ර්ධනය කිරීමයි. මහ පොළොවත් එක්ක හරි හරියට පොර බදනා මහ පොළොවත් එක්ක ඔට්ටු වී රටට බත සපයන්නට රැයෙත් දහවලෙත් පැල් කොටයට වී නිදි වරනා ගොවියාගේ හෙට දවස අති සාර්ථක කරන්නට ගෝඨාභයට හැකි නම් මහින්දට හැකි නම්... මහ මුහුදේ ඈත දියඹට ගොස් දහදුක් විඳින ධීවරයාගේ දරු පවුල්වලට හෙට සාර්ථක දිවි පෙවෙතකට මං සකසන්නේ නම්... රටේ සෙසු ක්ෂේත්‍රයන්හි කයත් මනසත් වෙහෙසවා රට නැංවීමට දිරියෙන් පිරිපුන් වෛද්‍ය, ඉංජිනේරු, නව තාක්ෂණයෙන් ශිල්ප දක්වන තරුණ තරුණියනට හෙට දවස ගැන යහපත් සිතිවිලි සමුදායක් මත රැඳී ඉදිරිය බලන්නට හැකියාවක් උදා කර දෙන්නේ නම්, කන්තෝරුවල කුරුටු ගානා ලිපිකාර ශ්‍රේණීන්හි මෙන්ම අපේ දරු දැරියනගේ ඇස් පාදන ගුරු පරපුරට නිසි ගෞරවයක් ඇතිව දරු දැරියනට 'අ'යනු 'ආ'යනු කියා දෙන්නට ඉඩක් කඩක් ඇති වේ නම්, රට පුරා රජ කරන පාතාල සිටුවරුන් ද කුඩු ජාවාරම්කාරයන් ද කම්බස් කරන්නේ නම්... අපට යහපත් රටක සැනසිල්ලේ සුව පහසුව කල දවස ගෙවිය හැකිය.

නව සියවසේ අභියෝග ජය ගන්නට හැම ක්ෂේත්‍රයකටම අලුතෙන් හිතන්නට මතන්නට හැකි නිර්මාණශීලි මිනිසුන් විශේෂයෙන්ම වත්මන් තරුණ පරපුර ගොනු කරගත හැකි වූවොත්... නව තාක්ෂණවේදයට අපේ සංස්කෘතික වටිනාකම් හර පද්ධතීන් බැහැර නොකොට අලුත් ලෝකයේ හැටියට හැඩගැසෙන්නට වත්මන් පරපුර සතු සැඟවුණු දක්ෂතා, කුසලතා ඔප් නංවන්නට රට ගැන දැය ගැන ඇල්මක් ආදරයක් දක්වන සිංහල, දෙමළ, මුස්ලිම් ආදී පටු මතිමතාන්තරවලට හිර නොවුණු දේශප්‍රේමයෙන් ඔද වැඩුණු තරුණ තරුණියන් සිය දහස් ගණනින් එක පෙළකට එක ගොඩකට රොක් කර ගත හැකි නම්... සත් සමුදුර තරණය කරමින් ද අභ්‍යවකාශයේ ඈත එපිට දැල්වෙන ඉර හඳ තාරකාවල අනාගත පැවැත්ම කෙබඳු දැයි ගවේෂණය කරන්නට හෙළ දෙසේ හෙළයනට අවස්ථාවක් ජාති, ආගම්, කුල ඈ කිසිදු භේදයකින් තොරව යොමු කරන්නට හැකි නම්...

ඔහු රිච්මන්ඩ් විද්‍යාලයෙන් සිප් සතර හැදෑරුව ද ගම අවට සියලු පන්සල්වලින් ජීවිතයට ඇවැසි ආධ්‍යාත්මික ගුණධර්මවලින් සිත පුරවා ගත්තේය. ඒ හුරුව වෙත දූ පුතුන් ද යොමු කළේය. එනිසාම ඔහුට යහපත් ජීවිතයක් ඔස්සේ සමාජය දිහා පැහැදිලි දැක්මකින් බැලිය හැකි විය. ඔහු දූ පුතුනට ද කියා දුන්නේ තමන් උගත ඒ පාඩම්ය. ඩී.ඒ.සිය බිරිය හා දරුමල්ලන් ද නෑ සියන් ද දේශපාලන හා සමාජ ක්‍රියාකාරීන් ද හැර දමා දිවියෙන් සමුගනිද්දී උපයා සපයා ගෙන තිබුණේ මනුස්සකමින් පිරුණු ගැමි ජන හදවත්ය. ඒ හදවත් රුපියල් කෝටි ප්‍රකෝටි ගණනකට වඩා වටින්නේය. අද ඔහුගේ දූ පුතුන් ද මුනුපුරු මිනිපිරියන් ද අස්වනු නෙළා ගන්නේ එදා ඩී.ඒ. වගා දිගා කළ ගිරුවාපත්තුවේ මිනිසුන් තුළ ඉතිරි කර තබා ගිය යහගුණ සමුදායයි. ඒ යහගුණ ඔහුගේ දරුමල්ලන් ද භුක්ති විඳින්නේ ඔහු ගිය මඟ යහමින් වැපුරූ අස්වැන්න නෙළා ගැනීමයි. යහගුණට තක්සේරු කළ හැකි අන් කිසිදු වටිනාකමකට නොහැකි වග අදින් අවුරුදු පනස් තුනකට පෙර ඩී.ඒ. රටට දැයට කියා දුන් පාඩමයි. අපිදු ඒ පාඩම නිසි සේ ප්‍රගුණ කළ හොත් කිසිදාක වරදින්නේ නැත.

ඔහු වෙනත් ශුද්ධ වූ ලොවක හිඳ පුතණුවෝද මුනුපුරු මිනිපිරියෝ ද රට කරන්නට කැප වී හිඳින දසුන තුටු පහටු සිතින් බලා හිඳිනා වග සහතිකය.

ඩී.ඒ.රාජපක්ෂයාණන්ගේ නාමය සදාකල් දිනේවා!!!

සුගතපාල මැන්දිස්

යම් ස්ථානයකට ඇතුළු වීමේදී QR කේතය ස්කෑන් කිරීමෙන් හෝ කෙටි පණිවිඩ මගින් 1919 දත්ත ගබඩාවට අදාළ තොරතුරු ලැබීමෙන් පසු අදාළ පුද්ගලයාට එම පරිශ්‍රයට ඇතුළත් වීමට අවසර ලැබේ ද යන්න දුරකතනයේ දර්ශනය වනු ඇත. එමඟින් ආසාදිතයන් හෝ නිරෝධායනයට ලක් කළ පුද්ගලයන් කිසියම් පරිශ්‍රයකට ඇතුළු වීම අවහිර කළ හැකි වේ.

මේ වන විට ලොව පුරා පැතිර යන කොවිඩ් 19 වසංගත තත්ත්වය ලෝක ජන ජීවිත කෙරෙහි මරු පහරක් එල්ල කර තිබෙන ආකාරය පිළිබඳව අමුතුවෙන් කතා කළ යුතු නැත. එහෙත් පියවි ඇසට හෝ නොපෙනෙන වයිරසයක් විසින් මිනිස් ජිවිතවලට විශාල බලපෑමක් එල්ල කරන විට ඒ බලපෑම සමනය කර ගනිමින් දෛනික ජන ජීවිතය යළි පණ ගන්වා ගත යුතු ආකාරය පිළිබඳව නොයෙක් මාතෘකා ඔස්සේ පුළුල් සාකච්ඡා ඇති කර ගත යුතු වේ.

ඇහැට නොපෙනෙන කොවිඩ් මාරයාගෙන් ආරක්ෂා වීම, වසංගතය හමුවේ නව සෞඛ්‍ය පුරුදුවලට හුරු වීම යනාදී කාරණා සම්බන්ධයෙන් විවිධ සීමා මායිම් ඔස්සේ කතාබහ කෙරෙමින් පවතී. ඒ හා සමගාමීව මෙම වසංගතය මැඬපවත්වා ගැනීම සඳහා නව තාක්ෂණික ක්‍රමවේදයන් දායක කර ගන්නේ කෙසේ ද යන්න පිළිබඳව ද අවධානය යොමු කළ යුතු වේ.

ඩිජිටල් තාක්‍ෂණය

ලොව පුරා ව්‍යාප්තව තිබෙන කොවිඩ් -19 වයිරසය පාලනය කිරීම සඳහා මහජන සෞඛ්‍ය ප්‍රතිචාරයට සහාය වීම වෙනුවෙන් ඩිජිටල් තාක්‍ෂණයන් උපයෝගී කර ගෙන ඇති අතර, ජනගහන නිරීක්‍ෂණය, සිද්ධි හඳුනා ගැනීම, සම්බන්ධතා සොයා ගැනීම, සංචලතා දත්ත සහ මහජනයා සමඟ සන්නිවේදනයේ යෙදීම යන කාරණා පිළිබඳව මනා සම්බන්ධීකරණයක් පවත්වා ගැනීම කෙරෙහි ලෝක සෞඛ්‍ය සංවිධානය පවා අවධානය යොමු කර තිබුණි. මෙම වසංගතය හමුවේ ඩිජිටල්-සෞඛ්‍ය තාක්‍ෂණික විසඳුම් සඳහා පෙර නොවූ විරූ ඉල්ලුමක් මතු වී තිබෙන බැවින් ඊට අනුරූපීව මෙරට තොරතුරු තාක්ෂණවේදීන් විසින් නිර්මාණය කරනු ලැබූ ''පරිස්සමෙන් ඉන්න" (Stay Safe) මෘදුකාංග යෙදුම පිළිබඳව දැන ගත යුතු කරුණු කිහිපයක් මෙම ලිපියෙන් විස්තර කෙරේ.

''පරිස්සමෙන් ඉන්න'' (Stay Safe) යනු ආසාදිතයන්ගේ සම්බන්ධතා සොයා ගැනීම සහ ආසාදනය විය හැකි වාහකයන්ගේ නිදහස් සංචරණය සොයා ගැනීම යන අභියෝග දෙකටම එකවර විසඳුම් සපයන මෘදුකාංග යෙදුමකි. තොරතුරු හා සන්නිවේදන තාක්‍ෂණ නියෝජිතායතනය (ICTA) හඳුන්වා දෙන මෙම යෙදවුම සඳහා ශානක පෙරේරා, නිසු මේයන්, ක්‍රිස්ටෝර් අදිකාරම් සහ කණිෂ්ක බණ්ඩාර යන ස්වේච්ඡා මෘදුකාංග වෘත්තිකයන් සිය දායකත්වය සපයා දී තිබේ. භාවිතයට පහසු හා සරල මෙම මෙවලම කොවිඩ් 19 වැළැක්වීමේ බලධාරීන්ට, වාණිජ හා රාජ්‍ය අංශයේ ආයතනවලට සහ සියල්ලටම වඩා පුරවැසියන්ට මහඟු ප්‍රයෝජනයක් වනු ඇති බව තොරතුරු හා සන්නිවේදන තාක්‍ෂණ නියෝජිතායතනය පවසයි.

QR කේතය

මෙම මෘදුකාංගය ක්‍රියාත්මක වනුයේ QR කේත මත පදනම් කර ගෙනය. www.staysafe.gov.lkයන වෙබ් ලිපිනය වෙත පිවිසීමෙන් සෑම ආයතනයකටම අනන්‍ය QR කේතය හිමිකර ගත හැකිය. අන්තර්ජාලය සම්බන්ධිත දුරකතනයක් ඇති ඕනෑම කෙනකුට ආයතනයක් සඳහා QR කේතයක් ජනනය කළ හැකි වන අතර එය සුපිරි වෙළෙඳපොළක්, කුඩා එළවළු වෙළෙඳ සලක්, රජයේ, පෞද්ගලික හෝ වේවා සංවිධානයේ නම, වීදි ලිපිනය, හිමිකරුගේ නම හා දුරකථන අංක වැනි තොරතුරු කිහිපයක් සපයා දීම ඊට ප්‍රමාණවත්ය. මේ කිසිඳු ක්‍රියාවලියක් සඳහා රුපියලක මුදලක් හෝ වැය නොවීම සුවිශේෂීය. QR කේතය ගැනීමෙන් අනතුරුව සිදු කිරීමට ඇත්තේ එහි මුද්‍රිත පිටපතක් ගෙන එය අදාළ ආයතනයේ හෝ වෙළෙඳසලෙහි දොරටුවේ ප්‍රදර්ශනය කිරීමට පමණි. සිංහල, දෙමළ සහ ඉංග්‍රීසි යන භාෂා තුනෙන්ම අදාළ තොරතුරු ලැබීමට සලස්වා ඇත. එම ආයතනයට හෝ වෙළෙඳසලට පැමිණෙන ඕනෑම අයකු QR කේතය ස්කෑන් කර පරිශ්‍රයට පිවිසෙන විට පද්ධතිය ස්වයංක්‍රීයව උපාංගය මගින් විස්තර එකතු කරමින් ඒවා සටහන් කරනු ලබයි. මෙම ක්‍රියාවලිය අමුත්තන්ගේ ලැයිස්තුවක් නඩත්තු කිරීමේ කාර්යයකට සමාන වේ. එක් ස්ථානයකට ඇතුළු වන අවස්ථාවේදී ලියාපදිංචි වීමෙන් පසු දිවයිනේ ඕනෑම ස්ථානයකට යළි ලියාපදිංචියකින් තොරව ඇතුළත් වීමට හැකියාව ලැබේ.

මෙම පද්ධතියේදී එක් ස්කෑන් පරීක්ෂණයකින් පවා පුද්ගලයකුගේ තොරතුරු ස්ථාපිත වේ. උදාහරණයක් ලෙස ගතහොත් නොවැම්බර් 30 දින ප.ව 3.30ට A නමැති පුද්ගලයා R නම් සුපිරි වෙළෙඳසලේ T නම් ශාඛාවට පැමිණ ඇති බව තහවුරු වනු ඇත. මෙහි විශේෂත්වයක් වන්නේ එම ස්ථාන අනිවාර්යයෙන්ම ගොඩනැඟිලි වීම අවශ්‍ය නැත. ඒවා දුම්රිය හෝ බස් රථ හෝ ඕනෑම ආකාරයේ ප්‍රවාහන මාධ්‍යයක් විය හැකිය.

ආසාදිතයකු හඳුනා ගැනීම

යම් ස්ථානයකට ඇතුළු වීමේදී QR කේතය ස්කෑන් කිරීමෙන් හෝ කෙටි පණිවිඩ මගින් 1919 දත්ත ගබඩාවට අදාළ තොරතුරු ලැබීමෙන් පසු අදාළ පුද්ගලයාට එම පරිශ්‍රයට ඇතුළත් වීමට අවසර ලැබේ ද යන්න දුරකතනයේ දර්ශනය වනු ඇත. එමඟින් ආසාදිතයන් හෝ නිරෝධායනයට ලක් කළ පුද්ගලයන් කිසියම් පරිශ්‍රයකට ඇතුළු වීම අවහිර කළ හැකි වේ. තව ද යම් අයකු ආසාදිතයකු ලෙස හඳුනා ගත හොත් ඔහු හෝ ඇය ගමන් කළ ස්ථානවල ගැවසුණු අයට වහා ආරක්‍ෂිත පියවර ගන්නැයි කෙටි පණිවිඩයක් මඟින් දැනුම් දීමේ ක්‍රමවේදයක් මීට ඇතුළත් වීම වඩාත්ම සුවිශේෂි වේ. මෙම කොවිඩ් වසංගතය පාලනය කිරීමේදී ප්‍රබලම ගැටලුවක් ලෙස මතු වනුයේ ආසාදිතයන්ගේ සබඳතා සොයා ගැනීමට යෑමේදීය. 'පරිස්සමෙන් ඉන්න'එයට පහසුවක් වනු ඇති බව භාවිතයට ගත් කළ වැටහෙනු ඇත. මෙම තොරතුරු මත පදනම්ව, දුරකථන අංක සමඟ පළමු හා දෙවන සබඳතා පිළිබඳ සවිස්තර ලැයිස්තුවක් නිර්මාණය කරනු ලබයි. වර්තමානයේ සෞඛ්‍ය බලධාරීහු මේ ක්‍රියාවලිය සඳහා පැය ගණනක් කාලය වැය කරති. එහෙත් මෙම යෙදුම ඔස්සේ තත්පර කිහිපයකින් එම තොරතුරුම ජනනය කර සපයා දීමක් සිදු කරයි. එය සබඳතා සොයා යෑම ද වේගවත් කරනු ඇත.

මෙහි ඇති තවත් වාසියක් වන්නේ කඩදාසි ගොනු තබාගෙන අමුත්තන්ගේ ලේඛනයක් නඩත්තු කිරීමට අවශ්‍ය නොවීමය. පෑන්, පැන්සල්, කඩදාසි තබාගෙන පිටස්තරයන්ගේ විස්තර ඇතුළත් කිරීමට වඩා QR කේතයක් ප්‍රදර්ශනය කිරීම ඕනෑම ආයතන හිමිකරුවකුට හෝ වෙළෙඳසල් හිමිකරුවකුට පහසුදායී වනු ඇත. පැමිණියේ කවුරුන් ද, කුමන වේලාවක ද, කොපමණ කාලයක් රැඳී සිටියේ ද, දිනපතා හෝ සතිපතා දැන ගැනීමට හැකිය. මෙහි වැදගත්ම දෙය නම්, කොවිඩ් -19 ආසාදිතයකු සිය පරිශ්‍රයට ඇතුළු වන්නේ දැයි කියා වහාම දැන ගැනීමට හැකි වීමයි. තොරතුරු හා සන්නිවේදන තාක්‍ෂණ නියෝජිතායතනය පවසන ආකාරයට මෙම පද්ධතියේ අවසාන ප්‍රතිලාභ හිමි වන්නේ රටේ පුරවැසියන්ටය. එය හුදෙක් සෞඛ්‍ය බලධාරීන්ට විශාල සහායක් ද වේ.

අනාගත අනුවාද

'පරිස්සමෙන් ඉන්න' (Stay Safe) කොවිඩ් ආසාදිතයන් සලකුණු කරන බැවින් වයිරස ආසාදිතයකු සංචරණය කරන්නේ නම් ඒ බව වහා නිරීක්ෂකයන්ට දැන ගත හැකි වේ. මෙහි අනාගත අනුවාද (Update Version)වලදී නිරෝධායනය යටතේ සිටින පිරිස් පොදු ස්ථානවලට ඇතුළු වීම වැළැක්වීම සඳහා මෙම පහසුකම පුළුල් කළ හැකි බව තොරතුරු හා සන්නිවේදන තාක්‍ෂණ නියෝජිතායතනය තහවුරු කරයි. ශ්‍රී ලංකාවේ ජනගහනයෙන් සියයට 60-70 අතර ප්‍රමාණයකට ජංගම දුරකථන හිමි අතර, ඔවුන්ගෙන් අඩක් ස්මාර්ට් දුරකථන භාවිත කරති. QR ස්කෑන් කිරීම සඳහා අනිවාර්යයෙන් ස්මාර්ට් ජංගම දුරකතනයක් තිබිය යුතුය. එබැවින් 'පරිස්සමෙන් ඉන්න' (Stay Safe) යෙදුම, එහි ආරම්භක අවධියේදී අදාළ වන්නේ ජනගහනයෙන් කොටසකට පමණි. ස්මාර්ට් ජංගම දුරකථන භාවිත කරන්නන්ට තිබෙන්නේ අදාළ ස්ථානයේ QR කේතය [Location ID] 'ස්කෑන්'කර ලැබෙන පෝරමයේ ජාතික හැඳුනුම්පත් අංකය, දුරකථන අංකය සහ නම ඊට ඇතුළත් කිරීම පමණි. (Stay Safe) නමින් ගූගල් යෙදුම් ගබඩාවන්හි (App Store) තිබෙන ව්‍යාජ යෙදුම් සිය ස්මාර්ට් ජංගම දුරකතනවලට බාගත කර ගැනීමට යෑමෙන් වළකින්නැයි ඔවුන් ස්මාර්ට් ජංගම දුරකථන භාවිත කරන්නන්ගෙන් ඉල්ලා සිටී. 

ස්මාර්ට් නොවන ජංගම දුරකතන හිමිකරුවන් ද මෙම පද්ධතියට එක් වන්නේ මඳක් වෙනස් ආකාරයෙනි. ඔවුන් පළමුව කළ යුතු වන්නේ තමන්ගේ දුරකතනයෙන් SS හිස්තැනක් REG හිස්තැනක් ජාතික හැඳුනුම්පත් අංකය සටහන් කර 1919 අංකයෙන් රාජ්‍ය තොරතුරු කේන්ද්‍රයට කෙටි පණිවිඩයක් [SMS] යැවීමයි. එම ලියාපදිංචියෙන් පසුව SS හිස්තැනක් පරිශ්‍රයේ අංකය [Location ID] ඇතුළත් කර 1919ට යොමුකර අදාළ ස්ථානයට පිවිසිය හැකිය. තෙවන කාණ්ඩය වන දුරකථන පාවිච්චි නොකරන්නන් ගැනත් මෙහි අවධානය යොමු වී ඇත. ඔවුන් පද්ධතියට සම්බන්ධ කරන්නට ඇති එකම ක්‍රමය වන්නේ සෑම කෙනකුටම QR කේතයක් සපයා දීමයි. එහිදී ක්‍රියාවලිය ප්‍රතිවිරුද්ධ ආකාරයෙන් සිදු වේ. එනම් යම් වෙළෙඳසලක හිමිකරු හෝ ආයතනයක නිලධාරීන් දුරකතනයක් නොමැති අයගේ QR කේතය ස්කෑන් කර පද්ධතියට දත්ත ඇතුළත් කරනු ලබයි.

රහස්‍යතා ප්‍රතිපත්තියක්

කරුණු කාරණා මෙසේ වුවද නවීන තාක්ෂණය නිදන කාමරය දක්වා එබිකම් කිරීමට සුක්ෂ්ම වී තිබෙන මොහොතක මෙවන් තාක්ෂණික මෙවලමක් හරහා සිය පෞද්ගලික දත්ත දීම අනතුරුදායක වේයැයි යමකුට සිතෙන්නට පුළුවන. මෙම ඩිජිටල් තාක්ෂණික යෙදුම ප්‍රයිවසි නැතිනම් පෞද්ගලිකත්වය සම්බන්ධයෙන් ද අවධානය යොමු කිරීමට අමතක නොකිරීම අගය කළ යුතුය. මෙම තාක්ෂණික ක්‍රියාවලියේදී ඕනෑම අයකුගේ දත්ත ගබඩා වෙන්නේ රජයට අයත් ක්ලවුඩයක (Cloud) වන අතර එය රහස්‍යතා ප්‍රතිපත්තියක් (privacy policy) අනුගමනය කරමින් සිදු කෙරෙන බව තොරතුරු හා සන්නිවේදන තාක්‍ෂණ නියෝජිතායතනය විශේෂයෙන් අවධාරණය කරයි. එමෙන්ම අදාළ තොරතුරු භාවිත කරනුයේ කොවිඩ් වසංගත තත්ත්වය පාලනය කිරීම සඳහා පමණක් වන බවට ද ඔවුහු සහතික වෙති.

'පරිස්සමෙන් ඉන්න' (Stay Safe) යෙදුම කොවිඩ් වසංගතය පැතිරීම අවම කිරීමට සහාය වන උසස් තාක්ෂණික විසඳුමකි. කෙසේ වෙතත් ප්‍රජාව මෙය අනුගමනය නොකරන්නේ නම් කිසිදු පද්ධතියක් ප්‍රයෝජනවත් නොවනු ඇත. මෙය මුල් කාලීනව භාවිතා කරන්නන්ට අපහසුතාවලට මුහුණ දීමට සිදු විය හැකි මුත් ප්‍රජාව එහි ප්‍රතිලාභ දුටු පසු භාවිතය වේගවත් වීම ස්වභාවික වනු ඇති බව මෙම පද්ධතියේ නිර්මාණකරුවන්ගේ අදහසය.

පහන් විජේසේකර

වසංගතය සමඟ ජීවත් වෙමින් වසංගතයෙහි ගොදුරක් නොවී සිටින්නට සිදු වීම, ලෝකයේ සියලු දෙනාම මේ වන විට මුහුණ දෙන නවතම අභියෝගයයි. වයිරසයට බිය වී දොර කවුළු වසා ගනිමින් ගෙතුළට වී රැදී සිටින්නට තරම් ආර්ථික ශක්තිමත්භාවයක් නොමැති මිනිසුන් ජීවනෝපාය මාර්ගයන් සරිකර ගැනීම සඳහා සමාජය වෙත අවතීර්ණ විය යුතුය.

නිවෙසේ සිට වැඩ කිරීම මේ මොහොතේ වඩාත් සුදුසු ක්‍රියාමාර්ගය ලෙස නිර්දේශ කරනු ලැබ ඇති මුත් වැඩ බිම් ආශ්‍රිතව වැඩ කටයුතු කිරීම අනිවාර්යයෙන් කළ යුතු පිරිස්, සෙසු සමාජය සමඟ ගැටෙමින් රැකියා කරා යා යුතුය.

නිවෙසෙන් පිට වී ගොස් නැවත නිවෙස වෙත පැමිණෙන තුරු ඇසට නොපෙනෙන වයිරසයකින් බේරී කටයුතු කිරීමේ අභියෝගය හමුවේ පරාජය නොවීමට නම් නිරන්තර සෞඛ්‍ය උපදෙස් පිළිබඳ අවදියෙන් සහ සැලකිල්ලෙන් සිටීම අනිවාර්යය.

පොදු ප්‍රවාහන සේවය බොහෝ වෘත්තිකයන් සිය ප්‍රවාහන මාධ්‍ය ලෙස භාවිත කරන අතර විවිධ ප්‍රදේශවල විවිධ පුද්ගලයන් එකම අවකාශයක් තුළ රැස්වන එක් මාධ්‍යයක් ලෙස පොදු ප්‍රවාහන සේවය හඳුන්වා දිය හැකිය. ප්‍රවේසම පිළිබඳව ඉතා විශාල සැලකිල්ලක් දැක්වීමට සිදු වන එක් ස්ථානයක් වන්නේ ද පොදු ප්‍රවාහන සේවය යි.

වයිරසයෙන් ජනතාව ආරක්ෂා කර ගැනීම සඳහා පොදු ප්‍රවාහන සේවයෙහි අසුන් ගත හැකි ගණනට පමණක් මගීන් රැගෙන යෑම වැනි ක්‍රියා මාර්ග රජය මඟින් අනුගමනය කරන අතර එයට නිවැරදිව අනුගතවීම ප්‍රවාහන ක්ෂේත්‍රයෙහි නිරත වන වෘත්තිකයන්ගේ වගකීමකි.

පොදු ප්‍රවාහන සේවය භාවිත කරන මගීන් නිරන්තරයෙන්ම මුඛ ආවරණ දමා ගනිමින් දෑත් පිරිසුදුව තබා ගනිමින් දුරස්ථභාවය හැකිතාක් දුරට ආරක්ෂා කර ගනිමින් ගමන් කිරීම පෞද්ගලික මෙන්ම පොදු සෞඛ්‍යාරක්ෂිත බව පිළිබඳව වගකීම් සහගත හැසිරීමකි.

බස් රියට හෝ දුම්රියට ගොඩවන සෑම අවස්ථාවකම එහි යම් කිසි තැනක් ස්පර්ශ කිරීමට සිදු වුව හොත් හැකි විගස විසබීජ නාශක දියරයකින් දෑත් පිරිසුදු කර ගැනීම කළ යුතු අතර එසේ නොකර මුහුණ ඇල්ලීම හෝ මුව ආවරණය සකස් කිරීම වැනි කටයුතු කිසිසේත්ම සිදු නොකළ යුතුය. භාවිත කරන මුදල් පවා හැකි සෑම අවස්ථාවකම විසබීජහරණය කිරීම සිදු කළ යුතු බව මතක තබා ගත යුතුය.

වර්තමානයේ ක්‍රියාත්මක වන කොවිඩ් වයිරසයෙහි බලවත් බව පෙරට වඩා ඉතා ඉහළ අගයක් ගන්නා බව සෞඛ්‍ය අංශ පවසන අතර එම වයිරසය ශරීරගත වීමට සිරුරේ විවිධ ස්ථානවලින් හැකියාව පවතින බවට ද මත පළවෙමින් තිබේ. එසේ නමුත් වයිරසය යම් අයකුගේ ශරීරයෙන් පිටවන්නේ මුඛය සහ නාසය හරහා බව සියලු දෙනා දන්නා කරුණකි. තමා රෝගී නොවී සිටීමට දැඩිව අධිෂ්ඨාන කරගත යුතු අතර තමා රෝගියකු යැයි සලකා තමාගෙන් අන් අයකුට රෝගය ව්‍යාප්ත නොකිරීමට ද සියලු දෙනා වගබලා ගත යුතුය.

තමා තනිව තම පෞද්ගලික වාසස්ථානයේ නොසිටින සෑම අවස්ථාවකම නාසය සහ මුඛය නිවැරදිව ආවරණය කර ගනිමින් වගකීම් සහගතව කටයුතු කිරීම සෑම විනයගරුක පුරවැසියකුගේම යුතුකමකි. මුව ආවරණය නිතරම නාසය සහ මුඛය නිසි ආකාරයෙන් වැසෙන පරිදි පැලඳිය යුතු අතර එය වරින් වර උස් පහත් කරමින් මුඛය සහ නාසය නිරාවරණය කිරීම ඔබ වෙත රෝගය කැන්දා ගැනීම සහ ඔබෙන් රෝගය තවත් අයකුට සම්ප්‍රේෂණය කිරීමට ඉවහල් වන හේතුවක් වනු ඇත.

තමාට සුළු හෝ කොරෝනා රෝග ලක්ෂණයක් දැනෙන්නේ නම් හැකිතාක් සමාජයෙන් දුරස් වී සිටීම වඩා වැදගත්ය. එවැනි අවස්ථාවක සමාජය සමඟ ගැටීම තුළ සමාජයේ බොහෝ දෙනා බරපතළ අපහසුතාවන්ට ලක් වන බව සියලු දෙනා තරයේ සිහිතබා ගත යුතුය.

රැකියා ස්ථානයේ දී ද මිතුරු සමාගම් හැකි තාක් දුරට ශාරීරික දුරස්ථභාවය තබා ගනිමින් පවත්වන්නට හැකි නම් තමාගේ මෙන්ම මිතුරාගේ සෞඛ්‍ය ද ආරක්ෂා වනු ඇත.

ළංවීම සහ එක්වීම තුළ සබඳතා ශක්තිමත් වූ බව පෙර තිබූ අත්දැකීම් ඇසුරේ අප විශ්වාස කළ කරුණක් වුවද වෙන් වීම සහ ඈත් වීම මගින් සබඳතා වඩාත් තිර වනු ඇති බව මේ මොහොතේ අප සිතට ගත යුතුය. අත්වැරදීමකින් හෝ ඔබ රෝගියකු වී සිට තවත් අයකුට ඔබේ ළංවීම සහ ඔවුන් සමඟ මුසු වීම මත රෝගය ආසාදනය වන්නට සිදු වුව හොත් එයින් ඇතැම් සබඳතා යළිත් ගොඩනඟන්නට නොහැකි ලෙස බිඳ වැටෙන්නට ද ඉඩ තිබේ.

දිනෙන් දින ඉහළ යන රෝගීන්ගේ නිල වාර්තා සහ මරණ අනුපාතය ඔබව දැනුවත් කරන්නේ ඔබ තවදුරටත් ඔබේ වගකීම ආරක්ෂා කළ යුතු බව නොවේද...?

දිල්රූ ජයසේකර

මේ දවස්වල හැම තැනම කතා වන්නේ කොවිඩ් -19 වසංගතය ගැනයි. වසංගත සම්බන්ධයෙන් සැලකූ කල මෑතකාලීනව අප රට අත්විඳි දරණුතම වසංගතය ලෙස වාර්තා වන්නේ 1930 දශකයේ රට පුරා පැතිර ගිය මැලේරියා උවදුරයි. එය ලාංකික වාම ව්‍යාපාරයේ තීරණාත්මක කඩයමක් ද විය.

පළමු වැනි ලෝක මහා සංග්‍රාමය අවසාන වන විට ලොව පුරා දහස් ගණනක් පිරිස් ආබාධිත තත්ත්වයට පත්ව සිටියහ. විශේෂයෙන්ම හමුදා සාමාජිකයෝ රැසක් ඒ අතර වූහ. මෙලෙස ආබාධිත බ්‍රිතාන්‍ය හමුදා සෙබළුන්ගේ සුභසාධනය වෙනුවන් පොපිමල් අලෙවි කිරීමේ ව්‍යාපාරයක් ක්‍රියාත්මක කෙරිණි. ලංකාවේ ද මේ පොපිමල් ව්‍යාපාරය සිදු කෙරුණු අතර පොපිමල් අලෙවියෙන් උපයන මුදල් කියූ පරිදි ආබාධිත සෙබළුන්ගේ යහපත පිණිස යෙදවුණේ නැත. කෙසේ වෙතත් අධිරාජ්‍යවාදයේ පීඩනයට හසුව සිටි ලාංකිකයන්ට පොපිමල් මිල දී ගැනීම හැර වෙනත් විකල්පයක් ද නොතිබිණි.

මෙවැනි පසුබිමක සූරියමල් ව්‍යාපාරයේ මූලික අදහස ලංකා සේවාමුක්ත බළකායේ හිටපු නිලධාරියකු වූ ඊලියන් පෙරේරා මහතාගෙන් මතු වේ:

"සුද්දො අපේ රටේ මිනිසුන්ගෙන් පුළුවන් තරම් වැඩ ගත්තා. අපියි යුද්දෙදි ඉස්‌සරහට ගියේ. අපේ අත-පය කැඩුණා. දහස්‌ ගණනක්‌ මැරුණා. සුද්දො පොපිමල් විකුණ විකුණා ඒවා උන්ගෙ රටට අරගෙන යනවා. අපේ රටේ අත පය නැති වෙච්ච අබ්බගාත වෙච්ච අයට සතයක්‌වත් දෙන්නෙ නැහැ. මියගිය අයගෙ පවුල්වලට සහනයක්‌ නැහැ..."

1931දී ඊලියන් පෙරේරා මහතා මේ අදහස ගෙන එන විට, ලංකාවේ කම්කරු ව්‍යාපාරය බිඳවැටී තිබිණි. ඒ අනුව තරුණ පිරිස් ආකර්ෂණය කරගැනීමේ ව්‍යාපාරයක අවශ්‍යතාව මතුවෙමින් පැවතිණි. මෙවැනි පරිසරයක 1931දී ආරම්භ වූ 'සූරියමල් ව්‍යාපාරය'යළි ප්‍රතිසංවිධානය කරමින් 1933දී නව ජව සම්පන්න ගමනකට මුල පිරිණි. ඒ හොරණ විල්මට්‌ ඒ. පෙරේරා මහතාගේ නිවෙසේ පැවති රැස්‌වීමකදීය. ඉංග්‍රීසි ආණ්‌ඩුවේ සහායෙන් ක්‍රියාත්මක වූ පොපිමල් ව්‍යාපාරයට විරුද්ධව ලාංකික නිදහස්‌ ව්‍යාපාරයක්‌ ලෙස සූරියමල් ව්‍යාපාරය 1933 නොවැම්බර් මස 11 දා ආරම්භ වූයේ මෙරට අධිරාජ්‍ය විරෝධි ව්‍යාපාරයට නව ප්‍රවේශයක් ද ගෙන එමිනි.

"සූරිය මලක්‌ මිල දී ගෙන පලඳින්නා අධිරාජ්‍ය විරෝධි යුද විරෝධි අයකුම පමණක්‌ නොව; සාගින්නෙන්, දුකෙන් පෙළෙමින් නිරුවතින් රෝ බියෙන් නූගත්කමින් පෙළෙමින් සිටින අසරණ ලාංකිකයන්ට ආදරය හා අනුකම්පා කරන්නෙක්‌ ද වෙයි. නිදහසත්, ආත්මගෞරවයත් අපේක්‍ෂා කරන හැම පුරවැසියෙක්‌ම සූරිය මලක්‌ මිල දී ගෙන පලඳින්න."

සූරියමල් ව්‍යාපාරය එලෙස ජනතාවගෙන් ඉල්ලීමක් ද කළේය. කෙටි කලකින්ම රතු පැහැති අධිරාජ්‍යවාදි පොපිමලට විරුද්ධව කහ පැහැති සූරියමල වටා ලාංකිකයෝ පෙළගැසෙන්න වූහ. සූරියමල් විකිණීමෙන් ලද ආදායම ආර්ථික අපහසුතා මැද ජීවත් වූ හිටපු හමුදා සෙබළුන්ගේ යහපත සඳහා යෙදවිණි.

මෙහිදී තවත් වැදගත් කටයුතු රැසක් සූරියමල් ව්‍යාපාරය යටතේ පෙළගැසී තිබිණි. උග්‍ර ලෙස සමාජ පීඩනයට හසුව සිටි තරුණයන් රැසකට උසස් අධ්‍යාපනයට යොමු කිරීම සිදු විය. මේ සමඟම සිදු වූ වැදගත්ම කාර්යය ලෙස සැලකෙන්නේ රට පුරා පැතිර යමින් තිබූ මැලේරියා වසංගතයෙන් පීඩා විඳි ජනතාව වෙනුවෙන් කටයුතු කිරීමය.

මැලේරියා උණ වසංගතය නිසා බෙහෙත් හේත්, නිසි සාත්තු සේවක පහසුකම් හෝ පෝෂ්‍ය දායක ආහාරපාන හිඟය නිසා දිනපතා දහ දහස් ගණනින් මරණයට පත් වෙමින් සිටියහ. එවකට කෑගල්ල උපදිසාපති ලෙස සේවය කළ බ්‍රිතාන්‍ය ජාතික එෆ්. සී. ගිබ්සන් පැවති වසංගත තත්ත්වය පිළිබඳ මෙසේ ප්‍රකාශ කර තිබිණි:

"මම එම ගම පුරා ගෙන් ගෙට ගියෙමි. එක්‌ දුගී පැල්පතක මවක් දරුවකු වදා සිටියාය. ඒ දෙදෙනාට සාත්තු සප්පායම් කිරීමට පළාතකවත් කිසිවෙක් නොවූහ. පණ ඇති සැම මැලේරියාව සෑදී උණ විකාරයෙන් දොඩවමින් වෙව්ලමින් සිටියහ. ඒ ළඟ ළඟ එන මරු වැලඳගැනීමට සූදානමිනි. ගෙය තුළ මැරෙන තම ඥතියාගේ මළ සිරුර භූමදානය කිරීමටවත් ඔවුන්ට උනන්දුවක්‌ නැත. තවත් පැල්පතක ජීවතුන් අතර සිටියේ එක්‌ බිලිඳියක් පමණි. ඇය මිය ගිය තම මවගේ තනයෙන් කිරි උරා බොමින් සිටියාය."

රට වෙළාගෙන පැවති භයානක තත්ත්වය එකල මාධ්‍ය මඟින් පෙන්වා දී තිබිණි. 1935 ජනවාරි 15 දින 'දිනමිණ'පුවත්පත කුරුණෑගල පැවති තත්ත්වය මෙසේ වාර්තා කළේය:

"රෝග භය අඩු වීමේ කිසිම ලකුණක් පෙනෙන්න නැත. ආරෝග්‍ය ශාලාව ලෙඩුන්ගෙන් පිරී තිබේ. හුස්මක් කටක් ගැනීමටවත් ඉඩක් නැත. ලෙඩුන්ගෙන් වැඩිදෙන ගර්භණීහුය. මැලේරියාවෙන් දුර්වල වූ මේ ස්ත්‍රීන් බොහෝ දෙනකුට නියම කාලයට ප්‍රථමයෙන් දරුවෝ ලැබෙති. ශරීර දුර්වලත්වය නිසා රාත්තල් දෙක තුනකට වඩා බර නැති බිලිඳුන් සමූහයක් මේ දුර්භාග්‍ය කාලයෙහි මෙලොව බිහි වන බව පෙනේ. සමහර ළමයි ආරෝග්‍ය ශාලාවේ ඉස්තෝප්පුවලද සමහරෙක් මව්වරුන්ගේ ඇඳන් යට ද වැතිර සිටිති. පිරිමි වාට්ටුවල ඇඳන් මතුපිට කෙදිරි ගෑමට පවා ශක්තිය නැතිකමින් හැලහොල්මනක් නැතිව නිඳා සිටින පියවරුන්ගේ දර්ශනය ඉතා සංවේගජනකය. ඔවුන්ගෙන් සමහරෙක් අන්තිම හුස්ම හෙළති. නමුත් මේ කිසිවක් නොදත් සදහටම මව්වරුන්ගේ ආශ්‍රයෙන් ඉවත් වූ අහිංසක දරුපැටවු පණ අදින පියවරුන්ගේ ඇඳන් යට එළා තිබෙන පැදුරු උඩ ඒ මේ අත පෙරළෙමින් හඬති."

එමෙන්ම දිනමිණ පුවත්පතේ එදිනම පළ වූ වාර්තාවකට අනුව මාස දෙකක් ඇතුළත කුරුණැගල දිස්ත්‍රික්කයේ 5500ක් මියගොස් තිබේ.

1935 ජනවාරි 26 දින දිනමිණ පුවත්පත සති හයක් ඇතුළත ළමයින් 3,500 දෙනකු මිය ගිය බව සනාථ කරයි. එමෙන්ම කෑගලු දිස්ත්‍රික්කයම මුළුමනින්ම පාළු පිට්ටනියක් වීමේ ලකුණු පහළ වී ඇති බවද එම වාර්තාව කියයි. තව ද එහි වැඩිදුරටත් මෙසේ සඳහන් වේ:

"ආරෝග්‍ය ශාලාවල සහ වතුවල මරුමුවට පත් රෝගීන් හැර කෑගලු දිස්ත්‍රික්කයේ ගම් නියම්ගම්වල පමණක් ගිය දෙසැම්බර් මාසයේදී 3027 දෙනෙක් මළහ. මෙයින් 2200ක් පමණ ළදරුවෝය."

මේ අයුරින් මැලේරියාව1930 දශක යේ උපරිම ලෙස පැතිරී ගියේය. රෝගීන් මිලියන 1.5ක් පමණ වාර්තා වී තිබිණි. මාස හතක් වැනි කෙටි කාලයක් තුළ 80,000ක් පමණ මිය ගිය බවට ඇතැම් සංඛ්‍යාලේඛන පෙන්වා දෙයි. එහෙත් ඇතැම් පිරිස් පවසන්නේ මරණ ප්‍රමාණය එක් ලක්ෂ විසිපන්දහසක් පමණ වූ බවයි. මෙවැනි මරණ ප්‍රමාණයක් වාර්තා වන්නේ ලංකාවේ ජනගහනය ද මිලියන 6කට පමණක් ආසන්නව සිටි සමයක වීම සුවිශේෂය.

අඩාළ වෙමින් පවතින ජනජීවිතය නංවා ලීමට සූරියමල් ව්‍යාපාරය පෙරට විත් කටයුතු කරන්නට විය. එහි සංවිධායකයෝ ගම්නියම්ගම් සිසාරා සැරිසැරූහ.

ඉන් කලකට පසු පැවති මැතිවරණයේදී ඇන්.ඇම්. පෙරේරා මහතාගේ නාම යෝජනා පත්‍රයට අත්සන් කරන ලද්දේ අතුරලියේ සුවඳා මහතාය. ඔහු මැලේරියා සමයේ සිය අත්දැකීම් මලල්ගොඩ බන්දුතිලක මහතාට මෙසේ ප්‍රකාශ කර තිබිණි:

"තුන් කෝරලයේ මැලේරියා වසංගතය පැතිරුණා. දුප්පත් මිනිස්සු මැලේරියා වසංගතයෙන් හරි හැටි දුක් වින්දා. කැඳ ටිකක් වත් උයා දෙන්න කෙනකු නැතිව බේතක් හේතක් නැතිව මේ වසංගතයෙන් මැරුණු අය එමට හිටියා. කිසිම කෙනෙක් ඒ කාලයේ අපේ දුප්පත් මිනිස්සු මැලේරියා නිසා විඳපු දුක් ගැන හෙව්වේ බැලුවේ නැහැ. ...

"දවසක් දා අපේ ගේ ගාවට ඇවිත් කණ්ඩායමක් මට කතා කළා. ඒ කණ්ඩායමේ පිලිප්, ඇන් ඇම්, දොස්තර ඇස්.ඒ. වික්‍රමසිංහ යන සහෝදරවරු සිටියා. ඔය කණ්ඩායම මට කතා කරලා කිවුවා අපි ආවේ මැලේරියාවෙන් දුක් විඳින අයට සාත්තු සප්පායම් කරන්න, බේත් හේත් දෙන්න කියලා. ඒ ගොල්ලන්ගේ පිටි පස්සෙන් ගෝණි කරගහගත්තු අයත් හිටියා. ඒ ගොල්ල මගෙන් ඉල්ලා සිටියා ඒ අයට පාරවල් පෙන්වන්න කියලා. ඇවිත් තියෙන වැඩේ හොඳ හින්දා මම පාරවල් පෙන්නන්න කැමති වුණා."

මෙලෙස මැලේරියාවෙන් තදින් පීඩා විඳින ප්‍රදේශවල සහන කටයුතු කිරීම, එවැනි ගම්වල නිවෙසකට රුපියල් 250ක් වටිනා ආහාර බෙදා දීම සිදු විය. එමෙන්ම මැලේරියා රෝගීන්ට මානසික සහනයක් ගෙන ඒමට කැරොල් ගායනයක් ද සංවිධානය කරනු ලැබ තිබිණි. මැලේරියාවට ගොදුරු වූ තුන් කෝරළයේ ජනතාවට කෑමබීම සහ බෙහෙත් ද රැගෙන ඇන්එම් ඇතුළු පිරිස ගෙයක් පාසා ගියහ.

මේ අතර දොස්තර ඇස්.ඒ. වික්‍රමසිංහ මහතාගේ මූලිකත්වයෙන් යුතු වෛද්‍ය පිරිසක් රෝගීන්ගේ නිවෙස් කරා ගොස් ප්‍රතිකාර කිරීමට කටයුතු කළහ. වසංගතයෙන් නිවෙස්වලම මිය යෑමෙන් අනතුරුව කුණු වී තිබූ මළ සිරුරු පවා ඉවත් කිරීමේ කටයුතු කිරීමට මේ පිරිස ක්‍රියා කර තිබේ. සමහර ගම්වල තාවකාලික රෝහල් පිහිටුවා ප්‍රතිකාර කිරීමට කටයුතු කෙරිණි. එමෙන්ම එම ව්‍යාපාරයේ නියැළි බොහෝ දෙන පරිප්පු, මාමයිට් ආදි පෝෂ්‍ය දායක ආහාර වර්ග ගෝණි පිටින් කර තබාගෙන නිවෙස් පාසා යමින් ඒවා බෙදා දුන්හ. මෙහිදී ස්වාභාවික පරිසරයේ කඳු පල්ලම් ආදි බාධා පමණක් නොව ඇතැම් ප්‍රභූන්ගේ තර්ජනවලට ද ලක් වීමට මේ පිරිසට සිදු වූහ. එහෙත් ඉන් නොසැලී කටයුතු කිරීමට ඔවුහු කටයුතු කළහ. මෙලෙස දුෂ්කර ප්‍රදේශ පසු කරමින් ජනතාවට ඉටු කළ සේවය නිසා ආචාර්ය එන්.එම්. පෙරේරා ජනතාව අතර මහත් ජනප්‍රිය චරිතයක් විය. මෙකල ජනතාව ඇන්ඇම් හැඳින්වූයේ 'පරිප්පු මහත්තයා'යන ආදරණීය නමිනි.

මෙලෙස ඇන්ඇම් ඇතුළු පිරිස ජනතාවට ආහාර ද්‍රව්‍ය බෙදා දුන්හ; නිවෙස්වල සිටි ලෙඩුන්ට කැඳ උයා දුන්හ. එකල ඔවුනට නවාතැන් ගන්නට තැනක් තිබුණේ ද නැත. හැමදාම උදේට පැමිණ ගම්වල ඇවිද ලෙඩුන්ට සාත්තු සප්පායම් කර නැවත හැන්දෑවට පිටව ගොස් පසුදා උදේම ආපසු එන ඔවුන්ට සමහර දවස්වල කුසගින්නේම සිටින්නට වූ බව වාර්තාගතය. පසුකාලීන ලංකාවේ මාක්ස්වාදි බළකොටු කෑගල්ල ආදි ප්‍රදේශවල බිහිවීමටද ඇන්.එම්. පෙරේරාලා සූරියමල් ව්‍යාපාරය මැලේරියා වසංගතය සමයේ ජනජීවිත නැංවීමට දුන් සහාය බලපෑවේය. 1935දී ලංකා සමසමාජ පක්ෂය පිහිටුවාගත් ආචාර්ය ඇන්.ඇම් පෙරේරා, ආචාර්ය කොල්වින් ආර්. ද සිල්වා වැනි වාමාංශික නායකයෝ නිදහස ඉල්ලා ගෙන ගිය උද්ඝෝෂණවල ප්‍රචාරක කටයුතු සඳහා සූරියමල් ව්‍යාපාරය යොදාගත්හ.

 මලික් චමින්ද ධර්මවර්ධන

වර්ෂ 1977දී කේවල ඡන්ද ක්‍රමයෙන් බලයට පත් ජේ.ආර්. ජයවර්ධනගේ එක්සත් ජාතික පක්‍ෂ ආණ්ඩුව 1983 වසරේ පැවැත්වීමට නියමිත පාර්ලිමේන්තු මහ මැතිවරණය නොපවත්වා, පවතින පාර්ලිමේන්තුවට තවත් අවුරුදු 06ක් බලයේ සිටීමට අනුමැතිය ගැනීම සඳහා 1982 දෙසැම්බර් 22 දින ජන මත විචාරණයන් පැවැත්වීය.

ඒ වන විට, ආණ්ඩුවේ නායකයන් මරා රාජ්‍ය බලය පැහැරගැනීමේ ප්‍රයත්නයක් පවතින බවට 'නැක්සලයිට් කුමන්ත්‍රණ'චෝදනාවක් නඟා විපක්ෂයේ ක්‍රියාකාරි නායකයන් රැසක් අත්අඩංගුවට ගෙන තිබිණි. මෙලෙස අත්අඩංගුවට ගනු ලැබූ අය අතර ශ්‍රීලනිපයේ ලේකම් රත්නසිරි වික්‍රමනායක, විජය කුමාරණතුංග, අ.ම. කරුණාරත්න, අනුරුද්ධ රත්වත්තේ ඇතුළු පිරිසක් සිටියහ. විපක්ෂයට හිතවත් පුවත්පත් දෙකක් වූ 'ඇත්ත'හා 'ජනදින'පුවත්පත් ආයතන සීල් තැබිණි.

මෙවන් පරිසරයක විපක්‍ෂයේ දේශපාලන කටයුතු සඳහා නීතියෙන්ම විවිධ අවහිරතා පනවා තිබුණු අතර, ශ්‍රීලනිප ලේකම් ඇතුළු ක්‍රියාකාරීන් අත්අඩංගුවෙන් මුදාහරින ලෙස ශ්‍රේෂ්ඨාධිකරණයට පෙත්සමක් ඉදිරිපත් කෙරිණි. එහිදී රටේ ජනමත විචාරණයක් පැවැත්වෙන අවස්ථාවක ප්‍රබල පක්‍ෂයක ලේකම් ඇතුළු ක්‍රියාකාරීන් රිමාන්ඩ් භාරයේ රඳවා තැබීම යුක්ති සහගත නොවන්නේ යැයි උසාවිය තීන්දු කළ නමුත් විජය කුමාරණතුංග මහතාට නිදහස නොලැබිණි.

මේ තත්ත්වය යටතේ 'ජනමත විචාරණය'ඡන්ද මංකොල්ලයක් ලෙස විපක්‍ෂය විසින් හඳුන්වා දුන් අතර, විපක්ෂයේ ප්‍රධානම සටන් පාඨය බවට ද එය පත් විය. අත්අඩංගුවට පත් සියල්ලන් ජනමත විචාරණයෙන් අනතුරුව කිසිදු නෛතික පියවරකින් තොරව නිදහස් කරනු ලැබීමෙන් පැහැදිලි වූයේ රජයේ ප්‍රජාතන්ත්‍ර විරෝධි ක්‍රියාදාමයයි. මේ තත්ත්වය අනුව ජනමත විචාරණයෙන් පරාද වූ ඡන්ද කොට්ඨාස සඳහා අතුරු මැතිවරණ පවත්වන බව ප්‍රකාශයට පත් කරමින් ඒ සඳහා ව්‍යවස්ථා සංශෝධන ද ඉදිරිපත් කරන ලදි. එසේ ආණ්ඩුවට බහුතරයක් නොලැබුණු ආසන සඳහා මන්ත්‍රීවරුන්ගේ දින රහිත ඉල්ලා අස්වීම් ලිපි භාරගත් ජේ.ආර්. ජයවර්ධන 1983 මැයි 18 දින අතුරු මැතිවරණ 18ක් පැවැත්වීමට කටයුතු කළේය. මේ මැතිවරණයේදී ද රජයේ ක්‍රියාපිළිවෙත කැපීපෙනුණු අතර, ඡන්ද පොළ නියෝජිතයන් පලවා හැරීම් සිදුව තිබිණි.

රජයේ මේ හැසිරීමට මුහුණ දීම සඳහා විකල්ප වැඩසටහනක අවශ්‍යතාව මතු විය. මේ අතර 1978 ආණ්ඩුක්‍රම ව්‍යවස්ථාවට පසුව ඉදිරිපත් කළ සංශෝධන බොහෝ විට රජයේ අවශ්‍යතාව පදනම් කරගෙන සිදු කළ ඒවා විය. අතුරු මැතිවරණ පැවැත්වීම රජයට අවශ්‍ය නම් මිස ප්‍රතිපත්තියක පිහිටා සිදු කරන ලද්දක් නොවීය. උදාහරණ වශයෙන් කඩුවෙල ආසනයෙන් ඉල්ලා අස් වූ එම්.ඩී.එච්. ජයවර්ධන මහතාගෙන් හිස් වූ මන්ත්‍රීධුරයට ඡන්දයක් නොපවත්වා නීතිඥ පෝල් පෙරේරා පත් කරනු ලැබීය. හාරිස්පත්තුවේ ආර්.පී. විජේසිරි මහතා ඉල්ලා අස් වී කුණ්ඩසාලේ අතුරු මැතිවරණයට තරග කළ අතර, විජේසිරි මහත්මිය හාරිස්පත්තුවට පත් කෙරිණි. මේ අතර පිළිගත් දේශපාලන පක්‍ෂයකට අයත් වූ මන්ත්‍රීවරයකුගෙන් ආසනය හිස් වූ විටෙක දින 30ක් ඇතුළත ඒ සඳහා මන්ත්‍රීවරයකු පත් කිරීමට අදාළ පක්‍ෂ ලේකම්වරයා අපොහොසත් වුව හොත් අතුරු මැතිවරණයක් පැවැත්විය හැකි පරිදි ආණ්ඩුක්‍රම ව්‍යවස්ථාව සංශෝධනය කරන ලදි.

මේ අතර කුණ්ඩසාලේ එජාප මන්ත්‍රී ඩී.එම්. චිත්‍රපාල මහතාත් මින්නේරිය එජාප මන්ත්‍රී මෙරිල් ද සිල්වා මහතාත් මියයෑම නිසා රජය අතුරු මැතිවරණයකට සූදානම් විය. ඡන්ද මධ්‍යස්ථානවලින් විපක්‍ෂ නියෝජිතයන් පලවාහැරීම වැළැක්වීම සඳහා ශ්‍රීලනිපයේ විශාල පිරිසක් අපේක්‍‍ෂකයන් ලෙස ඉදිරිපත් කිරීමට කටයුතු කරන ලද්දේ මේ අවස්ථාවේය. ඒ අනුව ලංකා ඉතිහාසයේ එකම ඡන්ද කොට්ඨාසයට අපේක්‍ෂකයන් 51 දෙනකු නාම යෝජනා භාර දීම මින්නේරිය අතුරු මැතිවරණයේදී සිදු විය.

මැතිවරණ දෙපාර්තමේන්තුව වාර්තා පෙන්වා දෙන අන්දමට දිගම ඡන්ද පත්‍රිකාව ප්‍රකාශ වූයේ ද මින්නේරිය අතුරු මැතිවරණය සඳහාය. පිළිගත් දේශපාලන පක්‍ෂයක් වූවත් ස්වාධීන අපේක්‍ෂකයකු වූවත් සමාන සැලකීමක් ලබන අතර ඒ අනුව ඡන්ද නියෝජිතයන් 02 බැගින් පත් කිරීමටද අපේක්‍ෂකයාට ඉඩ ලැබිණි. එමඟින් සෑම ඡන්ද පොළ මධ්‍යස්ථානයකම විශාල නියෝජිත පිරිසකට පහසුකම් සැලසීම ඡන්ද නිලධාරියාට සිදු වන අතර, නීතිවිරෝධි කටයුතු කිරීම අවම කළ හැකි විය.

 ප්‍රසන්න වෙල්ගම

වර්ෂ 1965දී බිහි වන 'හත් හවුල් ආණ්ඩුව'තුළ ඇති වන අවුල්-වියවුල් සහ ජනතා හඬට කන් නොදීමේ හේතුව නිසාම නැවත වතාවක් ආණ්ඩු බලය අත් පත් කරගැනීමට සිරිමාවෝ බණ්ඩාරනායක මැතිනියට හැකි විය. ආසන 168න් 116ක් ම දිනාගත් එම ආණ්ඩුව පිහිටුවීම සඳහා එකතු වන්නේ ශ්‍රී ලංකා නිදහස් පක්ෂය, ශ්‍රී ලංකාවේ කොමියුනිස්ට් පක්ෂය සහ සමසමාජ පක්ෂයයි. මෙයට 'තුන් හවුල'යැයි නමක් ද පටබැඳිණි. මෙහිදී අපේ සාකච්ඡාවට බඳුන් වනුයේ එවන් ජනතා ප්‍රසාදයක් ලැබූ ආණ්ඩුවක් ජනතාව අතරින්ම අප්‍රසාදයට පත් වීමට තුඩු දුන් හේතු සාධක සහ එහි බෙදීම් සිදු වූ ආකාරය පිළිබඳවය.

ජනතාව මේ සමඟි පෙරමුණු ආණ්ඩුව පිළිබඳ දැඩි විශ්වාසයක් තැබූහ. විශේෂයෙන්ම එවක කැපීපෙනෙන වාමාංශික දේශපාලන ව්‍යාපාර වූ සමසමාජ සහ කොමියුනිස්ට් පක්ෂ ශ්‍රීලනිපය සමඟ ඒකාබද්ධ වීම ජනතාවට අලුත්ම පූර්වාදර්ශයක් විය. ජනතා බලාපොරොත්තු අහස උසට නැඟි සමයක් විය. ශ්‍රී ලංකා නිදහස් පක්ෂය වාමාංශික දේශපාලන පක්ෂයක් ලෙස පොදුවේ හැඳින්වුව ද ඒ තුළ සිටි දක්ෂිණාංශික නියෝජනය හැම විටම වමේ අදහස්වලට විරුද්ධව නැඟී සිටින්නට පොරකන අයුරු දක්නට ලැබිණි. මැතිනියගේ ආණ්ඩුවේ මුදල් ඇමැතිකම ලැබුණේ සමසමාජ පාක්ෂිකයකු වූ ආචාර්ය ඇන්.ඇම්. පෙරේරා මහතාටය. ලෙස්ලි ගුණවර්ධනට ප්‍රවාහන ඇමති ධුරය ද ආචාර්ය කොල්වින් ආර්. ද සිල්වා මහතාට වැවිලි කර්මාන්ත හා ව්‍යවස්ථා සම්පාදන ඇමති ධුරය ද, පීටර් කෙනමන්ට නිවාස හා ඉදිකිරීම් අමාත්‍ය ධුරය ද අග්‍රාමාත්‍යතුමිය විසින් පිරිනමන ලදි.

මේ පිළිබඳ ෆීලික්ස් ඩයස් බණ්ඩාරනායක වැනි දක්ෂිණාංශික අදහස් දැරූ ඇමැතිවරුන්ට තිබුණේ දැඩි අකැමැත්තකි. කෙසේ වෙතත් එය මුල් කාලයේදී ජනතාවට පෙනෙන්නට නොඑසේ නම් බාහිරින් පෙනෙන්නට තරම් ඔඩුදුවා තිබුණේ නැත. ඒ නිසාම ඒ වන විට ජනතාව කෙරෙහි තිබුණේ මේ වමට බර අලුත් ආණ්ඩුව ජනතාව වෙනුවෙන් පෙනී සිටින, නිර්ධනයන්ගේ ආණ්ඩුවක්ය යන හැඟීමකි. එය 'මේ ආණ්ඩුව කිසි සේත්ම පෙරළන්න බැහැ'මතය ජනතාව අතරින් මතු වූ යුගයක් විය. විශේෂයෙන්ම ධනවාදයට එරෙහිව හඬ නැඟූ වමේ ප්‍රධාන බලවේග දෙකක් වූ සමසමාජ සහ කොමියුනිස්ට් පක්ෂවල ඒකාබද්ධ වීම ජනතාවගේ බලාපොරොත්තු ඉහළ දමන්නක් විය.

1965 ඩඩ්ලි සේනානායක ආණ්ඩුව එවක පැවති ආහාර අර්බුදයට නිසි විසඳුම් නොදීම නිසා 'හඳෙන් හෝ හාල් ගෙනැවිත් දෙනවා'කියූ සමඟි පෙරමුණට ජනතා කැමැත්ත දැඩිව ලැබුණු බැව් අමතක නොකළ යුතුය. කෙසේ වෙතත් 1971දී ඇති වූ තරුණ නැඟිටීම නොඑසේ නම් කැරැල්ල මර්දනය කිරීමට රජයට සිදු විය. ඒ තුළ ස්වකීය ගමනේ කිසියම් අඩාළ වීමකට ඒ රජය මුහුණ දුන් බව ද සිහිපත් කළ යුතුය. ඔවුන්ගේ පස් අවුරුදු සැලැස්මට අනුව ප්‍රධාන කරුණු තුනක් යටතේ කටයුතු කිරීමට අදහස් කරනු ලැබීය. ඒ අනුව දළ දේශීය නිෂ්පාදිතය 6% මට්ටමකින් පවත්වාගෙන යෑම රැකියා විරහිත තරුණ තරුණියන් ලක්ෂ 08කට රැකියා සැපයීම සහ අපනයන විවිධාංගීකරණයට සැලසුම් සැකැසිණි. මේ ඉලක්ක ළඟා කරගැනීමට දේශීය ඉතිරි කිරීම් අනුපාතය 12% සිට 17% දක්වා වර්ධනය කිරීම, දේශීය ආයෝජනන අනුපාතය 19% දක්වා වැඩි කිරීම, ගෙවුම් ශේෂ හිඟය අඩු කිරීමට පියවර ගැනීම ක්‍රියාවට නැංවීමට යෝජනා විය.

කැලණියේ ටයර් සංස්ථාව, වාලච්චේනේ කඩදාසි සංස්ථාව, ඇඹිලිපිටියේ කඩදාසි කර්මාන්ත ශාලාව, ඔරුවල වානේ සංස්ථාව, තුල්හිරිය, වැල්ලවත්ත සහ වේයන්ගොඩ නූල් හා රෙදි කර්මාන්ත ශාලා, කපුවත්තේ කපු නූල් නිෂ්පාදනය, පිටි සංස්ථාව, ධීවර සංස්ථාව, ලංකා ලෝහ භාණ්ඩ සංස්ථාව, රත්තොටපෝසිලේන් පිඟන් සංස්ථාව, කන්තලේ සහ හිඟුරාන සීනි සංස්ථාව, කිරි මණ්ඩලය, සපුගස්කන්ද පොහොර සංස්ථාව ඇතුළු සංස්ථා සහ කර්මාන්ත ශාලා ඇති කරන ලද්දේ දේශීය නිෂ්පාදනයට දිරි දීම සහ සංවර්ධනයේ අරමුණිනි.

ඒ අනුව රජය මඟින් සිදු කළ වෙනස්කම් අතර වානේ කර්මාන්තය, ලෝහ කර්මාන්තය, රෙදිපිළි කර්මාන්තය, කඩදාසි කර්මාන්තය, ලුහු භාණ්ඩ කර්මාන්තය, පේෂ කර්මාන්තය, දේශීය කිරි කර්මාන්තය පමණක් නොව, පෞද්ගලික අංශය යටතේ මෙරට මෝටර් රථ, ස්කූටර්, ට්රැක්ටර් නිෂ්පාදනය ද ආරම්භ කෙරිණි. එසේම බැංකු ජනසතුව, තෙල් ජනසතුව, ඉඩම් ජනසතුව, වානේ, ටයර්, පිටි කර්මාන්තශාලා ආරම්භය, නව ජනරජ ව්‍යවස්‌ථාවක්‌ ඇරඹීම, සෙනට්‌ සභාව අහෝසි කිරීම, උත්තරීතර අධිකරණය ශ්‍රී ලංකාවේ ශ්‍රේෂ්ඨාධිකරණය බවට පත් කිරීම මෙන්ම වගා සංග්‍රාමය කැපීපෙනිණි. මෙරට නිෂ්පාදනය කළ හැකි සෑම දෙයක්ම රට තුළම නිපදවීමේ රජයේ ප්‍රතිපත්තිය අතිශයින්ම හිතෛෂි වුව ද ඒ වන විටත් ලෝක මට්ටමෙන් අර්බුද රැසක් පැනනැඟි සමයක් බවට ද එය පත්ව තිබිණි. 71 තරුණ නැඟිටීම කෙසේ හෝ මර්දනය කරගන්නට විදේශීය සහාය ද ඇතිව ආණ්ඩුවට හැකි වුවත්, ලෝක ආර්ථික අර්බුදය, ඉන්ධන අර්බුදය මෙන්ම ආහාර අර්බුදයට ද මුහුණ දෙන්නට එවක සමඟි පෙරමුණු ආණ්ඩුවට සිදු විය.

කෙසේ වෙතත් 1972 ජනරජ ව්‍යවස්ථාව ගෙනෙන්නට සමඟි පෙරමුණු ආණ්ඩුවට හැකි විය. ආචාර්ය කොල්වින් ආර්. ද සිල්වා මහතාගෙන් ඒ සඳහා අනුපමේය මෙහෙයක් වූ බැව් සඳහන් කිරීම වටී. මේ හේතුවෙන් බහුතර බලයක් තිබුණු ආණ්ඩුව 72 සිට ඉදිරියට තවත් අවුරුදු 05ක් කටයුතු කරන්නට ව්‍යවස්ථාවෙන්ම අවසර ලබාගති. එහෙත් සමඟි පෙරමුණු ආණ්ඩුවට සොබාදහමෙන් පවා වැඩිපුර ලැබුණේ ආශීර්වාද වෙනුවට අකටයුතුකම්ය; වෙනස්කම්ය. ලෝක අර්බුද හමුවේ ඔවුන්ට ද නොසැලෙන්නට නොහැකි විය. මේ අතර ආණ්ඩුව තුළ සිටි ෆිලික්ස් ඩයස් ඇතුළු පිරිස වාමාංශික ආණ්ඩුවක් තුළ දක්ෂිණාංශික අදහස් ව්‍යාප්ත කිරීමට කටයුතු කළහ. දාස මුදලාලි, හැරී මුදලාලි, පියදාස මුදලාලි වැනි අයගේ කකුලෙන් ඇදිල්ල ද පැවතිණි. එසේ වුවත් විරෝධතා මධ්‍යයේ 8% ධන බද්ද ක්‍රියාත්මක කිරීමට ඇන්.ඇම්. පෙරේරාට මුදල් ඇමැති ලෙස හැකි විය. ඔහුගේ අදහස වූයේ රටේ පවුල් 25ක් පමණ අතර රටේ ධනයෙන් වැඩි ප්‍රමාණයක් සංසරණය වන බවයි. ඒ නිසා ධන බද්ද ක්‍රියාවට නැංවීමෙන් සාමාන්‍ය ජනයා අතර මුදල් හුවමාරුව සහ ධනය බෙදීයෑම ක්‍රමයෙන් ව්‍යාප්ත කිරීමට හැකි බව ඔහු පැවසීය. මේ කටයුතු ඉහත සඳහන් කළ ධනේශ්වර නියෝජිතයන්ගේ ඇස්වල කටු අනින්නාක් මෙන් විය.

මේ කාලය තුළ ආණ්ඩුව ගෙන ගිය 'Grow More Food'ප්‍රතිපත්තිය නිසා රටේ අඟලක් අඟලක් පාසා වගා කරන්නට ජනතාව පෙලඹුණහ. ගෙවතු වගාවට, අවුරුදු ගණන් පුරන් වී අතහැරදමන ලද සියලු කුඹුරු අස්සද්දන්නට ජනතාව පෙලගැසුණහ. දේශීය දේ අගයන්නට ජනතාව පුරුදු පුහුණු වූහ. ආනයනික සීනි වෙනුවට මෙරට නිෂ්පාදිත සීනි වෙළෙඳපොළට ආවේය. එහෙත් ගැටලුව වූයේ ඒ රතු සීනි ප්‍රමිතියෙන් තොරව නිපදවීමයි. අපේ රටේ සීනි වුව ද කහට හෝ තිත්ත රහකට ආසන්න රසක් තිබීම නිසා ජනතාව ඊට අප්‍රසාදය පළ කළහ. තේ පානය සඳහා වැඩි වැඩියෙන් උක් හකුරු භාවිත කරන්නට විය. එහෙත් ඒ අතර වමේ ආණ්ඩුව තුළ සිටි ධනපතිවාදි අදහස් දැරූ නායකයෝ සුදු සීනි භාවිත කළහ. ඒ අතර වගා කළ සියලු බිම්වලින් අපේක්ෂිත අස්වැන්න ලැබීමට නොහැකි වූයේ නිසි කලට වැස්ස නොලැබීම ආදි කරුණු නිසාය.

එබැවින් 'හාල් පොලු', 'මිරිස් පොලු'දමන්නට ආණ්ඩුවට සිදු විය. එහිදී ඒ භාණ්ඩ එක් ප්‍රදේශයක සිට තවත් ප්‍රදේශයකට ප්‍රවාහනය තහනම් විය. පාන් නිෂ්පාදනය තහනම් විය. අඟහරුවාදා සහ සිකුරාදා ආපණශාලාවල බත් දීම තහනම් විය. ඒ වෙනුවට දේශීය වෙනත් ආහාර සැපයීමට සිදු විය. ආහාර අර්බුදය කොතෙක් උග්‍ර වී ද යත්: පරිප්පු වැනි දේ ප්‍රදර්ශනයකදී හැරෙන්නට දැකගැනීමට නොහැකි විය! රජයේ සමුපකාර ඉදිරියේ දවස තිස්සේ පෝලිමේ සිට තමන්ගේ අහාර සලාකය ලබාගැනීමට ජනතාවට සිදු විය.

දුප්පත් ජනතාව කුසගින්නේ මරණයට පවා පත් වූ අවස්ථා ද නොවූයේ නොවේ. ඒ අතර වල් හබරල, ලාවුළු, මඤ්ඤොක්කා වැනි භෝගවලින් ගෘහස්ථව ආහාර නිපදවාගන්නට ජනතාව පෙලඹුණහ. ගම්වල විසූ ජනතාව කෙසේ හෝ අල-බතලවලින් යැපුණු අතර, නාගරික ජනතාවට සලාක පෝලිම්ව ලගින්න සිදු විය. ජනතාවගේ ඉවසීමේ සීමා පනින්නට මේවා පැහැදිලි හේතු විය.

මේ සියල්ල අතර සමඟි පෙරමුණෙන් විපක්ෂයට ගිය පළමු මන්ත්‍රී වූයේ ප්‍රින්ස් ගුණසේකරය. එවක ආණඩුව 71 කැරැල්ල මර්දනයට ගත් ඇතැම් ක්‍රියාමාර්ග තමා අනුමත නොකරන බව පවසමින් ඔහු විපක්ෂයට එක් විය. 72 ව්‍යවස්ථාව ද සම්මත කරගැනීමෙන් අනතුරුව 1972 රජය ඉදිරිපත් කළ අපරාධ යුක්‌ති විනිශ්චය සභා පනතට පක්‌ෂව ඡන්දය නොදීම නිසා ලංකා කොමියුනිස්‌ට්‌ පක්‌ෂයේ නායක දොස්‌තර එස්‌. ඒ. වික්‍රමසිංහ, සරත් මුත්තෙට්‌ටුවේගම, ඊලියන් නානායක්‌කාර හා ඇම්. ජී. මැන්දිස්‌ යන මන්ත්‍රීවරු 04 දෙනා ආණ්‌ඩු පක්‌ෂයෙන් ඉවත් කරනු ලැබූහ. ආරක්ෂාව පිළිබඳ ඇති වූ මතභේදයක් මුල් කරගෙන හිටපු හමුදාපතිවරයකු වූ ආණ්ඩු පක්ෂ මන්ත්‍රී රිචඩ් උඩුගම මහතා 1974දී ආණ්ඩුවෙන් ඉවත් විය.

මේ අතර ශ්‍රීලනිප, සමසමාජ, කොමියුනිස්ට් තුන් හවුල නමැති පැණිවරකාවට හෙණ වැදුණේ 1975 අගෝස්තු 12 දින හර්තාල් සමරුවේදී මුදල් අමාත්‍ය ආචාර්ය ඇන්.ඇම්. පෙරේරා විසින් සිදු කරන ලද කථාවෙන් අනතුරුවය. ඔහුගේ විවේචන සහ නිර්පාක්ෂික අදහස් ආණ්ඩුව තුළ සිටි දක්ෂිණාංශිකයන්ගේ කන් දෙදරවන්නක් විය. ඔවුහු වහා අගමැතිනියට පැමිණිලි කොට ඇය උසිගැන්වීමට කටයුතු කළහ. ඒ අනුව ඇය "මගේ ස්වාමිපුරුෂයාගේ කීර්තිනාමය කෙලෙසන ප්‍රකාශයක් ඇන්.ඇම්. පෙරේරා මුදල් අමාත්‍යවරයා සිදු කළා"යනුවෙන් ප්‍රකාශයක් ද නිකුත් කරමින් ඇන්ඇම්ගේ මුදල් ඇමැතිකම ගලවා ඔහුට රාජ්‍ය පරිපාලන අමාත්‍ය ධුරය දීමට සැලසුම් කළාය. බැලූ බැල්මටම එය කොතරම් අදූරදර්ශි ක්‍රියාවක්ද යන්න ඕනෑම සාමාන්‍ය මිනිසකුට පෙනෙනු ඇත. මුදල් ඇමතිකමෙන් ඉවත් කොට රාජ්‍ය පරිපාලන ඇමැති කිරීම දඬුවම් දීමක් ද? දක්ෂිණාංශිකයන්ගේ අදහස් මුදුන් පමුණුවා ගැනීමට එසේ අවස්ථාව උදා විය.

ප්‍රතිඵලය වූයේ 1975 සැප්තැම්බර් 02 දින ඇන්ඇම්, ලෙස්ලි සහ කොල්වින් අමාත්‍ය ධුරවලින් ඉවත් කිරීමට අගමැති උපදෙස් පරිදි එවක ජනපති විලියම් ගොපල්ලව කටයුතු කිරීමයි. ආණ්ඩු පක්ෂයේ සිටි සමසමාජ පක්ෂයේ මන්ත්‍රීන් 19න් 17ක්ම ඒ සමඟ ආණ්ඩුවෙන් ඉවත් වූහ. එකවර විශාල මන්ත්‍රී ප්‍රමාණයක් විපක්ෂයට ගිය පාර්ලිමේන්තු ඉතිහාසසයේ ප්‍රථම වතාව මෙය ලෙස හඳුන්වා දීමේ වරදක් නැත. බද්දේගම මන්ත්‍රී නීල් ද අල්විස් සහ බුලත්සිංහල මන්ත්‍රී අනිල් මුණසිංහ යන සමසමාජ මන්ත්‍රීවරු පමණක් ආණ්ඩුව සමඟ සිටියහ. ඒ අතර 1976 වන විට ආණ්ඩුව තුළ සිටි ප්‍රගතිශීලි මන්ත්‍රීවරු කිහිපදෙනෙක් ද විපක්ෂයට ගියහ. ඒ අතර නන්ද එල්ලාවල, බොනී ජයසූරිය, රොනී ද මෙල්, ටෙනිසන් එදිරිසූරිය, ගාමිණී ආරියතිලක, ඒ.එම්. ජිනදාස වැනි මහත්වරු වූහ.

වාමාංශික ආණ්ඩුවක් ලෙස ජනතාව හැඳින්වූ සහ ලෙහෙසියෙන් පෙරළීමට නොහැකි ආණ්ඩුවක් ලෙස ජනතාව ආදරයෙන් වැලඳගත් සමඟි පෙරමුණු ආණ්ඩුව අවුරුදු කිහිපයක් තුළ දියාරු වූයේ එසේය. මේ අතර කොමියුනිස්ට් පක්ෂයේ පීටර් කෙනමන් සහ බී.වයි. තුඩාව මහත්වරු ද 1977දී ආණ්ඩුවෙන් ඉවත් වූහ. මේ අරාජිකත්වය හමුවේ තවදුරටත් ආණ්ඩු නොකළ හැකි බැව් පෙනී ගියෙන් ජාතික රාජ්‍ය සභාව විසුරුවා හරින ලෙස අග්‍රාමාත්‍යතුමියගෙන් ජනපති ගොපල්ලවට උපදෙස් ලැබුණි. 1977 මැයි 17 දින විසුරුවා හරින ලද ජාතික රාජ්‍ය සභාවට නව මන්ත්‍රීවරුන් තෝරා පත් කරගැනීම සඳහා මැතිවරණය පැවැත්වීමට දින නියම වූයේ එම වසරේම ජූලි 21දිනයේය.

මෙරට ප්‍රගතිශීලි සහ වාමාංශික ජනතාව අතිශයින් බලාපොරොත්තු තැබූ සහ රට සැබෑ වෙනසකට බඳුන් කළ හැකිව පැවති යුගයක් එලෙස දියාරු වී යෑම රටේ බොහෝ පසුබෑම්වලට පසුකාලීනව බලපෑ බැව් නොකිව මනාය. ආණ්ඩුවේ සහ වමේ එකී පරාජය තිස් අවුරුදු යුද්ධයටද අනියම් ආකාරයෙන් බලපෑ බැව් දේශපාලන විශ්ලේෂකයෝ අදටත් පවසති. ජනතාවගේ ඉවසීමේ සීමාව පනින තුරු ආණ්ඩුවක් කටයුතු නොකළ යුතු බවට අපේ ඉතිහාසය අපට කියා දෙන පාඩමක් ලෙස ද සමඟි පෙරමුණු රජය බිඳවැටීමේ සිදුවීම දැක්විය හැකිය.

අනෙක් අතට විප්ලවයකින් බලය නොගත්, ජනතාවගේ ඡන්දයෙන් බලය ගත් ආණ්ඩුවකට තමන් ජනතා මතයට ගරු කළ යුත්තේ කෙසේ දැයි කියා දුන් සිදු වීමක් ලෙස ද එම ආණ්ඩුවේ බිඳවැටීම දැක්වීම නිවරදය. අනෙක් අතට රටක ජනතාවක් වශයෙන් දුෂකරතාවන්ට ද ඉවසීමෙන් මුහුණ දීමේ වැදගත්කම පෙන්වා දුන් සිද්ධියක් ලෙස ද එය සටහන් කරනු වටී. ආර්ථික, දේශපාලන විචාරකයන්, විවේචකයන් මෙන්ම විශේෂඥයන් ද මේ පැරදුම හඳුන්වන්නේ මෙරට ජනතාවගේ ඉවසීම නැතිකම නිසා දේශීය ආර්ථිකයක හිමිකාරිත්වය අහිමි කරගත් දේශපාලන සන්ධිස්ථානයක් ලෙසය.

 ගයාන් පීරිස්

මහජන ප්‍රසාදය දිනා ඇති, කැපීපෙනෙන දේශපාලනඥයකුට දේශපාලන පක්ෂයකින් ඉල්ලා අස් වීමට හෝ ඉවත් කරනු ලැබීමට හෝ සිදු වුව හොත්, එය, හිටපු පක්ෂයට හෝ නායකයාට හෝ අභියෝගයක් වන පරිදි, තම අරමුණ කරා යෑමට අලුත් මාවතක් නිර්මාණය කර ගැනීමට ස්වර්ණමය අවස්ථාවක් කර ගනියි. එහිදී නව දේශපාලන පක්ෂයක් පිහිටුවා ගැනීම බොහෝ විට සිදු වන දෙයකි.

මෙරට පැරණිතම දේශපාලන පක්ෂය වන ලංකා සමසමාජ පක්ෂයෙන් පිලිප් ගුණවර්ධන ඉවත් වී, විප්ලවකාරි සමසමජ පක්ෂය පිහිටුවා ගත්තේය; ආචාර්ය කොල්වින් ආර්. ද සිල්වා ඉවත් වී බෝල්ෂේවික් ලෙනිස්ට් පක්ෂය පිහිටුවා ගත්තේය; දොස්තර එස්.ඒ. වික්‍රමසිංහ ඉවත් වී, කොමියුනිස්ට් පක්ෂය පිහිටුවා ගත්තේය; ආචාර්ය විජයානන්ද දහනායක ඉවත් වී භාෂා පෙරමුණ පිහිටුවා ගත්තේය.

තම අරමුණ ඉතා සාර්ථකව කඩිනමින් සාක්ෂාත් කරගැනීම සඳහා එස්.ඩබ්.ආර්.ඩී. බණ්ඩාරනායක එක්සත් ජාතික පක්ෂයෙන් ඉවත් වී ශ්‍රී ලංකා නිදහස් පක්ෂය පිහිටුවා ගත්තේය. එජාපයෙන් නෙරපන ලද ගාමිණී දිසානායක, ලලිත් ඇතුළත්මුදලි ප්‍රජාතන්ත්‍රවාදී එක්සත් ජාතික පක්ෂය (රාජාලියා) පිහිටුවා ගත්තෝය.

කේ.එම්.පී. රාජරත්න, එස්.ඩී. බණ්ඩාරනායක, සී.පී. ද සිල්වා, විමල් වීරවංශ, හකීම් ඇතුළු මෙහි සඳහන් නොවන තවත් බොහෝ දේශපාලකයෝ මව් පක්‍ෂයෙන් ඉවත්ව නව දේශපාලන පක්ෂ ආරම්භ කරගනිමින් සාර්ථක හෝ අසාර්ථක උත්සාහයන්හි නියැළුණහ.

එක්සත් ජාතික පක්ෂයේ නිර්මාතෘ ඩී.ඇස්. සේනානායක මහතාගේ මුනුපුරා මෙන්ම, ඩඩ්ලි සේනානායකගේ ඥාති පුත්‍රයකු ද වන රුක්මන් සේනානායක එවකට එජාපයේ නායක ජේ.ආර්. ජයවර්ධන විසින් එජාපයෙන් නෙරපා හරින ලදුයේ විනය විරෝධිව කටයුතු කළ බවට චෝදනා නඟමිනි. ජේආර්-ඩීඇස් සම්බන්ධතාවේ ඉතිහාසය සුපරීක්ෂාකාරිව බැලීමේදී සේනානායකවරුන් කෙරෙහි ජේආර් තුළ යම් නොරිස්සුම් ස්වභාවයක් පැවති බව දේශපාලන කෂේත්‍රයේ ප්‍රකට රහසකි.

1977 මැතිවරණය ඉලක්ක කරගනිමින් ජේආර් ජයවර්ධන ප්‍රචාරක රැස්වීම් මාලාවක්, කල් තියා රට පුරා පවත්වාගෙන ගිය අතර, සේනානායකවරුන් පිළිබඳ තම ගුප්ත ආකල්පය එවන් එක් රැස්වීමකදී ප්‍රකාශ කළේ එජාපය සේනානායකවරුන්ටම උරුම වූ පක්ෂයක් නොවන බවය. තවත් වරෙක සේනානායකවරුන් ජයවර්ධන මහතා විසින් හඳුන්වන ලද්දේ ප්‍රතිගාමීන් වශයෙනි.

රුක්මන් සේනානායක මහතා එජාපයෙන් නෙරපීම පිළිබඳ සිරිකොත රැස්වීමකදී ජයවර්ධන මහතා ප්‍රකාශ කළේ පක්ෂය තුළ තිබූ කුණු කන්දක් ඉවත් කළ බවයි. සේනානායකවරුන්ගෙන් මිදුණු එක්සත් ජාතික පක්ෂය නැවත සේනානායකවරුන් වෙත නතු වනවාට ජයවර්ධන මහතා කෙරෙහි කිසිදු කැමැත්තක් තිබුණේ නැත. රුක්මන් සේනානායක චරිතය මතුව එනවාට ඔහු තුළ තිබූ ප්‍රබලම හේතුව වූයේ රුක්මන්, සේනානායකවරයකු වීමය.

ඩඩ්ලි සේනානායකගේ හදිසි අභාවයෙන් හිස් වූ දැදිගම ආසනය සඳහා පැවති අතුරු මැතිවරණයට සේනානායකවරයකු ඉදිරිපත් කිරීමට ජේආර් වැඩි කැමැත්තක් දැක්වූයේ නැත. එහෙත් දැදිගම ජනතාව පමණක් නොව එක්සත් ජාතික පාක්ෂිකයන් අතිබහුතර සංඛ්‍යාවකගේ එකම ඉල්ලීම වූයේ 'දැදිගමට රුක්මන්'ය. එසේ පක්‍ෂයේ ප්‍රබලයන්ගෙන් පවා රුක්මන් ඉදිරිපත් කරන ලෙස ප්‍රබල හඬක් නැගෙන්නට වූයෙන් ජේආර්ට තම මතය හකුළාගන්නට සිදු විය. ඒ අනුව එක්සත් ජාතික පක්ෂයේ දැදිගම අපේක්ෂකයා වශයෙන් ඉදිරිපත් කෙරුණු රුක්මන් සේනානායක, ශ්‍රීලනිප අපේක්ෂක ධර්මසිරි සේනානායක විශාල වැඩි ඡන්ද සංඛ්‍යාවකින් පරදවා දැදිගම කොට්ඨාසයේ පාර්ලිමේන්තු මන්ත්‍රීවරයා විය. එජාපයේ ප්‍රබල බළකොටුවකට නැවත සේනානායකවරයකු පත් වීම නිසා තම දිගුකාලීන දේශපාලන න්‍යායපත්‍රයට ඔහුගෙන් බාධාවක් එල්ල විය හැකි බවට අදහසක් ජයවර්ධන මහතාගේ සිතෙහි ඇතිව තිබිණි.

එජාපයේ දැදිගම මන්ත්‍රීවරයා ලෙස පත්ව ආ පසු පාර්ලිමේන්තුවේදී අනාගත අගමැතිවරයා ලෙස ජයගොස නැංවීම නිසා ජේආර් තුළ රුක්මන් සේනානායක කෙරෙහි වූ සැකය තවතවත් තියුණු විය. එහි අවසාන ඵලය වූයේ රුක්මන් සේනානායක මහතා එජාපයෙන් නෙරපන තැනට කටයුතු සිදු වීමය.

ජේආර් විරෝධි කණ්ඩායම් රුක්මන් සේනානායක මහතා වටා එක් රොක් වූ අතර, මේ තත්ත්වය එජාපයේ අභ්‍යන්තර සෙලවීමකට හේතුවක් විය. එහි ප්‍රතිඵලයක් වශයෙන් 1976 ජූනි මස 30 දින බොරැල්ලේ වුඩ්ලන්ඩ්හිදී රුක්මන් සේනානායකගේ නායකත්වයෙන් 'ඩඩ්ලි පෙරමුණ'බිහි විය. මෙහි මංගල ප්‍රචාරක රැලිය අගනුවරදී පැවති අතර, දෙවැනි මහා රැලිය පැවතුණේ තෙල්දෙණිය නගරයේය. එවකට එජාප ප්‍රබලයන් වූ දොස්තර ගාමිණී විජේසේකර, ජේ.ආර්.පී. සූරියප්පෙරුම, ආර්.පී. විජේසිරි, දොස්තර සී.ඩී.එල්. ප්‍රනාන්දු, නීතිඥ එස්.ඩී.එස්. සෝමරත්න, දොස්තර ඒ.බී.ජී. සෙනෙවිරත්න මෙහි ප්‍රමුඛයන් වූ අතර, තෙල්දෙණිය රැස්වීමට විශාල ජන සහභාගිත්වයක් ඇති විය. මෙය ජයවර්ධන මහතාගේ නායකත්වයට බලවත් අභියෝගයක් විය.

නව පක්‍ෂයේ සලකුණ සමබර 'තරාදිය'වූ අතර, පක්‍ෂයේ පාට තැඹිලි වර්ණය විය. එම පක්ෂය පසුව 'එක්සත් ලංකා ජනතා පක්ෂය'ලෙස පසුව වඩාත් සංවිධානාත්මක දේශපාලන පක්ෂයක් බවට පත් විය. මෙහි නම එක්සත් ජාතික පක්ෂයේ කෙටි නම වූ 'එජාප'නමට ආසන්නව යන 'එලජප'ලෙස හැඳින්වීමට හැකි වීම උපක්‍රමයක් ලෙස සඳහන් කළ හැකිය.

එක්සත් ලංකා ජනතා පක්ෂයේ සභාපති වශයෙන් රාජනීතිඥ ඒ.සී. ගුණරත්න, උපසභාපති හා ප්‍රධාන සංවිධායක වශයෙන් රුක්මන් සේනානායක, මහ ලේකම් දොස්තර ගාමිණී සී. විජේසේකර, භාණ්ඩාගාරික නීතිඥ එස්.ඩී.එස්. සෝමරත්න, උප ලේකම් ඊ.එල්.ජී. මෙන්ඩිස්, උප භාණ්ඩාගාරික නීතිඥ එම්.එෆ්. මිෂ්කින් හා සංවිධායක ලේකම් ඩී.ජී. පී. රණසිංහ යන අයගෙන් සමන්විත වූ අතර, 08 දෙනකුගෙන් යුත් උපදේශක සභාවක් ද 22කගෙන් යුත් ක්‍රියාකාරි මණ්ඩලයක් ද තෝරා පත් කරගන්නා ලදි.

මෙහිදී 'දස පිළිවෙත්'නමින් ප්‍රතිපත්ති ප්‍රකාශනයක්ද එළිදැක්වුණු අතර, එය ඒ දිනවල මහත් කතාබහකට ලක් වූ ප්‍රතිපත්ති ප්‍රකාශයක් විය.

ඒ ප්‍රතිපත්ති අතර: සෙනේට් සභාව යළි පිහිටුවීම, විධායක ජනාධිපති ධුරය අහෝසි කිරීම, දේශීය කර්මාන්ත සංවර්ධනයෙන් ජීවන බර අඩු කිරීම ඇතුළු කරුණු රැසක් අඩංගු විය.

1989 වසරේ පැවති මහා මැතිවරණයේදී රුක්මන් සේනානායකගේ නායකත්වයෙන් තරග කළ එක්සත් ලංකා ජනතා පක්ෂයට සාර්ථක ගමනක් යෑමට නොහැකි වූ මුත්, එවකට විපක්ෂයේ සිටි ක්‍රියාකාරි පක්ෂයක් බවට පත්ව තිබිණි. එහෙත් රුක්මන් සේනානායක මහතාගේ එක්සත් ලංකා ජනතා පක්ෂයට අනාගත දේශපාලනය තුළ සාර්ථක ගමනක් යෑමට නොහැකි තැනට පත්ව තිබිණි.

පසුව එක්සත් ජාතික පක්ෂයේ ඉහළ නායකත්වයේ ඇරියුම පිළිගත් රුක්මන් සේනානායක, එක්සත් ලංකා ජනතා පක්ෂය විසුරුවා හැර, නැවත එජාපයට එක් වූයේ කඩුවෙල පැවති එක්සත් ජාතික පක්ෂයේ වේදිකාවට ගොඩ වෙමිනි.

සැබැවින්ම මෙරට ජාතික නායකයකු ලෙස මතු වීමට විශාල ඉඩක් තිබූ රුක්මන් සේනානායක මහතාට එක්සත් ජාතික පක්ෂය තුළින්ම එල්ල වූ කෙනෙහිලිකම් සහ නොතැකීම් නිසා ඒ අවස්ථාව අහිමි විය. එහි ප්‍රතිඵලය වූයේ සේනානායකවරුන්ට මෙරට දේශපාලනය තුළ තිබූ දේශපාලන අවස්ථාව අහිමිව යෑමයි.

 උදිත ගුණවර්ධන

1957දී පර්සි වික්‍රමසිංහ සමස්ත ලංකා ගම් කාරක සභාවේ මුල්ම සභාපති වීමට සමත් විය. 1960දී හක්මන කඹුරුපිටිය වෙනම ආසනයක් ලෙස වෙන් වූ අතර ඒ සමඟ පැවැති 1960 මහ මැතිවරණයෙන් කොමියුනිස්ට් පක්ෂය නියෝජනය කරමින් විපක්ෂය හා ශ්‍රී ලංකා නිදහස් පක්ෂය පරදවා, කඹුරුපිටිය ආසනයේ ප්‍රථම මහජන මන්ත්‍රීවරයා බවට පත් විය. 

කිරින්ද, පුහුල්වැල්ල වලකන්ද මාර්ගයේ ආසන්නයේ පිහිටි ප්‍රතාපවත් මන්දිරය ගැමියන් හඳුන්වන්නේ 'බටදොළ වලව්ව'වශයෙනි. 1865 සමයේ බටදොළ වලව්ව ඉදි කර ඇත්තේ එදා සුදු අධිරාජ්‍ය පාලකයන්ගෙන් වැවිල්ල සඳහා පුහුල්වැල්ලේ ඉඩම් මිල දී ගත් මාටින් අබේවර්ධන වික්‍රමසිංහ මහතාය. ඔවුන් පුහුල්වැල්ලට සංක්‍රමණය වී ඇත්තේ අකුරැස්ස අතුරලිය ප්‍රදේශයේ සිටය. ඔහු කොමියුනිස්ට් පක්ෂයේ නායක දොස්තර එස්.ඒ. වික්‍රමසිංහයගේ නෑ පරපුරේ පුරුකකි. තම පරම්පරාවෙන් අයිති ඉඩමක පුහුල්වැල්ල බාලිකා විදුහල ආරම්භ කළ මාටින් මහතා ගමේ අහිංසක ගැහැනු ළමයින්ගේ අධ්‍යාපනය දියුණු කිරීමට ද මුල් විය.

අපේ කතානායක පර්සි වික්‍රමසිංහ මේ මාටින් අබේවර්ධන වික්‍රමසිංහයන්ගේ පුත්‍රයෙකි. 1918 මාර්තු 24 දින උපන් පර්සි කුඩා කල පටන්ම බුද්ධිපත් කාර්යශූර අයෙක් විය. ගාල්ලේ රිච්මන්ඩ් විදුහ මූලික අධ්‍යාපනය ලද ඔහු පසුව කොළඹ නාලන්දා විදුහලින් ද කුණ්ඩසාලේ කෘෂිකර්ම අභ්‍යාස විදුහලින් වැඩිදුර ඉගැනුම ලැබුවේය.

පර්සි වික්‍රමසිංහ දේශපාලනයට පිවිසියේ 1953දී කිරින්ද පුහුල්වැල්ල ගම් සභාවට කොමියුනිස්ට් පක්ෂයේ වතුකොළ කන්ද කොට්ඨාසයෙන් ඉදිරිපත්ව ජය ගනිමිනි. 1956 කොමියුනිස්ට් පක්ෂයෙන් හක්මන ආසනයට තරග කරන මොහු එහිදී අත් වූයේ පරාජයයි. පසුව 1957දී හෙතෙම සමස්ත ලංකා ගම් කාරක සභාවේ මුල්ම සභාපති වීමට ඔහු සමත් විය. 1960දී හක්මන කඹුරුපිටිය වෙනම ආසනයක් ලෙස වෙන් වූ අතර ඒ සමඟ පැවැති 1960 මහ මැතිවරණයෙන් කොමියුනිස්ට් පක්ෂය නියෝජනය කරමින් විපක්ෂය හා ශ්‍රී ලංකා නිදහස් පක්ෂය පරදවා, කඹුරුපිටිය ආසනයේ ප්‍රථම මහජන මන්ත්‍රීවරයා බවට පත් විය. නැවතත් 1965 මහ මැතිවරණයෙන්ද කොමියුනිස්ට් පක්ෂය නියෝජනය කරමින් කඹුරුපිටිය ආසනයෙන් පාර්ලිමේන්තුවට තේරී පත් වූ පර්සි කඹුරුපිටිය ආසනයට ඇති කළ සංවර්ධන ව්‍යාපෘති රැසකි. යටියන රජයේ උළු කර්මාන්ත ශාලාව, යටියන වී ගබඩාව, යටියන පොහොර ගබඩාව ඔහු ඇති කළ අතර තිහගොඩ, යටියන, පුහුල්වැල්ල, නාරන්දෙණිය විදුහල් ඉතා දියුණු තත්ත්වයට වැඩි දියුණු කළේය.

ගැමියකු අත වූ බුලත් හෙප්පුවකින් විටක් ඒදාගෙන හපමින් ගම වටා පයින් ඇවිද්ද මේ මන්ත්‍රීවරයාට ආසනයේ ඕනෑම පුද්ගලයකුගේ නමින් ආමන්ත්‍රණය කිරීමට තරම් නිරවුල් මතකයක් තිබිණි. ඔහු බොහෝ වේලාවට ගමන් බිමන් ගියේ පාරේ බස් රථයෙනි. 1969 දෙසැම්බර් මුළු ශ්‍රී ලංකාවම බිලි ගත් ගංවතුරින් පසු එවකට සිටි එජාප අගමැති ඩඩ්ලි සේනානායක මහතා යටියන චාරිකාවක නිරත වූ අවස්ථාවේ පර්සි ඔහු හමුවට ගොස්, තම ජනතාව ගංවතුරෙන් විඳි පීඩාව අගමැතිවරයාට පැහැදිලි කළේය. මන්ත්‍රීවරයාගේ මේ ප්‍රකාශය එදා මාධ්‍යවල සහ දේශපාලන කරළියේ පුවත් මැවූ මාතෘකාවක් විය.

1970 මැතිවරණයට ඉදිරිපත් නොවූ ඔහු නැවත කරළියට එන්නේ 1977 මහ මැතිවරණයෙනි. ඒ කොමියුනිස්ට් පක්ෂයෙන් නොව, ශ්‍රී ලංකා නිදහස් පක්ෂයේ අපේක්ෂකයා ලෙසය. එහිදී ඔහු පරාජයට පත් වුවද පසුව කඹුරුපිටිය ශ්‍රී ලංකා නිදහස් පක්ෂ සංවිධායකවරයා ලෙස කටයුතු කළේය. 1982දී පවත්වන මෙරට ප්‍රථම ජනාධිපතිවරණය අවස්ථාවේදී ශ්‍රී ලංකා නිදහස් පක්ෂ අපේක්ෂකයා කඹුරුපිටිය ආසනයෙන් දිනවීමට ඔහුට හැකියාව ලැබිණි. නැවතත් 1983 ලාප්පු-කළගෙඩි ජන මත විචාරණයේදී කඹුරුපිටිය ආසනයෙන් 'කළගෙඩිය'ජයග්‍රහණය කරවා, විරුද්ධ මතය දිනවීමට ඔහුට හැකි වීම සුවිශේෂය.

ධනවතකු ලෙස ඉපදුණු වෙස්සන්තරයකු ලෙස සියල්ල ජනතාවට කැප කර දේශපාලන බිමෙන් ඉවත් වන පර්සි වික්‍රමසිංහ මහතා 1987නොවැම්බර් 26 දින ජීවිතයෙන් සමු ගත්තේ මාතර දිසාවටම දේශපාලන හිස් තැනක් ඉතිරි කරමිනි.

 නන්දික බැද්දේගම

1964 දෙසැම්බර් 03 දින පස්වැනි පාර්ලිමේන්තුවේ රාජාසන කථාව සඳහා වූ ඡන්ද විමසීමේදී ශ්‍රී ලංකා සමසමාජ හවුල් ආණ්ඩුව (සභාග ආණ්ඩුව) පරාජයට පත් විය. ආණ්ඩු පක්ෂයේ මන්ත්‍රීන් 14 දෙනා රාජාසන කතාවට විරුද්ධව ඡන්දය දීම නිසා එක් ඡන්දයකින් එසේ සභාග ආණ්ඩුව පරාජයට පත් වූ අතර 1964 දෙසැම්බර් 08 වැනිදා පාර්ලිමේන්තුව ගරු අගමැතිනී සිරිමාවෝ බණ්ඩාරනායක මැතිනිය විසින් විසිරුවා හරිනු ලැබීය. හයවැනි පාර්ලිමේන්තු මහ මැතිවරණය 1965 මාර්තු 22 දින පැවැත්වීමට දින නියම කෙරිණ. ඒ අනුව පැවැති මැතිවරණයේදී කළුතර දිස්ත්‍රික්කයේ බණ්ඩාරගම ආසනයේ ප්‍රතිඵල මෙසේ විය.

කේ.ඩී.ඩී. පෙරේරා (ශ්‍රීලනිප) 20897

ඩී.සී.ඩබ්. කන්නන්ගර (එජාප) 17476

ආර්.ඒ.කේ. පෙරේරා (මඑපෙ) 504

වැඩි ඡන්ද 3421

ලියාපදිංචි ඡන්ද 45512

එක්සත් ජාතික පක්ෂයේ ඩී.සී. ඩබ්. කන්නන්ගර මහතා මේ අනුව වැඩි ඡන්ද 3421කින් පරාජයට පත්ව තිබිණි. ජයග්‍රාහි කේ.ඩී.ඩී. පෙරේරා මහතාගේ තේරී පත් වීමට විරුද්ධව පරාජිත අපේක්ෂක කන්නන්ගර මහතාගේ නියෝජිතයන් කීප දෙනකු විසින් ශ්‍රේෂ්ඨාධිකරණයේදී ඡන්ද පෙත්සමක් ගොනු කරන ලදි. ඉන් ඉල්ලා සිටියේ ජයග්‍රාහී කේ.ඩී.ඩී. පෙරේරා මහතාගේ නියෝජිතයන් දෙදෙනකු විසින් මැතිවරණ දූෂණවල නිරත වීම නිසා පෙරේරා මහතාගේ පත්වීම අවලංගු කරන ලෙසය. මේ පෙත්සම විභාග කළ ශ්‍රේෂ්ඨාධිකරණය කේ.ඩී.ඩී. පෙරේරා මහතාගේ මන්ත්‍රී ධුරය අහෝසි කරමින් ප්‍රජා අයිතිය ද අහිමි කරනු ලැබීය. ඊට විරුද්ධව කේ.ඩී.ඩී. පෙරේරා මහතා අභියාචනයක් ඉදිරිපත් කළ ද උසාවිය ඒ අභියාචනය ප්‍රතික්ෂේප කර කලින් තීන්දුව අනුමත කළේය. මේ අනුව බණ්ඩාරගම ආසනය සඳහා වූ මන්ත්‍රී ධුරය අහිමි වීම නිසා ඒ වෙනුවෙන් 1967 සැප්තැම්බර් 23 දින අතුරු මැතිවරණයක් පැවැත්වීමට තීරණය විය. ඒ අතුරු මැතිවරණයට ශ්‍රීලනිපයෙන් නැවත වරක් කේ.ඩී.ඩී. පෙරේරා මහතාම ඉදිරිපත් වූ අතර එජාපයෙන් ඉදිරිපත් වූයේ ජෝර්ජ් කොතලාවල මහතාය. ඔහු 1965 මහ මැතිවරණයේදී ලංකා සමසමාජ පක්ෂයේ නායක ආචාර්ය ඇන්.ඇම්. පෙරේරා සමඟ යටියන්තොට ආසනය සඳහා තරග කර පරාජයට පත් බණ්ඩාරගම ප්‍රදේශයේ කොතලාවල පරම්පරාවේ කෙනෙක් විය.

කේ.ඩී.ඩී. පෙරේරා මහතාගේ ආධාරකරුවකු කරන ලද දූෂණයක් නිසා ඔහුට මන්ත්‍රී ධුරය අහිමි වීම ඔහුට නැවත මැතිවරණයකට ඉදිරිපත් වීමට බාධාවක් නොවන බව පක්ෂයේ කොටසක් තර්ක කළ අතර තවත් පිරිසක් ඔහුට ඉදිරිපත් වීමේ සුදුසුකම් නැති බව තර්ක කළේය. මේ අනුව එජාපය මැතිවරණ සටනට අවතීර්ණ වූයේ 'දිනුවත් දිනුම් පැරදුණත් දිනුම්'යන තර්කය සමඟින් ශ්‍රීලනිපයට ඇති වූ මේ සැකය නිසා ප්‍රදේශයේ ශ්‍රීලනි පාක්ෂිකයකු වූ ඊ.ඒ. බණ්ඩාර මහතා ස්වාධීන අපේක්ෂක ලෙස තරගයට ඉදිරිපත් කළේය.

කේ.ඩී.ඩී. පෙරේරා(ශ්‍රීලනිප) 23840

ජෝර්ජ් කොතලාවල (එජාප) 18372

ඊ. ඒ. බණ්ඩාර (ස්වාධීන) 211

වැඩි ඡන්ද 5468

ඉහත ප්‍රතිඵල අනුව කේ.ඩී.ඩී. පෙරේරා මහතා වැඩි ඡන්ද 5468ක් ලබාගනිමින් අතුරු මැතිවරණය ජය ගත්තේය. පරාජයට පත් ජෝර්ජ් කොතලාවල මහතාගේ නියෝජිතයන් දෙදෙනක වූ ඒ.ඩබ්ලිව්.ඒ. කුලරත්න පීරිස් හා පී. සිරිල් පෙරේරා යන මහත්වරු කේ.ඩී.ඩී. පෙරේරා මහතාගේ තේරී පත් වීම අභියෝගයට ලක් කරමින් ශ්‍රේෂ්ඨාධිකරණයට පෙත්සමක් ඉදිරිපත් කළහ. අතුරු මැතිවරණයෙන් බලයට පත් කේ.ඩී.ඩී. පෙරේරාට ප්‍රජා අයිතිය අහිමි කිරීම පිළිබඳ නෛතික ගැටලුවක් ඇති නිසාත් 1965 මැතිවරණ පෙත්සම විභාග කළ ශ්‍රේෂ්ඨාධිකරණය පෙරේරා මහතාගේ නියෝජිතයකු මැතිවරණ දූෂණයක යෙදීමේ ක්‍රියාව ඔප්පු වූ බව ප්‍රකාශ කළ නිසාත් ඒ පිළිබඳ අග්‍රාණ්ඩුකාරවරයාට වාර්තා කිරීමට නියෝග කර ඇති නිසාත් කේ.ඩී.ඩී. පෙ‍රේරා මහතාගේ මන්ත්‍රී ධුරය අහෝසි කොට ඊළඟට වැඩිම ඡන්ද ගත් ජෝර්ජ් කොතලාවල නීත්‍යනුකූල මන්ත්‍රීවරයා ලෙස ප්‍රකාශයට පත් කිරීමේ නියෝගයක් නිකුත් කරන මෙන් එම ඡන්ද පෙත්සමින් ඉල්ලා තිබිණි. මැතිවරණ පෙත්සම් ඉතිහාසයට මෙවැනි න‍ියෝගයක් ඉල්ලූ පෙත්සමක් මෙතෙක් ඉදිරිපත් නොවීම දේශපාලන ක්ෂේත්‍රයේත් නීති ක්ෂේත්‍රයේත් බලවත් අවධානයට මෙය ලක්වීමට හේතු විය.

අග්‍රවිනිශ්චයකාර එච්.එන්.ජී. ප්‍රනාන්දු, සී.ජී. වීරමන්ත්‍රී හා ඒ.එල්.එස්. සිරිමාන්න යන තුන්කට්ටුව හමුවේ මේ නඩුව විභාග විය. ප්‍රවීණ නීතිවේදියකු වූ ආචාර්ය කොල්වින් ආර්. ද සිල්වා මහතා කේ.ඩී.ඩී. පෙරේරා මහතා වෙනු‍වෙන් පෙනී සිටි අතර පෙත්සම්කරුවන් වෙනුවෙන් රාජනීතිඥ එච්. ඩබ්. ජයවර්ධන, රාජනීතිඥ ඒ. සී. ගුණරත්න, ඉසදීන් මොහොමඩ් හා එච්. ඩී. තම්බයියා යන නීතිවේදීහු පෙනී සිටියහ.

විත්ති පක්ෂයෙන් කේ.ඩී.ඩී. පෙරේරාගේ තේරී පත් වීම නීති විරෝධි බවට ප්‍රධාන තර්ක දෙකක් ‍ඉදිරිපත් කෙරිණි. අතුරු මැතිවරණයට කේ.ඩී.ඩී. පෙරේරා ඉදිරිපත් වන විට ඔහුගේ ප්‍රජා අයිතිය අධිකරණය මඟින් අහිමි කර තිබුණේ ද, අහිමි කර තිබුණේ නම් ඔහුට ලැබුණු ඡන්ද අවලංගු ඡන්ද වී ද යන්න හා මැතිවරණ දූෂණයකට වගකිව යුතු පුද්ගලයකු ඒ බව දැනදැනම මැතිවරණයකදී නැවත වරක් අපේක්ෂකයකු ලෙස ඉදිරිපත් වීම සිතාමතාම කරන ලද වැරැද්දක් ද, එසේ නම් මැතිවරණයකදී ඔහු ලැබූ ඡන්ද බල රහිත බවට පත් වන බව ද පෙත්සම්කරුවන්ගේ නීතිඥවරු උසාවියේදී තර්ක කළහ.

පුරා අවුරුදු දෙකක් පමණ තිස්සේ විභාග කළ මේ ඡන්ද පෙත්සමේ තීන්දුව ප්‍රකාශයට පත්කරන ලද්දේ 1969 පෙබරවාරි 22 දින දීය. ප්‍රවීණ නීතිවේදීන් ගණනාවක් දෙපාර්ශ්වයෙන් පෙනී සිටි මේ ඡන්ද පෙත්ස‍ෙම් තීන්දුව කෙරෙහි නීති ක්ෂේත්‍රයේ විශාල පිරිසක් අවධානය යොමු කළ අතර, නඩු තීන්දුව දෙකට එකක් ලෙස බෙදී තිබිණි. අග්‍රවිනිශ්චයකාර එච්.එන්.ජී. ප්‍රනාන්දු හා සී.ජී. වීරමන්ත්‍රී යන විනිසුරුවන්ගේ තීන්දුව වූයේ පෙත්සම්කරුවන්ගේ ඉල්ලීම නීත්‍යනුකූල වන බැවින් ජෝර්ජ් කොතලාවල මහතා බණ්ඩාරගම මන්ත්‍රීවරයා ලෙස පත් කළ යුතු බවය. එහෙත් ඒ.එල්.එස්. සිරිමාන්න විනිසුරුතුමාගේ නිගමනය වූයේ කේ.ඩී.ඩී. පෙරේරා මහතාගේ මන්ත්‍රී ධුරය අහිමි කළත් ජෝර්ජ් කොතලාවල මහතා නීත්‍යනුකූල මන්ත්‍රීවරයා ලෙස අධිකරණය විසින් පත් කිරීම නීත්‍යනුකූල නොවන බවය. අධිකරණයේ බහුතර මතයෙන් මේ අනුව එජාපයේ ජෝර්ජ් කොතලාවල මහතා බණ්ඩාරගම ආසනයේ නීත්‍යනුකූල මන්ත්‍රීවරයා ලෙස අධිකරණය විසින් ප්‍රකාශයට පත් කරනු ලැබීය.

මෙතෙක් ලංකා ඉතිහාසයේ අධිකරණයක් මඟින් මන්ත්‍රීවරයකු පාර්ලිමේන්තු යැවූ එකම අවස්ථාව ජෝර්ජ් කොතලාවල මහතාගේ පත්වීම විය. යටියන්තොටින් පැරදී බණ්ඩාරගමට පැමිණ බණ්ඩාරගමදී ද මැතිවරණයෙන් පරාජය වී අධිකරණ නියෝගයකින් මන්ත්‍රීවරයකු වූ කොතලාවල මහතා 1969 මාර්තු 05 දින පාර්ලිමේන්තු මන්ත්‍රීවරයකු ලෙස දිවුරුම් දුනනේය. ඡන්දයෙන් පැරදුණත් උසාවියෙන් මන්ත්‍රීවරයකු ලෙස පත්වීම ලැබ පාර්ලිමේන්තු යෑමට තරම් ජෝර්ජ් කොතලාවල මහතා වාසනාවන්ත විය.

 සමරසේන මුදලිගේ

රඛීන් ප්‍රාන්තයේ රොහින්ග්‍යා මුස්ලිම් සරණාගතයන් පිළිබඳ ප්‍රශ්නය මුල්කර ගනිමින් මියන්මාර නායිකා සුචීට අන්තර්ජාතික වශයෙන් දැඩි පීඩනයක් එල්ල විය. එහි වර්ග සංහාරයක් සිදු වන බවට නැඟුණු චෝදනා ඇය ප්‍රතික්ෂේප කළාය. රඛීන් ප්‍රාන්තයේ තත්ත්වය වාර්තා කිරීමේදී බටහිර මාධ්‍ය පවා එක් පාර්ශ්වයකට නැඹුරු වන තත්ත්වයක් දිස් විය. දැඩි බලපෑම් හමුවේ වුව ද සුචී රට වෙනුවෙන් දැරූ ස්ථාවරය වෙනස් කළේ නැත. මෙම ප්‍රතිඵලය මඟින් මියන්මාර ජනතාව එය අනුමත කර ඇති බව පැහැදිලි වේ.

මියන්මාරයේ හමුදා පාලනය 2011 වර්ෂයේදී නිමාවට පත් වීමෙන් පසු පැවැති දෙවැනි මැතිවරණය ඉකුත් ඉරිදා පැවැත්විණි. එම මහ මැතිවරණයේ ඡන්ද ගණන් කිරීමේ කටයුතු සිදු වෙමින් ඇති අතර, අවසන් නිල ප්‍රතිඵල තවමත් ප්‍රකාශයට පත් වී නොමැත. කෙසේවුව ද, දැනට ප්‍රකාශ වී ඇති නිල නොවන ප්‍රතිඵල අනුව අවුන්සාන් සුචීගේ ප්‍රජාතන්ත්‍රවාදය සඳහා වන ජාතික ලීගය (NLD) විශිෂ්ට ජයග්‍රහණයක් අත් කර ගෙන ඇති බව පැහැදිලි වේ. එය 2015 දී ඔවුන් ලැබූ ජයග්‍රහණයටත් වඩා වැඩි එකකි.

කොරෝනා වසංගත අභියෝගයට මුහුණ දෙමින් වුව ද මිලියන සංඛ්‍යාත ඡන්ද දායක පිරිසක් ඡන්දය ප්‍රකාශ කර තිබීම වි‍ශේෂ කාරණයකි. ලියාපදිංචි ඡන්ද දායක සංඛ්‍යාව මිලියන 37කි. අපේක්ෂිතයන් 7000කට ආසන්න පිරිසක් මැතිවරණයට තරග කළේ දේශපාලන පක්ෂ 100කට වැඩි ගණනකිනි. මැතිවරණයෙන් ආසන 1171ක් සඳහා නියෝජිතයන් පත් කර ගැනේ. ඒ; පාර්ලිමේන්තුවේ ඉහළ හා පහළ මන්ත්‍රී මණ්ඩල සඳහා මෙන්ම ප්‍රාදේශීය පාලන ඒකක සඳහාය. 2008 දී ව්‍යවස්ථා සංශෝධනය යටතේ සමස්ත ආසන සංඛ්‍යාවෙන් ¼ක් පමණ වෙන්ව ඇත්තේ හමුදා තන්ත්‍රයටය.

කොරෝනා වසංගත තත්ත්වය හේතුවෙන් මැතිවරණය පැවැත්වුණේ සෞඛ්‍ය ආරක්ෂක ක්‍රියාමාර්ග අනුගමනය කරමිනි. වයිරසයේ බලපෑම වැඩි, වැඩිහිටි ප්‍රජාවගේ ආරක්ෂාව වෙනුවෙන් ඔවුන්ට කල් තබා ඡන්දය ප්‍රකාශ කිරීමට අවස්ථාව සලසා තිබිණි. 75 හැවිරිදි වියේ පසුවන අවුන්සාන් සුචී ද කලින් ඡන්දය ප්‍රකාශ කළාය.

විශ්ලේෂකයන්ගේ අදහස

මෙම මහ මැතිවරණය සැලකිය හැකි වන්නේ සුචී හා පාලක පක්ෂයේ ජනප්‍රියත්වය පිළිබඳ ජනමත විචාරණයක් ලෙස බව දේශපාලන විශ්ලේෂකයන්ගේ අදහස විය. පළමු මහ මැතිවරණයටත් වඩා වැඩි බලයක් ඔවුන් වෙත ලැබීමෙන් මියන්මාර ජනතාව එම පාලනය ඉහළින් අනුමත කරන බව පැහැදිලි වේ.

මැතිවරණය නිමා වීමට පත් වීමෙන් පසු ප්‍රජාතන්ත්‍රවාදය සඳහා වන ජාතික ලීගයේ ප්‍රකාශක මියෝ යුන්ට් ප්‍රකාශ කර තිබුණේ, ආණ්ඩුවක් පිහිටුවීමට අවශ්‍ය ආසන සංඛ්‍යාව වන 322ට වඩා ඉතා වැඩි ආසන සංඛ්‍යාවක් ඇය හිමි කර ගනු ඇති බවය. ඡන්ද මධ්‍යස්ථානවල සිටි සිය නියෝජිතයන් සපයා දුන් වාර්තා මඟින් එය පැහැදිලි වන බව ඔහු පවසා තිබේ.

ජනතාවට මෙන්ම පක්ෂයට ද මෙය දිරිගන්වන සුළු මැතිවරණ ප්‍රතිඵලයක් බව ඔහු වැඩිදුරටත් සඳහන් කර තිබිණි.

ප්‍රධාන ප්‍රතිවාදී පක්ෂය

ප්‍රජාතන්ත්‍රවාදය සඳහා වන ජාතික ලීගයේ ප්‍රධාන ප්‍රතිවාදී පක්ෂය එක්සත් සහයෝගිතා හා සංවර්ධන පක්ෂයයි (USDP). ඊට හමුදා තන්ත්‍රයේ සහාය ද හිමි වේ. එම පක්ෂය මෙන්ම තවත් දේශපාලන පක්ෂ ගණනාවක් කොරෝනා වසංගත තත්ත්වය සැලකිල්ලට ගනිමින් මැතිවරණය කල් දමන ලෙසට ඉල්ලා තිබුණි. ඊට ප්‍රතිචාර දක්වමින් සුචී කියා සිටියේ, මැතිවරණය පැවැත්වීම වඩාත් වැදගත් බවය. ඉහළ ප්‍රතිශතයක් ඡන්දය ප්‍රකාශ කිරීමෙන් ද එය පැහැදිලි වේ.

රඛීන් ප්‍රාන්තයේ රොහින්ග්‍යා මුස්ලිම් සරණාගතයන් පිළිබඳ ප්‍රශ්නය මුල්කර ගනිමින් මියන්මාර නායිකා සුචීට අන්තර්ජාතික වශයෙන් දැඩි පීඩනයක් එල්ල විය. එහි වර්ග සංහාරයක් සිදු වන බවට නැඟුණු චෝදනා ඇය ප්‍රතික්ෂේප කළාය. රඛීන් ප්‍රාන්තයේ තත්ත්වය වාර්තා කිරීමේදී බටහිර මාධ්‍ය පවා එක් පාර්ශ්වයකට නැඹුරු වන තත්ත්වයක් දිස් විය. දැඩි බලපෑම් හමුවේ වුව ද සුචී රට වෙනුවෙන් දැරූ ස්ථාවරය වෙනස් කළේ නැත. මෙම ප්‍රතිඵලය මඟින් මියන්මාර ජනතාව එය අනුමත කර ඇති බව පැහැදිලි වේ.

මැතිවරණය අවලංගු විම

ගැටුම් පවතින රඛීන් ප්‍රාන්තය සහ තවත් ප්‍රාන්ත කිහිපයක මැතිවරණය අවලංගු විය. එම ප්‍රදේශවල නිදහස් හා සාධාරණ මැතිවරණයක් පැවැත්වීමට ඇති නොහැකියාව මැතිවරණ කොමිසම මඟින් පෙන්වා දී තිබිණි. රොහින්ග්‍යා මුස්ලිම්වරුන්ට ද ඡන්ද බලය හිමි‍ නොවේ. මේ තත්ත්වය මිලියනයක් පමණ වන පිරිසකට බලපෑ බවට විවේචනාත්මකව පෙන්වා දෙමින් වුව ද යුරෝපා සංගමය හා බ්‍රිතාන්‍ය මැතිවරණය පිළිබඳ ප්‍රශංසාත්මකව අදහස් පළ කළේය. අමෙරිකා රාජ්‍ය ලේකම් මයික් පොම්පියෝ පවසා තිබුණේ මියන්මාරයේ ප්‍රජාතන්ත්‍රීය පරිවර්තනයට අදාළව මෙය වැදගත් පියවරක් බවය. කොටසකට ඡන්දය ප්‍රකාශ කිරීමට අවස්ථාව නොලැබීම හා හමුදා තන්ත්‍රය වෙනුවෙන් ආසන ප්‍රමාණයක් වෙන්ව තිබීම ද අමෙරිකාවේ අවධානයට ලක්ව තිබිණි.

මියන්මාරය වසර 50ක් පමණ මිලිටරි පාලන තන්ත්‍රයක් යටතේ තිබූ රාජ්‍යයකි. සුචී ද දීර්ඝ කාලයක් නිවාස අඩස්සියේ පසු වූ අතර, ඇයට දේශපාලන කටයුතුවල යෙදීමට ඉඩ ලැබුණේ නැත. මෙවැනි පසුබිමක නොබෙල් සාම ත්‍යාගය ද ඇය වෙත පිරිනැමිණි. රොහින්ග්‍යා අර්බුදය මුල්කරගනිමින් එය ආපසු ගත යුතු බවට විවේචන එල්ල වෙද්දී ඇය කියා සිටියේ, අවශ්‍ය නම් එය ආපසු බාර දීමට වුව ද තමන් නොපැකිළෙන බවය. ජන සංහාරයක් සිදු වූ බවට එල්ල වූ චෝදනා හමුවේ සුචී සිය රට වෙනුවෙන් ඉකුත් වසරේදී අන්තර් ජාතික අධිකරණය (ICJ) හමුවේ පෙනී සිටියාය. මියන්මාරය දිගින් දිගටම මෙම චෝදනා ප්‍රතික්ෂේප කරන අතර, ආරක්ෂක අංශ සටන් කරමින් සිටින්නේ ත්‍රස්තවාදීන්ට එරෙහිව බව අවධාරණය කරයි. රඛීන් ප්‍රදේශයේ ගැටුම් හේතුවෙන් බංග්ලාදේශයට පලා ගොස් ඇති සරණාගතයන් සංඛ්‍යාව 700,000ට වැඩි බව එක්සත් ජාතීන්ගේ අධිකරණය ඉදිරියේදී අවුන්සාන් සුචී පැහැදිලිව කියා සිටියේ, තම රටට එරෙහිව එල්ල වන මෙම චෝදනා අසම්පූර්ණ මෙන්ම නොමඟ යවන සුළු ඒවා බවය.

ජනාධිපතිවරයා තෝරා ගැනීම

මැතිවරණයෙන් බලයට පත් වන ආණ්ඩුවේ කාලසීමාව වසර 5කි. පාර්ලිමේන්තුවේ ඉහළ හා පහළ මන්ත්‍රී මණ්ඩලවල බහුතර ඡන්දයෙන් ජනාධිපතිවරයා තෝරා ගැනීම සිදු වේ. දැනට ගණන් බලා ඇති පරිදි මැතිවරණයෙන් පාලක, ප්‍රජාතන්ත්‍රය සඳහා වන ජාතික ලීගයට 2/3 බලයක් හිමි වීමට ඉඩ තිබේ.

වාර්ගික පදනමකින් නිර්මාණය වූ කුඩා දේශපාලන පක්ෂ ද මැතිවරණය සඳහා තරග කළහ. ඔවුන්ට හිමි කර ගත හැකි වූයේ, ආසන සුළු සංඛ්‍යාවක් පමණි. බෙදුම්වාදී ත්‍රස්තවාදී කණ්ඩායම් සමඟ සටන් කරන අතර, කොරෝනා වයිරසය සමඟ ද සටන් කිරීමට මියන්මාරයට සිදු වීම එරට ජනජීවිතය කෙරෙහි බලපෑම් ඇති කර ඇත. ආර්ථික අභියෝග ජය ගැනීමට ද එරටට සිදුව තිබේ. නව රජය බලයට පත් වීමෙන් පසුව ප්‍රමුඛතා වශයෙන් තිබෙනු ඇත්තේ ද මෙවැනි අභියෝග ජය ගැනීමය.

ප්‍රජාතන්ත්‍රවාදය තහවුරු වූ පරිසරයක සිය අපේක්ෂා ඉටු කර ගැනීම කෙරෙහි මියන්මාර ජනතාව සිය නායිකා අවුන් සාන් සුචී සහ ඇයගේ දේශපාලන පක්ෂය කෙරෙහි බලවත් විශ්වාසයක් තබා ඇති බව මේ මැතිවරණ ප්‍රතිඵලය මඟින් ප්‍රකාශයට පත් වන පණිවිඩයයි. එක් අතකින් එය එරටට බලපෑම් කරන බාහිර ප්‍රජාවට ද වැදගත්ය. එමෙන්ම සුචී සහ ඇයගේ පක්ෂයට ද වැදගත්ය. එය සුචීට සහ පාලන පක්ෂයට වැදගත් වන්නේ ජනතාව තමන් කෙරෙහි රඳවා ඇති විශ්වාසය ආරක්ෂා කරගනිමින් ඔවුන්ගේ ද රටේ ද අපේක්ෂා සැබෑ කරගැනීම ඔවුන් වෙත පැවරී ඇති නිසාය.

ඇතැම් විශ්ලේෂකයන් පෙන්වා දෙන පරිදි අඩසියවසක් පමණ මිලිටරි පාලනය යටතේ පැවැති රාජ්‍යයක ප්‍රජාතන්ත්‍රවාදී මැතිවරණයක් පැවැත්වීමට හැකිවීමම සාධනීය කාරණයකි. ඒ අර්ථයෙන් මෙය, දෙවැනි මහ මැතිවරණයයි. මේ දක්වා සතුටුදායක දුරක් පැමිණීමට ද එරටට හැකි වී ඇත. එය තවදුරටත් ශක්තිමත් කර ගනිමින් ඉදිරියට යැමට අවශ්‍ය ශක්තිය දීම මිස එකී ගමනට අවහිර ඇති කිරීම ඔවුන් බාහිර පාර්ශ්වවලින් අපේක්ෂා නොකරනු ඇත. එසේම, අන් සියලු ස්වෛරී රාජ්‍ය මෙන්ම මියන්මාරය ද සිය රාජ්‍ය දුර්වල කිරීමට හෝ බෙදා වෙන් කිරීමට කවර පාර්ශවයකට හෝ ඉඩ නොහරිනු ඇත. එම මූලික අභිලාසයන්ට එකඟව සෙසු ජනකොටස් ද සමඟ එරට ඔසවා තැබීම ඔවුන් ඉදිරිපිට ඇති අභියෝගයකි. යකඩ ගැහැනියක ලෙස අභියෝග මැදින් නැඟුනු සුචී, එකී අභියෝගවලට ද නොසැලී මුහුණ දෙනවා ඇත.

ධම්මික සෙනෙවිරත්න